18.12.2015   

MT

Il-Ġurnal Uffiċjali tal-Unjoni Ewropea

L 332/111

(1)

Fit-30 ta' April 2015, il-Kummissjoni Ewropea (“il-Kummissjoni”) ħabbret, permezz ta' avviż ippubblikat f'Il-Ġurnal Uffiċjali tal-Unjoni Ewropea  (2) (“in-notifika ta' bidu”), il-bidu ta' proċediment antidumping (“il-proċediment antidumping”) fir-rigward ta' importazzjonijiet fl-Unjoni ta' vireg tal-azzar għar-rinfurzar tal-konkrit li jifilħu għal ħafna reħja (“HFP rebars”) li joriġinaw fir-Repubblika tal-Poplu taċ-Ċina (“RPĊ” jew “il-pajjiż ikkonċernat”) wara lment imressaq fis-17 ta' Marzu 2015 mill-Assoċjazzjoni tal-Azzar Ewropea (European Steel Association — “Eurofer” jew “l-ilmentatur”) f'isem produtturi li jirrappreżentaw aktar minn 25 % tal-produzzjoni totali tal-Unjoni ta' HFP rebars.

(2)

Il-prodott suġġett għal reġistrazzjoni (“il-prodott ikkonċernat”) huwa vireg tal-ħadid jew tal-azzar tar-rinfurzar tal-konkrit bi prestazzjoni li tiflaħ għal ħafna reħja, magħmula mill-ħadid, l-azzar bla liga jew l-azzar bil-liga (iżda minbarra azzar inossidabbli, azzar b'veloċità kbira, azzar siliko-manganiż), mhux maħdum aktar ħlief irrumblat bis-sħana, iżda inkluż dak mibrum wara l-irrumblar; dawn il-vireg fihom indentazzjonijiet, inċiżjonijiet, skanalaturi jew deformazzjonijiet oħra magħmula waqt il-proċess tal-irrumblar jew jiġu mibrumin wara l-irrumblar; il-karatteristika ewlenija tal-prestazzjoni li tiflaħ għal ħafna reħja hija l-kapaċità li tkun tiflaħ għal stress ripetut mingħajr ma tinkiser u, speċifikament, l-abilità li tirreżisti għal aktar minn 4,5 miljun ċiklu ta' reħja bl-użu ta' proporzjon ta' stress (minimu/massimu) ta' 0,2 u firxa tal-istress li taqbeż l-150 MPa, li toriġina mir-RPĊ, u li attwalment taqa' taħt il-kodiċijiet NM ex 7214 20 00, ex 7228 30 20, ex 7228 30 41, ex 7228 30 49, ex 7228 30 61, ex 7228 30 69, ex 7228 30 70 u ex 7228 30 89. Dawn il-kodiċi NM qed jingħataw għal skopijiet ta' informazzjoni biss u ma għandhom l-ebda effett vinkolanti fuq il-klassifikazzjoni tal-prodott.

(3)

It-talba għar-reġistrazzjoni skont l-Artikolu 14(5) tar-Regolament bażiku saret mill-ilmentatur fid-19 ta' Novembru 2015. L-ilmentatur talab li l-importazzjonijiet tal-prodott ikkonċernat isiru soġġetti għar-reġistrazzjoni sabiex sussegwentament ikunu jistgħu jiġu applikati miżuri kontra dawk l-importazzjonijiet mid-data ta' tali reġistrazzjoni.

(4)

Skont l-Artikolu 14(5) tar-Regolament bażiku, il-Kummissjoni tista' tagħti struzzjonijiet lill-awtoritajiet tad-dwana biex jieħdu l-passi xierqa għar-reġistrazzjoni tal-importazzjonijiet, sabiex sussegwentement ikunu jistgħu jiġu applikati miżuri fuq dawk l-importazzjonijiet. L-importazzjonijiet jistgħu jsiru soġġetti għar-reġistrazzjoni wara talba mill-industrija tal-Unjoni li jkun fiha biżżejjed evidenza biex tiġġustifika din l-azzjoni.

(5)

L-ilmentatur jiddikjara li r-reġistrazzjoni hija ġġustifikata billi l-prodott ikkonċernat għadu qed ikun suġġett għad-dumping u l-importaturi kienu jafu tajjeb, jew misshom kienu jafu, dwar il-prattiki ta' dumping li kienu ilhom għaddejjin għal perjodu estiż ta' żmien u li kienu qed jikkawżaw dannu għall-industrija tal-Unjoni. L-ilmentatur jiddikjara wkoll li l-importazzjonijiet Ċiniżi qed jikkawżaw dannu għall-industrija tal-Unjoni u li kien hemm żieda sostanzjali fil-livell ta' dawk l-importazzjonijiet, anki wara l-perjodu tal-investigazzjoni, li jimmina b'mod serju l-effett ta' rimedju tad-dazju antidumping, jekk jiġi applikat tali dazju.

(6)

Il-Kummissjoni tqis li l-importaturi kienu jafu, jew kellhom ikunu jafu dwar il-prattiki ta' dumping tal-esportaturi. Evidenza prima facie suffiċjenti f'dan ir-rigward kienet tinsab fl-ilment u dan kien ippreżentat fin-notifika ta' bidu ta' dan il-proċediment (3). Il-verżjoni mhux kunfidenzjali tal-ilment stmat marġni ta' dumping ta' 20–30 % għall-importazzjonijiet Ċiniżi. Meta titqies il-firxa tad-dumping li jista' jkun qed iseħħ, ikun raġonevoli li wieħed jassumi li l-importaturi jkunu jafu, jew misshom kienu jafu, bis-sitwazzjoni.

(7)

Fl-ilment, l-ilmentatur ipprovda evidenza dwar il-valur normali bbażat fuq informazzjoni tal-ipprezzar ta' produtturi fil-Qatar u l-Emirati Għarab Magħquda. L-evidenza ta' dumping hija bbażata fuq tqabbil tal-valuri normali stabbiliti hekk, mal-prezz tal-esportazzjoni (fuq livell ta' kif joħroġ mill-fabbrika) tal-prodott ikkonċernat meta jinbiegħ għall-esportazzjoni lejn l-Unjoni. Il-prezz tal-esportazzjoni Ċiniż ġie ddeterminat fuq il-bażi ta' kwotazzjonijiet ta' prezzijiet ta' bejgħ ta' esportazzjonijiet Ċiniżi lejn l-Unjoni.

(8)

Barra minn hekk, l-ilmentatur ipprovda, kemm fl-ilment kif ukoll fit-talba għal reġistrazzjoni, biżżejjed evidenza fil-forma ta' investigazzjonijiet reċenti minn awtoritajiet oħra (pereż. il-Kanada, l-Eġittu u l-Malasja) li fiha huma deskritti l-prattiki ta' dumping tal-esportaturi Ċiniżi u li prima facie ma setgħux u ma kellhomx jiġu injorati mill-importaturi.

(9)

Minn meta beda l-proċediment f'April 2015, il-Kummissjoni identifikat żieda oħra ta' madwar 38 % meta wieħed iqabbel il-volumi tal-importazzjoni matul il-perjodu minn April 2014 sa Marzu 2015 (jiġifieri l-Perjodu tal-Investigazzjoni) mal-perjodu bejn April u Settembru 2015 (jiġifieri l-perjodu ta' wara l-bidu). Dan juri li kien hemm żieda sostanzjali fl-importazzjonijiet Ċiniżi tal-prodott ikkonċernat wara l-bidu ta' din l-investigazzjoni.

(10)

L-ilmentatur inkluda wkoll evidenza prima facie fl-ilment u fit-talba għar-reġistrazzjoni dwar ix-xejra tat-tnaqqis fil-prezzijiet tal-bejgħ tal-importazzjoni. Mill-istatistika tal-Eurostat, li hija pubblikament disponibbli, jidher li l-valuri ta' unità tal-importazzjonijiet mir-RPĊ naqsu minn EUR 431 għal kull tunnellata fil-PI għal EUR 401 għal kull tunnellata fil-perjodu ta' wara l-PI. Din hija wkoll indikazzjoni oħra li l-importaturi ta' materjali Ċiniżi kienu jew kellhom ikunu konxji mid-dumping.

(11)

Barra minn hekk, fl-ilment hemm biżżejjed evidenza prima facie li qed tiġi kkawżata ħsara. Fis-sottomissjonijiet li saru fil-qafas tal-investigazzjoni, inkluża fit-talba għar-reġistrazzjoni, hemm evidenza li ssir ħsara addizzjonali biż-żieda kontinwa ta' dawn l-importazzjonijiet. Minħabba t-tajming, iż-żieda fil-volum tal-importazzjonijiet oġġett ta' dumping u l-imġiba fl-ipprezzar tal-produtturi esportaturi Ċiniżi x'aktarx li jimminaw serjament l-effett ta' rimedju ta' kwalunkwe dazju definittiv, sakemm dawn id-dazji ma jiġux applikati retroattivament. Barra minn hekk, fid-dawl tat-tnedija tal-proċedimenti attwali u filwaqt li jitqiesu l-iżviluppi tal-importazzjonijiet Ċiniżi f'termini ta' prezzijet u volumi sa issa, huwa raġonevoli li wieħed jassumi li l-livell tal-importazzjonijiet tal-prodott ikkonċernat jista' jiżdied ulterjorment qabel l-adozzjoni ta' miżuri provviżorji, jekk ikun hemm minnhom, u li l-inventarji jistgħu jinbnew b'mod rapidu mill-importaturi.

(12)

Fid-dawl ta' dak li ntqal hawn fuq, il-Kummissjoni kkonkludiet li l-ilmentatur ipprovda biżżejjed evidenza prima facie biex jiġġustifika li l-importazzjonijiet tal-prodott ikkonċernat ikunu soġġetti għar-reġistrazzjoni, b'konformità mal-Artikolu 14(5) tar-Regolament bażiku.

(13)

Il-partijiet kollha interessati huma mistiedna jippreżentaw il-fehmiet tagħhom bil-miktub u jipprovdu evidenza ta' sostenn. Barra minn hekk, il-Kummissjoni tista' tisma' lill-partijiet interessati, dment li jagħmlu talba bil-miktub u juru li hemm raġunijiet partikolari għalfejn għandhom jinstemgħu.

(14)

Skont l-Artikolu 14(5) tar-Regolament bażiku l-importazzjonijiet tal-prodott ikkonċernat għandhom isiru soġġetti għar-reġistrazzjoni bl-iskop li jiżguraw li, jekk l-investigazzjoni tirriżulta f'konklużjonijiet li jwasslu għall-impożizzjoni ta' dazji antidumping, dawk id-dazji jistgħu, jekk il-kundizzjonijiet neċessarji jintlaħqu, jiġu imposti b'mod retroattiv fuq l-importazzjonijiet irreġistrati f'konformità mal-Artikolu 10(4) tar-Regolament bażiku.

(15)

Fl-ilment l-ilmentatur jikkalkula marġni ta' dumping medju ta' 20–30 % u marġni medju ta' bejgħ taħt il-prezz ta' 15 %–30 % għall-prodott ikkonċernat. L-ammont stmat ta' responsabbiltà possibbli fil-futur huwa stabbilit fil-livell ta' bejgħ taħt il-prezz, stmat abbażi tal-ilment, jiġifieri 15 %–30 % ad valorem fuq il-valur ta' importazzjoni CIF tal-prodott ikkonċernat.

(16)

Kull dejta personali miġbura fil-kuntest ta' din ir-reġistrazzjoni se tiġi trattata skont ir-Regolament (KE) Nru 45/2001 tal-Parlament Ewropew u tal-Kunsill (4),