(1)

Fl-20 ta' Diċembru 2014, il-Kummissjoni Ewropea (“il-Kummissjoni”) bdiet investigazzjoni antidumping dwar l-importazzjonijiet fl-Unjoni ta' siliko-manganiż li joriġina mill-Indja (“il-pajjiż konċernat”) fuq il-bażi tal-Artikolu 5 tar-Regolament bażiku. Hija ppubblikat Notifika ta' Bidu f'Il-Ġurnal Uffiċjali tal-Unjoni Ewropea (2) (“in-Notifika ta' Bidu”).

(2)

Il-Kummissjoni nediet l-investigazzjoni wara lment li tressaq fl-10 ta' Novembru 2014 mill-Comité de Liaison des Industries de Ferro-Alliages (“Euroalliages” jew “l-ilmentatur”) f'isem tliet produtturi tal-Unjoni. L-ilmentatur jirrappreżenta madwar 25 % tal-produzzjoni totali tal-Unjoni tas-siliko-manganiż. L-ilment kien fih evidenza ta' dumping u ta' dannu materjali li jirriżulta li kienet biżżejjed biex tiġġustifika l-bidu tal-investigazzjoni.

(3)

Fin-Notifika ta' Bidu, il-Kummissjoni stiednet lill-partijiet interessati jikkuntattjawha sabiex jipparteċipaw fl-investigazzjoni. Minbarra dan, il-Kummissjoni speċifikament informat lill-produtturi magħrufa l-oħra tal-Unjoni, lill-produtturi esportaturi magħrufa, l-importaturi u l-utenti, lill-assoċċjazzjonijiet magħruf li huma kkonċernati u lill-awtoritajiet Indjani dwar il-bidu tal-investigazzjoni u stednithom jipparteċipaw.

(4)

Il-partijiet interessati kellhom l-opportunità li jikkumentaw dwar il-bidu tal-investigazzjoni u li jitolbu seduta ta' smigħ mal-Kummissjoni u/jew mal-Uffiċjal tas-Seduta fil-proċedimenti kummerċjali.

(5)

Fin-Notifika ta' Bidu, il-Kummissjoni ddikjarat li hija tista' tieħu kampjun ta' produtturi esportaturi fl-Indja u importaturi mhux relatati skont l-Artikolu 17 tar-Regolament bażiku.

(6)

Minħabba l-għadd limitat ta' produtturi magħrufa tal-Unjoni, ma kienx meħtieġ li jittieħed kampjun. Il-produtturi magħrufa kollha tal-Unjoni ġew infurmati dwar il-bidu tal-investigazzjoni u ġew mistiedna jippreżentaw ruħhom u jipparteċipaw fl-investigazzjoni.

(7)

Sabiex il-Kummissjoni tkun tista' tiddeċiedi jekk hux neċessarju li jittieħed kampjun u, jekk iva, tagħżel kampjun, l-importaturi mhux relatati kollha ntalbu jippreżentaw ruħhom mal-Kummissjoni u jipprovdu l-informazzjoni speċifikata fin-Notifika ta' Bidu.

(8)

Erba' importaturi mhux relatati wieġbu lill-Kummissjoni iżda tejn biss ipprovdew l-informazzjoni mitluba u qablu li jkunu inklużi fil-kampjun. Minħabba n-numru żgħir, il-Kummissjoni ddeċidiet li l-kampjunar ma kienx meħtieġ.

(9)

Biex il-Kummissjoni tkun tista' tiddeċiedi jekk il-kampjunar huwiex meħtieġ u, jekk dan ikun il-każ, tagħżel kampjun, il-produtturi esportaturi kollha fl-Indja ntalbu jippreżentaw ruħhom lill-Kummissjoni u jipprovdu l-informazzjoni speċifikata fin-Notifika ta' Bidu.

(10)

Oriġinarjament, 21 produttur esportatur wieġbu għall-kwestjonarju tat-teħid tal-kampjuni sal-iskadenza mogħtija. Huma rrapportaw volum totali ta' bejgħ ta' esportazzjoni li skont id-dejta tal-Eurostat kien ikopri 48 % tal-importazzjonijiet totali mill-Indja matul il-perjodu tal-investigazzjoni.

(11)

Sussegwentement, 13-il kumpanija addizzjonali ppreżentaw il-formoli tat-teħid tal-kampjun u esprimew ir-rieda tagħhom li jikkooperaw. Il-Kummissjoni kkuntattjat lil dawn il-kumpaniji u talbithom jipprovdu aktar informazzjoni dwar l-esportazzjonijiet tagħhom lejn l-Unjoni. Madankollu, wieġbu u pprovdew l-informazzjoni mitluba 11-il kumpanija biss.

(12)

Wara rakkomandazzjoni mill-Uffiċjal tas-Seduta, il-Kummissjoni ddeċidiet li tikkunsidra lil dawn il-kumpaniji bħala produtturi esportaturi li kkooperaw fl-investigazzjoni wkoll u l-kumpaniji kienu infurmati b'dan fil-21 ta' Mejju 2015. B'konsegwenza, il-volum totali ta' esportazzjonijiet mill-produtturi esportaturi kollha li kkooperaw kien jirrappreżenta 60 % tal-importazzjonijiet totali mill-Indja (dejta tal-Eurostat).

(13)

Għall-ewwel kien magħżul kampjun li jikkonsisti minn erba' gruppi ta' produtturi esportaturi, li jirrappreżentaw l-akbar volum rappreżentattiv ta' esportazzjonijiet li seta' raġonevolment jiġi investigat fiż-żmien disponibbli. Dan il-kampjun kien jirrappreżenta 31 % tal-volum totali tal-esportazzjonijiet mill-Indja lejn l-Unjoni skont id-dejta tal-Eurostat u 51 % tal-volum totali tal-esportaturi li kkooperaw.

(14)

Sussegwentement, waħda mill-erba' kumpaniji fil-kampjun infurmat lill-Kummissjoni li ma kinitx f'pożizzjoni li tkompli bil-kooperazzjoni tagħha bħala kumpanija inkluża fil-kampjun. Għaldaqstant, din il-kumpanija tneħħiet mill-kampjun. Madankollu, it-tliet kumpaniji li fadal kienu għadhom jirrappreżentaw madwar 43 % tat-total tal-esportazzjonijiet mill-Indja lejn l-Unjoni mill-produtturi esportaturi Indjani li kkoperaw u madwar 26 % tal-importazzjonijiet totali skont id-dejta tal-Eurostat u għalhekk il-kampjun baqa' meqjus bħala rappreżentattiv.

(15)

L-ilmentatur iddikjara li l-kampjun ma kienx rappreżentattiv minħabba li t-tipi ta' esportazzjonijiet tal-prodott ikkonċernat ta' tnejn mit-tliet kumpaniji fil-kampjun ma kinux jirrappreżentaw il-maġġoranza l-kbira tal-esportazzjonijiet Indjani. Barra minn hekk, l-ilmentatur argumenta li l-kampjun tat-tliet kumpaniji li fadal jirrappreżenta biss 13 % tat-total tal-esportazzjonijiet Indjani lejn l-Unjoni.

(16)

Għaldaqstant, l-ilmentatur talab reviżjoni tal-kampjun jew l-applikazzjoni tal-Artikolu 18 tar-Regolament bażiku f'każ li ma jkunx hemm ħin biżżejjed biex jintgħażel kampjun ġdid.

(17)

L-argumenti tal-ilmentatur ma jistgħux jiġu aċċettati. L-ewwel nett, il-kampjun jirrappreżenta fil-fatt 26 % tat-total tal-esportazzjonijiet Indjani lejn l-Unjoni u mhux 13 %, kif kien ikkomunikat b'mod żbaljat lill-partijiet interessati fid-dokument ta' informazzjoni msemmi fil-premessa 26 hawn taħt. It-tieni nett, il-kriterju użat għall-għażla tal-kampjun huwa l-akbar volum esportat lejn l-Unjoni f'konformità mal-Artikolu 17 tar-Regolament bażiku. Il-fatt li tnejn mill-kumpaniji fil-kampjun ma jipproduċux u ma jesportawx it-tipi kollha tal-prodott ma jagħmilx il-kampjun mhux rappreżentattiv billi kumplessivament il-kampjun ikopri t-tipi kollha ta' siliko-manganiż. It-tielet nett, l-ilmentatur stess argumenta li “il-kwalitajiet u d-daqsijiet kollha tas-siliko-manganiż għandhom jitqiesu bħala prodott wieħed minħabba li jaqsmu l-istess karatteristiċi fiżiċi u kimiċi ewlenin u l-istess użi ewlenin” (3). Ir-raba' nett, il-fatt li kumpanija waħda fil-kampjun b'volumi relattivament żgħar ta' esportazzjoni ma baqgħetx tikkoopera, x'aktarx li ma kienx se jaffettwa b'mod materjali r-riżultat tal-investigazzjoni jew jikkostitwixxi grad materjali ta' nuqqas ta' kooperazzjoni mill-kampjun.

(18)

Minn dan jirriżulta li t-talba tal-ilmentatur biex jew jintgħażel kampjun ġdid jew li jiġi applikat l-Artikolu 18 tar-Regolament bażiku għandha tiġi miċħuda.

(19)

Barra minn hekk, matul seduta li saret fit-18 ta' Novembru 2015, l-ilmentatur argumenta li l-esportazzjonijiet ta' siliko-manganiż ta' kwalità baxxa lejn l-Unjoni għandhom jiġu esklużi mill-volumi tal-esportazzjoni tal-produtturi esportaturi fil-kampjun peress li dan it-tip ta' prodott ta' kwalità baxxa ma jistax jintuża bħala tali mill-funderiji tal-azzar Ewropej. Il-Kummissjoni tfakkar li s-siliko-manganiż ta' kwalità baxxa huwa parti mill-prodott ikkonċernat u li volum rilevanti ġie esportat lejn l-Unjoni. Għalhekk, it-talba għall-esklużjoni ma tistax tiġi aċċettata. Fi kwalunkwe każ, anki jekk tiġi aċċettata, l-impatt fuq ir-rappreżentattività tal-kampjun ikun żgħir ħafna peress li l-kampjun xorta jkun jirrappreżenta madwar kwart tat-total tal-esportazzjonijiet Indjani lejn l-Unjoni.

(20)

Ħames produtturi esportaturi mill-Indja ppreżentaw tweġibiet għall-kwestjonarju u talbu li jiġi determinat il-marġini ta' dumping individwali tagħhom.

(21)

Il-Kummissjoni kkunsidrat li kien imprattikabbli, fid-dawl taċ-ċirkostanzi tal-investigazzjoni, li tilqa' tali talbiet.

(22)

Il-Kummissjoni bagħtet kwestjonarji lit-tliet produtturi esportaturi jew gruppi ta' produtturi kampjunati fl-Indja, lill-produtturi magħrufa kollha tal-Unjoni u lill-importaturi u l-utenti li talbu dan.

(23)

Waslu tweġibiet għall-kwestjonarju mingħand it-tliet produtturi esportaturi jew il-gruppi ta' produtturi kampjunati fl-Indja, mingħand żewġ produtturi tal-Unjoni, żewġ importaturi mhux relatati fl-Unjoni u ħames utenti fl-Unjoni.

(24)

Il-Kummissjoni fittxet u vverifikat l-informazzjoni kollha li tqieset neċessarja għal determinazzjoni proviżorja ta' dumping, il-ħsara li tirriżulta u l-interess tal-Unjoni. Iż-żjarat ta' verifika skont l-Artikolu 16 tar-Regolament bażiku saru fil-bini tal-kumpaniji li ġejjin:

(25)

L-investigazzjoni tad-dumping u l-ħsara kopriet il-perjodu mill-1 ta' Ottubru 2013 sat-30 ta' Settembru 2014 (“il-perjodu tal-investigazzjoni” jew “PI”). L-eżami tat-tendenzi rilevanti gћall-valutazzjoni tal-ħsara kopra l-perjodu mill-1 ta' Jannar 2011 sa tmiem il-perjodu tal-investigazzjoni (“il-perjodu taħt kunsiderazzjoni”).

(26)

Il-Kummissjoni ddeċidiet li ma timponix miżuri proviżorji. Il-partijiet interessati kollha rċevew dokument ta' informazzjoni li jispjega r-raġunijiet għan-nuqqas ta' impożizzjoni ta' miżuri proviżorji. Diversi partijiet interessati ressqu kummenti bil-miktub dwar is-sejbiet spjegati fid-dokument informattiv. Il-partijiet li talbu dan, ingħataw l-opportunità li jinstemgħu. Fit-8 ta' Diċembru 2015 saret seduta ta' smigħ mal-ilmentatur fil-preżenza tal-Uffiċjal tas-Seduta fi proċedimenti kummerċjali.

(27)

Sussegwentement, il-Kummissjoni infurmat lill-partijiet kollha bil-fatti u l-kunsiderazzjonijiet essenzjali li fuq il-bażi tagħhom kellha l-ħsieb li ma timponix dazju antidumping definittiv fuq l-importazzjonijiet lejn l-Unjoni ta' siliko manganiż li joriġina mill-Indja. Il-partijiet kollha ngħataw perjodu li fih setgħu jikkummentaw dwar id-divulgazzjoni finali. Fl-20 ta' Jannar 2016 saret seduta ta' smigħ oħra mal-ilmentatur fil-preżenza tal-Uffiċjal tas-Seduta fi proċedimenti kummerċjali. F'din is-seduta, l-ilmentatur kien akkumpanjat mill-produttur tal-Unjoni Spanjol, il-FerroAtlantica, li ma kienx irrappreżentat mill-ilmentatur u li ma kienx ikkoopera matul il-proċediment, kif spjegat hawn taħt fit-Taqsima 5.

(28)

Il-kummenti ppreżentati mill-partijiet interessati ġew ikkunsidrati u tqiesu meta kien xieraq.

(29)

Il-prodott ikkonċernat huwa s-siliko-manganiż (inkluż il-ferro-siliko-manganiż) li joriġina mill-Indja, li attwalment jaqa' taħt in-numri tal-kodiċijiet tan-NM ex 7202 30 00 u ex 8111 00 11 (“il-prodott ikkonċernat”).

(30)

Is-siliko-manganiż huwa ferroliga prinċipalment magħmul minn manganiż, silikon u ġeneralment ikun fih proporzjonijiet iżgħar ta' elementi oħra bħal kubrit, fosfru, karbonju u boron. Is-siliko-manganiż jiġi prodott bit-tidwib tal-manganiż mhux maħdum fi fran elettriċi u jintuża prinċipalment bħala sors ta' manganiż u silikon fil-produzzjoni tal-azzar.

(31)

Hemm diversi kwalitajiet differenti ta' siliko-manganiż skont il-kontenut tal-manganiż, is-silikon u l-karbonju u jinbiegħ f'ġebel ta' daqsijiet differenti skont il-ħtiġijiet tal-klijenti. Madankollu l-kwalitajiet u d-daqsijiet kollha jikkostitwixxu prodott wieħed, minkejja li jitħallas primjum għal kontenut ogħla ta' manganiż u silikon u għall-kontenut ta' karbonju ta' inqas minn 0,1 %, ħaġa li trendi s-siliko-manganiż adattat għall-produzzjoni ta' ċertu azzar inossidabbli speċjali.

(32)

Kontenut ogħla jew aktar baxx ta' elementi oħra bħalma huma l-fosfru u boron ma jaffettwax il-prezz, għalkemm il-kontenut ta' dawn l-elementi, ogħla minn ċertu limitu, irendu s-siliko-manganiż mhux adattat għal ċerti produzzjonijiet downstream.

(33)

L-investigazzjoni wriet li dawn il-prodotti għandhom l-istess karatteristiċi fiżiċi, kimiċi u tekniċi bażiċi kif ukoll l-istess użi bażiċi:

(34)

Għaldaqstant il-Kummissjoni kkonkludiet fid-dokument ta' informazzjoni tagħha li dawn il-prodotti huma prodotti simili skont it-tifsira tal-Artikolu 1(4) tar-Regolament bażiku.

(35)

Xi partijiet interessati sostnew li s-siliko-manganiż b'kontenut ta' karbonju baxx ħafna (l-aktar bejn 0,05 % u 0,1 %, massimu ta' 0,2 % — siliko-manganiż “b'livelli baxxi ta' karbonju”) kien prodott differenti mis-siliko-manganiż “standard” li fih għaxar darbiet aktar karbonju (massimu ta' 2 %). Huma spjegaw li minkejja li ż-żewġ prodotti għandhom elementi kimiċi jixxiebħu, il-karatteristiċi tekniċi huma differenti u dan għandu impatt fuq l-użu tagħhom: is-siliko-manganiż b'livell baxx ta' karbonju jintuża għall-azzar inossidabbli u speċjali filwaqt li s-siliko-manganiż standard jintuża għall-azzar bil-karbonju. Huma jgħidu wkoll li ż-żewġ tipi ta' siliko-manganiż mhumiex interkambjabbli. Filwaqt li siliko-manganiż b'livell baxx ta' karbonju jista' tintuża fil-produzzjoni tal-azzar standard, is-siliko-manganiż standard ma jistax jintuża fil-produzzjoni tal-azzar inossidabbli u speċjali. Barra minn hekk, l-użu tas-siliko-manganiż b'livell baxx ta' karbonju fil-manifattura tal-azzar standard ma jkunx raġjonevoli għax is-siliko-manganiż b'livell baxx ta' karbonju huwa agħla. B'hekk, dawk il-produtturi tal-azzar li jixtru ż-żewġ tipi ta' siliko-manganiż jużawhom għal produzzjonijiet differenti. Barra minn hekk, huma fakkru li l-awtoritajiet tal-Istati Uniti eskludew is-siliko-manganiż b'livell baxx ta' karbonju mill-ambitu tal-investigazzjoni tagħhom u qiesu li l-fatt li l-Kummissjoni ma għamlitx distinzjoni bejn iż-żewġ tipi f'investigazzjoni preċedenti ma jfissirx li l-Kummissjoni għandha ssegwi l-istess raġunament f'dan il-każ. Fl-aħħar nett, huma jissuġġerixxu li f'każ ta' suspett ta' ċirkomvenzjoni tad-dazju (siliko-manganiż standard dikjarat bħala siliko-manganiż b'livell baxx ta' karbonju biex jiġu evitati xi dazji antidumping) faċilment ikunu jistgħu jitwettqu verifiki u testijiet doganali effettivi.

(36)

Il-Kummissjoni kkunsidrat li s-siliko-manganiż għandu jitqies bħala prodott wieħed għall-iskop ta' din l-investigazzjoni. Is-siliko-manganiż huwa ferroliga użat prinċipalment fil-produzzjoni tal-azzar. Huwa dejjem magħmul mill-istess komponenti kimiċi, għalkemm kultant fi proporzjonijiet xi differenti. Għalhekk, anki jekk ċertu azzar jeħtieġ siliko-manganiż b'kontenut ta' karbonju limitat li ma jistax jiġi sostitwiti minn siliko-manganiż standard, dan ma jirrendix iż-żewġ tipi ta' siliko-manganiż prodotti differenti. Il-kontenut differenti ta' karbonju, kif ukoll il-kontenut differenti ta' manganiż — ta' tipi varji ta' siliko-manganiż huma riflessi sew fl-istruttura tal-“product-control-number” (PCN), li tippermetti paragun tal-varjetà rispettiva ta' tipi tal-prodott. L-awtoritajiet tal-Istati Uniti eskludew is-siliko-manganiż b'livell baxx ta' karbonju mill-ambitu tal-prodott fl-investigazzjonijiet tagħhom għaliex ma kienx hemm produtturi tas-siliko-manganiż b'livell baxx ta' karbonju fl-Istati Uniti tal-Amerika. Il-Kummissjoni diġà qieset f'investigazzjonijiet preċedenti li s-siliko-manganiż standard u dak b'livell baxx ta' karbonju huma bażikament l-istess prodott, anke biex tevita l-possibbiltà ta' ċirkumvenzjoni tad-dazji permezz ta' dikjarazzjoni ħażina (is-siliko-manganiż b'livell baxx ta' karbonju ma jistax jintgħaraf viżwalment mill-awtoritajiet doganali, ikun meħtieġ ittestjar). Il-fatt li s-siliko-manganiż b'livell baxx ta' karbonju huwa agħla ma jistax jiżgura li l-awtoritajiet doganali jkunu jistgħu jidentifikaw ċirkomvenzjoni possibbli abbażi tal-prezz tal-fattura, speċjalment jekk iż-żewġ partijiet fit-tranżazzjoni jkunu relatati jew jiftiehmu dwar kontrokumpens. Bħala konsegwenza, din it-talba ġiet irrifjutata.

(37)

Il-Kummissjoni l-ewwel eżaminat jekk il-volum totali ta' bejgħ domestiku ta' kull produttur esportatur li kkoopera kienx rappreżentattiv, skont l-Artikolu 2(2) tar-Regolament bażiku. Il-bejgħ domestiku jkun rappreżentattiv jekk it-total tal-volum tal-bejgħ domestiku tal-prodott simili lill-konsumaturi indipendenti fis-suq domestiku għal kull produttur esportatur ikun jirrappreżenta mill-anqas 5 % tal-volum totali tal-bejgħ għall-esportazzjoni tiegħu tal-prodott ikkonċernat lejn Unjoni matul il-perjodu tal-investigazzjoni.

(38)

Il-Kummissjoni mbagħad identifikat it-tipi ta' prodott mibjugħin fis-suq domestiku li kienu identiċi jew komparabbli mat-tipi ta' prodotti mibjugħin għall-esportazzjoni lejn l-Unjoni u eżaminat jekk il-bejgħ domestiku minn kull produttur esportatur li kkoopera għal kull tip ta' prodott kienx rappreżentattiv, skont l-Artikolu 2(2) tar-Regolament bażiku. Il-bejgħ domestiku ta' tip ta' prodott ikun rappreżentattiv jekk il-volum totali ta' bejgħ domestiku ta' dak it-tip ta' prodott lil konsumaturi indipendenti matul il-perjodu ta' investigazzjoni jkun jirrappreżenta mill-anqas 5 % tal-volum totali tal-bejgħ għall-esportazzjoni lejn l-Unjoni tat-tip ta' prodott identiku jew komparabbli.

(39)

Imbagħad il-Kummissjoni ddefiniet il-proporzjon tal-bejgħ profittabbli lill-konsumaturi indipendenti fis-suq domestiku għal kull tip ta' prodott matul il-perjodu tal-investigazzjoni biex tiddeċiedi jekk tużax il-prezz tal-bejgħ domestiku reali għall-kalkolu tal-valur normali, skont l-Artikolu 2(4) tar-Regolament bażiku.

(40)

Il-valur normali huwa bbażat fuq il-prezz domestiku reali għal kull tip ta' prodott, irrispettivament minn jekk dan il-bejgħ huwiex profittabbli jew le, jekk:

(41)

F'dan il-każ, il-valur normali huwa l-medja ponderata tal-prezzijiet tal-bejgħ domestiku kollu ta' dak it-tip ta' prodott matul il-perjodu ta' investigazzjoni.

(42)

Il-valur normali huwa bbażat fuq il-prezz domestiku reali għal kull tip ta' prodott, tal-bejgħ domestiku profittabbli biss, tat-tipi tal-prodott matul il-perjodu tal-investigazzjoni, jekk:

(43)

Fejn ma kien hemm l-ebda jew ma kienx hemm biżżejjed bejgħ ta' tip tal-prodott simili fil-perkors normali tal-kummerċ, jew fejn tip ta' prodott ma nbigħx fi kwantitajiet rappreżentattivi fis-suq domestiku, il-Kummissjoni ħadmet il-valur normali skont l-Artikolu 2(3) u (6) tar-Regolament bażiku.

(44)

Il-valur normali nħadem billi żdied dan li ġej mal-ispiża medja tal-produzzjoni tal-prodott simili ta' kull produttur esportatur li kkoopera matul il-perjodu tal-investigazzjoni:

(45)

Għal kumpanija waħda fil-kampjun, il-valur normali huwa bbażat fuq il-prezz domestiku reali għal kull tip ta' prodott skont il-metodoloġija deskritta fil-premessa (40) hawn fuq. Għaż-żewġ kumpaniji l-oħra fil-kampjun, il-valur normali ta' xi tipi ta' prodott inħadem skont il-metodoloġija deskritta fil-premessa (44) hawn fuq. Għat-tipi l-oħra tal-prodott li nbiegħu matul il-perkors normali tan-negozju, il-valur normali kien ibbażat fuq il-prezz domestiku attwali għal kull tip ta' prodott skont il-metodoloġija deskritta fil-premessa (40) hawn fuq.

(46)

Il-produtturi esportaturi esportaw lejn l-Unjoni jew direttament lil klijenti indipendenti jew permezz ta' negozjanti relatati li mhumiex fl-Unjoni.

(47)

Għalhekk, il-prezz tal-esportazzjoni kien stabbilit abbażi tal-prezz reali mħallas jew pagabbli għall-prodott ikkonċernat meta mibjugħ għall-esportazzjoni lejn l-Unjoni, skont l-Artikolu 2(8) tar-Regolament bażiku.

(48)

Il-Kummissjoni qabblet il-valur normali u l-prezz tal-esportazzjoni tal-produtturi esportaturi fuq il-bażi tal-prezz mill-fabbrika.

(49)

Fejn kien iġġustifikat mill-ħtieġa li jiġi żgurat paragun ġust, il-Kummissjoni aġġustat il-valur normali u/jew il-prezz tal-esportazzjoni għal differenzi li jaffettwaw il-prezzijiet u l-komparabilità tal-prezzijiet skont l-Artikolu 2(10) tar-Regolament bażiku.

(50)

F'dan ir-rigward, il-Gvern Indjan kellu fis-seħħ żewġ skemi biex jistimula l-esportazzjoni, jiġifieri r-Rifużjoni tad-Dazju (Duty Draw Back — DDB) u l-Iskema tal-Prodott Iffokat (Focus Product Scheme — FPS). L-iskema DDB ipprovdiet rifużjoni ta' 1,7 % fuq il-valur frank abbord (free on board — FOB) tal-esportazzjoni għad-dazji fuq l-importazzjoni u t-taxxi fuq il-materjali importati jekk tali importazzjonijiet intużaw għall-produzzjoni tal-prodotti finali għall-esportazzjoni. L-FPS huwa benefiċċju ta' 4 % fuq il-valur FOB mogħti lil ċerti prodotti li qed jiġu esportati, mingħajr l-ebda kondizzjoni ulterjuri li torbot l-oġġetti esportati ma' dawk importati.

(51)

Kumpanija waħda talbet aġġustament għad-DDB abbażi tal-Artikolu 2(10)(b) tar-Regolament bażiku. Madankollu, il-kumpanija ma setgħetx turi r-rabta bejn il-materja prima importata u l-oġġetti finali esportati, kif meħtieġ mill-Artikolu 2(10)(b). Għalhekk, il-Kummissjoni ma aċċettathiex din it-talba.

(52)

Kumpanija oħra talbet aġġustament għad-DDB kif ukoll għall-FPS abbażi tal-Artikolu 2(10)(k) tar-Regolament bażiku. Dwar id-DDB, it-talba ma tistax tintlaqa' skont l-Artikolu 2(10)(k) jekk ikun hemm bażi legali speċifika għaliha skont l-Artikolu 2(10)(b) tar-Regolament bażiku u l-kundizzjonijiet tal-aħħar waħda ma jkunux issodisfati. Peress li l-kumpanija ma setgħetx turi rabta bejn l-oġġetti importati u l-oġġetti esportati, il-Kummissjoni ma laqgħetx din it-talba.

(53)

Dwar l-FPS, l-evidenza ta' sostenn ipprovduta mill-kumpannija ma kinitx turi li l-klijenti fis-suq domestiku jħallsu b'mod konsistenti prezzijiet differenti minħabba l-iskema tal-FPS kif meħtieġ mill-Artikolu 2(10)(k) tar-Regolament bażiku. Għall-kuntrarju, l-evidenza wriet biss li l-ammonti rċevuti mingħand l-awtoritajiet Indjani taħt l-iskema tal-FPS sempliċiment joħlqu differenza konsistenti fl-introjtu mill-bejgħ bejn il-bejgħ domestiku u l-esportazzjoni. Għalhekk il-Kummissjoni ikkonkludiet li din it-talba hija bla bażi.

(54)

Għall-produtturi esportaturi fil-kampjun, il-Kummissjoni qabblet il-valur normali medju ponderat ta' kull tip ta' prodott simili mal-prezz tal-esportazzjoni medju ponderat tat-tip korrispondenti tal-prodott ikkonċernat, skont l-Artikolu 2(11) u (12) tar-Regolament bażiku.

(55)

Il-marġni medju ponderat tad-dumping għall-produtturi esportaturi li kkooperaw u li ma kinux inklużi fil-kampjun kien ikkalkulat skont id-dispożizzjonijiet tal-Artikolu 9(6) tar-Regolament bażiku. Dan il-marġni ġie stabbilit fuq il-bażi tal-marġini stabbiliti għall-produtturi esportaturi inklużi fil-kampjun.

(56)

Il-livell ta' kooperazzjoni tqies baxx minħabba li l-importazzjonijiet tal-produtturi esportaturi li kkooperaw kienu jikkostitwixxu biss 60 % tal-esportazzjonijiet totali mill-Indja lejn l-Unjoni matul il-perjodu tal-investigazzjoni.

(57)

Għalhekk il-Kummissjoni kkalkulat il-marġini uniku għall-pajjiż kollu fuq il-bażi tal-medja tal-ogħla tranżazzjonjiet li kienu soġġetti għal dumping ta' waħda mill-kumpaniji fil-kampjun.

(58)

Il-marġini tad-dumping, espressi bħala perċentwali tal-prezz CIF fil-fruntiera tal-Unjoni, bid-dazju mhux imħallas, huma kif ġej:

(59)

Il-prodott simili ġie mmanifatturat minn erba' produtturi fl-Unjoni matul il-perjodu tal-investigazzjoni. Fuq il-bażi tal-informazzjoni disponibbli mill-ilment, ma hemm l-ebda produttur ieħor tal-prodott simili fl-Unjoni. Żewġ produtturi tal-Unjoni li huma wkoll l-ilmentaturi, l-Comilog Dunkerque u l-OFZ, ikkooperaw. Produttur ieħor tal-Unjoni (Italghisa, l-Italja) li appoġġja l-ilment waqaf jikkoopera ftit wara l-bidu tal-investigazzjoni. Madankollu, il-volum tal-produzzjoni tiegħu kien marġinali. Ir-raba' produttur tal-Unjoni, FerroAtlantica ma kkooperax iżda li ma opponiex li ssir l-investigazzjoni.

(60)

Biex jipproteġi l-kunfidenzjalità tad-dejta minn żewġ produtturi tal-Unjoni li kkooperaw, il-valuri kollha huma espressi bħala firxiet. Matul l-PI il-produzzjoni totali tal-Unjoni kienet tammonta għal [213 000/282 000] tunnellata. Iż-żewġ produtturi tal-Unjoni li kkooperaw ipproduċew [85 000/113 000] tunnellata, li jirrappreżentaw madwar [35 %/47 %] tal-produzzjoni totali tal-Unjoni.

(61)

Bosta partijiet interessati kkummentaw dwar id-definizzjoni tal-industrija tal-Unjoni. L-ewwel nett, huma qiesu li n-nuqqas ta' inklużjoni ta' FerroAtlantica fost l-ilmentaturi jpoġġi fid-dubju l-konklużjoni tal-Kummissjoni li l-produtturi li fadal jistgħu jitqiesu li jikkostitwixxu l-parti l-kbira tal-industrija tal-Unjoni kif meħtieġ mill-Artikolu 4.1 tal-Ftehim tad-WTO dwar l-antidumping u mill-Artikolu 4(1) tar-Regolament bażiku. It-tieni nett, huma jemmnu illi kieku l-analiżi tal-fatturi u tal-indiċijiet ekonomiċi li għandhom effett fuq l-istat tal-industrija tal-Unjoni qieset lill-FerroAtlantica wkoll u partikolarment il-profittabbiltà tagħha matul il-perjodu taħt kunsiderazzjoni, l-istampa tal-ħsara li kienet tirriżulta kienet tkun differenti ħafna. It-tielet nett, huma sostnew li n-nuqqas ta' inklużjoni ta' FerroAtlantica fost l-ilmentaturi kienet għażla tattika, ġustifikata mis-sempliċi intenzjoni li l-istampa tal-ħsara tiġi distorta, peress li FerroAtlantica kienet ilmentatur attiv fl-investigazzjonijiet tal-antidumping preċedenti mibdija mill-Kummissjoni.

(62)

Il-Kummissjoni ċaħdet dawn it-talbiet kif ġej: (i) FerroAtlantica kienet ikkuntattjata kif dovut mill-Kummissjoni u ntbagħtilha kwestjonarju. Dan ifisser li anke jekk il-kumpanija mhijiex ilmentatur, hi kellha opportunità ugwali li tipparteċipa, tesprimi l-opinjonijiet tagħha u tikkoopera billi tipprovdi lill-Kummissjoni bl-informazzjoni mitluba. Madankollu, il-kumpanija ma kkooperatx u baqgħet siekta. Il-Kummissjoni ma għandha l-ebda mezz biex iġġiegħel lill-kumpanija tikkoopera u lanqas li timpediha milli tikkoopera. Għalhekk, ma jistax ikun li l-Kummissjoni eskludiet lil dik il-kumpanija. Għall-kuntrarju, id-dejta disponibbli dwar din il-kumpanija ġiet ipprovduta fl-ilment u ntużat fl-eżami tal-ħsara kif spjegat hawn taħt fil-premessa (88); (ii) iż-żewġ produtturi tal-Unjoni li kkooperaw u li pprovdew l-informazzjoni meħtieġa. Huma jirrappreżentaw madwar [35 %/47 %] tat-total tal-produzzjoni tal-Unjoni. Il-Kummissjoni qieset li dan il-perċentwali kien kbir biżżejjed biex tikkonkludi li ż-żewġ produtturi huma proporzjon kbir tal-produzzjoni domestika. Proporzjon kbir ma jfissirx neċessarjament maġġoranza skont l-Artikolu 4(1) tar-Regolament bażiku (4), li huwa konformi mal-interpretazzjoni mogħtija għall-kunċett simili fl-Artikolu 4.1 tal-ftehim tad-WTO dwar l-antidumping (5), (iii) l-analiżi tal-indikaturi mikroekonomiċi kienet ibbażata fuq id-dejta taż-żewġ produtturi tal-Unjoni li kkooperaw. Li kieku tqieset id-dejta mikroekonomika ta' FerroAlantica, l-indikaturi ekonomiċi varji setgħu jew ma setgħux urew xejriet differenti, iżda peress li ż-żewġ produtturi tal-Unjoni li kkooperaw jirrappreżentaw proporzjon kbir tal-industrija tal-Unjoni, analiżi bbażata fuq id-dejta tagħhom hija leġittima.

(63)

Il-konsum totali tal-Unjoni ġie stabbilit billi ġew miżjuda mal-bejgħ domestiku tal-produtturi kollha tal-Unjoni, l-importazzjonijiet totali fl-Unjoni. Il-konsum tal-Unjoni żviluppa kif ġej:

Tabella 1

Il-konsum tal-Unjoni (tunnellati metriċi)

(64)

Il-konsum tal-Unjoni naqas matul is-snin, f'konformità mat-tnaqqis fil-produzzjoni u l-konsum tal-azzar fl-Unjoni.

(65)

Il-volum tal-importazzjonijiet ġie stabbilit bl-użu tad-dejta tal-Eurostat u b'kunsiderazzjoni tar-reġimi kollha ta' importazzjoni, inkluż l-ipproċessar attiv. L-oriġini ta' volum sinifikanti mill-importazzjoni “mhijiex speċifikata għal raġunijiet kummerċjali jew militari fil-qafas tal-kummerċ ma' pajjiżi terzi”. Bl-għajnuna tal-awtoritajiet doganali ta' Stat Membru wieħed, il-Kummissjoni kienet kapaċi tanalizza parti minn dan il-volum skont il-pajjiż tal-oriġini. Bl-allokazzjoni ta' dawn “l-importazzjonijiet mhux speċifikati” lill-pajjiżi tal-oriġini rispettivi tagħhom, ix-xejra kumplessiva tal-importazzjonijiet ma tinbidilx b'mod sinifikanti. Madankollu, biex tinżamm il-kunfidenzjalità ta' dawk l-importazzjonijiet, iċ-ċifri tal-importazzjonijiet ġew ippreżentati f'firxiet.

(66)

L-importazzjonijiet mill-Indja żviluppaw kif ġej:

Tabella 2

Volum ta' importazzjoni (f'tunnellati metriċi) u s-sehem mis-suq

(67)

L-importazzjonijiet mill-Indja jirrappreżentaw madwar kwart tal-importazzjonijiet totali fl-Unjoni u għandhom l-akbar sehem mis-suq tal-importazzjonijiet totali fl-Unjoni.

(68)

L-importazzjonijiet mill-Indja żdiedu b'mod konsiderevoli fl-2012 meta mqabbel mal-2011, iżda fis-snin ta' wara reġgħu naqsu biex il-livell fil-PI kien kemmxejn ogħla minn dak tal-2011. Ix-xejra tal-importazzjonijiet mill-Indja kienet simili għax-xejra tal-produzzjoni u l-bejgħ tal-Industrija tal-Unjoni u kienet opposta għax-xejriet tal-importazzjonijiet minn pajjiżi terzi oħra (l-importazzjonijiet mill-Indja żdiedu fl-2012 filwaqt li l-importazzjonijiet minn pajjiżi terzi oħrajn naqsu, u viċi versa) fl-2013 u matul il-PI.

(69)

L-ilmentatur stqarr li kien hemm żieda kbira fis-sehem tas-suq mill-Indja mill-2008 sal-2013.

(70)

Madankollu, kif imsemmi fil-premessa 25, l-eżami tax-xejriet rilevanti għall-valutazzjoni tad-dannu kopra l-perjodu mill-1 ta' Jannar 2011 sal-aħħar tal-PI. Għalhekk, ma ġiet eżaminata u kkunsidrata l-ebda data qabel l-2011.

(71)

Il-prezz medju ponderat tal-importazzjonijiet lejn l-Unjoni mill-Indja żviluppa kif ġej:

Tabella 3

Prezzijiet tal-Importazzjoni (EUR/tunellata mettrika)

(72)

Il-prezz tal-importazzjonijiet mill-Indja naqsu f'konformità mal-prezz tal-bejgħ tal-industrija tal-Unjoni. Id-dejta tal-Eurostat turi wkoll li l-importazzjonijiet Indjani huma l-irħas fost il-pajjiżi esportaturi ewlenin tas-siliko-manganiż.

(73)

Il-Kummissjoni vvalutat it-twaqqigħ tal-prezz matul il-perjodu tal-investigazzjoni billi qabblet:

(74)

It-tqabbil tal-prezzijiet sar fuq bażi ta' tip tip għal tranżazzjonijiet fl-istess livell ta' kummerċ, aġġustati kif dovut meta meħtieġ, u wara t-tnaqqis tar-rifużjonijiet u l-iskontijiet. Ir-riżultat tat-tqabbil ingħata bħala perċentwal tal-fatturat matul il-perjodu tal-investigazzjoni tal-produtturi tal-Unjoni li kkooperaw.

(75)

Sabiex jitqies il-livell aktar baxx ta' manganiż fis-siliko-manganiż mibjugħ mill-produtturi esportaturi Indjani fil-kampjun (jekk u meta ġustifikat) sar aġġustament fil-kwalità. L-aġġustament sar bl-użu tal-hekk imsejjaħ “skalar pro-rata”, formula użata ħafna fl-industrija biex ikun jista' jsir tqabbil referenzjarju tal-prezz tal-prodott ikkonċernat mas-siliko-manganiż bi grad standard (65 % manganiż u 16 % silikon).

(76)

Wieħed mill-produtturi esportaturi Indjani fil-kampjuni biegħ siliko-manganiż b'livell baxx ta' karbonju lill-Unjoni. L-industrija tal-Unjoni tipproduċi siliko-manganiż b'livell baxx ta' karbonju iżda mhux iż-żewġ produtturi tal-Unjoni li kkooperaw. Sabiex jiġi żgurat tqabbil ġust bejn is-siliko-manganiż b'livell baxx ta' karbonju Indjan u s-siliko-manganiż standard tal-Unjoni, il-Kummissjoni aġġustat 'il fuq il-medja tal-prezz tal-bejgħ tal-Unjoni billi użat il-primjum medju tas-suq għas-siliko-manganiż b'livell baxx ta' karbonju. B'hekk il-Kummissjoni ħadet inkunsiderazzjoni l-fatt li jitħallas prezz ogħla għas-siliko-manganiż b'livell baxx ta' karbonju meta mqabbel mas-siliko-manganiż bi grad standard.

(77)

Fuq din il-bażi, ġie konkluż li produttur esportatur Indjan fil-kampjun kien qed iwaqqa' l-prezzijiet tal-industrija tal-Unjoni b'6,5 % u li ż-żewġ produtturi Indjani l-oħra fil-kampjun ma kinux qed iwaqqgħu l-prezzijiet tal-Unjoni.

(78)

Għall-produtturi esportaturi li ma kkooperawx, ġie stabbilit it-twaqqigħ tal-prezz minimu fuq il-bażi tal-prezzijiet medji tal-importazzjoni skont id-dejta tal-Eurostat, mingħajr aġġustament għal differenzi fil-kwalità jew livelli differenti ta' kummerċ.

(79)

Bosta partijiet interessati qalu li t-tqabbil bejn il-prezzijiet tal-Unjoni u l-prezzijiet Indjani bbażat fuq il-medja tal-prezzijiet mill-Eurostat huwa qarrieq. Żewġ partijiet interessati pproponew li l-Kummissjoni għandha taġġusta l-prezz medju Indjan jekk wieħed jassumi li l-medja ta' kontenut ta' manganiż fis-siliko-manganiż Indjan hija ta' 58 %. Parti minnhom issuġġerixxiet ukoll li l-prezz medju tal-Ukrajna bbażat fuq id-dejta tal-Eurostat għandu jiġi aġġustat jekk wieħed jassumi li l-medja ta' kontenut ta' manganiż fis-siliko-manganiż tal-Ukrajna hija ta' 68 %. Dawn il-partijiet qalu li wara dawn l-aġġustamenti, il-prezz medju Indjan tas-siloko-manganiż ma jkunux inqas mill-prezzijiet debitati mill-produtturi tal-Unjoni jew minn produtturi f'pajjiżi terzi oħra.

(80)

Il-Kummissjoni hija konxja tal-fatt li d-dejta tal-Eurostat tinkludi l-gradi/il-kwalitajiet kollha tal-prodott konċernat u li għalhekk ma tippermettix tqabbil xieraq bejn it-tipi ta' prodotti. Fin-nuqqas ta' informazzjoni iktar preċiża għal kull tip ta' prodott, b'mod partikolari fir-rigward tal-produtturi Indjani li ma kkoperawx, ma jistax ma jintużawx il-prezzijiet medji fl-analiżi tal-ħsara u l-valutazzjoni ssir bl-attenzjoni dovuta f'kull każ flimkien mal-bqija tal-indikaturi tal-ħsara.

(81)

Parti waħda interessata spjegat li l-aġġustament pro-rata bbażat fuq il-kontenut tal-manganiż ma tirriflettix id-differenza sħiħa fil-prezz għax ix-xerrej ta' prodott ta' kwalità iżjed baxxa jkollu jġarrab l-ispejjeż biex jitneħħew l-impuritajiet addizzjonali. Parti interessata minnhom argumentat li l-istruttura tal-product-control-number (PCN) użata mill-Kummissjoni ma tagħmilx distinzjoni bejn it-tipi differenti ta' siliko-manganiż b'kontenut ta' manganiż inqas minn 60 %, u għalhekk it-tqabbil għall-kalkoli tat-twaqqigħ tal-prezz mhux tajjeb. Parti interessata oħra nnottat li minħabba li nħolqu firxiet ta' kontenut ta' manganiż ir-riżultati ma humiex preċiżi.

(82)

Il-Kummissjoni ċaħdet dawn id-dikjarazzjonijiet minħabba li l-aġġustament pro-rata huwa bbażat fuq l-prattika tas-suq aċċettata b'mod ġenerali, u għalhekk xierqa. Barra minn hekk, din il-parti interessata ma pprovdietx metodoloġija alternattiva. L-aġġustament li sar fuq il-kontenut ta' manganiż tal-produtturi esportaturi Indjani fil-kampjun kien ibbażat fuq il-kontenut preċiż kif verifikat matul l-investigazzjoni. Għaldaqstant, huwa jiddistingwi bejn diversi tipi ta' siliko-manganiż b'kontenut ta' manganiż ta' inqas minn 60 %.

(83)

Parti interessata waħda ddikjarat li siliko-manganiż manifatturat mill-industrija tal-Unjoni huwa aktar għali għax dan fih inqas impuritajiet bħall-fosforu u l-boron mis-siliko-manganiż prodott fl-Indja. Din il-parti pprovdiet informazzjoni dwar it-talbiet magħmula minn konsumaturi biex jiġu fornuti b'siliko-manganiż li jkun fih inqas minn ċertu perċentwal ta' fosforu u boron, bl-implikazzjoni li għalhekk il-konsumaturi kienu lesti jħallsu primjum għal dan.

(84)

Madankollu, l-informazzjoni mressqa ma pprovatx li l-kontenut tal-fosforu jew tal-boron għandu effett fuq il-prezz. Hija wriet biss li ċerti utenti jistgħu jitolbu — sabiex jipproduċu ċerti prodotti speċjali tal-azzar — li s-siliko-manganiż li jixtru għandu jkollu kontenut ta' fosforu jew boron inqas minn ċertu livell limitu. Fin-nuqqas ta' evidenza ċara dwar primjum imħallas, din id-dikjarazzjoni ġiet miċħuda.

(85)

Wara divulgazzjoni finali, l-ilmentatur argumenta li huwa pjuttost normali li jkun hemm xi ftit tat-twaqqigħ tal-prezz fis-suq tal-kommoditajiet u li l-eżistenza ta' twaqqigħ tal-prezz mhijiex rekwiżit fiha nfisha biex tiġi stabbilita l-eżistenza ta' ħsara. Fil-fatt, kif stabbilit fit-Taqsima 5.5 hawn taħt, il-Kummissjoni bbażat il-konklużjonijiet tagħha dwar il-ħsara fuq għadd ta' indikaturi, u l-livell ta' twaqqigħ f'dan il-każ ma kienx determinanti għall-istabbiliment tal-ħsara.

(86)

L-ilmentatur iddikjara li l-Kummissjoni applikat metodu differenti fil-kalkoli tal-marġni tad-dumping u biex tistabbilixxi t-twaqqigħ fil-prezz, inkwantu użat l-aktar tranżazzjonijiet li kienu l-oġġett ta' dumping biex jiġi stabbilit il-marġni tad-dumping iżda mhux għat-twaqqigħ tal-prezz.

(87)

Il-Kummissjoni ma tarax għaliex għandha tapplika l-istess metodoloġija fil-kalkoli għat-twaqqigħ tal-prezz u l-kalkoli tad-dumping. Il-fini tal-kalkoli hija kompletament differenti; il-kalkolu tal-aktar tranżazzjonijiet li kienu oġġett ta' dumping serva biex jiġi kkalkulat il-marġni tad-dumping għall-produtturi esportaturi Indjani li ma kkoperawx, filwaqt li l-kalkoli tat-twaqqigħ tal-prezz ma sarux biex jiġi kkalkolat xi marġini preċiż, iżda biex jiġi eżaminat l-effett fuq prezzijiet tal-importazzjonijiet oġġett ta' dumping, kif meħtieġ skont l-Artikolu 3(3) tar-Regolament bażiku. B'hekk din id-dikjarazzjoni ġiet miċħuda.

(88)

Skont l-Artikolu 3(5) tar-Regolament bażiku, l-eżaminar tal-impatt tal-importazzjonijiet li huma oġġett ta' dumping fuq l-industrija tal-Unjoni kien jinkludi evalwazzjoni tal-indikaturi ekonomiċi kollha li influwenzaw l-istat tal-industrija tal-Unjoni matul il-perjodu taħt kunsiderazzjoni. L-indikaturi tal-ħsara huma bbażati fuq dejta speċifika pprovduta miż-żewġ produtturi tal-Unjoni li kkooperaw, l-ilmentaturi, f'dan il-każ, li jirrappreżentaw proporzjon kbir tal-produzzjoni totali tal-Unjoni matul il-perjodu tal-investigazzjoni. Fejn disponibbli mill-ilmentatur, id-dejta relatata mal-produtturi kollha tal-Unjoni ġiet eżaminata wkoll għall-indikaturi li ġejjin: il-konsum tal-Unjoni, is-sehem mis-suq, il-produzzjoni, il-kapaċità tal-produzzjoni, l-utilizzazzjoni tal-kapaċità, l-impjiegi u l-produttività. Kif spejgat fil-premessa (60) hawn fuq, biex tiġi protetta l-kunfidenzjalità tad-dejta miż-żewġ produtturi tal-Unjoni li kkooperaw, il-valuri kollha huma espressi bħala firxiet.

(89)

L-indikaturi tal-ħsara huma: il-produzzjoni, il-kapaċità tal-produzzjoni, l-utilizzazzjoni tal-kapaċità, il-volum tal-bejgħ, is-sehem mis-suq, it-tkabbir, l-impjiegi, il-produttività, il-kobor tal-marġni ta' dumping, l-irkupru minn dumping tal-passat, il-prezzijiet medji ta' unità, il-kost unitarju, il-kostijiet lavorattivi, l-inventarji, il-profittabbiltà, il-fluss tal-flus, l-investimenti, ir-redditu fuq l-investimenti u l-abbiltà li jiġi ġġenerat il-kapital.

(90)

Parti interessata minnhom ilmentat li xi ftit mid-dejta ta' FerroAtlantica tqieset għall-indikaturi makroekonomiċi (il-volum tal-bejgħ u s-sehem mis-suq, il-produzzjoni, il-kapaċità tal-produzzjoni u l-utilizzazzjoni tal-kapaċità, l-impjiegi u l-produttività) iżda mhux għall-bqija tal-indikaturi mikroekonomiċi. Din id-dikjarazzjoni ġiet irrifjutata għax FerroAtlantica ma kkooperatx u għalhekk il-Kummissjoni ma kellha ebda dejta mikroekonomika mingħand dik il-kumpanija għad-dispożizzjoni tagħha.

(91)

Il-produzzjoni, il-kapaċità tal-produzzjoni u l-użu tal-kapaċità żviluppaw matul il-perjodu taħt kunsiderazzjoni kif ġej:

Tabella 4

Il-produzzjoni, il-kapaċità produttiva u l-użu tal-kapaċità (tunnellati metriċi)

(92)

Il-volum tal-produzzjoni fl-2013 u matul il-PI kien aktar baxx milli fil-bidu tal-perjodu taħt kunsiderazzjoni. Is-sena 2012 tirrappreżenta l-ogħla punt tal-produzzjoni. Minħabba d-deċiżjoni ta' parti waħda fl-Unjoni, il-kapaċità tal-produzzjoni tal-industrija tal-Unjoni kumplessivament żdiedet fl-2012 meta mqabbla mal-2011 u baqgħet relattivament l-istess wara. Bħala konsegwenza, l-użu tal-kapaċità naqas b'mod sinifikanti.

(93)

Il-volum tal-bejgħ u s-sehem mis-suq tal-industrija tal-Unjoni żviluppaw matul il-perjodu taħt kunsiderazzjoni kif ġej:

Tabella 5

Volum ta' bejgħ (f'tunnellati metriċi) u s-sehem mis-suq

(94)

Il-volum tal-bejgħ żdied fl-2012 meta mqabbel mal-2011, u naqas fl-2013. Il-volum tal-bejgħ matul il-PI kien aktar baxx mill-2011. Is-sena 2012 tirrappreżenta l-ogħla punt tal-bejgħ. Madankollu, peress li t-tnaqqis fil-bejgħ kien proporzjonalment inqas mit-tnaqqis fil-konsum, is-sehem mis-suq żdied u kien ogħla matul il-PI meta mqabbel mas-sena 2011.

(95)

Matul il-perjodu taħt kunsiderazzjoni, l-industrija tal-Unjoni ma rreġistrat l-ebda tkabbir iżda f'kuntest diffiċli ta' tnaqqis fil-konsum, irnexxielha żżomm s-sehem mis-suq.

(96)

L-impjiegi u l-produttività żviluppaw kif ġej tul il-perjodu taħt kunsiderazzjoni:

Tabella 6

Impjiegi u produttività

(97)

L-għadd ta' impjegati żdied fl-2012 u naqas matul il-perjodu ta' wara. Il-produttività, imkejla bħala unità ta' produzzjoni għal kull impjegat, varjat u matul il-PI kienet ogħla milli kienet fl-2011.

(98)

Il-marġinijiet tad-dumping kollha huma ogħla mil-livell de minimis, u għal produttur esportatur minnhom huma b'mod sinifikanti ogħla minn dak il-livell. L-impatt tad-daqs tal-marġnijiet reali tad-dumping fuq l-industrija tal-Unjoni ma kienx negliġibbli, meta wieħed iqis il-volum u l-prezzijiet tal-importazzjonijiet mill-Indja.

(99)

Il-miżuri antidumping kontra l-importazzjonijiet tas-siliko-manganiż li joriġinaw miċ-Ċina u l-Każakistan skadew fl-2012. Ma kien hemm l-ebda talba biex jinbeda rieżami tal-iskadenza. Ma hemm l-ebda indikazzjoni li l-industrija tal-Unjoni ma rkupratx mill-effetti tad-dumping tal-imgħoddi qabel beda d-dumping mill-Indja.

(100)

Il-prezzijiet medji ponderati tal-bejgħ ta' unità taż-żewġ produtturi tal-Unjoni li kkooperaw lill-klijenti mhux relatati fl-Unjoni żviluppaw kif ġej matul il-perjodu taħt kunsiderazzjoni:

Tabella 7

Prezzijiet tal-bejgħ fl-Unjoni

(101)

Il-prezz medju tal-bejgħ ta' unità taż-żewġ produtturi tal-Unjoni li kkooperaw naqas sena wara l-oħra.

(102)

L-ispejjeż tal-produzzjoni naqsu, l-aktar minħabba tnaqqis fil-prezz taż-żewġ fatturi ewlenin tal-ispiża tal-produzzjoni: il-manganiż mhux maħdum u l-enerġija.

(103)

Matul il-perjodu taħt kunsiderazzjoni il-kostijiet lavorattivi medji taż-żewġ produtturi tal-Unjoni li kkooperaw żviluppaw hekk:

Tabella 8

Kostijiet lavorattivi medji għal kull impjegat (EUR)

(104)

Il-kostijiet lavorattivi medji għal kull impjegat huma kkalkulati billi l-kostijiet lavorattivi totali f'perjodu partikolari taż-żewġ produtturi tal-Unjoni li kkooperaw jiġu diviżi bl-għadd totali ta' ħaddiema impjegati fl-istess perjodu. Il-kostijiet lavorattivi totali żdiedu fl-2012 u fl-2013, iżda kważi naqsu għal-livell tal-2011 matul il-PI. L-għadd ta' impjegati naqas ukoll matul is-snin, b'mod aktar sinifikanti (f'termini relattivi) mit-tnaqqis fil-kostijiet lavorattivi. B'konsegwenza, il-kost lavorattiv medju għal kull impjegat żdied.

(105)

Il-livelli tal-ħażna taż-żewġ produtturi tal-Unjoni li kkooperaw żviluppaw kif ġej matul il-perjodu taħt kunsiderazzjoni:

Tabella 9

Inventarji

(106)

Il-livell tal-inventarji żdied fl-2012 u l-2013 u naqas matul il-PI iżda xorta għadu aktar mil-livell tal-2011. L-istess japplika għall-proporzjon bejn l-inventarju u l-produzzjoni.

(107)

Il-profittabbiltà, il-fluss tal-flus, l-investimenti u r-redditu fuq l-investimenti taż-żewġ produtturi tal-Unjoni li kkooperaw żviluppaw kif ġej matul il-perjodu taħt kunsiderazzjoni:

Tabella 10

Profittabbiltà, fluss tal-flus, investimenti u redittu fuq l-investimenti

(108)

Il-Kummissjoni stabbilixxiet il-profittabbiltà taż-żewġ produtturi tal-Unjoni li kkooperaw billi l-profitt nett qabel it-taxxa tal-bejgħ tas-siliko-manganiż lil konsumaturi mhux relatati fl-Unjoni ngħata bħala perċentwal tal-fatturat ta' dak il-bejgħ. Il-profittabbiltà kienet negattiva matul il-perjodu eżaminat kollu. L-agħar sena kienet l-2011. Is-sitwazzjoni bdiet titjieb fl-2012 iżda reġgħet iddeterjorat matul is-sena ta' wara u matul il-PI. Matul l-PI, is-sitwazzjoni tjiebet xi ftit meta mqabbla mal-2011.

(109)

Il-fluss tal-flus nett huwa l-ħila tal-produtturi tal-Unjoni li jiffinanzjaw l-attivitajiet tagħhom huma stess. Ix-xejra tal-fluss tal-flus nett hija ċiklika, naqset fl-2012, żdiedet fl-2013 u reġgħet naqset matul il-PI.

(110)

Il-livell tal-investiment naqas matul il-perjodu taħt kunsiderazzjoni.

(111)

Ir-redditu fuq l-investiment huwa l-profitt f'perċentwal tal-valur kontabilistiku nett tal-investimenti. Billi l-livell ta' investiment naqas, ir-redditu fuq l-investiment (dejjem negattiv peress li ż-żewġ kumpaniji li kkooperaw kienu qed jagħmlu telf) tjieb matul il-perjodu taħt kunsiderazzjoni.

(112)

Fatturi bħalma huma l-evoluzzjoni tal-volum tal-produzzjoni, l-użu tal-kapaċità kif ukoll il-volum tal-bejgħ u l-prezz juru xejra negattiva ċara għall-industrija kollha tal-Unjoni.

(113)

Fir-rigward taż-żewġ produtturi tal-Unjoni li kkooperaw, l-indikaturi juru li kienu qed jagħmlu telf matul il-perjodu taħt kunsiderazzjoni kollu. Il-prezz u l-volum tal-bejgħ tagħhom tas-siliko-manganiż naqas b'mod kostanti u dan ma kienx suffiċjentement ikkumpensat bi tnaqqis relatat fl-ispejjeż tal-produzzjoni. Indikaturi oħra bħalma huma l-fluss tal-flus u r-redditu fuq l-investiment kienu negattivi wkoll matul il-perjodu taħt kunsiderazzjoni kollu u kellhom xejra 'l isfel.

(114)

Fuq il-bażi tal-konklużjonijiet ta' hawn fuq rigward iż-żewġ produtturi tal-Unjoni li kkooperaw, il-Kummissjoni kkonkludiet li proporzjon kbir tal-industrija tal-Unjoni ġarrab ħsara materjali skont it-tifsira tal-Artikolu 3(1) wara evalwazzjoni tal-fatturi u l-indiċi ekonomiċi relevanti kollha li għandhom effett fuq l-istat tal-industrija, kif stipulat fl-Artikolu 3(5) tar-Regolament bażiku.

(115)

Xi partijiet interessati sostnew li anke jekk wieħed iqis biss l-indikaturi ekonomiċi taż-żewġ produtturi tal-Unjoni li kkooperaw, l-indikaturi ekonomiċi tagħhom ma jurux dannu materjali. Huma ssottolinjaw pereżempju li anke jekk il-volum tal-bejgħ tal-produtturi tal-Unjoni li kkooperaw naqas f'termini assoluti, dan żdied f'termini ta' sehem mis-suq. Huma qiesu li dan huwa żvilupp pożittiv f'kuntest ta' domanda dejjem tiċkien għas-siliko-manganiż. Huma saħqu, b'mod partikolari, li anke jekk il-produtturi tal-Unjoni li kkooperaw kienu qed jagħmlu telf matul il-perjodu taħt kunsiderazzjoni, is-sitwazzjoni tagħhom kienet qed titjieb mill-2012 sa tmiem il-PI. Huma qiesu dan bħala żvilupp pożittiv ieħor.

(116)

Il-Kummissjoni taqbel li mhux il-fatturi u l-indiċijiet ekonomiċi kollha li għandhom effett fuq l-istat tal-industrija juru xejriet negattivi. Madankollu, jibqa' l-fatt li l-biċċa l-kbira tal-indikaturi ekonomiċi u finanzjarji juru sitwazzjoni negattiva għaż-żewġ produtturi tal-Unjoni li kkooperaw. Għalhekk il-Kummissjoni tirrifjuta din l-affermazzjoni.

(117)

L-ilmentatur allega li meta rreferiet għall-Artikolu 3(5) il-Kummissjoni rrikonoxxiet li l-importazzjonijiet li huma oġġett ta' dumping kienu fil-fatt ikkawżaw dannu materjali.

(118)

Madankollu, dan ma kienx dak li kkonkludiet il-Kummissjoni. L-ewwel nett, il-Kummissjoni kkonkludiet li proporzjon kbir tal-industrija tal-Unjoni ġarrab ħsara materjali, mingħajr referenza għal kawżi possibbli ta' din il-ħsara. Sussegwentament, kif meħtieġ mill-Artikolu 3(6) tar-Regolament bażiku, il-Kummissjoni eżaminat jekk l-importazzjonijiet oġġett ta' dumping mill-Indja kkawżawx dannu materjali.

(119)

Ir-raġunament tal-ilmentatur li f'każ li evalwazzjoni tal-fatturi u l-indiċi ekonomiċi relevanti kollha li għandhom effett fuq l-istat tal-industrija, kif stipulat fl-Artikolu 3(5) tar-Regolament bażiku, iwassal sabiex jiġi konkluż li ġġarrab dannu mill-industrija tal-Unjoni ifisser ukoll li d-dannu huwa kkawżat minn importazzjonijiet oġġett ta' dumping, huwa raġunament li jinterpreta ħażin ir-Regolament bażiku. Kif stipulat fl-Artikolu 3(6) tar-Regolament bażiku, waħda mill-kundizzjonijiet li għandha tiġi ssodisfata sabiex jiġi impost dazju antidumping, hija li jrid jintwera li l-importazzjonijiet oġġett ta' dumping qegħdin jikkawżaw ħsara. Dan jirrikjedi analiżi sħiħa tal-kawżalità u mhijiex sempliċi suppożizzjoni kif qed jissuġġerixxi l-ilmentatur. Din l-analiżi tinsab fit-taqsima 6 aktar 'l isfel.

(120)

Skont l-Artikolu 3(6) tar-Regolament bażiku, il-Kummissjoni eżaminat jekk l-importazzjonijiet oġġett ta' dumping mill-Indja kkawżawx dannu materjali lill-industrija tal-Unjoni.

(121)

Il-Kummissjoni ma osservatx koinċidenza fiż-żmien bejn ix-xejra tas-sitwazzjoni ekonomika diffiċli taż-żewġ produtturi tal-Unjoni li kkooperaw u ż-żieda tal-volum tal-importazzjonijiet oġġett ta' dumping mill-Indja. Il-volum tal-importazzjonijiet mill-Indja żdied fl-2012 meta mqabbel mal-2011, iżda naqas wara (ara t-Tabella 11), kemm f'termini assoluti u meta mqabbel mal-produzzjoni u l-konsum fl-Unjoni. Dan juri kontrotendenza meta mqabbel mas-sitwazzjoni taż-żewġ produtturi tal-Unjoni li kkooperaw, li ġarrbu l-ogħla telf fl-2011 (meta l-volum tal-importazzjonijiet mill-Indja kien l-aktar baxx, kemm f'termini assoluti kif ukoll meta mqabbel mal-produzzjoni u l-konsum), u t-telf l-aktar baxx fl-2012 (meta l-volum tal-importazzjonijiet mill-Indja kien l-ogħla, għal darb' oħra kemm f'termini assoluti u meta mqabbel mal-produzzjoni u l-konsum). Bl-istess mod, matul il-PI is-sitwazzjoni finanzjarja taż-żewġ produtturi tal-Unjoni li kkooperaw iddeterjorat iżda l-volum tal-importazzjonijiet mill-Indja naqsu, kemm f'termini assoluti kif ukoll relattivament mal-produzzjoni u l-konsum, meta mqabbel mal-2013.

Tabella 11

Volum tal-importazzjonijiet u l-bejgħ (f'tunnellati metriċi), sehem mis-suq u profittabbiltà

(122)

L-ilmentatur spjega l-kontrotendenza bejn il-volum tal-importazzjoni u l-profittabbiltà taż-żewġ produtturi tal-Unjoni li kkooperaw, kif ġej. Minħabba spejjeż eċċezzjonali tal-enerġija fi Stat Membru minnhom fl-2011, produttur wieħed mill-Unjoni kellu telf ogħla fl-2011 milli fl-2012 meta naqsu l-ispejjeż tal-enerġija. Mingħajr dawn l-ispejjeż eċċezzjonali tal-enerġija fl-2011, ix-xejriet kienu juru li l-ikbar telf taż-żewġ produtturi tal-Unjoni li kkooperaw seħħ matul l-PI.

(123)

Il-Kummissjoni aċċettat li fl-2011 wieħed miż-żewġ produtturi tal-Unjoni li kkooperaw kien qed jaffaċċja spejjeż tal-enerġija eċċezzjonali. Madankollu, anki wara li ġew aġġustati l-ispejjeż tal-produzzjoni u l-profittabbiltà għal dik is-sena, il-kontrotendenza baqgħet l-istess. L-akbar telf taż-żewġ produtturi tal-Unjoni li kkooperaw (li seħħ matul il-PI) jaħbat ma' tnaqqis fil-volum tal-importazzjonijiet mill-Indja, kemm f'termini assoluti kif ukoll meta mqabbel mal-produzzjoni u l-konsum fl-Unjoni.

(124)

Barra minn hekk, l-ilmentatur argumenta li analiżi sena wara sena (jiġifieri l-evoluzzjoni tal-importazzjonijiet oġġett ta' dumping imqabbla mad-deterjorament tal-prestazzjoni fuq bażi annwali) ma kinitx preċiża f'suq tal-komoditajiet u ssuġġerixxa li l-analiżi tkun ibbażata fuq ix-xejriet bejn l-2011 u l-PI u ppropona il-metodoloġija li ġejja. L-ewwel nett, l-ilmentatur ikkalkula dak li huwa kkunsidra li huwa l-konsum reali tas-siliko-manganiż fl-Unjoni bħala perċentwal tal-produzzjoni tal-azzar fl-Unjoni (billi assuma li huwa meħtieġ ammont kostanti ta' siliko-manganiż għall-produzzjoni ta' tunnellata azzar), u qal li l-konsum reali baqa' relattivament stabbli matul il-perjodu kollu bejn Jannar 2011 u April 2013. It-tieni, l-ilmentatur ikkalkula l-konsum apparenti tas-siliko-manganiż fl-Unjoni bħala l-produzzjoni domestika miżjuda mal-importazzjonijiet bit-tnaqqis tal-esportazzjonijiet għall-istess perjodu, u qal li l-konsum apparenti żdied b'mod sinifikanti minħabba ż-żieda tal-importazzjonijiet mill-Indja. It-tielet, l-ilmentatur ikkunsidra li d-differenza bejn il-konsum reali u l-konsum apparenti kien l-akkumulazzjoni tal-ħażna tal-importazzjonijiet Indjani bejn l-2011 u April 2013. Fl-aħħar nett, l-ilmentatur ikkunsidra li l-eċċess tal-akkumulazzjoni tal-ħażna tqiegħed fuq is-suq tal-Unjoni sa minn April 2013 u dan wassal għal provvista żejda b'konsegwenza ta' pressjoni 'l isfel fuq il-prezzijiet, anki jekk fl-istess ħin l-importazzjonijiet mill-Indja naqsu.

(125)

Il-Kummissjoni kkalkulat il-konsum tal-Unjoni tas-siliko-manganiż bħala s-somma tal-bejgħ domestiku flimkien mal-importazzjonijiet. L-ilmentatur ma spjegax għaliex dan il-metodu ma jistax jitqies li huwa preċiż. Il-konsum tal-Unjoni wera xejra ta' tnaqqis matul il-perjodu taħt kunsiderazzjoni, skont ix-xejra globali ta' domanda baxxa għas-siliko-manganiż. Il-Kummissjoni nnotat li kemm il-bejgħ taż-żewġ produtturi tal-Unjoni li kkooperaw kif ukoll l-importazzjonijiet minn pajjiżi terzi kollha naqsu matul il-perjodu taħt kunsiderazzjoni. Madankollu, l-importazzjonijiet mill-pajjiżi terzi kollha kienu affettwati b'mod aktar qawwi mit-tnaqqis fil-konsum, filwaqt li ż-żewġ produtturi tal-Unjoni li kkooperaw irnexxielhom iżommu s-sehem mis-suq tagħhom. Barra minn hekk, fost l-importazzjonijiet mill-pajjiżi terzi kollha, l-importazzjonijiet mill-Indja żdiedu fl-2012 u sussegwentement naqsu filwaqt li l-importazzjonijiet minn pajjiżi terzi oħra naqsu fl-2012 u żdiedu wara.

(126)

Il-Kummissjoni kunsidrat li d-dikjarazzjoni tal-ilmentatur ta' effett enormi ta' akkumulazzjoni tal-ħażna tal-importazzjonijiet Indjani ma kienx issostanzjat biżżejjed. Ma ġiet ipprovduta l-ebda dejta statistika speċifika dwar l-importazzjonijiet Indjani tas-siliko-manganiż u l-konsum tiegħu tul iż-żmien. Għaldaqstant ma ntweriex li l-pressjoni eżerċitata fuq il-volum tal-bejgħ tal-Unjoni u l-prezzijiet matul il-perjodu ta' investigazzjoni kien dovut għall-effett tal-importazzjonijiet Indjani fis-sentejn ta' qabel.

(127)

L-informazzjoni pprovduta mill-ilmentatur wasslet biss għall-konklużjoni li l-konsum reali tas-siliko-manganiż kien inqas mill-konsum apparenti bejn Marzu 2011 u Marzu 2012 u li din l-akkumilazzjoni tal-ħażniet tqiegħdet fis-suq minn Marzu 2012, xahar wara li l-konsum reali jidher li kien kemmxejn ogħla mill-konsum apparenti. Skont il-graff li pprovda l-ilmentatur matul is-seduta ta' Diċembru 2015, ħażna żejda kienet tiġi assorbita bejn Marzu 2012 u Settembru 2013 u ma kienx ikollha effett matul il-perjodu tal-investigazzjoni (minn Ottubru 2013 sa Settembru 2014). Barra minn hekk, l-informazzjoni ġenerali ma ppermettietx li l-importazzjonijiet mill-Indja jiġu iżolati mill-importazzjonijiet l-oħra. Għalhekk, mhuwiex ċar x'kien is-sors tal-allegat akkumulazzjoni enormi tal-ħażna: Is-sors seta' kien l-importazzjonijiet mill-Indja, iżda wkoll importazzjonijiet minn pajjiżi terzi jew anke mill-industrija tal-Unjoni fejn żidiet sostanzjali fl-inventarji ilhom jiġu osservati mill-2011 (ara t-Tabella 9). Barra minn hekk, minħabba l-evoluzzjoni tas-suq tas-siliko-manganiż sa mill-2011 (tnaqqis fil-konsum flimkien ma' tnaqqis tal-prezzijiet, ħajja tal-prodott fuq l-ixkaffa ta' anqas minn sena), jidher li ftit hemm raġuni għal allegata akkumulazzjoni enormi tal-ħażna miġmugħa fl-2011 u qabel u li ġiet rilaxxata fis-suq tal-Unjoni fi tmiem l-2013 u matul l-2014 (matul il-perjodu ta' investigazzjoni). Għalhekk, id-dikjarazzjoni li l-interpretazzjoni tad-dejta tal-importazzjoni matul il-perjodu tal-investigazzjoni għandha tinbidel minħabba akkumulazzjoni enormi tal-ħażna ta' importazzjonijiet mill-Indja ġiet miċħuda.

(128)

Fid-dokument ta' informazzjoni, u f'talba separata lill-importaturi magħrufa kollha, il-Kummissjoni tablet lill-partijiet interessati biex jipprovdu informazzjoni dwar l-importazzjonijiet tas-siliko-manganiż b'kontenut baxx ta' manganiż (50 % jew inqas) bħala parti mill-prodott ikkonċernat, biex tivvaluta l-volum u l-prezz medju ta' dawn l-importazzjonijiet. Barra minn hekk, l-għan kien li tiġi ċċarata l-fattibbiltà teknika u ekonomika tal-użu ta' siliko-manganiż ta' kwalità baxxa (bħala tali jew wara t-taħlit) u l-impatt tiegħu fuq is-suq tal-Unjoni.

(129)

Il-Kummissjoni ma rċeviet l-ebda kumment mingħand l-importaturi iżda rċeviet xi feedback mingħand xi partijiet interessati oħra.

(130)

Produttur Indjan wieħed ikkummenta li s-siliko-manganiż b'kontenut baxx ta' manganiż huwa prodott ta' kwalità inferjuri u li għalhekk jinbiegħ bi prezz aktar baxx. Madankollu jekk il-prezz tiegħu jiġi aġġustat biex jitqies il-kontenut aktar baxx ta' manganiż, il-prezz aġġustat ikun kompletament konformi mal-prezz tas-siliko-manganiż standard. Din il-parti interessata żiedet li l-volum tal-importazzjonijiet ta' dan is-siliko-manganiż ta' standard inferjuri fl-Unjoni huwa baxx u għalhekk ma jistax jikkawża ħsara lill-industrija tal-Unjoni.

(131)

Grupp ieħor ta' produtturi Indjani sostnew li s-siliko-manganiż ta' kwalità baxxa jista' jintuża direttament fi fran bl-ark elettriku jew jista' jitħallat ma' siliko-manganiż ta' kwalità ogħla biex jinkiseb prodott standard, mhux esklużivament siliko-manganiż b'kontenut FE ta' 72 % (tipikament mill-Ukrajna). Huma nnutaw li l-istudju tal-fattibilità teknika ppreżentat mill-ilmentatur innifsu ma jeskludix il-possibbiltà teknika tat-taħlit. Huma rrikonoxxew li t-taħlit jinvolvi spiża addizzjonali, iżda mhux fil-livell deskritt mill-ilmentatur. Huma qablu li dan it-tip ta' siliko-manganiż jinbiegħ bi prezz aktar baxx proprjament minħabba l-kontenut baxx ta' manganiż u li għalhekk it-tqabbil tal-prezzijiet mas-siliko-manganiż standard għandu jsir wara aġġustament prorata li jwassal għal prezzijiet simili.

(132)

L-ilmentatur argumenta li s-siliko-manganiż ta' kwalità baxxa ma jintużax bħala tali mill-funderiji tal-azzar fl-Unjoni u li l-klijenti tagħhom ma jirriskjawx jużaw taħlita ta' gradi differenti ta' siliko-manganiż għal raġunijiet ta' kwalità. L-ilmentatur sostna wkoll li dan il-prodott ta' standard inferjuri jirrappreżenta fenomenu temporanju li ma kienx il-kawża tad-dannu tagħhom.

(133)

Fir-rigward tal-effett tal-importazzjonijiet oġġett ta' dumping fuq il-prezzijiet, il-Kummissjoni nnotat li l-prezz medju kemm tal-importazzjonijiet oġġett ta' dumping tas-siliko-manganiż mill-Indja kif ukoll tal-prezzijiet taż-żewġ produtturi tal-Unjoni li kkooperaw kien qed jonqos matul il-perjodu taħt kunsiderazzjoni. Madankollu, ftit li xejn instab twaqqigħ tal-prezz, kif imsemmi hawn fuq fil-premessi (77) u ta' wara.

(134)

Il-Kummissjoni kkonkludiet li ma kienx hemm koinċidenza fiż-żmien bejn ix-xejra tas-sitwazzjoni ekonomika diffiċli taż-żewġ produtturi tal-Unjoni li kkooperaw u ż-żieda tal-volum tal-importazzjonijiet oġġett ta' dumping mill-Indja. L-investigazzjoni stabbilixxiet l-eżistenza ta' kontrotendenzi bejn iż-żieda fil-volum tal-importazzjonijiet oġġett ta' dumping u d-dannu mġarrba miż-żewġ produtturi tal-Unjoni li kkooperaw. Barra minn hekk, is-sehem mis-suq tal-importazzjonijiet oġġett ta' dumping żdiedu matul il-perjodu taħt kunsiderazzjoni, iżda biss minn [18 %/24 %] sa [23 %/30 %]. Is-sehem mis-suq ma jurix xejra li qed tikber kontinwament u l-prezzijiet ma waqqgħux il-prezzijiet tal-industrija tal-Unjoni, jew ftit li xejn.

(135)

Minħabba n-nuqqas ta' koinċidenza fiż-żmien bejn id-deterjorament tas-sitwazzjoni ekonomika tal-produtturi tal-Unjoni li kkooperaw u x-xejriet fil-volum u fis-sehem fis-suq tal-importazzjonijiet oġġett ta' dumping tas-siliko-manganiż mill-Indja, il-Kummissjoni kkonkludiet li l-impatt tal-importazzjonijiet oġġett ta' dumping fuq is-sitwazzjoni tal-industrija tal-Unjoni ma jistax jiġi kklassifikat bħala materjali skont it-tifsira tal-Artikolu 3(6) tar-Regolament bażiku. F'dawn iċ-ċirkustanzi, ma ntweriex li l-volum u/jew li l-livelli tal-prezzijiet tal-importazzjonijiet Indjani oġġett ta' dumping kienu responsabbli għas-sitwazzjoni dannuża taż-żewġ produtturi li kkooperaw.

(136)

Billi ma setgħetx tiġi stabbilita rabta kawżali bejn l-importazzjonijiet oġġett ta' dumping u s-sitwazzjoni dannuża tal-industrija tal-Unjoni, ma kien hemm għalfejn jiġu żvelati l-ebda kalkoli ta' bejgħ taħt il-prezz, billi dawn huma rilevanti biss biex jiġi stabbilit il-livell tal-miżuri. Għaldaqstant, il-Kummissjoni ċaħdet id-dikjarazzjoni tal-ilmentatur li l-Kummissjoni naqset milli tikkalkula u tiżvela l-livell ta' bejgħ taħt il-prezz.

(137)

Kif stabbilit fil-premessa (135) il-Kummissjoni ma setgħetx tistabbilixxi rabta kawżali bejn id-dannu mġarrab mill-industrija tal-Unjoni u l-importazzjonijiet oġġett ta' dumping mill-Indja. Għaldaqstant, ma kienx hemm għalfejn jinsiltu konklużjonijiet fir-rigward tal-impatt ta' fatturi oħra fuq il-qagħda tal-industrija tal-Unjoni, kif stabbilit fl-Artikolu 3(7) tar-Regolament bażiku. Madankollu, ġew ukoll eżaminati fatturi oħra u għall-finijiet ta' kompletezza dawn huma deskritti f'din it-taqsima li jmiss.

(138)

L-ilmentatur iddikjara li l-Kummissjoni wettqet żball metodoloġiku fil-valutazzjoni li l-possibbiltà ta' dannu minn fatturi oħra jista' b'xi mod jiġġustifika l-fatt li l-importazzjonijiet oġġett ta' dumping qegħdin jikkawżaw ħsara materjali. L-ilmentatur argumenta wkoll li l-Kummissjoni użat fatturi bħall-importazzjonijiet li mhumiex mill-Indja u s-sitwazzjoni tas-suq ta' FerroAtlantica biss biex itemm il-każ.

(139)

Peress li ma tista' tiġi stabbilita l-ebda rabta kawżali, il-konsiderazzjoni tal-impatt potenzjali ta' fatturi oħrajn fuq id-dannu mġarrab mill-industrija tal-Unjoni ma għadhiex rilevanti. It-taqsimiet 7.1 sa 7.4 hawn taħt huma limitati għad-deskrizzjoni tal-fatturi l-oħra mingħajr ma tinsilet xi konklużjoni dwar l-impatt potenzjali tagħhom fuq id-dannu. Fin-nuqqas ta' rabta kawżali, l-analiżi tal-“fatturi l-oħra” ma għandha l-ebda effett fuq il-konklużjonijiet dwar id-dumping, il-ħsara u l-kawżalità. Għalhekk il-Kummissjoni tirrifjuta din id-dikjarazzjoni.

(140)

Il-volum tal-importazzjonijiet minn pajjiżi terzi ġie stabbilit bl-użu tad-dejta tal-Eurostat u b'kunsiderazzjoni tar-reġimi kollha tal-importazzjoni, inkluż l-ipproċessar attiv. L-oriġini ta' volum sinifikanti mill-importazzjoni “mhijiex speċifikata għal raġunijiet kummerċjali jew militari fil-qafas tal-kummerċ ma' pajjiżi terzi”. Bl-għajnuna tal-awtoritajiet doganali ta' Stat Membru wieħed, il-Kummissjoni kienet kapaċi tanalizza parti minn dan il-volum skont il-pajjiż tal-oriġini. Bl-allokazzjoni ta' dawn “l-importazzjonijiet mhux speċifikati” lill-pajjiżi tal-oriġini rispettivi tagħhom, ix-xejra kumplessiva tal-importazzjonijiet ma tinbidilx b'mod sinifikanti. Madankollu, biex tinżamm il-kunfidenzjalità ta' dawk l-importazzjonijiet, iċ-ċifri tal-importazzjonijiet ġew ippreżentati f'firxiet kif ġej:

Tabella 12

Importazzjonijiet minn pajjiżi terzi (tunnellati metriċi)

(141)

Is-siliko-manganiż jiġi importat fl-Unjoni minn għadd sinifikanti ta' pajjiżi oħra. Apparti mill-Indja, hemm tliet pajjiżi esportaturi ewlenin (skont il-volum): In-Norveġja, l-Afrika t'Isfel u l-Ukrajna. L-ewwel erba' pajjiżi jirrappreżentaw madwar 90 % tal-importazzjonijiet totali fl-Unjoni u għandhom sehem mis-suq ta' madwar 70 %. In-Norveġja għandha sehem mis-suq ta' madwar [17 %/23 %]. Produttur Norveġiż wieħed tas-siliko-manganiż huwa relatat ma' wieħed mill-produtturi tal-Unjoni (Comilog Dunkerque/Eramet).

(142)

Il-volum tal-importazzjonijiet fl-Unjoni minn pajjiżi terzi oħra għajr l-Indja segwa kontrotendenza meta mqabbel mal-importazzjonijiet mill-Indja. B'mod partikolari, dan naqas fl-2012 u fl-2013 meta mqabbel mal-2011, iżda żdied matul l-PI.

(143)

Abbażi tad-dejta tal-Eurostat, il-prezzijiet tal-importazzjoni minn pajjiżi terzi kienu bħala medja ogħla mill-prezzijiet tal-importazzjoni mill-Indja u wrew tendenza ta' tnaqqis matul il-perjodu taħt kunsiderazzjoni. Madankollu, id-dejta tal-Eurostat ma tipprovdix tqassim skont il-kwalità u l-gradi u għalhekk ma tippermettix tqabbil tal-istess mal-istess.

(144)

L-ilmentatur spjega li r-raġunijiet għaliex l-importazzjonijiet tas-siliko-manganiż mill-Ukrajna, l-Afrika t'Isfel u n-Norveġja naqsu fl-2012 ma kinux relatati maż-żieda fl-importazzjonijiet mill-Indja iżda kienu dovuti għal ċirkustanzi speċifiċi għal kull pajjiż.

(145)

Il-Kummissjoni ħadet nota tal-ispjegazzjonijiet mogħtija mill-ilmentatur dwar iż-żieda jew it-tnaqqis tal-importazzjonijiet minn ċerti pajjiżi terzi. Madankollu, il-fatt li ż-żewġ produtturi tal-Unjoni li kkooperaw żammew is-sehem tagħhom mis-suq juri li l-pajjiżi terzi kienu qed jikkompetu bejniethom għaż-żamma tal-bejgħ u s-sehem mis-suq fl-Unjoni, mingħajr ma affettwaw il-volum tal-bejgħ u s-sehem mis-suq taż-żewġ produtturi tal-Unjoni li kkooperaw.

(146)

Il-volum tal-esportazzjonijiet taż-żewġ produtturi tal-Unjoni li kkoopera żviluppa kif ġej matul il-perjodu taħt kunsiderazzjoni:

Tabella 13

Prestazzjoni tal-esportazzjonijiet tal-produtturi tal-Unjoni li kkooperaw

(147)

Iż-żewġ produtturi tal-Unjoni li kkooperaw aktar milli rdoppjaw il-bejgħ tagħhom barra l-Unjoni matul il-perjodu taħt kunsiderazzjoni, għalkemm il-volumi mhumiex partikolarment sinifikanti f'termini assoluti.

(148)

Il-prezz medju tal-bejgħ lil partijiet mhux relatati f'pajjiżi terzi naqas f'konformità mat-tnaqqis tal-prezz fis-suq tal-Unjoni.

(149)

Bosta partijiet interessati konfermaw fis-sottomissjonijiet tagħhom li bħala waħda mill-konsegwenzi tat-tnaqqis fir-ritmu ekonomiku tal-Unjoni, il-produzzjoni tal-azzar naqset. Billi s-siliko-manganiż jintuża prinċipalment għall-produzzjoni tal-azzar, dan kellu impatt dirett u immedjat fuq il-konsum tas-siliko-manganiż.

(150)

Bosta partijiet interessati konfermaw fis-sottomissjonijiet tagħhom li l-produzzjoni dinjija tas-siliko-manganiż ma naqsitx flimkien mat-tnaqqis fil-konsum. Huma qalu li l-prezz tas-suq tas-siliko-manganiż huwa marbut mal-bilanċ tal-provvista u d-domanda, kif inhu l-każ għall-komoditajiet kollha. Bħala konsegwenza, il-provvista żejda skattat tnaqqis fil-prezz tas-siliko-manganiż. L-industrija tal-Unjoni fis-sħuħija tagħha żiedet il-kapaċità tagħha mill-2011 sal-2012 u b'hekk ikkontribwixxiet għal din is-sitwazzjoni.

(151)

Il-kumpanija Spanjola FerroAtlantica ma kkooperatx mal-investigazzjoni. Skont l-ilment, FerroAtlantica, bħala l-produttur ewlieni tal-Unjoni, evitatat milli ġġarrab dannu sinifikanti mill-importazzjonijiet Indjani u kienet fil-fatt profittabbli ħafna. FerroAtlantica li hija l-akbar produttur tas-siliko-manganiż fl-Unjoni, irnexxielha żżomm is-sehem mis-suq tagħha tul il-perjodu taħt kunsiderazzjoni kollu u hija f'kompetizzjoni diretta maż-żewġ produtturi tal-Unjoni li kkooperaw.

(152)

L-ilmentatur qal li FerroAtlantica ma setgħetx ikkontribwixxiet għad-dannu mġarrab miż-żewġ produtturi tal-Unjoni li kkooperaw peress li ma kinitx qed twaqqa' l-prezzijiet tagħhom u ma żiditx is-sehem mis-suq għad-detriment tagħhom. L-ilmentatur sostna wkoll li FerroAtlantica ma għadhiex ħielsa mid-dannu kkawżat mill-importazzjonijiet Indjani għax is-sitwazzjoni tagħha bdiet tiddeterjora sa mill-bidu tal-2015.

(153)

Din id-dikjarazzjoni hija relatata ma' avvenimenti wara l-PI li normalment ma jistgħux jitqiesu skont l-Artikolu 6(1) tar-Regolament bażiku. Barra minn hekk, il-Kummissjoni ma identifikat l-ebda konsiderazzjoni speċjali li trendi d-deċiżjoni tagħha manifestament inadegwata kieku kellha twarrab dan l-argument. B'mod partikolari, l-argument sar fi stadju tard ħafna tal-investigazzjoni, aktar minn 11-il xahar wara li nbdiet, meta ma kienx għadu jista' jiġi vverifikat. Fi kwalunkwe każ, il-Kummissjoni tqis li l-preżenza fis-suq tal-akbar produttur tal-Unjoni kellu impatt fuq l-iżvilupp tal-volum tal-bejgħ, il-prezz u s-sehem mis-suq taż-żewġ produtturi tal-Unjoni li kkooperaw fil-PI.

(154)

L-ilmentatur u żewġ produtturi ewlenin tal-azzar ippreżentaw kummenti dwar l-interess tal-Unjoni. Peress li r-rabta kawżali bejn l-importazzjonijiet oġġett ta' dumping mill-Indja u d-dannu mġarrba mill-industrija tal-Unjoni ma ġietx stabbilita, mhux meħtieġ li jiġi eżaminat l-interess tal-Unjoni.

(155)

Fuq il-bażi tal-konklużjonijiet li waslet għalihom il-Kummissjoni fir-rigward tad-dumping, id-dannu u l-kawżalità, skont l-Artikolu 9 tar-Regolament bażiku, il-proċediment għandu jintemm mingħajr l-impożizzjoni ta' miżuri.

(156)

Il-partijiet ikkonċernati kollha ġew infurmati bil-konklużjonijiet finali u l-intenzjoni li l-proċediment jintemm u ngħataw l-opportunità biex jikkummentaw. Il-kummenti tagħhom tqiesu iżda ma biddlux il-konklużjonijiet milħuqa hawn fuq,

(157)

Il-Kumitat stabbilit mill-Artikolu 15(1) tar-Regolament (KE) Nru 1225/2009 ma esprimiex opinjoni,