1.   Persuna bi drittijiet ta' proprjetà fuq parametru referenzjarju għandha, fuq talba, tqiegħed għad-dispożizzjoni tal-kontropartijiet ċentrali (CCPs) u ċ-ċentri tan-negozjar l-informazzjoni li hi neċessarja għalihom sabiex iwettqu l-funzjonijiet tagħhom ta' kklerjar jew ta' negozjar, kif xieraq skont it-tip speċifiku ta' parametru referenzjarju li jintalab aċċess għalih kif ukoll skont l-istrument finanzjarju rilevanti li għandu jiġi kkummerċjalizzat jew ikklerjat.

2.   CCP jew ċentru tan-negozjar għandu fit-talba tiegħu jispjega għaliex din l-informazzjoni tkun meħtieġa għall-finijiet ta' kklerjar jew negozjar.

3.   Għall-finijiet tal-paragrafu 1, il-funzjonijiet rilevanti ta' negozjar u ta' kklerjar għandhom mill-inqas jinkludu dan li ġej:

(a)

għal ċentru tan-negozjar: (i) il-valutazzjoni inizjali tal-karatteristiċi tal-parametru referenzjarju; (ii) il-kummerċjalizzazzjoni tal-prodott rilevanti; (iii) l-appoġġ tal-proċess ta' formazzjoni tal-prezzijiet għall-kuntratti ammessi jew li qed jiġu ammessi għan-negozjar; (iv) l-attivitajiet kontinwi ta' sorveljanza tas-suq;

(b)	għal CCP: (i) ġestjoni xierqa tar-riskju ta' pożizzjonijiet miftuħin rilevanti f'derivattivi nnegozjati fil-boroż, inkluża t-tpaċija; (ii) konformità mal-obbligi rilevanti stipulati fir-Regolament (UE) Nru 648/2012 tal-Parlament Ewropew u tal-Kunsill (3).

4.   Informazzjoni rilevanti fir-rigward tal-flussi tal-prezzijiet u tad-dejta msemmija fl-Artikolu 37(1)(a) tar-Regolament (UE) Nru 600/2014 għandha tinkludi mill-inqas:

(a)	fluss tal-valuri tal-parametru referenzjarju;

(b)	in-notifika fil-pront ta' kull ineżattezza fil-kalkolu tal-valuri tal-parametru referenzjarju u tal-valuri korretti u aġġornati tal-parametru referenzjarju;

(c)	il-valuri storiċi tal-parametru referenzjarju meta l-persuna bi drittijiet ta' proprjetà fuq il-parametru referenzjarju jkollha din l-informazzjoni.

5.   Rigward il-kompożizzjoni, il-metodoloġija u l-ipprezzar, l-informazzjoni pprovduta għandha tippermetti lis-CCPs u liċ-ċentri tan-negozjar sabiex jifhmu kif jinħoloq il-valur ta' kull parametru referenzjarju, u l-metodoloġija reali użata biex jiġu kkalkulati l-valuri tal-parametri referenzjarji. Informazzjoni rilevanti rigward il-kompożizzjoni, il-metodoloġija u l-ipprezzar għandha mill-inqas tinkludi:

(a)	id-definizzjonijiet tat-termini ewlenin kollha użati fir-rigward tal-parametru referenzjarju;

(b)	għaliex ġiet adottata l-metodoloġija u l-proċeduri għar-rieżami u l-approvazzjoni tagħha;

(c)

il-kriterji u l-proċeduri użati għad-determinazzjoni tal-parametru referenzjarju, inkluża deskrizzjoni tad-dejta tal-input, il-prijorità mogħtija għal tipi differenti ta' dejta tal-input, l-użu ta' kull mudell jew metodu ta' estrapolazzjoni u kull proċedura għal tibdil fil-bilanċ tal-komponenti tal-parametru referenzjarju;

(d)	il-kontrolli u r-regoli li jirregolaw kull eżerċizzju ta' diskrezzjoni jew ġudizzju sabiex tiġi żgurata l-konsistenza fl-użu ta' dawn id-diskrezjoni jew ġudizzju;

(e)	il-proċeduri li jirregolaw id-determinazzjoni tal-parametru referenzjarju f'perjodi ta' stress, jew f'perjodi meta s-sorsi tad-dejta tat-tranżazzjonijiet jistgħu jkunu insuffiċjenti, mhux preċiżi jew mhux kredibbli u l-limitazzjonijiet potenzjali tal-parametru referenzjarju f'perjodi bħal dawn;

(f)	is-sigħat li matulhom il-parametru referenzjarju jiġi kkalkulat;

(g)	il-proċeduri li jirregolaw il-metodoloġija ta' tibdil fil-bilanċ tal-parametru referenzjarju u l-piżijiet li jirriżultaw tal-komponenti tal-parametru referenzjarju;

(h)	il-proċeduri biex jiġu indirizzati żbalji fid-dejta tal-input, jew fid-determinazzjoni tal-parametru referenzjarju, inkluż meta tista' tkun meħtieġa determinazzjoni mill-ġdid tal-parametru referenzjarju;

(i)	informazzjoni dwar il-frekwenza ta' kull rieżami u approvazzjoni interni tal-kompożizzjoni u l-metodoloġija u, fejn applikabbli, informazzjoni dwar il-proċeduri u l-frekwenza ta' rieżami estern tal-kompożizzjoni u l-metodoloġija.

1.   Persuna bi drittijiet ta' proprjetà fuq parametru referenzjarju għandha tagħmel disponibbli l-informazzjoni rilevanti kollha msemmija fl-Artikolu 1 mitluba mis-CCPs u ċ-ċentri tan-negozjar permezz tal-liċenzjar mingħajr dewmien żejjed, jew fuq bażi ta' darba, inklużi emendi għal informazzjoni mogħtija qabel, jew fuq bażi kontinwa jew perjodika, skont it-tip ta' informazzjoni kkonċernata.

2.   Persuna bi drittijiet ta' proprjetà fuq parametru referenzjarju għandha tipprovdi l-informazzjoni rilevanti kollha msemmija fl-Artikolu 1 lis-CCPs u liċ-ċentri ta' negozjar kollha permezz ta' liċenzjar fuq l-istess skali taż-żmien u bl-istess kundizzjonijiet, sakemm ma jkunux jistgħu jiġu ġġustifikati b'mod oġġettiv kundizzjonijiet differenti.

3.   Ir-rekwiżiti fil-paragrafi 1 u 2 ma japplikawx jekk u sakemm persuna bi drittijiet ta' proprjetà fuq parametru referenzjarju tkun tista' turi li ċerta informazzjoni hija disponibbli pubblikament jew b'mezzi oħra kummerċjali għas-CCPs u ċ-ċentri tan-negozjar, jekk tali informazzjoni tkun affidabbli u f'waqtha.

1.   Meta persuna bi drittijiet ta' proprjetà fuq parametru referenzjarju tistabbilixxi, skont l-Artikolu 37(1) tar-Regolament (UE) Nru 600/2014, kundizzjonijiet differenti, inklużi t-tariffi u l-kundizzjonijiet tal-ħlas tagħhom, dawk il-kundizzjonijiet għandhom japplikaw b'mod speċifiku għal kull kategorija tad-detenturi tal-liċenzji.

2.   Persuna bi drittijiet ta' proprjetà fuq parametru referenzjarju għandha tistabbilixxi l-istess drittijiet u obbligi għad-detenturi tal-liċenzji fl-istess kategorija.

3.   Persuna bi drittijiet ta' proprjetà fuq parametru referenzjarju għandha tagħmel il-kriterji li jiddefinixxu l-kategoriji differenti ta' detenturi tal-liċenzja disponibbli pubblikament.

4.   Persuna bi drittijiet ta' proprjetà fuq parametru referenzjarju għandha, fuq talba, tipprovdi b'xejn lil kull CCP jew ċentru tan-negozjar il-kundizzjonijiet li japplikaw għall-kategorija li għaliha jappartjenu din is-CCP jew ċentru tan-negozjar.

5.   Persuna bi drittijiet ta' proprjetà fuq parametru referenzjarju għandha tqiegħed għad-dispożizzjoni tad-detenturi kollha tal-liċenzja fl-istess kategorija kull żieda jew modifika tal-kundizzjonijiet għal ftehimiet ta' liċenzjar maqbula ma' detentur tal-liċenzja, f'dik il-kategorija bl-istess kundizzjonijiet.

1.   Persuna bi drittijiet ta' proprjetà fuq parametru referenzjarju għandha tistabbilixxi l-kundizzjonijiet għal ftehimiet ta' liċenzjar u tagħmilhom disponibbli għas-CCPs u ċ-ċentri tan-negozjar fuq talba mingħajr ħlas. L-applikazzjoni għandha tinkludi dan li ġej:

(a)	l-ambitu tal-użu u l-kontenut tal-informazzjoni għal kull użu skont il-ftehimiet ta' liċenzjar, fejn tiġi identifikata b'mod ċar f'kull każ l-informazzjoni kunfidenzjali;

(b)	il-kundizzjonijiet għar-ridistribuzzjoni, jekk tkun permessa, ta' informazzjoni minn CCPs u ċentri tan-negozjar;

(c)	ir-rekwiżiti tekniċi għall-forniment tas-servizz;

(d)	it-tariffi u l-kundizzjonijiet għall-ħlas tagħhom;

(e)	il-kundizzjonijiet biex il-ftehim jiskadi fejn jitqies it-tul tal-ħajja tal-istrumenti finanzjarji li jirreferenzjaw il-parametru referenzjarju;

(f)

iċ-ċirkostanzi ta' kontinġenza u l-miżuri rilevanti li jirregolaw it-tkomplija, il-perjodi ta' tranżizzjoni u l-interruzzjoni tas-servizz matul perjodu ta' kontinġenza, li: (i) jippermettu terminazzjoni b'mod ordnat; (ii) jiżguraw li t-terminazzjoni ma tirriżultax minn ksur minuri tal-kuntratt u li l-parti rilevanti tingħata żmien raġonevoli biex tirrimedja kull ksur li ma jwassalx għal terminazzjoni immedjata;

(g)	il-liġi applikabbli u l-allokazzjoni tar-responsabbiltajiet.

2.   Il-ftehim ta' liċenzjar għandu jirrikjedi lis-CCPs, liċ-ċentri tan-negozjar u lill-persuni bi drittijiet ta' proprjetà fuq parametru referenzjarju sabiex jistabbilixxu politiki, proċeduri u sistemi adegwati sabiex jiżguraw dan li ġej:

(a)	implimentazzjoni tas-servizz mingħajr dewmien żejjed skont skeda miftiehma minn qabel;

(b)	aġġornar tal-informazzjoni kollha pprovduta mill-partijiet tul il-perjodu tal-arranġament tal-aċċess, inkluża informazzjoni li jista' jkollha impatt fuq ir-reputazzjoni;

(c)	kanal ta' komunikazzjoni bejn il-partijiet li jkun tempestiv, affidabbli u sikur matul il-ħajja tal-kuntratt tal-liċenzja;

(d)

konsultazzjoni fejn xi bidla fl-operazzjonijiet ta' xi waħda mill-entitajiet x'aktarx ikollha impatt materjali fuq il-ftehim ta' liċenzjar jew fuq ir-riskji li l-entità l-oħra tkun esposta għalihom u notifika fi żmien perjodu raġonevoli ta' avviż qabel l-implimentazzjoni ta' kull bidla għall-operazzjoni ta' xi waħda mill-entitajiet;

(e)	il-forniment tal-informazzjoni u l-istruzzjonijiet rilevanti biex din tiġi trażmessa u użata permezz tal-mezzi tekniċi miftiehma;

(f)	l-għoti ta' informazzjoni aġġornata lil persuni bi drittijiet ta' proprjetà fuq parametru referenzjarju dwar ir-ridistribuzzjoni, jekk tkun permessa, ta' informazzjoni lill-membri tal-ikklerjar ta' CCPs u lill-membri jew il-parteċipanti ta' ċentri tan-negozjar;

(g)	is-soluzzjoni tat-tilwim u t-terminazzjoni tal-ftehim iseħħu b'mod ordnat skont iċ-ċirkostanzi identifikati.

1.   Meta tkun qed tistabbilixxi jekk parametru referenzjarju ġdid ikunx jissodisfa l-kriterji stabbiliti fil-punti (a) u (b) tal-Artikolu 37(2) tar-Regolament (UE) Nru 600/2014, persuna bi drittijiet ta' proprjetà fuq parametru referenzjarju għandha tqis l-istandards li ġejjin:

(a)	li CCP ma tkunx tista' tpaċi jew sostanzjalment tinnewtralizza kuntratti bbażati fuq l-aktar parametru referenzjarju riċenti b'kuntratti bbażati fuq il-parametru referenzjarju eżistenti rilevanti;

(b)	li r-reġjuni u s-setturi tal-industrija koperti mill-parametri referenzjarji rilevanti ma jkunu la identiċi u lanqas simili;

(c)	li l-valuri tal-parametri referenzjarji rilevanti ma jkunux korrelatati ħafna;

(d)	li l-kompożizzjoni tal-parametri referenzjarji rilevanti, fir-rigward tan-numru ta' komponenti, il-komponenti attwali tagħhom, il-valuri u l-ippeżar tagħhom ma jkunu la identiċi u lanqas simili;

(e)	li l-metodoloġiji ta' kull parametru referenzjarju rilevanti ma jkunu la identiċi u lanqas simili.

2.   Għall-parametri referenzjarji tal-komoditajiet, minbarra l-istandards speċifikati fil-paragrafu 1, għandhom jiġu kkunsidrati l-istandards addizzjonali li ġejjin:

(a)	li l-parametri referenzjarji rilevanti ma jkunux ibbażati fuq l-istess komoditajiet sottostanti;

(b)	li l-postijiet tal-kunsinna tal-komoditajiet sottostanti ma jkunux l-istess.

3.   Flimkien mal-istandards speċifikati fil-paragrafi 1 u 2, persuna bi drittijiet ta' proprjetà fuq parametru referenzjarju għandha tqis standards ulterjuri fl-użu speċifiċi għat-tipi ta' parametri referenzjarji li jkunu qed jiġu vvalutati, kif xieraq.

4.   Serje li għadha kemm ħarġet ta' parametru referenzjarju ma tikkostitwixxix parametru referenzjarju ġdid.