|
28.7.2016 |
MT |
Il-Ġurnal Uffiċjali tal-Unjoni Ewropea |
L 202/27 |
DEĊIŻJONI TAL-KUNSILL (UE) 2016/1232
tat-18 ta' Lulju 2016
li tistabbilixxi l-pożizzjoni li għandha tittieħed f'isem l-Unjoni Ewropea fil-Kunsill ta' Stabbilizzazzjoni u Assoċjazzjoni stabbilit mill-Ftehim ta' Stabbilizzazzjoni u Assoċjazzjoni bejn l-Unjoni Ewropea u l-Komunità Ewropea tal-Enerġija Atomika, minn naħa waħda, u l-Kosovo (*1), min-naħa l-oħra, dwar Deċiżjoni tal-Kunsill ta' Stabbilizzazzjoni u Assoċjazzjoni li tadotta r-regoli ta' proċedura tiegħu
IL-KUNSILL TAL-UNJONI EWROPEA,
Wara li kkunsidra t-Trattat dwar l-Unjoni Ewropea, u b'mod partikolari l-Artikolu 37 flimkien mal-Artikolu 31(1) tiegħu,
Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-Artikolu 217 flimkien mal-Artikolu 218, il-paragrafu 9 tiegħu,
Wara li kkunsidra l-proposta mill-Kummissjoni Ewropea,
Billi:
|
(1) |
L-Artikolu 126 tal-Ftehim ta' Stabbilizzazzjoni u Assoċjazzjoni bejn l-Unjoni Ewropea u l-Komunità Ewropea tal-Enerġija Atomika, minn naħa waħda u l-Kosovo (*1), min-naħa l-oħra (1), (“il-Ftehim”), jistabbilixxi Kunsill ta' Stabbilizzazzjoni u Assoċjazzjoni. |
|
(2) |
L-Artikolu 127(2) tal-Ftehim jistipula li l-Kunsill ta' Stabbilizzazzjoni u Assoċjazzjoni għandu jistabbilixxi r-regoli ta' proċedura tiegħu. |
|
(3) |
L-Artikolu 129(1) tal-Ftehim jistipula li l-Kunsill ta' Stabbilizzazzjoni u Assoċjazzjoni għandu jiġi megħjun minn Kumitat ta' Stabbilizzazzjoni u Assoċjazzjoni (“il-Kumitat”). |
|
(4) |
L-Artikolu 129(2) u (3) tal-Ftehim jipprevedi wkoll li l-Kunsill ta' Stabbilizzazzjoni u Assoċjazzjoni għandu, fir-regoli ta' proċedura tiegħu, jiddetermina d-dmirijiet tal-Kumitat u li l-Kunsill ta' Stabbilizzazzjoni u Assoċjazzjoni jista' jiddelega kull wieħed mis-setgħat tiegħu lill-Kumitat. |
|
(5) |
L-Artikolu 131 tal-Ftehim jipprevedi li l-Kunsill ta' Stabbilizzazzjoni u Assoċjazzjoni jista' jiddeċiedi li jwaqqaf kumitati jew korpi speċjali oħrajn li jistgħu jgħinuh fit-twettiq ta' dmirijietu. Jipprevedi wkoll li l-Kunsill ta' Stabbilizzazzjoni u Assoċjazzjoni, fir-regoli ta' proċedura tiegħu, għandu jiddetermina l-għamla u d-dmirijiet ta' dawn il-kumitati jew korpi u kif għandhom jaħdmu. |
|
(6) |
Huwa importanti li ssir konsultazzjoni regolari u formali mal-Istati Membri, u li jitqiesu l-fehmiet tagħhom. Għalhekk, l-Istati Membri għandhom jiġu mistiedna jkunu parti mid-delegazzjoni tal-Unjoni Ewropea fil-laqgħat kollha tal-Kunsill ta' Stabbilizzazzjoni u Assoċjazzjoni. |
|
(7) |
Il-Kummissjoni u r-Rappreżentant Għoli tal-Unjoni għall-Affarijiet Barranin u l-Politika ta' Sigurtà (“ir-Rappreżentant Għoli”) ser jissorveljaw mill-qrib u kontinwament l-isforzi tal-Kosovo għan-normalizzazzjoni tar-relazzjonijiet tiegħu mas-Serbja u jirrappurtaw kif xieraq, u mill-inqas darbtejn fis-sena, dwar dik il-kwistjoni. |
|
(8) |
Ir-raba' paragrafu tal-Artikolu 140 tal-Ftehim jistipula li l-Unjoni tista' tieħu miżuri li tqis xierqa, inkluż is-sospensjoni tal-Ftehim kollu jew parti minnu, b'effett immedjat, fil-każ li l-Kosovo ma jikkonformax mal-prinċipji essenzjali kif jinsabu fl-Artikoli 5 u 13 tal-Ftehim. Kull rakkomandazzjoni jew deċiżjoni rilevanti mill-Kunsill ta' Stabbilizzazzjoni u Assoċjazzjoni, kif ukoll ir-rapporti li għandhom jiġu ppreżentati mill-Kummissjoni u r-Rappreżentant Għoli dwar l-isforzi tal-Kosovo għan-normalizzazzjoni tar-relazzjonijiet tiegħu mas-Serbja, għandhom jitqiesu għal kwalunkwe proposta eventwali tal-Kummissjoni għas-sospensjoni tal-Ftehim abbażi tar-raba' paragrafu tal-Artikolu 140 tal-Ftehim. |
|
(9) |
L-ebda terminu, għażla ta' kliem jew definizzjoni użata f'din id-Deċiżjoni u l-Annessi tagħha, jew fid-deċiżjonijiet u r-rakkomandazzjonijiet u dokumenti oħrajn, fosthom il-minuti, li jkunu ser jiġu adottati mill-Kunsill ta' Stabbilizzazzjoni u Assoċjazzjoni, ma tikkostitwixxi rikonoxximent tal-Kosovo minn Stati Membri individwali f'dik il-kapaċità fejn ma jkunux ħadu tali pass. |
|
(10) |
Il-proċeduri interni tal-Istati Membri jistgħu japplikaw meta jiġu riċevuti dokumenti maħruġin mill-Awtoritajiet tal-Kosovo skont dan il-Ftehim. |
|
(11) |
Huwa opportun li tiġi stabbilita l-pożizzjoni li għandha tittieħed f'isem l-Unjoni fil-Kunsill ta' Stabbilizzazzjoni u Assoċjazzjoni, rigward deċiżjoni tal-Kunsill ta' Stabbilizzazzjoni u Assoċjazzjoni li jadotta r-regoli ta' proċedura tiegħu. |
|
(12) |
Il-pożizzjoni tal-Unjoni fil-Kunsill ta' Stabbilizzazzjoni u Assoċjazzjoni għandha għalhekk tkun ibbażata fuq l-abbozz ta' Deċiżjoni mehmuż, |
ADOTTA DIN ID-DEĊIŻJONI:
Artikolu 1
Il-pożizzjoni li għandha tittieħed f'isem l-Unjoni Ewropea, fil-Kunsill ta' Stabbilizzazzjoni u Assoċjazzjoni stabbilit mill-Artikolu 126 tal-Ftehim, għandha tkun ibbażata fuq l-abbozz ta' Deċiżjoni tal-Kunsill ta' Stabbilizzazzjoni u Assoċjazzjoni, mehmuż ma' din id-Deċiżjoni.
Emendi tekniċi għal dak l-abbozz ta' Deċiżjoni jistgħu jiġu aċċettati mingħajr deċiżjoni oħra mill-Kunsill.
Artikolu 2
L-Istati Membri għandhom jiġu mistiedna jagħmlu parti mid-delegazzjoni tal-Unjoni Ewropea fil-laqgħat kollha tal-Kunsill ta' Stabbilizzazzjoni u Assoċjazzjoni. Għandhom jirċievu wkoll id-dokumentazzjoni kollha mogħtija lill-Kunsill ta' Stabbilizzazzjoni u Assoċjazzjoni jew maħruġa minnu.L-Istati Membri għandhom jagħtu lir-Rappreżentant Għoli tal-Unjoni Ewropea għall-Affarijiet Barranin u l-Politika ta' Sigurtà, f'konformità mar-responsabbiltajiet tiegħu jew tagħha skont it-Trattati u l-kapaċità tiegħu jew tagħha bħala l-President tal-Kunsill Affarijiet Barranin, l-informazzjoni meħtieġa dwar dan.
Artikolu 3
Din id-Deċiżjoni għandha tidħol fis-seħħ fid-data tal-adozzjoni tagħha.
Magħmul fi Brussell, it-18 ta' Lulju 2016.
Għall-Kunsill
Il-President
G. MATEČNÁ
(*1) Dan l-isem huwa mingħajr preġudizzju għall-pożizzjonijiet dwar l-istatus, u huwa konformi mal-UNSCR 1244/1999 u l-Opinjoni tal-QIĠ dwar id-dikjarazzjoni tal-indipendenza tal-Kosovo.
DEĊIŻJONI Nru 1/2016 TAL-KUNSILL TA' STABBILIZZAZZJONI U ASSOĊJAZZJONI BEJN L-UE U L-KOSOVO (*1)
ta' [data]
li biha jadotta r-regoli ta' proċedura tiegħu
IL-KUNSILL TA' STABBILIZZAZZJONI U ASSOĊJAZZJONI,
Wara li kkunsidra l-Ftehim ta' Stabbilizzazzjoni u Assoċjazzjoni bejn l-Unjoni Ewropea u l-Komunità Ewropea tal-Enerġija Atomika, minn naħa waħda, u l-Kosovo (*1), min-naħa l-oħra (“il-Ftehim”) u b'mod partikolari l-Artikoli 126, 127, 129 u 131 tiegħu,
Billi l-Ftehim daħal fis-seħħ fl-1 ta' April 2016,
ADOTTA DIN ID-DEĊIŻJONI:
Artikolu 1
Presidenza
Il-Partijiet għandu jkollhom il-Presidenza tal-Kunsill ta' Stabbilizzazzjoni u Assoċjazzjoni b'mod alternat għal perjodu ta' 12-il xahar. L-ewwel perjodu għandu jibda fid-data tal-ewwel laqgħa tal-Kunsill ta' Stabbilizzazzjoni u Assoċjazzjoni u jintemm fil-31 ta' Diċembru tal-istess sena.
Artikolu 2
Laqgħat
Il-Kunsill ta' Stabbilizzazzjoni u Assoċjazzjoni għandu jiltaqa' darba fis-sena f'konformità mal-prattika stabbilita għall-Kunsilli ta' Stabbilizzazzjoni u Assoċjazzjoni, inkluż b'rabta mal-livell ta' rappreżentanza u l-post. Sessjonijiet speċjali tal-Kunsill ta' Stabbilizzazzjoni u Assoċjazzjoni jistgħu jsiru fuq talba ta' waħda mill-Partijiet, jekk il-Partijiet jaqblu dwar dan. Il-laqgħat tal-Kunsill ta' Stabbilizzazzjoni u Assoċjazzjoni għandhom jissejħu b'mod konġunt mis-Segretarji tal-Kunsill ta' Stabbilizzazzjoni u Assoċjazzjoni bi qbil mal-President.
Artikolu 3
Delegazzjonijiet
Qabel kull laqgħa, il-President għandu jiġi mgħarraf dwar l-għamla maħsuba tad-delegazzjoni ta' kull Parti. Rappreżentant tal-Bank Ewropew tal-Investiment (BEI) għandu jattendi l-laqgħat tal-Kunsill ta' Stabbilizzazzjoni u Assoċjazzjoni, bħala osservatur, meta fl-aġenda jidhru ħwejjeġ li jikkonċernaw lill-BEI. Il-Kunsill ta' Stabbilizzazzjoni u Assoċjazzjoni jista' jistieden ukoll lil persuni oħra jattendu l-laqgħat tiegħu sabiex jipprovdu informazzjoni fuq suġġetti partikolari.
Artikolu 4
Segretarjat
Uffiċjal tas-Segretarjat Ġenerali tal-Kunsill tal-Unjoni Ewropea flimkien ma' uffiċjal tar-rappreżentanza tal-Kosovo fil-Belġju għandhom flimkien iservu bħala Segretarji tal-Kumitat ta' Stabbilizzazzjoni u Assoċjazzjoni.
Artikolu 5
Korrispondenza
Il-korrispondenza indirizzata lill-Kunsill ta' Stabbilizzazzjoni u Assoċjazzjoni għandha tintbagħat lill-President tal-Kunsill ta' Stabbilizzazzjoni u Assoċjazzjoni fl-indirizz tas-Segretarjat Ġenerali tal-Kunsill tal-Unjoni Ewropea.
Iż-żewġ Segretarji għandhom jiżguraw li l-korrispondenza tgħaddi għand il-President tal-Kunsill ta' Stabbilizzazzjoni u Assoċjazzjoni u, fejn xieraq, tkun tinxtered mal-membri l-oħra tal-Kunsill ta' Stabbilizzazzjoni u Assoċjazzjoni. Il-korrispondenza li titqassam għandha tintbagħat lis-Segretarjat Ġenerali tal-Kummissjoni, is-Servizz Ewropew ta' Azzjoni Esterna u r-rappreżentanza tal-Kosovo fil-Belġju.
Komunikazzjonijiet mill-President tal-Kunsill ta' Stabbilizzazzjoni u Assoċjazzjoni għandhom jintbagħtu miż-żewġ Segretarji lid-destinatarji u jitqassmu, fejn xieraq, lill-membri l-oħra tal-Kunsill ta' Stabbilizzazzjoni u Assoċjazzjoni msemmijin fit-tieni paragrafu.
Artikolu 6
Pubbliku
Sakemm ma jiġix deċiż mod ieħor, il-laqgħat tal-Kunsill ta' Stabbilizzazzjoni u Assoċjazzjoni ma għandhomx ikunu pubbliċi.
Artikolu 7
Aġendi għal-laqgħat
1. Il-President għandu jfassal aġenda proviżorja għal kull laqgħa. Din tintbagħat mis-Segretarji tal-Kunsill ta' Stabbilizzazzjoni u Assoċjazzjoni lid-destinatarji msemmijin fl-Artikolu 5 mhux aktar tard minn 15-il jum tax-xogħol qabel il-bidu tal-laqgħa. L-aġenda proviżorja għandha tinkludi l-punti li dwarhom il-President ikun irċieva talba biex dawn jinżiedu fl-aġenda mhux aktar tard minn 21 jum tax-xogħol qabel il-bidu tal-laqgħa, għalkemm l-ebda punt ma għandu jitniżżel fl-aġenda proviżorja sakemm ma tkunx intbagħtet id-dokumentazzjoni ta' appoġġ lis-Segretarji mhux aktar tard mid-data li fiha tintbagħat l-aġenda. L-aġenda għandha tiġi adottata mill-Kunsill ta' Stabbilizzazzjoni u Assoċjazzjoni fil-bidu ta' kull laqgħa. Punt ieħor minbarra dawk li jidhru fl-aġenda proviżorja jista' jitqiegħed fuq l-aġenda jekk iż-żewġ Partijiet jaqblu dan.
2. Il-President, bi qbil maż-żewġ Partijiet, jista' jqassar il-limiti ta' żmien speċifikati fil-paragrafu 1 sabiex jitqiesu l-ħtiġijiet ta' każ partikolari.
Artikolu 8
Minuti
L-abbozz tal-minuti ta' kull laqgħa għandu jitħejja miż-żewġ Segretarji. Il-minuti għandhom, bħala regola ġenerali, jindikaw fir-rigward ta' kull punt fuq l-aġenda:
|
— |
id-dokumentazzjoni mogħtija lill-Kunsill ta' Stabbilizzazzjoni u Assoċjazzjoni, |
|
— |
id-dikjarazzjonijiet li membru tal-Kunsill ta' Stabbilizzazzjoni u Assoċjazzjoni jkun talab li jiddaħħlu, |
|
— |
id-deċiżjonijiet meħuda u r-rakkomandazzjonijiet magħmula, id-dikjarazzjonijiet li ntlaħaq qbil dwarhom u l-konklużjonijiet adottati. |
L-abbozz tal-minuti għandu jitressaq quddiem il-Kunsill ta' Stabbilizzazzjoni u Assoċjazzjoni għall-approvazzjoni. Meta approvati, il-minuti għandhom jiġu ffirmati mill-President u ż-żewġ Segretarji. Il-minuti għandhom jiġu arkivjati fis-Segretarjat Ġenerali tal-Kunsill tal-Unjoni Ewropea, li jkun depożitarju tad-dokumenti tal-Assoċjazzjoni. Kull wieħed mid-destinatarji msemmijin fl-Artikolu 5 għandu jingħata kopja ċċertifikata.
Artikolu 9
Deċiżjonijiet u rakkomandazzjonijiet
1. Il-Kunsill ta' Stabbilizzazzjoni u Assoċjazzjoni għandu jieħu d-deċiżjonijiet tiegħu u jagħmel rakkomandazzjonijiet bi qbil komuni bejn il-Partijiet, mingħajr preġudizzju għall-Artikolu 2 u 5 tal-Ftehim. Il-Kunsill ta' Stabbilizzazzjoni u Assoċjazzjoni jista' jieħu deċiżjonijiet jew jagħmel rakkomandazzjonijiet bi proċedura bil-miktub jekk iż-żewġ Partijiet jaqblu dan.
2. Id-deċiżjonijiet u r-rakkomandazzjonijiet tal-Kunsill ta' Stabbilizzazzjoni u Assoċjazzjoni, skont l-Artikolu 128 tal-Ftehim, għandu jkollhom it-titlu ta' “Deċiżjoni” u “Rakkomandazzjoni” rispettivament, segwiti minn numru tas-serje, mid-data ta' meta ġew adottati u minn deskrizzjoni tas-suġġett tagħhom. Id-deċiżjonijiet u r-rakkomandazzjonijiet tal-Kunsill ta' Stabbilizzazzjoni u Assoċjazzjoni għandhom jiġu ffirmati mill-President u awtentikati miż-żewġ Segretarji. Id-deċiżjonijiet u r-rakkomandazzjonijiet għandhom jintbagħtu lil kull wieħed mid-destinatarji msemmija fl-Artikolu 5. Kull Parti tista' tiddeċiedi fuq il-pubblikazzjoni ta' deċiżjonijiet u rakkomandazzjonijiet tal-Kunsill ta' Stabbilizzazzjoni u Assoċjazzjoni fil-pubblikazzjoni uffiċjali rispettiva tagħha.
Artikolu 10
Lingwi
Il-lingwi uffiċjali tal-Kunsill ta' Stabbilizzazzjoni u Assoċjazzjoni għandhom ikunu l-lingwi awtentiċi tal-Ftehim ta' Stabbilizzazzjoni u Assoċjazzjoni. Sakemm ma jiġix deċiż mod ieħor, il-Kunsill ta' Stabbilizzazzjoni u Assoċjazzjoni għandu jsejjes id-deliberazzjonijiet tiegħu fuq dokumentazzjoni mfassla f'dawn il-lingwi.
Artikolu 11
Spejjeż
L-Unjoni Ewropea u l-Kosovo għandhom it-tnejn iħallsu l-ispejjeż li jġarrbu biex jipparteċipaw fil-laqgħat tal-Kunsill ta' Stabbilizzazzjoni u Assoċjazzjoni, kemm fir-rigward tal-persunal, tal-ispejjeż ta' vjaġġar u ta' sussistenza kif ukoll tal-ispejjeż ta' posta u telekomunikazzjoni. Spejjeż marbutin mal-interpretazzjoni fil-laqgħat, it-traduzzjoni u r-riproduzzjoni tad-dokumenti kif ukoll spejjeż oħra marbutin mal-organizzazzjoni tal-laqgħat għandhom jiġġarrbu mill-Parti li tkun qed tospita l-laqgħat.
Artikolu 12
Kumitat ta' Stabbilizzazzjoni u Assoċjazzjoni
1. B'dan huwa stabbilit Kumitat ta' Stabbilizzazzjoni u Assoċjazzjoni (“il-Kumitat”) sabiex jgħin lill-Kunsill ta' Stabbilizzazzjoni u Assoċjazzjoni fil-qadi ta' dmirijietu. Dan għandu jkun magħmul minn rappreżentati tal-Unjoni Ewropea, minn naħa, u tal-Kosovo min-naħa l-oħra, normalment fuq livell ta' impjegati anzjani taċ-ċivil.
2. Il-Kumitat għandu jħejji l-laqgħat u d-deliberazzjonijiet tal-Kunsill ta' Stabbilizzazzjoni u Assoċjazzjoni, jimplimenta d-deċiżjonijiet tal-Kunsill ta' Stabbilizzazzjoni u Assoċjazzjoni fejn meħtieġ u, inġenerali, jiżgura l-kontinwità tar-relazzjoni ta' assoċjazzjoni u t-tħaddim xieraq tal-Ftehim. Għandu jqis kull kwistjoni li tiġi riferuta lilu mill-Kunsill ta' Stabbilizzazzjoni u Assoċjazzjoni kif ukoll kull kwistjoni li tista' tqum kuljum matul l-implimentazzjoni tal-Ftehim ta' Stabbilizzazzjoni u Assoċjazzjoni. Għandu jressaq proposti jew kull abbozz ta' deċiżjonijiet/rakkomandazzjonijiet għall-adozzjoni quddiem il-Kunsill ta' Stabbilizzazzjoni u Assoċjazzjoni.
3. F'każijiet fejn il-Ftehim jirriferi għal obbligu ta' konsultazzjoni jew il-possibilità ta' konsultazzjoni, din il-konsultazzjoni tista' ssir fil-Kumitat. Il-konsultazzjoni tista' tissokta fil-Kunsill ta' Stabbilizzazzjoni u Assoċjazzjoni jekk iż-żewġ Partijiet jaqblu dan.
4. Ir-regoli ta' proċedura tal-Kumitat ta' Stabbilizzazzjoni u Assoċjazzjoni huma mehmuża ma' din id-Deċiżjoni.
Magħmul fi
Għall-Kunsill ta' Stabbilizzazzjoni u Assoċjazzjoni
Il-President
(*1) Dan l-isem huwa mingħajr preġudizzju għall-pożizzjonijiet dwar l-istatus, u huwa konformi mal-UNSCR 1244/1999 u l-Opinjoni tal-QIĠ dwar id-dikjarazzjoni tal-indipendenza tal-Kosovo.
ANNESS
għad-
DEĊIŻJONI Nru 1/2016 TAL-KUNSILL TA' STABBILIZZAZZJONI U ASSOĊJAZZJONI BEJN L-UE U L-KOSOVO (*1)
ta' [data]
Regoli ta' Proċedura tal-Kumitat ta' Stabbilizzazzjoni u Assoċjazzjoni
Artikolu 1
Presidenza
Il-Partijiet għandu jkollhom il-presidenza tal-Kumitat ta' Stabbilizzazzjoni u Assoċjazzjoni (“il-Kumitat”) b'mod alternat għal perjodu ta' 12-il xahar. L-ewwel perjodu għandu jibda fid-data tal-ewwel laqgħa tal-Kunsill ta' Stabbilizzazzjoni u Assoċjazzjoni u jintemm fil-31 ta' Diċembru tal-istess sena.
Artikolu 2
Laqgħat
Il-Kumitat għandu jiltaqa' skont kif jitolbu ċ-ċirkostanzi, bil-qbil taż-żewġ Partijiet. Kull laqgħa tal-Kumitat għandha ssir fi żmien u f'post miftiehma miż-żewġ Partijiet. Il-laqgħat tal-Kumitat għandhom jissejħu mill-President.
Artikolu 3
Delegazzjonijiet
Qabel kull laqgħa, il-President għandu jiġi mgħarraf dwar l-għamla maħsuba tad-delegazzjoni għal kull Parti.
Artikolu 4
Segretarjat
Uffiċjal tal-Kummissjoni Ewropea u uffiċjal tal-Kosovo għandhom flimkien ikunu Segretarji tal-Kumitat. Il-komunikazzjonijiet kollha previsti f'din id-Deċiżjoni lill-President tal-Kumitat u mingħandu għandhom jgħaddu għand is-Segretarji tal-Kumitat u s-Segretarji u l-President tal-Kunsill ta' Stabbilizzazzjoni u Assoċjazzjoni.
Artikolu 5
Pubbliku
Sakemm ma jiġix deċiż mod ieħor, il-laqgħat tal-Kumitat ma għandhomx ikunu pubbliċi.
Artikolu 6
Aġendi għal-laqgħat
1. Il-President għandu jfassal aġenda proviżorja għal kull laqgħa. Din għandha tintbagħat mis-Segretarji tal-Kumitat lid-destinatarji msemmija fl-Artikolu 4 mhux aktar tard minn 30 jum qabel il-bidu tal-laqgħa. L-aġenda proviżorja għandha tinkludi l-punti li dwarhom il-President ikun irċieva talba biex dawn jiddaħħlu fl-aġenda mhux aktar tard minn 35 jum tax-xogħol qabel il-bidu tal-laqgħa, għalkemm ma għandhom jitniżżlu punti fuq l-aġenda proviżorja sakemm ma tkunx intbagħtet id-dokumentazzjoni ta' appoġġ lis-Segretarji mhux aktar tard mid-data li fiha tintbagħat l-aġenda. Il-Kumitat jista' jitlob esperti jattendu l-laqgħat tiegħu sabiex jipprovdu informazzjoni fuq suġġetti partikolari. L-aġenda għandha tiġi adottata mill-Kumitat fil-bidu ta' kull laqgħa. Punt ieħor minbarra dawk li jidhru fl-aġenda proviżorja jista' jitqiegħed fuq l-aġenda jekk iż-żewġ Partijiet jaqblu dan.
2. Il-President, bi qbil maż-żewġ Partijiet, jista' jqassar il-limiti ta' żmien speċifikati fil-paragrafu 1 sabiex jitqiesu l-ħtiġijiet ta' każ partikolari.
Artikolu 7
Minuti
Għal kull laqgħa għandhom jittieħdu l-minuti, u għandhom jiġu bbażati fuq taqsira mill-President tal-konklużjonijiet li jkun wasal għalihom il-Kumitat. Meta jiġu approvati mill-Kumitat, il-minuti għandhom jiġu ffirmati mill-President u mis-Segretarji u jiġu arkivjati minn kull wieħed miż-żewġ Partijiet. Kopja tal-minuti għandha tingħata lil kull wieħed mid-destinatarji msemmijin fl-Artikolu 4.
Artikolu 8
Deċiżjonijiet u rakkomandazzjonijiet
Fil-każijiet speċifiċi fejn il-Kumitat jingħata s-setgħa mill-Kunsill ta' Stabbilizzazzjoni u Assoċjazzjoni skont l-Artikolu 128 tal-Ftehim li jieħu deċiżjonijiet jew jagħmel rakkomandazzjonijiet, dawk l-atti jsiru skont l-Artikolu 9 tar-Regoli ta' Proċedura tal-Kunsill ta' Stabbilizzazzjoni u Assoċjazzjoni.
Artikolu 9
Spejjeż
L-Unjoni Ewropea u l-Kosovo għandhom it-tnejn iħallsu l-ispejjeż li jġarrbu għall-parteċipazzjoni tagħhom fil-laqgħat tal-Kumitat, kemm f'dak li għandu x'jaqsam man-nefqa tal-persunal, il-vjaġġi u s-sussistenza u n-nefqa għall-posta u t-telekomunikazzjoni. Spejjeż marbutin mal-interpretazzjoni fil-laqgħat, it-traduzzjoni u r-riproduzzjoni tad-dokumenti kif ukoll spejjeż oħra marbutin mal-organizzazzjoni tal-laqgħat għandhom jiġġarrbu mill-Parti li tkun qed tospita l-laqgħat.
Artikolu 10
Sottokumitati u gruppi speċjali
Il-Kumitat jista' joħloq sottokumitati u gruppi speċjali biex jaħdmu taħt l-awtorità tiegħu. Huma għandhom jirrappurtaw lill-Kumitat wara kull laqgħa li jagħmlu. Il-Kumitat jista' jiddeċiedi li jneħħi kull sottokumitat jew grupp eżistenti, jistipula jew ibiddel it-termini ta' referenza tagħhom jew iwaqqaf aktar sottokumitati jew gruppi oħra biex jgħinuh fil-qadi ta' dmirijietu. Dawn is-sottokumitati u gruppi ma għandu jkollhom l-ebda setgħa ta' teħid ta' deċiżjonijiet.
(*1) Dan l-isem huwa mingħajr preġudizzju għall-pożizzjonijiet dwar l-istatus, u huwa konformi mal-UNSCR 1244/1999 u l-Opinjoni tal-QIĠ dwar id-dikjarazzjoni tal-indipendenza tal-Kosovo.
ANNESS
ABBOZZ
DEĊIŻJONI Nru 1/2016 TAL-KUMITAT TA' STABBILIZZAZZJONI U ASSOĊJAZZJONI UE — KOSOVO (*1)
ta' [jum xahar] 2016
li toħloq sottokumitati u gruppi speċjali
IL-KUMITAT TA' STABBILIZZAZZJONI U ASSOĊJAZZJONI,
Wara li kkunsidra l-Ftehim ta' Stabbilizzazzjoni u Assoċjazzjoni bejn l-Unjoni Ewropea u l-Komunità Ewropea tal-Enerġija Atomika, minn naħa waħda, u l-Kosovo (*1), min-naħa l-oħra, u b'mod partikolari l-Artikolu 130 tiegħu,
Wara li kkunsidra r-regoli ta' proċedura tiegħu, u b'mod partikolari l-Artikolu 10 tiegħu,
ADOTTA DIN ID-DEĊIŻJONI:
Artikolu Uniku
Is-sottokumitati u l-gruppi speċjali mniżżla fl-Anness I huma hawnhekk maħluqa. It-termini ta' referenza tagħhom huma stipulati fl-Anness II.
Magħmul fi …, fi [jum xahar] 2016.
Għall-Kumitat ta' Stabbilizzazzjoni u Assoċjazzjoni
Il-President
(*1) Dan l-isem huwa mingħajr preġudizzju għall-pożizzjonijiet dwar l-istatus, u huwa konformi mal-UNSCR 1244/1999 u l-Opinjoni tal-QIĠ dwar id-dikjarazzjoni tal-indipendenza tal-Kosovo.
ANNESS I
Struttura tas-Sottokumitati Multidixxiplinari
|
Titolu |
Kwistjonijiet |
Artikolu tal-Ftehim |
||
|
Moviment Liberu tal-Merkanzija |
Art. 20 |
||
|
Prodotti Industrijali |
Art. 21-25 |
|||
|
Kwistjonijiet kummerċjali |
Art. 36-49 |
|||
|
Standardizzazzjoni, metroloġija, akkreditazzjoni, ċertifikazzjoni, analiżi tal-konformità u sorveljanza tas-suq |
Art. 80 |
|||
|
Kooperazzjoni industrijali |
Art. 99 |
|||
|
SMEs |
Art. 100 |
|||
|
Turiżmu |
Art. 101 |
|||
|
Dwana |
Art. 104 |
|||
|
Tassazzjoni |
Art. 105 |
|||
|
Regoli ta' oriġini |
Protokoll III |
|||
|
Assistenza amministrattiva reċiproka fi kwistjonijiet doganali |
Protokoll IV |
|||
|
Prodotti agrikoli |
Art. 26, 28, 29, 33, 34 u 37 |
||
|
Prodotti tas-sajd |
Art. 31 u 32, Annessi IV u V |
|||
|
Prodotti agrikoli pproċessati |
Art. 27 u Protokoll I |
|||
|
Inbid |
Art. 30 u Protokoll II |
|||
|
Il-protezzjoni tal-indikazzjonijiet ġeografiċi għal prodotti agrikoli u prodotti tas-sajd, u għall-prodotti tal-ikel li mhumiex inbid u spirti |
Art. 35 |
|||
|
Is-settur agrikolu u agroindustrijali, kwistjonijiet veterinarji u fitosanitarji |
Art. 102 |
|||
|
Kooperazzjoni fis-sajd |
Art. 103 |
|||
|
Dritt ta' stabbiliment |
Art. 50-54 |
||
|
Għoti ta' servizzi |
Art. 55-60 |
|||
|
Mistoqsijiet oħrajn relatati mat-Titolu V tal-Ftehim |
Art. 61-73 |
|||
|
Approssimazzjoni tal-leġislazzjoni u l-infurzar tal-liġi |
Art. 74 |
|||
|
Kompetizzjoni |
Art. 75-76 |
|||
|
Il-proprjetà intellettwali, industrijali u kummerċjali |
Art. 77-78 |
|||
|
Akkwist pubbliku |
Art. 79 |
|||
|
Servizzi bankarji, tal-assigurazzjoni u servizzi finanzjarji oħra |
Art. 96 |
|||
|
Protezzjoni tal-konsumatur |
Art. 81 |
|||
|
Pagamenti kurrenti u l-moviment ta' kapital |
Art. 64-66 |
||
|
Politika ekonomika |
Art. 94 |
|||
|
Kooperazzjoni statistika |
Art. 95 |
|||
|
Promozzjoni u protezzjoni tal-investiment |
Art. 98 |
|||
|
|
Kooperazzjoni finanzjarja |
Art. 121-125 |
||
|
Tisħiħ tal-istituzzjonijiet u l-istat tad-dritt |
Art. 83 |
||
|
Id-drittijiet fundamentali, inkluża l-ġlieda kontra d-diskriminazzjoni u l-protezzjoni tad-data |
Art. 3, 4 u 84 |
|||
|
Il-kooperazzjoni ġudizzjarja fi kwistjonijiet ċivili u kriminali |
Art. 83 |
|||
|
Il-viża, il-kontroll tal-fruntieri/konfini, l-asil u l-migrazzjoni |
Art. 85-86 |
|||
|
Prevenzjoni u kontroll tal-immigrazzjoni illegali; riammissjoni |
Art. 87-88 |
|||
|
Ħasil tal-flus |
Art. 89 |
|||
|
Drogi |
Art. 90 |
|||
|
Ġlieda kontra t-terroriżmu |
Art. 92 |
|||
|
Il-prevenzjoni tal-kriminalità organizzata u attivitajiet illegali oħrajn |
Art. 91 |
|||
|
|
|
||
|
|
Kundizzjonijiet tax-xogħol u opportunitajiet indaqs |
Art. 82 |
||
|
Kooperazzjoni soċjali |
Art. 106 |
|||
|
L-edukazzjoni u t-taħriġ |
Art. 107 |
|||
|
Kooperazzjoni kulturali |
Art. 108 |
|||
|
Kooperazzjoni fil-qasam awdjoviżiv |
Art. 109 |
|||
|
|
Is-soċjetà tal-informazzjoni |
Art. 110 |
||
|
|
In-netwerks u s-servizzi tal-komunikazzjoni elettronika |
Art. 111 |
||
|
|
L-informazzjoni u l-komunikazzjoni |
Art. 112 |
||
|
|
Riċerka u żvilupp teknoloġiku |
Art. 118 |
||
|
Trasport |
Art. 113 |
||
|
|
Enerġija |
Art. 114 |
||
|
|
Ambjent |
Art. 115 |
||
|
|
Tibdil fil-klima |
Art. 116 |
||
|
|
Protezzjoni ċivili |
Art. 117 |
||
|
Żvilupp reġjonali u lokali |
Art. 119 |
L-Istruttura tal-Gruppi Speċjali
|
Titolu |
Kwistjonijiet |
Artikolu tal-Ftehim |
|
Grupp Speċjali għar-riforma tal-amministrazzjoni pubblika |
Riforma tal-amministrazzjoni pubblika |
Art. 120 |
|
Grupp Speċjali dwar in-normalizzazzjoni (1) |
Titjib viżibbli u sostenibbli tar-relazzjonijiet tal-Kosovo mas-Serbja, u kooperazzjoni effettiva mal-missjoni tal-PSDK tal-UE filwaqt li tkun fis-seħħ |
Art. 5 |
(1) Dan il-grupp speċjali ma jiħux post id-djalogu bejn Pristina u Belgrad imwettaq taħt il-patroċinju tar-Rappreżentant Għoli.
ANNESS II
Termini ta' Referenza tas-Sottokumitati u l-Gruppi Speċjali UE — Kosovo (*1)
Għamla u President
Is-sottokumitati u l-gruppi speċjali dwar ir-riforma tal-amministrazzjoni pubblika (RAP) u dwar in-normalizzazzjoni għandhom ikunu magħmula minn rappreżentanti tal-Kummissjoni Ewropea, is-Servizz Ewropew għall-Azzjoni Esterna fil-każ tal-grupp speċjali dwar in-normalizzazzjoni, u r-rappreżentanti tal-Kosovo. Dawn għandhom jitmexxew miż-żewġ partijiet b'mod alternat. L-Istati Membri ser jiġu infurmati u mistiedna għal-laqgħat tas-sottokumitati u tal-gruppi speċjali dwar ir-RAP u n-normalizzazzjoni.
Segretarjat
Uffiċjal tal-Kummissjoni Ewropea, jew tas-Servizz Ewropew għall-Azzjoni Esterna fil-każ tal-grupp speċjali dwar in-normalizzazzjoni, u uffiċjal tal-Kosovo għandhom flimkien ikunu segretarji ta' kull wieħed mis-sottokumitati u l-gruppi speċjali.
Il-komunikazzjonijiet kollha dwar is-sottokumitati u l-gruppi speċjali għandhom jintbagħtu lis-segretarji tas-sottokumitat rilevanti u tal-grupp speċjali.
Laqgħat
Is-sottokumitati u l-gruppi speċjali għandhom jiltaqgħu kull meta ċ-ċirkustanzi jitolbu dan, bil-qbil taż-żewġ partijiet. Kull laqgħa ta' sottokumitat jew grupp speċjali għandha tinżamm f'ħin u post li jaqblu dwarhom iż-żewġ Partijiet.
Jekk iż-żewġ Partijiet jaqblu, is-sottokumitati u l-gruppi speċjali jistgħu jistiednu esperti għal-laqgħat tagħhom biex jipprovdu l-informazzjoni speċifika mitluba.
Aġenda u dokumenti ta' appoġġ
Il-President u s-Segretarji għandhom ifasslu aġenda proviżorja għal kull laqgħa mhux aktar tard minn 30 jum tax-xogħol qabel il-bidu tal-laqgħa.
L-aġenda proviżorja għandha tinkludi punti li dwarhom is-segretarji jkunu rċevew talba biex jiġu inklużi fl-aġenda mhux aktar tard minn 35 jum qabel il-bidu tal-laqgħa.
Wara l-qbil tal-aġenda proviżorja għal kull laqgħa u mhux aktar tard minn għaxart ijiem tax-xogħol qabel il-bidu tal-laqgħa s-segretarju f'isem il-Kosovo għandu jibgħat lis-segretarju, f'isem il-Kummissjoni Ewropea, jew is-Servizz Ewropew ta' Azzjoni Esterna fil-każ tal-grupp speċjali dwar in-normalizzazzjoni, id-dokumentazzjoni meħtieġa bil-miktub wara l-punti miftiehma fl-aġenda proviżorja.
Jekk id-data ta' għeluq imsemmija fit-tielet paragrafu ma tiġix irrispettata, il-laqgħa titħassar awtomatikament mingħajr avviż ieħor.
Suġġetti
Is-sottokumitati għandhom jiddiskutu kwistjonijiet marbuta mal-oqsma tal-Ftehim kif imniżżla fl-istruttura tas-sottokumitat multidixxiplinari. Il-progress fl-approssimazzjoni, l-implimentazzjoni u l-infurzar tal-leġislazzjoni għandhom jiġi evalwat fis-suġġetti kollha. Is-sottokumitati għandhom jeżaminaw kull problema li tista' tinqala' fl-oqsma rilevanti tagħhom u għandhom jissuġġerixxu passi possibbli li għandhom jittieħdu.
Is-sottokumitati għandhom iservu wkoll ta' fora fejn jiġi ċċarat aktar l-acquis u jeżaminaw il-progress li sar mill-Kosovo biex jikkonforma mal-acquis skont l-impenji li ttieħdu skont il-Ftehim.
Il-grupp speċjali għar-RAP jiddiskuti kwistjonijiet marbuta mar-riforma tal-amministrazzjoni pubblika u jissuġġerixxi passi possibbli li għandhom jittieħdu. Il-grupp speċjali dwar in-normalizzazzjoni għandu jiddiskuti kwistjonijiet marbutin mat-titjib viżibbli u sostenibbli tar-relazzjonijiet tal-Kosovo mas-Serbja, u kooperazzjoni effettiva mal-missjoni tal-Politika Ewropea ta' Sigurtà u Difiża waqt li tkun fis-seħħ, u jissuġġerixxi passi possibbli li għandhom jittieħdu.
Minuti
Wara kull laqgħa għandhom jittieħdu l-minuti u jintlaħaq qbil dwarhom. Kopja tal-minuti għandha tingħata mis-segretarju tas-sottokumitat jew tal-grupp speċjali lis-Segretarju tal-Kumitat ta' Stabbilizzazzjoni u Assoċjazzjoni.
Pubbliku
Sakemm ma jiġix deċiż mod ieħor, il-laqgħat tas-sottokumitati u tal-grupp speċjali ma għandhom ikunu pubbliċi.
(*1) Dan l-isem huwa mingħajr preġudizzju għall-pożizzjonijiet dwar l-istatus, u huwa konformi mal-UNSCR 1244/1999 u l-Opinjoni tal-QIĠ dwar id-dikjarazzjoni tal-indipendenza tal-Kosovo.