ANNESS

ELEMENTI ESSENZJALI TAL-ISTATUTI TAL-EU-OPENSCREEN ERIC

L-Artikoli u l-paragrafi li ġejjin tal-Artikoli tal-Istatuti tal-EU-OPENSCREEN ERIC jipprevedu l-elementi essenzjali skont l-Artikolu 6(3) tar-Regolament (KE) Nru 723/2009

1. Kompiti u Attivitajiet

(Artikolu 3 tal-Istatuti tal-EU-OPENSCREEN ERIC)

L-EU-OPENSCREEN ERIC għandu jistabbilixxi, jopera u jiżviluppa infrastruttura ta' riċerka distribwita Ewropea magħmula minn pjattaformi ta' skrinjar, kif ukoll faċilitajiet tal-kimika u tal-bijoloġija, sabiex jiġi ffaċilitat l-aċċess għar-riżorsi, l-għodod u l-faċilitajiet għar-riċerkaturi u biex tiġi appoġġata riċerka ta' kwalità għolja fuq il-mekkaniżmi molekulari ta' proċessi bijoloġiċi.

2.	L-EU-OPENSCREEN ERIC għandu jopera l-infrastruttura fuq bażi nonekonomika. L-EU-OPENSCREEN ERIC jista' jwettaq attivitajiet ekonomiċi limitati, bil-kundizzjoni li dawn ikunu marbuta mill-qrib mal-kompitu prinċipali tagħha u li ma jippreġudikawx il-kisba tiegħu.

Sabiex jissodisfa l-kompiti tiegħu, l-EU-OPENSCREEN ERIC għandu jwettaq u jikkoordina attivitajiet, li jinkludu iżda li mhux limitati għal:

(a)	l-iżvilupp, il-bini u ż-żamma ta' Librerija Ewropea tal-Kimika u tal-Bijoloġija għall-Komposti;

(b)	l-iżvilupp, l-bini u ż-żamma ta' Bażi tad-Dejta Ċentrali għar-riżultati tal-iskrining;

(c)	il-bini u ż-żamma ta' Uffiċċju Ċentrali għall-koordinazzjoni ta' attivitajiet;

(d)	l-organizzazzjoni u l-koordinazzjoni ta' servizzi ta' infrastruttura ta' kwalità għolja appoġġati minn proċeduri armonizzati u standards ta' kwalità;

(e)	l-għoti ta' aċċess effettiv tar-riżorsi u s-servizzi tal-EU-OPENSCREEN ERIC u s-Siti Sħab tiegħu lir-riċerkaturi, skont ir-regoli definiti f'dawn l-Istatuti;

(f)	l-istabbiliment ta' kollaborazzjoni ma' infrastrutturi ta' riċerka Ewropej u internazzjonali oħra sabiex jaqdi lill-komunità tar-riċerka fi kwistjonijiet ta' riċerka interdixxiplinari;

(g)	it-tixrid tal-għodod u d-dejta għall-użu tal-pubbliku;

(h)	l-involviment fi skambju mal-industrija rilevanti mingħajr preġudizzju għall-Artikolu 3(2) tar-Regolament (KE) Nru 723/2009.

2. Sede statutorja tal-EU-OPENSCREEN ERIC

(Artikolu 1(2) tal-Istatuti tal-EU-OPENSCREEN ERIC)

Is-sede statutorja tal-EU-OPENSCREEN ERIC għandha tkun f'Berlin, il-Ġermanja.

3. Isem

(Artikolu 1(1) tal-Istatuti tal-EU-OPENSCREEN ERIC)

L-Infrastruttura Ewropea ta' Pjattaformi Miftuħa ta' Skrinjar għall-Bijoloġija Kimika, “EU-OPENSCREEN” ġiet stabbilita. L-EU-OPENSCREEN għandu jkollha forma legali ta' Konsorzju għal Infrastruttura Ewropea ta' Riċerka (ERIC)), minn issa 'l quddiem imsejjaħ bħala “EU-OPENSCREEN ERIC”.

4. Durata

(l-Artikolu 28(1) tal-Istatuti tal-EU-OPENSCREEN ERIC)

L-EU-OPENSCREEN ERIC għandu jeżisti għal perjodu ta' żmien indefinit.

5. Stralċ

(Mill-Artikolu 28(2) sa 28(5) tal-Istatuti tal-EU-OPENSCREEN ERIC)

1.	L-istralċ tal-EU-OPENSCREEN ERIC għandu jsegwi deċiżjoni mill-Assemblea tal-Membri skont l-Artikolu 14(6) jew meta n-numru ta' membri jkun inqas mill-minimu stabbilit fl-Artikolu 9 tar-Regolament (KE) Nru 723/2009.

2.	Mingħajr dewmien bla bżonn u fi kwalunkwe eventwalità fi żmien għaxart ijiem mill-adozzjoni tad-deċiżjoni biex jiġi stralċat l-EU-OPENSCREEN ERIC, l-EU-OPENSCREEN ERIC għandu jinnotifika lill-Kummissjoni Ewropea dwar id-deċiżjoni.

3.	L-assi li jibqgħu wara l-ħlas tad-djun tal-EU-OPENSCREEN ERIC għandhom jitqassmu bejn il-Membri u l-Osservaturi fil-waqt tax-xoljiment b'mod proporzjonali skont il-kontribuzzjonijiet annwali tagħhom akkumulati għall-EU-OPENSCREEN ERIC.

4.	L-EU-OPENSCREEN ERIC għandu jieqaf jeżisti fil-jum li fih il-Kummissjoni Ewropea tippubblika n-notifika korrispondenti f'Il-Ġurnal Uffiċjali tal-Unjoni Ewropea.

6. Obbligazzjoni

(l-Artikolu 20 tal-Istatuti tal-EU-OPENSCREEN ERIC)

1.	L-obbligazzjoni tal-Membri u tal-Osservaturi għad-djun tal-EU-OPENSCREEN ERIC għandha tkun limitata għall-kontribuzzjonijiet rispettivi tagħhom.

2.	L-EU-OPENSCREEN ERIC għandu jkollu assigurazzjoni xierqa u proporzjonata li tkopri r-riskji speċifiċi għall-bini u għall-operat tal-EU-OPENSCREEN ERIC.

7. Politika tal-Aċċess

(Artikolu 22 tal-Istatuti tal-EU-OPENSCREEN ERIC)

1.	L-EU-OPENSCREEN ERIC għandu jagħti aċċess tas-servizzi u tar-riżorsi lill-Utenti skont il-politika stabbilita fl-Anness 3 tal-Istatuti.

2.	Għandu jkun hemm kategoriji differenti ta' Utenti. L-Assemblea tal-Membri għandha tiddeċiedi t-tariffi differenti u l-kamp ta' applikazzjoni tal-aċċess għal dawn il-kategoriji.

8. Politika tal-Evalwazzjoni Xjentifika

(Artikolu 17 tal-Istatuti tal-EU-OPENSCREEN ERIC)

1.	Il-Bord Konsultattiv Xjentifiku u Etiku għandu jkun magħmul minn xjentisti indipendenti u rikonoxxuti internazzjonalment u/jew minn esperti li jaġixxu fuq it-titolu personali tagħhom.

2.	Il-Bord Konsultattiv Xjentifiku u Etiku għandu joffri pariri dwar il-kwistjonijiet kollha, inklużi mistoqsijiet etiċi mitluba mill-Assemblea tal-Membri. Għandhom jiġu stipulati iktar dettalji fir-Regoli ta' Proċedura.

3.	L-Assemblea tal-Membri għandha taħtar lill-membri tal-Bord Konsultattiv Xjentifiku u Etiku għal tliet snin. L-Assemblea tal-Membri tista' terġa taħtarhom għal darba oħra għall-istess tul ta' żmien.

9. Politika tat-Tixrid

(Artikolu 24 tal-Istatuti tal-EU-OPENSCREEN ERIC)

L-utenti tas-servizzi u r-riżorsi tal-EU-OPENSCREEN ERIC għandhom jagħmlu disponibbli pubblikament ir-riżultati tar-riċerka tagħhom fil-Bażi tad-Dejta Ċentrali tal-EU-OPENSCREEN ERIC wara l-perjodu ta' grazzja ta' sentejn. Jekk tintalab, tista' tingħata estensjoni sa massimu ta' tliet snin. Minkejja dan, id-drittijiet u l-obbligi eżistenti għandhom ikunu rispettati.

10. Drittijiet tal-Proprjetà Intellettwali

(Artikolu 25 tal-Istatuti tal-EU-OPENSCREEN ERIC)

1.	It-terminu proprjetà intellettwali għandu jinftiehem skont l-Artikolu 2 tal-konvenzjoni li tistabbilixxi l-Organizzazzjoni Dinjija tal-Proprjetà Intellettwali ffirmata fl-14 ta' Lulju 1967.

2.	L-EU-OPENSCREEN ERIC jista' jkun sid ta' proprjetà intellettwali kull meta l-kontribuzzjoni tal-EU-OPENSCREEN ERIC tkopri l-proċess ta' innovazzjoni. Iktar dettalji fir-rigward tal-politika ta' proprjetà intellettwali għandhom jiġu stipulati fl-Anness 4 tal-Istatuti u fir-Regoli ta' Proċedura.

L-introjtu ġġenerat mill-proprjetà intellettwali prodotta mill-EU-OPENSCREEN ERIC għandu jintuża għall-operazzjonijiet tal-EU-OPENSCREEN ERIC sa livell limitu stabbilit fir-Regoli ta' Proċedura. L-użu tal-introjtu ogħla minn dan il-livell limitu għandu jkun soġġett għal deċiżjoni tal-Assemblea tal-Membri.

L-ebda dispożizzjoni f'dawn l-Istatuti ma jenħtieġ li tinftiehem li qed tfittex li tibdel il-kamp ta' applikazzjoni u l-applikazzjoni tad-drittijiet tal-proprjetà intellettwali u l-ftehimiet dwar il-kondiviżjoni tal-benefiċċji kif inhu determinat fil-liġijiet u fir-regolamenti rilevanti tal-Membri u tal-Osservaturi u l-ftehimiet internazzjonali li jagħmlu parti minnhom.

11. Politika tal-Impjiegi

(Artikolu 26 tal-Istatuti tal-EU-OPENSCREEN ERIC)

L-EU-OPENSCREEN ERIC għandu jkun impjegatur li jħaddan politika ta' opportunitajiet indaqs. Għal kull pożizzjoni vakanti, l-EU-OPENSCREEN ERIC għandu jagħżel lill-aħjar kandidat. Il-politika tal-impjiegi tal-EU-OPENSCREEN ERIC għandha tiġi irregolata mil-liġijiet tal-pajjiż li fih huwa impjegat il-persunal.

2.	Il-proċeduri tal-għażla għall-pożizzjonijiet bħala persunal tal-EU-OPENSCREEN ERIC għandhom ikunu trasparenti u nondiskriminatorji, filwaqt li għandhom jirrispettaw l-opportunitajiet indaqs. Ir-reklutaġġ u l-impjiegi ma għandhomx ikunu diskriminatorji.

12. Politika tal-Akkwist

(Artikolu 27(1)(2) tal-Istatuti tal-EU-OPENSCREEN ERIC)

L-EU-OPENSCREEN ERIC għandu jittratta lill-kandidati u lill-offerenti għall-akkwist b'mod ugwali u mhux diskriminatorju, indipendentament minn jekk humiex ibbażati fl-Unjoni Ewropea jew le. L-akkwisti għandhom jirrispettaw il-prinċipji tat-trasparenza, in-nondiskriminazzjoni u l-kompetizzjoni. L-akkwist pubbliku tal-innovazzjoni jista' jsir kriterju. Għandhom jiġu stipulati d-dettalji fir-Regoli ta' Proċedura.

L-akkwist mis-Siti Sħab kif definit fl-Artikolu 11 tal-Istatuti għandu jirrispetta l-bżonnijiet, ir-rekwiżiti tekniċi u l-ispeċifikazzjonijiet tal-EU-OPENSCREEN ERIC maħruġa mill-korpi rilevanti. Għandhom jiġu stipulati iktar dettalji fir-Regoli ta' Proċedura. Il-ftehim bejn Sit Sieħeb u l-EU-OPENSCREEN ERIC għandu jkollu dispożizzjoni skont dan.