(1)

Sabiex ikun żgurat approċċ armonizzat għall-applikazzjoni ta' limiti ta' pożizzjoni għal derivattivi ta' komoditajiet, jenħtieġ li tiġi speċifikata metodoloġija għall-kalkolu ta' dawk il-limiti. Jenħtieġ li l-metodoloġija tipprevjeni l-arbitraġġ regolatorju u tippromwovi l-konsistenza filwaqt li tipprovdi lill-awtoritajiet kompetenti bi flessibilità suffiċjenti biex jitqiesu l-varjazzjonijiet fost swieq ta' derivattivi ta' komoditajiet differenti u s-swieq fil-komoditajiet sottostanti. Il-metodoloġija għall-kalkolu tal-limiti jenħtieġ li tippermetti lill-awtoritajiet kompetenti jibbilanċjaw l-objettivi tal-istabbiliment ta' limiti f'livell suffiċjentement baxx sabiex persuni li jkollhom pożizzjonijiet f'dawk id-derivattivi ta' komoditajiet ma jitħallewx jabbużaw jew jagħmlu distorsjoni fis-suq, mal-objettivi li jkunu appoġġjati arranġamenti ta' pprezzar u ta' riżoluzzjoni ordnati, jiġu żviluppati derivattivi ta' komoditajiet ġodda u d-derivattivi ta' komoditajiet jiġu megħjuna jkomplu jappoġġjaw il-funzjonament ta' attivitajiet kummerċjali fis-suq tal-komoditajiet sottostanti.

(2)

Sabiex ikunu identifikati b'mod ċar numru limitat ta' kunċetti li joħorġu mid-Direttiva 2014/65/UE, kif ukoll biex ikunu speċifikati termini tekniċi meħtieġa għal dan ir-Regolament, jenħtieġ li jiġu definiti numru ta' termini sabiex tkun żgurata applikazzjoni uniformi.

(3)

Pożizzjonijiet twal u qosra f'derivattiv ta' komodità ta' parteċipanti tas-suq jenħtieġ li jiġu nnettjati kontra xulxin biex jiġi determinat id-daqs effettiv ta' pożizzjoni li persuna tikkontrolla fi kwalunkwe mument. Id-daqs ta' pożizzjoni miżmum permezz ta' kuntratt ta' opzjoni jenħtieġ li jiġi kkalkulat fuq bażi ta' ekwivalenti għad-delta. Peress li dan ir-Regolament japplika metodoloġija differenti għall-kalkolu ta' limiti ta' pożizzjoni għal kuntratti ta' xahar spot jew xhur oħra, tali nnettjar jenħtieġ li jiġi applikat b'mod separat għall-pożizzjonijiet tax-xahar spot u tax-xhur l-oħra.

(4)

Id-Direttiva 2014/65/UE tirrikjedi li kwalunkwe pożizzjoni miżmuma minn persuni oħra f'isem persuna jenħtieġ li tkun inkluża fil-kalkolu tal-limitu ta' pożizzjoni ta' dik il-persuna u għal limiti ta' pożizzjoni li jenħtieġ li jiġu applikati kemm fil-livell ta' entità kif ukoll fil-livell ta' grupp u għaldaqstant jeħtieġ li jiġu aggregati l-pożizzjonijiet fil-livell ta' grupp. Ikun xieraq li tiġi pprovduta biss aggregazzjoni fil-livell ta' grupp jekk impriża omm tista' tikkontrolla l-użu tal-pożizzjonijiet. Għaldaqstant, l-impriżi omm jenħtieġ li jaggregaw il-pożizzjonijiet li jkollhom is-sussidjarji tagħhom ma' kwalunkwe pożizzjoni li l-entità omm ikollha direttament, minbarra li s-sussidjarji jaggregaw ukoll il-pożizzjonijiet tagħhom. Tali aggregrazzjoni tista' twassal biex il-pożizzjonijiet ikkalkulati fil-livell tal-impriża omm li jkunu akbar jew, minħabba nnettjar ta' pożizzjonijiet twal u qosra f'idejn sussidjarji differenti, iktar baxxi mil-livell ta' sussidjarju individwali. Jenħtieġ li l-pożizzjonijiet ma jiġux aggregati fil-livell tal-impriża omm jekk il-pożizzjonijiet huma f'idejn impriżi ta' investiment kollettiv li jkollhom dawk il-pożizzjonijiet f'isem l-investituri tagħhom minflok f'isem l-impriżi omm tagħhom f'każijiet fejn l-impriża omm ma tistax tikkontrolla l-użu ta' dawk il-pożizzjonijiet għall-benefiċċju tagħha stess.

(5)

Il-kunċett tal-istess derivattiv ta' komodità jenħtieġ li jistabbilixxi limitu massimu ta' domanda sabiex ħadd ma jkun jista' jinnettja b'mod mhux xieraq pożizzjonijiet ma' derivattivi ta' komoditajiet mhux simili sabiex jevita u jdgħajjef ir-robustezza tal-limitu ta' pożizzjoni fil-kuntratt prinċipali ta' derivattiv ta' komodità. Jenħtieġ li dan ma jwaqqafx lill-awtoritajiet kompetenti milli jistabbilixxu limiti ta' pożizzjoni simili għal kuntratti ta' derivattiv ta' komoditajiet simili taħt il-koordinazzjoni tal-Awtorità Ewropea tat-Titolu u s-Swieq (ESMA). Derivattivi ta' komoditajiet jenħtieġ li jitqiesu biss bħala negozjar f'volum sinifikattiv f'ċentru tan-negozjar jekk jeċċedu l-livell limitu massimu ta' likwidità speċifikat f'dan ir-Regolament għal perjodu ta' żmien suffiċjenti.

(6)

Fil-każ fejn kuntratt barra l-Borża (OTC) ikun ivvalutat fuq l-istess komodità sottostanti li huwa konsenjabbli fl-istess post u bl-istess kundizzjonijiet kuntrattwali u jekk qed ikollu eżitu ekonomiku korrelat ħafna għal kuntratt innegozjat f'ċentru tan-negozjar, jenħtieġ li jitqies ekonomikament ekwivalenti irrispettivament minn differenzi żgħar fl-ispeċifikazzjonijiet kuntrattwali li jikkonċernaw id-daqsijiet tal-lott u d-data tal-konsenja. Barra minn hekk, differenzi fl-arranġamenti għall-ġestjoni tar-riskju ta' wara n-negozju, bħal arranġamenti ta' kklerjar, jenħtieġ li ma jkunux ta' ostakli biex tali kuntratti jiġu ddikjarati bħala ekonomikament ekwivalenti. Sabiex jiġi evitat li jsir innettjar mhux xieraq ta' pożizzjonijiet potenzjalment dominanti nnegozjati f'ċentru tan-negozjar bl-użu ta' arranġamenti bilaterali f'kuntratti OTC u sabiex ikun żgurat it-tħaddim effiċjenti tar-reġim ta' limitazzjonijiet ta' pożizzjoni fil-prattika, jeħtieġ li derivattivi ta' komoditajiet nnegozjati OTC jiġu kkunsidrati ekonomikament ekwivalenti għal kuntratti ta' ċentru tan-negozju f'ċirkustanzi limitati biss. Sabiex jiġi skoraġġit l-evitar ta' limitazzjonijiet ta' pożizzjoni u sabiex tittejjeb l-integrità tar-reġim tal-limitu ta' pożizzjoni, jeħtieġ li definizzjoni ta' kuntratt OTC ekonomikament ekwivalenti tkun ifformulata b'mod ristrett sabiex ma tippermettix li persuna tinnettja pożizzjoni OTC fir-rigward ta' pożizzjonijiet multipli oħra jew li teżerċita diskrezzjoni fl-għażla ta' pożizzjonijiet li fir-rigward tagħhom hija nnettjata.

(7)

Sabiex jiġi stabbilit liema pożizzjonijiet f'derivattivi ta' komoditajiet jistgħu jitkejlu b'mod oġġettiv bħala li jnaqqsu r-riskji direttament relatati ma' attività kummerċjali, jenħtieġ li jiġu pprovduti ċerti kriterji, inkluż l-użu tad-definizzjoni kontabilistika ta' kuntratt ta' ħħeġġjar ibbażata fuq ir-regoli tal-Istandards Internazzjonali tar-Rappurtar Finanzjarju (IFRS). Dik id-definizzjoni ta' kontabilità jenħtieġ li tkun disponibbli wkoll għal entitajiet mhux finanzjarji minkejja li ma japplikawx ir-regoli tal-IFRS fil-livell ta' entità.

(8)

Barra minn hekk, l-entitajiet mhux finanzjarji jenħtieġ li jkunu jistgħu jużaw tekniki ta' ġestjoni tar-riskju biex itaffu r-riskji ġenerali li jirriżultaw mill-attività kummerċjali tagħhom jew dik tal-grupp tagħhom, inklużi riskji li jirriżultaw minn bosta swieq ġeografiċi, bosta prodotti, orizzonti ta' żmien jew entitajiet (“iħħeġġjar makro jew ta' portafoll”). Meta entità mhux finanzjarja tuża ħħeġġjar makro jew ta' portafoll, jista' jkun li ma tkunx tista' tistabbilixxi rabta individwali bejn pożizzjoni speċifika f'derivattiv ta' komodità u riskju speċifiku li jirriżulta mill-attività kummerċjali li d-derivattiv ta' komodità huwa maħsub li jiħħeġġja. Entità mhux finanzjarja tista' tuża wkoll derivattiv ta' komodità mhux ekwivalenti biex tiħħeġġja riskju speċifiku li jirriżulta minn attività kummerċjali fejn ma jkunx disponibbli derivattiv ta' komodità identiku jew fejn derivattiv ta' komodità korrelatat iktar mill-qrib ma jkollux likwidità suffiċjenti (“proxy hedging”). F'każijiet bħal dawn, il-linji politiċi u s-sistemi għall-ġestjoni tar-riskju jenħtieġ li jkunu jistgħu jipprevjenu li tranżazzjonijiet mhux ta' ħħeġġjar jiġu kategorizzati bħala ħħeġġjar u jenħtieġ li jkunu kapaċi jipprovdu għal ħarsa suffiċjentement diżaggregata lejn il-portafoll ta' ħħeġġjar sabiex komponenti spekulattivi jiġu identifikati u kkunsidrati fir-rigward tal-limitazzjonijiet ta' pożizzjoni. Jenħtieġ li l-pożizzjonijiet ma jikkwalifikawx bħala li jnaqqsu r-riskji relatati ma' attività kummerċjali fuq il-bażi biss li ġew inklużi bħala parti minn portafoll ta' tnaqqis tar-riskju fuq bażi ġenerali.

(9)

Riskju jista' jevolvi maż-żmien u, sabiex isir adattament għall-evoluzzjoni tar-riskju, id-derivattivi ta' komoditajiet inizjalment imwettqa biex jitnaqqas ir-riskju relatat ma' attività kummerċjali, jista' jkun ikollu jiġi kkumpensat permezz tal-użu ta' kuntratti ta' derivattiv ta' komodità addizzjonali li jagħlqu dawk il-kuntratti ta' derivattiv ta' komodità li ma jkunux għadhom relatati mar-riskju kummerċjali. Minbarra dan, l-evoluzzjoni ta' riskju li jkun ġie indirizzat billi pożizzjoni tiddaħħal f'derivattiv ta' komodità għall-fini tat-tnaqqis tar-riskju jenħtieġ li sussegwentement ma tagħtix lok għall-evalwazzjoni mill-ġdid ta' dik il-pożizzjoni bħala li hi tranżazzjoni privileġġata ab initio.

(10)

Entitajiet mhux finanzjarji jenħtieġ li jkunu jistgħu japplikaw għall-eżenzjoni fir-rigward tal-iħħeġġjar ta' attivitajiet kummerċjali qabel jidħlu f'pożizzjoni. L-applikazzjoni jenħtieġ li tagħti lill-awtorità kompetenti ħarsa ġenerali ċara u konċiża tal-attivitajiet kummerċjali tal-entità mhux finanzjarja fir-rigward tal-komodità sottostanti, ir-riskji assoċjati u kif id-derivattivi ta' komoditajiet huma użati biex jittaffew dawk ir-riskji. Il-limiti ta' pożizzjoni japplikaw f'kull ħin u jekk fl-aħħar mill-aħħar l-eżenzjoni ma tingħatax mill-awtorità kompetenti, jenħtieġ li l-entità mhux finanzjarja għaldaqstant tnaqqas kwalunkwe pożizzjoni li tkun teċċedi limitu u jista' jkun li jkollha taffaċċja miżuri superviżorji fir-rigward ta' ksur ta' limitu. Entitajiet mhux finanzjarji jenħtieġ li jivvalutaw mill-ġdid l-attivitajiet tagħhom perjodikament sabiex ikunu żguri li l-applikazzjoni kontinwa tal-eżenzjoni hija ġustifikata.

(11)

Il-perjodu ta' xahar spot, li huwa l-perjodu ta' żmien minnufih qabel il-konsenja fl-iskadenza, huwa speċifiku għal kull derivattiv ta' komodità u jista' ma jikkorrispondix għal eżattament xahar wieħed. Għaldaqstant kuntratti ta' xahar spot jenħtieġ li jirreferu għall-kuntratt li jkun il-kuntratt li jmiss f'dak id-derivattiv ta' komodità biex jimmatura. Ir-restrizzjoni tal-pożizzjonijiet li persuna jista' jkollha fil-perjodu li matulu għandha ssir il-konsenja tal-komodità fiżiku tillimita l-kwantità tal-provvista konsenjabbli sottostanti li kull persuna tista' tagħmel jew tirċievi f'konsenja, u b'hekk tiġi evitata l-akkumulazzjoni ta' pożizzjonijiet dominanti minn individwi li jistgħu b'hekk ikunu f'pożizzjoni li jagħmlu squeeze tas-suq billi jirrestrinġu l-aċċess għall-komodità. Il-linja bażi standard għal-limitu ta' pożizzjoni tax-xahar spot kemm għad-derivattivi ta' komoditajiet saldati fiżikament kif ukoll għal dawk saldati b'kontanti għandha għalhekk tkun maħduma bħala perċentwal tal-istima tal-provvista konsenjabbli. L-awtoritajiet kompetenti jenħtieġ li jkunu jistgħu jimplimentaw skeda għat-tnaqqis ta' limiti ta' pożizzjoni fuq firxa mill-mument meta kuntratt isir kuntratt ta' xahar spot sal-maturità sabiex ikun żgurat b'mod aktar preċiż li tul il-perjodu tax-xahar spot kollu jkunu stabbiliti b'mod adegwat limiti ta' pożizzjoni u sabiex ikun żgurat saldament mingħajr problemi.

(12)

Il-limitu ta' pożizzjoni tax-xhur l-oħra huwa applikat mal-firxa tal-maturitajiet kollha minbarra x-xahar spot. Il-linja bażi standard għal-limiti ta' pożizzjoni tax-xhur l-oħra kemm għad-derivattivi ta' komoditajiet saldati fiżikament kif ukoll għal dawk saldati b'kontanti għandha tinħadem bħala perċentwal tal-interess miftuħ totali. Id-distribuzzjoni tal-pożizzjonijiet mal-firxa tax-xhur l-oħra ta' kuntratt ta' komodità hija ta' spiss ikkonċentrata fl-aktar xhur qrib ta' maturità. Għalhekk, l-interess miftuħ totali jipprovdi linja bażi aktar adatta għall-istabbiliment ta' limiti ta' pożizzjoni mill-użu ta' ċifra maħduma fuq medja fuq il-maturitajiet kollha.

(13)

Il-linja bażi standard ta' 25 % ta' provvista konsenjabbli u ta' interess miftuħ ġiet stabbilita b'referenza għall-esperjenza ta' swieq oħra u ġurisdizzjonijiet oħra. Il-linja bażi għandha tkun aġġustata mill-awtoritajiet kompetenti biex tkun tista' tiġi mnaqqsa b'massimu ta' 20 % (jew 22,5 % fil-każ ta' xi derivattivi ta' komoditajiet agrikoli) u li tiġi miżjuda b'massimu ta' 10 % (jew 15 % fil-każ ta' derivattivi ta' komoditajiet inqas likwidi) jekk il-karatteristiċi tas-suq ikunu jirrikjedu dan, bħan-nuqqas ta' parteċipanti fis-suq, jew sabiex ikun appoġġjat is-saldament mingħajr problemi u l-funzjonament tal-kuntratt u s-suq sottostanti tiegħu. Peress li kull aġġustament għaċ-ċifra linja bażi japplika biss jekk, u sakemm, il-karatteristiċi tal-objettivi tas-suq jeħtieġu dan, l-aġġustamenti temporanji għal-linja bażi jenħtieġu għalhekk ikunu possibbli. L-awtoritajiet kompetenti għandhom jiżguraw li aġġustament 'l isfel tal-linja bażi jiġi affettwat kull meta dan ikun meħtieġ biex jiġu evitati pożizzjonijiet dominanti u biex jiġi appoġġjat l-ipprezzar ordinat fid-derivattiv ta' komodità u fil-komodità sottostanti. Il-firxa tirrifletti l-fatt li d-Direttiva 2014/65/UE tkopri firxa usa' ta' derivattivi ta' komoditajiet u swieq minn swieq u ġurisdizzjonijiet oħra. Id-definizzjoni ta' derivattiv ta' komodità skont l-Artikolu 2(1)(30) tar-Regolament (UE) Nru 600/2014 tal-Parlament Ewropew u tal-Kunsill (2) hija wiesgħa, u tinkludi wkoll derivattivi titolizzati u derivattivi saldati b'kontanti li ma għandhomx bażi tanġibbli bħal varjabbli tal-klima. Għal derivattivi titolizzati l-kunċett ta' xahar spot u xhur oħra ma japplikax. Għal derivattivi mingħajr bażi tanġibbli l-provvista konsenjabbli ma tistax tintuża biex ikun stabbilit limitu ta' pożizzjoni. Għaldaqstant l-awtoritajiet kompetenti għandhom ikunu jistgħu jtejbu jew jaġġustaw il-metodoloġiji biex jiddeterminaw il-limiti ta' pożizzjoni għal dawn id-derivattivi ta' komoditajiet fuq parametri differenti bħan-numru ta' titoli maħruġa jew l-użu ta' interess miftuħ għax-xahar spot.

(14)

Ċerti derivattivi ta' komoditajiet, b'mod partikolari għall-enerġija u l-gass, jipprovdu li s-sottostanti jkunu konsenjati kostantement fuq perjodu speċifikat ta' żmien bħal jum, xahar jew sena. Barra minn hekk, ċerti kuntratti b'perjodi ta' konsenja itwal bħal sena jew tliet xhur jistgħu jiġu awtomatikament sostitwiti b'kuntratti relatati ta' perjodi ta' konsenja iqsar bħal tliet xhur jew xahar (kuntratti kaskata). F'dawn il-każijiet, limitu ta' pożizzjoni ta' xahar spot għall-kuntratt li għandu jiġi sostitwit qabel il-konsenja ma jkunx xieraq, peress li tali limitu ma jkoprix l-iskadenza u l-konsenja fiżika jew saldament b'kontanti tal-kuntratt. Sal-punt li perjodi ta' konsenja ta' kuntratti tal-istess sovraimpożizzjoni sottostanti, limitu ta' pożizzjoni uniku għandu japplika għall-kuntratti relatati kollha sabiex jitqiesu tajjeb il-pożizzjonijiet tul dawk il-kuntratti li jistgħu potenzjalment ikunu konsenjati. Sabiex dan ikun faċilitat, kuntratti relatati għandhom jitkejlu f'unitajiet tas-sottostanti u jiġu aggregati u nnettjati skont il-każ.

(15)

Għal ċerti derivattivi ta' komoditajiet agrikoli, li għandhom impatt materjali fuq il-prezzijiet tal-ikel għall-konsumaturi, il-metodoloġija tippermetti lil awtorità kompetenti tistabbilixxi linja bażi u limitu ta' pożizzjoni taħt il-minimu tal-medda ġenerali fejn issib evidenza ta' attività spekulattiva b'impatt sinifikanti fuq il-prezzijiet.

(16)

L-awtorità kompetenti għandha tivvaluta jekk il-fatturi elenkati taħt il-paragrafu 3 tal-Artikolu 57 tad-Direttiva 2014/65/UE jeħtiġux aġġustament tal-linja bażi sabiex jiġi stabbilit il-livell finali tal-limitu ta' pożizzjoni. Il-valutazzjoni għandha tqis dawn il-fatturi bħala rilevanti għad-derivattiv ta' komodità partikolari inkwistjoni. Il-metodoloġiji għandhom jipprovdu direzzjoni dwar kif jiġi stabbilit il-limitu mingħajr ma titneħħa d-deċiżjoni aħħarija dwar limitu ta' pożizzjoni adatt għal derivattiv ta' komodità mill-awtorità kompetenti sabiex ikun evitat abbuż tas-suq. Il-fatturi għandhom jagħtu indikazzjonijiet importanti lill-awtoritajiet kompetenti u lill-ESMA biex jiġi ffaċilitat il-ħolqien tal-opinjonijiet tagħha u jiġi żgurat allinjament xieraq mal-limiti ta' pożizzjonijiet madwar l-Unjoni, inkluż billi jiġi vvalutat l-impatt tal-volatilità fuq bażi ta' każ b'każ u bil-frekwenza meħtieġa biex jiġi żgurat li l-limiti ta' pożizzjoni jibqgħu xierqa.

(17)

Il-limiti ta' pożizzjoni ma għandhomx joħolqu ostakli għall-iżvilupp ta' derivattivi ta' komoditajiet ġodda u ma għandhomx ifixklu taqsimiet inqas likwidi tas-swieq ta' derivattivi ta' komoditajiet milli jaħdmu sew. Meta japplikaw il-metodoloġija, l-awtoritajiet kompetenti għandhom iqisu l-ħin meħtieġ biex tkun żviluppata u miġbuda l-likwidità kemm lejn derivattivi ta' komoditajiet ġodda kif ukoll lejn dawk eżistenti u, b'mod partikolari, lejn derivattivi ta' komoditajiet li jistgħu jappoġġjaw il-ġestjoni tar-riskju fi swieq mfassla apposta jew immaturi jew li jippruvaw jiżviluppaw arranġamenti ta' ħħeġġjar ġodda f'komoditajiet ġodda. Minħabba l-firxa wiesgħa ta' swieq u komoditajiet li fir-rigward tagħhom japplika r-reġim ta' limiti ta' pożizzjoni, ma hemm l-ebda perjodu ta' żmien uniku u predeterminat li jaqbad b'mod adegwat iċ-ċaqliqa milli kuntratt ta' derivattiv ta' komodità jkun ġdid għal li jkun stabbilit. Bl-istess mod, hemm bosta kuntratti ta' derivattivi ta' komoditajiet li jistgħu ma jiġbdu qatt biżżejjed parteċipanti jew likwidità biex tkun possibbli l-applikazzjoni effettiva ta' limiti ta' pożizzjoni mingħajr ir-riskju li l-parteċipanti regolarment u mingħajr ma jridu jiksru l-limitu u konsegwentement ifixklu l-ipprezzar u s-saldu ta' dawk id-derivattivi ta' komoditajiet. Sabiex ikunu indirizzati dawn ir-riskji għall-funzjonament effiċjenti tas-swieq, il-metodoloġija tipprevedi approċċ b'diversi saffi fejn il-limitu ta' pożizzjoni għax-xahar spot u għax-xhur l-oħra jkun stabbilit f'livell fiss ta' 2 500 lott għad-derivattivi ta' komoditajiet u ta' 2,5 miljun titolu għad-derivattivi titolarizzati b'komodità sottostanti sakemm jinqabeż livell limitu massimu ta' 10 000 lott jew 10 miljun titolu, rispettivament. Il-kuntratti li jaqbżu dawn il-limiti massimi filwaqt li xorta jibqgħu relattivament illikwidi għandhom, fejn ikun il-każ, ikunu jistgħu jibbenefikaw minn limitu ogħla sabiex ikun żgurat li n-negozjar f'kuntratti tali ma jkunx ristrett bla bżonn.

(18)

In-numru, il-kompożizzjoni, u r-rwol tal-parteċipanti tas-suq f'derivattiv ta' komodità jistgħu jinfluwenzaw in-natura u d-daqs tal-pożizzjonijiet li ċerti parteċipanti tas-suq ikollhom fis-suq. Għal xi derivattivi ta' komoditajiet, ċerti parteċipanti tas-suq jista' jkollhom pożizzjoni kbira li tirrifletti r-rwol tagħhom fix-xiri u l-bejgħ tal-komodità, u l-konsenja tagħha, meta jkunu fuq in-naħa l-oħra tas-suq meta mqabbla mal-maġġoranza tal-parteċipanti tas-suq l-oħra li jkunu jipprovdu likwidità jew servizzi għall-ġestjoni tar-riskju għas-suq tal-komodità sottostanti.

(19)

Il-provvista, l-użu, l-aċċess għal, u d-disponibbiltà tal-komodità sottostanti huma karatteristiċi tas-suq tal-komodità sottostanti. Permezz tal-valutazzjoni ta' komponenti aktar granulari ta' dawn il-karatteristiċi, bħad-deterjorabbiltà tal-komodità u l-metodu ta' trasportazzjoni, l-awtorità kompetenti tista' tiddetermina l-flessibbiltà tas-suq u taġġusta l-limiti ta' pożizzjoni skont il-każ.

(20)

Għal xi derivattivi ta' komoditajiet jista' jkun hemm diskrepanza kbira bejn l-interess miftuħ u l-provvista konsenjabbli. Dan jista' jiġri meta hemm relattivament ftit negozjar fid-derivattivi meta mqabbel mal-provvista konsenjabbli, f'liema l-każ l-interess miftuħ ikun iżgħar meta mqabbel mal-provvista konsenjabbli, jew, pereżempju, fejn derivattiv ta' komodità partikolari jintuża b'mod wiesa' għall-iħħeġġjar ta' bosta esponimenti għar-riskju differenti u l-provvista konsenjabbli tkun għalhekk iżgħar meta mqabbla mal-interess miftuħ. Diskrepanzi sinifikanti bħal dawn bejn l-interess miftuħ u l-provvista konsenjabbli jiġġustifikaw aġġustamenti mil-linja bażi applikabbli għal-limiti tax-xhur l-oħra 'l isfel jew 'il fuq sabiex ikun evitat suq diżordinat meta joqrob ix-xahar spot.

(21)

Bl-istess objettiv li jkunu limitati swieq diżordinati kif joqrob ix-xahar spot minħabba diskrepanzi kbar bejn il-kalkoli tal-provvista konsenjabbli u l-interess miftuħ, il-konsenja konsenjabbli hija definita bħala li tinkludi kwalunkwe gradi jew tipi sostituti ta' komodità li jista' jkun konsenjat f'saldament ta' kuntratt ta' derivattiv ta' komodità taħt it-termini ta' dak il-kuntratt.

(22)

Il-leġiżlazzjoni l-ġdida tal-Parlament Ewropew u tal-Kunsill dwar is-swieq fi strumenti finanzjarji stabbiliti fid-Direttiva 2014/65/UE u r-Regolament (UE) Nru 600/2014 japplika mit-3 ta' Jannar 2017. Sabiex tiġi żgurata l-konsistenza u ċ-ċertezza legali, dan ir-Regolament għandu japplika mill-istess data.

(23)

Dan ir-Regolament huwa bbażat fuq l-abbozz ta' standards tekniċi regolatorji ppreżentati mill-ESMA lill-Kummissjoni.

(24)

L-ESMA wettqet konsultazzjonijiet pubbliċi miftuħin dwar l-abbozz ta' standards tekniċi regolatorji li fuqu huwa bbażat dan ir-Regolament, analizzat l-ispejjeż u l-benefiċċji potenzjali relatati u talbet l-opinjoni tal-Grupp tal-Partijiet Interessati tat-Titoli u s-Swieq stabbilit mill-Artikolu 37 tar-Regolament (UE) Nru 1095/2010 tal-Parlament Ewropew u tal-Kunsill (3),