|
21.3.2017 |
MT |
Il-Ġurnal Uffiċjali tal-Unjoni Ewropea |
L 75/32 |
DEĊIŻJONI TA' IMPLIMENTAZZJONI TAL-KUMMISSJONI (UE) 2017/487
tas-17 ta' Marzu 2017
li temenda d-Deċiżjoni 2005/51/KE fir-rigward tal-perjodu li fih il-ħamrija li hija kkontaminata mill-pestiċidi jew minn sustanzi organiċi persistenti li jniġġsu, tista' tiġi introdotta fl-Unjoni għall-għanijiet ta' dekontaminazzjoni
(notifikata bid-dokument C(2017) 1693)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Direttiva tal-Kunsill 2000/29/KE tat-8 ta' Mejju 2000 dwar il-miżuri protettivi kontra l-introduzzjoni ġewwa l-Komunità ta' organiżmi ta' ħsara għall-prodotti tal-pjanti u kontra t-tixrid tagħhom ġewwa l-Komunità (1), u b'mod partikolari l-ewwel subparagrafu tal-Artikolu 15(1) tagħha,
Billi:
|
(1) |
Skont l-Artikolu 4(1) tad-Direttiva 2000/29/KE, flimkien mal-punt 14 tal-Parti A tal-Anness III ta' dik id-Direttiva, l-introduzzjoni fl-Unjoni ta' ħamrija li toriġina f'ċertu pajjiżi terzi hija pprojbita. |
|
(2) |
Bid-Deċiżjoni tal-Kummissjoni 2005/51/KE (2) l-Istati Membri kienu temporanjament awtorizzati li jipprevedu deroga minn dawk id-dispożizzjonijiet, soġġett għal kundizzjonijiet speċifiċi, fir-rigward ta' ħamrija kkontaminata mill-pestiċidi jew sustanzi organiċi persistenti li jniġġsu, meta tkun importata għal finijiet ta' dekontaminazzjoni u destinata għat-trattament f'inċineraturi magħmulin apposta għal skart perikoluż. |
|
(3) |
Xi Stati Membri talbu estensjoni tal-awtorizzazzjoni biex jipprevedu dik id-deroga. F'dan ir-rigward, mill-provi ppreżentati mill-Istati Membri skont id-Deċiżjoni 2005/51/KE, jidher li, meta jsir użu minn dik id-deroga, il-kundizzjonijiet speċifiċi stipulati f'din id-Deċiżjoni huma suffiċjenti biex jimpedixxu l-introduzzjoni ta' organiżmi perikolużi fl-Unjoni u kien hemm konformità magħhom. Konsegwentement, ma hemmx riskju fitosanitarju mill-attività koperta mid-Deċiżjoni 2005/51/KE. |
|
(4) |
Huwa għalhekk xieraq li d-deroga tiġi estiża sal-31 ta' Diċembru 2019. |
|
(5) |
Għalhekk, id-Deċiżjoni 2005/51/KE għandha tiġi emendata kif xieraq. |
|
(6) |
Il-miżuri previsti f'din id-Deċiżjoni huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf, |
ADOTTAT DIN ID-DEĊIŻJONI:
Artikolu 1
Fit-tieni paragrafu tal-Artikolu 1 tad-Deċiżjoni 2005/51/KE, id-data “it-28 ta' Frar 2017” tinbidel bid-data “il-31 ta' Diċembru 2019”.
Artikolu 2
Din id-Deċiżjoni hija indirizzata lill-Istati Membri.
Magħmul fi Brussell, is-17 ta' Marzu 2017.
Għall-Kummissjoni
Vytenis ANDRIUKAITIS
Membru tal-Kummissjoni
(1) ĠU L 169, 10.7.2000, p. 1.
(2) Id-Deċizjoni tal-Kummissjoni 2005/51/KE tal-21 ta' Jannar 2005 li tawtorizza lill-Istati Membri biex jipprovdu temporanjament għal derogi minn ċertu dispożizzjonijiet tad-Direttiva tal-Kunsill 2000/29/KE fir-rigward tal-importazzjoni tal-ħamrija kkontaminata mill-pestiċidi jew sustanzi organiċi persistenti li jniġġsu għall-għanijiet ta' dekontaminazzjoni (ĠU L 21, 25.1.2005, p. 21).