(1)

Skont l-Artikolu 78(3) tat-Trattat dwar il-Funzjonament tal-Unjoni Ewropea (TFUE), f'każ li Stat Membru wieħed jew iktar isibu ruħhom f'sitwazzjoni ta' emerġenza kkaratterizzata minn dħul f'daqqa ta' ċittadini ta' pajjiżi terzi, il-Kunsill, fuq proposta mill-Kummissjoni u wara konsultazzjoni mal-Parlament Ewropew, jista' jadotta miżuri proviżorji għall-benefiċċju tal-Istat Membru jew l-Istati Membri kkonċernati.

(2)

Skont l-Artikolu 80 TFUE, il-politiki tal-Unjoni fil-qasam tal-kontrolli fil-fruntieri, tal-ażil u tal-immigrazzjoni u l-implimentazzjoni tagħhom għandhom jiġu rregolati mill-prinċipju tas-solidarjetà u tal-kondiviżjoni ġusta tar-responsabbiltà bejn l-Istati Membri, u l-atti tal-Unjoni adottati f'dan il-qasam għandhom jinkludu miżuri xierqa għall-applikazzjoni ta' dan il-prinċipju.

(3)

Abbażi tal-Artikolu 78(3) TFUE, il-Kunsill adotta żewġ Deċiżjonijiet li jistabbilixxu miżuri proviżorji fil-qasam tal-protezzjoni internazzjonali għall-benefiċċju tal-Italja u tal-Greċja. Taħt id-Deċiżjoni tal-Kunsill (UE) 2015/1523 (2), 40 000 applikant għall-protezzjoni internazzjonali għandhom jiġu rilokati mill-Italja u mill-Greċja għall-Istati Membri l-oħra. Taħt id-Deċiżjoni tal-Kunsill (UE) 2015/1601 (3), 120 000 applikant għall-protezzjoni internazzjonali għandhom jiġu rilokati mill-Italja u mill-Greċja għall-Istati Membri l-oħra.

(4)

L-Artikolu 9 tad-Deċiżjoni (UE) 2015/1523 u l-Artikolu 9 tad-Deċiżjoni (UE) 2015/1601 jipprevedu li, fl-eventwalità ta' sitwazzjoni ta' emerġenza kkaratterizzata minn dħul f'daqqa ta' ċittadini ta' pajjiżi terzi fi Stat Membru, il-Kunsill jista', fuq proposta mill-Kummissjoni u wara li jikkonsulta mal-Parlament Ewropew, jadotta miżuri proviżorji għall-benefiċċju tal-Istat Membru kkonċernat, skont l-Artikolu 78(3) TFUE. Tali miżuri jistgħu jinkludu, meta jkun jixraq, sospensjoni tal-parteċipazzjoni ta' dak l-Istat Membru fir-rilokazzjoni kif previst f'dawk id-Deċiżjonijiet, kif ukoll miżuri possibbli ta' kumpens għall-Italja u għall-Greċja.

(5)

L-Iżvezja qiegħda taffaċċja sitwazzjoni ta' emerġenza kkaratterizzata minn dħul f'daqqa ta' ċittadini ta' pajjiżi terzi fit-territorju tagħha minħabba tibdil qawwi fil-flussi migratorji. Fit-8 ta' Diċembru 2015, l-Iżvezja talbet formalment is-sospensjoni tal-obbligi tagħha taħt id-Deċiżjonijiet (UE) 2015/1523 u (UE) 2015/1601.

(6)

Iż-żieda konsiderevoli fil-qsim irregolari tal-fruntieri fl-Unjoni u fil-movimenti sekondarji madwar l-Unjoni wasslet għal żieda qawwija fl-Iżvezja fl-għadd ta' applikazzjonijiet għall-protezzjoni internazzjonali, prinċipalment minn individwi li daħlu fl-Unjoni mill-Italja u mill-Greċja.

(7)

Iċ-ċifri tal-Eurostat jikkonfermaw żieda qawwija fl-Iżvezja fl-għadd ta' applikanti għall-protezzjoni internazzjonali. L-għadd ta' applikanti għall-protezzjoni internazzjonali żdied b'aktar minn 60 % minn 68 245 applikant għall-perjodu mill-1 ta' Jannar sal-31 ta' Ottubru 2014 għal 112 040 applikant għall-perjodu mill-1 ta' Jannar sal-31 ta' Ottubru 2015.

(8)

L-għadd ta' applikanti għall-protezzjoni internazzjonali fix-xahar reċentement laħaq livell saħansitra ogħla: irdoppja bejn Awwissu (11 735) u Settembru (24 261) u laħaq 39 055 f'Ottubru 2015 (żieda ta' 61 % minn Settembru).

(9)

L-Iżvezja, kellha bil-bosta l-akbar għadd ta' applikanti għall-protezzjoni internazzjonali per capita fl-Unjoni fl-2015, bi 11 503 applikant għal kull miljun abitant.

(10)

L-Iżvezja qiegħda wkoll taffaċċja sitwazzjoni diffiċli minħabba ż-żieda sinifikanti reċenti fl-għadd ta' minorenni mhux akkumpanjati, b'wieħed minn kull erba' applikanti jiddikjara li huwa minorenni mhux akkumpanjat.

(11)

Is-sitwazzjoni attwali poġġiet pressjoni ferm sinifikanti fuq is-sistema tal-ażil u l-migrazzjoni tal-Iżvezja, b'konsegwenzi prattiċi serji fil-post fir-rigward tal-kondizzjonijiet ta' akkoljenza u tal-kapaċità tas-sistema tal-ażil u l-migrazzjoni li tittratta l-applikazzjonijiet. Bħala kontribut għat-taffija tal-pressjoni sinifikanti li l-Iżvezja qiegħda taffaċċja, l-obbligi tal-Iżvezja bħala Stat Membru ta' rilokazzjoni taħt id-Deċiżjonijiet (UE) 2015/1523 u (UE) 2015/1601 għandhom jiġu sospiżi għal sena.

(12)

Is-sospensjoni tal-obbligi tal-Iżvezja għandha tiġi kkomplementata, fejn xieraq, minn miżuri ta' sostenn opereazzjonali kkoordinati mill-Uffiċċju Ewropew ta' Appoġġ fil-qasam tal-Asil (EASO) u minn Aġenziji oħra rilevanti.

(13)

L-Iżvezja għandha tippreżenta pjan direzzjonali lill-Kunsill u lill-Kummissjoni li jindika l-miżuri li ser tieħu sabiex tiżgura l-effettività tas-sistema tagħha tal-ażil u l-migrazzjoni u sabiex terġa' tibda taqdi l-obbligi tagħha skont id-Deċiżjonijiet (UE) 2015/1523 u (UE) 2015/1601 ladarba s-sospensjoni tal-obbligi tagħha ma tibqax effettiva.

(14)

Peress li l-objettivi ta' din id-Deċiżjoni ma jistgħux jintlaħqu b'mod suffiċjenti mill-Istati Membri iżda jistgħu minflok, minħabba l-iskala u l-effetti tal-azzjoni, jintlaħqu aħjar fil-livell tal-Unjoni, l-Unjoni tista' tadotta miżuri, f'konformità mal-prinċipju tas-sussidjarjetà kif stipulat fl-Artikolu 5 tat-Trattat tal-Unjoni Ewropea (TUE). F'konformità mal-prinċipju tal-proporzjonalità, kif stabbilit f'dak l-Artikolu, din id-Deċiżjoni ma tmurx lil hinn minn dak li huwa meħtieġ sabiex jintlaħqu dawk l-objettivi.

(15)

Din id-Deċiżjoni tirrispetta d-drittijiet fundamentali u tosserva l-prinċipji rikonoxxuti mill-Karta tad-Drittijiet Fundamentali tal-Unjoni Ewropea.

(16)

F'konformità mal-Artikoli 1 u 2 tal-Protokoll Nru 21 dwar il-pożizzjoni tar-Renju Unit u tal-Irlanda fir-rigward tal-ispazju ta' libertà, sigurtà u ġustizzja, anness mat-TUE u mat-TFUE, u mingħajr preġudizzju għall-Artikolu 4 ta' dak il-Protokoll, dawk l-Istati Membri mhumiex qiegħdin jieħdu sehem fl-adozzjoni ta' din id-Deċiżjoni u mhumiex marbut biha jew soġġetti għall-applikazzjoni tagħha.

(17)

F'konformità mal-Artikoli 1 u 2 tal-Protokoll Nru 22 dwar il-pożizzjoni tad-Danimarka, anness mat-TUE u mat-TFUE, id-Danimarka mhijiex qiegħda tieħu sehem fl-adozzjoni ta' din id-Deċiżjoni u mhijiex marbuta biha jew soġġetta għall-applikazzjoni tagħha.

(18)

Fid-dawl tal-urġenza tas-sitwazzjoni, din id-Deċiżjoni għandha tidħol fis-seħħ fil-jum wara dak tal-pubblikazzjoni tagħha f'Il-Ġurnal Uffiċjali tal-Unjoni Ewropea.