11.10.2016   

MT

Il-Ġurnal Uffiċjali tal-Unjoni Ewropea

L 274/55

(1)

Skont l-Artikolu 6(6) tar-Regolament (KE) Nru 66/2010 l-Ekotikketta tal-UE ma tistax tingħata għal oġġetti li jkun fihom sustanzi jew preparazzjonijiet/taħlitiet li jissodisfaw il-kriterji għall-klassifikazzjoni bħala sustanzi tossiċi, perikolużi għall-ambjent, karċinoġeniċi, mutaġeniċi jew tossiċi għar-riproduzzjoni skont ir-Regolament (KE) Nru 1272/2008 tal-Parlament Ewropew u tal-Kunsill (2) jew għall-oġġetti li fihom is-sustanzi msemmijin fl-Artikolu 57 tar-Regolament (KE) Nru 1907/2006 tal-Parlament Ewropew u tal-Kunsill (3).

(2)

Skont l-Artikolu 6(7) tar-Regolament (KE) Nru 66/2010, il-Kummissjoni tista' tadotta l-miżuri biex tagħti d-derogi mill-Artikolu 6(6) ta' dan ir-Regolament għal kategoriji speċifiċi ta' oġġetti li fihom dawk is-sustanzi, fejn mhuwiex fattibbli teknikament li dawk l-oġġetti jiġu sostitwiti għal kollox jew permezz li jintużaw materjali jew disinji alternattivi, jew fil-każ ta' prodotti li għandhom prestazzjoni ambjentali ġeneralment aħjar minn oġġetti oħra tal-istess kategorija.

(3)

Is-subtiliżina hija sustanza perikoluża b'klassifikazzjoni armonizzata skont l-Anness VI tar-Regolament (KE) Nru 1272/2008. Dan jinkludi dawn il-klassijiet ta' periklu li ġejjin: Sensitizzazzjoni respiratorja, Kategorija 1, Ħsara serja għall-għajnejn Kategorija 1, Irritazzjoni tal-ġilda, Kategorija 2, u Tossiċità Speċifika għall-Organi fil-Mira — Esponiment wieħed għal kanal respiratorju, Kategorija 3.

(4)

Id-Deċiżjonijiet tal-Kummissjoni 2011/263/UE (4) u 2011/264/UE (5), kif emendati permezz tad-Deċiżjoni tal-Kummissjoni 2012/49/UE (6) jinkludu diġà deroga għall-enżima subtiliżina, ikklassifikata bħala H400: Tossika ħafna għall-organiżmi akkwatiċi, skont kriterji ekoloġiċi stabbiliti, għall-għoti tal-Ekotikketta tal-UE lid-deterġenti tal-magni tal-ħasil tal-platti u tal-ħasil tal-ħwejjeġ, peress li s-subtiliżina kienet ġiet rikonoxxuta bħala ingredjent importanti ta' dawn id-deterġenti u kienet diġà ġiet derogata. Barra minn hekk, għall-istess għan li s-subtiliżina tiġi permessa fi prodotti bl-Ekotikketta tal-UE, id-Deċiżjonijiet tal-Kummissjoni 2012/720/UE (7) u 2012/721/UE (8) ippermettew lill-enżimi kklassifikati bħala H400: Tossiċi ħafna għall-organiżmi akkwatiċi fid-deterġenti tal-magni awtomatiċi tal-ħasil tal-platti industrijali u istituzzjonali u d-deterġenti tal-ħasil tal-ħwejjeġ industrijali u istituzzjonali. Dawn id-derogi kienu ngħataw wara li ġiet rikonoxxuta l-funzjoni importanti tas-subtiliżina fil-gruppi ta' deterġenti msemmija hawn fuq u l-livell għoli ta' degradazzjoni/inattivazzjoni fl-impjant tat-trattament tal-ilma mormi u waqt l-użu u t-trasport tad-diterġenti lejn sistemi ta' dranaġġ. Id-derogi kienu meħtieġa għaliex is-subtiliżina kienet ikklassifikata bħala Akkwatiku Akut 1 (Fattur M 1) (H400) bl-awtoklassifikazzjoni meta ġiet irreġistrata skont ir-Regolament (KE) Nru 1907/2006, u dan ma kienx jippermetti li tintuża f'prodotti li għandhom l-Ekotikketta tal-UE.

(5)

Ir-Regolament (KE) Nru 1272/2008 kif emendat mir-Regolament tal-Kummissjoni (UE) Nru 286/2011 (9). L-emendi fir-Regolament (KE) Nru 1272/2008 saru applikabbli għas-sustanzi mill-1 ta' Diċembru 2012, u għat-taħlitiet mill-1 ta' Ġunju 2015. Ir-Regolament (UE) Nru 286/2011 żied kriterji ġodda għall-klassifikazzjoni ta' periklu għall-ilma fuq tul ta' żmien abbażi tad-dejta dwar it-tossiċità akkwatika kronika u l-bijodegradabbiltà. Abbażi tal-kriterji l-ġodda, studju reċenti mwettaq minn REACH SIEF għas-subtiliżina indika li s-subtiliżina trid tiġi kklassifikata wkoll bħala perikoluża għall-ambjent akkwatiku (periklu kroniku), Kategorija 2. Is-sustanza hija bijodegradabbli faċilment u ma għandhiex toħloq riskju għall-ambjent għax din kważi tiġi ddiżattivata kompletament fl-impjanti tad-drenaġġ. Bħala riżultat ta' din il-klassifikazzjoni, is-subtiliżina tkun pprojbita milli tintuża fil-prodotti li jkollhom l-Ekotikketta tal-UE. Minħabba f'hekk ikun diffiċli li l-kriterji ekoloġiċi stabbiliti għall-għotja tal-Ekotikketta tal-UE lid-deterġenti għall-magni tal-ħasil tal-platti, lid-deterġenti tal-ħwejjeġ, lid-deterġenti għall-magni awtomatiċi tal-ħasil tal-platti industrijali u istituzzjonali u deterġenti tal-ħasil tal-ħwejjeġ industrijali u istituzzjonali, jikkorrispondu b'mod indikattiv mal-aħjar 10 sa 20 % tad-deterġenti u prodotti tat-tindif disponibbli fis-suq tal-Unjoni f'termini ta' prestazzjoni ambjentali tul iċ-ċiklu ta' ħajjithom.

(6)

Is-subtiliżina ttejjeb il-prestazzjoni tat-tindif tad-deterġenti billi effettivament tkisser il-komponenti proteiniċi tat-tbajja'. L-enżima tagħti prestazzjoni eċċellenti anki f'temperaturi baxxi bid-dożaġġ meħtieġ li tippermetti ir-rispett tat-temperatura l-baxxa, mal-kompattazzjoni, u mal-kriterji ta' prestazzjoni fl-iskema tal-Ekotikketta tal-UE. Fil-mument, ma hemm l-ebda ingredjent jew teknoloġija alternattiva. Enzimi oħrajn b'attivitajiet katalitiċi differenti, eż. l-alfa-amilażi, il-lipażi, il-ljasi tal-pektati jistgħu jneħħu tipi oħra ta' depożiti u tbajja', eż. tbajja' tal-lamtu, tax-xaħam u tal-pektin, iżda ma jistgħux ineħħu t-tebgħat tal-proteini.

(7)

Ir-reviżjoni tal-kriterji għall-għotja tal-Ekotikketta tal-UE lid-deterġenti tal-magni tal-ħasil tal-platti u lid-deterġenti tal-ħasil tal-ħwejjeġ, stabbiliti fid-Deċiżjonijiet 2011/263/UE u 2011/264/UE, u l-iżvilupp tal-kriterji għall-għoti tal-Ekotikketta tal-UE lil deterġenti għall-magni awtomatiċi tal-ħasil tal-platti industrijali u istituzzjonali u lil deterġenti tal-ħasil tal-ħwejjeġ industrijali u istituzzjonali u l-emendi relatati ma ħadux inkunsiderazzjoni l-kriterji l-ġodda għall-klassifikazzjoni ambjentali introdotti bir-Regolament (UE) Nru 286/2011.

(8)

Din l-emenda tapplika retroattivament mill-1 ta' Diċembru 2012, biex tiġi żgurata l-kontinwità tal-validità tal-kriterji biex tingħata l-Ekotikketta tal-UE lid-deterġenti tal-magni tal-ħasil tal-platti, lid-deterġenti tal-ħwejjeġ, lid-deterġenti tal-magni awtomatiċi tal-ħasil tal-platti industrijali u istituzzjonali u lid-deterġenti tal-ħasil tal-ħwejjeġ industrijali u istituzzjonali.

(9)

Għaldaqstant, id-Deċiżjonijiet tal-Kummissjoni 2011/263/UE, 2011/264/UE, 2012/720/UE u 2012/721/UE għandhom jiġu emendati skont dan.

(10)

Il-miżuri stipulati f'din id-Deċiżjoni huma skont l-opinjoni tal-Kumitat stabbilit bl-Artikolu 16 tar-Regolament (KE) Nru 66/2010,