ANNESS
|
28.2.2017 |
MT |
Il-Ġurnal Uffiċjali tal-Unjoni Ewropea |
L 50/42 |
REGOLAMENT TA' IMPLIMENTAZZJONI TAL-KUMMISSJONI (UE) 2017/337
tas-27 ta' Frar 2017
li jemenda r-Regolament (KE) Nru 1375/2007 dwar l-importazzjonijiet tar-residwi mill-manifattura tal-lamtu mill-qamħirrum mill-Istati Uniti tal-Amerka
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) Nru 1308/2013 tal-Parlament Ewropew u tal-Kunsill tas-17 ta' Diċembru 2013 li jistabbilixxi organizzazzjoni komuni tas-swieq fi prodotti agrikoli u li jħassar ir-Regolamenti tal-Kunsill (KEE) Nru 922/72, (KEE) Nru 234/79, (KE) Nru 1037/2001 u (KE) Nru 1234/2007 (1), u b'mod partikolari l-Artikolu 178 tiegħu,
Billi:
|
(1) |
Ir-Regolament tal-Kummissjoni (KE) Nru 1375/2007 (2) jistabbilixxi d-dispożizzjonijiet biex ikun żgurat li r-residwi mill-manifattura tal-lamtu mill-qamħirrum li jiġi importat mill-Istati Uniti tal-Amerka jikkonformaw mad-definizzjoni miftehma għat-tariffa. L-Anness I ta' dak ir-Regolament fih ċertifikat mudell ta' konformità maħruġ mill-industrija tat-tħin niedi tal-Istati Uniti tal-Amerka. |
|
(2) |
Inbidlet il-kumpanija li tikkonferma l-wasla taċ-ċertifikati tal-produtturi u li toħroġ iċ-ċertifikati tal-konformità. Għaldaqstant, l-isem tal-kumpanija li jidher fuq iċ-ċertifikati tal-konformità jeħtieġ li jinbidel ukoll. |
|
(3) |
Biex ikunu jistgħu jintużaw iċ-ċertifikati li nħarġu qabel id-dħul fis-seħħ ta' dan ir-Regolament għandha tiġi stabbilita dispożizzjoni dwar dan. |
|
(4) |
Għalhekk ir-Regolament (KE) Nru 1375/2007 għandu jiġi emendat skont dan. |
|
(5) |
Il-miżuri previsti f'dan ir-Regolament huma skont l-opinjoni tal-Kumitat għall-Organizzazzjoni Komuni tas-Swieq Agrikoli, |
ADOTTAT DAN IR-REGOLAMENT:
Artikolu 1
Fl-Anness I tar-Regolament (KE) Nru 1375/2007, il-mudell taċ-“Ċertifikat ta' Konformità” jinbidel bil-mudell stabbilit fl-Anness ta' dan ir-Regolament.
Artikolu 2
Iċ-ċertifikati li nħarġu skont ir-Regolament (KE) Nru 1375/2007 qabel id-data tad-dħul fis-seħħ ta' dan ir-Regolament għandhom jibqgħu validi.
Artikolu 3
Dan ir-Regolament għandu jidħol fis-seħħ fis-seba' jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, is-27 ta' Frar 2017.
Għall-Kummissjoni
Il-President
Jean-Claude JUNCKER
(1) ĠU L 347, 20.12.2013, p. 671.
(2) Ir-Regolament tal-Kummissjoni (KE) Nru 1375/2007 tat-23 ta' Novembru 2007 dwar l-importazzjonijiet tar-residwi mill-manifattura tal-lamtu mill-qamħirrum mill-Istati Uniti tal-Amerka (ĠU L 307, 24.11.2007, p. 5)
ANNESS