18.5.2017 |
MT |
Il-Ġurnal Uffiċjali tal-Unjoni Ewropea |
L 127/88 |
DEĊIŻJONI TAL-KUNSILL (UE) 2017/814
tat-12 ta’ Ottubru 2015
dwar il-pożizzjoni li għandha tiġi adottata f’isem l-Unjoni Ewropea fil-Kumitat ta’ Assoċjazzjoni bejn l-UE u ċ-Ċilì rigward is-sostituzzjoni tal-Artikolu 12 tal-Anness III għall-Ftehim li jistabbilixxi assoċjazzjoni bejn il-Komunità Ewropea u l-Istati Membri tagħha, min-naħa l-waħda, u r-Repubblika taċ-Ċilì min-naħa l-oħra
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-ewwel subparagrafu tal-Artikolu 207(4) b’mod konġunt mal-Artikolu 218(9) tiegħu,
Wara li kkunsidra l-proposta mill-Kummissjoni Ewropea,
Billi:
(1) |
Skont l-Artikolu 38 tal-Anness III għall-Ftehim li jistabbilixxi assoċjazzjoni bejn il-Komunità Ewropea u l-Istati Membri tagħha, min-naħa l-waħda, u r-Repubblika taċ-Ċilì, min-naħa l-oħra (1) (“il-Ftehim”), il-Kumitat ta’ Assoċjazzjoni bejn l-UE u ċ-Ċilì (“il-Kumitat ta’ Assoċjazzjoni”) jista’ jiddeċiedi li jemenda d-dispożizzjonijiet ta’ dak l-Anness. |
(2) |
Fl-4 ta’ Novembru 2014, il-Kumitat Speċjali dwar il-Kooperazzjoni Doganali u r-Regoli tal-Oriġini, stabbilit bl-Artikolu 81 tal-Ftehim, qabel li jirrakkomanda lill-Kumitat ta’ Assoċjazzjoni li ssir emenda għall-Artikolu 12, dwar it-trasport dirett, tal-Anness III għall-Ftehim. |
(3) |
Il-vjeġġ tal-kunsinni minn Parti waħda tal-Ftehim għandu jasal direttament għand il-Parti l-oħra iżda, taħt ċerti restrizzjonijiet, jista’ jgħaddi wkoll minn pajjiż terz. Il-kundizzjonijiet għat-trasport minn pajjiż terz għandhom jiġu kkjarifikati b’mod li jippermettu espliċitament il-qsim tal-kunsinni iżda mingħajr ebda tnaqqis tar-restrizzjonijiet eżistenti. |
(4) |
L-emenda tal-Artikolu 12 tal-Anness III għall-Ftehim tipprovdi ċertezza legali għall-importaturi u l-esportaturi, kif ukoll konsistenza fl-interpretazzjoni ta’ dan l-Artikolu għall-Partijiet. |
(5) |
Il-pożizzjoni li għandha tiġi adottata f’isem l-Unjoni fil-Kumitat ta’ Assoċazzjoni għandha tkun ibbażata fuq l-abbozz tad-Deċiżjoni mehmuż, |
ADOTTAT DIN ID-DEĊIŻJONI:
Artikolu 1
1. Il-pożizzjoni li għandha tiġi adottata f’isem l-Unjoni fil-Kumitat ta’ Assoċjazzjoni rigward is-sostituzzjoni tal-Artikolu 12 tal-Anness III għall-Ftehim għandha tkun ibbażata fuq l-abbozz tad-Deċiżjoni tal-Kumitat ta’ Assoċjazzjoni mehmuż ma’ din id-Deċiżjoni.
2. Ir-rappreżentanti tal-Unjoni fil-Kumitat ta’ Assoċjazzjoni jistgħu jaqblu dwar bidliet żgħar fl-abbozz tad-Deċiżjoni tal-Kumitat ta’ Assoċjazzjoni, mingħajr l-ebda deċiżjoni ulterjuri tal-Kunsill.
Artikolu 2
Wara l-adozzjoni tagħha, id-Deċiżjoni tal-Kunsill ta’ Assoċjazzjoni għandha tiġi ppubblikata f’Il-Ġurnal Uffiċjali tal-Unjoni Ewropea.
Artikolu 3
Din id-Deċiżjoni tidħol fis-seħħ fid-data tal-adozzjoni tagħha.
Magħmul fil-Lussemburgu, it-12 ta’ Ottubru 2015.
Għall-Kunsill
Il-President
F. MOGHERINI
(1) ĠU L 352, 30.12.2002, p. 3 (Edizzjoni Speċjali bil-Malti: Kapitolu 11 Volum 053 p. 3).
ABBOZZ
DEĊIŻJONI NRU …TAL-KUMITAT TA’ ASSOĊJAZZJONI BEJN L-UE U Ċ-ĊILÌ
ta’
li tissostitwixxi l-Artikolu 12 tat-Titolu III tal-Anness III għall-Ftehim li jistabbilixxi assoċjazzjoni bejn il-Komunità Ewropea u l-Istati Membri tagħha, min-naħa l-waħda, u r-Repubblika taċ-Ċilì, min-naħa l-oħra
IL-KUMITAT TA’ ASSOĊJAZZJONI BEJN L-UE U Ċ-ĊILÌ,
Wara li kkunsidra l-Ftehim li jistabbilixxi assoċjazzjoni bejn il-Komunità Ewropea u l-Istati Membri tagħha, min-naħa l-waħda, u r-Repubblika taċ-Ċilì, min-naħa l-oħra (1), u b’mod partikolari l-Artikolu 38 tal-Anness III għalih;
Billi:
(1) |
L-Artikolu 12 tat-Titolu III tal-Anness III għall-Ftehim li jistabbilixxi assoċjazzjoni bejn il-Komunità Ewropea u l-Istati Membri tagħha, min-naħa l-waħda, u r-Repubblika taċ-Ċilì, min-naħa l-oħra (“il-Ftehim”) jistabbilixxi li t-trattament preferenzjali japplika biss għall-prodotti li jissodisfaw ir-rekwiżiti tal-Anness III li huma ttrasportati direttament bejn ir-Repubblika taċ-Ċilì (“Ċilì”) u l-Unjoni Ewropea. |
(2) |
Iċ-Ċilì u l-Unjoni Ewropea kkonkludew diversi ftehimiet b’kontenut kummerċjali mid-dħul fis-seħħ tal-Ftehim, li taw il-possibbiltà lill-operaturi ekonomiċi li jadattaw l-istrateġija ta’ esportazzjoni tagħhom biex jiffrankaw l-ispejjeż u jwieġbu aħjar għad-domanda tas-suq. |
(3) |
Iċ-Ċilì u l-Unjoni Ewropea ftiehmu li jemendaw l-Artikolu 12 tat-Titolu III tal-Anness III għall-Ftehim sabiex l-operaturi ekonomiċi jkollhom aktar flessibbiltà, |
ADOTTAT DIN ID-DEĊIŻJONI:
Artikolu 1
L-Atikolu 12 tat-Titolu III tal-Anness III għall-Ftehim, dwar it-trasport dirett, huwa sostitwit bit-test li jidher fl-Anness għal din id-Deċiżjoni.
Artikolu 2
Din id-Deċiżjoni għandha tidħol fis-seħħ 90 jum wara l-jum li fih tkun saret l-aħħar notifika li permezz tagħha l-partijiet jikkomunikaw it-tlestija tal-proċeduri legali domestiċi meħtieġa.
Magħmul fi…
Għall-Kumitat ta’ Assoċjazzjoni bejn l-UE u ċ-Ċilì
Il-President
(1) ĠU L 352, 30.12.2002, p. 3 (Edizzjoni Speċjali bil-Malti: Kapitolu 11 Volum 053 p. 3).
ANNESS
“Artikolu 12
Trasport dirett
1. It-trattament preferenzjali previst taħt dan il-Ftehim japplika biss għall-prodotti li jissodisfaw ir-rekwiżiti ta’ dan l-Anness, li huma trasportati direttament bejn l-Unjoni Ewropea u ċ-Ċilì. Madankollu, il-prodotti jistgħu jiġu trasportati minn territorji oħra bi trasbord jew ħażna temporanja f’dawn it-territorji, sakemm jibqgħu taħt is-sorveljanza tal-awtoritajiet doganali fil-pajjiż ta’ tranżitu jew ta’ ħżin, u ma jsirux operazzjonijiet fuqhom għajr iż-żieda jew it-twaħħil ta’ marki, tikketti jew siġilli; ħatt l-art; tagħbija mill-ġdid; qsim ta’ kunsinni; jew kwalunkwe operazzjoni maħsuba biex il-prodotti jibqgħu f’kundizzjoni tajba.
2. Għandu jitqies li jkun hemm konformità mal-paragrafu 1 sakemm l-awtoritajiet doganali ma jkollhomx xi raġuni biex jemmnu mod ieħor. F’każijiet bħal dawn, l-awtoritajiet doganali jistgħu jirrikjedu lill-importatur biex jipprovdi evidenza tal-konformità, li għandha tingħata bi kwalunkwe mezz adatt, inklużi dokumenti kuntrattwali tat-trasport, pereżempju poloz tal-kargu, jew evidenza fattwali jew konkreta bbażata fuq l-immarkar jew in-numerazzjoni tal-pakketti, jew kwalunkwe evidenza relatata mal-prodotti nfushom.”