(1)

Fil-11 ta' Mejju 2017, il-Konvenzjoni ta' Minamata dwar il-Merkurju (1) (il-“Konvenzjoni”) ġiet approvata, f'isem l-Unjoni Ewropea, permezz tad-Deċiżjoni tal-Kunsill (UE) 2017/939 (2).

(2)

Il-Konvenzjoni ser tidħol fis-seħħ fis-16 ta' Awwissu 2017. L-ewwel laqgħa tal-Konferenza tal-Partijiet għall-Konvenzjoni (il-“KPK 1”) ser issir mill-24 sad-29 ta' Settembru 2017 f'Ġinevra. F'dawn iċ-ċirkostanzi, jenħtieġ li l-Unjoni tiddetermina l-pożizzjoni li għandha tittieħed fil-KPK 1.

(3)

L-Artikolu 3(8) tal-Konvenzjoni jirrikjedi li l-Partijiet li għandhom l-intenzjoni li jimportaw il-merkurju minn pajjiż mhux parti jippermettu tali importazzjoni biss bil-kondizzjoni li jiġu pprovduti b'ċertifikazzjoni mill-pajjiż mhux parti li qed jesporta li l-merkurju importat la jkun ġej minn estrazzjoni primarja tal-merkurju u lanqas minn eċċess ta' merkurju mid-dekummissjonar ta' faċilitajiet ta' kloroalkali (iċ-“ċertifikazzjoni”).

(4)

L-Artikolu 3(12) tal-Konvenzjoni jipprevedi l-adozzjoni tal-kontenut meħtieġ taċ-ċertifikazzjoni mill-KPK 1. Għalhekk tali kontenut meħtieġ taċ-ċertifikazzjoni ser ikollu effetti legali.

(5)

Ir-Regolament (UE) 2017/852 tal-Parlament Ewropew u tal-Kunsill (3) huwa konformi mad-dispożizzjonijiet tal-Artikolu 3(8) tal-Konvenzjoni, kif ikkomplementat mill-kontenut meħtieġ propost taċ-ċertifikazzjoni.

(6)

L-Artikolu 8(4) tal-Konvenzjoni jirrikjedi li l-Partijiet jiżguraw li punti ta' sorsi ġodda li jaqgħu fi ħdan il-kategoriji tas-sorsi elenkati fl-Anness D jużaw l-aqwa tekniki disponibbli u l-aqwa prattiki ambjentali disponibbli biex jikkontrollaw u, fejn ikun possibbli, inaqqsu l-emissjonijiet tal-merkurju u tal-komposti tal-merkurju fl-atmosfera.

(7)

L-Artikolu 8(5) tal-Konvenzjoni jipprevedi li l-partijiet għandhom jikkontrollaw u, fejn ikun possibbli, inaqqsu l-emissjonijiet fl-arja tal-merkurju u tal-komposti tal-merkurju mil-punti ta' sorsi eżistenti li jaqgħu fi ħdan il-kategoriji tas-sorsi elenkati fl-Anness D billi jimplimentaw waħda jew aktar mill-miżuri li ġejjin: l-użu tal-aħjar tekniki disponibbli u l-aħjar prattiki ambjentali; l-istabbiliment ta' miri kwantifikati jew ta' valuri ta' limitu tal-emissjonijiet; l-istabbiliment ta' strateġija ta' kontroll multinkwinanti; jew ta' miżuri alternattivi.

(8)

L-Artikolu 8(7) tal-Konvenzjoni jirrikjedi li l-Partijiet jistabbilixxu u jżommu inventarju tal-emissjonijiet tal-merkurju u tal-komposti tal-merkurju fl-atmosfera.

(9)

L-Artikolu 8(8) tal-Konvenzjoni jistipula li l-KPK 1 għandha tadotta gwida dwar l-aħjar tekniki disponibbli u l-aħjar prattiki ambjentali, filwaqt li tqis kwalunkwe differenza bejn is-sorsi l-ġodda u dawk eżistenti u tqis il-ħtieġa li jiġu mminimizzati l-effetti transmedjali, u għandha ukoll tadotta gwida mmirata li tappoġġa l-Partijiet fl-implimentazzjoni tal-obbligi tagħhom skont l-Artikolu 8(5), b'mod partikolari biex jiddeterminaw il-miri u jistabbilixxu l-valuri ta' limitu tal-emissjonijiet.

(10)

L-Artikolu 8(9) tal-Konvenzjoni jipprevedi l-adozzjoni mill-Konferenza tal-Partijiet għall-Konvenzjoni, malajr kemm jista' jkun, ta' gwida dwar il-kriterji li l-Partijiet jistgħu jiżviluppaw skont l-Artikolu 8(2)(b), meta jagħżlu li japplikaw miżuri ta' kontroll dwar l-emissjonijiet tal-merkurju u tal-komposti tal-merkurju fl-arja biss għall-punti ta' sors li jkunu f'kategorija partikolari ta' sorsi elenkata fl-Anness D, bil-kundizzjoni li mill-inqas 75 fil-mija tal-emissjonijiet tal-kategorija ta' sorsi kkonċernata jkunu koperti, u ta' gwida dwar il-metodoloġija li għandha tintuża għat-tħejjija tal-inventarji tal-emissjonijiet tal-merkurju u tal-komposti tal-merkurju fl-arja.

(11)

It-tieni sentenza tal-Artikolu 8(10) tal-Konvenzjoni tispeċifika li l-Partijiet għandhom jieħdu kont tal-gwida meta jimplimentaw id-dispożizzjonijiet rilevanti ta' dak l-Artikolu. Għalhekk din il-gwida ser ikollha effetti legali.

(12)

Il-Kumitat Intergovernattiv ta' Negozjar tal-Konvenzjoni, fis-seba' sessjoni tiegħu li saret mill-10 sal-15 ta' Marzu 2016 fil-Ġordan, adotta, fuq bażi provviżorja, fl-istennija ta' adozzjoni formali mill-KPK 1, l-erba' dokumenti ta' gwida msemmija fl-Artikolu 8(8) u (9) tal-Konvenzjoni.

(13)

Il-leġislazzjoni tal-Unjoni, inklużi d-Direttiva 2010/75/UE tal-Parlament Ewropew u tal-Kunsill (4) u r-Regolament (KE) Nru 166/2006 tal-Parlament Ewropew u tal-Kunsill (5) hija konformi mad-dispożizzjonijiet tal-Artikolu 8 tal-Konvenzjoni, kif ikkomplementat mill-gwida proposta.

(14)

Għalhekk jenħtieġ li l-kontenut meħtieġ propost taċ-ċertifikazzjoni u l-erba' dokumenti ta' gwida proposti jiġu appoġġati,