1.   Dan ir-Regolament jistabbilixxi regoli dettaljati għar-rekwiżiti organizzazzjonali tas-sistemi taċ-ċentri ta' negozjar li jippermettu n-negozjar algoritmiku, fir-rigward tar-reżiljenza u l-kapaċità tagħhom, rekwiżiti għaċ-ċentri ta' negozjar biex jiżguraw ittestjar xieraq tal-algoritmi u rekwiżiti fir-rigward tal-kontrolli li jikkonċernaw id-DEA skont l-Artikolu 48(12)(a), (b) u (g) tad-Direttiva 2014/65/UE.

2.   Għall-finijiet ta' dan ir-Regolament, qed jitqies li ċentru ta' negozjar jippermetti negozjar algoritmiku fejn il-preżentazzjoni tal-ordnijiet u t-tqabbil tal-ordnijiet jiġu ffaċilitati b'mezzi elettroniċi.

3.   Għall-finijiet ta' dan ir-Regolament, kwalunkwe arranġament jew sistema li tippermetti negozjar algoritmiku għandha titqies bħala “sistema ta' negozjar algoritmiku”.

1.   Qabel tibda tintuża sistema ta' negozjar u tal-anqas darba fis-sena, iċ-ċentri ta' negozjar għandhom iwettqu awtovalutazzjoni tal-konformità tagħhom mal-Artikolu 48 tad-Direttiva 2014/65/UE, billi jqisu n-natura, l-iskala u l-kumplessità tan-negozju tagħhom. L-awtovalutazzjoni għandha tinkludi analiżi tal-parametri kollha stabbiliti fl-Anness għal dan ir-Regolament.

2.   Iċ-ċentri ta' negozjar għandhom iżommu rekord tal-awtovalutazzjoni tagħhom għal tal-anqas ħames snin.

1.   Bħala parti mill-qafas globali tagħhom ta' governanza u teħid tad-deċiżjonijiet, iċ-ċentri ta' negozjar għandhom jistabbilixxu u jagħmlu monitoraġġ tas-sistemi ta' negozjar tagħhom permezz ta' arranġament formalizzat ta' governanza li jistabbilixxi:

(a)	l-analiżi tagħhom ta' kwistjonijiet tekniċi, ta' riskju u ta' konformità meta jittieħdu deċiżjonijiet kritiċi.

(b)	linji ċari ta' kontabilità, inkluż proċeduri biex jiġu approvati l-iżvilupp, l-użu u l-aġġornamenti sussegwenti tas-sistemi ta' negozjar u biex jiġu solvuti problemi identifikati meta jsir il-monitoraġġ tas-sistemi ta' negozjar;

(c)	proċeduri effettivi għall-komunikazzjoni ta' informazzjoni sabiex l-istruzzjonijiet ikunu jistgħu jintalbu u jiġu implimentati b'mod effiċjenti u f'waqthom;

(d)	separazzjoni ta' kompiti u responsabbiltajiet, biex tiġi żgurata superviżjoni effettiva tal-konformità miċ-ċentri ta' negozjar.

2.   Il-korp maniġerjali jew il-maniġment superjuri ta' ċentri ta' negozjar għandhom japprovaw:

(a)	l-awtovalutazzjoni ta' konformità skont l-Artikolu 2;

(b)	miżuri biex jespandu l-kapaċità taċ-ċentru ta' negozjar fejn meħtieġ sabiex ikunu konformi mal-Artikolu 11;

(c)	azzjonijiet biex jiġu rimedjati n-nuqqasijiet materjali identifikati tul il-monitoraġġ skont l-Artikoli 12 u 13 u wara l-eżami perjodiku tal-prestazzjoni u l-kapaċità tas-sistemi ta' negozjar skont l-Artikolu 14.

1.   Iċ-ċentri ta' negozjar għandhom jiżguraw li l-funzjoni ta' verifika tal-konformità tagħhom tkun responsabbli biex:

(a)	tipprovdi ċarezza lill-persunal kollu involut fin-negozjar algoritmiku dwar l-obbligi legali taċ-ċentri ta' negozjar fir-rigward ta' tali negozjar;

(b)	tiżviluppa u żżomm il-politiki u l-proċeduri biex jiżguraw li s-sistemi ta' negozjar algoritmiku jikkonformaw ma' dawk l-obbligi.

2.   Iċ-ċentri ta' negozjar għandhom jiżguraw li l-persunal tal-konformità tagħhom għandu tal-anqas fehim ġenerali tal-mod kif joperaw is-sistemi ta' negozjar algoritmiku u l-algoritmi.

Il-persunal ta' konformità għandu jkun f'kuntatt kontinwu ma' persuni fiċ-ċentru ta' negozjar li għandhom għarfien tekniku dettaljat tas-sistemi ta' negozjar algoritmiku taċ-ċentru jew tal-algoritmi.

Iċ-ċentri ta' negozjar għandhom jiżguraw ukoll li l-persunal ta' konformità jkollu, il-ħin kollu, kuntatt dirett ma' persuni li għandhom aċċess għall-funzjonalità msemmija fl-Artikolu 18(2)(c) (funzjonalita ta' kanċellazzjoni, “kill functionality”) jew aċċess għal dik il-funzjonalità ta' kanċellazzjoni u għal dawk li huma responsabbli għas-sistema ta' negozjar algoritmiku.

3.   Meta l-funzjoni ta' verifika tal-konformità, jew l-elementi tagħha, jiġu esternalizzati lil parti terza, iċ-ċentri ta' negozjar għandhom jipprovdu lill-parti terza bl-istess aċċess għall-informazzjoni daqslikieku jipprovdu lill-persunal ta' konformità tagħhom stess. Iċ-ċentri ta' negozjar għandhom jidħlu fi ftehim ma' dawn il-konsulenti ta' konformità, biex jiżguraw li:

(a)	il-privatezza tad-dejta tiġi ggarantita;

(b)	l-awditjar tal-funzjoni ta' verifika tal-konformità minn awdituri interni u esterni jew mill-awtorità kompetenti ma tiġix imfixkla.

1.   Iċ-ċentri ta' negozjar għandhom jimpjegaw għadd suffiċjenti ta' persunal bil-ħiliet neċessarji biex jimmaniġġjaw is-sistemi ta' negozjar algoritmiku tagħhom u l-algoritmi ta' negozjar u b'biżżejjed għarfien ta':

(a)	is-sistemi ta' negozjar u l-algoritmi rilevanti;

(b)	il-monitoraġġ u l-ittestjar ta' dawn is-sistemi u l-algoritmi;

(c)	it-tipi ta' negozjar imwettqa mill-membri, mill-parteċipanti jew mill-klijenti taċ-ċentru ta' negozjar (“membri”);

(d)	l-obbligi legali taċ-ċentru ta' negozjar.

2.   Iċ-ċentri ta' negozjar għandhom jiddefinixxu l-ħiliet neċessarji msemmija fil-paragrafu 1. Il-persunal imsemmi fil-paragrafu 1 għandu jkollu dawk il-ħiliet meħtieġa fiż-żmien tar-reklutaġġ jew għandu jakkwistahom permezz ta' taħriġ wara r-reklutaġġ. Iċ-ċentri ta' negozjar għandhom jiżguraw li dawk il-ħiliet tal-persunal jibqgħu aġġornati u għandhom jevalwaw il-ħiliet tagħhom fuq bażi regolari.

3.   It-taħriġ tal-persunal imsemmi fil-paragrafu 2 għandu jkun imfassal apposta għall-esperjenza u r-responsabbiltajiet tal-persunal, billi jitqiesu n-natura, l-iskala u l-kumplessità tal-attivitajiet tagħhom.

4.   Il-persunal imsemmi fil-paragrafu 1 għandu jinkludi persunal b'anzjanità suffiċjenti biex iwettaq il-funzjonijiet tagħhom b'mod effettiv fiċ-ċentru ta' negozjar.

1.   Iċ-ċentri ta' negozjar li jesternalizzaw il-funzjonijiet operazzjonali tagħhom kollha jew parti minnhom fir-rigward tas-sistemi li jippermettu n-negozjar algoritmiku għandhom jiżguraw li:

(a)	il-ftehim ta' esternalizzazzjoni esklussivament jirrelata ma' funzjonijiet operazzjonali u ma jibdilx ir-responsabbiltajiet tal-maniġment superjuri u tal-korp maniġerjali;

(b)	ir-relazzjoni u l-obbligi taċ-ċentru ta' negozjar lejn il-membri tiegħu, l-awtoritajiet kompetenti, jew kwalunkwe parti terza, bħal klijenti ta' servizzi tal-fluss tad-dejta ma jinbidlux;

(c)	jissodisfaw ir-rekwiżiti li għandhom jikkonformaw magħhom sabiex ikunu awtorizzati skont it-Titolu III tad-Direttiva 2014/65/UE.

2.   Għall-finijiet ta' dan l-Artikolu, il-funzjonijiet operazzjonali għandhom jinkludu l-attivitajiet diretti kollha relatati mal-prestazzjoni u s-sorveljanza tas-sistema ta' negozjar li jappoġġjaw dawn l-elementi li ġejjin:

(a)	konnettività upstream, kapaċità tal-preżentazzjoni tal-ordnijiet, kapaċitajiet ta' trażżin u kapaċità tal-ibbilanċjar tad-dħul tal-ordnijiet tal-klijenti minn kanali differenti;

(b)	magna tan-negozjar għat-tqabbil tal-ordnijiet;

(c)	konnettività downstream, editjar tal-ordnijiet u t-tranżazzjonijiet u kwalunkwe tip ieħor ta' fluss ta' dejta tas-suq;

(d)	infrastruttura għall-monitoraġġ tal-prestazzjoni tal-elementi msemmija fil-punti (a), (b) u (c).

3.   Iċ-ċentri ta' negozjar għandhom jiddokumentaw il-proċess tal-għażla tal-fornitur tas-servizzi li lilu se jiġu esternalizzati l-funzjonijiet operazzjonali (“il-fornitur tas-servizzi”). Għandhom jieħdu l-passi meħtieġa biex jiżguraw, qabel jikkonkludu l-ftehim ta' esternalizzazzjoni u tul il-perjodu kollu tiegħu, li l-kundizzjonijiet li ġejjin jiġu ssodisfati:

(a)	il-fornitur tas-servizzi jkollu l-kapaċità li jwettaq il-funzjonijiet esternalizzati b'mod affidabbli u professjonali u jkun id-detentur ta' kwalunkwe awtorizzazzjoni meħtieġa skont il-liġi għal dawk l-għanijiet;

(b)	il-fornitur tas-servizzi jissorvelja tajjeb it-twettiq tal-funzjonijiet esternalizzati, u jimmaniġġja b'mod adegwat ir-riskji assoċjati mal-ftehim ta' esternalizzazzjoni;

(c)

is-servizzi esternalizzati jkunu pprovduti skont l-ispeċifikazzjonijiet tal-ftehim ta' esternalizzazzjoni, li huma bbażati fuq metodi predeterminati għall-valutazzjoni tal-istandard tal-prestazzjoni tal-fornitur tas-servizzi, inkluż il-metrika għall-kejl tas-servizz ipprovdut u l-ispeċifikazzjonijiet tar-rekwiżiti li għandhom jiġu ssodisfati;

(d)	iċ-ċentru ta' negozjar ikollu l-għarfien espert meħtieġ biex jissorvelja l-funzjonijiet esternalizzati u jimmaniġġa r-riskji assoċjati mal-ftehim ta' esternalizzazzjoni;

(e)	iċ-ċentru ta' negozjar ikollu l-kapaċità li jieħu azzjoni malajr jekk il-fornitur tas-servizzi ma jkunx qiegħed iwettaq il-funzjonijiet b'mod effettiv u f'konformità ma' liġijiet applikabbli u rekwiżiti regolatorji;

(f)	il-fornitur tas-servizzi jiżvela liċ-ċentru ta' negozjar kwalunkwe fatt li jista' jkollu impatt materjali fuq il-kapaċità tiegħu li jwettaq il-funzjonijiet esternalizzati b'mod effettiv u f'konformità mal-obbligi legali tiegħu;

(g)	iċ-ċentru ta' negozjar huwa kapaċi jittermina l-ftehim ta' esternalizzazzjoni fejn meħtieġ mingħajr detriment għall-kontinwità u l-kwalità tas-servizzi tiegħu lill-klijenti;

(h)	il-fornitur tas-servizzi jikkoopera mal-awtoritajiet kompetenti taċ-ċentru ta' negozjar b'rabta mal-attivitajiet esternalizzati;

(i)	iċ-ċentru ta' negozjar ikollu aċċess effettiv għad-dejta relatata mal-attivitajiet esternalizzati u għal-lok tan-negozju tal-fornitur tas-servizzi, u l-awdituri taċ-ċentru ta' negozjar u l-awtoritajiet kompetenti jkollhom aċċess għad-dejta relatata mal-attivitajiet esternalizzati;

(j)	iċ-ċentru ta' negozjar jistabbilixxi rekwiżiti li għandhom jiġu ssodisfati mill-fornituri ta' servizz biex jipproteġu informazzjoni kunfidenzjali relatata maċ-ċentru ta' negozjar u mal-membri tiegħu, u mal-informazzjoni u s-softwer proprjetarji taċ-ċentru;

(k)	il-fornitur tas-servizzi jissodisfa r-rekwiżiti msemmija fil-punt (j);

(l)	iċ-ċentru ta' negozjar u l-fornitur tas-servizzi jistabbilixxu, jimplimentaw u jżommu pjan ta' kontinġenza għall-irkupru minn diżastru u l-ittestjar perjodiku ta' miżuri ta' sostenn, meta dan ikun neċessarju b'qies għall-funzjoni operazzjonali li tkun ġiet esternalizzata;

(m)	il-ftehim ta' esternalizzazzjoni jispeċifika l-obbligi tal-fornitur tas-servizzi f'każ li ma jkunx jista' jipprovdi s-servizzi tiegħu, inkluż il-forniment tas-servizz minn ditta ta' sostituzzjoni;

(n)	iċ-ċentru ta' negozjar għandu aċċess għal informazzjoni fir-rigward tal-arranġamenti ta' kontinwità tal-kummerċ msemmija fl-Artikolu 16 tal-fornitur tas-servizzi.

4.   Il-ftehimiet ta' esternalizzazzjoni għandhom jiġu konklużi bil-miktub u għandhom jistabbilixxu:

(a)	l-assenjar tad-drittijiet u l-obbligi bejn il-fornitur tas-servizzi u ċ-ċentru ta' negozjar;

(b)

deskrizzjoni ċara ta': (i) il-funzjonijiet operazzjonali li huma esternalizzati; (ii) l-aċċess taċ-ċentru ta' negozjar għall-kotba u r-rekords tal-fornitur tas-servizzi; (iii) il-proċedura biex jiġu identifikati u indirizzati kunflitti ta' interess potenzjali; (iv) ir-responsabbiltà assunta minn kull parti; (v) il-proċedura għall-emendar u t-terminazzjoni tal-ftehim.

(c)	il-mezzi li jiżguraw li kemm iċ-ċentru ta' negozjar kif ukoll il-fornitur tas-servizzi jiffaċilitaw bi kwalunkwe mod meħtieġ l-eżerċizzju mill-awtorità kompetenti tas-setgħat superviżorji tagħha.

5.   Iċ-ċentri ta' negozjar għandhom jirrapportaw lill-awtoritajiet kompetenti l-intenzjoni tagħhom li jesternalizzaw il-funzjonijiet operazzjonali f'dawn il-każijiet:

(a)	meta l-fornitur tas-servizzi jipprovdi l-istess servizz lil ċentri ta' negozjar oħra;

(b)	meta l-funzjonijiet operazzjonali kritiċi meħtieġa għall-kontinwazzjoni tan-negozju jiġu esternalizzati, f'liema każ iċ-ċentri ta' negozjar għandhom jitolbu l-awtorizzazzjoni minn qabel mingħand l-awtorità kompetenti.

6.   Għall-finijiet tal-punt (b) fil-paragrafu 5, il-funzjonijiet operazzjonali kritiċi jinkludu dawk il-funzjonijiet meħtieġa biex jikkonformaw mal-obbligi msemmija fl-Artikolu 47(1)(b), (c) u (e) tad-Direttiva 2014/65/UE.

7.   Iċ-ċentri ta' negozjar għandhom jinformaw lill-awtoritajiet kompetenti dwar kwalunkwe ftehim ta' esternalizzazzjoni li ma jkunx soġġett għal rekwiżit ta' għoti ta' awtorizzazzjoni preliminari immedjatament wara l-iffirmar tal-ftehim.

1.   Iċ-ċentri ta' negozjar għandhom jistabbilixxu l-kundizzjonijiet għall-użu tas-sistemi ta' preżentazzjoni tal-ordnijiet elettroniċi mill-membri tagħhom. Dawk il-kundizzjonijiet għandhom jiġu stabbiliti wara li jiġi kkunsidrat il-mudell tan-negozjar taċ-ċentru ta' negozjar u għandhom ikopru tal-anqas:

(a)	il-kontrolli ta' qabel in-negozjar fuq il-prezz, il-volum u l-valur tal-ordnijiet u l-użu tas-sistema u l-kontrolli ta' wara n-negozjar fuq l-attivitajiet tan-negozjar tal-membri;

(b)	il-kwalifiki meħtieġa mill-persunal f'pożizzjonijiet ewlenin fost il-membri;

(c)	l-ittestjar tekniku u l-funzjonali tal-konformità;

(d)	il-politika dwar l-użu tal-funzjonalita ta' kanċellazzjoni;

(e)	id-dispożizzjonijiet dwar jekk il-membru jistax jagħti lill-klijenti tiegħu stess aċċess elettroniku dirett għas-sistema u, jekk iva, il-kundizzjonijiet applikabbli għal dawk il-klijenti.

2.   Iċ-ċentri ta' negozjar għandhom iwettqu valutazzjoni tad-diliġenza dovuta tal-membri prospettivi tagħhom kontra l-kundizzjonijiet imsemmija fil-paragrafu 1 u għandhom jistabbilixxu l-proċeduri għal din il-valutazzjoni.

3.   Iċ-ċentri ta' negozjar għandhom, darba fis-sena, iwettqu valutazzjoni fuq bażi ta' riskju tal-konformità tal-membri tagħhom mal-kundizzjonijiet imsemmija fil-paragrafu 1 u jikkontrallaw jekk il-membri tagħhom għadhomx reġistrati bħala ditti ta' investiment. Il-valutazzjoni fuq bażi ta' riskju għandha tqis l-iskala u l-impatt potenzjali tan-negozjar imwettaq minn kull membru kif ukoll iż-żmien li jkun għadda sa mill-aħħar valutazzjoni fuq bażi ta' riskju tal-membru.

4.   Iċ-ċentri ta' negozjar għandhom, fejn meħtieġ, iwettqu valutazzjonijiet addizzjonali tal-konformità tal-membri tagħhom mal-kundizzjonijiet imsemmija fil-paragrafu 1 wara l-valutazzjoni annwali fuq bażi ta' riskju stabbilita fil-paragrafu 3.

5.   Iċ-ċentri ta' negozjar għandhom jistabbilixxu l-kriterji u l-proċeduri għall-impożizzjoni ta' sanzjonijiet fuq membru mhux konformi. Dawk is-sanzjonijiet għandhom jinkludu sospensjoni tal-aċċess għaċ-ċentru ta' negozjar u telf tas-sħubija.

6.   Iċ-ċentri ta' negozjar għandhom, għal mill-anqas ħames snin, iżommu r-rekords ta':

(a)	il-kundizzjonijiet u l-proċeduri għall-valutazzjoni tad-diliġenza dovuta

(b)	il-kriterji u l-proċeduri għall-impożizzjoni ta' sanzjonijiet;

(c)	il-valutazzjoni inizjali tad-diliġenza dovuta tal-membri tagħhom;

(d)	il-valutazzjoni annwali fuq bażi ta' riskju tal-membri tagħhom;

(e)	il-membri li jkunu fallew il-valutazzjoni annwali fuq bażi ta' riskju u kwalunkwe sanzjoni imposta fuq dawn il-membri.

1.   Iċ-ċentri ta' negozjar għandhom, qabel jibdew jużaw jew jaġġornaw sistema ta' negozjar, jagħmlu użu minn metodoloġiji ddefiniti b'mod ċar tal-iżvilupp u l-ittestjar li jiżguraw tal-anqas li:

(a)	is-sistema ta' negozjar ma taġixxix b'mod mhux maħsub;

(b)	il-kontrolli ta' konformità u ta' ġestjoni tar-riskju inklużi fis-sistemi jaħdmu kif maħsub, inkluż il-ġenerazzjoni awtomatika tar-rapporti tal-iżbalji;

(c)	is-sistema ta' negozjar tkun tista' tkompli taħdem b'mod effettiv fil-każ ta' żieda sinifikanti fl-għadd ta' messaġġi ġestiti mis-sistema.

2.   Iċ-ċentri ta' negozjar għandhom ikunu kapaċi juru l-ħin kollu li ħadu l-passi raġonevoli kollha biex jevitaw li s-sistemi ta' negozjar tagħhom jikkontribwixxu għal kundizzjonijiet diżordinati ta' negozjar.

1.   Iċ-ċentri ta' negozjar għandhom jirrikjedu li l-membri tagħhom iwettqu l-ittestjar tal-konformità qabel l-użu jew l-aġġornament sostanzjali ta':

(a)	l-aċċess għas-sistema taċ-ċentru ta' negozjar;

(b)	is-sistema ta' negozjar tal-membru, l-algoritmu tan-negozjar jew l-istrateġija tan-negozjar.

2.   L-ittestjar tal-konformità għandu jiżgura li l-funzjonament bażiku tas-sistema, l-algoritmu u l-istrateġija ta' negozjar jikkonformaw mal-kundizzjonijiet taċ-ċentru ta' negozjar.

3.   L-ittestjar tal-konformità għandu jivverifika l-funzjonament tas-segwenti:

(a)	il-kapaċità tas-sistema jew l-algoritmu li jinteraġixxu kif mistenni mal-loġika tat-tqabbil taċ-ċentru ta' negozjar u l-ipproċessar adegwat tal-flussi tad-dejta minn u lejn iċ-ċentru ta' negozjar;

(b)	il-funzjonalitajiet bażiċi bħall-preżentazzjoni, il-modifika jew il-kanċellazzjoni ta' ordni jew indikazzjoni ta' interess, it-tniżżil ta' dejta statika u tas-suq u l-flussi kollha tad-dejta tan-negozju;

(c)	il-konnettività, inkluż il-kmand ta' kanċellazzjoni mal-iskonnessjoni, it-telf u r-regolazzjoni tal-fluss tad-dejta tas-suq, u t-tkomplija tal-attività inkluża t-tkomplija tan-negozjar fl-istess jum u t-trattament ta' strumenti sospiżi jew dejta tas-suq mhux aġġornata.

4.   Iċ-ċentri ta' negozjar għandhom jipprovdu ambjent għall-ittestjar tal-konformità lill-membri attwali u prospettivi tagħhom li:

(a)	ikun aċċessibbli bil-kundizzjonijiet ekwivalenti għal dawk applikabbli għas-servizzi tal-ittestjar l-oħra taċ-ċentru ta' negozjar;

(b)	jipprovdi lista ta' strumenti finanzjarji li jistgħu jiġu ttestjati u li huma rappreżentattivi ta' kull klassi ta' strumenti disponibbli fl-ambjent tal-produzzjoni;

(c)	ikun disponibbli matul is-sigħat ġenerali tas-suq jew, jekk disponibbli biss barra mis-sigħat tas-suq, fuq bażi perjodika skedata minn qabel;

(d)	ikun appoġġjat minn persunal b'għarfien suffiċjenti.

5.   Iċ-ċentri ta' negozjar għandhom jagħtu rapport tar-riżultati tal-ittestjar tal-konformità lill-membru attwali jew prospettiv biss.

6.   Iċ-ċentri ta' negozjar għandhom jirrikjedu lill-membri attwali u prospettivi tagħhom jużaw il-faċilitajiet tal-ittestjar tal-konformità tagħhom.

7.   Iċ-ċentri ta' negozjar għandhom jiżguraw separazzjoni effettiva tal-ambjent tal-ittestjar mill-ambjent tal-produzzjoni għall-ittestjar tal-konformità msemmi fil-paragrafi 1 sa 3.

1.   Iċ-ċentri ta' negozjar għandhom jirrikjedu lill-membri tagħhom jiċċertifikaw li l-algoritmi li jużaw ikunu ġew ittestjati biex jiġi evitat li jikkontribwixxu għal kundizzjonijiet diżordinati ta' negozjar, jew joħolquhom, qabel l-użu jew l-aġġornament sostanzjali ta' algoritmu tan-negozjar jew strateġija tan-negozjar u jispjegaw il-mezzi użati għal dak l-ittestjar.

2.   Iċ-ċentri ta' negozjar għandhom jipprovdu lill-membri tagħhom b'aċċess għal ambjent tal-ittestjar li għandu jikkonsisti fi kwalunkwe mis-segwenti:

(a)

faċilitajiet ta' simulazzjoni li jirriproduċu kemm jista' jkun possibbli b'mod realistiku l-ambjent tal-produzzjoni, inklużi kundizzjonijiet diżordinati ta' negozjar, u li jipprovdu l-funzjonalitajiet, il-protokolli u l-istruttura li jippermettu lill-membri jittestjaw firxa ta' xenarji li huma jqisu rilevanti għall-attività tagħhom;

(b)	simboli tal-ittestjar kif definiti u miżmuma miċ-ċentru ta' negozjar.

3.   Iċ-ċentri ta' negozjar għandhom jiżguraw separazzjoni effettiva tal-ambjent tal-ittestjar mill-ambjent tal-produzzjoni għat-testijiet imsemmija fil-paragrafu 1.

1.   Iċ-ċentri ta' negozjar għandhom jiżguraw li s-sistemi ta' negozjar tagħhom għandhom biżżejjed kapaċità biex iwettqu l-funzjonijiet tagħhom mingħajr fallimenti tas-sistemi, perjodi ta' qtugħ jew żbalji fit-tqabbil tat-tranżazzjonijiet tal-anqas fl-ogħla numru ta' messaġġi kull sekonda rreġistrat fuq dik is-sistema matul il-ħames snin preċedenti mmultiplikat bi tnejn.

Għall-finijiet tal-istabbiliment tal-ogħla numru ta' messaġġi, għandhom jitqiesu dawn il-messaġġi segwenti:

(a)	kwalunkwe input, inkluż ordnijiet u modifiki jew kanċellazzjonijiet ta' ordnijiet;

(b)	kwalunkwe output, inkluż ir-reazzjoni tas-sistema għal input, wiri tad-dejta tal-ktieb tal-ordnijiet u d-disseminazzjoni tal-fluss ta' wara n-negozjar li jimplika użu indipendenti tal-kapaċità tas-sistema ta' negozjar.

2.   L-elementi ta' sistema ta' negozjar li għandhom jitqiesu għall-finijiet tal-paragrafu 1 għandhom ikunu dawk li jappoġġjaw l-attivitajiet segwenti:

(a)	konnettività upstream, kapaċità tal-preżentazzjoni tal-ordnijiet, kapaċitajiet ta' trażżin u kapaċità tal-ibbilanċjar tad-dħul tal-ordnijiet tal-klijenti minn kanali differenti;

(b)	magna tan-negozjar li tippermetti li ċ-ċentru ta' negozjar iqabbel l-ordnijiet b'dewmien adegwat;

(c)	konnettività downstream, editjar tal-ordnijiet u t-tranżazzjonijiet u kwalunkwe tip ieħor ta' fluss ta' dejta tas-suq;

(d)	infrastruttura għall-monitoraġġ tal-prestazzjoni tal-elementi msemmija hawn fuq.

3.   Iċ-ċentri ta' negozjar għandhom jivvalutaw jekk il-kapaċità tas-sistemi ta' negozjar tagħhom tibqax adegwata meta l-għadd ta' messaġġi jkun qabeż l-ogħla għadd ta' messaġġi kull sekonda rreġistrati fuq dik is-sistema matul il-ħames snin ta' qabel. Wara l-valutazzjoni, iċ-ċentri ta' negozjar għandhom jinformaw lill-awtorità kompetenti dwar kwalunkwe miżura ppjanata biex tespandi l-kapaċità tagħhom u l-ħin tal-implimentazzjoni ta' dawn il-miżuri.

4.   Iċ-ċentri ta' negozjar għandhom jiżguraw li s-sistemi taghom huma kapaċi jlaħħqu ma' flussi ta' messaġġi dejjem jiżdiedu mingħajr degradazzjoni materjali tal-prestazzjoni tas-sistemi tagħhom. B'mod partikolari, it-tfassil tas-sistema ta' negozjar għandu jippermetti li l-kapaċità tagħha tespandi fi żmien raġonevoli kull meta meħtieġ.

5.   Iċ-ċentri ta' negozjar għandhom immedjatament jippubblikaw u jirrapportaw lill-awtorità kompetenti u lill-membri kwalunkwe interruzzjoni severa fin-negozjar li mhix minħabba l-volatilità tas-suq u kwalunkwe tfixkil materjali ieħor fil-konnettività.

1.   Iċ-ċentri ta' negozjar għandhom jiżguraw li s-sistemi ta' negozjar algoritmiku huma l-ħin kollu adattati għan-negozju li jseħħ minnhom u li huma robusti biżżejjed biex jiżguraw il-kontinwità u r-regolarità fil-prestazzjoni tas-swieq li joperaw fihom, irrispettivament mill-mudell ta' negozjar użat.

2.   Iċ-ċentri ta' negozjar għandhom iwettqu monitoraġġ f'ħin reali tas-sistemi ta' negozjar algoritmiku tagħhom fir-rigward tas-segwenti:

(a)	il-prestazzjoni tagħhom u l-kapaċità tagħhom imsemmija fl-Artikolu 11(4);

(b)	ordnijiet mibgħuta mill-membri tagħhom fuq bażi individwali u aggregata.

B'mod partikolari, iċ-ċentri ta' negozjar għandhom joperaw limiti fuq it-trażżin u jagħmlu monitoraġġ tal-fluss tal-konċentrazzjoni tal-ordnijiet biex jiġi identifikat theddid potenzjali għall-funzjonament ordnat tas-suq.

3.   L-allerti f'ħin reali għandhom jiġu ġġenerati f'ħames sekondi mill-avveniment rilevanti.

1.   Iċ-ċentri ta' negozjar għandhom ikunu kapaċi juru l-ħin kollu lill-awtorità kompetenti tagħhom li huma qed jagħmlu monitoraġġ f'ħin reali tal-prestazzjoni u tal-użu tal-elementi tas-sistemi ta' negozjar tagħhom imsemmija fl-Artikolu 11(2) fir-rigward tal-parametri segwenti:

(a)	il-persentaġġ tal-kapaċità massima tal-messaġġi użat kull sekonda;

(b)	l-għadd totali ta' messaġġi ġestiti mis-sistema ta' negozjar maqsuma skont kull element tas-sistema ta' negozjar, inkluż: (i) l-għadd ta' messaġġi li jaslu kull sekonda; (ii) l-għadd ta' messaġġi mibgħuta kull sekonda; (iii) l-għadd ta' messaġġi rrifjutati mis-sistema kull sekonda;

(c)	il-perjodu ta' żmien minn meta jasal il-messaġġ fi kwalunkwe kanal ta' barra tas-sistema ta' negozjar sa meta jintbagħat messaġġ relatat mill-istess kanal wara li l-magna ta' korrispondenza tkun ipproċessat il-messaġġ oriġinali;

(d)	il-prestazzjoni tal-magna ta' korrispondenza.

2.   Iċ-ċentri ta' negozjar għandhom jieħdu l-azzjoni xierqa kollha fir-rigward ta' kwalunkwe kwistjoni identifikata fis-sistema ta' negozjar matul il-monitoraġġ kontinwu hekk kif ikun raġonevolment possibbli, f'ordni ta' prijorità, u għandhom ikunu kapaċi jaġġustaw, ixolju, jew jagħlqu s-sistema ta' negozjar, jekk meħtieġ.

1.   Iċ-ċentri ta' negozjar għandhom, fil-kuntest tal-awtovalutazzjoni li għandha titwettaq skont l-Artikolu 2, jevalwaw il-prestazzjoni u l-kapaċità tas-sistemi ta' negozjar algoritmiku tagħhom u proċessi assoċjati għall-governanza, il-kontabilità, l-approvazzjoni u l-arranġamenti ta' kontinwità tal-kummerċ.

2.   Bħala parti mill-evalwazzjoni msemmija fil-paragrafu 1, iċ-ċentri ta' negozjar għandhom iwettqu testijiet tal-istress fejn huma għandhom jissimulaw xenarji avversi biex jivverifikaw il-prestazzjoni tal-ħardwer, is-softwer u l-komunikazzjonijiet u jidentifikaw ix-xenarji li taħthom is-sistema ta' negozjar jew partijiet mis-sistema ta' negozjar iwettqu l-funzjonijiet tagħhom b'fallimenti fis-sistemi, qtugħ jew żbalji fit-tranżazzjonijiet tat-tqabbil.

3.   It-testijiet tal-istress għandhom ikopru l-fażijiet kollha tan-negozjar, is-segmenti tan-negozjar u t-tipi ta' strumenti nnegozjati miċ-ċentru ta' negozjar u għandhom jissimulaw l-attivitajiet tal-membri bl-istruttura eżistenti ta' konnettività.

4.   Ix-xenarji avversi msemmija fil-paragrafu 2 għandhom ikunu bbażati fuq:

(a)	żieda fl-għadd ta' messaġġi li jaslu billi jibda bl-ogħla għadd ta' messaġġi ġestiti mis-sistema taċ-ċentru ta' negozjar matul il-ħames snin preċedenti;

(b)	aġir mhux mistenni tal-funzjonijiet operazzjonali taċ-ċentru ta' negozjar;

(c)	kombinazzjoni aleatorja ta kundizzjonijiet tas-suq normali u taħt stress u mġiba mhux mistennija tal-funzjonijiet operazzjonali taċ-ċentru ta' negozjar.

5.   L-evalwazzjoni tal-prestazzjoni u l-kapaċità taċ-ċentru ta' negozjar deskritta fil-paragrafi 1 sa 4 għandha titwettaq minn assessur indipendenti jew minn dipartiment fiċ-ċentru ta' negozjar għajr dak li għandu r-responsabbiltà għall-funzjoni li tkun qed tiġi riveduta.

6.   Iċ-ċentri ta' negozjar għandhom jieħdu azzjoni biex b'mod rapidu u effettiv jirrimedjaw kwalunkwe defiċjenza identifikata fl-evalwazzjoni tal-prestazzjoni u l-kapaċità taċ-ċentru ta' negozjar imsemmija fil-paragrafi 1 sa 4 u għandhom iżommu rekord tar-reviżjoni u ta' kwalunkwe azzjoni ta' rimedju meħuda f'dan ir-rigward għal mill-anqas ħames snin.

1.   Iċ-ċentri ta' negozjar għandhom ikunu kapaċi juru l-ħin kollu li s-sistemi tagħhom għandhom stabbiltà suffiċjenti billi jkollhom arranġamenti effettivi ta' kontinwità tal-kummerċ biex jindirizzaw inċidenti ta' tfixkil.

2.   L-arranġamenti ta' kontinwità tal-kummerċ għandhom jiżguraw li n-negozjar ikun jista' jitkompla fi żmien sagħtejn jew qrib sagħtejn minn inċident ta' tfixkil u li l-ammont massimu ta' dejta li jista' jintilef minn kwalunkwe servizz tal-IT taċ-ċentru ta' negozjar wara inċident ta' tfixkil ikun qrib iż-żero.

1.   Iċ-ċentri ta' negozjar għandhom, fil-kuntest tal-qafas tagħhom ta' governanza u ta' teħid ta' deċiżjonijiet skont l-Artikolu 3, jistabbilixxu pjan ta' kontinwità tal-kummerċ biex jimplimentaw arranġamenti ta' kontinwità tal-kummerċ effettivi previsti fl-Artikolu 15. Il-pjan ta' kontinwità tal-kummerċ jistabbilixxi l-proċeduri u l-arranġamenti għall-immaniġġjar ta' inċidenti ta' tfixkil.

2.   Il-pjan ta' kontinwità tal-kummerċ jipprovdi għal dan il-kontenut minimu segwenti:

(a)	il-firxa ta' xenarji avversi possibbli li jirrelataw mal-operazzjoni tas-sistemi ta' negozjar algoritmiku, inkluż in-nuqqas ta' disponibbiltà ta' sistemi, persunal, spazju tax-xogħol, fornituri esterni jew ċentri tad-dejta jew telf jew tibdil ta' dejta kritika u dokumenti;

(b)	il-proċeduri li għandhom jiġu segwiti fil-każ ta' avveniment ta' tfixkil;

(c)	iż-żmien massimu biex titkompla l-attività kummerċjali u l-ammont ta' dejta li jista' jintilef fis-sistema tal-IT;

(d)	il-proċeduri għar-rilokazzjoni tas-sistema ta' negozjar għal sit ta' riżerva u għall-operazzjoni tas-sistema ta' negozjar minn dak is-sit.

(e)	riżerva tad-dejta kummerċjali kritika inkluż informazzjoni aġġornata dwar il-kuntatti neċessarji biex tiġi żgurata l-komunikazzjoni fiċ-ċentru ta' negozjar, bejn iċ-ċentru ta' negozjar u l-membru tiegħu u bejn iċ-ċentru ta' negozjar u l-infrastrutturi tal-ikklerjar u s-saldu;

(f)	it-taħriġ tal-persunal dwar l-operazzjoni tal-arranġamenti ta' kontinwità tal-kummerċ;

(g)	l-assenjazzjoni tal-kompiti u l-istabbiliment ta' tim speċifiku għall-operazzjonijiet tas-sigurtà lest biex iwieġeb immedjatament wara inċident ta' tfixkil;

(h)	programm kontinwu għall-ittestjar, l-evalwazzjoni u r-reviżjoni tal-arranġamenti inkluż proċeduri għall-modifika tal-arranġamenti fid-dawl tar-riżultati ta' dak il-programm.

3.   Is-sinkronizzazzjoni tal-arloġġ wara inċident ta' tfixkil tiġi inkluża fil-pjan ta' kontinwità tal-kummerċ.

4.   Iċ-ċentri ta' negozjar għandhom jiżguraw li l-valutazzjoni tal-impatt li tidentifika r-riskji u l-konsegwenzi tat-tfixkil titwettaq u tiġi riveduta perjodikament. Għal dan il-għan, kwalunkwe deċiżjoni miċ-ċentru ta' negozjar li ma jqisx riskju identifikat ta' nuqqas ta' disponibbiltà tas-sistema ta' negozjar fil-pjan ta' kontinwità tal-kummerċ għandha tiġi ddokumentata b'mod adegwat u approvata b'mod espliċitu mill-korp maniġerjali taċ-ċentru ta' negozjar.

5.   Iċ-ċentri ta' negozjar għandhom jiżguraw li l-maniġment superjuri tagħhom:

(a)	jistabbilixxi objettivi u strateġiji ċari f'termini ta' kontinwità tal-kummerċ;

(b)	jalloka riżorsi umani, teknoloġiċi u finanzjarji adegwati biex jiġu segwiti l-objettivi u l-istrateġiji taħt il-punt (a);

(c)	japprova l-pjan ta' kontinwità tal-kummerċ u kwalunkwe emenda għalih meħtieġa bħala konsegwenza ta' tibdil organizzazzjonali, teknoloġiku u legali;

(d)	ikun informat, tal-anqas fuq bażi annwali, dwar ir-riżultati tal-valutazzjoni tal-impatt jew kwalunkwe reviżjoni tagħha u dwar kwalunkwe sejba li tikkonċerna l-adegwatezza tal-pjan ta' kontinwità tal-kummerċ;

(e)	jistabbilixxi funzjoni għall-kontinwità tal-kummerċ fl-organizzazzjoni.

6.   Il-pjan ta' kontinwità tal-kummerċ għandu jistabbilixxi l-proċeduri li jindirizzaw kwalunkwe tfixkil tal-funzjonijiet operazzjonali kritiċi esternalizzati, inkluż fejn dawk il-funzjonijiet operazzjonali kritiċi ma jibqgħux disponibbli.

1.   Iċ-ċentri ta' negozjar għandhom, fil-kuntest tal-awtovalutazzjoni tagħhom skont l-Artikolu 2, jittestjaw fuq il-bażi ta' xenarji realistiċi l-operazzjoni tal-pjan ta' kontinwità tal-kummerċ u jivverifikaw il-kapaċità taċ-ċentru ta' negozjar li jirkupra minn inċidenti ta' tfixkil u jkompli bin-negozjar kif stabbilit fl-Artikolu 15(2).

2.   Iċ-ċentri ta' negozjar għandhom, fejn meqjus neċessarju, billi jikkunsidraw ir-riżultati tal-eżami perjodiku skont il-paragrafu 1, jiżguraw li l-eżami tal-pjan u l-arranġamenti ta' kontinwità tal-kummerċ tagħhom titwettaq minn assessur indipendenti jew minn dipartiment fiċ-ċentru ta' negozjar għajr dak li għandu r-responsabbiltà għall-funzjoni li tkun qed tiġi eżaminata. Ir-riżultati tal-attività tal-ittestjar jiġu ddokumentati bil-miktub, maħżuna u ppreżentati lill-maniġment superjuri taċ-ċentru ta' negozjar kif ukoll lill-unitajiet operattivi involuti fil-pjan ta' kontinwità tal-kummerċ.

3.   Iċ-ċentri ta' negozjar għandhom jiżguraw li l-ittestjar tal-pjan ta' kontinwità tal-kummerċ ma jinterferixxix mal-attività normali tan-negozjar.

1.   Iċ-ċentri ta' negozjar għandu jkollhom tal-anqas dawn l-arranġamenti li ġejjin fis-seħħ biex jipprevjenu n-negozjar diżordinat u l-ksur tal-limiti tal-kapaċità:

(a)	limiti għal kull membru fuq l-għadd ta' ordnijiet mibgħuta kull sekonda;

(b)	mekkaniżmi għall-ġestjoni tal-volatilità;

(c)	kontrolli ta' qabel in-negozjar.

2.   Għall-finijiet tal-paragrafu 1, iċ-ċentri ta' negozjar għandhom ikunu kapaċi:

(a)	jitolbu informazzjoni mingħand kwalunkwe membru jew utent tal-aċċess sponsorizzat dwar ir-rekwiżiti organizzazzjonali u l-kontrolli tan-negozjar;

(b)	jissospendu l-aċċess ta' membru jew negozjant għas-sistema ta' negozjar fuq l-inizjattiva taċ-ċentru ta' negozjar jew fuq talba ta' dak il-membru, membru tal-ikklerjar, is-CCP, fejn previst fir-regoli regolatorji tas-CCP, jew l-awtorità kompetenti;

(c)

joperaw funzjonalità ta' kanċellazzjoni li tikkanċella ordnijiet mhux eżegwiti ppreżentati minn membru, jew minn klijent tal-aċċess sponsorizzat taħt dawn iċ-ċirkostanzi segwenti: (i) meta ssir talba mill-membru, jew mill-klijent ta' aċċess sponsorizzat meta l-membru, jew il-klijent ma jkunx teknikament jista' jħassar l-ordnijiet tiegħu stess; (ii) meta l-ktieb tal-ordnijiet ikun fih ordnijiet duplikati ħżiena; (iii) wara sospensjoni mibdija mill-operatur tas-suq jew mill-awtorità kompetenti;

(d)	jikkanċellaw jew jirrevokaw tranżazzjonijiet fil-każ ta' ħsara fil-mekkaniżmi taċ-ċentru ta' negozjar għall-ġestjoni tal-volatilità jew fil-funzjonijiet operazzjonali tas-sistema ta' negozjar;

(e)	jibbilanċjaw l-entratura tal-ordnijiet mill-kanali differenti tagħhom, meta ċ-ċentru ta' negozjar juża aktar minn kanal wieħed sabiex jevita kollassi.

3.   Iċ-ċentri ta' negozjar għandhom jistabbilixxu politiki u arranġamenti fir-rigward ta':

(a)	mekkaniżmi għall-ġestjoni tal-volatilità skont l-Artikolu 19;

(b)	kontrolli ta' qabel in-negozjar u ta' wara n-negozjar użati miċ-ċentru u kontrolli ta' qabel in-negozjar u ta' wara n-negozjar meħtieġa għall-membri tagħhom biex jaċċessaw is-suq;

(c)	obbligu tal-membri li joperaw il-funzjonalità ta' kanċellazzjoni tagħhom stess;

(d)	rekwiżiti ta' informazzjoni għall-membri;

(e)	sospensjoni tal-aċċess;

(f)	politika dwar il-kanċellazzjoni fir-rigward tal-ordnijiet u t-tranżazzjonijiet inkluż: (i) iż-żmien; (ii) il-proċeduri; (iii) l-obbligi tar-rapportar u tat-trasparenza; (iv) il-proċeduri għar-riżoluzzjoni ta' tilwimiet; (v) il-miżuri biex jiġu mminimizzati n-negozji żbaljati;

(g)

arranġamenti għat-trażżin tal-ordnijiet inkluż: (i) l-għadd ta' ordnijiet kull sekonda f'intervalli ta' ħin definiti minn qabel; (ii) politika ta' trattament indaqs bejn il-membri sakemm il-mekkaniżmu ta' regolazzjoni ma jkunx indirizzat lejn membri individwali; (iii) miżuri li għandhom jiġu adottati wara avveniment ta' trażżin.

4.   Iċ-ċentri ta' negozjar għandhom jippubblikaw il-politiki u l-arranġamenti tagħhom stabbiliti fil-paragrafi 2 u 3. Dak l-obbligu ma għandux japplika fir-rigward tal-għadd speċifiku ta' ordnijiet kull sekonda f'intervalli ta' ħin definiti minn qabel u l-parametri speċifiċi tal-mekkaniżmi tagħhom għall-ġestjoni tal-volatilità.

5.   Iċ-ċentri ta' negozjar għandhom iżommu rekords sħaħ tal-politiki u l-arranġamenti tagħhom skont il-paragrafu 3 għal perjodu minimu ta' ħames snin.

1.   Iċ-ċentri ta' negozjar għandhom jiżguraw li mekkaniżmi xierqa biex b'mod awtomatiku jwaqqfu jew jirrestrinġu n-negozjar huma operazzjonali l-ħin kollu matul is-sigħat tan-negozjar.

2.   Iċ-ċentri ta' negozjar għandhom jiżguraw li:

(a)	l-mekkaniżmi li jwaqqfu jew jirrestrinġu n-negozjar jiġu ttestjati qabel l-implimentazzjoni u perjodikament wara meta l-kapaċità u l-prestazzjoni tas-sistemi ta' negozjar jiġu riveduti;

(b)	jiġu allokati riżorsi tal-IT u umani biex jittrattaw it-tfassil, iż-żamma u l-monitoraġġ tal-mekkaniżmi implimentati biex iwaqqfu jew jirrestrinġu n-negozjar;

(c)	il-mekkaniżmi għall-ġestjoni tal-volatilità tas-suq isir monitoraġġ tagħhom kontinwament.

3.   Iċ-ċentri ta' negozjar għandhom iżommu rekords tar-regoli u l-parametri tal-mekkaniżmi biex tiġi ġestita l-volatilità u kwalunkwe tibdil fiha, kif ukoll rekords tal-operazzjoni, il-ġestjoni u l-aġġiornament ta' dawk il-mekkaniżmi.

4.   Iċ-ċentri ta' negozjar għandhom jiżguraw li r-regoli tagħhom tal-mekkaniżmi għall-ġestjoni tal-volatilità jinkludu proċeduri għall-ġestjoni ta' sitwazzjonijiet fejn il-parametri jridu jitħaddmu manwalment biex jiġi żgurat negozjar ordnat.

1.   Iċ-ċentri ta' negozjar għandhom iwettqu dawn il-kontrolli ta' qabel in-negozjar segwenti adattati għal kull strument finanzjarju negozjat fuqhom:

(a)	collars tal-prezzijiet, li b'mod awtomatiku jimblokkaw l-ordnijiet li ma jissodisfawx il-parametri tal-prezzijiet stabbiliti minn qabel fuq il-bażi ta' kull ordni għaliha;

(b)	il-valur massimu tal-ordni, li b'mod awtomatiku jipprevjeni ordnijiet b'valur tal-ordni għoli b'mod mhux tas-soltu milli jidħlu fil-ktieb tal-ordnijiet b'referenza għall-valuri nozzjonali għal kull strument finanzjarju;

(c)	il-volum massimu tal-ordni, li b'mod awtomatiku jipprevjeni ordnijiet ta' daqs tal-ordni kbir b'mod mhux tas-soltu milli jidħlu fil-ktieb tal-ordnijiet.

2.   Il-kontrolli ta' qabel in-negozjar stabbiliti fil-paragrafu 1 jitfasslu biex jiżguraw li:

(a)	l-applikazzjoni awtomatizzata tagħhom ikollha l-kapaċità taġġusta limitu mill-ġdid matul is-sessjoni tan-negozjar u fil-fażijiet kollha tagħha;

(b)	il-monitoraġġ tagħhom ikollu dewmien ta' mhux aktar minn ħames sekondi;

(c)	ordni tiġi rrifjutata meta jinkiser il-limitu;

(d)	proċeduri u arranġamenti jkunu fis-seħħ biex jawtorizzaw l-ordnijiet li huma 'l fuq mil-limiti fuq talba mingħand il-membru kkonċernat. Dawn il-proċeduri u arranġamenti japplikaw fir-rigward ta' ordni speċifika jew sett ta' ordnijiet fuq bażi temporanja f'ċirkustanzi eċċezzjonali.

3.   Iċ-ċentri ta' negozjar jistgħu jistabbilixxu l-kontrolli ta' wara n-negozjar li huma jqisu xierqa fuq il-bażi ta' valutazzjoni tar-riskju tal-attività tal-membri tagħhom.

1.   Iċ-ċentri ta' negozjar għandhom jagħmlu l-provvista ta' aċċess sponsorizzat soġġetta għall-awtorizzazzjoni tagħhom u għandhom jirrikjedu li d-ditti li jkollhom l-aċċess sponsorizzat ikunu soġġetti għal tal-anqas l-istess kontrolli bħal dawk imsemmija fl-Artikolu 18(3)(b).

2.   Iċ-ċentri ta' negozjar għandhom jiżguraw li l-fornituri ta' aċċess sponsorizzat ikunu l-ħin kollu esklussivament intitolati li jistabbilixxu jew jimmodifikaw il-parametri li japplikaw għall-kontrolli msemmija fil-paragrafu 1 fuq il-fluss tal-ordnijiet tal-klijenti tagħhom b'aċċess sponsorizzat.

3.   Iċ-ċentri ta' negozjar għandhom ikunu kapaċi jissospendu jew jirtiraw il-provvista ta' aċċess sponsorizzat għall-klijenti li jkunu kisru d-Direttiva 2014/65/UE, ir-Regolamenti (UE) Nru 600/2014 (4) u (UE) Nru 596/2014 (5) tal-Parlament Ewropew u tal-Kunsill jew ir-regoli interni taċ-ċentru ta' negozjar.

1.   Iċ-ċentri ta' negozjar għandu jkollhom fis-seħħ proċeduri u arranġamenti għal sigurtà fiżika u elettronika mfassla biex tipproteġi s-sistemi tagħhom minn użu ħażin jew aċċess mhux awtorizzat u biex tiżgura l-integrità tad-dejta li hija parti mis-sistemi tagħhom, jew li tgħaddi mis-sistemi tagħhom, inklużi arranġamenti li jippermettu l-prevenzjoni jew il-minimizzazzjoni tar-riskji ta' attakki kontra s-sistemi ta' informazzjoni kif definiti fl-Artikolu 2(a) tad-Direttiva 2013/40/UE tal-Parlament Ewropew u tal-Kunsill (6).

2.   B'mod partikolari, iċ-ċentri ta' negozjar għandhom jistabbilixxu u jżommu miżuri u arranġamenti għas-sigurtà fiżika u elettronika biex jidentifikaw malajr u jipprevjenu jew jimminimizzaw ir-riskji relatati ma':

(a)	aċċess mhux awtorizzat għas-sistema ta' negozjar tagħhom jew għal parti minnha, inkluż l-aċċess mhux awtorizzat għall-ispazju tax-xogħol u ċ-ċentri tad-dejta;

(b)	interferenzi tas-sistema li jfixklu serjament jew jinterrompu l-funzjonament ta' sistema ta' informazzjoni bi dħul ta' dejta, bi trażmissjoni, ħsara, tħassir, deterjorazzjoni, tibdil, trażżin ta' din id-dejta, jew bl-inaċċessibilità ta' din id-dejta;

(c)	interferenzi tad-dejta li jħassru, jagħmlu ħsara, jiddeterjoraw, jibdlu jew irażżnu d-dejta fuq is-sistema ta' informazzjoni, jew jagħmlu din id-dejta inaċċessibbli;

(d)	interċettazzjonijiet, b'mezzi tekniċi, ta' trażmissjonijiet ta' dejta mhux pubbliċi lejn, minn jew f'sistema ta' informazzjoni, inkluż l-emissjonijiet elettromanjetiċi minn sistema ta' informazzjoni li ġġorr din id-dejta.

3.   Iċ-ċentri ta' negozjar għandhom minnufih jinformaw lill-awtorità kompetenti dwar inċidenti ta' użu ħażin jew aċċess mhux awtorizzat billi minnufih jipprovdu rapport tal-inċident li jindika n-natura tal-inċident, il-miżuri adottati b'reazzjoni għall-inċident u l-inizjattivi meħuda biex jiġu evitati inċidenti simili milli jiġru fil-futur.