15.9.2016   

MT

Il-Ġurnal Uffiċjali tal-Unjoni Ewropea

L 247/1

REGOLAMENT DELEGAT TAL-KUMMISSJONI (UE) 2016/1649

tat-8 ta' Lulju 2016

li jissupplimenta r-Regolament (UE) Nru 1316/2013 tal-Parlament Ewropew u tal-Kunsill li jistabbilixxi l-Faċilità Nikkollegaw l-Ewropa

(Test b'rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 1316/2013 tal-Parlament Ewropew u tal-Kunsill tal-11 ta' Diċembru 2013 li jistabbilixxi l-Faċilità Nikkollegaw l-Ewropa, li jemenda r-Regolament (UE) Nru 913/2010 u li jħassar ir-Regolamenti (KE) Nru 680/2007 u (KE) Nru 67/2010 (1), u b'mod partikulari l-Artikolu 21 tiegħu,

Billi:

(1)

Fis-7 ta' Jannar 2014, il-Kummissjoni adottat ir-Regolament Delegat (UE) Nru 275/2014 (2) li jistabbilixxi prijoritajiet tal-finanzjament tat-trasport għall-fini tal-programmi ta' ħidma multiannwali u annwali.

(2)

Bis-sentenza tagħha tas-17 ta' Marzu 2016 fil-Każ C-286/14, il-Parlament Ewropew vs Il-Kummissjoni Ewropea, il-Qorti tal-Ġustizzja tal-Unjoni Ewropea annullat ir-Regolament Delegat (UE) Nru 275/2014 u ordnat li l-effetti ta' dak ir-Regolament jinżammu sad-dħul fis-seħħ, fi żmien raġonevoli li ma jistax jaqbeż is-sitt xhur mid-data tal-għoti tas-sentenza, ta' att ġdid maħsub biex jissostitwixxih.

(3)

Skont l-Artikolu 21(3) tar-Regolament (UE) Nru 1316/2013, il-prijoritajiet tal-finanzjament tat-trasport jeħtieġ li jqisu l-azzjonijiet eliġibbli li jikkontribwixxu għall-proġetti ta' interess komuni skont ir-Regolament (UE) Nru 1315/2013 tal-Parlament Ewropew u tal-Kunsill (3), elenkati skont l-Artikolu 7(2) tar-Regolament (UE) Nru 1316/2013.

(4)

L-azzjonijiet eliġibbli elenkati fl-Artikolu 7(2) tar-Regolament (UE) Nru 1316/2013 huma deskritti iktar fid-dettall fl-Artikoli 10 u 11 ta' dak ir-Regolament u jipprovdu r-rati massimi tal-finanzjament applikabbli għal dawk l-azzjonijiet. Għaldaqstant huwa xieraq li jkun hemm referenza għall-azzjonijiet kif elenkati f'dawk l-Artikoli biex jingħataw id-dettalji tal-prijoritajiet tal-finanzjament tat-trasport.

(5)

Il-proġetti ta' interess komuni kif elenkati fil-Parti I tal-Anness I tar-Regolament (UE) Nru 1316/2013 huma eliġibbli għall-programmi ta' ħidma multiannwali li hemm referenza għalihom fl-Artikolu 17(3) ta' dak ir-Regolament. Il-proġetti li mhumiex elenkati fil-Parti I tal-Anness I iżda huma eliġibbli skont l-Artikolu 7(2) ta' dak ir-Regolament, huma eliġibbli għall-programmi ta' ħidma annwali.

(6)

Skont l-Artikolu 4(2) tar-Regolament (UE) Nru 1316/2013 li jistabbilixxi l-objettivi settorjali speċifiċi tat-trasport, u meta wieħed iqis li l-Artikolu 21(3) ta' dak ir-Regolament jagħti s-setgħa lill-Kummissjoni li tadotta atti delegati skont l-Artikolu 26 li jagħti d-dettalji, għas-settur tat-trasport, tal-prijoritajiet ta' finanzjament li jridu jiġu riflessi fil-programmi ta' ħidma, dan ir-Regolament Delegat jistabbilixxi dawn il-prijoritajiet li jridu jiġu riflessi fil-programmi ta' ħidma multiannwali jew annwali skont l-Artikolu 17(3) tar-Regolament imsemmi.

(7)

Meta wieħed jikkunsidra li l-istrumenti finanzjarji għandhom jirċievu kontribuzzjoni tal-Unjoni skont il-programmi ta' ħidma annwali, huwa xieraq li hawn tiġi inkluża prijorità korrispondenti.

(8)

L-azzjonijiet li jappoġġaw il-programmi elenkati fl-Artikolu 5(2)(b) tar-Regolament (UE) Nru 1316/2013, li jikkonsistu fl-ispejjeż tal-assistenza teknika u amministrattiva mġarrba mill-Kummissjoni għall-ġestjoni tal-Faċilità Nikkollegaw l-Ewropa u limitati għal 1 % tal-pakkett finanzjarju, mhux se jkunu koperti mill-programmi ta' ħidma. Madankollu l-azzjonijiet li jappoġġaw il-programmi u li jikkontribwixxu għall-proġetti ta' interess komuni kif previst fl-Artikolu 7(2) u kif hemm referenza fl-Artikolu 5(2)(a) tar-Regolament (UE) Nru 1316/2013 se jkunu koperti mill-programmi ta' ħidma u huma inklużi hawnhekk flimkien ma' prijorità korrispondenti.

(9)

Ir-riżorsi kollha li hemm referenza għalihom fl-Artikolu 5(1)(a) tar-Regolament (UE) Nru 1316/2013, inklużi r-riżorsi trasferiti mill-Fond ta' Koeżjoni se jkunu koperti taħt l-istess programmi ta' ħidma. Skont l-Artikolu 11 ta' dak ir-Regolament, ir-riżorsi trasferiti mill-Fond ta' Koeżjoni se jkunu suġġetti għal sejħiet speċifiċi għall-proposti.

(10)

Biex jippermetti l-adozzjoni f'waqtha tal-atti ta' implimentazzjoni previsti fl-Artikolu 17(3) tar-Regolament (UE) Nru 1316/2013 sabiex tiġi żgurata l-kontinwità legali tal-Faċilità Nikkollegaw l-Ewropa — is-Settur tat-Trasport — il-programm, dan ir-Regolament jeħtieġ li jidħol fis-seħħ fil-jum ta' wara l-pubblikazzjoni tiegħu f'Il-Ġurnal Uffiċjali tal-Unjoni Ewropea,

ADOTTAT DAN IR-REGOLAMENT:

Artikolu 1

Dan ir-Regolament jistabbilixxi l-prijoritajiet ta' finanzjament li jridu jiġu riflessi fil-programmi ta' ħidma annwali u multiannwali msemmija fl-Artikolu 17 tar-Regolament (UE) Nru 1316/2013 għat-tul tal-Faċilità Nikkollegaw l-Ewropa għal azzjonijiet eliġibbli skont l-Artikolu 7(2) ta' dak ir-Regolament, kif stabbilit fl-Anness.

Artikolu 2

Dan ir-Regolament għandu jidħol fis-seħħ fl-ewwel jum wara l-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-8 ta' Lulju 2016.

Għall-Kummissjoni

Il-President

Jean-Claude JUNCKER

(1)  ĠU L 348, 20.12.2013, p. 129.

(2)  Ir-Regolament ta' Delega tal-Kummissjoni (UE) Nru 275/2014 tas-7 ta' Jannar 2014 li jemenda l-Anness I tar-Regolament (UE) Nru 1316/2013 tal-Parlament Ewropew u tal-Kunsill li jistabbilixxi l-Faċilità Nikkollegaw l-Ewropa (ĠU L 80, 19.3.2014, p. 1).

(3)  Ir-Regolament (UE) Nru 1315/2013 tal-Parlament Ewropew u tal-Kunsill tal-11 ta' Diċembru 2013 dwar linji gwida tal-Unjoni għall-iżvilupp tan-netwerk trans-Ewropew tat-trasport u li jħassar id-Deċiżjoni Nru 661/2010/UE (ĠU L 348, 20.12.2013, p. 1).

ANNESS

IL-PRIJORITAJIET TAL-FINANZJAMENT TAT-TRASPORT GĦALL-FINI TAL-PROGRAMMI TA' ĦDIMA MULTIANNWALI U ANNWALI

1.   Il-prijoritajiet tal-finanzjament għall-programmi ta' ħdima multiannwali

1.1.   Il-prijoritajiet ta' finanzjament bl-iskop li jinħolqu konnessjonijiet nieqsa u jitneħħew il-punti ta' konġestjoni, li tittejjeb l-interoperabilità ferrovjarja, u, b'mod partikolari, li jittejbu t-taqsimiet transkonfinali:

(i)

Proġetti identifikati bil-quddiem fuq il-Kurituri tan-Netwerk Ewlieni (il-ferroviji, il-passaġġi fuq l-ilma interni, it-toroq, u l-portijiet marittimi u interni).

(ii)

Proġetti identifikati bil-quddiem dwar sezzjonijiet oħra tan-Netwerk Ewlieni (il-ferroviji, il-passaġġi fuq l-ilma interni, it-toroq, il-portijiet marittimi u interni).

(iii)

L-interoperabilità ferrovjarja.

(iv)

It-tnedija tal-ERTMS.

1.2.   Il-prijoritajiet ta' finanzjament bl-iskop li jiġu żgurati sistemi ta' trasport sostenibbli u effiċjenti fuq medda twila ta' żmien, bil-ħsieb li jkun hemm tħejjija għall-flussi futuri tat-trasport mistennija, kif ukoll li jippermettu li l-modi kollha tat-trasport jiġu dekarbonizzati permezz ta' tranżizzjoni lejn teknoloġiji innovattivi tat-trasport b'livell baxx ta' karbonju u effiċjenti fl-użu tal-enerġija, filwaqt li tiġi ottimizzata s-sikurezza:

(i)

It-tnedija ta' teknoloġiji ġodda u tal-innovazzjoni fil-modi kollha tat-trasport, b'enfasi fuq id-dekarbonizzazzjoni, is-sikurezza u t-teknoloġiji innovattivi għall-promozzjoni tas-sostenibbiltà, l-operazzjoni, il-ġestjoni, l-aċċessibbiltà, il-multimodalità u l-effiċjenza tan-netwerk.

(ii)

Infrastruttura b'sigurtà u sikurezza, inklużi parkings b'sigurtà u sikurezza fuq in-Netwerk Ewlieni tat-toroq.

1.3.   Il-prijoritajiet ta' finanzjament bl-iskop li jittejbu kemm jista' jkun l-integrazzjoni u l-interkonnessjonijiet bejn il-mezzi ta' trasport, u tittejjeb l-interoperabilità tas-servizzi ta' trasport, filwaqt li tiġi żgurata l-aċċessibbiltà tal-infrastrutturi tat-trasport:

(i)

Ajru Uniku Ewropew — SESAR.

(ii)

Servizzi ta' Informazzjoni dwar ix-Xmajjar.

(iii)

Sistemi tat-Trasport Intelliġenti għat-toroq.

(iv)

Sistemi ta' Monitoraġġ tat-Traffiku tal-Bastimenti u ta' Informazzjoni.

(v)

Awtostradi tal-baħar.

(vi)

Azzjonijiet li jimplimentaw l-infrastruttura tat-trasport f'nodi tan-Netwerk Ewlieni, inkluż in-nodi urbani.

(vii)

Konnessjonijiet mal-pjataformi loġistiċi multimodali u l-iżvilupp tagħhom.

1.4.   Azzjonijiet ta' appoġġ għall-programmi.

2.   Il-prijoritajiet tal-finanzjament għall-programmi ta' ħidma annwali

2.1.   Il-prijoritajiet ta' finanzjament bl-iskop li jitneħħew l-ostakli, li tittejjeb l-interoperabilità ferrovjarja, li jinħolqu l-konnessjonijiet nieqsa u, b'mod partikolari, li jittejbu t-taqsimiet transkonfinali:

(i)

Il-ferroviji, il-passaġġi fuq l-ilma interni u l-proġetti ta' toroq fuq in-Netwerk Ewlieni inklużi l-konnessjonijiet mal-portijiet interni u marittimi u mal-ajruporti, kif ukoll l-iżvilupp tal-portijiet.

(ii)

Proġetti identifikati fuq in-Netwerk Komprensiv (il-ferroviji, il-passaġġi fuq l-ilma interni, it-toroq, il-portijiet marittimi u interni).

(iii)

Proġetti li jgħaqqdu n-netwerk ta' trasport trans-Ewropew ma' netwerks tal-infrastruttura ta' pajjiżi ġirien, b'mod partikolari relatati ma' taqsimiet transkonfinali (il-ferroviji, il-passaġġ tal-ilma interni, it-toroq, il-portijiet marittimi u interni).

2.2.   Il-prijoritajiet ta' finanzjament bl-iskop li jiġu żgurati sistemi ta' trasport sostenibbli u effiċjenti fuq medda twila ta' żmien, bil-ħsieb li jkun hemm tħejjija għall-flussi futuri tat-trasport mistennija, kif ukoll li jippermettu li l-modi kollha tat-trasport jiġu dekarbonizzati permezz ta' tranżizzjoni lejn teknoloġiji innovattivi tat-trasport b'livell baxx ta' karbonju u effiċjenti fl-użu tal-enerġija, filwaqt li tiġi ottimizzata s-sikurezza:

(i)

It-tnedija ta' teknoloġiji ġodda u tal-innovazzjoni, minbarra dawk koperti mill-Programm ta' Ħidma multiannwali.

(ii)

Servizzi tat-Trasport tal-Merkanzija.

(iii)

Azzjonijiet sabiex jitnaqqas l-istorjbu li joħroġ mill-ferroviji li jġorru l-merkanzija inkluż it-twaħħil ta' tagħmir apposta mal-vetturi kollha li joperaw fuq il-linji tal-ferroviji.

2.3.   Il-prijoritajiet ta' finanzjament bl-iskop li tittejjeb kemm jista' jkun l-integrazzjoni u l-interkonnessjonijiet bejn il-mezzi ta' trasport, u tittejjeb l-interoperabilità tas-servizzi ta' trasport, filwaqt li tiġi żgurata l-aċċessibbiltà tal-infrastrutturi tat-trasport:

(i)

Sistemi ta' applikazzjonijiet telematiċi barra dawk koperti mill-Programm ta' Ħidma multiannwali.

(ii)

Azzjonijiet għal aċċessibilità aħjar għall-infrastruttura tat-trasport għall-persuni b'diżabilità.

(iii)

Azzjonijiet li jimplimentaw l-infrastruttura tat-trasport f'nodi tan-Netwerk Ewlieni, inkluż in-nodi urbani.

(iv)

Konnessjonijiet mal-pjataformi loġistiċi multimodali u l-iżvilupp tal-pjattaformi.

2.4.   Strumenti finanzjarji tas-CEF:

(i)

Kontribuzzjoni lill-istrumenti finanzjarji, kif definit fl-Artikolu 14 u l-Parti III tal-anness tas-CEF.

(ii)

Azzjonijiet li jappoġġaw il-programm għall-istrumenti finanzjarji innovattivi.