(1)

Biex tkun tista' ssir l-applikazzjoni tal-miżura tranżizzjonali stabbilita fl-Artikolu 308b(13) tad-Direttiva 2009/138/KE, impriżi tal-assigurazzjoni u tar-riassigurazzjoni jinħtieġ li jkunu jistgħu juru lill-awtoritajiet superviżorji tagħhom li x-xiri tal-ekwitajiet suġġetti għal din il-miżura tranżizzjonali saru fl-1 ta' Jannar 2016 jew qabel. Għal din il-fini, l-impriżi tal-assigurazzjoni u tar-riassigurazzjoni jinħtieġ li jsegwu ċerti proċeduri għall-identifikazzjoni u d-dokumentazzjoni xierqa ta' dawn l-ekwitajiet.

(2)

Sabiex ikunu żgurati kundizzjonijiet uniformi u kontroll adegwat tal-applikazzjoni tal-miżura tranżizzjonali, l-impriżi tal-assigurazzjoni u r-riassigurazzjoni jinħtieġ li jżommu dokumentazzjoni li tidentifika kull bidla li taffettwa l-ammont tal-ekwitajiet suġġetti għall-miżura tranżizzjonali. Dawn jinħtieġ li jaġġornaw id-dokumentazzjoni kull darba li jikkalkulaw ir-Rekwiżit Kapitali tas-Solvenza b'konformità mal-formula standard sabiex jiġu identifikati l-ekwitajiet suġġetti għall-miżura tranżizzjonali.

(3)

Għal ekwitajiet miżmuma permezz ta' impriżi ta' investiment kollettiv jew investimenti oħra f'forma ta' fondi fejn l-approċċ look-through ma jkunx possibbli, l-Artikolu 173(2) tar-Regolament Delegat tal-Kummissjoni (UE) 2015/35 (2) jistabbilixxi metodoloġija biex jiġi identifikat l-ammont ta' ekwitajiet mixtrija qabel l-1 ta' Jannar 2016 u għalhekk ma hemmx bżonn li d-data tax-xiri ta' dawk l-ekwitajiet tiġi rintraċċata. Id-data tax-xiri rilevanti li trid tiġi identifikata u ddokumentata jinħtieġ li tkun id-data tax-xiri tal-unitajiet jew ishma ta' dawk l-intrapriżi għal investiment kollettiv jew investimenti oħrajn f'forma ta' fondi.

(4)

Jinħtieġ li l-impriżi jinkludu fid-dokumentazzjoni tagħhom id-data tax-xiri tal-ekwitajiet, l-unitajiet jew l-ishma li l-miżura tranżizzjonali tapplika għalihom. Barra minn hekk, jinħtieġ li l-awtoritajiet superviżorji, wara talba mingħandhom, jingħataw aċċess għal dokumentazzjoni u informazzjoni komprensivi biex jivverifikaw li l-kundizzjonijiet għall-applikazzjoni tal-miżura tranżizzjonali jkunu ssodisfati.

(5)

Meta impriżi tal-assigurazzjoni u tar-riassigurazzjoni jbigħu ekwitajiet, unitajiet, jew ishma msemmija fl-Artikolu 173 tar-Regolament Delegat (UE) 2015/35 u mbagħad jixtru lura ekwitajiet, unitajiet jew ishma tal-istess tip wara l-1 ta' Jannar 2016, l-ammont ta' ekwitajiet li jkunu suġġetti għall-miżura tranżizzjonali jonqsu meta mqabbla mal-ammont inizjalment identifikat. Il-proċedura segwita mill-impriżi tal-assigurazzjoni u tar-riassigurazzjoni jinħtieġ li għalhekk tiżgura li l-ekwitajiet li jibqgħu suġġetti għall-miżura tranżizzjonali wara bejgħ ta' dan it-tip u xirjiet sussegwenti ta' ekwitajiet, unitajiet jew ishma jkunu jistgħu jiġu distinti mill-ekwitajiet, l-unitajiet jew l-ishma l-oħra kollha.

(6)

Dan ir-Regolament huwa bbażat fuq l-abbozz tal-istandards tekniċi ta' implimentazzjoni ppreżentat mill-Awtorità Ewropea tal-Assigurazzjoni u l-Pensjonijiet tax-Xogħol lill-Kummissjoni.

(7)

L-Awtorità Ewropea tal-Assigurazzjoni u l-Pensjonijiet tax-Xogħol wettqet konsultazzjonijiet pubbliċi miftuħa dwar l-abbozz tal-istandards tekniċi ta' implementazzjoni li dan ir-Regolament huwa bbażat fuqu, analizzat il-kostijiet u l-benefiċċji potenzjali relatati u talbet l-opinjoni tal-Grupp tal-Partijiet Ikkonċernati tal-Assigurazzjoni u tar-Riassigurazzjoni stabbilit mill-Artikolu 37 tar-Regolament (UE) Nru 1094/2010 tal-Parlament Ewropew u tal-Kunsill (3),