(1)

B'deċiżjonijiet tal-14 ta' Diċembru 2009 (2) (“Deċiżjoni ta' Ristrutturar”), il-Kummissjoni ddikjarat għadd ta' miżuri ta' għajnuna mill-Istat (3) konċessi lir-Royal Bank of Scotland (“RBS”) bħala kompatibbli mas-suq intern. Il-konklużjoni ntlaħqet abbażi tal-pjan ta' ristrutturar (“Pjan ta' Ristrutturar”) u tal-impenji (“Impenji”) maħruġa mill-Gvern tar-Renju Unit (“l-awtoritajiet tar-Renju Unit”).

(2)

Permezz ta' deċiżjoni tad-9 ta' April 2014 (4) (“Deċiżjoni ta' Ristrutturar Emendata”), il-Kummissjoni ddikjarat li l-lista emendata notifikata tal-impenji (5) (“Impenji Emendati”) ma tikkostitwixxix għajnuna mill-Istat. L-Impenji Emendati wkoll ma jaffettwawx il-konklużjoni milħuqa fid-Deċiżjoni ta' Ristrutturar, li l-għajnuna mill-Istat ipprovduta lir-RBS hija kompatibbli mas-suq intern abbażi tal-Artikolu 107(3)(b) tat-Trattat dwar il-Funzjonament tal-Unjoni Ewropea (TFUE).

(3)

Minn mindu ġiet adottata d-Deċiżjoni ta' Ristrutturar Emendata, is-servizzi tal-Kummissjoni, l-awtoritajiet tar-Renju Unit u r-RBS (direttament jew permezz tal-Fiduċjarju ta' Monitoraġġ maħtur skont id-Deċiżjoni ta' Ristrutturar) kellhom skambji frekwenti, f'għamla ta' laqgħat, sejħiet ta' konferenza u skambju ta' ittri elettroniċi u dokumenti.

(4)

Fis-17 ta' Frar 2017, Her Majesty's Treasury (“HMT”) ħabbar pubblikament li kien beħsiebu jitlob emenda formali biex jiġi ssostitwit l-impenn li jċedi n-negozju Rainbow (6) b'pakkett ta' miżuri li jkollhom l-għan li tiżdied il-kompetizzjoni fis-suq bankarju SME u ta' daqs medju (7) (“suq bankarju SME u ta' daqs medju”).

(5)

Permezz ta' ittra tat-2 ta' Marzu 2017, l-awtoritajiet tar-Renju Unit innotifikaw lill-Kummissjoni t-talba formali biex jiġi ssostitwit l-impenn li jċedi 'l hekk imsejjaħ negozju Rainbow, kif identifikat fid-Deċiżjoni ta' Ristrutturar (8) u sussegwentement emendat fid-Deċiżjoni ta' Ristrutturar Emendata (9).

(6)

Permezz ta' ittra tal-4 ta' April 2017 (“Deċiżjoni ta' Ftuħ”), il-Kummissjoni infurmat lill-awtoritajiet tar-Renju Unit li kienet iddeċidiet li tagħti bidu għall-proċedura stipulata fl-Artikolu 108(2) tat-TFUE fir-rigward ta' din it-talba.

(7)

Fil-5 ta' Mejju 2017, id-Deċiżjoni ta' Ftuħ ġiet ippubblikata f'Il-Ġurnal Uffiċjali tal-Unjoni Ewropea (10). Il-Kummissjoni talbet lill-partijiet interessati jippreżentaw il-kummenti tagħhom.

(8)

Fit-8 ta' Mejju 2017, l-awtoritajiet tar-Renju Unit issottomettew ir-risposta tagħhom għad-Deċiżjoni ta' Ftuħ.

(9)

Tul Mejju u Ġunju 2017, il-Kummissjoni rċeviet kummenti minn partijiet interessati. Saru laqgħat ma' xi partijiet interessati biex jiġu kkjarifikati l-kummenti rċevuti. Il-Kummissjoni pprovdiet lill-awtoritajiet tar-Renju Unit il-kummenti rċevuti mill-partijiet interessati.

(10)

Fit-22 ta' Ġunju 2017, l-awtoritajiet tar-Renju Unit issottomettew ir-riposta tagħhom għall-kummenti rċevuti mill-partijiet interessati u għall-kummenti rċevuti fil-qafas tal-eżerċizzju ta' ttestjar tas-suq tal-awtoritajiet tar-Renju Unit infushom (11).

(11)

Permezz ta' ittra tat-28 ta' Lulju 2017, l-awtoritajiet tar-Renju Unit bagħtu notifika aġġornata lill-Kummissjoni li tirrifletti aġġornament rigward il-pakkett alternattiv propost fin-notifika oriġinali tat-2 ta' Marzu 2017.

(12)

Billi fid-29 ta' Marzu 2017, ir-Renju Unit innotifika li beħsiebu joħroġ mill-Unjoni Ewropea, b'konformità mal-Artikolu 50 tat-Trattat tal-Unjoni Ewropea, it-Trattati mhux se jibqgħu japplikaw għar-Renju Unit mid-data li fiha jidħol fis-seħħ il-ftehim dwar l-irtirar jew, jekk dan ma jsirx, wara sentejn min-notifika, sakemm il-Kunsill Ewropew, bi qbil mar-Renju Unit, ma jiddeċidix li jestendi dan il-perjodu. Minħabba f'hekk, u mingħajr preġudizzju għal kwalunkwe dispożizzjoni tal-ftehim dwar l-irtirar, din id-Deċiżjoni tapplika biss sakemm ir-Renju Unit jibqa' Stat Membru.

(13)

Ibbażat f'Edinburgh, ir-RBS (12) huwa wieħed mill-ikbar gruppi fil-qasam tas-servizzi finanzjarji fl-Ewropa u jipprovdi servizzi lil klijenti privati, korporattivi u istituzzjonali. Fl-aħħar tal-2016, kellu karta tal-bilanċ b'total ta' GBP 799 biljun (13) u total ta' assi bil-piż differenzjat skont ir-riskju (“RWA”) (14) ta' GBP 228 biljun.

(14)

Deskrizzjoni ddettaljata tal-miżuri ta' għajnuna mill-Istat favur ir-RBS tista' tinstab fil-premessi 31 sa 54 tad-Deċiżjoni ta' Ristrutturar. Id-Deċiżjoni ta' Ristrutturar Emendata (15) indikat li l-unika miżura ta' għajnuna għall-kapital li kienet għadha ma ttemmitx jew għadha ma tħallsitx lura fl-2013 kienet ir-rikapitalizzazzjoni ta' GBP 45,5 biljun f'azzjonijiet ordinarji u pprivileġġjati (16), li magħha kien relatat is-sehem ta' aċċess għad-dividend (“DAS”) miżmum mill-Istat. Id-DAS inħoloq biex jiġu pprovduti drittijiet imsaħħa għad-dividendi lill-awtoritajiet tar-Renju Unit.

(15)

F'Awwissu 2015, l-awtoritajiet tar-Renju Unit biegħu 5,4 % tal-bank (17), u dan kien l-ewwel bejgħ tal-ishma li l-Gvern kellu fil-grupp tar-RBS. L-ishma pprivileġġjati kollha nbidlu f'ishma ordinarji f'Ottubru tal-2015 (18). Rigward id-DAS, ir-RBS ħallas lill-awtoritajiet tar-Renju Unit dividend finali f'Marzu 2016, u sussegwentement id-DAS ġie rtirat (19). B'konsegwenza ta' dawn l-azzjonijiet, l-awtoritajiet tar-Renju Unit bħalissa jżommu 8,4 biljun sehem ordinarju fir-RBS, li jirrappreżentaw 71,2 % tal-kapital azzjonarju ordinarju tal-kumpanija (20).

(16)

L-implimentazzjoni tal-impenji ta' ċessjoni u ta' mġiba li wasslet għad-Deċiżjoni ta' Ristrutturar Emendata hija deskritta b'mod iddettaljat fil-premessi 12 sa 22 tad-Deċiżjoni ta' Ristrutturar Emendata.

(17)

L-implimentazzjoni tal-impenji inklużi fid-Deċiżjoni ta' Ristrutturar Emendata hija deskritta fil-qosor fil-premessi 15 u 16 tad-Deċiżjoni ta' Ftuħ. Ir-RBS ikkompleta dawn iċ-ċessjonijiet qabel l-iskadenzi miftiehma, bl-eċċezzjoni tal-impenn relatat maċ-ċessjoni tan-negozju Rainbow.

(18)

L-Impenji u l-Impenji Emendati inkludew iċ-ċessjoni ta' diversi negozji, inklużi tan-negozju bl-imnut u mal-SMEs tar-RBS relatat mal-fergħat fl-Ingilterra u f'Wales, u tan-negozju bl-imnut u mal-SMEs tan-NatWest relatat mal-fergħat fl-Iskozja, flimkien man-negozju dirett mal-SMEs u ċerti klijenti korporattivi ta' daqs medju (imsejjaħ in-“negozju Rainbow”). L-iskadenza inkluża fid-Deċiżjoni ta' Ristrutturar kienet il-31 ta' Diċembru 2013, u fid-Deċiżjoni ta' Ristrutturar Emendata, l-iskadenza ġiet estiża għall-31 ta' Diċembru 2017.

(19)

Fil-valutazzjoni tagħha tal-kompatibilità tal-għajnuna lir-RBS fid-Deċiżjoni ta' Ristrutturar, il-Kummissjoni nnutat li l-impenn li jċedi n-negozju Rainbow ikkontribwixxa biex jiġu limitati d-distorsjonijiet tal-kompetizzjoni maħluqa mill-għajnuna fis-suq bankarju SME u ta' daqs medju fir-Renju Unit.

(20)

Deskrizzjoni ddettaljata tal-proċess segwit mir-RBS u l-awtoritajiet tar-Renju Unit biex iċedu n-negozju Rainbow u tad-diffikultajiet relatati li ħabbtu wiċċhom magħhom qed tingħata fil-premessi minn 19 sa 25 tad-Deċiżjoni ta' Ftuħ.

(21)

B'ittra datata t-2 ta' Marzu 2017, l-awtoritajiet tar-Renju Unit innotifikaw lill-Kummissjoni t-talba li l-impenn li jċedu n-negozju Rainbow jiġi ssostitwit b'pakkett alternattiv ta' impenji. Permezz ta' ittra tat-28 ta' Lulju 2017, l-awtoritajiet tar-Renju Unit bagħtu notifika emendata lill-Kummissjoni li tirrifletti aġġornament rigward il-pakkett alternattiv propost fin-notifika oriġinali.

(22)

Skont l-awtoritajiet tar-Renju Unit, l-għan tal-pakkett alternattiv propost huwa li, minħabba d-diffikultajiet biex iċedu n-negozju Rainbow (21), tinstab alternattiva mill-inqas ekwivalenti rigward l-ambitu u l-impatt għall-impenn oriġinali li iċedu n-negozju Rainbow u li wkoll: (i) ikollha impatt aktar malajr u b'hekk ittaffi b'mod aktar effikaċi kwalunkwe distorsjoni tal-kompetizzjoni; (ii) tieħu inkonsiderazzjoni ċ-ċirkostanzi attwali tas-suq u l-ħtiġijiet speċifiċi tal-entitajiet sfidanti (“entitajiet sfidanti”) (22) u ta' parteċipanti potenzjali oħra fis-suq bankarju SME u ta' daqs medju fir-Renju Unit; u (iii) ma tqegħidx f'riskju l-vijabbiltà tar-RBS.

(23)

Il-pakkett alternattiv aġġornat jinkludi firxa ta' rimedji ta' mġiba u jikkonsisti minn żewġ elementi

(24)

Jiġi stabbilit korp indipendenti (“il-Korp”) għall-ġestjoni u l-kontroll tal-Fond ta' Kapaċità u l-Iskema ta' Qlib Inċentivat (23).

(25)

Il-pakkett alternattiv aġġornat ikun iffinanzjat mir-RBS. L-awtoritajiet tar-Renju Unit jistmaw li l-ispiża totali tal-pakkett għar-RBS se tkun ta' madwar GBP [0,5-1,5] biljun jekk wieħed jikkunsidra l-kost kapitali bil-quddiem u tnaqqis kontinwu fil-qligħ tar-RBS (24).

(26)

Il-Fond ta' Kapaċità u ta' Innovazzjoni jkollu daqs ta' GBP 425 miljun, imqassam lill-entitajiet eliġibbli (i) għall-iżvilupp tal-kapaċità biex jikkompetu mar-RBS fil-forniment ta' servizzi bankarji lil SMEs; u/jew(ii) għall-iżvilupp u t-titjib tal-prodotti u s-servizzi finanzjarji disponibbli lill-SMEs. Il-proġetti ta' investiment li jkunu jistgħu jibbenefikaw minn ħtieġa ta' appoġġ biex jidħlu fil-mira l-Għanijiet Permessi (25).

(27)

Il-Fond ta' Kapaċità u ta' Innovazzjoni jkun maqsum f'erba' pools, u l-fondi jkunu jsiru disponibbli kif deskritt fit-Tabella 1:

Tabella 1

Għotjiet disponibbli għall-Fond ta' Kapaċità u ta' Innovazzjoni

L-ikbar żborżi mill-Fond ta' Kapaċità u ta' Innovazzjoni jkunu mmirati għal entitajiet b'kapaċità BCA eżistenti b'saħħitha. It-tliet l-ikbar għotjiet se jsiru disponibbli għal entitajiet b'tali kapaċità, għat-tisħiħ tal-abbiltà tagħhom li jikkompetu mar-RBS fil-forniment ta' servizzi bankarji u prodotti finanzjari għall-SMEs. Il-kriterji ta' eliġibbiltà tal-pools differenti huma deskritti fil-premessi 28 sa 31.

(28)

Il-kriterji ta' eliġibbiltà għall-Pool A: Dan il-pool ikun miftuħ għal kull entità li taċċetta d-depożiti:

(29)

Il-kriterji ta' eliġibbiltà għall-Pool B: Kienu se japplikaw l-istess kriterji ta' eliġibbiltà kif deskritti fil-premessa 28 rigward il-Pool A, barra l-fatt li mhux meħtieġ li l-entità jkollha offerta BCA attwali (għalkemm jentħieġ mill-inqas li tkun esprimiet pubblikament l-intenzjoni tagħha li tniedi waħda).

(30)

Il-kriterji ta' eliġibbiltà għall-Pool C: Dan il-pool ikun miftuħ għall-entitajiet tal-Pool A u tal-Pool B u kwalunkwe entità oħra:

(31)

Il-kriterji ta' eliġibbiltà għall-Pool D: Dan il-pool ikun miftuħ għal kull entità:

(32)

Il-Korp ikun jimmanniġġa u jikkontrolla l-Fond ta' Kapaċità u ta' Innovazzjoni. Il-Korp huwa ddisinjat bħala indipendenti kemm mir-RBS kif ukoll mill-awtoritajiet tar-Renju Unit u se jkollu s-setgħat meħtieġa biex jaqdi l-kompitu tiegħu li jamministra l-applikazzjonijiet lill-Fond ta' Kapaċità u ta' Innovazzjoni jew jagħmel arranġamenti għall-amministrazzjoni tagħhom u għall-monitoraġġ tal-użu li jkun qed isir mill-fondi. Se jkun hemm erba' gruppi ta' salvagwardji rigward l-użu tal-fondi mill-entitajiet riċevituri li jiġu applikati tul iċ-ċiklu tal-ħajja tal-fond: (i) salvagwardji ta' qabel l-iżborż, (ii) rappurtar u monitoraġġ permanenti mill-Korp, (iii) id-dritt tal-awditjar tal-Korp u (iv) id-dritt tal-Korp li jirkupra fondi.

(33)

L-ewwel grupp ta' salvagwardji japplika qabel l-iżborż. L-applikanti se jkunu mitluba jissottomettu lill-Korp pjan ta' direzzjoni tan-negozju li jispjega, b'livell raġjonevoli ta' dettall, kif l-applikant jipproponi li se juża kwalunkwe fond mogħti lilu. Imbagħad, il-Korp irid jikkunsidra kull element tal-pjan skont għadd ta' fatturi determinati minn qabel u rigward jekk il-pjan huwiex konsistenti mal-Għanijiet Permessi (27).

(34)

It-tieni grupp ta' salvagwardji jikkonsisti fir-rappurtar u l-monitoraġġ permanenti mill-Korp: ir-riċevituri sejrin jirrappurtaw lill-Korp fuq bażi ta' kull tliet xhur għal 18-il xahar (il-korp se joħroġ ir-rapport annwali tiegħu stess dwar l-amministrazzjoni tal-fond min-naħa tiegħu). Ir-rapport fih dettalji rigward l-użu tal-fondi rċevuti, inkluż l-ammont totali minfuq tul l-aħħar tliet xhur. Fil-każ tal-entitajiet tal-Pool A, tal-Pool B u tal-Pool C, ir-rapport se jinkludi:

(35)

It-tielet grupp ta' salvagwardji jikkonsisti fid-dritt tal-awditjar tal-Korp: il-Korp ikollu l-kapaċità kuntrattwali li jaħtar “persuna kompetenti” (28) biex tinvestiga u tawditja l-użu tal-fondi mir-riċevituri f'ċirkostanzi fejn il-Korp ikollu dubji li r-riċevitur kien qed juża b'mod adegwat u bis-sħiħ il-fondi rċevuti fil-qafas tal-Miżura A.

(36)

Ir-raba' grupp ta' salvagwardji jikkonsisti fid-dritt tal-Korp li jirkupra fondi: jekk il-Korp iqis (wara awditu jew mod ieħor) li seħħ ksur materjali tal-ftehim ta' bejn il-Korp u r-reċipjent, dak tal-ewwel jista' jitlob l-irkupru tal-fondi diġà mqassma lil dan tal-aħħar. Dan jinkludi kull nuqqas li l-ammont tal-fondi jintuża għal Għanijiet Permessi jew kwalunkwe użu tiegħu għal għanijiet ipprojbiti (29): F'dawn il-każijiet, il-Korp jista' jobbliga lir-riċevitur jirrimedja l-ksur jew jitlob il-ħlas lura (sħiħ jew parzjali) tal-ammont tal-fondi.

(37)

Id-dispożizzjonijiet li jiddeterminaw l-użu tal-fondi tal-Pool A, tal-Pool B u tal-Pool C għandhom jinkludu dispożizzjonijiet li jistipulaw li:

(38)

Id-dispożizzjonijiet li jiddeterminaw l-użu tal-fondi tal-Pool D għandhom jinkludu dispożizzjonijiet li jistipulaw li:

(39)

Il-finanzjament għall-entitajiet tal-Pools A, B u C ikun organizzat f'tali fażijiet li kwalunke entità li ma tirbaħx applikazzjoni għall-Pool A tkun eliġibbli biex tapplika għal finanzjament mill-Pool B, filwaqt li kwalunke entità li ma tirbaħx applikazzjoni għall-Pool B tkun eliġibbli biex tapplika għal finanzjament mill-Pool C. Il-proċess ta' finanzjament għall-Pool D ikun għaddej fl-istess ħin bħall-proċess ta' finanzjament organizzat f'fażijiet għall-Pools A, B u C.

(40)

Il-Korp se jikkummerċjalizza l-Fond ta' Kapaċità u ta' Innovazzjoni lill-entitajiet tal-Pools A u D malajr daqskemm ikun raġjonevolment prattikabbli wara l-istabbiliment tiegħu u wara li jiġi ffirmat l-Att ta' Qafas dwar l-għajnuna mill-Istat (31). Il-kummerċjalizzazzjoni lill-entitajiet tal-Pools B u C se ssegwi 3 u 6 xhur (rispettivament) wara l-kummerċjalizzazzjoni tal-Fond ta' Kapaċità u ta' Innovazzjoni lill-entitajiet tal-Pool A.

(41)

Il-perjodu ta' applikazzjoni għall-fondi tal-Pool A se jiskadi fi żmien xahrejn (2) wara li l-Korp jibda l-kummerċjalizzazzjoni tal-fond, filwaqt li l-perjodu ta' applikazzjoni tal-Pool B se jiskadi fi żmien 5 xhur wara din id-data, u l-perjodu ta' applikazzjoni tal-Pool C se jiskadi fi żmien 8 xhur wara din id-data. Il-perjodu ta' applikazzjoni għall-Pool D se jkun għaddej fl-istess ħin bħall-perjodu ta' applikazzjoni għall-fondi tal-Pools A–C u se jiskadi wara massimu ta' 6 xhur wara li l-Korp jibda l-kummerċjalizzazzjoni tal-fond.

(42)

Il-fond huwa maħsub biex jiskadi wara tmiem l-Iskema ta' Qlib Inċentivat (għalkemm jista' jiġi estiż abbażi ta' kriterji ddeterminati minn qabel skont l-ammont ta' fondi mhux imqassma li jkun fadal). Id-drittijiet u l-obbligi tal-Korp rigward ir-rappurtar f'kull każ ikunu jkomplu għal tliet xhur wara li jintemm l-aħħar ftehim bejn il-Korp u kwalunkwe riċevitur li jkun jipparteċipa fil-Fond ta' Kapaċità u ta' Innovazzjoni.

(43)

L-ispiża tal-Miżura A għar-RBS tinkludi l-kost kapitali bil-quddiem ta' GBP 425 miljun u l-ispejjeż operattivi tal-Korp (32), li għalihom se jħallas ir-RBS.

(44)

L-entitajiet eliġibbli biex jipparteċipaw fl-Iskema ta' Qlib Inċentivat (“Entitajiet Eliġibbli”) huma dawk li jaċċettaw depożiti u jissodisfaw il-kriterji li ġejjin:

(45)

L-Iskema ta' Qlib Inċentivat iffinanzjata mir-RBS tkun tipprovdi fondi lill-Korp biex jitqassmu lill-Entitajiet Eliġibbli billi huma jittrasferixxu klijenti b'suċċess. B'hekk l-Entitajiet Eliġibbli jingħataw il-possibbiltà li joffru inċentivi lill-klijenti tas-servizzi bankarji għall-SMEs tar-RBS li jinkoraġġuhom jaqilbu l-BCA, il-kont ta' depożitu u s-self tagħhom lejn l-Entitajiet Eliġibbli. Dan ikun isir f'għamla ta' impenn mir-RBS li:

(46)

Id-doti BCA u ta' self se jagħtu l-possibbiltà lill-Entitajiet Eliġibbli jiffinanzjaw offerti bi prezzijiet attraenti jew inċentivi oħrajn lill-klijenti tar-RBS fil-perimetru ta' Williams & Glyn (“W&G”) (34) u jattiraw l-interess ta' dawk il-klijenti biex jaqilbu.

(47)

Id-doti BCA mħallsa lill-entitajiet riċevituri jkunu organizzati f'saffi karatterizzati minn żieda kbira fl-ammonti biex b'hekk huma jkollhom riżorsi suffiċjenti biex jipprovdu inċentivi konvinċenti lill-klijenti li jkunu kemm SMEs żgħar kif ukoll SMEs ta' daqs ikbar biex jaqilbu għalihom. L-ammonti ta' dota BCA proposti biex jingħataw fil-bidu tal-iskema jintwerew fit-tabella ta' hawn taħt.

Tabella 2

Ammonti proposti ta' dota BCA inizjali mill-Iskema ta' Qlib Inċentivat

(48)

Id-doti ta' self se jagħtu l-possibbiltà lill-Entitajiet Eliġibbli li jnaqqsu r-rati tal-imgħax imposti fuq is-self lill-klijenti u b'hekk se jagħmlu l-offerti tagħhom aktar kompetittivi filwaqt li jisseddaq introjtu mill-kapital adegwat. Fil-każijiet fejn klijent jaqleb il-BCA primarju tiegħu u prodott ta' self mir-RBS, il-Korp se jħallas lill-entità riċevitriċi dota addizzjonali ta' 2,5 % tal-bilanċ tas-self meħud li jiġi ttrasferit.

(49)

Ir-RBS ikun qed jimmira għall-klijenti tiegħu fi ħdan il-perimetru W&G (li jinkludi madwar 200 000 klijent tas-servizzi bankarji għall-SMEs), li se titwasslilhom informazzjoni dwar il-benefiċċji tal-qlib u l-entitajiet sfidanti alternattivi potenzjali li huma forsi jkunu jixtiequ jikkunsidraw.

(50)

Ir-RBS se jibda jikkomunika l-Iskema ta' Qlib Inċentivat lill-klijenti madwar tliet xhur wara t-tnedija tal-pakkett, u d-doti jsiru disponibbli sa mit-tieni (2) trimestru tal-2018 (madwar tliet xhur wara li r-RBS jibda jikkomunika lill-klijenti tiegħu). Il-proċess tat-tqassim tad-doti għall-Iskema ta' Qlib Inċentivat jiġi rripetut kull tliet xhur sakemm id-doti jkunu disponibbli. Id-doti jieqfu malli jkun tħallas massimu ta' GBP 225 miljun għad-doti BCA jew, fil-każ li dan ma jkunx seħħ aktar kmieni, 18-il xahar wara l-komunikazzjoni tal-Iskema ta' Qlib Inċentivat mir-RBS (suġġett għal estensjoni bi 12-il xahar, ara l-premessa 51(d)).

(51)

Il-Korp ikun responsabbli għall-ġestjoni u l-kontroll tal-Iskema ta' Qlib Inċentivat, b'żieda mal-Fond ta' Kapaċità u ta' Innovazzjoni, u jkun qed jimmonitorja l-imġiba tar-RBS lejn il-klijenti u l-interazzjoni tiegħu magħhom fuq bażi permanenti. Dan ikun jinkludi l-possibbiltà li, suġġett għal-liġijiet applikabbli u r-rekwiżiti tal-protezzjoni tad-data, il-Korp:

(52)

Sabiex jiġi żgurat li r-RBS ikollu l-inċentivi adegwati għall-implimentazzjoni effettiva tal-Iskema ta' Qlib Inċentivat, fil-każ li inqas minn […] klijent ikunu qalbu u jkun hemm nuqqas ta' nefqa għad-doti sal-aħħar tal-perjodu ta' […] xahar (jew, fil-każ li l-Korp jiddeċiedi li jestendi l-perjodu rilevanti, id-data li fiha jiskadi l-perjodu estiż), ir-RBS ikun obbligat jittrasferixxi ammont multiplu addizzjonali ddefinit minn qabel (il-“Multiplikatur”) ta' dan in-nuqqas ta' nefqa lill-Korp, suġġett għal massimu ta' GBP 50 miljun.

(53)

Il-Multiplikatur ġie ddefinit bħala […] tan-nuqqas ta' nefqa. Din il-penali hija soġġetta għall-kundizzjonijiet li ġejjin:

(54)

[…]

(55)

F'każ fejn it-total tal-ammont mhux minfuq kollu u l-multiplikatur (flimkien ma' kwalunkwe ammonti rkuprati u ammonti mhux imqassma mill-Fond ta' Kapaċità u ta' Innovazzjoni) ikun jammonta għal inqas minn GBP 5 miljun, il-Korp se jqassam il-fondi lil xi organizzazzjonijiet karitattivi.

(56)

Ir-RBS se jagħti l-kunsens tiegħu għal arranġamenti ta' non-solleċitazzjoni fil-qafas tal-Iskema ta' Qlib Inċentivat, li se jipprojbixxu lir-RBS u lill-membri tal-grupp tiegħu li (i) jieħdu ċerti azzjonjiet li jista' jkollhom effett negattiv fuq l-Iskema ta' Qlib Inċentivat; u (ii) li jissolleċitaw, iħeġġu jew jinkoraġixxu lil Klijenti Eliġibbli (jew klijenti li jkunu qalbu għal Entità Eliġibbli għall-Qlib Inċentivat) biex jibqgħu klijenti tal-grupp rigward kwalunkwe BCA jew prodott rilevanti ta' self, jew li jittrasferixxu kwalunkwe BCA jew prodott rilevanti ta' self minn Entitajiet Eliġibbli għall-Qlib Inċentivat lejn kwalunkwe membru tal-grupp tul ċerti perjodi ta' żmien definiti.

(57)

Bil-għan li jappoġġja s-suċċess tal-Iskema ta' Qlib Inċentivat, ir-RBS se joffri lill-entitajiet li jkunu qed jipparteċipaw fl-Iskema ta' Qlib Inċentivat l-għażla li jidħlu f'Kuntratt ta' Aġenzija Interbankarju li jħalli l-għażla lill-klijenti li jiġbdu lejhom fil-qafas tal-Iskema ta' Qlib Inċentivat li jibqgħu jużaw servizzi ta' flus kontanti u ta' pproċessar ta' ċekkijiet fil-fergħat tar-RBS (l-“Iskema ta' Aċċess għall-Fergħat”). Dan l-aċċess għall-fergħat se jkun disponibbli għall-Klijenti Eliġibbli għal minimu ta' tliet snin mit-tnedija tal-Iskema ta' Qlib Inċentivat b'kundizzjonijiet kummerċjali raġjonevoli u mhux diskriminatorji, bi spejjeż tal-entità kkonċernata.

(58)

Il-kost kapitali bil-quddiem tal-Miżura B huwa ta' GBP 350 miljun, li magħhom iridu jiżdiedu l-ispejjeż tal-implimentazzjoni għar-RBS u t-telf permanenti ta' qligħ futur mir-RBS (37).

(59)

Id-Deċiżjoni ta' Ftuħ tat l-opportunità lill-partijiet interessati biex jikkummentaw fuq il-proposta tal-awtoritajiet tar-Renju Unit. Waslu għadd kbir ta' kummenti tul il-perjodu ta' konsultazzjoni. Il-kummenti rċevuti kienu dwar il-pakkett alternattiv inizjali kif deskritt fil-premessi minn 28 sa 68 tad-Deċiżjoni ta' Ftuħ (“Pakkett Alternattiv Inizjali”). B'reazzjoni għall-kummenti mill-partijiet interessati u l-istudju tas-suq tagħhom stess (38), l-awtoritajiet tar-Renju Unit aġġornaw il-pakkett alternattiv, kif deskritt fit-Taqsima 2.3.

(60)

Minħabba l-għadd kbir ta' kummenti (39), il-kummenti ewlenin li ġew kondiviżi bejn diversi partijiet interessati sabiex jgħinu l-valutazzjoni tal-ekwivalenza tal-pakkett alternattiv maċ-ċessjoni tan-negozju Rainbow huma deskritti fil-qosor f'din it-taqsima.

(61)

Il-maġġoranza tal-kummenti rċevuti jindikaw li l-Pakkett Alternattiv Inizjali għandu għadd ta' karatteristiċi li jkunu jistgħu jsaħħu l-kompetizzjoni fis-swieq tal-SMEs tar-Renju Unit. Xi wħud jindikaw li l-pakkett alternattiv ikollu impatt aktar rapidu fuq il-kompetizzjoni b'inqas riskju ta' eżekuzzjoni u jkun kapaċi jsaħħaħ mhux biss Entità Sfidanti waħda (bħalma hu l-każ taċ-ċessjoni tan-negozju Rainbow).

(62)

Xi partijiet interessati jissuġġerixxu dwar li-Pakkett Alternattiv Inizjali fl-intier tiegħu li

(63)

L-awtoritajiet tar-Renju Unit iqisu li l-pakkett alternattiv huwa mill-inqas ekwivalenti għaċ-ċessjoni tan-negozju Rainbow f'termini tal-impatt tiegħu fuq il-limitazzjoni ta' distorsjonijiet potenzjali tal-kompetizzjoni, u jista' jiġi implimentat b'aktar ċertezza u b'mod aktar rapidu minn ċessjoni.

(64)

L-awtoritajiet tar-Renju Unit iqisu li l-pakkett alternattiv fl-intier tiegħu hu ddisinjat bil-għan li joħloq kapaċità fis-suq biex jiġu promossi livelli permanentement ogħla ta' qlib madwar is-suq kollu fis-swieq tal-SMEs u tal-klijenti korporattivi ta' daqs medju. Billi huwa l-ikbar attur, il-piż ta' dan se jaffettwa l-aktar lir-RBS. Minkejja li huwa inqas kwantifikabbli mill-benefiċċji tal-Iskema ta' Qlib Inċentivat, il-Fond ta' Kapaċità u ta' Innovazzjoni se jsaħħaħ l-offerti ta' servizzi bankarji lill-SMEs ta' ħafna banek u b'hekk iwassal għal għażla ikbar fis-suq billi joħloq diversità ta' mudelli ta' negozju u jmexxi 'l quddiem il-qlib. Se jaċċellera wkoll l-iżvilupp ta' negozji ġodda u ta' teknoloġiji ġodda li jista' jkun li jdgħajfu d-dipendenza tal-SMEs fuq il-banek tagħhom.

(65)

L-awtoritajiet tar-Renju Unit jissottomettu li l-pakkett alternattiv ġie ddisinjat biex jissodisfa l-istess għanijiet bħaċ-ċessjoni oriġinali tan-negozju Rainbow:

(66)

Rigward l-impatt tal-pakkett alternattiv fuq il-qasam tan-negozji ta' daqs medju, l-awtoritajiet tar-Renju Unit iqisu wkoll li:

(67)

Barra minn hekk, l-awtoritajiet tar-Renju Unit iqisu l-vantaġġi addizzjonali tal-pakkett alternattiv meta mqabbel maċ-ċessjoni tan-negozju Rainbow.

(68)

Rigward il-kummenti minn partijiet interessati, l-awtoritajiet tar-Renju Unit jgħidu li

(69)

F'għadd ta' kummenti mill-partijiet interessati ssemma li jkun tajjeb li jitkabbar id-daqs tal-Fond ta' Kapaċità tal-SME peress li b'hekk kieku jinħoloq impatt ikbar fuq il-kompetizzjoni fis-suq bankarju tal-SMEs.

(70)

Kummenti oħrajn mill-partijiet interessati semmew li l-frammentazzjoni tal-fondi bejn għadd kbir ta' banek, b'tali mod li l-ebda wieħed ma jkun jista' jwettaq investiment sinifikantii, mhux se jkollha effett materjali fuq il-kompetizzjoni jew il-konċentrazzjoni. Flok li jkun hemm żborżi indaqs fi ħdan il-pools rispettivi, ikun tajjeb li d-daqs tal-iżborżi jvarja biex ikunu jittieħdu inkonsiderazzjoni l-ħtiġijiet u l-pjanijiet ta' investiment reali tal-applikant li jkun.

(71)

Għadd ta' partijiet ippreżentaw ukoll li jkun tajjeb li l-Fond ta' Kapaċità tal-SME jinfetaħ aktar lejn dawk l-istituzzjonijiet mingħajr kapaċità BCA b'saħħitha eżistenti u li istituzzjonijiet mhux bankarji (pereżempju kumpaniji tal-bini) għandu jkollhom il-possibbiltà li jibbenefikaw mill-Fond ta' Kapaċità.

(72)

L-awtoritajiet tar-Renju Unit iqisu li jkun raġjonevoli li wieħed jistenna li l-Fond ta' Kapaċità tal-SME, b'mod partikolari meta jingħaqad mal-Iskema ta' Qlib Inċentivat, se jżid is-sehem mis-suq tal-Entitajiet Sfidanti u b'hekk jirriżulta fi tnaqqis ekwivalenti fis-sehem mis-suq tar-RBS.

(73)

L-awtoritajiet tar-Renju Unit iqisu li l-Fond ta' Kapaċità se jżid is-sehem mis-suq tal-Entitajiet Sfidanti billi se jtejjeb b'mod sostanzjali s-sitwazzjoni ekonomika tal-banek li deħlin fis-suq bankarju tal-SMEs (u, jekk ikunu jixtiequ, f'dak tal-korporazzjonijiet ta' daqs medju) u/jew li qed jiżviluppaw aktar il-kapaċitajiet eżistenti. Biex tingħata illustrazzjoni tal-kunċett sottostanti, għotja ta' GBP 3 miljun mill-fond tista' trendi proġett ta' GBP 10 miljun fil-limitu profittabbli ekonomiku, billi żżid ir-redditu fuq l-investiment fi proġett minn redditu taħt il-kost kapitali għal livell vijabbli u sostenibbli.

(74)

B'rispons għall-kummenti mill-partijiet interessati, l-awtoritajiet tar-Renju Unit għamlu t-tibdiliet li ġejjin rigward il-pakkett alternattiv:

(75)

Xi partijiet interessati qajmu kwistjonijiet dwar jekk kienx se jkun hemm biżżejjed klijenti li jiġu inċentivati biżżejjed bid-daqs propost tad-doti biex jegħlbu l-isforzi li jinvolvi l-qlib. L-esperjenza tal-passat tat prova li l-klijenti huma inerti u li jrid ikun hemm proċess ċar u bla xkiel biex il-klijenti jaqilbu. Sabiex jiġi ffaċilitat il-qlib, ikun tajjeb ukoll li r-RBS jikkondividi informazzjoni dwar il-klijenti tiegħu mal-Entitajiet Sfidanti (inklużi r-rekords dwar l-istorja ta' kreditu). Xi partijiet interessati indikaw ukoll il-ħtieġa li jiġu pprovduti rekords tal-passat tal-klijenti għall-valutazzjoni tal-affidabbiltà kreditizja.

(76)

Għadd ta' kummenti indikaw li jrid jiżdied id-daqs tad-doti biex isir possibbli l-qlib (u skont il-komplessità u d-daqs tal-klijent), u dan ikun jirrikjedi żieda sinifikanti fid-daqs totali tal-Iskema ta' Qlib Inċentivat.

(77)

Xi kummenti indikaw li t-tul tal-Iskema ta' Qlib Inċentivat għandu jkun suffiċjenti biex ikun żgurat li ż-żmien ma jkunx ostakolu sinifikanti. Barra minn hekk, ġiet proposta l-estensjoni awtomatika tal-perimetru ta' klijenti (fil-każ li ma jintlaħaqx il-livell ta' qlib mixtieq).

(78)

Diversi kummenti ssuġġerixxew li jkun tajjeb li l-pakkett alternattiv jiffoka wkoll fuq it-trasferiment tas-self flimkien mat-trasferiment ta' BCAs, peress li l-enfasi fuq il-BCAs qed tinjora l-ħtieġa ta' kompetizzjoni ikbar fis-suq tas-self lill-SMEs. Il-pakkett ikun qed jiffoka żżejjed fuq il-fornituri ta' BCA. Is-suq tas-self lill-SMEs wieħed jarah bħala ferm aktar profittabbli mill-BCAs, u d-distorsjoni tal-kompetizzjoni trid tissewwa fis-suq tas-self ukoll. Il-kummenti wkoll jispjegaw fil-qosor li bħalissa, l-Entitajiet Sfidanti jkunu żvantaġġati billi l-ikbar 4 banek huma permessi jużaw mudell ibbażat fuq Klassifikazzjonijiet Interni Avvanzati milli mudell kapitali standardizzat: dan jippermetti li l-erba' banek joffru prezzijiet aħjar għas-self mill-Entitajiet Sfidanti.

(79)

Xi kummenti ssuġġerew li x'aktarx ikun aħjar li r-RBS jiġġiegħel iċedi klijenti (inkluż bejgħ sfurzat ta' BCAs u/jew self) milli li l-klijenti jingħataw l-opportunità li jaqilbu bank. Kummenti oħrajn jissuġġerixxu li jkun tajjeb li r-RBS jikkommetti ruħu jittrasferixxi għadd minimu nett ta' BCA u tiġi imposta penali fil-każ ta' nuqqas ta' prestazzjoni.

(80)

Għadd ta' kummenti wkoll jissuġġerixxu li jkun tajjeb li l-Iskema ta' Qlib Inċentivat tibda biss wara li jkun irnexxielhom jimplimentaw l-investimenti li jsiru possibbli permezz tal-Fond ta' Kapaċità tal-SME.

(81)

Rigward l-Iskema ta' Qlib Inċentivat inkluża fil-Pakkett Alternattiv Inizjali, l-awtoritajiet tar-Renju Unit iqisu li:

(82)

B'rispons għall-kummenti mill-partijiet interessati, l-awtoritajiet tar-Renju Unit jistqarru li huma fiduċjużi li biżżejjed klijenti jaqilbu bis-saħħa tal-inċentivi finanzjarji offruti bħal:

(83)

Barra minn hekk, b'rispons għall-kummenti mill-partijiet terzi, l-awtoritajiet tar-Renju Unit iqisu li:

(84)

B'rispons għall-kummenti mill-partijiet interessati u l-istudju tagħhom stess dwar is-suq, l-awtoritajiet tar-Renju Unit għamlu wkoll it-tibdiliet li ġejjin fl-Iskema ta' Qlib Inċentivat:

(85)

Għadd ta' partijiet interessati ddubitaw il-benefiċċji tal-Iskema ta' Aċċess għall-Fergħat għall-kompetizzjoni fis-suq bankarju tal-SMEs u kienu tal-fehma li l-amministrazzjoni u l-iffinanzjar tal-iskema kienu se jkunu ta' piż għall-klijenti u l-Entitajiet Sfidanti involuti u li din tista' tfisser distrazzjoni mhux utli għall-Korp.

(86)

Għadd żgħir ta' partijiet interessati esprimew ruħhom favur l-Iskema ta' Aċċess għall-Fergħat u kienu jaħsbu li se jisfruttawha.

(87)

B'rispons għall-kummenti rċevuti li l-Iskema ta' Aċċess għall-Fergħat probabbli li tkun ta' interess limitat għall-Entitajiet Sfidanti, għalkemm importanti għal għadd żgħir minnhom, l-Iskema ta' Aċċess għall-Fergħat se tinżamm, iżda bir-reviżjonijiet li ġejjin:

(88)

Xi partijiet interessati kienu kritiċi rigward il-Fond ta' Innovazzjoni propost billi jqisuh mhux neċessarju u, minħabba n-natura fit-tul tiegħu, kienu tal-fehma li mhux se jkollu impatt sinifikanti fuq il-kompetizzjoni u mhu se jkollu ebda effett fuq il-pożizzjoni tar-RBS fis-suq tal-SMEs fir-Renju Unit. Argumentaw li l-finanzjament mill-Fond ta' Innovazzjoni jkun aħjar li jiġi indirizzat lejn elementi oħrajn tal-pakkett.

(89)

Għadd żgħir ta' kummenti dwar il-Fond ta' Innovazzjoni kienu pożittivi u tal-fehma li dak kien se jgħin biex titħaffef l-innovazzjoni fis-settur bankarju tal-SME. Xi wħud argumentaw ukoll li l-banek u s-soċjetajiet tal-bini jrid ikollhom aċċess għall-benefiċċji ta' dan il-finanzjament.

(90)

B'rispons għall-kummenti rċevuti, il-Fond ta' Innovazzjoni se jingħaqad mal-Fond ta' Kapaċità tal-SME biex b'hekk jinħoloq Fond ta' Kapaċità u ta' Innovazzjoni. Dan hu maħsub biex jindirizza t-tħassib dwar l-eżistenza ta' żewġ fondi distinti billi b'hekk tkun possibbli aktar flessibbiltà rigward min jista' japplika u l-mod ta' kif jiġu allokati l-fondi, filwaqt li jinżammu l-benefiċċji tal-finanzjament għall-innovazzjonijiet rilevanti għall-SMEs.

(91)

Skont l-Artikolu 107(1) tat-TFUE, kull għajnuna, ta' kwalunkwe forma, mogħtija minn Stat Membru jew permezz ta' riżorsi tal-Istat, li twassal għal distorsjoni jew theddida ta' distorsjoni għall-kompetizzjoni billi tiffavorixxi ċerti impriżi jew ċerti produtturi, sa fejn tolqot il-kummerċ bejn l-Istati Membri, hija pprojbita. Il-Kummissjoni tosserva li l-awtoritajiet tar-Renju Unit jqisu li fil-qafas tal-pakkett alternattiv aġġornat mhux se tkun qed tingħata għajnuna addizzjonali mill-Istat.

(92)

Il-kwalifikazzjoni ta' miżura bħala għajnuna mill-Istat fi ħdan is-sinifikat ta' din id-dispożizzjoni tirrikjedi għalhekk li jiġu ssodisfati l-kundizzjonijiet kumulattivi li ġejjin: (i) il-miżura trid tkun imputabbli għall-Istat u ffinanzjata permezz tar-riżorsi tal-Istat; (ii) din trid tagħti vantaġġ lill-benefiċjarju tagħha; (iii) dak il-vantaġġ irid ikun selettiv; u (iv) il-miżura għandha tgħawweġ jew thedded li tgħawweġ il-kompetizzjoni u jkollha l-potenzjal li tolqot il-kummerċ bejn l-Istati Membri.

(93)

Il-pakkett alternattiv aġġornat deskritt fit-taqsima 2.3 jirrappreżenta kost finanzjarju għar-RBS. Abbażi tad-data pprovduta mill-awtoritajiet tar-Renju Unit, il-pakkett alternattiv ikollu kost bil-quddiem għar-RBS ta' madwar GBP 833 miljun (51), flimkien ma' kost addizzjonali permanenti kkawżat mit-telf ta' profitti (52). Mhux se jkun hemm fluss ta' riżorsa statali mill-Istat lejn ir-RBS għall-finanzjament ta' dawk il-Miżuri. L-ispejjeż tal-pakkett alternattiv aġġornat se jiġġarrbu mir-RBS fl-intier tagħhom.

(94)

Minħabba li l-pakkett alternattiv aġġornat ma jinvolvix riżorsi mill-Istat rigward ir-RBS, m'hemmx ħtieġa li jiġu vvalutati l-kundizzjonijiet kumulattivi l-oħra biex xi miżura tikkwalifika bħala għajnuna mill-Istat. Għaldaqstant, il-pakkett alternattiv ma jinvolvix għajnuna ġdida lir-RBS.

(95)

Il-Kummissjoni tosserva li m'hemmx rabta diretta bejn l-għajnuna mill-Istat mogħtija lir-RBS fl-2008 u fl-2009 u l-pakkett alternattiv aġġornat li jiġi deskritt fit-taqsima 2.3. Fil-fatt, fil-proċedura li twassal għad-Deċiżjoni ta' Ristrutturar, l-awtoritajiet tar-Renju Unit impenjaw ruħhom biex iċedu n-negozju Rainbow, u l-approvazzjoni tal-għajnuna kienet ibbażata fuq dak l-impenn. Il-pakkett alternattiv ġie propost tmien snin wara l-għoti tal-aħħar għajnuna kapitali lir-RBS. Għaldaqstant, jista' jiġi eskluż li l-pakkett alternattiv ikun marbut direttament mal-għajnuna lir-RBS fl-2008 u l-2009 jew ibbażat fuqha.

(96)

Madankollu, ta' min wieħed jinnota li, kif ġie indikat fil-premessa 15, l-Istat għadu l-proprjetarju ta' 71,2 % tal-ishma tar-RBS. Dan jissuġġerixxi li l-piż finanzjarju tal-pakkett alternattiv jiġġarrab mill-Istat b'mod indirett, iżda fil-parti kbira tiegħu billi hu jkun l-azzjonist maġġoritarju tar-RBS. Barra minn hekk, l-awtoritajiet tar-Renju Unit kienu involuti mill-qrib fid-disinn tal-pakkett alternattiv, ħaġa li tista' tissuġġerixxi li d-disinn tal-pakkett huwa imputabbli għall-Istat. Barra minn hekk, jista' jkun li l-pakkett alternattiv jagħti vantaġġ selettiv lill-impriżi li huma intitolati li jibbenefikaw minnu. Il-miżura hija wkoll imfassla b'tali mod li l-effetti tagħha jkunu indirizzati lejn l-Entitajiet Sfidanti.

(97)

Madankollu, għalkemm il-pakkett alternattiv ġie kkunsidrat li jikkostitwixxi għajnuna mill-Istat lill-banek li kienu se jibbenefikaw minnu, il-Kummissjoni tqis li huwa kompatibbli bħala parti neċessarja mill-Impenji li abbażi tagħhom il-miżuri ta' għajnuna favur ir-RBS jitqiesu kompatibbli abbażi tad-Deċiżjoni ta' Ristrutturar, tad-Deċiżjoni ta' Ristrutturar Emendata u tad-Deċiżjoni preżenti (53).

(98)

Fid-dawl tal-elementi diskussi fit-taqsima 5.1.1, il-Kummissjoni tikkonkludi li l-pakkett alternattiv aġġornat ma jikkwalifikax bħala għajnuna mill-Istat ġdida lir-RBS.

(99)

Kif ġie analizzat fit-taqsima 5.1.2, sa fejn il-pakkett alternattiv jikkwalifika bħala għajnuna mill-Istat lill-banek li jibbenefikaw minnu, din l-għajnuna titqies kompatibbli abbażi tal-Artikolu 107(3)(b) tat-TFUE bħala parti neċessarja mill-Impenji li abbażi tagħhom il-miżuri ta' għajnuna inizjali favur ir-RBS jitqiesu kompatibbli fil-każ preżenti. Fid-dawl tas-sostituzzjoni tal-impenn ta' ċessjoni bil-pakkett alternattiv, il-kompatibbiltà tal-għajnuna eżistenti lir-RBS hija analizzata fit-taqsima 5.2 tad-Deċiżjoni preżenti.

(100)

Filwaqt li l-pakkett alternattiv aġġornat donnu ma jinkludix għajnuna mill-Istat ġdida lir-RBS, l-għajnuna eżistenti ġiet awtorizzata, fost l-oħrajn, abbażi tal-impenn li jinbiegħ in-negozju Rainbow. L-awtoritajiet tar-Renju Unit issa jitolbu li dan l-impenn jiġi ssostitwit b'impenn li jimplimenta l-pakkett alternattiv aġġornat. Għaldaqstant, jenħtieġ li l-Kummissjoni tivvaluta jekk is-sostituzzjoni proposta hijiex se tibdel il-konklużjoni li l-għajnuna eżistenti lir-RBS hija kompatibbli mas-suq intern.

(101)

Deċiżjoni ta' ristrutturar, bħad-Deċiżjoni ta' Ristrutturar Emendata, bi prinċipju tista' tiġi emendata mill-Kummissjoni fejn il-modifika tkun ibbażata fuq impenji ġodda li jistgħu jitqiesu ekwivalenti ma' dawk ipprovduti oriġinarjament (54). F'dik is-sitwazzjoni, il-miżuri ta' għajnuna eżistenti jibqgħu kompatibbli fuq il-bażi tal-Artikolu 107(3)(b) tat-TFUE jekk jibqa' intatt il-bilanċ ġenerali tad-deċiżjoni oriġinali. Sabiex jinżamm il-bilanċ oriġinali, is-sostituzzjoni tal-impenn ta' ċessjoni bil-pakkett alternattiv m'għandhiex taffettwa ħażin il-vijabbiltà tal-benefiċjarju tal-għajnuna, bis-sett ġenerali ta' impenji jibqa' ekwivalenti f'termini ta' qsim tal-piżijiet u miżuri ta' kumpens filwaqt li jiġu kkunsidrati r-rekwiżiti tal-Komunikazzjoni ta' Ristrutturar (55).

(102)

Jenħtieġ li l-Kummissjoni tivvaluta jekk il-modifiki tal-Impenji Emendati humiex iqiegħdu f'dubju l-konklużjoni milħuqa fid-Deċiżjoni ta' Ristrutturar Emendata rigward il-kapaċità tar-RBS li jreġġa' lura l-vijabbiltà tiegħu mingħajr ma jiġi bżonn għajnuna oħra mill-Istat.

(103)

Skont l-estimu pprovdut mill-awtoritajiet tar-Renju Unit (ara t-Tabella 3), l-ispejjeż tal-pakkett alternattiv mhumiex ogħla mill-ispejjeż talli titkompla ċ-ċessjoni tan-negozju Rainbow. Għaldaqstant, il-Kummissjoni tqis li l-qlib għall-pakkett alternattiv ma jaffettwax b'mod sinifikanti l-vijabbiltà tar-RBS.

(104)

Ta' min wieħed jinnota li n-negozju Rainbow fih innifsu mhuwiex entità li tagħmel it-telf (56). Konsegwentement, il-modifiki tal-Impenji Emendati li jippermettu lir-RBS iżomm in-negozju Rainbow mhux se jaffettwaw b'mod negattiv il-profittabbiltà tar-RBS.

(105)

Il-Kummissjoni tikkonkludi b'mod preliminari li l-emendi proposti mill-awtoritajiet tar-Renju Unit mhux qed iqiegħdu f'periklu l-vijabbiltà tar-RBS.

(106)

Ir-RBS kellu telf sinifikanti attribwibbli lill-azzjonisti ordinarji mill-2008 'l quddiem (57), li jirriżulta primarjament mill-akkumulazzjoni ta' elementi kbar ta' darba, bħal multi u ħlasijiet minħabba mġiba ħażina fil-passat u bejgħ mhux permess ta' ċerti prodotti, spejjeż ta' ristrutturar u telf ogħla mill-mistenni rigward assi mhux komuni. Għaldaqstant, jenħtieġ li l-Kummissjoni tivvaluta jekk għadhiex valida il-konklużjoni tagħha li r-RBS se jkun kapaċi jreġġa' lura l-profittabbiltà u l-vijabbiltà tiegħu mingħajr għajnuna oħra mill-Istat.

(107)

Il-Kummissjoni qed tinnota li r-riżultati tar-RBS mill-ewwel (1) nofs tal-2017 jindikaw profittabbiltà mtejba (58). Għall-ewwel (1) nofs tal-2017, ir-RBS irrapporta introjtu operatorju ta' GBP 939 miljun lill-azzjonisti ordinarji.

(108)

Il-proporzjon kapitali tal-Grad 1 ta' ekwità komuni baqa' jitjieb mill-2013 'il quddiem, u l-introjtu operatorju komuni kompla b'mod pożittiv kif deskritt fil-premessa 11 tad-Deċiżjoni ta' Ftuħ.

(109)

Għaldaqstant, il-Kummissjoni tqis li l-emendi proposti ma jqegħdux f'dubju l-konklużjoni milħuqa fid-Deċiżjoni ta' Ristrutturar rigward il-kapaċità tar-RBS li jreġġa' lura l-vijabbiltà tiegħu.

(110)

Id-Deċiżjoni ta' Ristrutturar Emendata tindika li ċ-ċessjoni tan-negozju Rainbow ttieħdet inkonsiderazzjoni bħala miżura biex jiġu limitati d-distorsjonijiet tal-kompetizzjoni u la kien miżura ta' qsim tal-piżijiet u lanqas miżura li tillimita l-spejjeż ta' ristrutturar (59). F'dan is-sens, il-pakkett alternattiv aġġornat propost mhux qed jaffettwa l-valutazzjoni mwettqa qabel mill-Kummissjoni dwar il-qsim tal-piżijiet.

(111)

Għaldaqstant, it-tibdiliet innotifikati ma jaffettwawx il-valutazzjoni tal-qsim tal-piżijiet li seħħet fid-Deċiżjoni ta' Ristrutturar u fid-Deċiżjoni ta' Ristrutturar Emendata.

(112)

Skont id-Deċiżjoni ta' Ristrutturar Emendata (60), l-għan ewlieni tal-impenn li jiġi ċedut in-negozju Rainbow kien li tiġi limitata d-distorsjoni tal-kompetizzjoni li setgħet toħloq l-għajnuna lir-RBS. B'mod aktar preċiż, l-impenn li jiġi ċedut in-negozju Rainbow kien immirat biex jiġi evitat li l-ammont kbir ħafna ta' għajnuna mill-Istat li ngħata lir-RBS fl-2008 u l-2009 jirriżulta f'distorsjoni indebita tal-kompetizzjoni fis-suq tas-servizzi bankarji lill-SMEs u lill-korporazzjonijiet ta' daqs medju fir-Renju Unit, fejn ir-RBS kien il-mexxej tas-suq (61). Sabiex jiġi evitat tisħiħ tal-pożizzjoni tar-RBS f'dak is-suq li jnaqqas il-kompetizzjoni fih, l-awtoritajiet tar-Renju Unit impenjaw ruħhom li r-RBS kien se jċedi entità b'sehem ta' 5 % mis-suq tal-klijenti SMEs u korporazzjonijiet ta' daqs medju fir-Renju Unit (62).

(113)

L-għan tal-pakkett alternattiv kif deskritt fit-taqsima 3.3 huwa l-indirizzar tad-distorsjoni tal-kompetizzjoni bl-istess mod bħal permezz tal-impenn li jiġi ċedut in-negozju Rainbow, li qed jiġi ssostitwit bih.

(114)

Għaldaqstant, jenħtieġ li l-Kummissjoni tivvaluta jekk il-pakkett alternattiv aġġornat huwiex ekwivalenti għall-impenn ta' ċessjoni li se jissostitwixxi.

(115)

Il-pakkett alternattiv jikkonsisti l-aktar f'żewġ miżuri individwali. Il-Kummissjoni beħsiebha tivvaluta l-ekwivalenza kemm f'livell individwali kif ukoll fil-livell tal-pakkett.

(116)

Il-Kummissjoni tosserva li huwa probabbli li l-provvista ta' fondi mill-Fond ta' Kapaċità u ta' Innovazzjoni (63) lil Entitajiet Sfidanti bil-għan li tiżdied il-kapaċità tagħhom li joffru servizzi bankarji lill-SMEs se żżid il-kompetizzjoni fis-suq bankarju tal-SMEs.

(117)

Abbażi tal-kummenti li l-Kummissjoni rċeviet mingħand il-partijiet interessati b'riżultat tad-Deċiżjoni ta' Ftuħ, hija tqis li d-distribuzzjoni tal-fondi f'diversi għotjiet ta' daqs sa GBP 120 miljun tippermettiha ssaħħaħ l-offerti bankarji ta' għadd ta' entitajiet u ddaħħal għażla ikbar fis-suq.

(118)

L-interess li ntwera u r-rispons li wasal mill-partijiet interessati dwar kif kienu se jużaw il-fondi li jista' jkun li se jirċievu mill-Fond ta' Kapaċità u ta' Innovazzjoni jipprovdi serħan il-moħħ ulterjuri li l-Fond ta' Kapaċità se jkollu impatt pożittiv fuq il-kompetizzjoni fis-suq.

(119)

Abbażi tal-kummenti rċevuti mill-partijiet interessati, id-daqs tal-għotjiet jikkorrispondi bejn wieħed u ieħor għad-daqs li xi wħud mill-partijiet interessati indikaw li jeħtieġu sabiex ikun hemm inċentiv għalihom biex jinvestu fil-kapaċitajiet tagħhom tas-servizzi bankarji lill-SMEs. Se jkun hemm kompetizzjoni għad-diżborżi mill-fondi, bl-aktar fondi jiġu indirizzati lejn dawk l-entitajiet li jkunu l-aktar kapaċi jikkonvinċu lill-Korp bl-argumenti tagħhom favur il-kompetizzjoni. Il-Kummissjoni hija tal-fehma li d-daqs tal-għotjiet mill-Fond ta' Kapaċità u ta' Innovazzjoni huwa adegwat u li l-kompetizzjoni se twassal għal impatt ikbar fuq is-suq.

(120)

Il-Kummissjoni tinnota li, minn total ta' GBP 425 miljun, ir-riżorsi tal-Fond ta' Kapaċità u ta' Innovazzjoni huma kkonċentrati madwar erba' għotjiet kbar li flimkien jammontaw għal GBP 330 miljun. Fil-fatt, hemm qasma kbira bejn is-sehem mis-suq tal-erba' banek ewlenin għall-SMEs fir-Renju Unit (64) u l-Entitajiet Sfidanti. Barra minn hekk, fost l-Entitajiet Sfidanti, hemm differenza kbira bejn dawk l-entitajiet li stabbilixxew operat ta' servizzi bankarji lill-SMEs u dawk li għadhom deħlin fis-suq jew li qed joffru firxa limitata ta' prodotti ta' spiss immirati għall-iżgħar SMEs. L-għan taċ-ċessjoni tan-negozju Rainbow kien li jinħoloq bank għall-SMEs u l-korporazzjonijiet ta' daqs medju li, għalkemm iżgħar mill-erba' banek ewlenin għall-SMEs, madankollu jkun kbir biżżejjed biex jisfidahom. Il-fatt li l-parti l-kbira tal-fondi huma mmirati għal dawk il-ftit Entitajiet Sfidanti b'kapaċità BCA għall-SMEs eżistenti b'saħħitha, huwa probabbli li jwassal għall-ikbar impatt fuq il-kompetizzjoni fis-suq u se jirriżulta b'aktar ċertezza f'tisħiħ sinifikanti tal-pożizzjoni ta' waħda jew aktar mill-entitajiet. B'hekk, dan iżid l-ekwivalenza mal-impatt li kien se jkollha ċ-ċessjoni tan-negozju Rainbow, meta mqabbla ma' pakkett alternattiv iffukat fuq il-banek il-ġodda li deħlin fis-suq jew il-banek li qed joffru biss firxa limitata ta' prodotti bankarji lill-SMEs, ta' spiss immirati għall-iżgħar SMEs biss.

(121)

Skont il-kummenti rċevuti mill-partijiet interessati, huwa importanti għall-Entitajiet Sfidanti li l-ewwel joħolqu kapaċitajiet addizzjonali li jkunu ta' appoġġ għall-isforz tagħhom biex jikkonvinċu lill-klijenti ta' W&G biex jaqilbu permezz tal-Qlib Inċentivat. Il-Kummissjoni hija tal-fehma li l-fatt li jiġi pprovdut perjodu ta' tliet xhur wara l-ħruġ ta' għotja mill-Fond ta' Kapaċità u ta' Innovazzjoni jagħti l-possibbiltà lill-Entitajiet Sfidanti jippjanaw u jimplimentaw investimenti addizzjonali mingħajr ma jdewwmu bla bżonn l-implimentazzjoni tal-Iskema ta' Qlib Inċentivat.

(122)

Il-Kummissjoni tosserva li l-Iskema ta' Qlib Inċentivat (65) se żżid il-kompetizzjoni fis-suq bankarju tal-SMEs, bit-trasferiment ta' klijenti mir-RBS lejn l-Entitajiet Sfidanti. L-implimentazzjoni tal-Iskema ta' Qlib Inċentivat timmira għat-trasferiment ta' għadd ta' klijenti li jikkorrispondi għal 3 punti perċentwali mis-sehem mis-suq tar-RBS fis-suq bankarju tal-SMEs fir-Renju Unit (ikkalkulat abbażi tal-għadd ta' SMEs).

(123)

F'termini ta' għadd ta' SMEs ittrasferiti, l-Iskema ta' Qlib Inċentivat tista' twassal għal tnaqqis fis-sehem mis-suq tar-RBS li jaqbeż it-3 punti perċentwali, iżda f'dan il-każ, il-portafoll tal-klijenti li jkunu jaqilbu kieku fih proporzjon ikbar ta' SMEs ta' daqs żgħir. Fil-fatt, billi hemm limitu massimu għall-ammont ta' fondi disponibbli għall-Miżura B, il-qlib ta' aktar klijenti neċessarjament jimplika li bħala medja, id-doti jkollhom ikunu iżgħar, bir-riżultat li l-klijenti ttrasferiti jkollhom ikunu SMEs żgħar ħafna, ħaġa li ma kinitx fil-mira taċ-ċessjoni tan-negozju Rainbow. Bħala konklużjoni, meta wieħed jivvaluta l-ekwivalenza, ta' min iqis li l-Iskema ta' Qlib Inċentivat se jippermetti li t-trasferiment mis-sehem mis-suq tar-RBS ikun limitat għal 3 punti perċentwali.

(124)

Rigward kemm hu probabbli li jintlaħaq it-tnaqqis bi 3 punti perċentwali, il-Kummissjoni tosserva li l-offerti magħmula mill-Entitajiet Sfidanti se jkollhom ikunu attraenti biżżejjed biex jikkonvinċu l-għadd massimu ta' klijenti biex jaqilbu. Filwaqt li tikkunsidra l-kummenti rċevuti mill-partijiet interessati, id-daqs tad-doti msemmi fir-riċerka Charterhouse ikkummissjonata mir-RBS (66), u ż-żieda fil-fondi disponibbli għall-Miżura B, il-Kummissjoni tqis li issa huma kbar biżżejjed biex iservu ta' inċentiv għat-trasferiment ta' għadd ta' klijenti li jikkorrispondi għal sehem mis-suq ekwivalenti għal 3 punti perċentwali.

(125)

Il-Kummissjoni tqis l-estensjoni tat-tul, tal-perimetru u tal-Multiplikatur kif deskritt fil-premessi 52 u 53 bħala salvagwardji importanti li jipprovdu serħan il-moħħ addizzjonali li jista' jintlaħaq trasferiment ta' sehem mis-suq ta' 3 punti perċentwali mir-RBS.

(126)

Il-Kummissjoni tqis ukoll li l-BCAs huma prodott “gateway” għall-SMEs, li ġeneralment ikunu jikkunsidraw il-fornitur BCA tagħhom meta jkunu qed ifittxu servizzi bankarji oħra bħas-self (67). Għaldaqstant, il-Kummissjoni tqis li l-inċentivi għall-qlib ta' BCA huma wkoll inċentivi biex il-klijenti jaqilbu prodotti ta' self.

(127)

Il-Kummissjoni tosserva li d-doti għas-self deskritti fil-premessa 48 ikunu jippermettu lill-Entitajiet Sfidanti jipprovdu aktar inċentivi lill-klijenti SMEs biex jittrasferixxu prodotti oħra flimkien mal-BCAs tagħhom. Id-daqs tad-dota għas-self inaqqas ukoll l-iżvantaġġ li semmew il-partijiet interessati rigward l-użu ta' mudell kapitali standardizzat (68). Il-Kummissjoni tqis li dan il-fatt jipprovdi aktar serħan il-moħħ li l-pakkett alternattiv huwa ekwivalenti maċ-ċessjoni tan-negozju Rainbow, li fil-qafas tagħha dawk is-selfiet kienu se jiġu ttrasferiti lejn xerrej potenzjali.

(128)

Il-Kummissjoni tinnota wkoll li l-ammont allokat ta' GBP 75 miljun biex jiffaċilita l-qlib (kumpens għall-ħlasijiet ta' waqfien relatati mat-trasferiment tal-bilanċi ta' self jew spejjeż oħra ta' partijiet terzi bħall-ispejjeż legali) u s-Servizz ta' Qlib ta' Kont Kurrenti se jnaqqsu l-ostakoli li jżommu lura lill-klijenti milli jaqilbu għall-Entitajiet Sfidanti.

(129)

Il-Kummissjoni tqis ukoll li s-setgħat u l-kontroll f'idejn il-Korp (69) jiżguraw li l-Iskema ta' Qlib Inċentivat tista' tiġi adattata aktar għas-sinjali tas-suq wara li tkun tnediet l-iskema.

(130)

Il-Kummissjoni ma tqisx problematiku l-fatt li m'għadux qed jiġi propost li l-aċċess għall-fergħat tar-RBS (kif deskritt fil-premessa 57) jiġi offrut bla ħlas, kif previst fil-verżjoni inizjali tal-pakkett alternattiv. Fil-fatt, l-Entitajiet Sfidanti stabbiliti fil-qasam tal-SMEs ikkummentaw li huma ma kellhomx bżonn ta' tali aċċess biex ikunu jistgħu jikkompetu mal-erba' banek ewlenin tal-SMEs. Bl-użu tal-fondi inizjalment allokati lill-Iskema ta' Aċċess għall-Fergħat (inizjalment bla ħlas) għall-Miżuri A u B, il-fondi tal-pakkett alternattiv qed jiġu allokati b'mod aktar effikaċi bil-għan li tintlaħaq ekwivalenza mal-effett taċ-ċessjoni tan-negozju Rainbow.

(131)

Abbażi tat-tibdiliet li ġew introdotti fl-Iskema ta' Qlib Inċentivat, tas-salvagwardji inklużi fl-iskema u tal-kummenti rċevuti mill-partijiet interessati, il-Kummissjoni tikkonkludi li jkun probabbli ħafna li l-Iskema ta' Qlib Inċentivat twassal għat-trasferiment b'suċċess ta' 3 punti perċentwali mis-sehem mis-suq tal-RBS.

(132)

Kif ġie stabbilit fid-Deċiżjoni ta' Ftuħ (70), hemm modi differenti ta' kif wieħed jivvaluta l-ekwivalenza tal-pakkett alternattiv. F'termini ta' xenarju kontrofattwali, l-impatt tal-pakkett alternattiv jista' jitqabbel mal-impatt mistenni li jkollu l-bejgħ tan-negozju Rainbow lil xerrej kummerċjali li kieku ġie implimentat issa (“Ċessjoni tan-negozju Rainbow” fit-Tabella 3) jew mal-impatt li kien mistenni li se jkollha ċ-ċessjoni tan-negozju Rainbow skont id-Deċiżjoni ta' Ristrutturar (“Deċiżjoni fuq l-Objettiv 2009” fit-Tabella 3). F'termini tal-indikaturi użati, wieħed jista' jkejjel l-ekwivalenza bl-użu ta' indikaturi differenti, bħall-evoluzzjoni tas-sehem mis-suq tal-SMEs tar-RBS, l-ispejjeż finanzjarji għar-RBS, u d-daqs tal-assi u l-obbligazzjonijiet ittrasferiti.

(133)

It-Tabella 3 tqabbel it-tliet xenarji skont indikaturi differenti.

Tabella 3

Paragun ta' 3 xenarji skont indikaturi differenti

(134)

Il-motivazzjoni wara ċ-ċessjoni tan-negozju Rainbow fid-Deċiżjoni ta' Ristrutturar u d-Deċiżjoni ta' Ristrutturar Emendata hija li tiġi limitata d-distorsjoni tal-kompetizzjoni fis-suq bankarju tal-SMEs u l-korporazzjonijiet ta' daqs medju fir-Renju Unit. L-awtoritajiet tar-Renju Unit iddisinjaw il-pakkett alternattiv bil-għan li jintlaħaq l-istess għan sottostanti.

(135)

L-alternattivi jistgħu jitqabblu bl-użu tal-impatt fuq is-sehem tar-RBS mis-suq tal-SMEs fir-Renju Unit. Skont id-Deċiżjoni ta' Ristrutturar, iċ-ċessjoni tan-negozju Rainbow kienet mistennija li tirriżulta f'telf ta'5 % tas-sehem mis-suq, kif deskritt fil-premessa 112 tad-Deċiżjoni ta' Ftuħ. Il-pakkett alternattiv ikollu wkoll jirriżulta f'telf fis-sehem mis-suq. Dan ikun jammonta għal massimu ta' 3 % meta wieħed jieħu inkonsiderazzjoni l-Iskema ta' Qlib Inċentivat biss. Il-Kummissjoni tqis li l-impatt tal-Fond ta' Kapaċità u ta' Innovazzjoni se jkun ukoll sinifikanti biżżejjed biex jagħmel possibbli il-qlib ta' SMEs mir-RBS u minn banek oħrajn. Madankollu, il-kwantifikazzjoni ta' dan il-fenomenu hija diffiċli.

(136)

Kif indikat mill-awtoritajiet tar-Renju Unit (73), ikun raġjonevoli li wieħed iqis il-fatt li r-RBS ġarrab telf fis-sehem mis-suq bankarju tal-SMEs fir-Renju Unit mid-Deċiżjoni ta' Ristrutturar'il quddiem. L-awtoritajiet tar-Renju Unit irreferew għal fornitur tad-data. Sfortunatament, il-fornitur tad-data beda jipproduċi kalkoli tas-sehem mis-suq mhux qabel ir-raba' (4) trimestru tal-2010. B'riżultat ta' dan, m'hemmx serje ta' perjodi konsistenti li tkopri l-perjodu mill-2008 jew l-2009 sal-lum. Skont id-data kkalkulata mill-fornitur, is-sehem mis-suq tar-RBS kien jammonta għal mhux inqas minn [25-30] % fir-raba' (4) trimestru tal-2010 (l-ewwel punt ta' data) fis-suq għall-SMEs b'fatturat sa GBP 25 miljun. Skont dik id-data, ir-RBS tilef [3-7] % tas-sehem mis-suq bejn ir-raba' (4) trimestru tal-2010 u r-raba' (4) trimestru tal-2016 fis-suq għall-SMEs b'fatturat sa GBP 25 miljun (74). Il-Kummissjoni tqis li l-użu tat-telf fis-sehem mis-suq mir-raba' (4) trimestru tal-2011 'il quddiem ([0-5] %) huwa aktar prudenti meta mqabbel mal-użu tat-telf fis-sehem mis-suq mir-raba' (4) trimestru tal-2010 'l quddiem ([3-7] %), peress li l-ewwel punt ta' data (Q4 2010) jagħti sehem mis-suq ogħla minn dak li ġie kkomunikat minn sorsi oħra fi żmien id-Deċiżjoni ta' Ristrutturar, u għalhekk ma jistax jiġi eskluż li dak il-punt jikkostitwixxi massimu ta' darba li ma jirriflettix b'mod korrett il-punt ta' tluq fil-perjodu 2008-2009. Għalhekk il-Kummissjoni tqis li s-sehem mis-suq diġà mitluf fis-segment tal-SMEs fir-Renju Unit jista' jiġi, b'mod prudenti, kkwantifikat fil-livell ta' [0-5] %.

(137)

It-tnaqqis b'5 % fis-sehem mis-suq tar-RBS mistenni fid-Deċiżjoni ta' Ristrutturar jinqabeż meta wieħed jgħaqqad flimkien it-telf fis-sehem mis-suq mistenni mill-pakkett alternattiv (sa 3 % b'rużultat tal-Miżura B weħidha) mat-telf fis-sehem mis-suq osservat ta' [0-5] %.

(138)

Abbażi tal-analiżi fil-premessi 122 sa 131, il-Kummissjoni tivvaluta li huwa probabbli ħafna li bil-pakkett alternattiv se jintlaħaq trasferiment ta' 3 % tas-sehem mis-suq tal-klijenti SMEs.

(139)

Bħala konklużjoni, il-Kummissjoni tqis li t-telf fis-sehem mis-suq rigward l-SMEs antiċipat fl-2009 fi żmien id-Deċiżjoni ta' Ristrutturar ikun jiġi ssodisfat permezz tal-pakkett alternattiv.

(140)

Il-Kummissjoni tosserva li l-Miżura A hija mmirata għall-klijenti SMEs, iżda ma teskludix il-korporazzjonijiet ta' daqs medju mill-benefiċċji tal-pakkett alternattiv. Il-Fond ta' Kapaċità u ta' Innovazzjoni se jippermetti lill-banek itejbu u jestendu l-proposti eżistenti fil-qasam tas-servizzi bankarji lin-negozji lejn l-SMEs il-kbar u b'hekk anki lejn il-korporazzjonijiet ta' daqs medju. Pereżempju, wieħed mill-banek indika fis-sottomissjoni tiegħu wara d-Deċiżjoni ta' Ftuħ li kien se jinvesti sa GBP 25 miljun fi pjattaforma sofistikata ta' servizzi bankarji onlajn lin-negozji li kienet se tipprovdi kapaċitajiet diġitali sofistikati (inklużi FX u kapaċitajiet ta' pagamenti internazzjonali) lill-korporazzjonijiet żgħar, ta' daqs medju u kbar. Dan il-bank antiċipa wkoll li sa GBP 50 miljun ta' pjanijiet ta' investiment oħra kienu jkunu ta' għajnuna għalih biex jindirizza s-segmenti kollha tas-suq.

(141)

Il-Kummissjoni tqis ukoll li l-Iskema ta' Qlib Inċentivat (b'doti kbar għall-SMEs ta' daqs ikbar u aktar kumplessi) se sservi ta' inċentiv ulterjuri lill-Entitajiet Sfidanti biex itejbu aktar il-prodotti u s-servizzi tagħhom għal dawk l-SMEs kbar. Għalhekk, dawk l-Entitajiet Sfidanti se jsaħħu wkoll il-kapaċità tagħhom li jaqdu klijenti korporattivi ta' daqs medju.

(142)

Il-Kummissjoni tosserva wkoll li l-għotjiet u d-doti tal-Miżuri A u B huma kkonċentrati f'idejn dawk il-ftit Entitajiet Sfidanti b'kapaċità BCA għall-SMEs eżistenti b'saħħitha. Dawk l-Entitajiet Sfidanti se jkunu wkoll li jkun probabbli li jippruvaw jikkompetu għall-klijenti korporattivi ta' daqs medju.

(143)

Skont id-data kkalkulata mill-fornitur, is-sehem mis-suq tar-RBS kien jammonta għal mhux inqas minn [30-35] % fir-raba' (4) trimestru tal-2010 (l-ewwel punt ta' data) fis-suq għall-klijenti korporattivi b'fatturat li jaqbeż il-GBP 25 miljun. (75). Skont dik id-data, ir-RBS tilef [5-10] % tas-sehem mis-suq bejn ir-raba' (4) trimestru tal-2010 u t-tieni (2) trimestru tal-2017 fis-suq għall-SMEs b'fatturat sa GBP 25 miljun (76). B'mod simili bħal fil-każ tas-segment tal-SMEs, il-Kummissjoni tqisu aktar prudenti li wieħed juża t-telf fis-sehem mis-suq mir-raba' (4) trimestru tal-2011 'il quddiem milli li jintuża t-telf fis-sehem mis-suq mir-raba' (4) trimestru tal-2010 'l quddiem. Il-Kummissjoni tinnota li t-telf osservat fis-sehem tar-RBS mis-suq tal-klijenti korporattivi mir-raba' (4) trimestru tal-2011 sar-raba' (4) trimestru tal-2016 ([0-5] %) huwa konformi mat-telf fis-sehem mis-suq tal-SMEs ([0-5] %). It-telf osservat huwa saħansitra ikbar meta wieħed jikkunsidra t-telf fis-sehem mis-suq mir-raba' (4) trimestru tal-2011 sat-tieni (2) trimestru tal-2017 ([5-10] %).

(144)

Il-Kummissjoni tinnota wkoll li l-klijenti korporattivi ta' daqs medju ta' spiss jitolbu prodotti bankarji aktar kumplessi u aktar varjati. Għadd limitat ħafna biss ta' Entitajiet Sfidanti wrew interess reali f'dawk il-klijenti (77), billi l-parti l-kbira tal-entitajiet ma jkollhomx il-kapaċità biex jiżviluppaw dawk il-prodotti b'mod profittabbli. Il-Kummissjoni hija wkoll tal-fehma li huwa raġjonevoli li wieħed jikkunsidra l-kummenti mir-Renju Unit fil-premessa 66(e), li jiddeskrivu fil-qosor li ċ-ċessjoni tan-negozju Rainbow kien se jkollha impatt iżgħar u/jew aktar inċert fuq il-kompetizzjoni fis-segment tal-korporazzjonijiet ta' daqs medju meta mqabbel mas-segment tal-SMEs.

(145)

Minkejja li huwa aktar diffiċli li wieħed jikkwantifika d-distorsjoni tal-kompetizzjoni minħabba l-impatt indirett tal-pakkett alternattiv fuq is-segment tal-korporazzjonijiet ta' daqs medju, il-Kummissjoni tqis li, flimkien mat-telf fis-sehem mis-suq osservat, il-pakkett alternattiv ikun probabbli li jilħaq impatt rilevanti għall-kompetizzjoni rigward il-korporazzjonjiet ta' daqs medju li jkun mill-inqas ekwivalenti maċ-ċessjoni tan-negozju Rainbow. Għalhekk, il-Kummissjoni tikkonkludi li d-distorsjoni tal-kompetizzjoni hija wkoll indirizzata rigward il-klijenti korporattivi ta' daqs medju bil-Miżuri A u B.

(146)

Rigward kemm il-klijenti korporattivi ta' daqs medju u kemm il-klijenti SMEs, it-telf kapitali totali stmat tax-xenarji differenti jista' wkoll jintuża biex titqabbel l-ekwivalenza bejn iċ-ċessjoni tan-negozju Rainbow u l-pakkett alternattiv.

(147)

Id-Deċiżjoni ta' Ristrutturar ma kinitx tinkludi estimu tal-kost kapitali taċ-ċessjoni tan-negozju Rainbow. Madankollu, huwa raġjonevoli li wieħed juża l-estimu tal-kost kapitali ġġenerat mill-bejgħ tan-negozju Rainbow kieku jiġi segwit, element li ġie kkwantifikat mill-awtoritajiet tar-Renju Unit.

(148)

L-ispejjeż imġarrba mir-RBS mill-2009 'l quddiem biex jikkonforma mal-impenn ta' ċessjoni jammontaw għal GBP [1-3] biljun (78). Dawn ikopru diversi tipi ta' spejjeż, bl-ikbar waħda minnhom tkun dik tat-teknoloġija għall-ħolqien ta' pjattaforma tal-IT separata għan-negozju Rainbow.

(149)

It-telf kapitali dirett (79) tal-pakkett alternattiv huwa iżgħar milli kieku titkompla ċ-ċessjoni tan-negozju Rainbow. Barra minn hekk, meta wieħed iżid l-ispejjeż diġà mġarrba mir-RBS, huwa ċar li l-pakkett alternattiv jinvolvi aktar spejjeż minn dawk previsti b'mod impliċitu fid-Deċiżjoni ta' Ristrutturar (80).

(150)

Bħala konklużjoni, bl-użu ta' dak l-indikatur, il-pakkett alternattiv kif iddikjarat mill-awtoritajiet tar-Renju Unit, mhux qed iħaffef il-piż finanzjarju għar-RBS, meta mqabbel ma' dak previst fid-Deċiżjoni ta' Ristrutturar; eventwalment, jiswa sinifikantement aktar flus.

(151)

Għall-paragun bejn id-diversi xenarji, jista' jintuża wkoll l-impatt fuq il-proporzjon tal-kapital tal-Grad 1. Id-differenza bejn l-indikatur tal-proporzjon tal-Grad 1 u l-indikatur tat-telf kapitali huwa li dak tal-ewwel jikkunsidra wkoll it-tnaqqis f'RWA: jekk xi xenarju jiġġenera tnaqqis ikbar fl-assi bil-piż differenzjat skont ir-riskju, dan ikollu — abbażi ta' ċertu telf kapitali konkret — effett inqas negattiv fuq il-proporzjon tal-kapital tal-Grad 1.

(152)

Iċ-ċifri dwar il-kapital tal-Grad 1 ġew ipprovduti mill-awtoritajiet tar-Renju Unit. It-Tabella 3 turi li l-impatt fuq il-proporzjon tal-kapital tal-Grad 1 tal-pakkett alternattiv huwa aktar sinifikanti. Dan donnu jirriżulta mill-fatt li jinvolvi telf ta' assi iżgħar. B'hekk, anki jekk it-telf kapitali jkun ftit iżgħar, għandu effett ftit aktar negattiv fuq il-proporzjon tal-kapital tal-Grad 1.

(153)

Ix-xenarji alternattivi jistgħu jitqabblu anki madwar l-assi totali. L-impatt fuq l-assi totali tal-pakkett alternattiv huwa ferm iżgħar minn dak relatat mal-impenn li jiġi ċedut in-negozju Rainbow.

(154)

L-impenn li jiġi ċedut in-negozju Rainbow kellu l-għan għaċ-ċessjoni ta' entità vijabbli. Sabiex ikun entità vijabbli, in-negozju Rainbow ried ikollu biżżejjed assi li jiġġeneraw introjtu u klijenti li jġarrbu l-ispejjeż tan-netwerk u l-infrastruttura kbar estiżi tal-fergħat tiegħu. Għalhekk, barra s-self u d-depożiti għall-SMEs, li fuqhom kienet tiffoka l-miżura mmirata biex iżżid il-kompetizzjoni fis-suq tal-SMEs, il-perimetru tan-negozju Rainbow kien jinkludi wkoll ammont kbir ta' selfiet bl-imnut u depożiti.

(155)

Il-pakkett alternattiv mhux qed jipprevedi t-trasferiment tal-assi u l-obbligazzjonijiet bl-imnut u oħrajn mhux relatati mal-SMEs. Jiffoka fuq l-ilħuq tat-trasferiment ta' parti mill-klijenti SMEs flimkien mal-assi (selfiet) u l-obbligazzjonijiet (depożiti) tagħhom. Għaldaqstant, il-pakkett alternattiv huwa ħafna iżgħar f'termini tal-ammonti tal-assi ttrasferiti, iżda jipprova jwassal riżultat simili fis-suq bankarju tal-SMEs fir-Renju Unit.

(156)

Mid-data tad-Deċiżjoni ta' Ristrutturar (14 ta' Diċembru 2009) 'il quddiem, ir-RBS ġenwinament ipprova jċedi n-negozju Rainbow, kif turi l-evidenza tal-proċeduri suċċessivi li tnedew, l-ammont sinifikanti tar-riżorsi involuti u l-ħaddiema ddedikati għaċ-ċessjoni tan-negozju Rainbow.

(157)

B'hekk, ir-RBS ġarrab spejjeż sinifikanti (b'mod partikolari, l-ispejjeż stmati tat-tentattivi biex jiġi ċedut in-negozju Rainbow, kif deskritt fil-premessa 148).

(158)

Il-Kummissjoni tinnota wkoll li l-pakkett alternattiv donnu mhux qed iħaffef ir-rekwiżiti imposti fuq ir-RBS. Fejn jidħlu l-ispejjeż, barra dawk diġà mġarrba mir-RBS fil-passat, l-implimentazzjoni tal-pakkett alternattiv ikun qed jimponi l-piż ta' kost addizzjonali fuq ir-RBS. L-ispejjeż kumulattivi mill-2009 'l quddiem ikunu ferm ogħla milli mistenni b'mod impliċitu mid-Deċiżjoni ta' Ristrutturar.

(159)

Il-pakkett alternattiv, flimkien mat-telf fis-sehem mis-suq, se jirriżulta fi tnaqqis totali fis-sehem tar-RBS mis-suq tal-SMEs, ħaġa mill-inqas ekwivalenti ma' dak previst fid-Deċiżjoni ta' Ristrutturar. Għalhekk it-tħassib li l-għajnuna kbira ħafna tal-2008-2009 tintuża mir-RBS biex jikkonsolida jew ikabbar is-sehem tiegħu mis-suq fis-suq diġà kkonċentrat tal-SMEs, ma jkunx aktar realistiku milli kieku ċ-ċessjoni tan-negozju Rainbow ġiet implimentata kif previst mid-Deċiżjoni ta' Ristrutturar.

(160)

Għaldaqstant, il-Kummissjoni tqis li, sabiex jintlaħaq l-effett intiż fuq il-kompetizzjoni, il-pakkett alternattiv huwa ekwivalenti għaċ-ċessjoni tan-negozju Rainbow.

(161)

Il-Kummissjoni tinnota wkoll li r-RBS implimenta l-Impenji u l-Impenji Emendati kollha (barra ċ-ċediment tan-negozju Rainbow) mid-Deċiżjoni ta' Ristrutturar u d-Deċiżjoni ta' Ristrutturar Emendata. Għalhekk, is-sostituzzjoni nnotifikata ta' impenn wieħed ta' ċessjoni qed isseħħ fil-kuntest tal-implimentazzjoni korretta tal-bqija tal-pjan ta' ristrutturar.

(162)

Abbażi tal-valutazzjoni ta' hawn fuq, tneħħew id-dubji tal-Kummissjoni dwar l-ekwivalenza tal-pakkett alternattiv, li ġew espressi fid-Deċiżjoni ta' Ftuħ. L-emenda rigward l-impenji ma taffettwax il-konklużjoni milħuqa fid-Deċiżjoni ta' Ristrutturar u d-Deċiżjoni ta' Ristrutturar Emendata, u għalhekk l-għajnuna mill-Istat ipprovduta lir-RBS trid tiġi ddikjarata kompatibbli mas-suq intern abbażi tal-Artikolu 107(3)(b) TFUE.

(163)

Barra minn hekk, il-Kummissjoni tikkonkludi li jinħtieġ li l-għajnuna mill-Istat potenzjali lill-benefiċjarji mill-pakkett alternattiv tiġi ddikjarata kompatibbli bħala parti neċessarja mill-impenji li abbażi tagħhom il-miżuri ta' għajnuna favur ir-RBS jiġu ddikjarati kompatibbli.