|
2.6.2017 |
MT |
Il-Ġurnal Uffiċjali tal-Unjoni Ewropea |
L 142/2 |
DEĊIŻJONI TAL-KUNSILL (UE) 2017/938
tat-23 ta' Settembru 2013
dwar l-iffirmar, f'isem l-Unjoni Ewropea, tal-Konvenzjoni ta' Minamata dwar il-Merkurju
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-Artikolu 192(1) tiegħu, flimkien mal-Artikolu 218(5) tiegħu,
Wara li kkunsidra l-proposta tal-Kummissjoni Ewropea,
Billi:
|
(1) |
Il-merkurju u l-komposti tiegħu huma tossiċi ħafna għas-saħħa tal-bnedmin u dik tal-annimali u tal-pjanti. Fl-Unjoni, il-merkurju u l-komposti tiegħu huma suġġetti għal regolamentazzjoni maħsuba biex jipproteġu s-saħħa tal-bnedmin u l-ambjent. |
|
(2) |
Fl-2009, il-Kunsill Amministrattiv tal-Programm tan-Nazzjonijiet Uniti għall-Ambjent (UNEP) talab lid-Direttur Eżekuttiv tal-UNEP ilaqqa' kumitat intergovernattiv ta' nnegozjar li ngħata l-mandat jipprepara strument globali legalment vinkolanti dwar il-merkurju, bil-għan li jlesti xogħlu qabel ma ssir is-27 sessjoni regolari tal-Kunsill Amministrattiv fl-2013. |
|
(3) |
F'Diċembru 2010, il-Kunsill awtorizza lill-Kummissjoni tipparteċipa, f'isem l-Unjoni, fir-rigward ta' kwistjonijiet li jkunu fl-ambitu tal-Unjoni u li l-Unjoni tkun adottat regoli għalihom, fin-negozjati dwar strument globali legalment vinkolanti dwar il-merkurju, skont id-direttivi ta' nnegozjar stabbiliti fl-Addendum għal dik l-awtorizzazzjoni. |
|
(4) |
Il-proċess ta' nnegozjar tlesta kif suppost, waqt il-ħames sessjoni tal-kumitat intergovernattiv ta' nnegozjar li saret f'Ġinevra bejn it-13 u t-18 ta' Jannar 2013. |
|
(5) |
L-Unjoni kellha rwol importanti fin-negozjati u pparteċipat b'mod attiv għar-riżultat, li huwa fil-limiti tad-direttivi ta' nnegozjar mogħtija lill-Kummissjoni. |
|
(6) |
Il-Kunsill, fit-3233 sessjoni tiegħu, li saret fil-21 ta' Marzu 2013, laqa' tajjeb l-eżitu tal-proċess ta' nnegozjar. |
|
(7) |
L-istrument globali u legalment vinkolanti dwar il-merkurju se jinfetaħ għall-iffirmar waqt Konferenza Diplomatika li għandha ssir f'Kumamoto (fil-Ġappun) bejn is-7 u l-11 ta' Ottubru 2013, li se tissejjaħ il-Konvenzjoni ta' Minamata dwar il-Merkurju. |
|
(8) |
Għalhekk, il-Konvenzjoni ta' Minamata dwar il-Merkurju għandha tiġi ffirmata, |
ADOTTA DIN ID-DEĊIŻJONI:
Artikolu 1
L-iffirmar, f'isem l-Unjoni, tal-Konvenzjoni ta' Minamata dwar il-Merkurju huwa b'dan awtorizzat, soġġett għall-konklużjoni tal-Konvenzjoni msemmija. (1).
Artikolu 2
Il-President tal-Kunsill huwa b'dan awtorizzat jaħtar lill-persuna(i) bis-setgħa li tiffirma/jiffirmaw il-Konvenzjoni f'isem l-Unjoni.
Artikolu 3
Din id-Deċiżjoni għandha tidħol fis-seħħ fil-jum tal-adozzjoni tagħha.
Magħmul fi Brussell, it-23 ta' Settembru 2013.
Għall-Kunsill
Il-President
V. JUKNA
(1) It-test tal-Konvenzjoni ser jiġi ppubblikat flimkien mad-Deċiżjoni dwar il-konklużjoni tagħha.