(7)

Il-Kummissjoni rċeviet mill-partijiet elenkati fit-Tabelli 1 u 3 hawn taħt it-talbiet għal eżenzjoni bl-informazzjoni kollha meħtieġa sabiex tiddetermina li dawn kienu ammissibbli skont l-Artikolu 4(1) tar-Regolament (KE) Nru 88/97.

(8)

Il-partijiet li talbu eżenzjoni ngħataw possibbiltà li jippreżentaw l-osservazzjonijiet tagħhom dwar il-konklużjonijiet tal-Kummissjoni dwar l-ammissibbiltà tat-talbiet tagħhom.

(9)

Skont l-Artikolu 5(1) tar-Regolament (KE) Nru 88/97 sakemm tittieħed deċiżjoni dwar il-mertu tat-talbiet mill-partijiet li qed jitolbu eżenzjoni, il-pagament tad-dazju estiż fir-rigward ta' kull importazzjoni ta' partijiet essenzjali tar-roti ddikjarati għaċ-ċirkolazzjoni libera minn dawn il-partijiet ġie sospiż mid-data li fiha l-Kummissjoni rċeviet it-talbiet tagħhom.

(10)

L-eżaminazzjoni tal-mertu tat-talbiet mill-partijiet elenkati fit-Tabella 1 hawn taħt ġiet konkluża.

Tabella 1

(11)

Matul l-eżaminazzjoni l-Kummissjoni stabbiliet li l-valur tal-partijiet li joriġinaw fiċ-Ċina jikkostitwixxu inqas minn 60 % tal-valur totali tal-partijiet tar-roti kollha assemblati minn kull waħda minn dawn il-partijiet. Dan kien ukoll il-każ għall-biċċa l-kbira tar-roti assemblati minn kull parti.

(12)

Konsegwentement, l-operazzjonijiet ta' assemblaġġ tagħhom jaqa' barra l-kamp ta' applikazzjoni tal-Artikolu 13(2) tar-Regolament (UE) 2016/1036.

(13)

Għal din ir-raġuni, u skont l-Artikolu 7(1) tar-Regolament (KE) Nru 88/97, il-partijiet elenkati fit-Tabella 1 hawn fuq jenħtieġ li jiġu eżentati mid-dazju estiż.

(14)

F'konformità mal-Artikolu 7(2) tar-Regolament (KE) Nru 88/97, l-eżenzjonijiet jidħlu fis-seħħ mid-dati tal-wasla tat-talbiet. Id-dejn doganali fir-rigward tad-dazju estiż mill-partijiet li qed jitolbu eżenzjoni għandu għalhekk jitqies null mill-istess data.

(15)

Il-partijiet li qed jitolbu eżenzjoni ġew infurmati bil-konklużjonijiet tal-Kummissjoni dwar il-merti tat-talbiet tagħhom u ngħataw opportunità biex jikkummentaw fuqhom.

(16)

Peress li l-eżenzjonijiet japplikaw biss għall-partijiet speċifikament imsemmija fit-Tabbela 1 hawn fuq, il-partijiet eżentati għandhom jinnotifikaw lill-Kummissjoni (7) mingħajr dewmien dwar kull tibdil fihom (pereżempju, wara li jinbidel l-isem, il-forma legali jew l-indirizz jew wara lil jitwaqqfu entitajiet ġodda).

(17)

F'każ ta' bidla fir-referenzi, il-parti jenħtieġ li tipprovdi l-informazzjoni rilevanti kollha, b'mod partikolari dwar kull modifika fl-attivitajiet tagħha marbuta ma' operazzjonijiet ta' assemblaġġ. Fejn xieraq, il-Kummissjoni se taġġorna r-referenzi għal tali parti.

(18)

Il-partijiet eżentati elenkati fit-Tabella 2 hawn taħt innotifikaw lill-Kummissjoni dwar il-bidliet fir-referenzi tagħhom (l-ismijiet, il-forom ġuridiċi jew l-indirizzi). Il-Kummissjoni, wara li eżaminat l-informazzjoni mressqa, ikkonkludiet li dawn il-bidliet bl-ebda mod ma jaffettwaw l-operazzjonijiet ta' assemblaġġ fir-rigward tal-kundizzjonijiet ta' eżenzjoni stabbiliti fir-Regolament (KE) Nru 88/97.

(19)

Filwaqt li l-eżenzjoni ta' dawn il-partijiet mid-dazju estiż awtorizzata skont l-Artikolu 7(1) tar-Regolament (KE) Nru 88/97 tibqa' mhux affettwata, ir-referenzi għal dawn il-partijiet jenħtieġ li jiġu aġġornati.

Tabella 2

(20)

L-eżaminazzjoni tal-mertu tat-talba mill-partijiet elenkati fit-Tabella 3 hawn taħt tinsab għaddejja. Sakemm tittieħed deċiżjoni dwar il-mertu tat-talbiet mingħand dawn il-partijiet il-pagament tad-dazju estiż huwa sospiż.

(21)

Billi s-suspensjonijiet se japplikaw biss għall-partijiet speċifikament imsemmija fit-Tabella 3 ta' hawn, jenħtieġ li dawn il-partijiet jinnotifikaw lill-Kummissjoni (7) minnufih, dwar kwalunkwe bidla f'dawn (pereżempju wara bidla fl-isem, fil-forma ġuridika jew fl-indirizz jew wara t-twaqqif ta' entitajiet ġodda ta' assemblaġġ).

(22)

F'każ ta' bidla fir-referenzi, il-parti jenħtieġ li tipprovdi l-informazzjoni rilevanti kollha, b'mod partikolari dwar kull modifika fl-attivitajiet tagħha marbuta ma' operazzjonijiet ta' assemblaġġ. Fejn xieraq, il-Kummissjoni se taġġorna r-referenzi għal tali parti.

Tabella 3

(23)

Is-sospensjoni tal-pagamenti tad-dazji għal partijiet li qed jiġu eżaminati jenħtieġ li titneħħa għall-parti elenkata fit-Tabella 4 hawn taħt.

Tabella 4

(24)

Il-Kummissjoni rċeviet mill-parti kkonċernata talba biex tirtira l-applikazzjoni għal eżenzjoni meta l-eżami tal-merti tagħha kienet għadha għaddejja u l-pagament tad-dazju estiż kien sospiż.

(25)

Il-Kummissjoni aċċettat l-irtirar u konsegwentement is-sospensjoni tal-pagament tad-dazju estiż jenħtieġ li titneħħa. Id-dazju estiż għandu jinġabar mid-data tal-wasla tat-talba għal eżenzjoni mressqa minn din il-parti, li hija d-data li fiha daħlet fis-seħħ is-sospensjoni (23 ta' Settembru 2016).

(26)

Il-parti ġiet informata bil-konklużjonijiet tal-Kummissjoni u ngħata opportunità tikkummenta dwarhom. Ma tressaq l-ebda kumment qabel l-iskadenza.

(27)

Il-parti eżentata elenkata fit-Tabella 5 hawn taħt nnotifikat lill-Kummissjoni bl-għeluq tal-attivitajiet tagħha u bir-rinunzja għall-eżenzjoni mill-pagament tad-dazju estiż.

(28)

Konsegwentement, skont il-prinċipju ta' amministrazzjoni tajba, l-awtorizzazzjoni ta' eżenzjoni mill-pagament tad-dazju estiż jenħtieġ li tiġi revokata.

Tabella 5