punt (a): ir-rotta proposta tgħaqqad erba' Stati Membri u s-Serbja;

punt (b): l-implimentazzjoni tar-rotta prinċipali proposta tal-kuritur

sa fejn huma kkonċernati l-Istati Membri, għal ħafna mit-tul tagħha tuża linji li huma parti min-netwerk ewlieni tat-TEN-T, u fir-rigward tas-Serbja, in-netwerk ewlieni indikattiv (3). Is-sezzjonijiet l-oħra previsti għall-implimentazzjoni tar-rotta prinċipali huma parti min-netwerk komprensiv. Barra minn hekk, il-parti ċentrali tal-kuritur C11 tar-RNE jinkludi r-rotta ewlenija tal-kuritur ferrovjarju tal-merkanzija propost minn Salzburg għall-fruntiera bejn il-Bulgarija u t-Turkija;

punt (e): il-kuritur propost se jikkomplementa l-kurituri ferrovjarji tal-merkanzija eżistenti fir-reġjun Ewropew tax-Xlokk, b'mod partikolari billi jagħti aċċess għal reġjuni li s'issa mhumiex koperti min-netwerk ta' kurituri ferrovjarji tal-merkanzija. Se jipprovdi wkoll rotta alternattiva għal żewġ kurituri ferrovjarji tal- merkanzija eżistenti, li huma l-kurituri ferrovjarji tal-merkanzija bejn l-Orjent u l-Mediterran tal-Lvant, u bejn ir-Renu u d-Danubju, li se ssaħħaħ l-għażliet għal ġestjoni ta' kontinġenza bejn il-kurituri bbażata fuq ir-rotot addizzjonali ta' devjazzjoni, u għaldaqstant tissaħħaħ ir-reżiljenza tal-merkanzija ferrovjarja, b'mod partikolari f'każ ta' interuzzjonijiet kbar;

punt (f): ir-rotta proposta hija assi ferrovjarja ewlenija għall-merkanzija fir-reġjun tal-Balkani tal-Punent. Fil-passat, tul il-kuritur kienu jintbagħtu volumi sinifikament ogħla mill-volumi ta' merkanzija attwali stmati fis-sezzjonijiet li jintużaw l-iktar. Fil-fatt, hemm potenzjal importanti biex jiġi żviluppat it-trasport ferrovjarju tal-merkanzija, bħal bidla modali jew żvilupp tal-volumi ġenerali tat-trasport, għaż-żewġ sottoswieq li jista' jservi l-kuritur ferrovjarju tal-merkanzija bejn l-Alpi u l-Balkani tal-Punent: minn naħa, it-trasport tal-merkanzija bejn ir-reġjuni moqdi direttament mill-kuritur u bejn dawn ir-reġjuni u partijiet oħra tal-Ewropa, u min-naħa l-oħra, it-trasport tal-merkanzija li jgħaddi matul il-kuritur kollu. B'mod partikolari, il-kuritur jista' jaqdi d-domanda evidenti għas-servizzi ferrovjarji tal-merkanzija intermodali bejn l-Unjoni u t-Turkija;

punt (g): il-kuritur se joħloq il-bażi għal interkonnessjonijiet aħjar bejn l-Istati Membri u l-pajjiżi terzi Ewropej peress li se jinkludi s-Serbja u jiffaċilita l-konnessjoni mat-Turkija fil-fruntiera bejn il-Bulgarija u t-Turkija, billi jipprovdi rabta diretta bejn l-Ewropa tal-Punent/l-Ewropa Ċentrali u t-Turkija;

punt (h): tul is-sajf tal-2017, l-applikanti potenzjali ġew ikkonsultati dwar l-istabbiliment tal-kuritur ferrovjarju tal-merkanzija bejn l-Alpi u l-Balkani tal-Punent. Kif dokumentat fl-Anness III tal-ittra ta' intenzjoni, 20 kumpanija esprimew l-appoġġ tagħhom. Fost dawk l-impriżi, 13 kienu impriżi ferrovjarji, tlieta kienu operaturi intermodali, tlieta kienu spedizjoniera tal-merkanzija u wieħed kien sid ta' vettura;

punt (i): il-kuritur propost jagħti aċċess dirett għat-terminals ewlenin tal-Istati Membri kkonċernati. Interfaċċi intermodali max-xmajjar Danubju u Sava jingħataw f'postijiet differenti. Barra minn hekk, jingħata aċċess għall-portijiet tal-baħar, b'mod partikolari l-portijiet ta' Koper u ta' Rijeka, permezz tal-konnessjoni ma' kurituri ferrovjarji tal-merkanzija oħrajn.