(1)

L-Artikolu 3(1)(a) tar-Regolament ta' Delega tal-Kummissjoni (UE) Nru 906/2014 (2) jistipula li n-nefqa relatata mal-ispejjeż finanzjarji mġarrba mill-Istati Membri sabiex jimmobilizzaw fondi biex jixtru l-prodotti għandha tiġi ddeterminata skont il-metodi stabbiliti fl-Anness I ta' dak ir-Regolament.

(2)

Il-punt I.1 tal-Anness I tar-Regolament ta' Delega (UE) Nru 906/2014 jistipula li l-kalkolu tal-ispejjeż ta' finanzjament ikkonċernati jrid isir abbażi ta' rata tal-imgħax li tkun l-istess fl-Unjoni kollha u li tkun stabbilita mill-Kummissjoni fil-bidu ta' kull sena fiskali. Din ir-rata tal-imgħax tikkorrispondi għall-medja tar-rati tal-Euribor għal terminu ta' tliet xhur u ta' 12-il xahar, reġistrati matul il-perjodu ta' referenza ta' sitt xhur li jrid jiġi determinat mill-Kummissjoni, qabel in-notifika mingħand l-Istati Membri stipulata fl-ewwel paragrafu tal-punt I.2 ta' dak l-Anness, b'koeffiċjent ta' korrezzjoni ta' terz u żewġ terzi rispettivament.

(3)

Biex jiġu ddeterminati r-rati tal-imgħax applikabbli għal sena finanzjarja partikolari, l-ewwel paragrafu tal-punt I.2 tal-Anness I tar-Regolament ta' Delega (UE) Nru 906/2014 jistipula li l-Istati Membri għandhom jinnotifikaw lill-Kummissjoni, meta titlob dan, ir-rata tal-imgħax medja mġarrba minnhom fil-verità matul il-perjodu ta' referenza li hemm referenza għalih fil-punt I.1 ta' dan l-Anness, sa mhux iktar tard mid-data ta' skadenza msemmija f'dik it-talba.

(4)

Barra minn hekk, f'konformità mat-tieni paragrafu tal-punt I.2 tal-Anness I tar-Regolament ta' Delega (UE) Nru 906/2014, jekk Stat Membru ma jibgħat l-ebda notifika, fil-forma u sad-data tal-iskadenza msemmijin fl-ewwel paragrafu ta' dak il-punt, ir-rata tal-imgħax imġarrba minn dak l-Istat Membru għandha titqies bħala 0 %. Jekk Stat Membru jiddikjara li ma ġarrab l-ebda spiża tal-imgħax għax ma kellux prodotti agrikoli fil-ħżin pubbliku matul il-perjodu ta' referenza, il-Kummissjoni għandha tistabbilixxi dik ir-rata tal-imgħax skont it-tielet paragrafu ta' dak il-punt.

(5)

Skont il-punt I.3 tal-Anness I tar-Regolament ta' Delega (UE) Nru 906/2014, ir-rata tal-imgħax stabbilita abbażi tal-punt I.2 ta' dak l-Anness għandha titqabbel mar-rata tal-imgħax uniformi stabbilita abbażi tal-punt I.1 ta' dak l-Anness. Ir-rata tal-imgħax applikabbli għal kull Stat Membru għandha tkun l-aktar waħda baxxa minn dawn iż-żewġ rati tal-imgħax. Madankollu, għall-fini tar-rimbors tal-infiq tal-Istati Membri, ir-rati tal-imgħax negattivi ma jistgħux jiġu kkunsidrati.

(6)

Ir-rati tal-imgħax applikabbli għas-sena fiskali tal-2018 tal-FAEG jenħtieġ jiġu stabbiliti billi jitqiesu dawk il-fatturi differenti.

(7)

Sabiex jiġi evitat li jkun hemm lakuna ġuridika rigward ir-rata tal-imgħax applikabbli għall-kalkolu tal-ispejjeż ta' finanzjament tal-miżuri ta' intervent, huwa xieraq li r-rata l-ġdida tapplika retroattivament mill-1 ta' Ottubru 2017,