18.6.2016 |
MT |
Il-Ġurnal Uffiċjali tal-Unjoni Ewropea |
L 161/35 |
DEĊIŻJONI TAL-KUNSILL (UE) 2016/979
tal-20 ta' Mejju 2016
rigward l-adeżjoni tal-Kroazja mal-Konvenzjoni li tfasslet fuq il-bażi tal-Artikolu K.3 tat-Trattat dwar l-Unjoni Ewropea, dwar l-assistenza reċiproka u l-kooperazzjoni bejn l-amministrazzjonijiet doganali
IL-KUNSILL TAL-UNJONI EWROPEA,
Wara li kkunsidra t-Trattat dwar l-Unjoni Ewropea,
Wara li kkunsidra t-Trattat tal-Adeżjoni tal-Kroazja, u b'mod partikolari l-Artikolu 3(4) u (5) tiegħu,
Wara li kkunsidra ir-rakkomandazzjoni mill-Kummissjoni Ewropea,
Wara li kkunsidra l-opinjoni tal-Parlament Ewropew (1),
Billi:
(1) |
Il-Konvenzjoni mfassla fuq il-bażi tal-Artikolu K.3 tat-Trattat dwar l-Unjoni Ewropea, dwar l-assistenza reċiproka u l-kooperazzjoni bejn l-amministrazzjonijiet doganali (2) (“il-Konvenzjoni”) ġiet iffirmata fi Brussell fit-18 ta' Diċembru 1997. Din tidħol fis-seħħ 90 jum wara n-notifika tat-tlestija tal-proċeduri kostituzzjonali għall-adozzjoni tal-Konvenzjoni minn dak l-Istat, Membru tal-Unjoni Ewropea fil-mument tal-adozzjoni mill-Kunsill tal-Att li jistabbilixxi l-Konvenzjoni, li jkun l-aħħar wieħed li jikkompleta dik il-formalità. |
(2) |
F'konformità mal-Artikolu 32(4) tal-Konvenzjoni, sa meta l-Konvenzjoni tidħol fis-seħħ, kull Stat Membru jista', meta jagħti n-notifika msemmija fl-Artikolu 32(2) tal-Konvenzjoni, jew fi kwalunkwe żmien ieħor wara dan, jiddikjara li sa fejn ikun ikkonċernat, il-Konvenzjoni għandha tapplika għar-relazzjonijiet tiegħu mal-Istati Membri li jkunu għamlu l-istess dikjarazzjoni. |
(3) |
L-Artikolu 3(4) tal-Att tal-Adeżjoni tal-Kroazja (“l-Att tal-Adeżjoni”) jistipula li l-Kroazja għandha taderixxi mal-konvenzjonijiet u l-protokolli elenkati fl-Anness I għall-Att tal-Adeżjoni. Dawk il-konvenzjonijiet u protokolli jinkludu, fost l-oħrajn, il-Konvenzjoni. Il-Konvenzjoni għandha tidħol fis-seħħ fir-rigward tal-Kroazja fid-data determinata mill-Kunsill. |
(4) |
F'konformità mal-Artikolu 3(5) tal-Att tal-Adeżjoni, il-Kunsill għandu jiddeċiedi li jagħmel l-aġġustamenti kollha li huma meħtieġa minħabba l-adeżjoni tal-Kroazja mal-konvenzjonijiet u mal-protokolli elenkati fl-Anness I tal-Att tal-Adeżjoni, |
ADOTTA DIN ID-DEĊIŻJONI:
Artikolu 1
Il-Konvenzjoni għandha tidħol fis-seħħ fir-rigward tal-Kroazja fl-ewwel jum tal-ewwel xahar wara d-data tal-pubblikazzjoni ta' din id-Deċiżjoni.
Artikolu 2
It-test tal-Konvenzjoni (3) bil-Kroat għandu jkun awtentiku taħt l-istess kondizzjonijiet bħat-testijiet tal-Konvenzjoni bil-lingwi l-oħra.
Artikolu 3
Din id-Deċiżjoni għandha ssir effettiva fil-jum wara dak tal-pubblikazzjoni tagħha f'Il-Ġurnal Uffiċjali tal-Unjoni Ewropea.
Magħmul fi Brussell, l-20 ta' Mejju 2016.
Għall-Kunsill
Il-President
K.H.D.M. DIJKHOFF
(1) L-Opinjoni tat-28 ta' April 2016 (għadha ma ġietx ippubblikata fil-Ġurnal Uffiċjali).
(3) It-test bil-Kroat ġie ppubblikat f'edizzjoni speċjali tal-Ġurnal Uffiċjali (Kapitolu 19, Volum 14, paġna 156).