9.11.2017   

MT

Il-Ġurnal Uffiċjali tal-Unjoni Ewropea

L 291/84

REGOLAMENT TAL-KUMMISSJONI (UE) 2017/1989

tas-6 ta' Novembru 2017

li jemenda r-Regolament (KE) Nru 1126/2008 li jadotta ċerti standards internazzjonali tal-kontabilità skont ir-Regolament (KE) Nru 1606/2002 tal-Parlament Ewropew u tal-Kunsill fir-rigward tal-Istandard Internazzjonali tal-Kontabilità 12

(Test b'rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (KE) Nru 1606/2002 tal-Parlament Ewropew u tal-Kunsill tad-19 ta' Lulju 2002 rigward l-applikazzjoni ta' standards internazzjonali tal-kontabilità (1), u b'mod partikolari l-Artikolu 3(1) tiegħu,

Billi:

(1)

Permezz tar-Regolament tal-Kummissjoni (KE) Nru 1126/2008 (2) ġew adottati ċerti standards internazzjonali u interpretazzjonijiet li kienu fis-seħħ fil-15 ta' Ottubru 2008.

(2)

Fid-19 ta' Jannar 2016, il-Bord dwar l-Istandards Internazzjonali tal-Kontabilità (IASB) ippubblika emendi għall-Istandard Internazzjonali tal-Kontabilità (IAS) 12 Taxxi fuq l-introjtu. L-emendi għandhom l-għan li jiċċaraw kif għandu jittieħed kont ta' assi ta' taxxa differita relatata ma' strumenti tad-dejn b'valur ġust.

(3)

Il-konsultazzjoni mal-Grupp Konsultattiv Ewropew għar-Rappurtaġġ Finanzjarju tikkonferma li l-emendi għall-IAS 12 jissodisfaw il-kriterji għall-adozzjoni stipulati fl-Artikolu 3(2) tar-Regolament (KE) Nru 1606/2002.

(4)

Għalhekk, ir-Regolament (KE) Nru 1126/2008 jenħtieġ li jiġi emendat skont dan.

(5)

L-IASB stabbilixxa d-data effettiva tal-emendi għall-IAS 12 mill-1 ta' Jannar 2017. Għalhekk, jenħtieġ li d-dispożizzjonijiet ta' dan ir-Regolament japplikaw b'mod retroattiv biex tkun żgurata ċ-ċertezza legali għall-emittenti kkonċernati u l-konsistenza ma' standards oħra tal-kontabilità stabbiliti fir-Regolament (KE) Nru 1126/2008.

(6)

Il-miżuri previsti f'dan ir-Regolament huma skont l-opinjoni tal-Kumitat Regolatorju dwar il-Kontabilità,

ADOTTAT DAN IR-REGOLAMENT:

Artikolu 1

Fl-Anness tar-Regolament (KE) Nru 1126/2008 l-Istandard Internazzjonali tal-Kontabilità (IAS) 12 Taxxi fuq l-introjtu huwa emendat kif stipulat fl-Anness ta' dan ir-Regolament.

Artikolu 2

Kull kumpanija tapplika l-emendi msemmija fl-Artikolu 1, mhux aktar tard mid-data tal-bidu tal-ewwel sena finanzjarja tagħha li tibda fl-1 ta' Jannar 2017 jew wara.

Artikolu 3

Dan ir-Regolament jidħol fis-seħħ fit-tielet jum wara l-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u huwa direttament applikabbli fl-Istati Membri kollha.

Magħmul fi Brussell, is-6 ta' Novembru 2017.

Għall-Kummissjoni

Il-President

Jean-Claude JUNCKER

(1)   ĠU L 243, 11.9.2002, p. 1.

(2)  Ir-Regolament tal-Kummissjoni (KE) Nru 1126/2008 tat-3 ta' Novembru 2008 li jadotta ċerti standards internazzjonali tal-kontabilità skont ir-Regolament (KE) Nru 1606/2002 tal-Parlament Ewropew u tal-Kunsill (ĠU L 320, 29.11.2008, p. 1)

ANNESS

Rikonoxximent ta' Assi ta' Taxxa Differita għal Telf mhux Realizzat

(Emendi għall-IAS 12)

Emendi għall-IAS12 Taxxi fuq l-Introjtu

Il-paragrafu 29 huwa emendat u l-paragrafi 27A, 29A u 98G huma miżjuda. Huwa wkoll miżjud eżempju wara l-paragrafu 26. Il-paragrafi 24, 26(d), 27 u 28 ma ġewx emendati iżda huma inklużi għall-ħeffa ta' referenza.

Differenzi temporanji deduċibbli

24

Assi ta' taxxa differita għandu jkun rikonoxxut għad-differenzi temporanji kollha deduċibbli sal-punt fejn hu probabbli li se jkun hemm profitt taxxabbli li għalih tista' tintuża d-differenza temporanja deduċibbli, għajr jekk l-assi ta' taxxa differita joriġina mir-rikonoxximent inizjali ta' assi jew obbligazzjoni fi tranżazzjoni li:

(a)

mhijiex kombinament ta' negozji; kif ukoll

(b)

fiż-żmien tat-tranżazzjoni, la taffettwa l-profitt kontabilistiku u lanqas il-profitt taxxabbli (telf ta' taxxa).

Madankollu, għal differenzi temporanji deduċibbli assoċjati ma' investimenti f'sussidjarji, fergħat u assoċjati, u interessi f'arranġamenti konġunti, għandu jiġi rikonoxxut assi ta' taxxa differita skont il-paragrafu 44.

…

26

 Dawn li ġejjin huma eżempji ta' differenzi temporanji deduċibbli li jirriżultaw f'assi ta' taxxa differita:

(a)

…

(d)

ċerti assi jistgħu jinżammu skont il-valur ġust, jew jistgħu jiġu rivalutati, mingħajr ma jsir aġġustament ekwivalenti għal finijiet tat-taxxa (ara l-paragrafu 20). Differenza temporanja deduċibbli tinħoloq jekk il-bażi għat-taxxa tal-assi taqbeż l-ammont miżmum fil-kotba tiegħu.

Eżempju li jispjega l-paragrafu 26(d)

L-identifikazzjoni ta' differenza temporanja deduċibbli fi tmiem is-Sena 2:

L-Entità A tixtri b'CU 1 000, fil-bidu tas-sena 1, strument ta' dejn b'valur nominali ta' CU 1 000 pagabbli mal-maturità f'ħames snin b'rata ta' imgħax ta' 2 % pagabbli fi tmiem kull sena. Ir-rata effettiva tal-imgħax hija ta' 2 %. L-istrument tad-dejn huwa mkejjel bil-valur ġust.

Fi tmiem is-Sena 2, il-valur ġust tal-istrument ta' dejn naqas għal CU918 bħala riżultat ta' żieda fir-rati tal-imgħax tas-suq għal 5 %. Ikun probabbli li l-Entità A tiġbor il-flussi ta' flus kuntrattwali kollha jekk hija tkompli żżomm l-istrument tad-dejn.

Kull qligħ (telf) fuq l-istrument ta' dejn huwa taxxabbli (deduċibbli) biss meta jiġi rrealizzat. Il-qligħ (telf) li jirriżulta mal-bejgħ jew il-maturità tal-istrument ta' dejn huwa kkalkulat għall-finijiet tat-taxxa bħala d-differenza bejn l-ammont miġbur u l-kost oriġinali tal-istrument tad-dejn.

Għaldaqstant, il-bażi għat-taxxa tal-istrument ta' dejn hija l-kost oriġinali tiegħu.

Id-differenza bejn l-ammont miżmum fil-kotba ta' CU918 għall-istrument tad-dejn muri fir-rapport tal-pożizzjoni finanzjarja tal-Entità A u l-bażi għat-taxxa tiegħu ta' CU 1 000 tagħti lok għal differenza temporanja deduċibbli ta' CU82 fi tmiem is-Sena 2 (ara l-paragrafi 20 u 26(d)), irrispettivament minn jekk l-Entità A tistenniex li tirkupra l-ammont miżmum fil-kotba tal-istrument tad-dejn permezz ta' bejgħ jew użu, jiġifieri billi żżommu u tiġbor il-flussi ta' flus kuntrattwali, jew taħlita tat-tnejn.

Dan huwa minħabba li d-differenzi temporanji deduċibbli huma differenzi bejn l-ammont miżmum fil-kotba ta' assi jew obbligazzjoni fir-rapport tal-pożizzjoni finanzjarja u l-bażi għat-taxxa tagħhom li jirriżultaw f'ammonti deduċibbli fil-kalkolu tal-profitt taxxabbli (telf ta' taxxa) ta' perjodi futuri meta l-ammont miżmum fil-kotba tal-assi jew l-obbligazzjoni jiġi rkuprat jew saldat (ara l-paragrafu 5). L-Entità A tikseb tnaqqis ekwivalenti għall-bażi għat-taxxa tal-assi ta' CU 1 000 fil-kalkolu tal-profitt taxxabbli (telf ta' taxxa) jew mal-bejgħ jew mal-maturità.

27

 It-treġġigħ lura ta' differenzi temporanji deduċibbli jirriżulta fi tnaqqis fil-kalkolu tal-profitti taxxabbli ta' perjodi futuri. Madankollu, benefiċċji ekonomiċi fil-forma ta' tnaqqis fil-pagamenti tat-taxxa jgħaddu għall-entità biss jekk tiggwadanja biżżejjed profitti taxxabbli biex tkun tista' ssir tpaċija tat-tnaqqis magħhom. Għalhekk, entità tirrikonoxxi assi ta' taxxa differita biss meta jkun probabbli li jkun hemm profitti taxxabbli biex id-differenzi temporanji deduċibbli jkunu jistgħu jintużaw għalihom.

27A

 Meta entità tivvaluta jekk hux se jkun hemm profitti taxxabbli disponibbli li għalihom tista' tuża differenza temporanja deduċibbli, hija tqis jekk il-liġi tat-taxxa tillimitax is-sorsi tal-profitti taxxabbli li għalihom tista' tagħmel tnaqqis mat-treġġigħ lura ta' din id-differenza temporanja deduċibbli. Jekk il-liġi tat-taxxa ma timponi l-ebda restrizzjoni bħal din, entità tivvaluta differenza temporanja deduċibbli flimkien mad-differenzi temporanji deduċibbli l-oħra kollha tagħha. Madankollu, jekk il-liġi tat-taxxa tirrestrinġi l-użu tat-telf għal tnaqqis għal introjtu ta' tip speċifiku, differenza temporanja deduċibbli tiġi vvalutata flimkien biss ma' differenzi temporanji deduċibbli oħra tat-tip xieraq.

28

 Huwa probabbli li jkun hemm profitt taxxabbli disponibbli li għalih differenza temporanja deduċibbli tkun tista' tintuża meta jkun hemm biżżejjed differenzi temporanji taxxabbli li jirrigwardaw l-istess awtorità ta' tassazzjoni u l-istess entità taxxabbli, li jkunu mistennija li jitreġġgħu lura:

(a)

fl-istess perjodu tat-treġġigħ lura mistenni tad-differenza temporanja deduċibbli; jew

(b)

f'perjodi li fihom telf ta' taxxa li jinħoloq mill-assi ta' taxxa differita jista' jiġi riportat lura jew 'il quddiem.

F'tali ċirkostanzi, l-assi ta' taxxa differita huwa rikonoxxut fil-perjodu li fih jinħolqu d-differenzi temporanji deduċibbli.

29

 Meta ma jkunx hemm biżżejjed differenzi temporanji taxxabbli li jirrigwardaw istess awtorità ta' tassazzjoni u mal-istess entità taxxabbli, l-assi tat-taxxa differita huwa rikonoxxut sal-punt li:

(a)

ikun probabbli li l-entità jkollha biżżejjed profitt taxxabbli li jirrigwarda l-istess awtorità tat-tassazzjoni u l-istess entità taxxabbli fl-istess perjodu tat-treġġigħ lura tad-differenza temporanja deduċibbli (jew fil-perjodi li fihom telf ta' taxxa li jinħoloq mill-assi ta' taxxa differita jista' jiġi riportat lura jew 'il quddiem). Fl-evalwazzjoni ta' jekk ikunx se jkollha biżżejjed profitt taxxabbli fil-perjodi futuri, entità:

(i)

tqabbel id-differenzi temporanji deduċibbli mal-profitt taxxabbli futur li jeskludi t-tnaqqis tat-taxxa li jirriżulta mit-treġġigħ lura ta' dawk id-differenzi temporanji deduċibbli. Dan it-tqabbil juri sa liema punt il-profitt taxxabbli futur ikun suffiċjenti għall-entità sabiex tnaqqas l-ammonti li jirriżultaw mit-treġġigħ lura ta' dawk id-differenzi temporanji deduċibbli.

(ii)

tinjora l-ammonti taxxabbli li jirriżultaw minn differenzi temporanji deduċibbli li huma mistennija li joriġinaw f'perjodi futuri, minħabba li l-assi tat-taxxa differita li jirriżulta minn dawn id-differenzi temporanji deduċibbli jkun jeħtieġ huwa stess li jkun hemm profitt taxxabbli futur sabiex ikun jista' jintuża.

(b)

ikunu disponibbli opportunitajiet ta' ppjanar tat-taxxa għall-entità li joħolqu profitt taxxabbli f'perjodi xierqa.

29A

 L-istima probabbli li jkun hemm profitt taxxabbli futur tista' tinkludi l-irkupru ta' xi assi ta' entità għal aktar mill-ammont miżmum fil-kotba tagħhom jekk ikun hemm evidenza biżżejjed li jkun probabbli li dan se jinkiseb mill-entità. Pereżempju, meta assi jitkejjel skont il-valur ġust, l-entità għandha tikkunsidra jekk ikunx hemm biżżejjed evidenza biex tikkonkludi li jkun probabbli li l-entità tirkupra l-assi għal aktar mill-ammont miżmum fil-kotba tiegħu. Dan jista' jkun il-każ, pereżempju, meta entità tkun qed tistenna li żżomm strument tad-dejn b'rata fissa u tiġbor il-flussi ta' flus kuntrattwali.

…

DATA EFFETTIVA

…

98G

 Ir-Rikonoxximent ta' Assi ta' Taxxa Differita għal Telf mhux Realizzat (Emendi għall-IAS 12), maħruġ f'Jannar 2016, emenda l-paragrafu 29 u żied il-paragrafi 27A, 29A u l-eżempju wara l-paragrafu 26. Entità għandha tapplika dawn l-emendi għal perjodi annwali li jibdew fl-1 ta' Jannar 2017 jew wara. Applikazzjoni qabel din id-data hija permessa. Jekk entità tapplika dawn l-emendi għal perjodu preċedenti, għandha tiddivulga dan il-fatt. Entità għandha tapplika dawn l-emendi retrospettivament skont l-IAS 8 Politiki ta' Kontabilità, Bidliet fl-Istimi ta' Kontabilità u Żbalji. Madankollu, mal-applikazzjoni inizjali tal-emenda, il-bidla fl-ekwità tal-bidu tal-aktar perjodu komparattiv bikri tista' tiġi rikonoxxuta fil-qligħ imfaddal tal-ftuħ (jew f'komponent ieħor ta' ekwità, skont il-każ), mingħajr ma tiġi allokata l-bidla bejn il-qligħ imfaddal tal-ftuħ u komponenti oħra ta' ekwità. Jekk entità tapplika dan it-tnaqqis, hija għandha tiddivulga dan il-fatt.