(1)

L-Awtorità Ewropea tat-Titoli u s-Swieq (ESMA) qieset ir-“Rapport dwar l-eżitu tas-sejħa tal-Kumitat tas-Superviżuri Bankarji Ewropej għal evidenza dwar l-internalizzazzjoni tas-saldu mill-banek kustodji u l-attivitajiet tagħhom li jixbħu lil dawk ta' Kontropartijiet Ċentrali” tas-17 ta' April 2009, li juri differenzi konsiderevoli rigward ir-regoli u l-proċeduri ta' monitoraġġ fil-livell ta' internalizzaturi tas-saldu fost l-Istati Membri, kif ukoll dwar l-interpretazzjoni tal-kunċett ta' saldu internalizzat.

(2)

Skont ir-Regolament (UE) Nru 909/2014, l-internalizzaturi tas-saldu għandhom jirrappurtaw dwar is-saldi li jinternalizzaw. Sabiex tiġi pprovduta ħarsa ġenerali tajba lejn l-ambitu u l-firxa tas-saldi internalizzati, jeħtieġ li jiġi speċifikat aktar il-kontenut ta' dan ir-rappurtar. Ir-rapporti dwar is-saldu internalizzat għandhom jipprovdu informazzjoni dettaljata dwar il-volum u l-valur aggregati tal-istruzzjonijiet tas-saldu saldati minn internalizzaturi tas-saldu barra s-sistemi tas-saldu tat-titoli li jispeċifikaw il-klassi tal-assi, it-tip ta' tranżazzjonijiet ta' titoli, it-tip ta' klijenti, u d-Depożitorju Ċentrali tat-Titoli (CSD — Central Securities Depository) tal-emittenti.

Internalizzatur tas-saldu għandu jirrapporta biss saldi internalizzati fejn ikun eżegwixxa istruzzjoni ta' saldu minn klijent tal-internalizzatur tas-saldu fil-kotba tiegħu stess. Internalizzatur tas-saldu ma għandux jirrapporta allinjamenti sussegwenti ta' pożizzjonijiet ta' entrati fil-kotba li jirriflettu s-saldu ta' struzzjonijiet minn entitajiet oħra fil-katina taż-żamma tat-titoli, peress li dawn ma jikkwalifikawx bħala saldu internalizzat. B'mod simili, internalizzatur tas-saldu ma għandux jirrapporta tranżazzjonijiet eżegwiti f'ċentru tan-negozjar u trasferiti miċ-ċentru tan-negozjar lil kontroparti ċentrali (CCP — central counterparty) għall-ikklerjar jew lil CSD għas-saldu.

(3)

Sabiex tiġi ffaċilitata l-komparabbiltà tad-dejta bejn l-internalizzaturi tas-saldu, kalkoli relatati mal-valur ta' struzzjonijiet ta' saldu internalizzat skont dan ir-Regolament għandhom ikunu bbażati fuq dejta u metodoloġiji oġġettivi u affidabbli.

(4)

Ir-rekwiżiti ta' rappurtar stabbiliti f'dan ir-Regolament jistgħu jeħtieġu bidliet sinifikanti fis-sistema tal-IT, ittestjar tas-suq u aġġustamenti għall-arranġamenti legali tal-istituzzjonijiet ikkonċernati. Huwa għalhekk neċessarju li dawk l-istituzzjonijiet jingħataw żmien biżżejjed biex jippreparaw għall-applikazzjoni ta' dawk ir-rekwiżiti.

(5)

Dan ir-Regolament huwa bbażat fuq l-abbozz tal-istandards tekniċi regolatorji sottomess mill-ESMA lill-Kummissjoni.

(6)

L-ESMA wettqet konsultazzjonijiet pubbliċi miftuħa dwar l-abbozz tal-istandards tekniċi regolatorji li dan ir-Regolament huwa bbażat fuqhom, analizzat il-kostijiet u l-benefiċċji potenzjali relatati u talbet l-opinjoni tal-Grupp tal-Partijiet Konċernati tat-Titoli u s-Swieq stabbilit skont l-Artikolu 10 tar-Regolament (UE) Nru 1095/2010 tal-Parlament Ewropew u tal-Kunsill (2).

(7)

F'konformità mal-Artikolu 9(2) tar-Regolament (UE) Nru 909/2014, waqt li kienet qed tiżviluppa l-abbozz tal-istandards tekniċi regolatorji li fuqu huwa msejjes dan ir-Regolament, l-ESMA ħadmet f'kooperazzjoni mill-qrib mal-membri tas-Sistema Ewropea ta' Banek Ċentrali,

1.

“Struzzjoni ta' saldu internalizzat” tfisser struzzjoni minn klijent tal-internalizzatur tas-saldu sabiex jitqiegħed għad-dispożizzjoni tar-riċevitur ammont ta' flus jew sabiex tiġi trasferita s-sjieda ta' titolu jew titoli jew interess fihom permezz ta' entrata f'reġistru, jew b'mod ieħor, li tiġi saldata mill-internalizzatur tas-saldu fil-kotba tiegħu stess u mhux permezz ta' sistema tas-saldu tat-titoli.

2.

“Struzzjoni li ma tirnexxix tal-internalizzar tas-saldu” tfisser li saldu, jew saldu parzjali, ta' tranżazzjoni tat-titoli ma jseħħux fid-data miftiehma mill-partijiet ikkonċernati minħabba nuqqas ta' titoli jew flus, indipendentement mill-kawża sottostanti.