|
29.3.2017 |
MT |
Il-Ġurnal Uffiċjali tal-Unjoni Ewropea |
L 82/4 |
DEĊIŻJONI TAL-KUNSILL (UE) 2017/601
tas-6 ta' Marzu 2017
dwar il-pożizzjoni li għandha tittieħed f'isem l-Unjoni Ewropea fil-Kunsill ta' Assoċjazzjoni stabbilit mill-Ftehim Ewro-Mediterranju li jistabbilixxi assoċjazzjoni bejn il-Komunità Ewropea u l-Istati Membri tagħha, minn naħa, u r-Repubblika Demokratika tal-Poplu tal-Alġerija, min-naħa l-oħra, fir-rigward tal-adozzjoni tal-Prijoritajiet tas-Sħubija bejn l-UE u l-Alġerija
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u partikolarment l-Artikolu 217, flimkien mal-Artikolu 218(9) tiegħu,
Wara li kkunsidra l-proposta konġunta tal-Kummissjoni Ewropea u tar-Rappreżentant Għoli tal-Unjoni għall-Affarijiet Barranin u l-Politika ta' Sigurtà,
Billi:
|
(1) |
Il-Ftehim Ewro-Mediterranju li jistabbilixxi assoċjazzjoni bejn il-Komunità Ewropea u l-Istati Membri tagħha, minn naħa, u r-Repubblika Demokratika tal-Poplu tal-Alġerija, min-naħa l-oħra (1) (“il-Ftehim”), ġie ffirmat fit-22 ta' April 2002 u daħal fis-seħħ fl-1 ta' Settembru 2005. |
|
(2) |
Il-Komunikazzjoni Konġunta tar-Rappreżentant Għoli tal-Unjoni għall-Affarijiet Barranin u l-Politika ta' Sigurtà u tal-Kummissjoni Ewropea tat-18 ta' Novembru 2015 dwar ir-Rieżami tal-Politika Ewropea tal-Viċinat intlaqgħet tajjeb fil-Konklużjonijiet tal-Kunsill tal-14 ta' Diċembru 2015; fejn il-Kunsill ikkonferma, b'mod partikolari, l-intenzjoni tiegħu li jibda fażi ġdida ta' djalogu mal-pajjiżi sħab fl-2016 li tista' twassal għad-definizzjoni ta' prijoritajiet ġodda ta' sħubija, fejn xieraq, iffukati fuq prijoritajiet u interessi maqbula konġuntament. |
|
(3) |
Jenħtieġ li l-Unjoni u l-Alġerija jikkooperaw sabiex jilħqu l-objettiv kondiviż tagħhom ta' spazju komuni ta' paċi, stabbiltà u prosperità, b'mod partikolari fir-rigward tal-kondiviżijoni tar-responsabbiltajiet u d-differenzjazzjoni, kif ukoll li jikkunsidraw ir-rwol ċentrali li l-Alġerija għandha fir-reġjun. |
|
(4) |
Filwaqt li jindirizzaw l-aktar sfidi urġenti, l-Unjoni u l-Alġerija qed ikomplu jsegwu l-objettivi prinċipali tas-sħubija tagħhom fuq terminu twil, u jaħdmu sabiex ikun hemm stabbiltà fil-pajjiż u fir-reġjun, kif ukoll jifavorixxu t-tkabbir ekonomiku u permezz ta' istituzzjonijiet tal-Istat solidi u d-diversifikazzjoni u l-kompetittività tal-ekonomija tal-Alġerija. |
|
(5) |
Jenħtieġ li l-pożizzjoni tal-Unjoni fil-Kunsill ta' Assoċjazzjoni stabbilit mill-Ftehim tkun ibbażata fuq l-abbozz ta' Deċiżjoni mehmuż, |
ADOTTA DIN ID-DEĊIŻJONI:
Artikolu 1
Il-pożizzjoni li għandha tittieħed f'isem l-Unjoni Ewropea fil-Kunsill ta' Assoċjazzjoni stabbilit mill-Ftehim Ewro-Mediterranju li jistabbilixxi assoċjazzjoni bejn il-Komunità Ewropea u l-Istati Membri tagħha, minn naħa, u r-Repubblika Demokratika tal-Poplu tal-Alġerija min-naħa l-oħra, fir-rigward tal-adozzjoni tal-Prijoritajiet tas-Sħubija bejn l-UE u l-Alġerija, għandha tkun ibbażata fuq fuq l-abbozz ta' deċiżjoni tal-Kunsill ta' Assoċjazzjoni UE-Alġerija anness ma' din id-Deċiżjoni.
Artikolu 2
Din id-Deċiżjoni għandha tidħol fis-seħħ fil-jum tal-adozzjoni tagħha.
Magħmul fi Brussell, is-6 ta' Marzu 2017.
Għall-Kunsill
Il-President
F. MOGHERINI
ABBOZZ TA'
DEĊIŻJONI Nru 1/2017 TAL-KUNSILL TA' ASSOĊJAZZJONI UE-ALĠERIJA
ta' …
dwar il-qbil rigward il-Prijoritajiet tas-Sħubija bejn l-UE u l-Alġerija
IL-KUNSILL TA' ASSOĊJAZZJONI UE-ALĠERIJA,
Filwaqt li jikkunsidra l-Ftehim Ewro-Mediterranju li jistabbilixxi assoċjazzjoni bejn il-Komunità Ewropea u l-Istati Membri tagħha, min-naħa l-waħda, u r-Repubblika Demokratika tal-Poplu tal-Alġerija, min-naħa l-oħra,
Billi
|
(1) |
Il-Ftehim Ewro-Mediterranju li jistabbilixxi assoċjazzjoni bejn il-Komunità Ewropea u l-Istati Membri tagħha, minn naħa l-waħda, u r-Repubblika Demokratika tal-Poplu tal-Alġerija, min-naħa l-oħra (1) (“il-Ftehim”), ġie ffirmat fit-22 ta' April 2002 u daħal fis-seħħ fl-1 ta' Settembru 2005. |
|
(2) |
L-Artikolu 94 tal-Ftehim jagħti s-setgħa lill-Kunsill ta' Assoċjazzjoni li jieħu d-deċiżjonijiet xierqa, għall-finijiet li jintlaħqu l-objettivi tal-Ftehim. |
|
(3) |
Skont l-Artikolu 104 tal-Ftehim, il-partijiet għandhom jieħdu kull miżura ġenerali jew speċifika meħtieġa biex jissodisfaw l-obbligi tagħhom skont il-Ftehim u għandhom jagħmlu ħilithom biex jilħqu l-objettivi tagħhom. |
|
(4) |
Fil-kuntest tar-rieżami tal-Politika Ewropea tal-Viċinat fl-2016 ġiet propota fażi ġdida ta' djalogu mas-sħab, li jikkontribwixxi għal sens aktar qawwi ta' sjieda miż-żewġ naħat. |
|
(5) |
L-UE u l-Alġerija qablu li jikkonsolidaw is-sħubija tagħhom billi japprovaw sett ta' prijoritajiet għall-perjodu 2017-2020 bl-għan li jappoġġjaw u jsaħħu r-reżiljenza u l-istabbiltà tal-Alġerija. |
|
(6) |
Il-partijiet għall-Ftehim adottaw it-test tal-Prijoritajiet tas-Sħubija bejn l-UE-Alġerija, bl-objettiv li jappoġġaw l-implimentazzjoni tal-Ftehim, b'enfasi fuq il-kooperazzjoni fir-rigward ta' interessi identifikati u kondiviżi bejn is-sħab li tingħatalhom prijorità, |
ADOTTA DIN ID-DEĊIŻJONI:
Artikolu 1
Il-Kunsill ta' Assoċjazzjoni jirrakkomanda li l-partijiet jimplimentaw il-Prijoritajiet tas-Sħubija bejn l-UE u l-Alġerija kif indikati fl-Anness għal din id-Deċiżjoni.
Artikolu 2
Din id-Deċiżjoni għandha tidħol fis-seħħ fil-jum tal-adozzjoni tagħha.
Magħmul fi …,
Għall-Kunsill ta' Assoċjazzjoni UE-Alġerija
Il-President
ANNESS
Prijoritajiet tas-Sħubija bejn l-UE u l-Alġerija