“(9)

L-għan ġenerali tal-Faċilità għar-Refuġjati fit-Turkija huwa li l-azzjonijiet iffinanzjati mill-baġit tal-Unjoni u mill-kontribuzzjonijiet bilaterali tal-Istati Membri jiġu kkoordinati u ssimplifikati, sabiex tittejjeb l-effiċjenza u l-komplimentarjetà tal-appoġġ mogħti lir-refuġjati u lill-komunitajiet ospitanti fit-Turkija”.

“(11)

L-istrumenti tal-UE attwalment użati b'reazzjoni għall-kriżi Sirjana, bħalma huma l-Istrument Ewropew tal-Viċinat (ENI) (5), l-Istrument ta' Finanzjament tal-Kooperazzjoni għall-Iżvilupp (DCI) (6), l-Istrument għall-Assistenza ta’ Qabel l-Adeżjoni (IPA II) (7), l-Istrument li jikkontribwixxi għall-Istabbiltà u l-Paċi (IcSP) (8) u l-finanzjament skont ir-Regolament tal-Kunsill (KE) Nru 1257/96 rigward l-għajnuna umanitarja jistgħu (9) jikkontribwixxu għall-Faċilità għar-Refuġjati fit-Turkija fil-limiti stipulati fil-qafas finanzjarju pluriennali għall-2014-2020. Kwalunkwe għajnuna umanitarja għall-Faċilità għar-Refuġjati fit-Turkija għandha tiġi amministrata u mogħtija skont il-prinċipji umanitarji u l-Kunsens Ewropew dwar l-Għajnuna Umanitarja (10).”;

“(13)

Konformi mal-‘Fehim Komuni li jistabbilixxi qafas ta' governanza u kundizzjonalità għall-Faċilità għar-Refuġjati għat-Turkija bejn l-Istati Membri tal-UE u l-Kummissjoni’ (minn hawn 'il quddiem ‘il-Fehim Komuni’) li ġie miftiehem fit-3 ta' Frar 2016, il-Kummissjoni tirrikonoxxi l-intenzjonijiet li esprimew l-Istati Membri li jikkontribwixxu EUR 2 000 000 000 minn ammont totali ta' EUR 3 000 000 000. It-twassil progressiv tal-assistenza għandu l-kundizzjoni li t-Turkija timplimenta l-impenji tagħhas kont il-Pjan ta' Azzjoni Konġunt bejn l-UE u t-Turkija. Deċiżjonijiet relatati ma', u azzjonijiet li jipprovdu assistenza umanitarja se jiġu implimentati f'konformità mar-Regolament tal-Kunsill (KE) Nru 1257/96 (11) u skont il-prinċipji stabbiliti fil-kunsens Ewropew dwar l-għajnuna umanitarja (12).”;

“(14)

Kif miftiehem fil-Fehim Komuni, il-kontribuzzjonijiet finanzjarji mill-Istati Membri se jiddaħħlu fil-baġit tal-Unjoni bħala dħul assenjat estern, skont l-Artikolu 21(2)(b) tar-Regolament (UE, Euratom) Nru 966/2012 tal-Parlament Ewropew u tal-Kunsill dwar ir-regoli finanzjarji applikabbli għall-baġit ġenerali tal-Unjoni u li jħassar ir-Regolament tal-Kunsill (KE, Euratom) Nru 1605/2002 (13). Il-Kummissjoni, minħabba li hi biss għandha r-responsabbiltà li timplimenta l-baġit tal-Unjoni skont l-Artikolu 317 tat-TFUE sejra, f'isem l-Unjoni, tirċievi ċ-ċertifikati ta' kontribuzzjoni individwali mingħand kull Stat Membru skont l-Artikolu 7(2) tar-Regolament Delegat tal-Kummissjoni (UE) Nru 1268/2012 dwar ir-regoli tal-applikazzjoni tar-Regolament (UE, Euratom) Nru 966/2012 tal-Parlament Ewropew u tal-Kunsill dwar ir-regoli finanzjarji applikabbli għall-baġit ġenerali tal-Unjoni (14). Iċ-ċertifikati ta' kontribuzzjoni individwali se jkunu bbażati fuq mudell wieħed li jagħti lok għal adattament, fejn meħtieġ, għal bżonnijiet speċifiċi. Kull Stat Membru individwali se jibgħat iċ-ċertifikat ta' kontribuzzjoni ffirmat bi skeda ta' kontribuzzjonijiet lill-Kummissjoni biex jiġu rikonoxxuti.”.

(i)

jagħti gwida strateġika dwar il-koordinazzjoni tal-assistenza li għandha tingħata. Il-gwida strateġika għanda tikkonsisti mill-istipular tal-prijoritajiet ġenerali, it-tipi ta' azzjonijiet li għandhom jiġu appoġġjati, l-istrumenti li għandhom jintużaw għall-implimentazzjoni effiċjenti tal-azzjonijiet u l-koordinazzjoni tagħhom, kif ukoll, fejn xieraq, il-kundizzjonijiet li għandhom x'jaqsmu mal-implimentazzjoni tat-Turkija tal-impenji tagħha skont il-Pjan ta' Azzjoni Konġunt bejn l-UE u t-Turkija għat-twassil tal-assistenza.

(ii)

jissorvelja u jivvaluta b'mod permanenti l-implimentazzjoni tal-azzjonijiet koordinati taħt il-Faċilità, inkluż ir-rispett tar-rekwiżiti ta' kondizzjonalità, u jieħu kont tal-valutazzjonijiet li jsiru mill-istrutturi stabbiliti bil-għan li jissorveljaw il-progress li jkun qed isir fl-implimentazzjoni tal-impenji riflessi fil-Pjan ta' Azzjoni Konġunt bejn l-UE u t-Turkija.

(iii)

jeżamina l-previżjonijiet ta' żborż relatati mal-implimentazzjoni tal-azzjonijiet ippreżentati mill-Kummissjoni u, fejn xieraq, jista' jipproponi li l-Kummissjoni tiddiferixxi l-eżerċitazzjoni parzjali jew sħiħa marbuta ma' ħlas parzjali wieħed jew iktar futur dovut.

(iv)

jissorvelja l-kontribuzzjonijiet mill-Istati Membri, skont l-iskeda ta' kontribuzzjonijiet stipulata fiċ-ċertifikat ta' kontribuzzjoni ta' kull Stat Membru, bil-ħsieb tal-ammont miftiehem ta' EUR 2 000 000 000.