REGOLAMENT TA' IMPLIMENTAZZJONI TAL-KUMMISSJONI (UE) 2016/2222

tal-5 ta' Diċembru 2016

li jemenda l-Anness I tar-Regolament tal-Kunsill (KEE) Nru 2658/87 dwar in-nomenklatura tat-tariffa u l-istatistika u dwar it-Tariffa Doganali Komuni

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament tal-Kunsill (KEE) Nru 2658/87 tat-23 ta' Lulju 1987 dwar in-nomenklatura tat-tariffa u l-istatistika u dwar it-Tariffa Doganali Komuni (1), u b'mod partikolari l-Artikolu 9(1)(e) tiegħu,

Billi:

(1)	Ir-Regolament (KEE) Nru 2658/87 stabbilixxa nomenklatura tal-oġġetti (minn hawn 'il quddiem imsejħa bħala n-“Nomenklatura Magħquda”), li hija stabbilita fl-Anness I ta' dak ir-Regolament.

(2)	Is-subintestatura 9505 10 tan-Nomenklatura Magħquda tkopri oġġetti għall-festi tal-Milied.

(3)

Fin-Noti ta' Spjegazzjoni tas-Sistema Armonizzata (HSEN) għall-intestatura 9505 (a) (1) u (2) tingħata xi gwida dwar l-interpretazzjoni tat-terminu “oġġetti għall-festi tal-Milied”. Madankollu, għad hemm fehmiet diverġenti dwar il-kamp ta' applikazzjoni tal-oġġetti li jaqgħu taħt is-subintestatura 9505 10.

(4)

Għal aktar ċertezza legali, il-kamp ta' applikazzjoni tas-subintestatura 9505 10 għandu għalhekk jiġi ċċarat billi ssir distinzjoni bejn l-oġġetti tradizzjonali li jintużaw għall-festi tal-Milied imsemmija fl-HSEN għall-intestatura 9505, il-punti (A)(1) u (2), u l-oġġetti tal-moda li jintużaw b'mod aktar ġenerali bħala tiżjin matul l-istaġun tax-xitwa.

(5)	Huwa għalhekk meħtieġ li tiddaħħal nota addizzjonali fil-Kapitolu 95 tan-Nomenklatura Magħquda biex tiġi żgurata l-interpretazzjoni uniformi tas-subintestatura 9505 10 fl-Unjoni kollha.

(6)	Għalhekk l-Anness I tar-Regolament (KEE) Nru 2658/87 għandu jiġi emendat skont dan.

(7)	Il-miżuri previsti f'dan ir-Regolament huma skont l-opinjoni tal-Kumitat tal-Kodiċi Doganali,

ADOTTAT DAN IR-REGOLAMENT:

Artikolu 1

Fil-Kapitolu 95 tat-Tieni Parti tan-Nomenklatura Magħquda stabbilita fl-Anness I tar-Regolament (KEE) Nru 2658/87, tiddaħħal in-nota addizzjonali 1 li ġejja:

“1.

Is-subintestatura 9505 10 tkopri:

(a)

oġġetti li huma ġeneralment rikonoxxuti bħala oġġetti li jintużaw tradizzjonalment u esklussivament fil-festi tal-Milied u li jkunu manifatturati u maħsubin bħala oġġetti għall-festi tal-Milied.

Dawn huma:

(1)	oġġetti assoċjati man-natività (jiġifieri oġġetti għall-presepju tradizzjonali), bħalma huma l-pasturi tax-xena tat-twelid ta' Ġesu Kristu, l-annimali tax-xena tat-twelid, l-istilel ta' Betlem, it-tliet slaten maġi u xeni tat-twelid;

(2)

oġġetti li huma rikonoxxuti li jintużaw fil-festi tal-Milied minħabba tradizzjonijiet nazzjonali antiki, bħal:

—	siġar artifiċjali tal-Milied,

—	kalzetti tal-Milied,

—	zkuk tal-Milied imitazzjoni,

—	crackers tal-Milied,

—	Father Christmases bl-islitta jew mingħajrha,

—	anġli tal-Milied.

Din is-subintestatura ma tkoprix oġġetti tal-istaġun tax-xitwa li jkunu tajbin għal użu aktar ġenerali bħala tiżjin matul dan l-istaġun, minħabba li l-karatteristiċi oġġettivi tagħhom jissuġġerixxu li ma jintużawx esklussivament għall-festi tal-Milied iżda prinċipalment bħala tiżjin matul l-istaġun tax-xitwa, bħal imrieżaq tas-silġ (icicles), kristalli tal-borra, stilel, renni, pitirrossi, snowmen, u immaġni oħra tal-istaġun tax-xitwa, kemm jekk il-kuluri jew l-ilbies eċċ. jissuġġerixxu xi konnessjoni mal-Milied kif ukoll jekk le.

(b)	l-oġġetti ta' tiżjin għas-siġar tal-Milied. Dawn huma oġġetti maħsubin biex jiddendlu fuq is-siġra tal-Milied (jiġifieri oġġetti ħfief li ġeneralment ikunu magħmulin minn materjal li ma jdumx iservi maħsubin għat-tiżjin tas-siġra tal-Milied). L-oġġetti għandu jkollhom konnessjoni mal-Milied.”

Artikolu 2

Dan ir-Regolament jidħol fis-seħħ fl-għoxrin jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, il-5 ta' Diċembru 2016.

Għall-Kummissjoni

Stephen QUEST

Direttur Ġenerali

Direttorat Ġenerali għat-Tassazzjoni u l-Unjoni Doganali

(1) ĠU L 256, 7.9.1987, p. 1.