REGOLAMENT TAL-KUNSILL (UE) 2015/878

tat-8 ta' Ġunju 2015

li jemenda r-Regolament (UE) Nru 1352/2014 dwar miżuri ristrettivi fid-dawl tas-sitwazzjoni fil-Jemen

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-Artikolu 215 tiegħu,

Wara li kkunsidra d-Deċiżjoni tal-Kunsill 2014/932/PESK tat-18 ta' Diċembru 2014 dwar miżuri restrittivi fid-dawl tas-sitwazzjoni fil-Jemen (1),

Wara li kkunsidra l-proposta konġunta tar-Rappreżentant Għoli tal-Unjoni għall-Affarijiet Barranin u l-Politika ta' Sigurtà u tal-Kummissjoni Ewropea,

Billi:

(1)

Id-Deċiżjoni 2014/932/PESK tagħti effett lir-Riżoluzzjoni tal-Kunsill tas-Sigurtà tan-Nazzjonijiet Uniti (UNSCR) 2140 (2014) tas-26 ta' Frar 2014 dwar miżuri restrittivi minħabba s-sitwazzjoni fil-Jemen tipprevedi restrizzjonijiet fuq l-ammissjoni u l-iffriżar ta' fondi u riżorsi ekonomiċi ta' ċerti persuni deżinjati mill-Kumitat stabbilit skont il-paragrafu 19 tal-UNSCR 2140 (2014).

(2)	Ir-Regolament tal-Kunsill (UE) Nru 1352/2014 (2) jagħti effett lid-Deċiżjoni 2014/932/PESK.

(3)

Fl-14 ta' April 2015, il-Kunsill tas-Sigurtà tan-Nazzjonijiet Uniti adotta l-UNSCR 2216 (2015) li testendi l-kamp ta' applikazzjoni tal-kriterji ta' deżinjazzjoni u li tipprevedi embargo fuq l-armi lil, jew għal benefiċċju ta', individwi u entitajiet iddeżinjati, u dawk li jaġixxu f'isimhom jew taħt id-direzzjoni tagħhom fil-Jemen. Permezz tad-Deċiżjoni tal-Kunsill (PESK) 2015/882 (3) li temenda d-Deċiżjoni 2014/932/PESK, il-Kunsill iddeċieda li jestendi l-kamp ta' applikazzjoni tal-kriterji tad-deżinjazzjonijiet kif xieraq.

(4)

Uħud minn dawk il-miżuri jaqgħu fil-kamp ta' applikazzjoni tat-Trattat dwar il-Funzjonament tal-Unjoni Ewropea u, għalhekk, partikolarment bil-ħsieb li tiġi żgurata l-applikazzjoni uniformi tagħha mill-operaturi ekonomiċi fl-Istati Membri kollha, hemm bżonn ta' azzjoni regolatorja fil-livell tal-Unjoni sabiex jiġu implimentati.

(5)	Ir-Regolment (UE) Nru 1352/2014 għandu għaldaqstant jiġi aġġornat skont dan,

ADOTTA DAN IR-REGOLAMENT:

Artikolu 1

Ir-Regolament (UE) Nru 1352/2014 huwa emendat kif ġej:

(1)

Fl-Artikolu 1, jiżdied il-punt li ġej:

“(j)

‘assistenza teknika’ tfisser kwalunkwe appoġġ tekniku relatat ma' tiswijiet, żvilupp, manifattura, immuntar, ittestjar, manutenzjoni, jew kwalunkwe servizz tekniku ieħor, u tista' tkun f'forma ta' istruzzjoni, parir, taħriġ, trasmissjoni ta' għarfien operazzjonali jew ħiliet jew servizzi ta' konsulenza, inklużi forom verbali ta' assistenza.”

(2)

Jiżdied l-Artikolu li ġej:

“Artikolu 1a

Għandu jkun ipprojbit:

(a)

li tingħata assistenza teknika relatata ma' attivitajiet militari u mal-forniment, manifattura, manutenzjoni u l-użu ta' armi u materjal relatat ta' kull tip, inklużi armi u munizzjon, vetturi u tagħmir militari, tagħmir paramilitari, u l-parts tal-bdil għalihom, direttament jew indirettament lil kwalunkwe persuna fiżika jew ġuridika, entità jew korp, kif elenkat fl-Anness I;

(b)

li jingħataw finanzjament jew assistenza finanzjarja relatati ma' attivitajiet militari, inklużi b'mod partikolari għotjiet, self u assigurazzjoni ta' kreditu għall-esportazzjoni, kif ukoll assigurazzjoni u riassigurazzjoni għal kwalunkwe bejgħ, forniment, trasferiment jew esportazzjoni ta' armi u materjal relatat, jew għall-forniment ta' assistenza teknika relatata, direttament jew indirettament lil kwalunkwe persuna fiżika jew ġuridika, entità jew korp, kif elenkat fl-Anness I.”

;

(3)

Fl-Artikolu 3(1), jiżdied il-punt li ġej:

“(d)	atti li jiksru l-embargo fuq l-armi impost bl-Artikolu 1 tad-Deċiżjoni 2014/932/PESK jew li jostakolaw il-kunsinna ta' għajnuna umanitarja lill-Jemen, jew l-aċċess għal, jew id-distribuzzjoni ta', għajnuna umanitarja fil-Jemen.”

Artikolu 2

Dan ir-Regolament għandu jidħol fis-seħħ fil-jum ta' wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fil-Lussemburgu, it-8 ta' Ġunju 2015.

Għall-Kunsill

Il-President

D. REIZNIECE-OZOLA

(1) ĠU L 365, 19.12.2014, p. 147.

(2) Ir-Regolament tal-Kunsill (UE) Nru 1352/2014 tat-18 ta' Diċembru 2014 dwar miżuri restrittivi fid-dawl tas-sitwazzjoni fil-Jemen (ĠU L 365, 19.12.2014, p. 60).

(3) Id-Deċiżjoni tal-Kunsill (PESK) 2015/882 tat-8 ta' Ġunju 2015 li temenda d-Deċiżjoni 2014/932/PESK dwar miżuri restrittivi fid-dawl tas-sitwazzjoni fil-Jemen (Ara paġna 11 ta' dan il-Ġurnal Uffiċjali).