(1)

Ir-Regolament (KE) Nru 854/2004 jistabbilixxi regoli speċifiċi għall-organizzazzjoni ta' kontrolli uffiċjali fuq prodotti li joriġinaw mill-annimali u r-Regolament (KE) Nru 853/2004 jistabbilixxi ċerti rekwiżiti speċifiċi dwar regoli ta' iġjene għall-ikel li joriġina mill-annimali. Il-miżuri ta' implimentazzjoni għal dawk ir-Regolamenti rigward il-metodi ta' ttestjar rikonoxxuti għall-bijotossini marini huma stabbiliti fl-Anness III tar-Regolament tal-Kummissjoni (KE) Nru 2074/2005 (3).

(2)

Il-punt 2 tal-Kapitolu I tal-Anness III tar-Regolament (KE) Nru 2074/2005 jipprevedi li jekk ir-riżultati tal-metodu għas-sejbien tal-velenu paralitiku tal-frott tal-baħar (PSP) jiġu kkontestati, il-metodu ta' referenza għandu jkun il-metodu bijoloġiku.

(3)

Waqt is-sitta u tletin sessjoni tal-Kumitat Codex Alimentarius dwar metodi ta' analiżi u teħid ta' kampjuni (Budapest, l-Ungerija, mit-23 sas-27 ta' Frar 2015) (4), ġie kkonfermat li l-metodu ta' ttestjar bijoloġiku fit-Taqsima I-8.6.2 tal-Codex għandu jibqa' kklassifikat bħala tat-Tip IV (5).

(4)

Il-metodi kollha tal-Codex, inklużi l-metodi tat-Tip IV, jistgħu jintużaw biss għall-kontroll, l-ispezzjoni u r-regolamentazzjoni (Principles for the establishment of methods of analysis), u jekk il-partijiet jaqblu dwar dan, għar-riżoluzzjoni tat-tilwim (Guidelines for Settling Disputes on Analytical (Test) Results (CAC/GL 70-2009), iżda mhux bħala metodi ta' referenza.

(5)

Meta jitqies li metodu tat-Tip IV ma jistax jintuża bħala metodu ta' referenza, huwa importanti li r-regoli attwali tal-Unjoni jiġu adattati għall-istandards internazzjonali.

(6)

Meta jitqies li l-hekk imsejjaħ metodu Lawrence, kif ippubblikat fil-Metodu Uffiċjali 2005.06 tal-AOAC (Paralytic Shellfish Poisoning Toxins in Shellfish), attwalment qed jintuża għas-sejbien tal-kontenut ta' velenu paralitiku tal-frott tal-baħar (PSP) fil-partijiet tal-molluski li jittieklu, huwa xieraq li dan il-metodu jintuża bħala l-metodu ta' referenza għas-sejbien ta' dawk it-tossini.

(7)

Għalhekk, jenħtieġ li l-Kapitolu I tal-Anness III tar-Regolament (KE) Nru 2074/2005 jiġi emendat skont dan.

(8)

Sabiex l-Istati Membri jkunu jistgħu jadattaw il-metodi tagħhom għall-metodu kimiku, il-metodu tal-ittestjar bijoloġiku jista' jibqa' jintuża bħala l-metodu ta' referenza sal-31 ta' Diċembru 2018.

(9)

Il-miżuri previsti f'dan ir-Regolament huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,