DEĊIŻJONI TAL-KUNSILL (UE) 2016/2079

tad-29 ta' Settembru 2016

dwar l-iffirmar, f'isem l-Unjoni Ewropea, u l-applikazzjoni proviżorja tal-Ftehim ta' Sħubija dwar ir-Relazzjonijiet u l-Kooperazzjoni bejn l-Unjoni Ewropea u l-Istati Membri tagħha, minn naħa waħda, u New Zealand, min-naħa l-oħra

IL-KUNSILL TAL-UNJONI EWROPEA,

Wara li kkunsidra t-Trattat dwar l-Unjoni Ewropea, u b'mod partikolari l-Artikolu 37 tiegħu,

Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-Artikolu 207 u l-Artikolu 212(1), flimkien mal-Artikolu 218(5) u t-tieni subparagrafu tal-Artikolu 218(8) tiegħu,

Wara li kkunsidra l-proposta konġunta mill-Kummissjoni Ewropea u r-Rappreżentant Għoli tal-Unjoni għall-Affarijiet Barranin u l-Politika ta' Sigurtà,

Billi:

(1)

Fil-25 ta' Ġunju 2012, il-Kunsill awtorizza lill-Kummissjoni u lir-Rappreżentant Għoli tal-Unjoni għall-Affarijiet Barranin u l-Politika ta' Sigurtà biex jiftħu negozjati ma' New Zealand dwar Ftehim Qafas li jissostitwixxi d-Dikjarazzjoni Konġunta dwar ir-relazzjonijiet u l-kooperazzjoni bejn l-Unjoni Ewropea u New Zealand tal-21 ta' Settembru 2007.

(2)

In-negozjati dwar il-Ftehim ta' Sħubija dwar ir-Relazzjonijiet u l-Kooperazzjoni bejn l-Unjoni Ewropea u l-Istati Membri tagħha, minn naħa waħda, u New Zealand, min-naħa l-oħra (il-“Ftehim”) ġew konklużi b'suċċess fit-30 ta' Lulju 2014. Il-Ftehim jirrifletti kemm ir-relazzjoni storikament viċina u r-rabtiet dejjem iktar b'saħħithom li qegħdin jiżviluppaw bejn il-Partijiet, kif ukoll ix-xewqa tagħhom li jsaħħu u jestendu iktar r-relazzjonijiet tagħhom b'mod ambizzjuż u innovattiv.

(3)	L-Artikolu 58 tal-Ftehim jipprevedi li l-Unjoni u New Zealand jistgħu japplikaw b'mod proviżorju ċerti dispożizzjonijiet tal-Ftehim, determinati reċiprokament miż-żewġ Partijiet, sakemm dan jidħol fis-seħħ.

(4)	Il-Ftehim għandu għalhekk jiġi ffirmat f'isem l-Unjoni u xi wħud mid-dispożizzjonijiet tiegħu għandhom jiġu applikati fuq bażi proviżorja, sakemm jitlestew il-proċeduri meħtieġa għall-konklużjoni tiegħu,

ADOTTA DIN ID-DEĊIŻJONI:

Artikolu 1

L-iffirmar f'isem l-Unjoni tal-Ftehim ta' Sħubija dwar ir-Relazzjonijiet u l-Kooperazzjoni bejn l-Unjoni Ewropea u l-Istati Membri tagħha, minn naħa waħda, u New Zealand, min-naħa l-oħra, huwa b'dan awtorizzat, soġġett għall-konklużjoni tal-Ftehim.

It-test tal-Ftehim huwa mehmuż ma' din id-Deċiżjoni.

Artikolu 2

Sakemm jidħol fis-seħħ, f'konformità mal-Artikolu 58 tal-Ftehim u soġġett għan-notifiki previsti fih, id-dispożizzjonijiet li ġejjin tal-Ftehim għandhom jiġu applikati b'mod proviżorju bejn l-Unjoni u New Zealand iżda biss sa fejn ikopru kwistjonijiet li jaqgħu fil-kompetenza tal-Unjoni, inklużi kwistjonijiet li jaqgħu fil-kompetenza tal-Unjoni biex jiddefinixxu u jimplimentaw politika estera u ta' sigurtà komuni (1):

—	Artikolu 3: (Djalogu),

—	Artikolu 4: (Kooperazzjoni f'organizzazzjonijiet reġjonali u internazzjonali),

—	Artikolu 5: (Djalogu politiku),

—	Artikolu 53 (Kumitat Konġunt), bl-eċċezzjoni tal-punti (g) u (h) tal-paragrafu 3 tiegħu, u

—	Titolu X (Dispożizzjonijiet finali), bl-eċċezzjoni tal-Artikolu 57 u l-Artikolu 58(1) u (3), sa fejn hu meħtieġ biex tiġi żgurata l-applikazzjoni proviżorja tad-dispożizzjonijiet tal-Ftehim imsemmi f'dan l-Artikolu.

Artikolu 3

Il-President tal-Kunsill huwa b'dan awtorizzat li jinnomina l-persuna jew persuni li jkollhom is-setgħa li jiffirmaw il-Ftehim f'isem l-Unjoni.

Artikolu 4

Din id-Deċiżjoni għandha tidħol fis-seħħ fil-jum wara dak tal-adozzjoni tagħha.

Magħmul fi Brussell, id-29 ta' Settembru 2016.

Għall-Kunsill

Il-President

P. ŽIGA

(1) Id-data li minnha ser jiġu applikati b'mod proviżorju d-dispożizzjonijiet tal-Ftehim imsemmi fl-Artikolu 2, ser tiġi ppubblikata f'Il-Ġurnal Uffiċjali tal-Unjoni Ewropea mis-Segretarjat Ġenerali tal-Kunsill.