(1)

Fid-29 ta' Ottubru 2015, skont l-Artikolu 5 tar-Regolament tal-Kunsill (KE) Nru 1225/2009 (2), il-Kummissjoni ħabbret permezz ta' notifika (“Notifika ta' Bidu”) ppubblikata fil-Ġurnal Uffiċjali tal-Unjoni Ewropea (3), il-bidu ta' proċediment antidumping fir-rigward tal-importazzjonijiet fl-Unjoni Ewropea, ta' ċertu tagħmir iwweldjat tarf ma' tarf ta' tubi u pajpijiet tal-azzar li ma jsaddadx, imlestija jew le, li joriġinaw mir-Repubblika tal-Poplu taċ-Ċina (“RPĊ”) u t-Tajwan (“il-pajjiżi kkonċernati”).

(2)

Il-proċediment tnieda wara lment ippreżentat fl-14 ta' Settembru 2015 mill-Kumitat tad-Difiża tal-Industrija ta' Tagħmir tal-Azzar Inossidabbli iwweldjati tarf ma' tarf tal-Unjoni Ewropea (Defence Committee of the Stainless Steel Butt-welding Fittings Industry of the European Union) (“l-ilmentatur”) f'isem il-produtturi li jirrappreżentaw bejn 37 % u 48 % tal-produzzjoni totali tal-Unjoni. Ippreżenta ruħu produttur wieħed li esprima l-oppożizzjoni tiegħu.

(3)

Għalhekk, il-livelli limitu rilevanti huma kif stabbiliti fl-Artikolu 5(4) tar-Regolament bażiku, jiġifieri “investigazzjoni ma għandhiex tinbeda skont il-paragrafu 1 sakemm ma jkunx ġie stabbilit, abbażi ta' eżami tal-livell ta' appoġġ, jew ta' oppożizzjoni għall-ilment espress mill-produtturi tal-prodott simili tal-Unjoni, li l-ilment ikun sar mill-industrija tal-Unjoni jew f'isimha. L-ilment għandu jitqies li jkun sar minn, jew f'isem, l-industrija tal-Unjoni jekk ikollu l-appoġġ ta' dawk il-produtturi tal-Unjoni li l-produzzjoni kollettiva tagħhom tikkostitwixxi aktar minn 50 % tal-produzzjoni totali tal-prodott simili prodott minn dik il-porzjoni tal-industrija tal-Unjoni li tesprimi appoġġ jew oppożizzjoni għall-ilment. Madankollu, l-ebda investigazzjoni m'għandha tinbeda li fiha l-produtturi tal-Unjoni li espressament jappoġġaw l-ilment jammontaw għal anqas minn 25 % tal-produzzjoni totali tal-prodott simili magħmul mill-industrija tal-Unjoni”. Dawn il-kundizzjonijiet intlaħqu fil-waqt tal-bidu tal-każ. Ladarba l-investigazzjoni tkun miftuħa, mhuwiex neċessarju li l-kundizzjonijiet jiġu ssodisfati b'mod permanenti matul l-investigazzjoni kollha. Il-Qorti kkonfermat dan għas-sitwazzjoni fejn kumpanija tirtira l-appoġġ tagħha għall-ilment (4); l-istess raġunament japplika b'analoġija f'sitwazzjoni fejn l-ambitu tal-prodott jinbidel.

(4)

Fl-istadju tal-bidu, waħda mill-partijiet interessati sostniet li l-Kummissjoni kienet ikkalkulat ħażin ir-rappreżentattività tal-ilmentatur fuq il-produzzjoni totali tal-industrija tal-Unjoni. Huma sostnew li l-ilmentatur preżenti ma jistax jirrappreżenta 43 %-49 % tal-produzzjoni tal-Unjoni billi fil-kawża preċedenti li kienet tkopri firxa simili tal-prodott, tmien kumpaniji kienu rrappreżentaw 48 % tal-produzzjoni tal-Unjoni. Il-Kummissjoni nnotat li filwaqt li l-firxa tal-prodott taż-żewġ investigazzjonijiet hija fil-fatt simili, il-firxa preċiża tal-prodott u l-perjodu kopert fl-investigazzjoni preżenti huma differenti mill-firxa tal-prodott u l-perjodu kopert fl-investigazzjoni preċedenti. Għalhekk, il-valutazzjonijiet imwettqa u r-riżultati ta' din il-valutazzjoni kienu differenti (jiġifieri l-produtturi tal-Unjoni differenti li ppreżentaw ruħhom f'din l-investigazzjoni kienu differenti minn dawk preżenti fl-investigazzjoni mnedija fl-2012; u dawk il-produtturi tal-Unjoni ġew iddefiniti fuq il-bażi tal-prodott simili tal-investigazzjoni tal-2012). In-nota għall-fajl dwar is-sitwazzjoni bid-data tat-28 ta' Ottubru 2015 tistabbilixxi l-produzzjoni totali tal-prodott simili fl-Unjoni għal 8 600 tunnellata għall-perjodu mill-1 ta' April 2014 sal-31 ta' Marzu 2015. Għall-investigazzjoni preċedenti mibdija fl-2012, in-nota għall-fajl dwar is-sitwazzjoni bid-data tad-9 ta' Novembru 2012 stabbiliet il-produzzjoni totali tal-prodott simili fl-Unjoni għal 21 600 tunnellata.

(5)

L-istess parti interessata sostniet li n-numru ta' kumpaniji li jappoġġaw l-ilment huwa baxx, 3 minn 16-il produttur tal-Unjoni, u talbet lill-Kummissjoni tinvestiga għalfejn il-produtturi l-oħra tal-Unjoni baqgħu siekta. Bi tweġiba għal dan il-kumment, il-Kummissjoni nnotat li n-numru ta' produtturi li jappoġġaw ilment mhuwiex importanti fil-ħin tal-bidu ta' kawża, iżda biss il-parti tagħhom fil-volum tal-produzzjoni tal-industrija tal-Unjoni kif definit fl-Artikolu 5(4) tar-Regolament bażiku.

(6)

Barra minn hekk, il-parti interessata kkontestat l-inklużjoni ta' produttur tal-Unjoni fid-definizzjoni tal-industrija tal-Unjoni billi dan il-produttur tal-Unjoni kien qiegħed jipproduċi tagħmir ta' valur miżjud konsiderevolment ogħla mill-produtturi l-oħra tal-Unjoni. Madankollu, l-investigazzjoni kkonfermat li dan il-produttur tal-Unjoni kien qiegħed jipproduċi wkoll u jbigħ il-prodott simili, u l-inklużjoni tiegħu fil-kampjun kienet ġustifikata. Hija kienet tkopri biss dawk il-volumi ta' dan il-produttur li jaqgħu fil-kamp ta' applikazzjoni tal-investigazzjoni. B'hekk din id-dikjarazzjoni ma ntlaqgħetx.

(7)

Il-Kummissjoni avżat b'mod uffiċjali lill-ilmentatur, lill-produtturi kollha tal-Unjoni, l-importaturi, kummerċjanti u l-utenti magħrufa li huma kkonċernati u lill-assoċjazzjonijiet tagħhom, kif ukoll lill-produtturi esportaturi u l-awtoritajiet tal-pajjiżi kkonċernati dwar il-bidu tal-investigazzjoni.

(8)

Il-Kummissjoni kkuntattjat ukoll lill-produtturi fil-Brażil, fl-Indja, fil-Malasja, fil-Korea, fl-Iżvizzera, fit-Tajlandja u fl-Istati Uniti tal-Amerka (“il-USA”) li kienu elenkati fin-Notifika ta' Bidu bħala pajjiżi analogi possibbli għall-finijiet tal-istabbiliment ta' valur normali għar-RPĊ.

(9)

Il-partijiet interessati ngħataw l-opportunità li jippreżentaw l-opinjonijiet tagħhom bil-miktub u li jitolbu seduta fil-limitu ta' żmien stabbilit fin-Notifika ta' Bidu. Il-partijiet kollha interessati li talbu dan u wrew li kien hemm raġunijiet partikolari biex jinstemgħu ngħataw seduta ta' smigħ.

(10)

Fin-Notifika ta' Bidu tagħha, il-Kummissjoni stqarret li għandha mnejn tieħu kampjun tal-partijiet interessati skont l-Artikolu 17 tar-Regolament bażiku.

(11)

Fin-Notifika ta' Bidu, il-Kummissjoni stqarret li, minħabba n-numru kbir ta' produtturi tal-Unjoni involuti fl-investigazzjoni, hija kienet se tillimita l-analiżi tagħha għal numru raġonevoli ta' produtturi tal-Unjoni. Fiż-żmien tal-bidu, ippreżentaw ruħhom il-produtturi msemmija fil-premessa 2, jiġifieri produttur wieħed tal-Unjoni u grupp ta' żewġ sussidjarji, li jinsabu fl-Unjoni, li jipproduċu l-prodott simili.

(12)

Wara l-pubblikazzjoni tan-Notifika ta' Bidu, produttur ieħor tal-Unjoni talab li jiġi inkluż fil-kampjun. L-erba' produtturi tal-Unjoni li kkooperaw għalhekk kienu inklużi fil-kampjun. Il-produtturi tal-Unjoni inklużi fil-kampjun kienu responsabbli għal madwar 47 % tal-produzzjoni totali stmata tal-Unjoni, u l-kampjun tqies bħala rappreżentattiv tal-industrija tal-Unjoni.

(13)

Madankollu, wieħed mill-produtturi tal-Unjoni inklużi fil-kampjun, jiġifieri Springer GmbH, sussegwentement informa lill-Kummissjoni bid-deċiżjoni tiegħu li ma jikkooperax. Dan il-produttur għalhekk ma ġiex investigat aktar. Il-Kummissjoni madankollu kkonkludiet li t-tliet produtturi tal-Unjoni li kien fadal fil-kampjun, li kienu responsabbli għal madwar 43 % tal-produzzjoni totali stmata tal-Unjoni, xorta kienu rappreżentattivi tal-industrija tal-Unjoni. Dan il-produttur tal-Unjoni informa wkoll lill-Kummissjoni li mhux biss kien produttur tal-Unjoni, iżda li kellu wkoll arranġament ta' pproċessar passiv ma' produttur Ċiniż.

(14)

Barra minn hekk, il-Kummissjoni vvalutat l-impatt tal-esklużjoni tat-tagħmir bit-truf forma ta' flanġijiet u ta' ħruxija baxxa (ara t-taqsima 2.2 aktar 'l isfel) fuq ir-rappreżentattività tal-kampjun. Hija sabet li l-produzzjoni ta' tagħmir bit-truf forma ta' flanġijiet u ta' ħruxija baxxa ma kinitx sostanzjali la fir-rigward tal-produtturi tal-Unjoni inklużi fil-kampjun u lanqas fir-rigward tal-produzzjoni totali tal-Unjoni u, għalhekk, ma kellha l-ebda impatt fuq ir-rappreżentattività tal-kampjun diġà magħżul.

(15)

Parti interessata waħda sostniet li l-produtturi tal-Unjoni għajr dawk li kienu qegħdin jappoġġaw l-ilment kienu qegħdin iżidu l-bejgħ tagħhom matul il-perjodu 2010-2015 u jbigħu bi prezzijiet u volum ogħla, skont l-istatistika tal-Eurostat dwar il-kummerċ intern tal-Unjoni.

(16)

Il-Kummissjoni analizzat id-dannu potenzjali kkawżat mill-importazzjonijiet mill-pajjiżi kkonċernati fir-rigward tal-industrija tal-Unjoni, inklużi l-produtturi kollha tal-Unjoni permezz tad-dejta makroekonomika (ara l-premessi 193-207) Barra minn hekk, il-Kummissjoni nnotat li l-parti bbażat l-analiżi tagħha fuq kodiċijiet tan-NM li kienu jinkludu mhux biss il-prodott ikkonċernat iżda wkoll prodotti barra l-kamp ta' applikazzjoni ta' din l-investigazzjoni. Barra minn hekk, b'mod ġenerali, il-volum irrappurtat fl-istatistika tal-kummerċ intern tal-Unjoni ma jirrigwardax biss il-produzzjoni tal-Unjoni iżda wkoll il-bejgħ mill-ġdid tal-prodotti importati. Għalhekk, ma setgħet tinstilet l-ebda konklużjoni dwar il-prezzijiet tal-bejgħ jew il-volum tal-produtturi tal-Unjoni. Fi kwalunkwe każ, jibqa' l-fatt li d-dejta makroekonomika tal-kampjun qed titqies bħala rappreżentattiva għall-industrija tal-Unjoni. Li din id-dejta ma tinkludix il-produtturi mhux ilmentaturi hija l-konsegwenza tal-fatt li dawn ma ppreżentawx ruħhom biex jiġu inklużi fil-kampjun.

(17)

Sabiex il-Kummissjoni tkun tista' tiddeċiedi jekk hux neċessarju li jittieħed kampjun u, jekk iva, tagħżel kampjun, l-importaturi mhux relatati kollha ntalbu jippreżentaw ruħhom lill-Kummissjoni u jipprovdu l-informazzjoni speċifikata fin-Notifika ta' Bidu.

(18)

Tliet importaturi mhux relatati pprovdew informazzjoni u qablu li jkunu inklużi fil-kampjun. Flimkien, huma kienu jirrappreżentaw 10 % tal-volumi stmati importati mir-RPĊ u t-Tajwan matul il-perjodu tal-investigazzjoni. Billi l-Kummissjoni setgħet teżamina l-importaturi kollha li ppreżentaw ruħhom, ma kien meħtieġ l-ebda kampjunar.

(19)

Biex il-Kummissjoni tkun tista' tiddeċiedi jekk ikunx meħtieġ kampjunar u, jekk dan ikun il-każ, tagħżel kampjun, fin-Notifika ta' Bidu l-produtturi esportaturi kollha fit-Tajwan intalbu jippreżentaw ruħhom lill-Kummissjoni u jipprovdu l-informazzjoni speċifikata fin-Notifika ta' Bidu. L-informazzjoni dwar il-bidu tal-investigazzjoni u n-Notifika ta' Bidu (li kienet tinkludi formola tal-kampjunar) intbagħtu lill-10 kumpaniji Tajwaniżi identifikati fl-ilment bħala produtturi esportaturi tal-prodott ikkonċernat lejn l-Unjoni. Barra minn hekk, l-Uffiċċju Rappreżentattiv tat-Taipei fl-Unjoni Ewropea ntalab jidentifika u/jew jikkuntattja produtturi esportaturi addizzjonali, jekk kien hemm.

(20)

Erba' produtturi esportaturi fit-Tajwan ipprovdew l-informazzjoni mitluba fin-Notifika ta' Bidu u qablu li jiġu inklużi fil-kampjun. Fid-dawl tan-numru ta' produtturi esportaturi Tajwaniżi li kkooperaw, ma tqiesx meħtieġ li jittieħed kampjun.

(21)

Matul l-investigazzjoni, tnejn mill-erba' kumpaniji ma kkooperawx aktar. Il-Kummissjoni infurmat lil dawn il-kumpaniji li, skont l-Artikolu 18(1) tar-Regolament bażiku, setgħu jsiru sejbiet provviżorji jew finali, pożittivi jew negattivi, abbażi tal-fatti disponibbli.

(22)

Biex il-Kummissjoni tkun tista' tiddeċiedi jekk ikunx meħtieġ kampjunar u, jekk iva, tagħżel kampjun, il-produtturi esportaturi kollha fir-RPĊ intalbu jidentifikaw ruħhom mal-Kummissjoni u jipprovdu l-informazzjoni speċifikata fin-Notifika ta' Bidu. Barra minn hekk, il-Missjoni tar-Repubblika tal-Poplu taċ-Ċina għall-Unjoni Ewropea ntalbet tidentifika u/jew tikkuntattja produtturi esportaturi addizzjonali, jekk kien hemm.

(23)

Disa' produtturi esportaturi fir-RPĊ ipprovdew l-informazzjoni mitluba u talbu li jkunu inklużi fil-kampjun. Skont l-Artikolu 17(1) tar-Regolament bażiku, il-Kummissjoni għażlet kampjun ta' erba' kumpaniji jew gruppi ta' kumpaniji, li kienu jirrappreżentaw madwar 79 % tal-esportazzjonijiet tal-produtturi esportaturi li kkooperaw lejn l-Unjoni u madwar 35 % tal-kwantitajiet totali esportati mir-RPĊ lejn l-Unjoni matul il-perjodu tal-investigazzjoni. Il-kriterju użat sabiex jintgħażlu l-erba' kumpaniji inklużi fil-kampjun kien il-volum tal-esportazzjonijiet tal-prodott ikkonċernat lejn l-Unjoni matul il-perjodu tal-investigazzjoni. Skont l-Artikolu 17(2) tar-Regolament bażiku, il-produtturi esportaturi magħrufa kollha kkonċernati u l-awtoritajiet tal-pajjiż ikkonċernat ġew ikkonsultati dwar l-għażla tal-kampjun, u ma waslu l-ebda kummenti.

(24)

Matul l-investigazzjoni, waħda mill-erba' kumpaniji inklużi fil-kampjun ma kkoperatx aktar. Il-Kummissjoni infurmat lil din il-kumpanija li skont l-Artikolu 18(1) tar-Regolament bażiku, setgħu jsiru sejbiet provviżorji jew finali, pożittivi jew negattivi, abbażi tal-fatti disponibbli.

(25)

L-ebda wieħed mill-produtturi esportaturi li kkooperaw fir-RPĊ ma talab trattament ta' ekonomija tas-suq (“TES”). Madankollu, ħames produtturi esportaturi fir-RPĊ li ma kinux inklużi fil-kampjun talbu eżami individwali skont l-Artikolu 17(3) tar-Regolament bażiku. Kif issemma fil-premessa 99, dawn it-talbiet ma ġewx aċċettati.

(26)

Intbagħtu kwestjonarji lill-erba' kumpaniji fit-Tajwan u lill-erba' kumpaniji inklużi fil-kampjun fir-RPĊ, lill-erba' produtturi tal-Unjoni inklużi fil-kampjun u lit-tliet importaturi inklużi fil-kampjun.

(27)

It-tweġibiet għall-kwestjonarju waslu biss mingħand żewġ kumpaniji fit-Tajwan, tliet kumpaniji fir-RPĊ, tliet produtturi tal-Unjoni u tliet importaturi.

(28)

Wara divulgazzjoni provviżorja, waslet tweġiba għall-kwestjonarju wkoll mingħand wieħed mill-produtturi ta' pajjiż analogu potenzjali li kien jinsab fl-Iżvizzera.

(29)

Il-Kummissjoni fittxet u vverifikat l-informazzjoni kollha li hija qieset bħala meħtieġa sabiex jiġi stabbilit id-dumping, id-dannu li jirriżulta u l-interess tal-Unjoni. Saru żjarat ta' verifika skont l-Artikolu 16 tar-Regolament bażiku fl-istabbilimenti tal-kumpaniji/l-assoċjazzjoni li ġejjin:

(30)

Saret żjara ta' verifika wkoll fil-bini tal-kumpanija Żvizzera Rohrbogen AG (Basel), li tqieset bħala produttur ta' pajjiż analogu potenzjali. Din iż-żjara ta' verifika saret wara divulgazzjoni provviżorja.

(31)

Fl-istadju provviżorju tal-investigazzjoni l-Kummissjoni ddeċidiet li ma timponix miżuri antidumping provviżorji. Ir-raġuni prinċipali għal din id-deċiżjoni kienet it-tfittxija li kienet għaddejja għal pajjiż analogu xieraq li abbażi tiegħu kien se jiġi stabbilit il-valur normali għall-produtturi esportaturi Ċiniżi. Fin-nuqqas ta' stabbiliment ta' marġni tad-dumping għar-RPĊ, ma setax lanqas jiġi stabbilit il-livell tal-importazzjonijiet akkumulati li kienu l-oġġett ta' dumping miż-żewġ pajjiżi kkonċernati. Filwaqt li d-dejta fir-rigward tal-industrija tal-Unjoni kienet disponibbli għall-finijiet tal-analiżi tad-diversi indikaturi tad-dannu, il-volum u l-prezzijiet tal-importazzjonijiet oġġett ta' dumping huma element indispensabbli fl-istabbiliment tad-dannu skont l-Artikolu 3 tar-Regolament bażiku. Għalhekk, fl-istadju provviżorju tal-investigazzjoni ma sar l-ebda stabbiliment tad-dannu, u konsegwentement tar-rabta kawżali bejn id-dannu u l-importazzjonijiet oġġett ta' dumping.

(32)

Il-partijiet interessati rċevew divulgazzjoni provviżorja fit-13 ta' Lulju 2016. Wara d-divulgazzjoni provviżorja waslu sottomissjonijiet mingħand produttur esportatur Tajwaniż wieħed, produttur esportatur Ċiniż wieħed, il-Kamra tal-Kummerċ Ċiniża tal-Metall, l-Importaturi u l-Esportaturi tal-Minerali u l-Prodotti Kimiċi (“CCCMC”) u l-ilmentatur. Dawn is-sottomissjonijiet kollha huma ttrattati fil-premessi li ġejjin.

(33)

Il-partijiet interessati rċevew id-dokument ta' divulgazzjoni finali fis-27 ta' Ottubru 2016. Il-Kummissjoni stiednet lill-partijiet interessati biex jippreżentaw kummenti bil-miktub u/jew biex jitolbu seduta mal-Kummissjoni u/jew mal-Uffiċjal tas-Seduta fi proċedimenti kummerċjali sas-16 ta' Novembru 2016.

(34)

Tliet produtturi esportaturi Ċiniżi, is-CCCMC, żewġ importaturi tal-Unjoni u l-ilmentatur ipprovdew il-kummenti tagħhom wara d-divulgazzjoni finali, u ntalbet seduta ta' smigħ mal-Uffiċjal tas-Seduta mill-produttur tal-Unjoni li kellu wkoll l-arranġament ta' pproċessar passiv kif ukoll seduta ta' smigħ mas-servizzi tal-Kummissjoni mis-CCCMC.

(35)

Matul is-smigħ mal-Uffiċjal tas-Seduta, il-produttur tal-Unjoni talab li l-prodotti li huma importati mill-ġdid wara proċessar passiv jkunu eżentati mid-dazji, minħabba li huma mhux qed jikkawżaw dannu lill-industrija tal-Unjoni billi dawn jirkbu ftit li xejn fuq il-produzzjoni tal-produtturi li lmentaw u minħabba li ma jkunx fl-interess tal-Unjoni li jiġu imposti dazji, filwaqt li jitqies l-istatus tiegħu bħala SME, il-fatt li rċieva fondi strutturali tal-UE bl-għan li tiġi stabbilita l-fabbrika tiegħu, u l-fatt li l-impożizzjoni tad-dazji teqred in-negozju tiegħu. Il-Kummissjoni stiednet lill-partijiet interessati biex jesprimu kull opinjoni li jista' jkollhom f'dan ir-rigward.

(36)

Barra minn hekk, produttur esportatur Ċiniż wieħed talab il-korrezzjoni ta' ismu li nkiteb ħażin, u importatur tal-Unjoni wieħed issuġġerixxa definizzjoni aktar preċiża ta' “tagħmir ta' ħruxija baxxa”, li kienet aċċettata mill-Kummissjoni.

(37)

Fir-rigward tad-divulgazzjoni finali, żewġ produtturi esportaturi Ċiniżi u s-CCCMC sostnew li l-perjodu previst mill-Kummissjoni għas-sottomissjoni tal-osservazzjonijiet mill-partijiet interessati kien insuffiċjenti u ma kienx jippermettilhom jindirizzaw b'mod sħiħ u komprensiv id-dejta kollha u r-raġunament kollu, li ġew ippreżentati għall-ewwel darba fid-divulgazzjoni finali. Huma qiesu dan bħala ksur serju tad-drittijiet tad-difiża tal-partijiet interessati f'dan il-proċediment.

(38)

Il-Kummissjoni nnotat li proċediment antidumping mibdi skont l-Artikolu (5) tar-Regolament bażiku jitmexxa skont skadenzi stretti. Il-partijiet interessati kkonċernati rċevew id-divulgazzjoni tad-deċiżjoni tal-Kummissjoni li ma jiġux imposti miżuri provviżorji kif ukoll tal-proposta tal-Kummissjoni għall-impożizzjoni ta' miżuri definittivi u ngħataw żmien raġonevoli biex jirrispondu. Skont l-Artikolu 20(5) tar-Regolament bażiku, il-Kummissjoni trid tistabbilixxi skadenza għal mill-inqas 10 ijiem għal kummenti wara d-divulgazzjoni finali. Billi kkonċediet 22 ġurnata, il-Kummissjoni kkonformat ma' dan ir-rekwiżit. L-ebda parti interessata ma talbet estensjoni f'dan ir-rigward. Qed jiġi wkoll enfasizzat li l-ebda dejta addizzjonali ma tista' tiġi żvelata fl-istadju provviżorju, mhux biss fir-rigward tas-sejbiet dwar id-dumping mir-RPĊ iżda wkoll fir-rigward tad-dannu. Fin-nuqqas ta' stabbiliment ta' marġni tad-dumping għar-RPĊ, ma setax jiġi stabbilit il-livell ta' importazzjonijiet oġġett ta' dumping mill-pajjiżi kkonċernati. Filwaqt li d-dejta fir-rigward tal-industrija tal-Unjoni hija disponibbli għall-finijiet tal-analiżi tad-diversi indikaturi tad-dannu, il-volum u l-prezzijiet tal-importazzjonijiet oġġett ta' dumping huma element indispensabbli fl-istabbiliment tad-dannu skont l-Artikolu 3 tar-Regolament bażiku. Għalhekk, l-ebda determinazzjoni ta' dannu ma saret fl-istadju provviżorju tal-investigazzjoni. It-talba għalhekk ma ntlaqgħetx.

(39)

Wara l-kummenti u t-talbiet ta' ċerti partijiet interessati wara d-divulgazzjoni finali, il-Kummissjoni żvelat dejta u informazzjoni addizzjonali. Din id-divulgazzjoni addizzjonali saret fil-25 ta' Novembru 2016. Sottomissjonijiet oħra waslu mingħand żewġ produtturi esportaturi Ċiniżi, is-CCCMC, l-Ilmentatur u tliet importaturi tal-Unjoni.

(40)

Matul is-smigħ mal-Uffiċjal tas-Seduta, l-Ilmentatur talab li t-talba għall-eżenzjoni għal skema ta' proċessar passiv ppreżentata minn wieħed mill-produtturi tal-Unjoni kif spjegat fil-premessa 35 hawn fuq m'għandhiex tingħata billi l-produttur tal-Unjoni inkwistjoni qed jimporta wkoll il-prodott ikkonċernat fiċ-Ċina. Barra minn hekk, bil-kontra ta' dak li kien sostna, il-prodotti tiegħu huma f'kompetizzjoni mal-prodott manifatturat mill-industrija tal-Unjoni. Matul din l-istess seduta, l-Ilmentatur spjega wkoll li l-biċċa l-kbira tan-negozjanti fl-Unjoni jaħżnu prodotti ċċertifikati doppjament kemm taħt l-istandards EN/DIN kif ukoll taħt l-istandards ASME/ANSI. Barra minn hekk, kuntrarju għall-istqarrija ta' wieħed mill-kummerċjanti, prodotti suġġetti għal standards differenti huma interkambjabbli.

(41)

Żewġ produtturi esportaturi Ċiniżi u s-CCCMC tennew il-pretensjonijiet tagħhom, speċjalment fir-rigward tan-nuqqas ta' divulgazzjoni tas-sejbiet dwar id-dannu fl-istadju provviżorju li fl-opinjoni tagħhom ma setax jiġi ġġustifikat min-nuqqas ta' dejta.

(42)

Bi tweġiba għal dan ta' hawn fuq, il-Kummissjoni tinnota li l-konklużjonijiet dwar l-indikaturi tad-dannu jistgħu biss jiġu żvelati ladarba l-volum ta' importazzjonijiet li huma l-oġġett ta' dumping jiġi determinat. F'dan il-każ partikolari fl-istadju provviżorju ma saret l-ebda determinazzjoni ta' dumping għar-RPĊ. Il-fatt li d-dejta mhux ipproċessata għal indikaturi ta' dannu kienet inġabret ma jfissirx li l-konklużjoni dwar l-indikaturi ta' dannu setgħet tiġi stabbilita. Għalhekk il-Kummissjoni pprovdiet divulgazzjoni adegwata skont it-tifsira tal-Artikolu 20 tar-Regolament bażiku. Il-Kummissjoni tqis li d-drittijiet tad-difiża ta' dawn il-partijiet interessati ġew rispettati.

(43)

L-investigazzjoni tad-dumping kienet tkopri l-perjodu mill-1 ta' Ottubru 2014 sat-30 ta' Settembru 2015 (“il-perijodu tal-investigazzjoni” jew il-“PI”).

(44)

L-analiżi tat-tendenzi li huma rilevanti gћall-valutazzjoni tad-dannu kopriet il-perjodu mill-1 ta' Jannar 2012 sa tmiem il-perjodu tal-investigazzjoni (“il-perjodu kkunsidrat”).

(45)

Wara d-divulgazzjoni definittiva, bosta partijiet interessati stqarrew li l-Kummissjoni kien messha eżaminat il-perjodu bejn l-2010 u l-PI minflok il-perjodu bejn l-2012 u l-PI. Hija l-prattika standard tal-Kummissjoni li tuża l-perjodu ta' erba' (4) snin biex tanalizza x-xejriet ta' dannu. Il-partijiet naqsu milli jissottomettu xi evidenza li kienet tappoġġa il-konklużjoni li l-perjodu kkunsidrat ma kienx xieraq.

(46)

Wara d-divulgazzjoni addizzjonali, żewġ produtturi esportaturi Ċiniżi u s-CCCMC tennew it-talba tagħhom rigward il-perjodu kkunsidrat għax-xejriet tad-dannu. Kif intqal hawn fuq hija prattika standard tal-Kummissjoni li tuża perjodu ta' erba' snin għall-valutazzjoni tad-dannu tagħha, abbażi tas-setgħa diskrezzjonali wiesgħa tagħha f'investigazzjonijiet ta' difiża kummerċjali. Barra minn hekk, il-partijiet interessati ma ppreżentaw l-ebda evidenza konvinċenti li kienet tobbliga lill-Kummissjoni tiddevja mill-prattika standard tagħha. Ukoll, il-każ (5) li għalih jirreferu l-partijiet interessati ġie tterminat minħabba l-irtirar tal-ilment. Għalhekk, ma saret l-ebda determinazzjoni ta' dannu f'dan il-każ. Barra minn hekk, il-prodott ikkonċernat minn din l-investigazzjoni huwa differenti mill-prodott ikkonċernat tal-investigazzjoni mitmuma. Għalhekk din l-affermazzjoni ma ntlaqgħetx.

(47)

Il-prodott soġġett għal din l-investigazzjoni huwa tagħmir għat-twaħħil tarf ma' tarf ta' tubi u pajpijiet, ta' gradi ta' azzar li ma jsaddadx awstenitiku, li jikkorrispondi għat-tipi AISI 304, 304L, 316, 316L, 316Ti, 321 u 321H u l-ekwivalenti tagħhom fin-normi l-oħra, b'dijametru estern massimu li ma jaqbiżx 406,4 mm u ħxuna tal-ħitan ta' 16 mm jew anqas, bi ħruxija ta' mhux anqas minn 0,8 mikrometri, mhux iffurmati bħala flanġijiet, imlestija jew le, li joriġinaw mir-RPĊ u mit-Tajwan. Il-prodott jaqa' taħt il-kodiċijiet NM ex 7307 23 10 u ex 7307 23 90.

(48)

Il-prodott ikkonċernat jiġi mmanifatturat essenzjalment billi jinqatgħu u jiġu ffurmati tubi u pajpijiet. Il-prodott ikkonċernat jintuża biex jgħaqqad pajpijiet u tubi tal-azzar li ma jsaddadx u jeżisti f'forom differenti bħal elbows, reducers, forom ta' T u tappijiet.

(49)

Il-prodott ikkonċernat jintuża f'firxa wiesgħa ta' industriji tal-konsumatur u applikazzjonijiet finali. Xi ftit eżempji huma:

(50)

Wara d-divulgazzjoni finali, importatur wieħed tal-Unjoni sostna li t-tappijiet m'għandhomx ikunu inklużi fl-ambitu tal-prodott billi ma jiġux prodotti permezz tal-qtugħ u l-iffurmar ta' pajpijiet.

(51)

Bi tweġiba għal dan l-argument, qed tinġibed l-attenzjoni li l-prodott ikkonċernat huwa “essenzjalment” iżda mhux “esklussivament” immanifatturat permezz tal-qtugħ u l-iffurmar ta' tubi u pajpijiet. Huwa nnutat ukoll li minn perspettiva tas-suq, tappijiet huma tipi ta' fittings u huma ppreżentati bħala tali fil-katalgi tal-kumpaniji. It-talba għalhekk ma ntlaqgħetx.

(52)

Wara d-divulgazzjoni definittiva, diversi partijiet argumentaw li l-prodotti importati u l-produzzjoni tal-Unjoni mhumiex teknikament interkambjabbli minħabba standards tekniċi differenti, jiġifieri EN/DIN u ASME/ANSI, jew li l-prodotti manifatturati skont l-istandards EN/DIN jenħtieġ li jiġu esklużi mill-ambitu tal-prodott.

(53)

L-ewwel nett, huwa importanti li jiġi ċċarat li kemm l-industrija tal-Unjoni kif ukoll il-produtturi esportaturi suġġetti għall-investigazzjoni jipproduċu ż-żewġ tipi ta' standards tekniċi. Dan huwa minnu wkoll għall-kumpaniji inklużi fil-kampjun. Barra minn hekk, il-magni użati biex jipproduċu għal standards differenti huma l-istess, u l-proċess ta' produzzjoni huwa l-istess.

(54)

It-tieni, l-investigazzjoni u seduta ta' smigħ mal-produttur tal-Unjoni li għandu wkoll arranġament ta' proċessar passiv wrew li l-karatteristiċi fiżiċi, tekniċi u kimiċi tal-prodotti approvati skont l-istandards EN/DIN u ASME/ANSI huma komparabbli. Billi l-istandards jistgħu jeħtieġu xi ftit differenzi skont il-ħxuna u reżistenza, dawk id-differenzi jvarjaw għal kull tip ta' prodott, u għal ħafna tipi ta' prodotti, hemm koinċidenza sħiħa jew sostanzjali.

(55)

It-tielet, iż-żewġ tipi ta' prodotti huma f'kompetizzjoni ma' xulxin. Għalkemm huwa veru li għal ċerti proġetti, l-ispeċifikazzjonijiet se jirrikjedu l-użu ta' EN/DIN jew ASME/ANSI fil-waqt li fih l-inġiniera jiddeċiedu dwar l-għażla tal-istandard, iż-żewġ speċifikazzjonijiet jinsabu f'kompetizzjoni. Dan jidher mill-fatt li l-użu tal-istandards EN/DIN u/ASME/ANSI jvarja bejn l-Istati Membri bbażat fuq xejriet storiċi, iżda t-tnejn li huma, kemm wieħed kif ukoll l-ieħor, jistgħu jintużaw fi proġetti ġodda madwar l-Unjoni.

(56)

Fl-aħħar nett, hemm ukoll kompetizzjoni diretta wara l-għażla tal-istandard fejn l-istandards jirkbu fuq xulxin kompletament, bħalma huwa l-każ għal ċerti tipi ta' prodotti.

(57)

Il-Kummissjoni tinnota wkoll li minkejja talbiet speċifiċi li saru lill-importatur li kkopera, il-Kummissjoni ma rċeviet l-ebda evidenza li turi li l-prodott simili u l-prodott ikkonċernat ma humiex f'kompetizzjoni.

(58)

Għaldaqstant id-dikjarazzjoni ma ntlaqgħetx.

(59)

Wara d-divulgazzjoni addizzjonali, diversi partijiet interessati, inkluż importatur mhux relatat, ikkonfermaw is-sejbiet tal-investigazzjoni ta' hawn fuq. Dawn il-partijiet interessati tennew li l-istandard ASME/ANSI jew EN/DIN fil-biċċa l-kbira huma interkambjabbli. Barra minn hekk, parti interessata minnhom iddikjarat li l-fornituri tat-tubi u tal-pajpijiet fl-Unjoni jipprovdu prodotti ċċertifikati doppjament u kull manifattur tal-prodott ikkonċernat jista' wkoll jikseb ċertifikazzjoni doppja. Din il-parti interessata żiedet tgħid li, fil-fatt, il-biċċa l-kbira tal-istokkijiet kummerċjali tal-prodott ikkonċernat u l-prodott simili għandha ċertifikazzjoni doppja.

(60)

Fin-nuqqas ta' kummenti oħrajn dwar l-istandards tal-prodott, l-allegazzjoni li l-prodott ikkonċernat u l-prodott simili kellhom jiġu analizzati b'mod separat abbażi tal-istandards ASME/ANSI u EN/DIN ma ntlaqgħetx.

(61)

Tliet importaturi mhux relatati, is-CCCMC u żewġ produtturi esportaturi Ċiniżi sostnew li d-definizzjoni tal-prodott ma tiddisintingwix b'mod suffiċjenti bejn tagħmir industrijali u l-hekk imsejjaħ “tagħmir sanitarju”, għalkemm għandhom karatteristiċi fiżiċi differenti. Barra minn hekk, huma sostnew li l-industrija tal-Unjoni ma tipproduċix “tagħmir sanitarju” u li għalhekk f'dan il-proċediment antidumping għandu jiġi inkluż biss “it-tagħmir industrijali”.

(62)

Waqt seduta ta' smigħ konġunta, it-tliet importaturi mhux relatati ssottomettew evidenza li tappoġġa l-affermazzjoni tagħhom u wrew numru ta' differenzi ewlenin bejn it-tagħmir “industrijali” u dak “sanitarju”, ibbażati fuq karatteristiċi fiżiċi, l-imballaġġ, l-użu finali u l-livell tal-prezzijiet.

(63)

Id-differenza kienet teħtieġ ridefinizzjoni f'termini tal-karatteristiċi fiżiċi u d-distinzjoni xierqa kienet ibbażata fuq il-ħruxija tal-wiċċ tat-tagħmir. Minflok l-użu tat-terminu tagħmir “sanitarju”, huwa xieraq li wieħed jitkellem dwar “tagħmir ta' ħruxija baxxa”, jiġifieri tagħmir bi ħruxija medja (Ra) tal-finitura tal-wiċċ ta' anqas minn 0,8 mikrometru. Dan it-tagħmir jintuża fl-industrija tal-ikel u x-xorb, fl-industrija tas-semikondutturi u fl-industriji farmaċewtiċi u tal-kura tas-saħħa.

(64)

Hemm differenzi importanti f'kemm huwa lixx il-wiċċ u fil-finitura tal-wiċċ. It-tarf tat-tagħmir ta' ħruxija baxxa huwa ġeneralment kwadru (b'differenza minn iċċanfrinat), u dan ġeneralment ikollu ħxuna tal-ħitan u dijametru ta' barra aktar baxxi. L-eżistenza ta' standards separati ma tidhirx u lanqas ma jidher il-fatt li l-materja prima għat-tagħmir ta' ħruxija baxxa hija dejjem kojl illaminat fil-kiesaħ jew tubu miġbud bil-kesħa (b'differenza mil-laminazzjoni bis-sħana għat-tagħmir ta' ħruxija għolja). Fl-aħħar nett, it-tagħmir ta' ħruxija baxxa jiġi ppakkjat individwalment f'borża tal-plastik, filwaqt li t-tagħmir ta' ħruxija għolja jiġi ppakkjat bil-massa fil-kartun.

(65)

Ma hemm l-ebda interkambjabbiltà: l-industrija li tuża tagħmir ta' ħruxija baxxa ma tistax tuża tagħmir ta' ħruxija għolja minħabba r-rekwiżiti iġjeniċi; mill-banda l-oħra, t-tagħmir ta' ħruxija baxxa mhuwiex tajjeb għal applikazzjonijiet li jużaw ħruxija għolja minħabba r-rekwiżiti ta' reżistenza aktar baxxa għall-pressjoni u għat-temperatura u l-livelli ta' prezzijiet ogħla tagħhom. L-investigazzjoni wriet li l-livell tal-prezzijiet tat-tagħmir ta' ħruxija baxxa huwa bħala medja minn 2 sa 3 darbiet ogħla għal kull kg. Dan huwa dovut prinċipalment għall-intensità tax-xogħol marbuta mal-illostrar u l-kontroll addizzjonali tal-kwalità.

(66)

Billi l-kwestjonarji kienu diġà ntbagħtu fiż-żmien tas-seduta ta' smigħ, ma kinitx aktar possibbli bidla fundamentali fin-numru tal-kodiċi tal-prodott (minn issa 'l quddiem “PCN”). Madankollu, biż-żieda tal-unika karatteristika fiżika tal-“ħruxija” bħala kolonna fit-tabella ta' tranżazzjoni bi tranżazzjoni u kriterju supplimentari fit-tabella tal-kost tal-produzzjoni fit-tweġiba għall-kwestjonarju, setgħet issir id-distinzjoni bejn iż-żewġ tipi ta' tagħmir. Kemm l-industrija tal-Unjoni kif ukoll l-importaturi tal-Unjoni eventwalment qablu li t-tagħmir bi ħruxija medja (Ra) tal-wiċċ ta' anqas minn 0,8 mikrometru ma għandux jitqies bħala l-prodott ikkonċernat. Għalhekk is-servizzi tal-Kummissjoni fl-istadju provviżorju tal-investigazzjoni qiesu li dan it-tagħmir għandu jiġi eskluż mill-kamp ta' applikazzjoni tal-investigazzjoni.

(67)

Wara d-divulgazzjoni provviżorja, wieħed mill-produtturi Ċiniżi inkluż fil-kampjun sostna li t-tagħmir ta' ħruxija baxxa ma għandux jiġi eskluż mid-definizzjoni tal-prodott. Il-kumpanija inkwistjoni kkontestat ukoll id-dikjarazzjonijiet magħmula mill-partijiet interessati, rigward id-differenzi fil-karatteristiċi fiżiċi, il-materjali tal-imballaġġ, il-livelli tal-kost/prezzijiet, u n-nuqqas ta' interkambjalità bejn it-tagħmir ta' ħruxija baxxa u t-tagħmir ta' ħruxija għolja. Madankollu, il-kwistjoni rigward id-differenzi fil-karatteristiċi fiżiċi, il-materjali tal-imballaġġ u l-livelli tal-prezzijiet bejn t-tagħmir ta' ħruxija baxxa u għolja kienet verifikata u kkonfermata fuq il-post fit-Tajwan. Għalhekk din l-affermazzjoni ma ntlaqgħetx.

(68)

Produttur esportatur Ċiniż-Tajwaniż sostna li t-tagħmir forma ta' flanġijiet, jiġifieri tagħmir li għandu t-truf iffurmati bħala flanġijiet, mhuwiex il-prodott ikkonċernat skont id-definizzjoni fin-Notifika ta' Bidu.

(69)

Jenħtieġ li jingħad li l-forma tat-tarf hija l-fattur determinanti għat-teknika li tista' tintuża għat-tqabbid tat-tagħmir mat-tubi. Jintużaw tekniki differenti għall-produzzjoni ta' tagħmir għat-twaħħil tarf ma' tarf bil-welding u ta' tagħmir forma ta' flanġijiet. It-tagħmir għat-twaħħil tarf ma' tarf bil-welding huwa prodott bit-teknika tal-welding, filwaqt li b'kuntrast, tinuża t-teknika tal-ikklampjar u tal-boltijiet fil-produzzjoni tat-tagħmir forma ta' flanġijiet. Barra minn hekk, in-noti ta' spjegazzjoni tal-kodiċijiet NM tad-definizzjoni tal-prodott jispeċifikaw li t-truf tat-tagħmir għat-twaħħil tarf ma' tarf bil-welding għandhom jinqatgħu kwadri jew iċċanfrinati sabiex jiġi faċilitat l-iwweldjar mat-tubi.

(70)

Instab ukoll li l-produzzjoni ta' tagħmir bit-truf forma ta' flanġijiet teħtieġ kostijiet addizzjonali, minħabba l-input akbar ta' materja prima u intermedja u proċess ta' manifattura aktar elaborat. Minn perspettiva ta' proċess ta' produzzjoni, it-tagħmir għat-twaħħil tarf ma' tarf bil-welding jista' jitqies bħala prodott nofsu lest għall-produzzjoni ta' tagħmir bit-truf forma ta' flanġijiet.

(71)

L-industrija tal-Unjoni qablet mal-fehma li t-tagħmir bit-truf forma ta' flanġijiet kien prodott differenti u qablet ukoll mal-esklużjoni tiegħu mid-definizzjoni tal-prodott.

(72)

Is-servizzi tal-Kummissjoni, mill-istadju provviżorju, diġà kienu qiesu li t-tagħmir bit-truf forma ta' flanġijiet jenħtieġ li jiġi eskluż mill-kamp ta' applikazzjoni tal-investigazzjoni. Ma waslu l-ebda kummenti mill-partijiet interessati li jikkontestaw din is-sejba, għalhekk din id-deċiżjoni nżammet.

(73)

L-investigazzjoni wriet li l-prodotti li ġejjin għandhom l-istess karatteristiċi fiżiċi bażiċi kif ukoll l-istess użi bażiċi:

(74)

Il-Kummissjoni għalhekk iddeċidiet li dawn il-prodotti huma prodotti simili skont it-tifsira tal-Artikolu 1(4) tar-Regolament bażiku.

(75)

Kif indikat fil-premessa 27, żewġ kumpaniji Tajwaniżi biss ikkooperaw fl-investigazzjoni billi pprovdew tweġibiet sħaħ għall-kwestjonarji dwar l-antidumping. Il-bejgħ ta' dawn il-kumpaniji kien jammonta għal 36 % tal-importazzjonijiet tal-prodott ikkonċernat mit-Tajwan lejn l-Unjoni, fil-perjodu tal-investigazzjoni.

(76)

Waħda mill-kumpaniji li kkooperaw kienet tipproduċi prinċipalment tagħmir li mhuwiex kopert mid-definizzjoni riveduta tal-prodott fl-investigazzjoni kif spjegat fil-premessi minn 61 sa 71 (tagħmir bi ħruxija medja (Ra) tal-finitura tal-wiċċ ta' anqas minn 0,8 mikrometru u/jew tagħmir bit-truf f'forma ta' flanġijiet). Dan il-produttur ma kellux bejgħ domestiku tal-prodott simili matul il-perjodu tal-investigazzjoni.

(77)

B'kuntrast, it-tieni kumpanija li kkooperat hija involuta fil-produzzjoni estensiva tal-biċċa l-kbira tat-tipi standard ta' tagħmir, li huma koperti mill-kamp ta' applikazzjoni tal-investigazzjoni. Il-kumpanija tipproduċi biss fuq il-bażi ta' pajpijiet iwweldjati, mill-gradi 304 u 316 biss ta' azzar u elbows u forom ta' T biss (u forom ta' T biss bl-istess dijametru tal-pajp prinċipali u fergħa li ma jiġux iwweldjati iżda li jiġu prodotti minn biċċa waħda ta' pajp biċ-ċentru tiegħu “miġbud 'l isfel” biex issir forma ta' T). Il-produttur ma kellux bejgħ domestiku tal-prodott simili matul il-perjodu tal-investigazzjoni.

(78)

Fil-każ taż-żewġ produtturi esportaturi Tajwaniżi, minħabba n-nuqqas ta' bejgħ domestiku tal-prodott simili, il-valur normali nħadem skont l-Artikolu 2(3) u (6) tar-Regolament bażiku billi mal-kost medju tal-manifattura tal-prodott rilevanti żdiedu l-ispejjeż tal-bejgħ, dawk ġenerali u amministrattivi (“BĠ&A”) imġarrba flimkien ma'profitt raġonevoli.

(79)

Fil-każ tal-ewwel kumpanija li kkooperat, l-ammont tal-ispejjeż BĠ&A u l-profitt kienu stabbiliti, skont l-Artikolu 2(6)(b) tar-Regolament bażiku, jiġifieri, abbażi tal-ammonti attwali applikabbli għall-produzzjoni u l-bejgħ, matul il-kors ordinarju tal-kummerċ, tal-istess kategorija ġenerali ta' prodotti għall-produttur inkwistjoni fis-suq domestiku tal-pajjiż tal-oriġini, jiġifieri l-bejgħ domestiku tat-tagħmir ta' ħruxija medja (Ra) tal-finitura tal-wiċċ ta' anqas minn 0,8 mikrometru.

(80)

Fil-każ tat-tieni kumpanija li kkooperat, minħabba n-nuqqas ta' bejgħ domestiku proprju tal-prodott simili jew tal-istess kategorija ġenerali ta' prodotti, ġie applikat l-Artikolu 2(6)(c) tar-Regolament bażiku. Għal dan l-għan, fil-kostruzzjoni tal-valur normali l-Kummissjoni użat l-istess ammonti ta' spejjeż BĠ&A u profitt użati għall-ewwel kumpanija, li kienet l-unika dejta disponibbli u verifikata u rreferiet għall-bejgħ tal-istess kategorija ġenerali ta' prodott fis-suq Tajwaniż.

(81)

Wara d-divulgazzjoni provviżorja, it-tieni produttur esportatur Tajwaniż qajjem ċerti pretensjonijiet kontra l-użu tad-dejta tal-ewwel produttur Tajwaniż għall-kostruzzjoni tal-valur normali tiegħu. L-ewwel, il-kumpanija sostniet (fuq il-bażi tal-verżjoni miftuħa tat-tweġiba għall-kwestjonarju u t-tweġibiet għall-ittra tan-nuqqasijiet tal-produttur l-ieħor) li l-ewwel produttur ma jistax jitqies bħala produttur esportatur tal-prodott ikkonċernat billi dan allegatament jipproduċi u jesporta biss lejn l-Unjoni tipi tal-prodott li kienu esklużi mid-definizzjoni tal-prodott, jiġifieri, tagħmir ta' ħruxija baxxa u tagħmir bit-truf forma ta' flanġijiet. It-tieni, il-kumpanija sostniet li l-użu taċ-ċifri tal-BĠ&A ta' kumpanija waħda sabiex jinħadem il-valur normali għal kumpanija oħra jikkontradixxi s-sejbiet tal-Korp tal-Appell tad-WTO (6) li l-BĠ&A ta' kumpanija unika ma jistgħux jintużaw biex jinħadmu l-valuri normali.

(82)

Bi tweġiba għall-pretensjonijiet ta' hawn fuq, il-Kummissjoni, waqt il-verifika fuq il-post fil-bini tal-kumpanija inkwistjoni, stabbiliet li parti mill-produzzjoni u l-bejgħ tal-kumpanija lill-Unjoni matul il-PI (jiġifieri tagħmir vakwu bi trattament addizzjonali tal-wiċċ li jirriżulta fi ħruxija tal-wiċċ ta' aktar minn 0,8 mikrometru) kienet taqa' fid-definizzjoni tal-prodott ta' din l-investigazzjoni. Għalhekk, il-kumpanija tqieset bħala produttur esportatur tal-prodott ikkonċernat u ġie kkalkulat marġni ta' dumping għal din il-kumpanija. Jenħtieġ li jiġi enfasizzat li l-kumpanija inkwistjoni ma kinitx qiegħda tbigħ dan it-tip ta' prodott fis-suq domestiku fit-Tajwan matul il-PI, li jaffettwa l-metodoloġija tal-kostruzzjoni tal-valur normali għaż-żewġ produtturi esportaturi Tajwaniżi kif spjegat fil-premessi 79 u 80. It-tieni, jenħtieġ jiġi nnotat ukoll li d-deċiżjoni tal-Korp tal-Appell tad-WTO kkwotata mill-parti interessata tirreferi għas-sitwazzjoni deskritta fl-Artikolu 2(6)(a) tar-Regolament bażiku; jiġifieri l-użu tal-medja ponderata tal-kostijiet BĠ&A ta' produtturi oħra fir-rigward tal-produzzjoni u l-bejgħ tal-prodott simili fis-suq domestiku tal-pajjiż tal-oriġini. F'dan il-każ, madankollu, il-kostruzzjoni tal-valur normali kienet ibbażata fuq l-Artikolu 2(6)(c) tar-Regolament bażiku; jiġifieri bil-kostijiet BĠ&A stabbiliti fuq il-bażi ta' “kwalunkwe metodu raġonevoli ieħor, sakemm l-ammont għal profitt b'hekk stabbilit ma jaqbiżx il-profitt normalment magħmul minn esportaturi jew produtturi oħra fuq bejgħ ta' prodotti tal-istess kategorija ġenerali fis-suq domestiku tal-pajjiż ta' oriġini”. Fid-dawl ta' dan ta' hawn fuq, il-Kummissjoni żżomm id-deċiżjoni tagħha rigward is-sors tad-dejta użat għall-kostruzzjoni tal-valur normali. Jenħtieġ li jiġi nnotat li l-Kummissjoni ħarset ukoll lejn is-sors tad-dejta alternattiv għall-istabbiliment tal-kostijiet BĠ&A sabiex jinħadem il-valur normali, jiġifieri d-dejta pprovduta mill-produttur analogu li kkoopera fl-Iżvizzera. Iċ-ċifra inkwistjoni ma kinitx ipprovduta għall-PI iżda huwa kkonfermat li għas-snin finanzjarji 2014 u 2015 din kienet fil-medda ta' bejn 8 % sa 12 % li hija komparabbli maċ-ċifra aġġustata tal-kostijiet ta' BĠ&A li finalment intużat fil-kalkolu kif indikat fil-premessa 86.

(83)

Fis-sottomissjoni tiegħu, il-produttur esportatur Tajwaniż allega wkoll divulgazzjoni inadegwata tad-dejta kritika użata għall-istabbiliment tal-valur normali. Fil-fatt, għal raġunijiet ta' kunfidenzjalità kummerċjali, din id-divulgazzjoni speċifika ma setatx tiżvela l-BĠ&A, il-profitt u l-allowances fuq iċ-ċifri tal-kostijiet użati fil-kalkoli. Il-kumpanija, li taf il-kostijiet tal-manifattura proprji tagħha, setgħet faċilment tistima l-aġġustament medju ġenerali li sar. Madankollu, hija talbet id-divulgazzjoni taċ-ċifri speċifiċi fir-rigward ta' ċerti elementi tal-kalkolu, jiġifieri l-livelli tal-BĠ&A u tal-profitt, il-livelli tal-allowances tal-valur normali fuq il-kostijiet u l-prezzijiet u l-aġġustament tal-VAT għall-valur normali.

(84)

Bi tweġiba għal din it-talba, irid jiġi sottolinjat li ċ-ċifri eżatti tal-kostijiet BĠ&A, il-profitt u l-allowances fuq il-kostijiet applikati fil-kostruzzjoni tal-valur normali ma jistgħux jiġu żvelati, billi d-dejta toriġina minn kumpanija waħda, li hija kompetitriċi Tajwaniża tal-kumpanija li talbet din l-informazzjoni, u din il-kumpanija talbet trattament kunfidenzjali minħabba li d-dejta tinkludi sigrieti kummerċjali. Ovvjament din it-talba hija ġustifikata. Madankollu, l-aktar ċifri importanti, jiġifieri, l-BĠ&A u l-profitt użati għall-kalkolu finali, huma żvelati f'meded fil-premessa 86 hawn taħt. Jenħtieġ li jiġi nnotat ukoll li l-livell tal-allowances fuq il-kostijiet kien baxx ħafna u kellu impatt insinifikanti fuq il-livell tal-valur normali u l-marġni tad-dumping. Ma kien applikat l-ebda allowance fuq il-prezzijiet billi ma ntużawx prezzijiet domestiċi fil-kalkolu tal-valur normali. Ukoll fil-każ ukoll tat-Tajwan, ma sar l-ebda aġġustament tal-VAT għall-valur normali.

(85)

Fl-aħħar nett, din il-kumpanija argumentat li l-livell tal-BĠ&A u l-profitt tal-kompetitur tagħha mhuwiex rappreżentattiv għalihom. Hija sostniet li l-produttur l-ieħor fit-Tajwan jopera produzzjoni fuq skala żgħira u jbigħ prodotti speċjalizzati ħafna, filwaqt li hija kienet involuta fil-produzzjoni u l-bejgħ bil-massa ta' prodotti standard.

(86)

Fil-fatt, waqt iż-żjarat ta' verifika kien ikkonfermat li l-prodotti manifatturati u mibjugħa miż-żewġ kumpaniji huma differenti, u għalhekk l-istrutturi tal-kostijiet BĠ&A tagħhom huma wkoll differenti. Għalhekk, il-Kummissjoni ddeċidiet li tnaqqas il-livell tal-kostijiet BĠ&A użat għall-kostruzzjoni tal-valur normali għal dan it-tieni produttur esportatur li kkoopera, bil-proporzjon tal-kostijiet lavorattivi relatati mal-kontroll tal-kwalità u l-kostijiet tar-riċerka u l-iżvilupp. Dan wassal għal tnaqqis fl-aġġustament tal-BĠ&A għal-livell ta' 7 %-13 % espress bħala perċentwal tal-fatturat, li suċċessivament naqqas il-livell tal-marġni tad-dumping individwali tiegħu. Fl-istess waqt, il-Kummissjoni qieset li l-marġni ta' profitt użat għall-kostruzzjoni tal-valur normali (1 %-5 % fuq il-fatturat) kien raġonevoli. L-aġġustament globali finali magħmul għall-kostijiet tal-manifattura fil-kalkolu tal-valur normali għall-produttur esportatur inkwistjoni kien ta' 15,36 %.

(87)

Iż-żewġ produtturi esportaturi li kooperaw għamlu bejgħ għall-esportazzjoni lejn l-Unjoni direttament lil klijenti indipendenti li kienu jinsabu fl-Unjoni.

(88)

Il-prezzijiet tal-esportazzjoni kienu stabbiliti abbażi tal-prezzijiet attwalment imħallsa jew pagabbli għall-prodott ikkonċernat meta jinbiegħ għall-esportazzjoni mill-pajjiż esportatur skont l-Artikolu 2(8) tar-Regolament bażiku.

(89)

Il-valur normali u l-prezz tal-esportazzjoni tal-produtturi esportaturi li kkooperaw ġew imqabbla fuq bażi ta' kif joħorġu mill-fabbrika.

(90)

Sabiex ikun żgurat tqabbil ġust bejn il-valur normali u l-prezz tal-esportazzjoni, saret konsiderazzjoni xierqa fil-forma ta' aġġustamenti għad-differenzi li jaffettwaw il-prezzijiet u l-kumparabbiltà tal-prezzijiet skont l-Artikolu 2(10) tar-Regolament bażiku.

(91)

Fuq din il-bażi, saru aġġustamenti għat-trasport, il-kostijiet tal-ġarr tal-merkanzija bil-baħar u tal-assigurazzjoni, il-kostijiet tal-immaniġġjar, tat-tagħbija u l-kostijiet anċillari, il-kostijiet tal-ippakkjar, il-kostijiet ta' kreditu, skontijiet u kummissjonijiet li kienu ppruvati li jaffettwaw it-tqabbil tal-prezzijiet. L-aġġustamenti totali kienu fil-medda ta' 1 %-10 %, ibbażati fuq il-valuri attwali rrappurtati mill-produtturi esportaturi Tajwaniżi u vverifikati fuq il-post. Dawn iċ-ċifri huma dawk irrappurtati għall-elementi ta' kost rilevanti mill-kumpaniji Tajwaniżi, u kienu żvelati lilhom għall-verifika fid-divulgazzjonijiet speċifiċi.

(92)

Ta' min jinnota li fil-kalkolu, il-Kummissjoni ċaħdet aġġustament għall-kambju mitlub minn waħda mill-partijiet interessati. Il-parti kienet talbet lill-Kummissjoni biex minflok ma tuża r-rata tal-kambju fid-data tal-fattura tuża r-rata tal-kambju fid-data tal-pagament. Ir-Regolament bażiku jistipula li normalment, tintuża d-data tal-fattura għall-istabbiliment tar-rata tal-kambju, iżda li f'sitwazzjonijiet straordinarji, tista' tintuża data aktar kmieni (pereżempju d-data tal-kuntratt). Madankollu, ir-Regolament bażiku ma jipprovdi l-ebda bażi legali għall-użu ta' data wara d-data tal-fattura. Il-ħsieb wara dan huwa li fid-data tal-fattura, il-prezz ikun iffissat u l-kumpanija ma jkun baqalha l-ebda influwenza biex tiddeċiedi jekk tagħmilx dumping jew le. Fi kwalunkwe każ, anki kieku kien possibbli l-użu ta' data aktar tard, li mhuwiex il-każ, kif diġà spjegat fid-divulgazzjoni provviżorja, l-applikant ma weriex li seħħet il-kundizzjoni addizzjonali, jiġifieri ċaqliq sostnut fir-rati tal-kambju.

(93)

Kif previst fl-Artikolu 2(11) u (12) tar-Regolament bażiku, għal kull kumpanija li kkooperat, il-valur normali medju ponderat ta' kull tip tal-prodott simili ġie mqabbel mal-prezz tal-esportazzjoni medju ponderat tat-tip korrispondenti tal-prodott ikkonċernat.

(94)

Fuq din il-bażi, il-marġnijiet ta' dumping medji ponderati, espressi bħala perċentwal tal-prezz CIF fil-fruntiera tal-Unjoni, bid-dazju mhux imħallas, huma kif ġej:

(95)

Għall-produtturi li ma kkooperawx, il-Kummissjoni kellha tibbaża fuq il-fatti disponibbli skont l-Artikolu 18(6) tar-Regolament bażiku. In-nuqqas ta' kooperazzjoni jippermetti lill-produtturi esportaturi kkonċernati li ma jaqsmux id-dejta speċifika għall-kumpanija tagħhom li abbażi tagħha tista' tiġi valutata l-imġiba attwali tagħhom fl-esportazzjoni u jobbliga lill-Kummissjoni tuża l-aħjar fatti disponibbli fir-rigward tagħhom. Fil-prattika tad-deċiżjonijiet tagħha, il-Kummissjoni għal dak l-għan tiddistingwi bejn investigazzjonijiet fejn il-kooperazzjoni tkun għolja (jiġifieri aktar minn 80 % tal-esportazzjonijiet irrappurtati lejn l-Unjoni, u sitwazzjonijiet fejn il-kooperazzjoni tkun baxxa (80 % u anqas ta' kooperazzjoni). Fil-każ preżenti, il-livell ta' kooperazzjoni kien konsiderevolment anqas minn 80 %. F'sitwazzjoni bħal din, il-Kummissjoni tqis li l-ogħla rata ta' dumping tal-produtturi li kkooperaw ma tikkostitwix approssimazzjoni tajba għar-rata ta' dumping tal-produtturi li ma kkooperawx, għar-raġuni li ġejja: wieħed jissuspetta li waħda mir-raġunijiet għalfejn daqstant produtturi ddeċidew li ma jikkooperawx hija li dawn kienu jafu li r-rati tad-dumping tagħhom se jkunu ferm ogħla minn dawk tal-produtturi li kkooperaw. Il-fatt li, fil-każ preżenti, il-kooperazzjoni kienet irtirata waqt l-investigazzjoni, jappoġġa din l-idea. Għalhekk, il-Kummissjoni tqis li r-rata ta' dumping tal-produtturi li ma kkooperawx hija riflessal-aħjar fil-livell tal-ogħla marġni ta' dumping stabbilit għal tip ta' prodott rappreżentattiv f'termini ta' volum, jiġifieri li jirrappreżenta aktar minn 10 % tal-esportazzjonijiet lejn l-Unjoni, għall-produttur esportatur li kkoopera li nstab li kien qed jagħmel dumping.

(96)

Wara l-aġġustament tal-kostijiet tal-BĠ&A użati għall-kalkolu tal-marġni ta' dumping għall-produttur esportatur Tajwaniż li kkoopera kif deskritt fil-premessa 86, il-marġni ta' dumping għall-pajjiż kollu, espress bħala perċentwal tal-prezz CIF fil-fruntiera tal-Unjoni, bid-dazju mhux imħallas, jammonta għal 12,1 %.

(97)

Wara d-divulgazzjoni finali, l-ilmentatur sostna f'dan ir-rigward li d-dazju residwu għat-Tajwan jenħtieġ li jkun ibbażat fuq l-ilment u jammonta għal 34,8 %. L-ilmentatur sostna li ħafna mill-produtturi Tajwaniżi tal-prodott ikkonċernat deliberatament naqset milli tikkoopera fil-proċedura sabiex ma jħallu lill-Kummissjoni tuża l-bejgħ domestiku tagħhom għall-kalkolu tal-valur normali. Għalhekk, skont l-ilmentatur, kalkolu tal-valur normali fl-ilment, li kien ibbażat fuq il-prezzijiet domestiċi fit-Taiwan, għandhom jintużaw bħala l-aħjar fatti disponibbli.

(98)

Bi tweġiba għal dan ta' hawn fuq, ta' min jinnota li fil-kalkolu tad-dazju residwali għat-Tajwan, il-Kummissjoni qed tuża l-aħjar fatti disponibbli fuq il-bażi tad-dejta miġbura u vverifikata matul l-investigazzjoni. Għaldaqstant, din id-dikjarazzjoni ma ntlaqgħetx.

(99)

Skont l-Artikolu 2(7)(a) tar-Regolament bażiku, il-valur normali għall-produtturi esportaturi li ma ngħatalhomx TES irid jiġi stabbilit fuq il-bażi tal-prezzijiet jew tal-valur maħdum f'pajjiż terz b'ekonomija tas-suq (“pajjiż analogu”). L-ebda wieħed mill-produtturi esportaturi li kkooperaw ma talab TES.

(100)

L-ilmentatur ippropona lill-USA bħala pajjiż analogu potenzjali. Barra minn hekk, skont l-informazzjoni disponibbli, il-produzzjoni tal-prodott simili sseħħ f'numru ta' pajjiżi oħra madwar id-dinja bħall-Brażil, l-Indja, il-Ġappun, il-Malasja, il-Korea, l-Iżvizzera u t-Tajlandja. Dawn il-pajjiżi tqiesu kollha bħala pajjiżi analogi potenzjali.

(101)

Ġew ikkuntattjati l-produtturi magħrufin kollha (52) tal-prodott simili fil-pajjiżi hawn fuq imsemmija, iżda ħadd minnhom ma kkoopera. Kumpanija Malasjana waħda biss qablet li tikkoopera iżda pprovdiet informazzjoni insuffiċjenti. Il-kumpanija ma kinitx kapaċi tipprovdi dejta għal kull PCN fir-rigward tal-kostijiet u l-prezzijiet domestiċi. Għalhekk, id-dejta defiċjenti tagħha ma setgħetx tintuża għall-istabbiliment tal-valur normali. Barra minn hekk, ta' min jinnota li l-kumpanija Malasjana inkwistjoni rrifjutat verifika fuq il-post tad-dejta pprovduta.

(102)

Fi stadju aktar tard ippreżenta ruħu produttur Żvizzeru, bħala produttur analogu potenzjali u qabel li jikkoopera. Il-kumpanija ssottomettiet it-tweġiba mitluba għall-kwestjonarju li kienet ivverifikata fuq il-post. Madankollu, minħabba l-firxa pjuttost limitata ta' tipi tal-prodott magħmula minn din il-kumpanija meta mqabbel mal-firxa wiesgħa ta' tipi tal-prodott esportati lejn l-Unjoni mill-produtturi esportaturi Ċiniżi inklużi fil-kampjun, il-Kummissjoni ddeċidiet li d-dejta pprovduta mill-kumpanija Żvizzera ma tkunx adatta għall-istabbiliment tal-valur normali għall-produtturi esportaturi Ċiniżi. F'dan ir-rigward huwa nnotat li 4,6 % biss tat-tipi tal-prodotti esportati lejn l-Unjoni minn produtturi Ċiniżi li jkopru 4,2 % tal-volum tal-esportazzjonijiet Ċiniżi kienu jaqblu direttament mat-tipi tal-prodott magħmula mill-produttur Żvizzeru. Fil-każ tat-Tajwan, li finalment intuża bħala l-pajjiż analogu, il-livell ta' tqabbil dirett mat-tipi tal-prodott esportati mill-produtturi Ċiniżi lejn l-Unjoni kien ta' 7,7 % għan-numru ta' tipi tal-prodott u ta' 11,1 % għall-volum tal-esportazzjoni.

(103)

F'din is-sitwazzjoni, il-Kummissjoni ddeċidiet li tuża l-pajjiż l-ieħor soġġett għall-investigazzjoni, jiġifieri t-Tajwan, bħala l-pajjiż analogu minkejja l-argumenti inizjalment ippreżentati mill-ilmentaturi li sostnew li l-kumpaniji Tajwaniżi kienu jipproduċu prinċipalment tipi ta' tagħmir ibbażati fuq tubi wweldjati bħala materja prima (b'differenza mill-produtturi Ċiniżi, li jużaw prinċipalment tubi mingħajr saldatura). L-istess argument ġie ppreżentat ukoll mill-produtturi esportaturi Ċiniżi. Mill-banda l-oħra, is-CCCMC fis-sottomissjoni tagħha wara d-divulgazzjoni provviżorja, qieset li d-dejta dwar il-kostijiet tal-manifattura fit-Tajwan tkun aktar xierqa għall-bażi tal-kostruzzjoni tal-valur normali mid-dejta tal-produtturi tal-Unjoni, li kienet ikkunsidrata wkoll bħala alternattiva mill-Kummissjoni fid-divulgazzjoni provviżorja.

(104)

It-Tajwan tqies xieraq bħala pajjiż analogu għaliex, kuntrarju għal dak li kien sostnut mill-ilmentaturi u minkejja l-użu differenti tal-materja prima, id-dejta pprovduta kienet tippermetti metodoloġija xierqa għall-attribuzzjoni tal-kostijiet fir-rigward tal-karatteristiċi differenti tal-kodifikazzjoni tal-prodott. Barra minn hekk, il-livell ta' kompetizzjoni fis-suq Tajwaniż huwa għoli billi hemm mill-anqas 10 produtturi domestiċi magħrufa tal-prodott ikkonċernat u dan huwa rifless ukoll fi preżenza qawwija ta' importazzjonijiet minn oriġini differenti, f'sitwazzjoni fejn il-livell tad-dazji doganali huwa moderat (minn 7,5 % sa 10 %).

(105)

Għar-raġunijiet imsemmija hawn fuq, il-Kummissjoni ddeċidiet li tuża lit-Tajwan bħala l-pajjiż analogu għar-RPĊ.

(106)

Wara d-divulgazzjoni finali, żewġ produtturi esportaturi Ċiniżi u s-CCCMC stqarrew li l-għażla ta' Tajwan bħala pajjiż analogu ma kinitx xierqa peress li l-kostijiet tal-manifattura użata nkisbu biss minn kumpanija Tajwaniża waħda li ma kellha l-ebda bejgħ domestiku. Il-partijiet inkwistjoni sostnew ukoll li l-livell ta' tqabbil ta' prodotti komparabbli kien baxx wisq. It-talba ta' livell baxx ta' tqabbil ta' prodotti komparabbli tqajmet ukoll minn importatur wieħed tal-Unjoni. Din il-kumpanija tal-aħħar indikat ukoll li ċ-Ċina ma tistax titqabbel mat-Tajwan billi ż-żewġ entitajiet għandhom livelli differenti ta' Indiċi tal-Iżvilupp tal-Bniedem (“HDI”) u l-PDG per capita.

(107)

Fir-rigward ta' dawn il-pretensjonijiet, ta' min wieħed ifakkar li l-ewwel u qabel kollox, id-deċiżjoni tad-WTO (7) timplika li t-tipi kollha ta' prodotti esportati mill-produtturi esportaturi Ċiniżi jenħtieġ jingħataw valur normali. Il-Kummissjoni tqis li l-informazzjoni disponibbli fuq il-livell ta' produttur esportatur wieħed ta' pajjiż analogu hija biżżejjed biex wieħed jibbaża t-tipi ta' prodotti li jifdal fuqha billi t-tipi misjuba jippermettu li ssir aktar kostruzzjoni tat-tipi tal-prodotti neqsin. L-okkorrenza ta' produttur esportatur wieħed biss bħal dan ma hi bl-ebda mod eċċezzjonali jew prattika ġdida. Ir-Regolament bażiku jipprevedi wkoll li l-valur normali jista' jinbena fuq il-kost tal-produzzjoni, fin-nuqqas ta' bejgħ domestiku. It-tieni, huwa mfakkar li l-livelli tal-HDI u tal-PDG mhumiex fatturi li jitqiesu fl-istabbiliment dwar jekk pajjiż analogu huwiex xieraq jew le. Sabiex jiġi ddeterminat pajjiż analogu xieraq, il-Kummissjoni tipproċedi kif spjegat fil-premessa 104. Għaldaqstant, il-pretensjonijiet ta' hawn fuq ma ntlaqgħux.

(108)

Fl-aħħar nett, żewġ produtturi esportaturi Ċiniżi u s-CCCMC qajmu mistoqsijiet dwar allegatament difett proċedurali serju bbażat fuq il-fatt li l-Kummissjoni kkalkolat l-ammont tal-marġni ta' dumping tal-produtturi Ċiniżi fuq il-bażi tad-dispożizzjonijiet tal-ekonomija mhux tas-suq (non-market economy — NME) tar-Regolament bażiku. Il-partijiet qalu li l-awtorità legali li tapplika metodoloġija NME għad-determinazzjoni tal-valur normali għall-produtturi esportaturi Ċiniżi tiskadi fl-11 ta' Diċembru 2016. Għalhekk, skont il-partijiet inkwistjoni, għal kwalunkwe miżuri antidumping definittivi adottati wara din id-data, li se jkun il-każ f'dan il-proċediment, il-Kummissjoni hija obbligata, skont id-dritt tad-WTO li tapplika l-metodoloġija ta' kalkolu standard ta' dumping.

(109)

F'dan ir-rigward, il-Kummissjoni tenfasizza li hija ma għandha l-ebda diskrezzjoni dwar jekk tapplikax jew le ir-regoli attwali kif stabbiliti fir-Regolament bażiku. Għalhekk, din il-pretenzjoni ma ntlaqgħetx.

(110)

Kif spjegat fil-premessa 103, il-valur normali għall-produtturi esportaturi fir-RPĊ ġie ddeterminat abbażi tal-valur maħdum fil-pajjiż analogu, f'dan il-każ it-Tajwan, skont l-Artikolu 2(7)(a) tar-Regolament bażiku.

(111)

Barra minn hekk, minħabba n-nuqqas ta' bejgħ domestiku tal-prodott simili fit-Tajwan, il-valur normali nħadem skont l-Artikolu 2(3) u (6) tar-Regolament bażiku billi mal-kost medju tal-manifattura tat-tip tal-prodott rilevanti żdiedu l-kostijiet ta' BĠ&A mġarrba u l-profitt magħmul fis-suq Tajwaniż matul il-perjodu tal-investigazzjoni.

(112)

Bħala bażi sabiex tistabbilixxi l-kostijiet tal-manifattura, il-Kummissjoni użat id-dejta ta' wieħed mill-produtturi Tajwaniżi li kkooperaw (Ta Chen). Jenħtieġ li jiġi nnotat li t-tieni produttur Tajwaniż li kkoopera (King Lai) kellu volum ta' produzzjoni limitat ħafna tal-prodott ikkonċernat fil-perjodu tal-investigazzjoni u din il-produzzjoni kienet tirrigwarda tipi ta' prodotti speċjalizzati ħafna. F'din il-parti żgħira tal-produzzjoni tagħhom li xorta hija kkunsidrata bħala l-prodott ikkonċernat, King Lai qiegħed jipproduċi prodotti li jistgħu jitqiesu bħala tagħmir ta' ħruxija baxxa iżda bi trattament addizzjonali tal-wiċċ li jgħolli l-ħruxija tal-wiċċ tagħhom għal aktar minn 0,8 mikrometru u għalhekk skont id-definizzjoni tal-premessa 47, huwa l-prodott ikkonċernat. Dan t-tagħmir għandu kostijiet tal-manifattura għoljin ħafna u l-konsiderazzjoni tiegħu tgħawweġ il-kalkoli. Barra minn hekk, dawn it-tipi ta' prodott ma jiġux esportati lejn l-UE mill-produtturi Ċiniżi inklużi fil-kampjun (għalkemm jistgħu jkunu koperti mill-PCNs tagħhom billi l-ħruxija mhijiex wieħed mill-parametri tal-kostruzzjoni tal-PCN). Għalhekk, id-dejta dwar il-kostijiet tal-manifattura ta' din il-kumpanija tqieset bħala mhux xierqa mill-Kummissjoni sabiex jinħadem il-valur normali għall-produtturi Ċiniżi.

(113)

Fir-rigward tal-kostruzzjoni tal-valur normali, importatur tal-Unjoni wieħed sostna li l-kostijiet tal-manifattura tal-kumpanija Tajwaniża King Lai ma setgħux jintużaw bħala bażi għall-kalkolu tal-valur normali tal-kumpaniji Ċiniżi billi King Lai tipproduċi prodott differenti li ma jistax jitqies bħala aċċessorju industrijali u li dan jimplika wkoll metodu ta' produzzjoni differenti u firxa ta' profitti differenti.

(114)

Bi tweġiba għal din il-pretensjoni, ta' min ifakkar li l-Kummissjoni ma għamlitx użu minn xi dejta dwar il-kostijiet ta' manifattura ta' King Lai għal tqabbil ma' kumpaniji oħra. Sabiex jiġi kalkolat il-valur normali ta' kumpaniji oħra, il-Kummissjoni użat biss il-kostijiet tal-BĠ&A u l-profitt ta' King Lai tal-istess kategorija ġenerali ta' prodott mibjugħ fis-suq domestiku, skont l-Artikolu 2(6)(c) tar-Regolament bażiku. Huwa mfakkar ukoll li l-kost ta' BĠ&A użat għal dawn il-kalkoli ġie aġġustat biex jitqiesu d-differenzi bejn il-prodotti magħmula minn King Lai u kumpaniji oħrajn. Fir-rigward tal-profitt użat, huwa enfasizzat li mhix fi skala differenti (1 %-5 %) minn dawk ta' kumpaniji oħra.

(115)

L-istess importatur tal-Unjoni sostna wkoll li t-tieni produttur Tajwaniż, Ta Chen, li l-kostijiet tal-manifattura tiegħu intużaw bħala bażi ta' kalkolu għall-valur normali tal-produtturi esportaturi Ċiniżi, huwa kumpanija kbira u integrata u, bħala tali, kapaċi “tottimizza l-kostijiet”. B'hekk, il-kumpanija kkonċernata ma tistax titqabbel mal-fabbriki Ċiniżi żgħar.

(116)

F'dan ir-rigward, il-Kummissjoni fakkret li l-kostijiet tal-manifattura tal-produtturi Ċiniżi ma kinux parti mill-analiżi f'din il-proċedura peress li l-ebda wieħed mill-produtturi Ċiniżi ma talab l-status ta' TES. Madankollu, jenħtieġ li tinġibed l-attenzjoni lejn il-fatt li l-“kostijiet allegatament ottimizzati” tal-produttur Tajwaniż jistgħu jirriżultaw biss f'valur normali maħdum aktar baxx u għaldaqstant, f'marġnijiet ta' dumping aktar baxxi għall-produtturi esportaturi Ċiniżi.

(117)

Billi numru limitat biss ta' tipi tal-prodott esportati lejn l-Unjoni mill-prodotturi esportaturi Ċiniżi inklużi fil-kampjun seta' jiġi identifikat fit-Tajwan, il-Kummissjoni ħadmet il-valur normali tat-tipi li kien fadal tal-prodott abbażi tal-kostijiet tal-manifattura tal-aktar tipi ta' prodotti li jixxiebhu mmanifatturati fit-Tajwan sabiex tikseb tqabbil sħiħ u ġust, ibbażat fuq l-kostijiet tal-manifattura aġġustati għal:

(118)

Fis-sottomissjoni tagħha wara d-divulgazzjoni provviżorja, is-CCCMC pproponiet bażi alternattiva għall-aġġustamenti tal-punti a) u b) u ppreżentat dejta mis-swieq Ċiniżi f'dan ir-rigward. Madankollu, din id-dejta, l-ewwel nett, mhijiex verifikata u, it-tieni, ġejja minn pajjiż mhux b'ekonomija tas-suq. Għalhekk, l-użu tagħhom jinnega l-metodoloġija tal-pajjiż analogu għall-kalkolu tal-valur normali. Għalhekk, din il-pretensjoni tas-CCCMC ma ntlaqgħetx.

(119)

Wara d-divulgazzjoni finali, is-CCCMC, kif ukoll żewġ produtturi esportaturi Ċiniżi, sostnew li kien irraġonevoli li tiġi aġġustata d-dejta dwar il-kostijiet Tajwaniżi bl-użu tad-dejta tal-kostijiet tal-industrija tal-Unjoni. Il-partijiet ikkonċernati rreferew għal prattika komuni tal-Unjoni li dan ma għandux isir f'każijiet preċedenti.

(120)

Kif intqal iktar' il fuq, il-prattika preċedenti tal-UE ġiet riveduta fid-dawl tad-deċiżjoni tad-WTO imsemmija fil-premessa 107. Sabiex jinħadem il-valur normali ta' tipi ta' prodotti neqsin, il-Kummissjoni serrħet fuq dejta tal-kostijiet Tajwaniżi u aġġustat il-kostijiet misjuba u vverifikati billi applikat aġġustamenti proporzjonali li nstabu fuq il-livell tal-kost ta' produzzjoni tal-industrija tal-Unjoni. Is-CCCMC naqset milli turi għalfejn dan ma kienx raġonevoli u/jew milli tipproponi metodu alternattiv.

(121)

Wara divulgazzjoni addizzjonali, is-CCCMC u ż-żewġ produtturi esportaturi Ċiniżi tennew l-oppożizzjoni tagħhom kontra l-użu tad-dejta tal-industrija tal-Unjoni għall-aġġustament tal-kostijiet tal-manifattura użati fil-kostruzzjoni tal-valur normali għal tipi ta' prodotti neqsin. Il-partijiet enfasizzaw li l-Kummissjoni ma pprovdietx evidenza li turi li d-differenzi fil-kostijiet tal-materja prima fis-suq tal-UE jkunu fl-istess livell ta' dak fis-suq tat-Tajwan. Barra minn hekk, il-partijiet tennew il-pretensjoni tagħhom li l-Kummissjoni setgħet tuża d-differenzi fil-prezzijiet tal-bejgħ tal-esportazzjonijiet Ċiniżi mingħajr saldatura u dawk iwweldjati għall-aġġustament ta' hawn fuq billi l-prezzijiet ta' bejgħ “sa ċertu punt jirriflettu x-xejra tad-differenzi fil-kostijiet tal-produzzjoni”.

(122)

Bi tweġiba għal pretensjonijiet ta' hawn fuq, qed jiġi l-ewwel nett enfasizzat li l-Kummissjoni ma setgħetx tqabbel il-livell ta' aġġustamenti għal tipi ta' pajpijiet użati bħala materja prima jew gradi tal-azzar mad-dejta mis-suq Tajwaniż billi l-produttur Tajwaniż li l-kostijiet tal-manifattura tiegħu intużaw bħala bażi biex jinħadem il-valur normali, sempliċement ma kienx juża ċerti tipi ta' materja prima. Din hija r-raġuni bażika għalfejn il-Kummissjoni kkunsidrat li tfittex id-dejta dwar il-kost nieqsa barra mis-suq tal-pajjiż analogu. It-tieni, fir-rigward tal-użu tal-prezzijiet Ċiniżi, ta' min ifakkar li l-ebda wieħed mill-produtturi esportaturi Ċiniżi ma kien talab għal TES f'din il-proċedura. Għalhekk, il-kostijiet tal-produzzjoni Ċiniża ma kinux disponibbli u lanqas eżaminati. Għalhekk, il-Kummissjoni ma tista' tislet l-ebda konklużjoni rigward “sa liema punt” id-differenzi fil-prezzijiet tal-bejgħ jirriflettu d-differenzi fil-kostijiet tal-produzzjoni tat-tipi differenti ta' tagħmir (8). Barra minn hekk, anki jekk tali konklużjonijiet jistgħu jiġu dedotti, ikunu japplikaw għall-kostijiet ta' produzzjoni f'pajjiż b'ekonomija mhux tas-suq. Għaldaqstant, il-pretensjonijiet ta' hawn fuq ma ntlaqgħux.

(123)

Dawn il-partijiet interessati jkomplu jistaqsu aktar dwar l-aġġustament li permezz tiegħu il-produzzjoni tat-tagħmir prodott minn tubi mingħajr saldatura hija bejn 2,12 u 2,97 darbiet aktar għalja mill-produzzjoni ta' tagħmir magħmul minn tubi wweldjati. Huma jirreferu għal pretensjoni mhux sostanzjata li saret mis-CCCMC wara divulgazzjoni provviżorja rigward il-livelli tal-prezzijiet, fejn id-differenza bejn tubi wweldjati u tubi mingħajr saldatura tidher li hija inqas minn 30 % tal-prezz ta' tubi wweldjati.

(124)

F'dan ir-rigward, ta' min jinnota li l-aġġustament magħmul mill-Kummissjoni huwa bbażat fuq id-differenza fil-kost osservata bejn it-tagħmir prodott bl-użu ta' tubi mingħajr saldatura u tagħmir magħmul minn tubi wweldjati, u mhux fuq id-differenza fil-prezz bejn tubi wweldjati u tubi mingħajr saldatura bħala tali. Jenħtieġ li jiġi nnotat ukoll li l-ebda wieħed mill-produtturi esportaturi Ċiniżi ma talab TES. Minħabba f'dan, il-produtturi esportaturi Ċiniżi ma kienu ppreżentaw l-ebda dejta dwar il-kost tal-produzzjoni u ssoktaw b'din il-prattika anki meta tpoġġew fid-dubju l-konsiderazzjonijet u d-differenzi tal-kostijiet stabbiliti mill-Kummissjoni. Barra minn hekk, listi ta' prezzijiet standard huma saħansitra aktar lil hinn minn konsiderazzjonijiet dwar kostijiet u prezzijiet billi ma jagħtux prova tal-prezzijiet applikati b'mod effettiv, u wisq inqas tal-livelli tal-kostijiet.

(125)

Biex jappoġġjaw l-argumenti tagħhom, il-partijiet interessati pprovdew analiżi tad-differenzi bbażati fuq il-livelli tal-prezzijiet tal-produtturi Zhejiang Good u Zhejiang Jndia, u kkonkludew li, fuq din il-bażi, l-aġġustament fil-prezz applikabbli għandu jkun bejn 0,43 u 1,70, u 0,64 u 1,80 rispettivament.

(126)

Minbarra l-fatt li dawn il-firxiet jirreferu għal prezzijiet u mhux għal kostijiet, il-fatt li tagħmir magħmul minn tubi wweldjat jinbiegħ xi drabi bi prezzijiet ogħla minn dawk tat-tagħmir magħmul minn tubi mingħajr saldatura ma jagħtix prova li l-kostijiet għandhom ikunu ogħla. Il-livelli ta' prezzijiet ikkwotati pjuttost juru nuqqas assolut ta' rabta ekonomika bejn il-kostijiet u l-prezz ikkwotat lill-klijenti, jew inkella dan ifisser li hemm fatturi oħrajn li għandhom rwol, bħal pereżempju d-daqs tal-ordni. Il-Kummissjoni, għal raġunijiet ta' kunfidenzjalità, ma tistax tiddivulga ċ-ċifri sottostanti iżda tista' tiżvela aktar dejta fattwali, li fiha l-aġġustament minn tagħmir magħmul minn tubi wweldjati għal dak magħmul minn tubi mingħajr saldatura użat għat-tqabbil skont id-deskrizzjoni tal-PCN huwa kif ġej:

Il-bidliet l-oħra ma kinux meħtieġa sabiex jinbena t-tipi ta' prodotti esportati mill-produtturi esportaturi Ċiniżi.

(127)

Barra minn hekk il-Kummissjoni għamlet aġġustamenti li jikkonvertu l-kost tal-orħos grad ta' azzar W1 fi gradi oħra u/jew gradi oħra bbażati fuq tubi mingħajr saldatura, għal darb' oħra bl-użu tad-dejta dwar il-kost tal-produzzjoni tal-industrija tal-Unjoni. Il-Kummissjoni, għal darb' oħra għal raġunijiet ta' kunfidenzjalità, ma tistax tiżvela ċ-ċifri sottostanti iżda tista' tagħti aktar dejta fattwali:

Bidliet oħra ma kinux meħtieġa sabiex jinbnew it-tipi ta' prodotti esportati mill-produtturi esportaturi Ċiniżi.

(128)

Il-Kummissjoni tixtieq ukoll tenfasizza li, fl-osservazzjonijiet tagħha fuq dawn il-fatturi ta' aġġustament, il-partijiet interessati ma jirreferux għal-livelli tal-prezzijiet taż-żewġ produtturi esportaturi Ċiniżi kif għamlu għall-aġġustamenti l-oħra, probabbilment minħabba li ċ-ċifri ma jpoġġux f'dubju l-metodoloġija tal-Kummissjoni.

(129)

Rigward id-differenzi fil-forma, l-aġġustamenti saru abbażi tad-dejta tal-prezzijiet tal-bejgħ tal-erba' produtturi esportaturi inklużi fil-kampjun, li huwa aktar komprensiv miż-żewġ produtturi li l-parti interessati Ċiniżi jirrappreżentaw.

Filwaqt li jittieħed il-livell tal-prezz tal-elbows bħala bażi, il-proporzjonijiet huma kif ġej:

(130)

Fi stadju sussegwenti fil-kostruzzjoni tal-valur normali, il-Kummissjoni aġġustat il-kostijiet tal-manifattura kkalkulati skont il-premessi minn 112 sa 117 biż-żieda tal-kostijiet tal-BĠ&A u l-profitt. Minħabba n-nuqqas ta' bejgħ domestiku tal-prodott simili taż-żewġ produtturi Tajwaniżi li kkooperaw u n-nuqqas ta' bejgħ tal-istess kategorija ġenerali ta' prodotti minn wieħed minnhom (Ta Chen), kellu jiġi applikat l-Artikolu 2(6)(c) tar-Regolament bażiku. Għal dan l-għan, fil-kostruzzjoni tal-valur normali, il-Kummissjoni użat l-ammonti ta' spejjeż ta' BĠ&A u l-profitti miksuba mill-kumpanija Tajwaniża l-oħra li kkooperat (King Lai) — l-unika dejta disponibbli u verifikata li tirreferi għall-bejgħ tal-istess kategorija ġenerali tal-prodott fis-suq Tajwaniż.

(131)

Għandu jiġi nnotat li l-kostijiet ta' BĠ&A użati għall-kalkolu tal-valur normali għall-produtturi esportaturi Ċiniżi ġew aġġustati (imnaqqsa), billi kien ivverifikat li t-tliet produtturi Ċiniżi inklużi fil-kampjun jipproduċu u jbigħu wkoll prodotti prinċipalment standard, kif spjegat fil-premessa 86. Il-livell finali tal-aġġustamenti tal-valur normali għall-kostijiet ta' BĠ&A u l-profitt għalhekk huwa wkoll l-istess kif previst f'din il-premessa.

(132)

Fir-rigward ta' aġġustamenti għal kostijiet ta' BĠ&A, iż-żewġ produtturi esportaturi Ċiniżi u s-CCCMC jaqblu fis-sottomissjoni tagħhom wara d-divulgazzjoni finali li għandu jsir tnaqqis meta jiġu stabbiliti l-kostijiet ta' BĠ&A użati għall-kostruzzjoni tal-valur normali. Dan huwa minħabba li l-esportatur Tajwaniż li d-dejta tiegħu ntużat f'dan ir-rigward ma jipproduċix il-prodott standard. Fl-istess ħin, dawn il-partijiet jistaqsu dwar jekk il-Kummissjoni wettqitx evalwazzjoni xierqa rigward il-livell ta' dan it-tnaqqis.

(133)

Ta' min jinnota f'dan ir-rigward li l-aġġustamenti saru fuq il-bażi ta' tqabbil ġenerali tal-istruttura BĠ&A tal-kumpanija Tajwaniża King Lai u tat-tieni kumpanija Tajwaniża Ta Chen. Dan l-approċċ ittieħed billi King Lai kienet l-unika kumpanija li kellha bejgħ domestiku fit-Tajwan (Ta Chen ma kellhiex bejgħ domestiku tal-prodott ikkonċernat, u ta' ebda prodott ieħor fl-istess kategorija ġenerali ta' prodotti). L-aġġustamenti huma ġġustifikati minħabba li l-ewwel kumpanija tipproduċi prodotti sofistikati u speċjalizzati ħafna, filwaqt li t-tieni kumpanija tipproduċi prodotti standard (għalhekk xi partijiet mill-kostijiet ta' BĠ&A tagħhom huma differenti b'mod ċar). Fuq il-bażi ta' dan it-tqabbil, il-Kummissjoni naqqset mill-kostijiet ta' BĠ&A l-kostijiet ta' R&Ż ta' King Lai u parti mill-kostijiet tax-xogħol relatati mad-dipartiment għall-kontroll tal-kwalità. Ma kienx hemm differenzi sinifikanti bejn iż-żewġ kumpaniji f'kategoriji oħra ta' kostijiet ta' BĠ&A. Għandu jkun enfasizzat li f'dan l-aġġustament il-Kummissjoni naqqset iż-żewġ kategoriji sħaħ ta' kostijiet ta' BĠ&A imsemmija hawn fuq. Għalhekk, il-Kummissjoni adottat pożizzjoni konservattiva meta tat dan l-aġġustament, fejn tat aġġustament pjuttost ogħla milli aktar baxx.

(134)

Il-partijiet interessati jallegaw ukoll li l-Kummissjoni ma għamlet l-ebda tqabbil tal-istruttura ta' kostijiet ta' BĠ&A bejn il-kumpannija Tajwaniża inkwistjoni u l-produtturi esportaturi Ċiniżi.

(135)

F'dan ir-rigward, ta' min ifakkar li, peress li t-Tajwan huwa pajjiż analogu, huma l-kostijiet ta' BĠ&A Tajwaniżi relatati mal-bejgħ domestiku fit-Tajwan li għandhom jintużaw. L-aġġustament tagħhom fuq il-bażi ta' tqabbil mal-kostijiet ta' BĠ&A tal-produtturi Ċiniżi jkun ifisser l-użu bħala punt ta' riferiment tal-kostijiet mill-pajjiż b'ekonomija mhux tas-suq. Madankollu, huwa enfasizzat li, bħala riżultat tal-aġġustament magħmul mill-Kummissjoni, il-kost ta' BĠ&A użat għall-kalkolu tal-valur normali tnaqqas għal-livell li mhuwiex irraġonevoli meta mqabbel mal-kostijiet ta' BĠ&A tal-kumpaniji Ċiniżi inklużi fil-kampjun. Fil-fatt, tnejn minn kull tliet kumpaniji Ċiniżi inklużi fil-kampjun irrappurtaw livelli ogħla ta' kostijiet ta' BĠ&A minn dawk użati għall-kostruzzjoni tal-valur normali.

(136)

Il-produtturi esportaturi li kkooperaw għamlu bejgħ għall-esportazzjoni lejn Unjoni direttament lil klijenti indipendenti jew permezz ta' kumpaniji kummerċjali mhux relatati li jinsabu barra mill-Unjoni.

(137)

Il-prezzijiet tal-esportazzjoni kienu stabbiliti abbażi tal-prezzijiet attwalment imħallsa jew pagabbli għall-prodott ikkonċernat meta jinbiegħ għall-esportazzjoni mill-pajjiż esportatur skont l-Artikolu 2(8) tar-Regolament bażiku.

(138)

Il-valur normali u l-prezz tal-esportazzjoni tal-produtturi esportaturi li kkooperaw ġew imqabbla fuq bażi ta' kif joħorġu mill-fabbrika.

(139)

Sabiex ikun żgurat tqabbil ġust bejn il-valur normali u l-prezz tal-esportazzjoni, saret konsiderazzjoni xierqa fil-forma ta' aġġustamenti għad-differenzi li jaffettwaw il-prezzijiet u l-kumparabbiltà tal-prezzijiet skont l-Artikolu 2(10) tar-Regolament bażiku.

(140)

Fuq din il-bażi, saru aġġustamenti għal trasport, kostijiet ta' ġarr ta' merkanzija bil-baħar u ta' assigurazzjoni, kostijiet ta' tagħbija u kostijiet anċillari, kostijiet tal-ippakkjar, kostijiet tal-kreditu, skontijiet u kummissjonijiet fejn dehru li affettwaw il-paragunabilità tal-prezzijiet. L-aġġustamenti totali kienu fil-medda ta' 5 %- 16 %, ibbażati fuq il-valuri attwali rrappurtati mill-produtturi esportaturi Ċiniżi u vverifikati fuq il-post. Dawn iċ-ċifri huma dawk irrappurtati għall-elementi ta' kostijiet rilevanti mill-kumpaniji Ċiniżi, u kienu ddivulgati lilhom għall-verifika fid-divulgazzjonijiet speċifiċi.

(141)

Iċ-Ċina tapplika l-politika tar-rimborż tal-VAT b'mod parzjali biss fil-mument tal-esportazzjoni u f'dan il-każ it-8 % VAT mhijiex rimborżata. Sabiex jiġi żgurat li l-valur normali ntwera bl-istess livell ta' tassazzjoni bħal tal-prezz tal-esportazzjoni, il-valur normali ġie aġġustat aktar 'il fuq permezz ta' dik il-parti tal-VAT imposta fuq l-esportazzjonijiet ta' pajpijiet u tubi mingħajr saldatura ta' dijametru kbir li ma ngħatatx lura lill-produtturi esportaturi Ċiniżi (9).

(142)

L-aġġustament ta' hawn fuq ġie diskuss fis-sottomissjonijiet ta' żewġ produtturi esportaturi Ċiniżi u s-CCCMC wara d-divulgazzjoni finali. Il-partijiet inkwistjoni ma kkontestawx il-prinċipju li skontu jaqbel li tiġi introdotta korrezzjoni li tqis il-VAT li ma tħallsitx lura mal-esportazzjoni. Madankollu, billi l-valur normali huwa konsiderevolment ogħla mill-prezz ta' esportazzjoni, il-partijiet interessati jsostnu li jenħtieġ li jiġi implimentat l-aġġustament ta' 8 % fuq il-prezz tal-esportazzjoni, filwaqt li kkwotaw in-nuqqas ta' TES u l-marġnijiet ogħla ta' dumping.

(143)

F'dan ir-rigward huwa nnotat li l-Kummissjoni aġġustat il-valur normali, f'konformità mas-Sentenza tal-Qorti Ġenerali fil-kawża T-423/09. Għalhekk, din il-pretenzjoni ma ntlaqgħetx.

(144)

Kif previst fl-Artikolu 2(11) u (12) tar-Regolament bażiku, għal kull kumpanija li kkooperat, il-valur normali medju ponderat ta' kull tip tal-prodott simili ġie mqabbel mal-prezz tal-esportazzjoni medju ponderat tat-tip korrispondenti tal-prodott ikkonċernat.

(145)

Fuq din il-bażi, il-marġnijiet ta' dumping medji ponderati, espressi bħala perċentwal tal-prezz CIF fil-fruntiera tal-Unjoni, bid-dazju mhux imħallas, huma kif ġej:

(146)

Il-marġni ta' dumping medju ponderat għandu jkun applikat għall-produtturi esportaturi Ċiniżi li kkooperaw, li ma kinux inklużi fil-kampjun.

(147)

Fir-rigward ta' dan ta' hawn fuq, importatur tal-Unjoni wieħed sostna fis-sottomissjoni tiegħu wara d-divulgazzjoni finali li d-differenza bejn il-marġnijiet ta' dumping ikkalkulati għal kumpanija Tajwaniża King Lai (0 %) u l-kumpanija relatata tagħha fiċ-Ċina (41,9 %) hija sproporzjonata, peress li ż-żewġ kumpaniji jimmanifatturaw l-istess tip ta' tagħmir li huwa eskluż mid-definizzjoni tal-prodott.

(148)

Bi tweġiba għal dan ta' hawn fuq, l-ewwel nett, għandu jiġi enfasizzat li Taiwanese King Lai ma kisbitx marġni tad-dumping ta' 0 % għaliex it-tagħmir li tipproduċi huwa eskluż mid-definizzjoni tal-prodott kif jidher li qed jifhem dan l-importatur tal-Unjoni. Prodotti esklużi mid-definizzjoni tal-prodott ma ġewx ikkunsidrati fil-kalkoli tal-marġni tad-dumping għal King Lai. Madankollu, il-kumpanija ipproduċiet u esportat ukoll lejn l-Unjoni, volum żgħir ta' prodotti li jaqgħu fid-definizzjoni tal-prodott ta' din l-investigazzjoni. Għalhekk, marġni tad-dumping li nstab li kien negattiv, kellu jiġi kkalkulat għal din il-kumpanija. Min-naħa l-oħra, King Lai fiċ-Ċina ma kinitx parti mill-kampjun u, għalhekk, ma ġie kkalkolat l-ebda marġni tad-dumping individwali għal din il-kumpanija. Il-kumpanija għalhekk kisbet il-marġni tad-dumping medju ponderat tal-kumpaniji Ċiniżi inklużi fil-kampjun. Madankollu, ma għandu japplika l-ebda dazju antidumping għall-prodott li mhuwiex kopert mid-definizzjoni tal-prodott ta' din l-investigazzjoni. Għalhekk, jekk huwa minnu li King Lai fiċ-Ċina, tesporta lejn l-UE prodott li mhuwiex kopert mid-definizzjoni tal-prodott ta' din l-investigazzjoni, hija ma tkunx soġġetta għad-dazji tal-antidumping mal-importazzjoni.

(149)

Minħabba l-livell baxx ta' kooperazzjoni tal-produtturi esportaturi Ċiniżi u skont ir-raġunament tal-premessa 95, il-marġni tad-dumping għall-pajjiż kollu għar-RPĊ ġie stabbilit fil-livell tal-ogħla marġni tad-dumping stabbilit għal tip ta' prodott rappreżentattiv f'termini ta' volum, għall-produttur esportatur li kkoopera li nstab li kien qiegħed jagħmel dumping.

(150)

Fuq din il-bażi, il-marġni tad-dumping għall-pajjiż kollu, espress bħala perċentwal tal-prezz CIF fil-fruntiera tal-Unjoni, bid-dazju mhux imħallas, jammonta għal 64,9 %.

(151)

Ħames produtturi esportaturi Ċiniżi li ma kinux inklużi fil-kampjun talbu eżami individwali f'dan il-proċediment. Minħabba n-numru kbir ta' applikazzjonijiet, il-Kummissjoni kkonkludiet li jkun diffiċli ħafna għall-konklużjoni f'waqtha tal-proċediment li taċċetta xi waħda minn dawn it-talbiet. F'dan ir-rigward ta' min jinnota li l-aċċettazzjoni tat-talbiet tal-kumpaniji inkwistjoni żżid b'aktar mid-doppju n-numru ta' kumpaniji li jkunu jeħtieġu kalkoli individwali tal-marġni tad-dumping billi l-kampjun oriġinali kien jikkonsisti minn erba' produtturi esportaturi. Huwa nnotat ukoll li xi wħud mill-applikanti għal eżami individwali huma parti mill-gruppi. Skont it-tweġibiet preliminari tal-kumpaniji inkwistjoni (formoli tal-kampjunar), eżami individwali jkun jeħtieġ analiżi u verifika tat-tweġibiet għall-kwestjonarju ta' mill-anqas 7 kumpaniji.

(152)

Abbażi tal-informazzjoni disponibbli mill-ilment u l-investigazzjoni sussegwenti, il-prodott simili kien immanifatturat minn tal-anqas 16-il produttur tal-Unjoni matul il-perjodu tal-investigazzjoni. Il-produtturi tal-Unjoni li jagħmlu tajjeb għall-produzzjoni totali tal-Unjoni jikkostitwixxu l-industrija tal-Unjoni skont it-tifsira tal-Artikolu 4(1) tar-Regolament bażiku u minn hawn 'il quddiem jissejħu “l-industrija tal-Unjoni”.

(153)

Il-produzzjoni totali tal-Unjoni matul il-perjodu tal-investigazzjoni kienet stmata għal madwar 8 270 tunnellata. Il-Kummissjoni stabbiliet iċ-ċifra fuq it-tweġibiet ivverifikati għall-kwestjonarju tal-produtturi tal-Unjoni inklużi fil-kampjun u d-dejta stmata pprovduta mill-ilmentatur. Kif intqal fil-premessi minn 11 sa 13, ġie applikat kampjunar sabiex jiġi stabbilit id-dannu possibbli mġarrab mill-industrija tal-Unjoni. Il-produtturi tal-Unjoni magħżula fil-kampjun kienu jirrappreżentaw madwar 43 % tal-produzzjoni totali stmata tal-Unjoni tal-prodott simili.

(154)

Parti waħda talbet spjegazzjoni għalfejn il-volum tal-produzzjoni totali tal-Unjoni naqas bi 80 tunnellata bejn id-divulgazzjoni provviżorja u dik definittiva. Fid-divulgazzjoni provviżorja l-produzzjoni totali tal-Unjoni ġiet stmata għal madwar 8 350 tunnellata. Il-premessa ta' hawn fuq tiddikjara li l-produzzjoni totali tal-Unjoni kienet stabbilita għal madwar 8 270 tunnellata. Ir-raġuni għal din id-differenza hija li fl-istadju provviżorju s-servizzi tal-Kummissjoni stmaw ħażin il-volum ta' produzzjoni ta' wieħed mill-produtturi tal-Unjoni mhux inkluż fil-kampjun. Dan il-produttur tal-Unjoni waqqaf il-produzzjoni matul il-perjodu ta' investigazzjoni. Għaldaqstant, il-produzzjoni tiegħu ġiet ikkalkulata mill-ġdid filwaqt li ġie kkunsidrat l-għeluq tal-kumpanija. Il-Kummissjoni kkonfermat li l-produzzjoni totali tal-Unjoni ġiet stmata għal madwar 8 270 tunnellata waqt il-perjodu tal-investigazzjoni.

(155)

Billi l-kampjun tal-kumpaniji huwa magħmul biss minn produttur wieħed u grupp ta' kumpaniji, id-dejta kollha li tikkonċerna l-indikaturi mikro kellha tiġi indiċjata sabiex tiġi mħarsal-kunfidenzjalità skont l-Artikolu 19 tar-Regolament bażiku.

(156)

Il-Kummissjoni stabbiliet il-konsum tal-Unjoni abbażi tal-volum totali stmat tal-bejgħ tal-industrija tal-Unjoni fis-suq tal-Unjoni u fuq il-volum totali tal-importazzjoni tal-prodott ikkonċernat lejn l-Unjoni.

(157)

Il-volum tal-bejgħ tal-prodott simili tal-industrija tal-Unjoni ġie stmat abbażi tad-dejta attwali vverifikata li kienet ipprovduta mill-produtturi tal-kampjun fit-tweġibiet tagħhom għall-kwestjonarju u, fil-każ tal-produtturi li ma kkooperawx, id-dejta pprovduta mill-ilmentatur.

(158)

Kif spjegat aktar 'il fuq fil-premessa 47, il-prodott ikkonċernat jaqa' taħt żewġ kodiċijiet NM: ex 7307 23 10 u ex 7307 23 90. Madankollu, dawn iż-żewġ kodiċijiet NM jinkludu mhux biss il-prodott ikkonċernat iżda wkoll prodotti barra l-kamp ta' applikazzjoni ta' din l-investigazzjoni. Għalhekk, il-volum tal-importazzjonijiet li ma jaqgħux fil-kamp ta' applikazzjoni ta' din l-investigazzjoni ried jitnaqqas mill-volum totali tal-importazzjonijiet irreġistrati taħt il-kodiċi NM imsemmi hawn fuq.

(159)

L-ilmentatur ikkalkola l-volum tal-importazzjonijiet tal-prodott ikkonċernat għall-oriġnijiet kollha abbażi tal-għarfien tiegħu tas-suq. Rigward il-pajjiżi kkonċernati, huwa qies li l-prodotti li kienu qed jiġu investigati kienu jirrappreżentaw il-maġġoranza kbira tal-volum irrappurtat taħt iż-żewġ kodiċijiet NM hawn fuq imsemmija għar-RPĊ u t-Tajwan, 90 % u 100 % rispettivament.

(160)

Sabiex tivverifika din l-istima, il-Kummissjoni użat l-informazzjoni li rċeviet waqt investigazzjoni preċedenti dwar tagħmir tal-azzar li ma jsaddadx, li tnediet fl-10 ta' Novembru 2012. Din l-investigazzjoni kienet tkopri l-prodotti kollha kklassifikati taħt dawn iż-żewġ kodiċijiet NM, inkluż il-prodott ikkonċernat ta' din l-investigazzjoni. Mill-analiżi magħmula, jidher li mill-anqas 22,3 % tal-prodotti esportati mill-produtturi esportaturi Ċiniżi taħt dawn il-kodiċijiet NM jaqgħu barra l-kamp ta' applikazzjoni ta' din l-investigazzjoni. Għat-Tajwan, ġie kkonfermat il-perċentwal ipprovdut mill-ilmentatur, jiġifieri 100 %.

(161)

Fil-każ tar-RPĊ, il-Kummissjoni ddeċidiet li taġġusta l-volumi tal-importazzjonijiet abbażi tal-aktar proporzjon konservattiv, jiġifieri 22,3 %.

(162)

Barra minn hekk, il-volum ġie aġġustat ulterjorment għall-volum tat-tagħmir bit-truf forma ta' flanġijiet/ta' ħruxija baxxa (ara t-taqsimiet 2.2.1 u 2.2.2), it-tnejn esklużi mid-definizzjoni tal-prodott ta' din l-investigazzjoni. Il-volum importat ġie stmat abbażi tat-tweġibiet għall-kampjunar f'livell ta' madwar 150 tunnellata għar-RPĊ u 20 tunnellata għat-Tajwan. Għalhekk, dawn il-kwantitajiet ġew imnaqqsa mill-volum stmat tal-importazzjonijiet mir-RPĊ u t-Tajwan. Għall-industrija tal-Unjoni, l-investigazzjoni żvelat li l-volum prodott u mibjugħ ta' dawn it-tipi esklużi tal-prodott huwa insinifikanti.

(163)

Fuq din il-bażi, il-konsum tal-Unjoni ġie stabbilit kif ġej:

Tabella 1

Konsum tal-Unjoni (tunnellati)

(164)

Il-konsum tal-Unjoni żdied bi 3 % bejn l-2012 u l-perjodu tal-investigazzjoni.

(165)

Il-Kummissjoni stħarrġet jekk l-importazzjonijiet tal-prodott ikkonċernat li oriġina mill-pajjiżi kkonċernati għandhomx ikunu vvalutati b'mod kumulattiv, skont l-Artikolu 3(4) tar-Regolament bażiku.

(166)

Il-marġnijiet ta' dumping stabbiliti fir-rigward tal-importazzjonijiet mir-RPĊ u t-Tajwan huma ppreżentati fil-qosor fil-premessa 145 u l-premessa 94 hawn fuq.

(167)

Bl-eċċezzjoni ta' King Lai, dawn il-marġnijiet kollha huma ogħla mil-limitu de minimis stabbilit fl-Artikolu 9(3) tar-Regolament bażiku. Kif issemma fil-premessa 94, il-volum tal-importazzjonijiet mhux oġġett ta' dumping kien insinifikanti. Fi kwalunkwe każ, dawn l-importazzjonijiet mhux oġġett ta' dumping kienu esklużi mill-volum totali tal-importazzjonijiet Tajwaniżi tal-prodott ikkonċernat.

(168)

Il-volum tal-importazzjonijiet minn kull pajjiż ikkonċernat ma kienx negliġibbli skont it-tifsira tal-Artikolu 5(7) tar-Regolament bażiku. Fil-perjodu tal-investigazzjoni, ir-RPĊ u t-Tajwan kellhom sehem mis-suq ta' 22,9 % u 7,8 % rispettivament, kif imsemmi fil-premessa 181.

(169)

Il-kundizzjonijiet ta' kompetizzjoni ta' bejn l-importazzjonijiet oġġett ta' dumping mill-pajjiżi konċernati u l-prodott simili kienu simili wkoll. Fil-fatt, il-prodotti importati kienu jikkompetu ma' xulxin u mal-prodott ikkonċernat immanifatturat fl-Unjoni. Il-prodotti huma interkambjabbli u kienu kummerċjalizzati fl-Unjoni permezz ta' mezzi ta' bejgħ komparabbli, billi kienu jinbiegħu lil kategoriji simili ta' konsumaturi finali.

(170)

Għalhekk, il-kriterji kollha stabbiliti fl-Artikolu 3(4) tar-Regolament bażiku ġew issodisfati u l-importazzjonijiet mill-pajjiżi konċernati kienu eżaminati b'mod kumulattiv għall-iskopijiet tad-determinazzjoni tad-dannu.

(171)

Wara d-divulgazzjoni definittiva, diversi partijiet argumentaw li l-Kummissjoni kienet eżaminat b'mod insuffiċjenti l-kundizzjonijiet tal-kompetizzjoni, kemm bejn it-tagħmir Ċiniż u Tajwaniż meta jiġi importat fl-Unjoni, kif ukoll bejn it-tagħmir importat u l-produzzjoni tal-Unjoni.

(172)

Dawn il-partijiet iddikjaraw fuq il-bażi tal-għarfien tagħhom fis-suq li hemm differenzi importanti bejn it-tagħmir prodott u esportat miċ-Ċina u mit-Tajwan lejn l-Unjoni. Dawn il-partijiet qiesu li ma kienx hemm kompetizzjoni bejn il-prodotti esportati minħabba l-proprjetajiet fiżiċi prodotti, sa fejn il-prodotti huma kapaċi jaqdu l-istess użu aħħari jew simili u sa liema punt il-konsumaturi jipperċepixxu u jittrattaw il-prodotti bħala mezzi alternattivi li jwettqu funzjonijiet partikolari sabiex jissodisfaw domanda partikolari.

(173)

Dawn il-partijiet sostnew li l-aġġustamenti estensivi li saru mill-Kummissjoni biex tilħaq ċertu xebh ta' tqabbil fil-prezz bejn il-prodotti Ċiniżi u Tajwaniżi juru li hemm differenzi kbar fil-karatteristiċi marbuta ma' materja prima (tubi mingħajr saldatura u tubi wweldjati), mal-gradi tal-azzar u mal-proċess tal-manifattura. Dan għandu impatt fuq il-prezz li jipprekludi l-interskambjabbiltà tagħhom fis-suq. Barra minn hekk, it-tendenza tal-prezzijiet juri differenzi fil-prezzijiet bejn iż-żewġ oriġini.

(174)

L-ewwel nett, il-Kummissjoni hija tal-fehma li l-kwistjoni ta' kompetizzjoni bejn it-tipi ta' prodotti differenti, ma huwiex determinanti fl-evalwazzjoni tad-dannu. Sakemm it-tipi kollha ta' prodotti jiffurmaw prodott wieħed, għar-raġuni stipulata hawn fuq fil-premessi minn 43 sa 50, m'hemmx bżonn li tinqasam l-evalwazzjoni tad-dannu minħabba l-fatt li allegatament, it-tipi ta' prodotti differenti jikkostitwixxu swieq separati tal-prodott mill-perspettiva tad-dritt tal-kompetizzjoni.

(175)

It-tieni nett, anki jekk il-kwistjoni ta' kompetizzjoni reali bejn it-tipi ta' prodott kienet rilevanti, il-Kummissjoni tinnota li l-affermazzjoni tan-nuqqas ta' kompetizzjoni mhijiex sostnuta mill-evidenza fil-fajl. Fil-fatt, il-Kummissjoni sabet li l-prodott ikkonċernat esportat mill-produttur esportatur Ċiniż u l-produttur esportatur Tajwaniż huma fil-fatt f'kompetizzjoni fis-suq tal-Unjoni. Dawn il-prodotti huma sa ċertu punt interkambjabbli. Din il-konklużjoni ntrifdet bil-prezz medju tal-prodott ikkonċernat. Jeżisti trikkib evidenti fejn il-prodott ikkonċernat prodott minn pajpijiet mingħajr saldatura għandu prezzi simili għal dak tal-prodott ikkonċernat prodott minn pajpijiet iwweldjati (10). Fir-rigward tal-kompetizzjoni mal-industrija tal-Unjoni, l-investigazzjoni kkonfermat li l-produtturi tal-Unjoni inklużi fil-kampjun ipproduċew jew jistgħu jipproduċu kemm mill-materja prima kif ukoll mit-tipi kollha tal-prodott. Għalhekk, dawn il-pretensjonijiet ma ntlaqgħux u l-analiżi kumulattiva tal-effetti tal-importazzjonijiet ġiet ikkonfermata.

(176)

Wara d-divulgazzjoni addizzjonali, dawn il-partijiet interessati tennew il-pretensjoni tagħhom li l-importazzjonijiet mill-pajjiżi kkonċernati ma kellhomx jiġu vvalutati b'mod kumulattiv. F'dan ir-rigward, il-Kummissjoni tinnota li anke jekk il-kompetizzjoni bejn l-importazzjonijiet mill-pajjiżi kkonċernati huma analizzati abbażi tal-PCN ir-riżultati huma l-istess, jiġifieri huwa ċar li hemm kompetizzjoni fil-prezzijiet. B'hekk din il-pretensjoni ma ntlaqgħetx.

(177)

Barra minn hekk, dawn il-partijiet qalu li l-produzzjoni ta' produttur wieħed tal-Unjoni hija primarjament il-produzzjoni ta' tagħmir minn gradi ta' azzar speċjali li ma jsaddadx, filwaqt li 70 % tal-produzzjoni Ċiniża hija magħmula prinċipalment minn azzar awstentiku standard ta' grad 304 jew 316, li jfisser li dawn il-prodotti mhumiex kompetituri.

(178)

Fir-rigward ta' dawn il-pretensjonijiet, il-Kummissjoni nnutat li r-relazzjoni kompetittiva bejn il-prodott ikkonċernat u l-prodott simili kien ikkonfermat mill-investigazzjoni kif iddikjarat fil-premessa 174 hawn fuq fl-analiżi ta' kumulazzjoni. Barra minn hekk, f'dak li għandu x'jaqsam mal-grad tal-azzar, wieħed mill-produtturi tal-Unjoni inklużi fil-kampjun kien tabilħaqq qed jipproduċi l-prodott simili minn gradi standard ta' azzar li ma jsaddadx li jirrappreżenta madwar 90 % tal-produzzjoni tiegħu. Isegwi li l-prodotti Ċiniżi huma f'kompetizzjoni diretta mal-prodotti ta' dan il-produttur tal-Unjoni. Għalhekk, il-pretensjoni ma ntlaqgħetx.

(179)

Fin-nuqqas ta' kummenti oħrajn dwar l-Artikolu 3(4) tar-Regolament bażiku, il-valutazzjoni kumulattiva tal-importazzjonijiet mill-pajjiżi kkonċernati kienet ikkonfermata.

(180)

Il-Kummissjoni stabbiliet il-volum tal-importazzjonijiet fuq il-bażi tad-dejta tal-Eurostat, l-għarfien tas-suq min-naħa tal-ilmentatur u informazzjoni oħra disponibbli għall-Kummissjoni (ara l-premessi minn 156 sa 164). Is-sehem mis-suq tal-importazzjonijiet ġie stabbilit billi tqabblu l-volumi tal-importazzjonijiet mal-konsum tal-Unjoni kif irrapportat fit-Tabella 1 hawn fuq.

Tabella 2

Il-volum tal-importazzjonijiet (tunnellati metriċi) u s-sehem tas-suq

(181)

L-importazzjonijiet lejn l-Unjoni mill-pajjiżi kkonċernati żviluppaw kif ġej:

(182)

It-tabella ta' hawn fuq turi li, f'ċifri assoluti, l-importazzjonijiet mill-pajjiżi kkonċernati żdiedu b'mod sinifikanti matul il-perjodu kkunsidrat (bi 28 %). Is-sehem mis-suq korrispondenti tal-importazzjonijiet oġġett ta' dumping fl-Unjoni żdied b'6 punti perċentwali matul il-perjodu kkunsidrat.

(183)

Għall-evoluzzjoni tal-prezzijiet tal-importazzjoni, fin-nuqqas ta' sors alternattiv, il-Kummissjoni kellha tibbaża fuq l-Eurostat sabiex tistabbilixxi l-prezzijiet medji tal-importazzjonijiet. Il-prezz medju tal-importazzjonijiet fl-Unjoni mill-pajjiżi kkonċernati żviluppa kif ġej:

Tabella 3

Il-prezzijiet tal-importazzjoni (EUR/tunnellata)

(184)

Il-prezzijiet medji tal-importazzjonijiet Ċiniżi li kienu l-oġġett ta' dumping naqsu minn 8 285 EUR/tunnellata fl-2012 għal 6 936 EUR/tunnellata matul il-perjodu tal-investigazzjoni. Matul il-perjodu kkunsidrat (PI-2012), it-tnaqqis fil-prezz ta' unità medju, tal-importazzjonijiet Ċiniżi li kienu l-oġġett ta' dumping, kien ta' madwar 16 %. Fl-istess perjodu, il-prezzijiet medji tal-importazzjonijiet Tajwaniżi li kienu l-oġġett ta' dumping naqsu minn 7 543 EUR/tunnellata, fl-2012, għal 5 840 EUR/tunnellata matul il-perjodu tal-investigazzjoni. Matul il-perjodu kkunsidrat, it-tnaqqis fil-prezz ta' unità medju tal-importazzjonijiet Tajwaniżi li kienu l-oġġett ta' dumping kien ta' madwar 23 %.

(185)

Wara d-divulgazzjoni definittiva, parti interessata waħda ddikjarat li l-Kummissjoni kien messha evalwat l-effett tat-tnaqqis fil-prezz tan-nikil fuq il-prezz tal-prodott ikkonċernat matul il-perjodu tal-investigazzjoni billi l-evoluzzjoni tal-prezz tan-nikil huwa fattur ewlieni fil-prezz tal-azzar li ma jsaddadx. Filwaqt li huwa minnu li n-nikil huwa wieħed mill-fatturi ewlenin tal-kostijiet prinċipali għall-produzzjoni tal-pajpijiet (materja prima tal-prodott ikkonċernat), ma hemm l-ebda relazzjoni diretta mal-prodott ikkonċernat. Barra minn hekk, il-Kummissjoni sabet li l-prezz tal-prodott ikkonċernat ma jikkorrelatax mal-prezz tan-nikil (11). Għalhekk, il-pretensjoni ma ntlaqgħetx.

(186)

Il-Kummissjoni vvalutat it-twaqqigħ fil-prezzijiet matul il-perjodu tal-investigazzjoni billi qabblet:

(187)

It-tqabbil tal-prezzijiet sar fuq bażi ta' tip b'tip għal tranżazzjonijiet fl-istess livell ta' kummerċ, aġġustati kif dovut abbażi tal-kostijiet attwali fejn meħtieġ, u wara t-tnaqqis tar-rifużjonijiet u l-iskontijiet kif irrapportat mill-produtturi tal-Unjoni inklużi fil-kampjun. Ir-riżultat tat-tqabbil ingħata bħala perċentwal tal-fatturat tal-produtturi tal-Unjoni matul il-perjodu tal-investigazzjoni.

(188)

Fuq il-bażi ta' dan ta' hawn fuq, instab li l-importazzjonijiet oġġett ta' dumping mir-RPĊ u mit-Tajwan waqqgħu il-prezzijiet tal-industrija tal-Unjoni b'59,4 % u 76,1 % rispettivament.

(189)

B'konformità mal-Artikolu 3(5) tar-Regolament bażiku, l-analiżi tal-impatt li għandhom l-importazzjonijiet li huma l-oġġett ta' dumping fuq l-industrija tal-Unjoni tinkludi evalwazzjoni tal-indikaturi ekonomiċi kollha li għandhom effett fuq l-istat tal-industrija tal-Unjoni matul il-perjodu kkunsidrat.

(190)

Għad-determinazzjoni tad-dannu, il-Kummissjoni għamlet distinzjoni bejn l-indikaturi makroekonomiċi u mikroekonomiċi ta' dannu. Il-Kummissjoni evalwat l-indikaturi makroekonomiċi abbażi tad-dejta u l-informazzjoni kontenuti fl-ilment u fl-istatistika tal-Eurostat, fejn kien xieraq, biex b'hekk id-dejta tirrigwarda l-produtturi kollha tal-Unjoni. Il-Kummissjoni evalwat l-indikaturi mikroekonomiċi abbażi tad-dejta kontenuta fit-tweġibiet għall-kwestjonarju, debitament verifikata, mill-produtturi tal-Unjoni inklużi fil-kampjun.

(191)

L-indikaturi makroekonomiċi huma: il-produzzjoni, il-kapaċità produttiva, l-użu tal-kapaċità, il-volum ta' bejgħ, is-sehem mis-suq, it-tkabbir, l-impjiegi, il-produttività, il-kobor tal-marġni tad-dumping u l-irkupru minn dumping tal-imgħoddi.

(192)

L-indikaturi mikroekonomiċi huma: il-prezzijiet ta' unità medji, il-kost unitarju, il-kostijiet lavorattivi, l-inventarji, il-profittabilità, il-flussi tal-flus, l-investimenti, ir-redditu fuq l-investimenti u l-kapaċità tal-ġenerazzjoni ta' kapital.

(193)

Il-produzzjoni totali tal-Unjoni, il-kapaċità produttiva u l-użu tal-kapaċità żviluppaw matul il-perjodu kkunsidrat kif ġej:

Tabella 4

Il-produzzjoni, il-kapaċità produttiva u l-użu tal-kapaċità

(194)

Il-volum tal-produzzjoni baqa' pjuttost stabbli bejn l-2012 u l-2013. Bejn l-2013 u l-perjodu tal-investigazzjoni, il-volum tal-produzzjoni tal-industrija tal-Unjoni naqas b'6 %. Matul il-perjodu kkunsidrat, kien hemm tnaqqis globali ta' 8 % fil-volum tal-produzzjoni.

(195)

Fl-istess ħin, il-kapaċità produttiva naqset drastikament bi 13 %. Dan jista' jiġi attribwit prinċipalment għall-għeluq ta' produttur wieħed tal-Unjoni, u għal tnaqqis fil-produzzjoni ta' produttur ieħor tal-Unjoni, li rriżulta fit-tnaqqis ta' madwar 3 600 tunnellata ta' kapaċità produttiva.

(196)

Iċ-ċifri tal-kapaċità rapportati jirreferu għall-kapaċità teknika, li jimplika li aġġustamenti, meqjusin bħala standards mill-industrija, għall-ħin tal-istabbiliment, il-manutenzjoni, l-ostakoli u perjodi oħrajn normali ta' waqfien ġew ikkunsidrati. Madankollu, din hija l-kapaċità produttiva teoretika tal-industrija tal-Unjoni.

(197)

Huwa diffiċli li jiġi valutat l-użu tal-kapaċità għal din l-industrija partikolari billi dan jista' jvarja skont it-tip ta' tagħmir u l-volum prodott. Wieħed mill-produtturi tal-Unjoni inklużi fil-kampjun qies li 60 % ta' użu tal-kapaċità kien il-massimu miksub fl-imgħoddi. Għalhekk, il-kapaċità produttiva teoretika msemmija hawn fuq hija esaġerata b'mod ċar meta mqabbla mal-kapaċità produttiva reali.

(198)

Minn dan joħroġ li l-użu tal-kapaċità baqa' baxx matul il-perjodu kkunsidrat, f'livell ta' madwar 42 %. Minħabba r-ristrutturazzjoni ta' wieħed mill-produtturi tal-Unjoni inklużi fil-kampjun u l-għeluq ta' produttur wieħed tal-Unjoni, l-użu tal-kapaċità żdied bi 3 punti perċentwali matul il-perjodu kkunsidrat. L-użu baxx tal-kapaċità jiddeterjora l-assorbiment tal-kostijiet fissi, li huwa waħda mill-kawżi tal-profittabilità baxxa tal-industrija tal-Unjoni matul il-perjodu kkunsidrat.

(199)

Il-volum tal-bejgħ tal-industrija tal-Unjoni fl-Unjoni lil klijenti mhux relatati u s-sehem mis-suq tagħha żviluppaw kif ġej:

Tabella 5

Volum tal-bejgħ u sehem mis-suq

(200)

Matul il-perjodu kkunsidrat, il-volum tal-bejgħ tal-industrija tal-Unjoni b'mod ġenerali naqas bi 11 % filwaqt li l-konsum tal-Unjoni żdied bi 3 %. Il-volum tal-bejgħ tal-prodotti Ċiniżi u Tajwaniżi li kienu l-oġġett ta' dumping żdied b'945 tunnellata (21 % u 55 % rispettivament) filwaqt li l-konsum tal-Unjoni żdied bi 379 tunnellata. Fil-kuntest taż-żieda fil-konsum fis-suq tal-Unjoni, it-tnaqqis fil-bejgħ u fis-sehem mis-suq tal-industrija tal-Unjoni jikkoinċidi ma' żieda fl-importazzjonijiet mill-pajjiżi kkonċernati. Barra minn hekk, minħabba l-pressjoni kontinwa tal-prezzijiet mill-importazzjonijiet oġġett ta' dumping, l-industrija tal-Unjoni kienet sfurzata tbaxxi l-produzzjoni tagħha sabiex tevita li tbigħ bi prezzijiet li jagħmlu t-telf.

(201)

L-impjiegi u l-produttività żviluppaw matul il-perjodu kkunsidrat kif ġej:

Tabella 6

L-impjiegi u l-produttività

(202)

B'mod konsistenti mat-tnaqqis fil-produzzjoni u l-bejgħ, kien osservat ukoll li l-livell tal-impjiegi fl-industrija tal-Unjoni naqas b'mod sinifikanti. It-tkeċċija tal-impjegati saret sabiex titnaqqas il-forza tax-xogħol, li kienet tirrappreżenta tnaqqis ta' 17 % fl-ammont tagħha. Minħabba f'hekk, iż-żieda ta' 10 % fil-produttività tal-forza tax-xogħol tal-industrija tal-Unjoni, imkejla bħala l-output għal kull persuna impjegata fis-sena, hija ferm ogħla miż-żieda ta' 3 punti perċentwali fl-użu tal-kapaċità (ara l-premessa 193). Dan jissuġġerixxi li l-industrija tal-Unjoni ppruvat tadatta għall-kundizzjonijiet tas-suq li kienu qegħdin jinbidlu (żieda fil-volum tal-importazzjonijiet oġġett ta' dumping) sabiex tibqa' kompetittiva.

(203)

Il-livelli tal-istokk tal-produtturi tal-Unjoni żviluppaw kif ġej matul il-perjodu kkunsidrat:

Tabella 7

Inventarji

(204)

Matul il-perjodu kkunsidrat il-livell tal-ħażniet tal-għeluq naqas bi 23 %. Il-maġġoranza tat-tipi tal-prodott simili mmanifatturati mill-industrija tal-Unjoni hija bbażata fuq ordnijiet speċifiċi mill-utenti. Madankollu, l-industrija trid iżżomm ukoll stokkijiet ta' firxa varjata ta' prodotti sabiex tkun tista' tikkompeti maż-żmien ta' konsenja rapidu ta' produtturi oħra. Dan huwa kkonfermat ukoll mill-analiżi tal-evoluzzjoni tal-istokkijiet tal-għeluq bħala persentaġġ tal-produzzjoni. Dan l-indikatur baqa' relattivament stabbli f'livell ta' 20 %-24 % tal-volum tal-produzzjoni.

(205)

Ġie konkluż li t-tnaqqis fil-livell tal-istokkijiet kien ikkawżat prinċipalment mir-rekwiżiti aktar stretti ta' kapital operatorju imposti mill-ġestjoni tal-industrija tal-Unjoni.

(206)

Bl-eċċezzjoni ta' esportatur Tajwaniż minuri wieħed, il-marġnijiet kollha tad-dumping kienu konsiderevolment ogħla mil-livell de minimis. L-impatt tad-daqs tal-marġnijiet għoljin attwali ta' dumping fuq l-industrija tal-Unjoni ma kienx negliġibbli, meta tqiesu l-volum u l-prezzijiet tal-importazzjonijiet mill-pajjiżi kkonċernati.

(207)

Il-konsum tal-Unjoni żdied bi 3 % matul il-perjodu kkunsidrat, filwaqt li l-volumi tal-bejgħ tal-industrija tal-Unjoni naqsu bi 11 %. Minkejja din iż-żieda fil-konsum, l-industrija tal-Unjoni tilfet mis-sehem mis-suq. Mill-banda l-oħra, is-sehem mis-suq tal-importazzjonijiet mill-pajjiżi kkonċernati żdied matul il-perjodu kkunsidrat.

(208)

Il-prezzijiet tal-bejgħ unitarji medji ponderati tal-produtturi tal-Unjoni lill-klijenti mhux relatati fl-Unjoni żviluppaw kif ġej matul il-perjodu kkunsidrat:

Tabella 8

Il-prezzijiet tal-bejgħ fl-Unjoni

(209)

It-tabella ta' hawn fuq turi l-evoluzzjoni tal-prezz unitarju tal-bejgħ fl-Unjoni meta mqabbel mal-kost korrispondenti tal-produzzjoni. Il-prezz tal-bejgħ unitarju medju evolva b'mod ġenerali f'konformità mal-kost tal-produzzjoni. Hemm tnaqqis ta' 2 % fil-kost tal-produzzjoni mill-2014 sal-perjodu tal-investigazzjoni, affettwat mit-tnaqqis fil-prezz tal-materja prima prinċipali, iżda l-prezz tal-bejgħ unitarju naqas b'5 %.

(210)

Wara d-divulgazzjoni definittiva, parti interessata waħda ddikjarat li l-Kummissjoni naqset milli tqis is-sitwazzjoni ġenerali tas-suq. B'mod partikolari, kien hemm waqgħa fil-prezzijiet taż-żejt, li naqset il-kostijiet tal-produzzjoni. Madankollu, il-parti ma pprovdiet l-ebda evidenza li ssostni l-pretensjoni tagħha. B'mod partikolari, għadu mhux ċar kif preċiżament il-waqgħa fil-prezzijiet taż-żejt madwar id-dinja kienet marbuta mal-kost tal-produzzjoni ta' dan il-prodott simili partikolari. Barra minn hekk, l-analiżi magħmula mill-Kummissjoni dwar id-dannu kopriet il-perjodu bejn l-2012 u l-PI li matulu tqieset il-materja prima kollha, inkluża l-enerġija. Għalhekk, il-pretensjoni ma ntlaqgħetx.

(211)

Il-kostijiet medji lavorattivi tal-produtturi tal-Unjoni żviluppaw matul il-perjodu kkunsidrat kif ġej:

Tabella 9

Kostijiet lavorattivi għal kull impjegat

(212)

Matul il-perjodu kkunsidrat, il-paga medja għal kull impjegat żdiedet b'10 %, li hija ftit ogħla miż-żieda ġenerali fil-prezzijiet fl-Unjoni dovuta għall-inflazzjoni. Madankollu, jenħtieġ li dan jiġi kkunsidrat fil-kuntest tat-tnaqqis kbir fl-impjiegi, kif spjegat fil-premessi 201 u 202.

(213)

Il-profittabbiltà, il-fluss tal-flus, l-investimenti u r-redditu fuq l-investimenti tal-produtturi tal-Unjoni żviluppaw matul il-perjodu kkunsidrat kif ġej:

Tabella 10

Il-profittabbiltà, il-fluss tal-flus, l-investimenti u r-redditu fuq l-investimenti

(214)

Il-Kummissjoni stabbilixxiet il-profittabbiltà tal-produtturi tal-Unjoni billi esprimiet it-telf nett qabel it-taxxa tal-bejgħ tal-prodott simili lil konsumaturi mhux relatati fl-Unjoni bħala perċentwal tal-fatturat ta' dan il-bejgħ.

(215)

Il-profittabilità żviluppat b'mod negattiv minn [8 %-10 %] fl-2012 għal [2 %-4 %] fl-2013 u fl-2014 u tjiebet fil-PI biex laħqet [4 %-6 %]. Matul il-perjodu kkunsidrat, il-kumpaniji inklużi fil-kampjun tilfu mill-volum tal-bejgħ u mis-sehem mis-suq, u ddeċidew li jikkonċentraw fuq segmenti bi prezzijiet għoljin fejn l-importazzjonijiet oġġett ta' dumping kienu anqas preżenti. Din l-istrateġija ppermettitilhom li jżidu l-profittabilità tagħhom matul il-PI.

(216)

B'riżultat ta' dan, filwaqt li fl-2013 u fl-2014, il-kumpaniji inklużi fil-kampjun ma kinux kapaċi jgħaddu ż-żidiet fil-kost tal-produzzjoni lill-klijenti, matul il-PI l-profittabilità tal-kumpaniji inklużi fil-kampjun setgħet tibbenefika mit-tnaqqis fil-kost tal-produzzjoni tagħha minħabba użu akbar tal-kapaċità u pressjoni anqas kompetittiva fis-segmenti tas-suq bi prezzijiet għolja.

(217)

Il-fluss tal-flus nett jirrappreżenta l-kapaċità tal-produtturi tal-Unjoni li jiffinanzjaw huma stess l-attivitajiet tagħhom. Ix-xejra fil-fluss tal-flus nett segwiet xejra 'l isfel (-43 %), dovuta l-iktar għal tnaqqis fl-inventarji.

(218)

Ir-redditu fuq l-investiment naqas bejn l-2012 u l-2014, u rkupra fil-PI waqt li segwa x-xejra tal-profittabilità. L-industrija tal-Unjoni żiedet il-livell tal-investimenti tagħha bi 22 % bejn l-2012 u l-perjodu tal-investigazzjoni. Madankollu, jenħtieġ li din iż-żieda ta' 22 % titqies fid-dawl taċ-ċifri assoluti. Il-livell ta' investiment għall-kampjun tal-industrija tal-Unjoni kien ta' anqas minn miljun euro fl-2012 u laħaq il-miljun matul il-PI prinċipalment għall-ispejjeż relatati mal-manutenzjoni normali u mat-tagħmir tas-sigurtà.

(219)

Diversi partijiet sostnew li l-waqgħa fil-profittabilità mill-2012 sal-2013 jenħtieġ li tiġi interpretata fid-dawl taż-żieda sostanzjali fl-investimenti fl-industrija tal-Unjoni. Huma osservaw li l-investimenti żdiedu b' 78 % bejn l-2012 u l-2013. Wara t-tieni divulgazzjoni, dawn il-partijiet tennew il-pretensjoni tagħhom u stqarrew li ż-żieda ta' 78 % jenħtieġ li tiġi kkunsidrata bħala spiża “enormi” ta' investiment.

(220)

F'dan ir-rigward, il-Kummissjoni nnutat li l-produtturi tal-Unjoni ma kinux jinvestu sabiex itejbu l-metodu tal-prodott tagħhom iżda kienu jinvestu fit-tagħmir obbligatorju ta' sikurezza u fil-manutenzjoni kif iddikjarat hawn fuq. Filwaqt li huwa minnu li l-investiment żdied, fl-istess ħin, ir-redditu fuq l-investiment naqas b'mod sostanzjali. Barra minn hekk, l-investiment jenħtieġ li jitqabbel mat-total tal-bejgħ tal-prodott simili u l-investiment inkwistjoni kien jirrappreżenta biss bejn 2-4 % tal-bejgħ totali tal-prodott simili. Fl-aħħar nett, l-investiment huwa biss wieħed mill-indikaturi ta' dannu u ma għandux jiġi analizzat b'mod iżolat.

(221)

Qed jiġi konkluż li ħafna mill-indikaturi tad-dannu juru xejra negattiva matul il-perjodu kkunsidrat. B'mod partikolari, l-indikaturi tad-dannu relatati mal-produzzjoni u s-sehem mis-suq tal-produtturi tal-Unjoni jikxfu d-diffikultajiet serji tal-industrija tal-Unjoni, kif ukoll l-eżistenza ta' twaqqigħ sostnut fil-prezzijiet. L-uniku indikatur pożittiv, jiġifieri t-titjib żgħir fil-profittabilità matul il-PI nkiseb għad-detriment tal-volum tal-bejgħ u tas-sehem mis-suq bid-dħul fis-segment tal-prezzijiet għoljin. Dan jista' ma jdumx wisq, jekk l-importazzjonijiet li huma l-oġġett ta' dumping jidħlu wkoll fis-segmenti tal-prezzijiet għoljin. Għaldaqstant, valutazzjoni tal-indikaturi makro- u mikroekonomiċi kollha turi xejra ġeneralment negattiva. Għalhekk, jista' jiġi konkluż li l-industrija tal-Unjoni sofriet dannu materjali skont it-tifsira tal-Artikolu 3(5) tar-Regolament bażiku.

(222)

F'konformità mal-Artikolu 3(6) tar-Regolament bażiku, il-Kummissjoni eżaminat jekk l-importazzjonijiet oġġett ta' dumping mill-pajjiżi konċernati kkawżawx dannu materjali lill-industrija tal-Unjoni. Skont l-Artikolu 3(7) tar-Regolament bażiku, il-Kummissjoni eżaminat ukoll jekk fatturi magħrufin oħrajn fl-istess ħin setgħux kienu ta' dannu lill-industrija tal-Unjoni. Il-Kummissjoni żgurat li kull dannu possibbli kkawżat minn fatturi oħrajn barra l-importazzjonijiet oġġett ta' dumping mill-pajjiżi konċernati ma kienx attribwit għall-importazzjonijiet oġġett ta' dumping.

(223)

Dawn il-fatturi huma: l-importazzjonijiet minn pajjiżi terzi, il-prestazzjoni fil-bejgħ għall-esportazzjoni tal-produtturi tal-Unjoni, l-użu baxx tal-kapaċità tal-industrija tal-Unjoni u l-importazzjonijiet mhux oġġett ta' dumping mit-Tajwan.

(224)

Bħala medja, il-prezzijiet tal-bejgħ tal-produtturi esportaturi naqsu minn 8 129 EUR/tunnellata fl-2012 għal 6 658 EUR/tunnellata matul il-perjodu tal-investigazzjoni (-18,1 %). Billi baxxew kontinwament il-prezz tal-bejgħ unitarju tagħhom matul il-perjodu kkunsidrat, il-produtturi esportaturi mill-pajjiżi kkonċernati setgħu jżidu b'mod sinifikanti s-sehem mis-suq tagħhom mill-2012 (24,7 %) sal-perjodu tal-investigazzjoni (30,7 %).

(225)

Mill-2012, iż-żieda kontinwa fl-importazzjonijiet mill-pajjiżi kkonċernati bi prezzijiet li kienu aktar baxxi minn dawk tal-industrija tal-Unjoni kellha impatt negattiv ċar fuq il-prestazzjoni finanzjarja tal-industrija tal-Unjoni. Fil-fatt, filwaqt li l-industrija tal-Unjoni kienet qiegħda tnaqqas il-kostijiet tagħha billi tnaqqas l-impjiegi u tagħlaq l-impjanti, il-volum tal-importazzjonijiet oġġett ta' dumping żdied bi prezzijiet dejjem aktar baxxi, li ġiegħel lill-industrija tal-Unjoni tnaqqas il-volum tal-bejgħ tagħha. B'riżultat ta' dan, l-industrija tal-Unjoni tilfet mis-sehem mis-suq tagħha u ma setgħetx tibbenefika miż-żieda fil-konsum.

(226)

Fid-dawl tal-koinċidenza stabbilita b'mod ċar fiż-żmien bejn, fuq naħa waħda, il-livell dejjem jiżdied ta' importazzjonijiet oġġett ta' dumping bi prezzijiet dejjem neżlin u, min-naħa l-oħra, it-telf fil-volum tal-bejgħ tal-industrija tal-Unjoni, wieħed jikkonkludi li l-importazzjonijiet oġġett ta' dumping kienu responsabbli għas-sitwazzjoni dannuża tal-industrija tal-Unjoni.

(227)

Wara d-divulgazzjoni definittiva, parti interessata waħda saħqet li t-tnaqqis fil-prezzijiet tal-bejgħ tal-produtturi esportaturi hi spjegata mit-tnaqqis fil-prezz tan-nikil. Madankollu, kif spjegat hawn fuq fil-premessa 185, ma hemm l-ebda korrelazzjoni diretta bejn il-prezz tan-nikil u l-prezzijiet ta' importazzjoni. Għalhekk, il-pretensjoni ma ntlaqgħetx.

(228)

Bosta partijiet iddikjaraw li d-dannu mġarrab mill-industrija tal-Unjoni ma jistax jiġi attribwit għall-importazzjonijiet li huma l-oġġett ta' dumping mill-pajjiżi kkonċernati billi l-prezzijiet ta' produttur wieħed biss tal-Unjoni inkluż fil-kampjun naqsu matul il-perjodu kkunsidrat filwaqt li l-produtturi l-oħra tal-Unjoni inklużi fil-kampjun kienu kapaċi jżommu l-prezzijiet tal-bejgħ tagħhom. Din il-pretensjoni ma ntlaqgħetx għar-raġunijiet li ġejjin. L-istatistika fl-UE mhijiex affidabbli f'dan il-każ peress li tinkludi mhux biss il-prodott ikkonċernat iżda wkoll tipi oħra ta' tagħmir. Barra minn hekk l-industrija tal-Unjoni ma sofrietx tnaqqis sostanzjali matul il-perjodu kkunsidrat (-5 %), iżda dan seħħ għad-detriment tal-volum tal-bejgħ tagħha, li naqas bi 11 %, kif ukoll tas-sehem mis-suq tagħha li naqas b' 5,5 % matul l-istess perjodu.

(229)

Wara t-tieni divulgazzjoni, il-partijiet interessati allegaw li, kuntrarjament għad-dikjarazzjoni tal-Kummissjoni fil-premessa 228 aktar 'il fuq, id-dejta rrappurtata mill-Eurostat tindika l-imġiba fl-ipprezzar tal-produtturi tal-Unjoni u għaldaqstant, huwa korrett li jiġi ddikjarat li l-prezzijiet tal-produtturi tal-Unjoni baqgħu stabbli matul il-perjodu kkunsidrat. F'dan ir-rigward, il-Kummissjoni tiddikjara dan li ġej: Kif spjegat hawn fuq id-definizzjoni tal-kodiċi NM rilevanti hija usa' mid-definizzjoni tal-prodott ikkonċernat u l-prodott simili (ara l-premessa 158 aktar 'il fuq). Barra minn hekk, dawn il-partijiet interessati huma żbaljati meta jsostnu li l-produtturi tal-Unjoni kienu qed jimmanifatturaw il-prodott simili biss li jaqa' taħt iż-żewġ kodiċi NM inkwistjoni. Tabilħaqq, l-industrija tal-Unjoni qed tipproduċi wkoll prodotti li ma jaqgħux fid-definizzjoni tal-prodott ta' dan ir-Regolament u li jaqgħu taħt iż-żewġ kodiċi NM inkwistjoni. Għalhekk, din il-pretensjoni ma ntlaqgħetx.

(230)

Fin-nuqqas ta' kwalunkwe kumment ieħor, il-Kummissjoni kkonfermat li l-importazzjonijiet oġġett ta' dumping tal-prodott ikkonċernat ikkawża dannu materjali lill-industrija tal-Unjoni.

(231)

Il-volum tal-importazzjonijiet minn pajjiżi terzi żviluppa kif ġej matul il-perjodu kkunsidrat:

Tabella 11

Il-volum tal-importazzjonijiet (tunnellati metriċi) u s-sehem mis-suq

(232)

L-akbar esportatur tal-prodott ikkonċernat lejn l-Unjoni wara r-RPĊ hija l-Isvizzera b'sehem mis-suq ta' 10 %, meta mqabbel ma' 30,7 % mir-RPĊ/mit-Tajwan. Il-prezzijiet ta' dawn l-importazzjonijiet kienu simili għall-prezzijiet tal-industrija tal-Unjoni jiġifieri 10 300 EUR/tunnellata.

(233)

Il-volum u s-sehem mis-suq tal-importazzjonijiet mill-oriġnijiet l-oħra kollha baqgħu stabbli matul il-perjodu kkunsidrat; jiġifieri madwar 2 500 tunnellata u 37 % rispettivament. Għalhekk jista' jiġi konkluż li l-impatt ta' dawn l-importazzjonijiet ma kissirx ir-rabta kawżali bejn l-importazzjonijiet Ċiniżi/Tajwaniżi li kienu l-oġġett ta' dumping u d-dannu materjali mġarrab mill-industrija tal-Unjoni.

(234)

Għadd ta' partijiet interessati qalu li l-Kummissjoni kellha tanalizza l-effett tal-prezz tal-importazzjoni li toriġina mill-Indja. Wara t-tieni divulgazzjoni, din il-pretensjoni ġiet imtennija u l-partijiet qalu wkoll li l-prezzijiet medji Indjani kienu qed jaqgħu matul il-perjodu kkunsidrat. Il-Kummissjoni osservat li l-importazzjonijiet Indjani għandhom sehem mis-suq ta' 1,4 %. Il-prezz medju tal-prodott simili li joriġina mill-Indja kien madwar 9 500 EUR/tunnellata matul il-perjodu tal-investigazzjoni. Filwaqt li huwa minnu li l-prezz medju tal-prodott li joriġina mill-Indja naqas minn madwar 13 700 EUR/tunnellata fl-2012 għal madwar 9 500 EUR/tunnellata fil-PI, xorta kien għadu 27 % ogħla mill-prezz medju tal-prodott ikkonċernat li joriġina miċ-Ċina, u 61 % ogħla meta mqabbel mal-prezzijiet Tajwaniżi. Għalhekk, dawn l-importazzjonijiet ma kisrux ir-rabta kawżali.

(235)

Bosta partijiet interessati ddikjaraw li l-Kummissjoni kien messha analizzat l-importazzjonijiet tal-prodott simili mir-Russja. B'kuntrast ma' dan, l-ilmentatur iddikjara li dawn l-importazzjonijiet m'għandhomx jittieħdu f'konsiderazzjoni għall-analiżi tal-kawżalità peress li l-prodotti ddikjarati taħt il-kodiċijiet NM ikkonċernati mhumiex prodotti simili.

(236)

Il-Kummissjoni sabet li l-prezzijiet tal-importazzjoni tar-Russja, irrapportati mill-Eurostat għall-kodiċijiet NM kkonċernati kienu madwar EUR 1 000/tunnellata matul il-perjodu tal-investigazzjoni. Għalhekk, l-importazzjonijiet mir-Russja huma relatati ma' prodott differenti li huwa aktar minn 7 darbiet irħas meta mqabbla mal-importazzjonijiet Ċiniżi. Għalhekk, dawn l-importazzjonijiet tqiesu irrelevanti għall-analiżi tal-kawżalità.

(237)

Wara t-tieni divulgazzjoni, diversi partijiet interessati argumentaw li l-effett ta' importazzjonijiet li joriġinaw mir-Russja u mill-Indja jenħtieġ li jiġi vvalutat b'mod kumulattiv. Kif iddikjarat fil-premessa 236 hawn fuq, l-importazzjonijiet li joriġinaw mir-Russja ma ġewx ikkunsidrati matul l-analiżi tar-rabta kawżali, peress li l-Kummissjoni skopriet li l-prodotti li joriġinaw mir-Russja mhumiex koperti mid-definizzjoni tal-prodott ikkonċernat u għalhekk mhumiex koperti minn din l-investigazzjoni. Għal din ir-raġuni, dawn l-importazzjonijiet ma jistgħux jiġu vvalutati b'mod kumulattiv mal-importazzjonijiet li joriġinaw mill-Indja. Għalhekk, din il-pretensjoni ma ntlaqgħetx.

(238)

Il-volum tal-esportazzjonijiet tal-produtturi tal-Unjoni żviluppa kif ġej matul il-perjodu kkunsidrat:

Tabella 12

Il-prestazzjoni tal-esportazzjonijiet

(239)

Skont dejta mill-produtturi tal-Unjoni inklużi fil-kampjun, il-prezzijiet tal-esportazzjoni naqsu b'14 % matul il-perjodu kkunsidrat u l-volum tal-esportazzjonijiet lil konsumaturi mhux relatati f'pajjiżi terzi naqas b'anqas minn 1 % tal-bejgħ totali tal-industrija tal-Unjoni. Madankollu, id-dannu mġarrab matul il-PI ma kienx sinifikanti, billi kien jirrappreżenta anqas minn 0,8 % tal-fatturat totali tal-industrija tal-Unjoni.

(240)

Għalhekk jista' jiġi konkluż li l-attività tal-esportazzjoni tal-industrija tal-Unjoni ma tkissirx ir-rabta kawżali.

(241)

Minħabba l-użu baxx tal-kapaċità tal-kumpaniji inklużi fil-kampjun matul il-perjodu kkunsidrat, il-Kummissjoni investigat ukoll jekk il-kapaċità żejda setgħetx ikkontribwiet għad-dannu jew saħansitra kissret ir-rabta kawżali. F'dan l-istadju, il-Kummissjoni tqis li dan mhuwiex il-każ. L-ewwel nett, kif spjegat aktar 'il fuq fil-premessa 197), il-kumpaniji jrid ikollhom kapaċità teoretika importanti sabiex ikunu jistgħu jissodisfaw it-talbiet kollha tal-konsumaturi, iżda mhuwiex realistiku li din il-kapaċità teoretika tintuża kompletament. It-tieni, l-industrija tal-Unjoni kienet profittabbli b'rata ta' użu tal-kapaċità aktar baxxa fl-2012, li tindika li d-dannu mhuwiex ikkawżat minn kapaċità żejda. Għalhekk, wieħed jikkonkludi li l-impatt ta' tali użu baxx tal-kapaċità huwa immaterjali u għalhekk ma setax ikisser ir-rabta kawżali.

(242)

Il-volum tal-importazzjonijiet mhux oġġett ta' dumping kien insinifikanti, 300 kg matul il-PI, meta mqabbel mal-konsum totali tal-Unjoni, 14 145 tunnellata. Għalhekk, wieħed jikkonkludi li l-impatt ta' dawn l-importazzjonijiet fuq l-industrija tal-Unjoni huwa immaterjali u għalhekk ma setax ikisser ir-rabta kawżali.

(243)

Kienet stabbilita rabta kawżali bejn id-dannu mġarrab mill-produtturi tal-Unjoni u l-importazzjonijiet oġġett ta' dumping mill-pajjiżi kkonċernati.

(244)

Il-pressjoni konsiderevoli tal-prezzijiet u l-volumi eżerċitata fuq l-industrija tal-Unjoni biż-żieda fl-importazzjonijiet oġġett ta' dumping mill-pajjiżi kkonċernati matul il-perjodu kkunsidrat ma ppermettietx lill-industrija tal-Unjoni li tibbenefika mill-irkupru bil-mod tas-suq tal-UE. L-analiżi tal-indikaturi tad-dannu ta' hawn fuq turi li s-sitwazzjoni ekonomika tal-industrija tal-Unjoni kollha kemm hi kienet affettwata minn żieda fl-importazzjonijiet oġġett ta' dumping bi prezzijiet baxxi mir-RPĊ u mit-Tajwan li waqqgħu l-prezzijiet tal-Unjoni. L-esportaturi Ċiniżi/Tajwaniżi rnexxielhom jiksbu sehem sinifikanti mis-suq (30,7 % matul il-PI meta mqabbel mas-sehem mis-suq ta' 24,7 % fl-2012) b'detriment għall-industrija tal-Unjoni. L-industrija tal-Unjoni tilfet 5,5 punti perċentwali mis-sehem mis-suq tagħha bejn l-2012 u l-PI, u 11 % mill-volumi tal-bejgħ, filwaqt li l-konsum żdied fis-suq tal-Unjoni.

(245)

Il-Kummissjoni ddistingwiet u sseparat l-effetti tal-fatturi kollha magħrufin dwar is-sitwazzjoni tal-industrija tal-Unjoni mill-effetti ta' dannu tal-importazzjonijiet oġġett ta' dumping. Il-fatturi identifikati l-oħra, jiġifieri l-importazzjonijiet minn pajjiżi terzi, il-prestazzjoni tal-bejgħ għall-esportazzjoni tal-produtturi tal-Unjoni, l-użu baxx tal-kapaċità tal-industrija tal-Unjoni u l-importazzjonijiet mit-Tajwan mhux oġġett ta' dumping, ma nstabux li jkissru r-rabta kawżali. Anki meta tqies l-effett kombinat tagħhom, il-konklużjoni tal-Kummissjoni ma kinitx differenti: fin-nuqqas tal-importazzjonijiet oġġett ta' dumping, l-industrija tal-Unjoni ma kinitx se tiġi negattivament affettwata b'mod tant sinifikanti. B'mod partikolari, is-sehem mis-suq ma kienx se jonqos għal dawk il-livelli u kienet tinkiseb profittabilità raġonevoli.

(246)

Fuq il-bażi ta' dan ta' hawn fuq, il-Kummissjoni kkonkludiet f'dan l-istadju li d-dannu materjali għall-industrija tal-Unjoni kien ikkawżat mill-importazzjonijiet oġġett ta' dumping mill-pajjiżi kkonċernati u li l-fatturi l-oħra, meqjusin b'mod individwali jew kollettivament, ma kissrux ir-rabta ta' kawżalità.

(247)

F'konformità mal-Artikolu 21 tar-Regolament bażiku, il-Kummissjoni eżaminat jekk kienx hemm raġuni konvinċenti sabiex tikkonkludi li ma kienx fl-interess tal-Unjoni li tadotta miżuri f'dan il-każ, minkejja d-determinazzjoni ta' dumping dannuż. Id-determinazzjoni tal-interess tal-Unjoni kienet ibbażata fuq apprezzament tal-interessi varji kollha involuti, inklużi dawk tal-industrija, tal-importaturi u tal-utenti tal-Unjoni.

(248)

L-industrija tal-Unjoni tinsab f'10 Stati Membri (l-Awstrija, ir-Repubblika Ċeka, id-Danimarka, il-Finlandja, Franza, il-Ġermanja, l-Italja, il-Polonja, Spanja u l-Iżvezja), u timpjega direttament madwar 500 impjegat b'rabta ma' tagħmir iwweldjat tarf ma tarf ta' tubi u pajpijiet tal-azzar li ma jsaddadx.

(249)

Ħadd mill-produtturi magħrufin ma oppona t-tnedija tal-investigazzjoni. Kif intwera aktar 'il fuq fl-analiżi tal-indikaturi tad-dannu, l-industrija kollha tal-Unjoni esperjenzat deterjorament tas-sitwazzjoni tagħha u ntlaqtet b'mod negattiv mill-importazzjonijiet oġġett ta' dumping.

(250)

Huwa mistenni li l-impożizzjoni ta' dazji antidumping definittivi tistabbilixxi mill-ġdid il-kundizzjonijiet ta' kummerċ ġust fis-suq tal-Unjoni u tippermetti lill-industrija tal-Unjoni li tirkupra. Dan jkun jirriżulta fit-titjib tal-profittabilità tal-industrija tal-Unjoni lejn livelli meqjusa neċessarji għal din l-industrija ta' kapital intensiv. L-industrija tal-Unjoni ġarrbet dannu materjali kkawżat mill-importazzjonijiet oġġett ta' dumping mill-pajjiżi kkonċernati. Qed jiġi mfakkar li ħafna mill-indikaturi ta' dannu wrew tendenza negattiva matul il-perjodu kkunsidrat.

(251)

B'mod partikolari, kienu serjament affettwati l-indikaturi tad-dannu relatati mal-produzzjoni, il-kapaċità tal-produzzjoni u s-sehem mis-suq tal-produtturi tal-Unjoni. L-impożizzjoni ta' miżuri għalhekk hija importanti sabiex is-suq jitreġġa' lura għal livelli mhux ta' dumping u mhux dannużi, u sabiex il-produtturi kollha jkunu jistgħu joperaw fis-suq tal-Unjoni f'kundizzjonijiet ta' kummerċ ġust. B'kuntrast, fin-nuqqas ta' miżuri, huwa probabbli ħafna li jkun hemm deterjorament ulterjuri fis-sitwazzjoni ekonomika u finanzjarja tal-industrija tal-Unjoni.

(252)

Skont id-dikjarazzjoni stabbilita fil-premessa 35) hawn fuq il-Kummissjoni vverifikat it-talba (li tinkludi żjara ta' verifika fuq il-post fil-kwartieri ġenerali tal-industrija tal-Unjoni). Il-Kummissjoni kkonkludiet li kuntrarju għall-pretensjoni ppreżentata: (i) il-prodotti importati taħt l-iskema ta' proċessar passiv jinsabu f'kompetizzjoni diretta ma' prodotti ta' produtturi oħra fl-Unjoni; (ii) id-dazju impost, li huwa dazju ta' 41,9 % applikabbli għall-produttur Ċiniż li miegħu il-kumpanija tal-UE għandha l-arranġament ta' pproċessar passiv, jenħtieġ li jkollu impatt finanzjarju limitat (10 %-15 %) fuq id-dħul tal-produttur tal-Unjoni ġġenerat mill-kummerċ ta' pproċessar passiv; (iii) jenħtieġ li l-vijabbiltà tal-kummerċ tal-ipproċessar passiv tal-produttur tal-Unjoni ma tiġix ipperikolata bl-impożizzjoni ta' miżuri, b'konsegwenza ta' dan, lanqas ma għandu jonqos in-numru ta' impjegati, u jenħtieġ ukoll li l-iskop tal-fondi tal-UE ma jitqiegħedx f'periklu. Għalhekk, il-pretensjoni ma ntlaqgħetx. Il-Kummissjoni tfakkar ukoll f'dan il-kuntest li l-Kodiċi Doganali tal-Unjoni jipprevedi li bħala regola, id-dazji għad-difiża tal-kummerċ japplikaw għall-iskemi ta' pproċessar passiv fejn l-operazzjoni mwettqa barra l-Unjoni tattribwixxi oriġini nonpreferenzjali lill-prodott, kif jidher li huwa l-każ preżenti. Ebda dazju ma japplika, għall-kuntrarju, jekk u sa fejn l-oriġini nonpreferenzjali tal-merkanzija tibqa' l-Unjoni.

(253)

Għaldaqstant, ġie konkluż li l-impożizzjoni ta' dazji antidumping tkun fl-interess tal-industrija tal-Unjoni. L-impożizzjoni ta' miżuri antidumping tippermetti lill-industrija tal-Unjoni li tirkupra mill-effetti tad-dumping dannuż li nstab.

(254)

Kif indikat fil-premessa 18), importatur wieħed biss issottometta informazzjoni dettaljata dwar l-impatt tad-dazji antidumping. Dan l-importatur qies li l-effett inizjali se jkun żieda fil-prezz b'impatt negattiv fuq il-prestazzjoni tiegħu f'termini ta' żmien tal-konsenja u l-kompetittività. Dan l-importatur sostna wkoll li kien se jibda jiffoka aktar fuq pajjiżi oħra li jipproduċu t-tagħmir bħall-Malasja, il-Vjetnam u l-Korea. Madankollu, il-proċess tal-għażla ta' sħab ġodda f'post ieħor ikun jiswa l-ħin u l-flus. Barra minn hekk, dan iġib diskontinwità fil-livell tal-istokkijiet u fil-kwalità tal-prodotti, li min-naħa tagħha jkollha impatt negattiv fuq il-kwalità tas-servizz ipprovdut lill-konsumaturi.

(255)

Madankollu, instab li l-importaturi jistgħu jaqilbu għal sorsi oħra ta' provvista, u għalhekk l-impatt negattiv tal-miżuri jista' jitnaqqas.

(256)

Wara d-divulgazzjoni definittiva, parti interessata minnhom ikkontestat din il-konstatazzjoni. Hija sostniet li l-produtturi tal-Unjoni mhux se jkunu kapaċi jaqdu s-suq tal-Unjoni. Barra minn hekk, il-produtturi tat-tagħmir eżistenti stabbiliti, pereżempju fil-Malażja u fit-Tajlandja ma jkunux jistgħu jipprovdu l-kwantità u l-kwalità biex iservu l-importaturi tal-Unjoni.

(257)

Il-Kummissjoni ma laqgħetx din il-pretensjoni. Il-produtturi tal-Unjoni attwalment joperaw bħala medja bl-użu ta' 42 % tal-kapaċità tagħhom. Għalhekk, huwa probabbli li dawn se jkunu kapaċi jgħollu l-produzzjoni tagħhom u li jfornu s-suq tal-Unjoni iktar milli jagħmlu llum. Barra minn hekk, it-tagħmir jiġi prodott ukoll f'bosta pajjiżi terzi oħra bħall-Indja, il-Malasja, it-Tajlandja, il-Korea u l-Ġappun. Għalhekk, il-Kummissjoni tqis li ma hemm l-ebda riskju ta' skarsezza tal-prodott fis-suq tal-Unjoni.

(258)

Fuq din il-bażi, wieħed jikkonkludi li l-impożizzjoni ta' miżuri antidumping mhux se jkollha effetti sostanzjalment negattivi fuq l-importaturi.

(259)

L-utenti tal-prodott ikkonċernat u tal-prodott simili jinsabu f'diversi oqsma industrijali. Il-fattur kruċjali għall-utenti huwa d-disponibbiltà tal-prodott fil-kwantità u fil-kwalità mitluba.

(260)

Billi utent wieħed biss ikkoopera fl-investigazzjoni, il-Kummissjoni ma setgħetx tikkwantifika l-impatt tal-miżura fuq l-utenti b'mod ġenerali. Madankollu, mit-tweġiba ta' dan l-utent li kkoopera, l-impatt ta' kull antidumping fuq il-kostijiet ta' din il-kumpanija se jkun insinifikanti (anqas minn 1 % tal-fatturat tagħha). Fi kwalunkwe każ, l-industrija tal-UE għandha l-kapaċità biex tissodisfa d-domanda tal-UE u hemm ukoll pajjiżi terzi oħra li jistgħu jforu lill-UE, jekk ikun hemm kundizzjonijiet ġusti.

(261)

Għar-raġunijiet ta' hawn fuq, ġie konkluż li l-impożizzjoni ta' miżuri antidumping mhux se jkollha impatt sostanzjali fuq l-utenti.

(262)

Fid-dawl ta' dan ta' hawn fuq, il-Kummissjoni kkonkludiet li ma hemmx raġunijiet konvinċenti kontra l-impożizzjoni ta' miżuri fuq l-importazzjonijiet tal-prodott ikkonċernat mill-pajjiżi kkonċernati.

(263)

Kull effett negattiv fuq l-importaturi u l-utenti mhux relatati jittaffa permezz tad-disponibbiltà ta' sorsi alternattivi ta' provvista.

(264)

Barra minn hekk, meta jiġi kkunsidrat l-impatt globali tal-miżuri antidumping fuq is-suq tal-Unjoni, l-effetti pożittivi, b'mod partikolari fuq l-industrija tal-Unjoni, jidhru li jegħlbu l-impatti potenzjalment negattivi fuq il-gruppi l-oħra ta' interess.

(265)

Fuq il-bażi tal-konklużjonijiet li waslet għalihom il-Kummissjoni fir-rigward tad-dumping, id-dannu, il-kawżalità u l-interess tal-Unjoni, jenħtieġ li jiġu imposti miżuri definittivi sabiex l-industrija tal-Unjoni tkun tista' tirkupra mid-dannu li qiegħed jiġi kkawżat mill-importazzjonijiet li huma l-oġġett ta' dumping.

(266)

Sabiex jiġi ddeterminat il-livell tal-miżuri, il-Kummissjoni l-ewwel stabbiliet l-ammont ta' dazju neċessarju sabiex jiġi eliminat id-dannu mġarrab mill-industrija tal-Unjoni.

(267)

Id-dannu jiġi eliminat kieku l-industrija tal-Unjoni kienet kapaċi tkopri l-kostijiet tal-produzzjoni u tikseb profitt qabel it-taxxa fuq il-bejgħ tal-prodott simili fis-suq tal-Unjoni li jista' jinkiseb raġonevolment f'kundizzjonijiet normali ta' kompetizzjoni minn industrija ta' dan it-tip fis-settur, jiġifieri fin-nuqqas ta' importazzjonijiet oġġett ta' dumping.

(268)

Sabiex jiġi ddeterminat il-profitt fil-mira, il-Kummissjoni kkunsidrat il-profitti magħmula mill-bejgħ mhux relatat li jintużaw sabiex jiġi stabbilit il-livell ta' eliminazzjoni tad-dannu.

(269)

Il-marġni ta' profitt fil-mira ġie provviżorjament stabbilit għal [7-12 %], b'konformità mal-profitti miksuba fl-2012 mill-bejgħ mhux relatat tal-produtturi tal-Unjoni inklużi fil-kampjun. Filwaqt li l-importazzjonijiet Ċiniżi u Tajwaniżi kienu diġà preżenti fis-suq tal-Unjoni, fl-2012 il-prezzijiet tal-importazzjonijiet oġġett ta' dumping kienu għadhom ma naqsux b'mod sostanzjali. Għalhekk, il-Kummissjoni tqis il-profittabilità milħuqa fl-2012 bħala li nkisbet f'kundizzjonijiet normali tas-suq.

(270)

Il-Kummissjoni kkalkolat prezz mhux dannuż tal-prodott simili gћall-industrija tal-Unjoni billi żiedet il-marġni ta' profitt imsemmi hawn fuq ta' [7–12 %] mal-kost tal-produzzjoni tal-produtturi tal-Unjoni inklużi fil-kampjun matul il-perjodu tal-investigazzjoni. Il-kost tal-manifattura rrappurtat minn wieħed mit-tliet produtturi tal-Unjoni kien ikkalkulat mill-ġdid abbażi tal-kostijiet standard (il-kost tal-materja prima flimkien mal-kost tal-konverżjoni u l-kostijiet ta' BĠ&A) billi l-kostijiet attwali ma kinux rappreżentattivi minħabba l-kwantità baxxa ħafna prodotta għal ċerti PCNs mibjugħa fil-PI.

(271)

Il-Kummissjoni ddeterminat il-livell tal-eliminazzjoni tad-dannu fuq il-bażi ta' tqabbil tal-prezz ta' importazzjoni medju ponderat tal-produtturi esportaturi li kkooperaw tal-pajjiżi kkonċernati, aġġustat kif xieraq għall-kostijiet tal-importazzjoni u d-dazji doganali, kif stabbilit għall-kalkoli tat-twaqqigħ tal-prezzijiet, mal-prezz mingħajr dannu medju ponderat tal-prodott simili mibjugħ mill-produtturi inklużi fil-kampjun tal-Unjoni fis-suq tal-Unjoni matul il-perjodu tal-investigazzjoni. Kull differenza li tirriżulta minn dan it-tqabbil ingħatat bħala perċentwal tal-valur CIF medju ponderat tal-importazzjoni.

(272)

B'riżultat ta' dan, il-marġnijiet ta' sottokwotazzjoni jvarjaw minn 75,4 % sa 127,1 %, meta wieħed iqabbel il-prezzijiet CIF Ċiniżi mal-prezzijiet mill-fabbrika tal-industrija tal-Unjoni u minn 104,4 % sa 110,0 % meta wieħed iqabbel il-prezzijiet CIF Tajwaniżi mal-prezzijiet mill-fabbrika tal-industrija tal-Unjoni.

(273)

Wara d-divulgazzjoni definittiva, diversi partijiet talbu kalkolu aktar dettaljat tad-danni. Il-Kummissjoni kienet tal-fehma li l-partijiet interessati kollha kienu diġà rċevew kalkolu dettaljat tad-danni. Hija segwiet il-prattiki standard tagħha li tiddivulga s-sejbiet rilevanti kollha filwaqt li tqis b'mod xieraq il-kunfidenzjalità tad-dejta tas-sors.

(274)

Bosta partijiet iddikjaraw li mhuwiex xieraq li l-prezz mhux dannuż jiġi bbażat fuq il-kost tal-produzzjoni tat-tliet produtturi tal-Unjoni inklużi fil-kampjun peress li ma hemm l-ebda evidenza li turi li l-kost tal-produzzjoni tagħhom hija rappreżentattiva fil-livell tal-industrija kollha tal-Unjoni. Dawn il-partijiet ma spjegawx ir-raġunijiet għalfejn il-Kummissjoni għandha tiddevja mill-prattika normali tagħha tal-użu tal-kost tal-produzzjoni tal-produtturi tal-Unjoni inklużi fil-kampjun f'dan il-każ partikolari. Barra minn hekk, kuntrarju għal din l-allegazzjoni, l-investigazzjoni stabbiliet li l-kostijiet ta' produzzjoni tat-tliet produtturi tal-Unjoni inklużi fil-kampjun huma rappreżentattivi tal-industrija tal-Unjoni. Matul l-investigazzjoni, il-Kummissjoni ma identifikat l-ebda kwistjoni jew problema li indikat li l-kost tal-produzzjoni tal-produtturi tal-Unjoni inklużi fil-kampjun ma kinux rappreżentattivi tal-prodott simili.

(275)

Dawn il-partijiet interessati sostnew ukoll li l-kalkolu tal-marġnijiet ta' sottokwotazzjoni huwa żbaljat billi l-istatistika turi li l-prezz medju ta' wieħed mit-tliet produtturi tal-Unjoni inklużi fil-kampjun huwa sinifikament ogħla mill-oħrajn. Filwaqt li l-Kummissjoni tirrikonoxxi l-fatt li l-prezzijiet ta' wieħed mill-produtturi tal-Unjoni huma ogħla minn tal-oħrajn, hija osservat li l-analiżi tal-prezzijiet fil-livell tal-Kodiċi NM hija qarrieqa peress li ma tqisx it-taħlita tal-prodotti sottostanti u l-fatt li ċerti prodotti ġew esklużi mid-definizzjoni tal-prodott. Barra minn hekk, kif iddikjarat hawn fuq il-kalkolu ta' sottokwotazzjoni sar fuq il-bażi tal-kost ta' produzzjoni skont it-tip ta' prodott. Għalhekk, intuża biss il-kost tal-produzzjoni ta' tipi ta' prodotti li jaqblu.

(276)

Barra minn hekk, anki li kieku l-Kummissjoni kellha tneħħi d-dejta dwar il-kostijiet ta' dan il-produttur tal-Unjoni partikolari u tuża biss id-dejta dwar il-kostijiet tal-produtturi l-oħra tal-Unjoni inklużi fil-kampjun, ir-riżultati jkunu fl-istess sitwazzjoni. Il-marġinijiet ta' sottokwotazzjoni bbażati fuq din il-metodoloġija jvarjaw minn 60 % sa 95 % meta l-prezzijiet CIF Ċiniżi jitqabblu mal-prezzijiet fil-mira mill-fabrika tal-industrija tal-Unjoni. Madankollu din l-affermazzjoni ma għandha l-ebda effett fuq il-miżuri finali. Barra minn hekk dan jimplika t-tqabbil ta' tipi ta' prodotti bbażati fuq materja prima kompletament differenti. Għalhekk din il-pretensjoni ma ntlaqgħetx.

(277)

Bosta partijiet iddikjaraw li l-użu ta' kost standard, minflok kost attwali kien wassal għal distorsjoni tal-prezz fil-mira billi diversi karatteristiċi tal-prodott ma kinux ittieħdu inkunsiderazzjoni. F'dan ir-rigward, il-Kummissjoni osservat li hija kienet injorat il-kost tal-manifattura kif irrappurtat minn wieħed mill-produtturi tal-Unjoni inklużi fil-kampjun minħabba li — kuntrarjament għal dak li sostnew il-partijiet interessati — l-użu tal-kost attwali tal-manifattura kien iwassal għal riżultat żbaljat. Bl-użu ta' metodoloġija tal-kost standardizzat, il-Kummissjoni setgħet teliminata d-distorsjoni kkawżata minn kwantitajiet baxxi mhux rappreżentattivi. Għalhekk, il-Kummissjoni kkonfermat l-adegwatezza tal-metodoloġija użata.

(278)

Diversi partijiet argumentaw li l-metodoloġija użata għall-kalkolu ta' sottokwotazzjoni jenħtieġ li tiġi applikata b'mod ekwilibrat, jiġifieri jenħtieġ li jintuża l-istess raggruppament ta' tipi ta' prodott għall-prodott ikkonċernat u għall-prodott simili. Il-Kummissjoni rrikonoxxiet in-nuqqas tal-metodoloġija użata inizjalment u rrevediet il-kalkolu ta' sottokwotazzjoni kif meħtieġ. Il-Kummissjoni nnutat li din il-bidla affettwat biss lit-tipi ta' prodott li jagħmlu użu minn tubi jew pajpijiet mingħajr saldatura bħala materja prima u affettwat biss lil dawk il-produtturi esportaturi li jużaw il-materja prima msemmija hawn fuq. Għalhekk, il-marġnijiet il-ġodda ta' sottokwotazzjoni jvarjaw minn 75,7 % sa 112,2 % meta l-prezzijiet CIF Ċiniżi, jitqabblu mal-prezzijiet fil-mira mill-fabbrika tal-industrija tal-Unjoni.

(279)

Wara t-tieni divulgazzjoni, bosta partijiet interessati ddikjaraw li ma kienx xieraq li jitqabbel il-prezz tal-produtturi esportaturi mal-prezz fil-mira stabbilit abbażi tal-kwalità ta' materjal tat-tagħmir prodott minn tubi mingħajr saldatura. Barra minn hekk, il-partijiet tennew li l-prezz fil-mira kellu jiġi stabbilit għal kull tip ta' prodott u mhux għal kull kwalità ta' materjal.

(280)

Il-Kummissjoni tiddikjara li hija pprovat twettaq il-kalkolu kif mitlub mill-partijiet interessati, jiġifieri analiżi tal-PCN għal kull PCN. Madankollu, hija sabet li r-riżultati ma kinux affidabbli għal ċerti PCNs minħabba l-kwantitajiet ferm differenti importati lejn l-Unjoni u prodotti mill-produtturi tal-Unjoni. Għalhekk, hija kkonstatat li l-metodoloġija deskritta fil-premessi 270)u (271)kienet iktar xierqa u, b'konsegwenza ta' dan, din il-pretensjoni ma ntlaqgħetx.

(281)

Fin-nuqqas ta' kummenti oħrajn, il-Kummissjoni kkonfermat il-marġnijiet ta' sottokwotazzjoni li jikkonċernaw lit-Tajwan kif iddikjarat fil-premessa 272) hawn fuq.

(282)

Fuq il-bażi ta' dan ta' hawn fuq, ir-rati tad-dazju antidumping definittivi, espressi skont il-prezz CIF fuq il-fruntiera tal-Unjoni, bid-dazju doganali mhux imħallas, għandhom ikunu kif ġej:

(283)

Ir-rati tad-dazju antidumping ta' kumpaniji individwali speċifikati f'dan ir-Regolament ġew stabbiliti abbażi tal-konklużjonijiet ta' din l-investigazzjoni. Għaldaqstant, dawn jirriflettu l-qagħda ta' dawn il-kumpaniji kkonstatata matul din l-investigazzjoni. Dawn ir-rati tad-dazju huma esklussivament applikabbli għall-importazzjonijiet tal-prodott ikkonċernat li joriġina mill-pajjiżi kkonċernati u prodott mill-entitajiet ġuridiċi msemmija. L-importazzjonijiet tal-prodott ikkonċernat immanifatturat minn kwalunkwe kumpanija oħra mhux imsemmija b'mod speċifiku fil-parti operattiva ta' dan ir-Regolament, inklużi entitajiet relatati ma' dawk imsemmijin b'mod speċifiku, jenħtieġ li jkunu suġġetti għar-rata ta' dazju applikabbli għall-“kumpaniji l-oħrajn kollha”. Ma għandhom ikunu suġġetti għal ebda rata ta' dazju antidumping individwali.

(284)

Kumpanija tista' titlob l-applikazzjoni ta' dawn ir-rati tad-dazju antidumping individwali jekk tibdel l-isem tal-entità tagħha jew tistabbilixxi entità ġdida ta' produzzjoni jew ta' bejgħ. It-talba trid tkun indirizzata lill-Kummissjoni. It-talba trid tinkludi l-informazzjoni rilevanti kollha, inklużi: modifika fl-attivitajiet tal-kumpanija marbuta mal-produzzjoni; il-bejgħ domestiku u għall-esportazzjoni assoċjat ma', pereżempju, il-bidla fl-isem jew il-bidla fl-entitajiet ta' produzzjoni u ta' bejgħ. Il-Kummissjoni se taġġorna l-lista ta' kumpaniji b'dazji individwali ta' antidumping, jekk dan ikun iġġustifikat.

(285)

Sabiex ir-riskji ta' ċirkomvenzjoni minħabba differenza fir-rati ta' dazju jinżammu kemm jista' jkun baxxi, huma meħtieġa miżuri speċjali biex tkun żgurata l-applikazzjoni tad-dazji antidumping individwali. Kumpaniji b'dazji antidumping individwali jridu jippreżentaw fattura kummerċjali valida lill-awtoritajiet doganali tal-Istati Membri. Il-fattura trid tkun konformi mar-rekwiżiti stipulati fl-Artikolu 1(3) ta' dan ir-Regolament. L-importazzjonijiet li ma jkunux akkumpanjati minn din il-fattura jkunu soġġetti għad-dazju antidumping applikabbli għall-“kumpaniji l-oħrajn kollha”.

(286)

Biex ikun żgurat infurzar xieraq tad-dazji antidumping, id-dazju antidumping għall-kumpaniji l-oħrajn kollha jenħtieġ li japplika mhux biss għall-produtturi esportaturi li ma kkooperawx f'din l-investigazzjoni, imma anki għall-produtturi li ma esportawx lejn l-Unjoni matul il-perjodu tal-investigazzjoni.

(287)

Fl-interess ta' amministrazzjoni soda, il-Kummissjoni stiednet lill-partijiet interessati biex jippreżentaw kummenti bil-miktub u/jew biex jitolbu seduta mal-Kummissjoni u/jew mal-Uffiċjal tas-Seduta fi proċedimenti kummerċjali fi żmien skadenza stipulata.

(288)

Il-miżuri stipulati f'dan ir-Regolament huma konformi mal-opinjoni tal-Kumitat stabbilit bl-Artikolu 15(1) tar-Regolament (UE) 2016/1036.