REGOLAMENT TA' IMPLIMENTAZZJONI TAL-KUMMISSJONI (UE) 2016/472

tal-31 ta' Marzu 2016

li jemenda r-Regolament (UE) Nru 72/2010 fir-rigward tad-definizzjoni tat-terminu “spettur tal-Kummissjoni”

(Test b'rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (KE) Nru 300/2008 tal-Parlament Ewropew u tal-Kunsill tal-11 ta' Marzu 2008 dwar regoli komuni fil-qasam tas-sigurtà tal-avjazzjoni ċivili u li jħassar ir-Regolament (KE) Nru 2320/2002 (1), u b'mod partikolari l-Artikolu 15 tiegħu,

Billi:

(1)

Il-Ftehim dwar iż-Żona Ekonomika Ewropea (ŻEE) (2), b'mod partikolari l-Anness XIII tiegħu, jipprovdi li l-Istati Membri ŻEE tal-Assoċjazzjoni Ewropea tal-Kummerċ Ħieles (EFTA) għandhom jimplimentaw l-istandards bażiċi komuni dwar is-sigurtà tal-avjazzjoni u li l-Awtorità ta' Sorveljanza tal-EFTA għandha twettaq l-ispezzjonijiet f'dawk l-Istati Membri. Sabiex ikun hemm aktar armonizzazzjoni fl-implimentazzjoni tal-istandards bażiċi komuni, il-Kummissjoni għandu jkollha l-possibbiltà li tinkludi esperti kkwalifikati mill-Awtorità ta' Sorveljanza tal-EFTA u mill-Istati Membri tal-EFTA fit-timijiet tagħha tal-ispezzjoni tas-sigurtà tal-avjazzjoni.

(2)

Is-Segretarjat tal-Konferenza Ewropea tal-Avjazzjoni Ċivili (ECAC) jikkoordina l-verifiki tas-sigurtà tal-avjazzjoni fl-Istati Membri tal-ECAC bl-għan li tiġi żgurata l-konformità mal-istandards tas-sigurtà tal-avjazzjoni. Sabiex jissaħħaħ l-iskambju tal-aħjar prassi bejn is-Segretarjat u l-Kummissjoni fil-qasam tas-sigurtà tal-avjazzjoni, il-Kummissjoni għandu jkollha l-possibbiltà li tinkludi esperti kkwalifikati mis-Segretarjat tal-ECAC fit-timijiet tagħha tal-ispezzjoni tas-sigurtà tal-avjazzjoni.

(3)	Il-miżuri previsti f'dan ir-Regolament huma skont l-opinjoni tal-Kumitat imsemmi fl-Artikolu 19(2) tar-Regolament (KE) Nru 300/2008,

ADOTTAT DAN IR-REGOLAMENT:

Artikolu 1

L-Artikolu 2(3) tar-Regolament tal-Kummissjoni (UE) Nru 72/2010 (3) jinbidel b'dan li ġej:

“3.

“Spettur tal-Kummissjoni” tfisser persuna magħżula mill-Kummissjoni biex tieħu sehem fl-ispezzjonijiet tal-Kummissjoni, li tkun ċittadin tal-Unjoni jew ta' Stat Membru tal-Assoċjazzjoni Ewropea tal-Kummerċ Ħieles (EFTA) u li tkun impjegata minn xi waħda minn dawn li ġejjin:

—	il-Kummissjoni;

—	Stat Membru tal-Unjoni, bħala awditur nazzjonali;

—	Stat Membru tal-EFTA, bħala persuna inkarigata mit-twettiq ta' attivitajiet ta' sorveljanza tal-konformità fuq livell nazzjonali f'isem dak l-Istat Membru;

—	l-Awtorità ta' Sorveljanza tal-EFTA,

—	is-Segretarjat tal-Konferenza Ewropea tal-Avjazzjoni Ċivili.”

Artikolu 2

Dan ir-Regolament jidħol fis-seħħ fl-għoxrin jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan ir-Regolament jorbot fl-intier tiegħu u japplika direttament fl-Istati Membri kollha.

Magħmul fi Brussell, il-31 ta' Marzu 2016.

Għall-Kummissjoni

Il-President

Jean-Claude JUNCKER

(1) ĠU L 97, 9.4.2008, p. 72.

(2) ĠU L 1, 3.1.1994, p. 3.

(3) Ir- Regolament tal-Kummissjoni (UE) Nru 72/2010 tas-26 ta' Jannar 2010 li jistabbilixxi proċeduri biex jitwettqu spezzjonijiet mill-Kummissjoni fil-qasam tas-sigurtà tal-avjazzjoni (ĠU L 23, 27.1.2010, p. 1).