(1)

Fis-26 ta' Ġunju 2014, il-Kummissjoni Ewropea (“il-Kummissjoni”) bdiet investigazzjoni antidumping fuq l-importazzjonijiet fl-Unjoni ta' prodotti tal-metall mgħattan mingħajr tisħin f'fuljetti li joriġinaw mir-Repubblika Popolari taċ-Ċina (“RPĊ”) u mit-Tajwan (“il-pajjiżi konċernati”) fuq il-bażi tal-Artikolu 5 tar-Regolament bażiku. Ippubblikat Notifika ta' Bidu f'Il-Ġurnal Uffiċjali tal-Unjoni Ewropea (2) (“in-Notifika ta' Bidu”).

(2)

Il-Kummisjoni bdiet l-investigazzjoni wara li rċeviet ilment fit-13 ta' Mejju 2014 mingħand Eurofer (“l-ilmentatur”) f'isem il-produtturi ta' prodotti ċatti tal-azzar inossidabbli llaminati bil-kesħa tal-Unjoni li lmentaw (stainless steel cold rolled, “SSCR”). L-ilmentatur jirrappreżenta madwar 50 % tal-produzzjoni totali tal-Unjoni ta' prodotti SSCR. L-ilment kien jinkludi evidenza ta' dumping u tad-dannu materjali li jirriżulta li kienet biżżejjed biex tiġġustifika l-bidu tal-investigazzjoni.

(3)

Fl-14 ta' Awwissu 2014, il-Kummissjoni bdiet investigazzjoni antisussidji fir-rigward tal-importazzjonijiet fl-Unjoni ta' prodotti SSCR li joriġinaw mir-RPĊ u bdiet investigazzjoni separata. Ippubblikat Notifika ta' Bidu fuq il-proċedimenti antisussidji f'Il-Ġurnal Uffiċjali tal-Unjoni Ewropea (3).

(4)

Wara talba mill-ilmentatur, sostnuta bl-evidenza meħtieġa, il-Kummissjoni adottat ir-Regolament ta' Implimentazzjoni (UE) Nru 1331/2014 fil-15 ta' Diċembru 2014 (4) li jagħmel l-importazzjonijiet ta' prodotti tal-metall mgħattan mingħajr tisħin f'fuljetti li joriġinaw mir-RPĊ u mit-Tajwan soġġetti għal reġistrazzjoni mis-17 ta' Diċembru 2014.

(5)

Fin-Notifika ta' Bidu, il-Kummissjoni stiednet lill-partijiet interessati jikkuntattjawha sabiex jieħdu sehem fl-investigazzjoni. Barra minn hekk, il-Kummissjoni speċifikament infurmat lill-ilmentatur, lil produtturi magħrufa oħrajn tal-Unjoni, lill-produtturi esportaturi magħrufa u lill-awtoritajiet Ċinżi u Tajwaniżi, lil importaturi, fornituri u utenti, negozjanti magħrufa, kif ukoll assoċjazzjonijiet magħrufa, ikkonċernati mill-bidu tal-investigazzjoni, u stednithom jieħdu sehem. Il-Kummissjoni għarrfet ukoll lil produtturi fl-Istati Uniti tal-Amerika (“l-Istati Uniti”) u tal-Afrika t'Isfel dwar il-bidu tal-investigazzjoni u stednithom jieħdu sehem. Fin-Notifika ta' Bidu, il-Kummissjoni għarrfet lill-partijiet interessati li kienet tqis lill-Istati Uniti bħala pajjiż terz b'ekonomija tas-suq (“pajjiż analogu”) skont it-tifsira tal-Artikolu 2(7)(a) tar-Regolament bażiku.

(6)

Il-partijiet interessati kellhom l-opportunità li jikkummentaw dwar il-ftuħ tal-investigazzjoni u li jitolbu smigħ mal-Kummissjoni u/jew mal-Uffiċjal tas-Seduta fil-proċedimenti kummerċjali.

(7)

Fin-Notifika ta' Bidu tagħha, il-Kummissjoni qalet li tista' tieħu kampjun tal-partijiet interessati skont l-Artikolu 17 tar-Regolament bażiku.

(8)

Fin-Notifika ta' Bidu tagħha, il-Kummissjoni ddikjarat li kienet għażlet kampjun provviżorju ta' produtturi tal-Unjoni. Il-Kummissjoni għażlet kampjun fuq il-bażi tal-volum tal-produzzjoni. Dan il-kampjun kien jikkonsisti f'erba' produtturi tal-Unjoni. Il-produtturi tal-Unjoni magħżula għall-kampjun kienu jirrappreżentaw madwar 50 % tal-volum tal-produzzjoni. Il-Kummissjoni stiednet lill-partijiet interessati biex jagħtu l-kummenti tagħhom fuq dan il-kampjun provviżorju. Ma sarux kummenti fuq il-kampjun provviżorju u l-kampjun provviżorju ġie kkonfermat. Il-kampjun jirrappreżenta l-industrija tal-Unjoni.

(9)

Biex tiddeċiedi jekk kienx meħtieġ li jittieħed kampjun u, jekk iva, biex tagħżel kampjun, il-Kummissjoni staqsiet lil importaturi mhux relatati sabiex jipprovdu l-informazzjoni speċifikata fin-Notifika ta' Bidu.

(10)

Wieħed u tletin importatur mhux relatati pprovdew l-informazzjoni mitluba u qablu li jkunu inklużi fil-kampjun. Skont l-Artikolu 17(1) tar-Regolament bażiku, il-Kummissjoni għażlet kampjun ta' erbgħa fuq il-bażi tal-akbar volum ta' importazzjonijiet fl-Unjoni. B'konformità mal-Artikolu 17(2) tar-Regolament bażiku, l-importaturi magħrufa u kkonċernati kollha ġew ikkonsultati dwar l-għażla tal-kampjun.

(11)

Daħlu kummenti li kienu jikkonċernaw l-istruttura tas-sjieda ta' wieħed mill-importaturi magħżula. Il-partijiet interessati argumentaw li wieħed mill-importaturi m'għandux ikun inkluż fil-kampjun għax hu relatat ma' produttur tal-Unjoni. Madankollu, dan l-importatur ma kien relatat mal-ebda produttur tal-Unjoni waqt il-perjodu tal-investigazzjoni, imma sar relatat wara. Barra minn hekk, it-terminu “importatur mhux relatat” ifisser mhux relatat ma' produtturi esportaturi. Tabilħaqq, importatur mhux relatat jista' jkun relatat ma' produttur tal-Unjoni.

(12)

Biex tiddeċiedi jekk hux meħtieġ kampjunar u, jekk iva, biex tagħżel kampjun, il-Kummissjoni staqsiet lill-produtturi esportaturi kollha fit-Tajwan sabiex jipprovdu l-informazzjoni speċifikata fin-Notifika ta' Bidu. Barra minn hekk, il-Kummissjoni staqsiet lir-rappreżentanti tat-Tajwan għall-UE biex jidentifikaw u/jew jikkuntattjaw produtturi esportaturi oħrajn, f'każ li hemm, li jistgħu jkunu interessati li jieħdu sehem fl-investigazzjoni.

(13)

Total ta' disa' allegati produtturi esportaturi fil-pajjiż ikkonċernat ipprovdew l-informazzjoni mitluba u qablu li jkunu inklużi fil-kampjun. Skont l-Artikolu 17(1) tar-Regolament bażiku, il-Kummissjoni għażlet kampjun ta' erbgħa (li tlieta minnhom huma relatati) fuq il-bażi tal-akbar volum rappreżentattiv ta' esportazzjonijiet lejn l-Unjoni li jista' jiġi investigat b'mod raġonevoli fiż-żmien disponibbli. Skont l-Artikolu 17(2) tar-Regolament bażiku, il-produtturi esportaturi magħrufa u kkonċernati kollha, u l-awtoritajiet tal-pajjiż ikkonċernati, ġew ikkonsultati dwar l-għażla tal-kampjun. Ma sar l-ebda kumment.

(14)

L-investigazzjoni wriet li żewġ kumpaniji tal-kampjun u żewġ kumpaniji li kkooperaw iżda li ma ntagħżlux għall-kampjun ma jissodisfawx id-definizzjoni ta' produttur esportatur, għax joperaw biss bħala ċentri tas-servizz u jużaw il-prodott ikkonċernat bħala l-input tal-produzzjoni tagħhom. Ġie stabbilit li dawn il-kumpaniji ma għandhom l-ebda faċilità ta' laminazzjoni bis-sħana jew bil-kesħa u l-valur miżjud tagħhom hu minimu b'rabta mal-ispiża tal-inputs tagħhom. Huma jixtru u jbigħu l-prodott ikkonċernat f'tipi differenti (ara l-premessi minn (26) sa (28) hawn taħt).

(15)

Madankollu, waħda minn dawn il-kumpaniji hija relatata ma' produttur esportaturi fil-kampjun. Għalhekk, fl-investigazzjoni ġiet ikkunsidrata li tappartjeni ma' dak il-grupp ta' kumpaniji. Wara l-esklużjoni mill-kampjun il-kumpanija li ma tissodisfax id-definizzjoni ta' produttur esportatur, il-kampjun li jifdal jirrappreżenta tal-inqas madwar 48 % tal-volum totali tal-esportazzjonijiet mit-Tajwan lejn l-Unjoni u madwar 80 % tal-bejgħ domestiku fit-Tajwan. Għalhekk, il-kampjun xorta kien wieħed rappreżentattiv.

(16)

Il-Kummissjoni eskludiet minn marġini individwali tad-dumping u mill-kalkolu tal-livell ta' eliminazzjoni tad-dannu, it-tliet kumpaniji l-oħra. B'riżultat ta' dan, ma ġiet stabbilita l-ebda rata ta' dazju għal dawn it-tliet kumpaniji.

(17)

Produttur esportatur minnhom fit-Tajwan talab u saritlu analiżi individwali skont l-Artikolu 17(3) tar-Regolament bażiku.

(18)

Biex tiddeċiedi jekk il-kampjunar huwiex meħtieġ, u jekk iva, biex tagħżel kampjun, il-Kummissjoni talbet lill-produtturi esportaturi kollha fir-RPĊ sabiex jipprovdu l-informazzjoni speċifikata fin-Notifika ta' Bidu. Barra minn hekk, il-Kummissjoni talbet lill-awtoritajiet tar-RPĊ sabiex jidentifikaw u/jew jikkuntattjaw produtturi esportaturi oħra, f'każ li hemm, li jistgħu jkunu interessati li jieħdu sehem fl-investigazzjoni.

(19)

Tmien produtturi esportaturi fir-RPĊ ipprovdew l-informazzjoni mitluba u qablu li jkunu inklużi fil-kampjun. Skont l-Artikolu 17(1) tar-Regolament bażiku, il-Kummissjoni għażlet kampjun ta' erba' kumpaniji li jappartjenu għal żewġ gruppi fuq il-bażi tal-akbar volum rappreżentattiv ta' esportazzjonijiet lejn l-Unjoni li jistgħu jiġu investigati b'mod raġonevoli fiż-żmien disponibbli. Skont l-Artikolu 17(2) tar-Regolament bażiku, il-produtturi esportaturi magħrufa u kkonċernati kollha, u l-awtoritajiet tal-pajjiż ikkonċernati, ġew ikkonsultati dwar l-għażla tal-kampjun. Ma sar l-ebda kumment.

(20)

Għall-għanijiet tal-Artikolu 2(7)(b) tar-Regolament bażiku, il-Kummissjoni bagħtet formoli ta' talba għal TES lill-produtturi esportaturi kollha fir-RPĊ li kkooperaw li jkunu fil-kampjun u lil produtturi esportaturi li kkooperaw iżda li ma kinux inklużi fil-kampjun u li xtaqu japplikaw għal eżami individwali skont l-Artikolu 17(3) tar-Regolament bażiku, lil assoċjazzjoni magħrufa ta' produtturi esportaturi, u lill-awtoritajiet tar-RPĊ. Ħadd mill-produtturi esportaturi ma ddikjara TES.

(21)

Il-Kummissjoni bagħtet il-kwestjonarji lill-produtturi esportaturi Ċiniżi u Tajwaniżi fil-kampjun, lill-produtturi esportaturi li talbu analiżi individwali, lill-produtturi f'żewġ pajjiżi analogi potenzjali, kif ukoll lill-produtturi tal-Unjoni magħżula għall-kampjun, lill-importaturi mhux relatati fil-kampjun, kif ukoll lill-utenti li daħlu f'kuntatt.

(22)

It-tweġibiet tal-kwestjonarji daħlu mingħand erba' produtturi esportaturi Ċiniżi fil-kampjun, erba' produtturi esportaturi Tajwaniżi fil-kampjun (inklużi tnejn li sar magħruf li ma kinux produtturi esportaturi), produttur esportatur Tajwaniż li talab analiżi individwali, żewġ produtturi fl-Istati Uniti (pajjiż analogu), erba' produtturi tal-Unjoni fil-kampjun, erba' importaturi mhux relatati fil-kampjun, u sitt utenti.

(23)

Il-Kummissjoni fittxet u vverifikat l-informazzjoni kollha li tqieset neċessarja għal determinazzjoni provviżorja ta' dumping, id-dannu li jirriżulta u l-interess tal-Unjoni. Iż-żjarat ta' verifika skont l-Artikolu 16 tar-Regolament bażiku saru fil-bini tal-kumpaniji li ġejjin:

Produtturi tal-Unjoni

Iċ-ċentru tas-servizz relatat ma' Acciai Speciali Terni S.P.A.

L-ilmentatur

Produtturi esportaturi fit-Tajwan

Produtturi esportaturi fir-RPĊ

Importatur relatat fl-Unjoni

(24)

Il-Kummissjoni pproċediet bis-smigħ, inkluż is-smigħ tal-Uffiċjal tas-Seduta ma' produtturi esportaturi, assoċjazzjonijiet u importaturi.

(25)

L-investigazzjoni tad-dumping u d-dannu kopriet il-perjodu bejn l-1 ta' Jannar 2013 u l-31 ta' Diċembru 2013 (“il-perjodu tal-investigazzjoni”). L-analiżi tax-xejriet relevanti għall-valutazzjoni tad-dannu kopriet il-perjodu ta' bejn l-1 ta' Jannar 2010 u tmiem il-perjodu tal-investigazzjoni (“il-perjodu kkunsidrat”).

(26)

Il-prodott ikkonċernat huwa prodotti ċatti tal-azzar inossidabbli llaminati bil-kesħa, mhux maħdumin aktar ħlief illaminati bil-kesħa (imnaqqsin bil-kesħa) li joriġinaw fir-RPĊ u t-Tajwan u li jaqgħu taħt il-kodiċijiet tan-NM 7219 31 00 , 7219 32 10 , 7219 32 90 , 7219 33 10 , 7219 33 90 , 7219 34 10 , 7219 34 90 , 7219 35 10 , 7219 35 90 , 7220 20 21 , 7220 20 29 , 7220 20 41 , 7220 20 49 , 7220 20 81 u 7220 20 89 (“il-prodott konċernat”).

(27)

Il-prodotti tal-metall mgħattan mingħajr tisħin f'fuljetti jintużaw f'għażla wiesgħa ta' applikazzjonijiet, pereżempju fil-produzzjoni tal-apparati domestiċi (ngħidu aħna, in-naħa ta' ġewwa tal-magni tal-ħasil tal-ħwejjeġ u tal-platti), tubi wweldjati u tagħmir mediku kif ukoll fl-ipproċessar tal-ikel u fl-industriji tal-karozzi.

(28)

L-investigazzjoni wriet li t-tipi differenti tal-prodott konċernat kollha għandhom l-istess karatteristiċi fiżiċi, kimiċi u tekniċi bażiċi u bażikament jintużaw għall-istess għanijiet.

(29)

Instab li, essenzjalment, il-pprodotti tal-metall mgħattan mingħajr tisħin f'fuljetti prodotti u mibjugħa fl-Unjoni mill-industrija tal-Unjoni u l-prodotti ċatti tal-azzar inossidabbli llaminati bil-kesħa prodotti u mibjugħa fil-pajjiżi konċernati u fil-pajjiż analogu għandhom l-istess karatteristiċi fiżiċi, kimiċi u tekniċi u l-istess użi bażiċi bħall-prodotti ċatti tal-azzar inossidabbli llaminati bil-kesħa prodotti fil-pajjiżi kkonċernati u mibjugħa għall-esportazzjoni lejn l-Unjoni. Għalhekk jitqiesu simili skont it-tifsira tal-Artikolu 1(4) tar-Regolament bażiku.

(30)

Il-partijiet interessati ddikjaraw li wħud mit-tipi ta' prodotti (inklużi l-istrippi dojoq u ta' preċiżjoni) għandhom ikunu esklużi mill-ambitu tal-investigazzjoni, għaliex il-produtturi tal-Unjoni ma jistgħux ifornu bis-sħiħ dawn is-segmenti tas-suq. Madankollu, l-industrija tal-Unjoni pprovdiet evidenza li huma kapaċi jfornu bis-sħiħ lil dawn is-segmenti tas-suq.

(31)

Rigward l-istrippi ta' preċiżjoni, l-istess partijiet argumentaw li d-Direttorat Ġenerali għall-Kompetizzjoni tal-Kummissjoni Ewropea ddeċieda li jeskludi dan it-tip ta' prodott mis-suq tal-prodott relevanti fl-analiżi tiegħu tal-każ ta' fużjoni Outokumpu/INOXUM (5). Madankollu, id-definizzjoni tas-suq f'każ ta' fużjoni tiffoka fuq is-sostituzzjoni min-naħa tad-domanda u min-naħa tal-provvista. F'każ ta' antidumping, is-suq huwa ddefinit mill-karatteristiċi fiżiċi tal-prodott taħt investigazzjoni. Għalhekk, f'każ ta' antidumping it-tipi ta' prodott jistgħu jkunu differenti f'dak li għandu x'jaqsam ma' ċerti parametri (wisa', tolleranzi, proprjetajiet mekkaniċi). Barra minn hekk, dan it-tip ta' prodott kien sa mill-bidu nett parti mill-investigazzjoni għax il-produtturi tal-Unjoni ta' strippi ta' preċiżjoni kienu kkuntattjati fl-eżerċizzju kurrenti.

(32)

Għalhekk, il-Kummissjoni ma laqgħetx it-talba u saħqet li l-ambitu tal-prodott taħt investigazzjoni għandu jibqa' kif inhu.

(33)

Skont l-Artikolu 2(7)(b) tar-Regolament bażiku l-Kummissjoni tiddetermina valur normali skont l-Artikolu 2 minn (1) sa (6) ta' dak ir-Regolament għall-produtturi esportaturi fir-RPĊ li stqarrew u wrew li huma konformi mal-kriterji tal-Artikolu 2(7)(c) ta' dak ir-Regolament u għalhekk jistgħu jingħataw TES.

(34)

Biex tiddetermina jekk il-kriterji tal-Artikolu 2(7)(c) tar-Regolament bażiku ntlaħqux, il-Kummissjoni kisbet l-informazzjoni neċessarja billi talbet lill-produtturi esportaturi kkonċernati biex jimlew il-formola tat-talba ta' TES. Ħadd minnhom ma ddikjara TES.

(35)

Skont l-Artikolu 2(7)(a) tar-Regolament bażiku, il-valur normali kien determinat fuq il-bażi tal-prezz jew il-valur maħluq f'pajjiż b'ekonomija tat-tielet suq għall-produtturi esportaturi li ma ngħatawx TES. Għal dan il-għan, ried jintgħażel pajjiż analogu.

(36)

Fin-Notifika ta' Bidu, il-Kummissjoni infurmat lil partijiet interessati li qieset lill-Istati Uniti bħala pajjiż analogu xieraq u stiednet partijiet interessati biex jikkummentaw.

(37)

Il-Kummissjoni kkuntattjat numru ta' pajjiżi analogi potenzjali (l-Indja, l-Afrika t'Isfel, il-Korea t'Isfel, it-Tajwan u l-Istati Uniti) u fuq il-bażi tal-informazzjoni li waslitilha talbet lil 32 produttur magħruf tal-prodott simili fl-Afrika t'Isfel, il-Korea t'Isfel u l-Istati Uniti biex jipprovdu l-informazzjoni. Ma waslitx informazzjoni dwar produtturi fl-Indja u, għaldaqstant, l-Indja ma setgħetx titqies bħala pajjiż analogu potenzjali. It-Tajwan huwa soġġett għall-istess investigazzjoni u, għalhekk, l-informazzjoni pprovduta mill-produtturi investigati ġiet ikkunsidrata għal dan l-għan.

(38)

Żewġ produtturi biss fl-Istati Uniti wieġbu l-kwestjonarju tal-produtturi tal-pajjiż analogu. Għalhekk, il-Kummissjoni kellha tagħżel bejn l-Istati Uniti u t-Tajwan.

(39)

Fl-Istati Uniti hemm tal-anqas erba' produtturi kbar tal-prodott simili (tlieta huma vertikalment integrati u wieħed le), u l-produzzjoni u l-konsum totali huma paragunabbli ma' dawk tar-RPĊ. Fit-Tajwan, hemm grupp wieħed kbir vertikalment integrat ta' produtturi li qed imexxi s-suq, irrispettivament mill-eżistenza ta' produtturi żgħar li mhumiex integrati. Il-proċess ta' produzzjoni fl-Istati Uniti hu simili għal dak fit-Tajwan u kważi simili għal dak ta' xi produtturi esportaturi fir-RPĊ. Fil-biċċa l-kbira tagħha, il-materja prima użata fl-Istati Uniti u t-Tajwan hija l-istess. Hemm dazji antidumping kontra l-Ġappun, il-Korea t'Isfel u t-Tajwan fl-Istati Uniti u kontra r-RPĊ u l-Korea t'Isfel fit-Tajwan. Madankollu, l-importazzjonijiet tal-prodott simili fl-Istati Uniti u t-Tajwan huma sostanzjali, u jirrappreżentaw madwar 17 % u 37 % rispettivament tal-konsumi totali tul il-perjodu ta' investigazzjoni. Il-pajjiżi ewlenin li jesportaw lejn l-Istati Uniti jinkludu: Il-Messiku, ir-RPĊ, it-Tajwan, Franza, il-Finlandja, il-Ġappun u l-Ġermanja u lejn it-Tajwan: ir-RPĊ, il-Korea t'Isfel, il-Ġappun, il-Finlandja u l-Vjetnam.

(40)

Fid-dawl ta' dawn iċ-ċirkostanzi, l-Istati Uniti tqiesu iktar xierqa bħala pajjiż analogu għal żewġ raġunijiet ewlenin:

(41)

Il-partijiet interessati opponew l-użu tal-Istati Uniti bħala pajjiż analogu l-aktar minħabba l-allegat proċess differenti ta' produzzjoni u t-tip differenti ta' materja prima użata fil-produzzjoni. Iddikjaraw li f'dan ir-rigward, it-Tajwan, li wkoll huwa soġġett għal din l-investigazzjoni, ikun pajjiż analogu aktar xieraq mill-Istati Uniti.

(42)

F'dan l-istadju l-Kummissjoni kkonkludiet li l-Istati Uniti hu pajjiż analogu xieraq skont l-Artikolu 2(7)(a) tar-Regolament bażiku.

(43)

L-informazzjoni li waslet mingħand il-produtturi li kkooperaw fil-pajjiż analogu intużat bħala bażi għad-determinazzjoni tal-valur normali għall-produtturi esportaturi li ma ngħatawx TES, skont l-Artikolu 2(7)(a) tar-Regolament bażiku.

(44)

Il-Kummissjoni l-ewwel eżaminat jekk il-volum totali tal-bejgħ domestiku taż-żewġ produtturi li kkooperaw fil-pajjiż analogu kinux rappreżentattivi, skont l-Artikolu 2(2) tar-Regolament bażiku. Il-bejgħ domestiku jkun rappreżentattiv jekk il-volum totali tal-bejgħ domestiku tal-prodott simili għall-klijenti indipendenti fis-suq domestiku jkun jirrappreżenta tal-inqas 5 % tal-volum totali tal-bejgħ b'esportazzjoni tal-prodott ikkonċernat lejn l-Unjoni ta' kull produttur esportatur Ċiniż fil-kampjun matul il-perjodu ta' investigazzjoni. Fuq din il-bażi, il-bejgħ totali taż-żewġ produtturi tal-prodott simili li kkooperaw fis-suq domestiku tal-pajjiż analogu kien rappreżentattiv.

(45)

Imbagħad il-Kummissjoni identifikat it-tipi ta' prodotti mibjugħa f'livell domestiku li kienu identiċi jew paragunabbli għat-tipi tal-prodott mibjugħa għall-esportazzjoni fl-Unjoni għall-produtturi esportaturi fil-kampjun.

(46)

Imbagħad il-Kummissjoni ddefinixxiet il-proporzjoni tal-bejgħ bi profitt lill-klijenti indipendenti fis-suq domestiku għal kull tip ta' prodott matul il-perjodu tal-investigazzjoni biex tiddeċiedi jekk tużax il-bejgħ domestiku attwali għall-kalkolu tal-valur normali, skont l-Artikolu 2(4) tar-Regolament bażiku.

(47)

Il-valur normali huwa bbażat fuq il-prezz domestiku attwali għal kull tip ta' prodott irrispettivament jekk dan il-bejgħ huwiex profittabbli jew le, jekk:

(48)

F'dan il-każ, il-valur normali huwa l-medja peżata tal-prezzijiet tal-bejgħ domestiku kollu ta' dak it-tip ta' prodott matul il-perjodu tal-investigazzjoni. Il-Kummissjoni ħadet inkunsiderazzjoni t-tranżazzjonijiet kollha li ġew irrappurtati bħala bejgħ domestiku, peress li ma kien hemm l-ebda raġuni biex tiddubita li huma kienu għall-konsum domestiku.

(49)

Il-valur normali huwa l-prezz domestiku attwali għal kull tip ta' prodott tal-bejgħ domestiku bi profitt tat-tipi ta' prodotti biss matul il-perjodu tal-investigazzjoni, jekk:

(50)

Il-produtturi esportaturi fil-kampjun biegħu għall-esportazzjoni lejn l-Unjoni jew direttament lill-klijenti indipendenti jew, f'każ ta' produttur esportatur wieħed, permezz ta' kumpanija relatata li taġixxi bħala importatur.

(51)

Jekk il-produtturi esportaturi biegħu għall-esportazzjoni l-prodott ikkonċernat direttament lill-klijenti indipendenti fl-Unjoni, il-prezz tal-esportazzjoni kien stabbilit fuq il-bażi tal-prezzijiet li tħallsu jew li kellhom jitħallsu għall-prodott ikkonċernat meta nbiegħ għall-esportazzjoni lejn l-Unjoni, skont l-Artikolu 2(8) tar-Regolament bażiku.

(52)

Jekk il-produttur esportatur biegħ għall-esportazzjoni l-prodott ikkonċernat permezz ta' kumpanija relatata li taġixxi bħala importatur, il-prezz tal-esportazzjoni ġie stabbilit fuq il-bażi tal-prezz li bih il-prodott importat reġa' nbiegħ għall-ewwel darba lill-klijenti indipendenti fl-Unjoni, skont l-Artikolu 2(9) tar-Regolament bażiku. F'dan il-każ, l-aġġustamenti tal-prezz saru għall-ispejjeż kollha li ġġarrbu bejn l-importazzjoni u l-bejgħ mill-ġdid, inkluż il-bejgħ ta' spejjeż ġenerali u amministrattivi (“SĠ&A”), u l-profitti akkumulati.

(53)

Il-Kummissjoni qabblet il-valur normali u l-prezz tal-esportazzjoni tal-produtturi esportaturi fil-kampjun fuq il-bażi tal-prezz mill-fabbrika.

(54)

Fejn dan kien iġġustifikat mill-ħtieġa li jiġi żgurat paragun ġust, il-Kummissjoni aġġustat il-valur normali u/jew il-prezz tal-esportazzjoni għad-differenzi li jaffettwaw il-prezzijiet u l-paragunabilità tal-prezzijiet skont l-Artikolu 2(10) tar-Regolament bażiku. Saru aġġustamenti għat-trasport, l-assigurazzjoni, l-immaniġġar, it-tagħbija u l-ispejjeż anċillari, l-ippakkjar, il-kreditu, it-tariffi tal-bank u l-kummissjonijiet.

(55)

Għall-produtturi esportaturi fil-kampjun, il-Kummissjoni qabblet il-valur normali medju peżat ta' kull tip ta' prodott simili fil-pajjiż analogu (ara l-premessi minn (43) sa (49) iktar 'il fuq) mal-prezz tal-esportazzjoni medju peżat tat-tip korrispondenti tal-prodott ikkonċernat, skont l-Artikolu 2(11) u (12) tar-Regolament bażiku.

(56)

Fuq il-bażi ta' dan, il-marġnijiet tad-dumping medji peżati espressi bħala perċentwali tal-kost, l-assigurazzjoni, il-prezz fil-fruntiera tal-Unjoni tat-trasport tal-merkanzija (cost, insurance, freight, “CIF”), u dazju mhux imħallas, huma kif ġej:

Tabella 1

Marġini tad-dumping, ir-RPĊ

(57)

Għall-produtturi esportaturi li kkooperaw u li ma kinux inklużi fil-kampjun, il-Kummissjoni kkalkolat il-marġini tad-dumping medju peżat, skont l-Artikolu 9(6) tar-Regolament bażiku. Għalhekk, dak il-marġini kien stabbilit fuq il-bażi tal-medja peżata tal-marġnijiet tad-dumping tal-produtturi esportaturi fil-kampjun.

(58)

Fuq il-bażi ta' dan, il-marġini tad-dumping provviżorju tal-produtturi esportaturi li kkooperaw u li ma kinux inklużi fil-kampjun kien ta' 30,0 %.

(59)

Għall-produtturi esportaturi kollha l-oħrajn fil-pajjiż ikkonċernat, il-Kummissjoni stabbilixxiet il-marġini tad-dumping fuq il-bażi tal-fatti disponibbli skont l-Artikolu 18 tar-Regolament bażiku. Għal dan il-għan, il-Kummissjoni ddeterminat il-livell ta' kooperazzjoni tal-produtturi esportaturi. Il-livell ta' kooperazzjoni huwa l-volum ta' esportazzjonijiet ta' produtturi esportaturi li kkooperaw lejn l-Unjoni, mogħti bħala proporzjon tal-valur totali tal-esportazzjonijiet — kif irrapportat fl-istatistika dwar l-importazzjoni tal-Eurostat — mill-pajjiż ikkonċernat lejn l-Unjoni.

(60)

Il-livell ta' kooperazzjoni kien ikkunsidrat għoli u fuq din il-bażi, il-Kummissjoni ddeċidiet li tibbaża l-marġini residwu tad-dumping fil-livell tal-kumpanija fil-kampjun bl-ogħla marġini tad-dumping.

(61)

Il-marġnijiet provviżorji tad-dumping mogħtija bħala perċentwal tal-prezz CIF fil-fruntiera tal-Unjoni, bid-dazju mhux imħallas, huma kif ġej:

Tabella 2

Marġini tad-dumping, ir-RPĊ

(62)

Il-Kummissjoni l-ewwel eżaminat jekk il-volum totali tal-bejgħ domestiku għal kull produttur esportatur investigat kienx rappreżentattiv, skont l-Artikolu 2(2) tar-Regolament bażiku. Bil-produtturi esportaturi investigati l-Kummissjoni kkunsidrat il-produtturi esportaturi magħżula għall-kampjun, flimkien ma' produttur esportatur wieħed li ngħata analiżi individwali. Il-bejgħ domestiku jkun rappreżentattiv jekk it-total tal-volum tal-bejgħ domestiku tal-prodott simili lill-klijenti indipendenti fis-suq domestiku għal kull produttur esportatur jirrappreżenta mill-inqas 5 % tal-volum totali tal-bejgħ bl-esportazzjoni tiegħu tal-prodott konċernat lill-Unjoni matul il-perjodu tal-investigazzjoni.

(63)

Il-Kummissjoni sabet li l-bejgħ domestiku rrapportat mill-produtturi esportaturi investigati kien jinkludi ammonti sinifikanti ta' prodott simili mibjugħ lil distributuri, li mbagħad ikomplu jesportawh. Kalkolu bbażat fuq id-dejta tal-produzzjoni mqiegħda għad-dispożizzjoni mill-kumpaniji li kkooperaw u mill-istatistika dwar l-importazzjoni u l-esportazzjoni tal-prodott simili fit-Tajwan, ikkonferma li l-bejgħ domestiku rrapportat mill-produtturi esportaturi li kkooperaw kien jinkludi madwar 50 % tal-bejgħ indirett bl-esportazzjoni li ma kienx għal konsum domestiku.

(64)

Barra minn hekk, il-Kummissjoni sabet li teżisti sistema ta' skontijiet fis-suq domestiku fit-Tajwan. Wieħed mill-produtturi esportaturi fil-kampjun spjega li din is-sistema nħolqot biex tagħti inċentiv lil ċentri tas-servizzi lokali (distributuri) li jkomplu jesportaw il-prodotti tal-azzar tagħhom. Malli l-prezzijiet stabbiliti fis-suq domestiku miż-żewġ produtturi ewlenin, inkluż l-iskontijiet, ġew ikkomunikati b'mod wiesa' kull xahar mad-distributuri kollha, anke fin-nuqqas ta' skontijiet mogħtija minn produtturi oħra lill-klijenti tagħhom, l-iffissar tal-prezzijiet tal-prodotti li jispiċċaw fis-suq domestiku u ta' dawk li jkomplu jiġu esportati, kien ferm influwenzat mis-sistema tal-prezzijiet li teżisti fit-Tajwan.

(65)

Fid-dawl ta' dawn is-sejbiet ta' verifika fuq il-post, tlieta mill-produtturi esportaturi ntalbu jerġgħu jeżaminaw il-bejgħ li kienu rrapportaw għas-suq domestiku fit-Tajwan u jneħħu l-bejgħ kollu li ma kienx għall-konsum domestiku. Madankollu, ikkonfermaw biss li ma kinux jafu bid-destinazzjoni finali tal-prodott simili li jbigħu lill-klijenti tagħhom.

(66)

Kif spjegat fil-premessa (63) hawn fuq u biex tiżgura li l-valur normali ma kienx ibbażat ukoll fuq prezzijiet stabbiliti għal esportazzjonijiet indiretti, il-Kummissjoni għażlet approċċ konservattiv għall-kalkoli provviżorji tad-dumping billi użat biss il-bejgħ irrapportat lill-utenti finali fit-Tajwan. Il-Kummissjoni kkunsidrat bħala utent finali lil kull operatur li kompla jittrasforma l-prodott simili fi prodott ieħor li ma baqax aktar l-istess prodott. Bejgħ lil distributuri jew kummerċjanti ġie esklużi mill-bejgħ domestiku minħabba li matul l-investigazzjoni l-Kummissjoni sabet li wieħed mid-distributuri ewlenin fit-Tajwan li kien akkwista volum kbir tal-prodott simili rrappurta bħala bejgħ domestiku mill-fornituri tiegħu, esporta l-biċċa l-kbira ta' dawn il-volumi mixtrija.

(67)

Fuq din il-bażi, il-bejgħ totali minn kull prodottur esportatur tal-prodott simili investigat fis-suq domestiku kien rappreżentattiv.

(68)

Imbagħad il-Kummissjoni identifikat it-tipi ta' prodotti mibjugħa domestikament li kienu identiċi jew paragunabbli għat-tipi ta' prodotti mibjugħa għall-esportazzjoni lejn l-Unjoni għall-produtturi esportaturi investigati b'bejgħ domestiku rappreżentattiv.

(69)

Wara, il-Kummissjoni analizzat jekk it-tipi ta' prodotti mibjugħa mill-produtturi esportaturi investigati fis-suq domestiku tagħhom imqabblin mat-tipi ta' prodotti mibjugħa għall-esportazzjoni lejn l-Unjoni kinux rappreżentattivi, skont l-Artikolu 2(2) tar-Regolament bażiku. Il-bejgħ domestiku ta' tip ta' prodott huwa rappreżentattiv jekk il-volum totali ta' bejgħ domestiku ta' dak it-tip ta' prodott lil konsumaturi indipendenti matul il-perjodu ta' investigazzjoni jirrappreżenta mill-anqas 5 % tal-volum totali tal-bejgħ b'esportazzjoni lejn l-Unjoni tat-tip ta' prodott identiku jew paragunabbli.

(70)

Imbagħad il-Kummissjoni ddefinixxiet il-proporzjon tal-bejgħ bi profitt lill-klijenti indipendenti fis-suq domestiku għal kull tip ta' prodott matul il-perjodu tal-investigazzjoni biex tiddeċiedi jekk tużax il-bejgħ domestiku attwali għall-kalkolu tal-valur normali, skont l-Artikolu 2(4) tar-Regolament bażiku.

(71)

Il-valur normali huwa bbażat fuq il-prezz domestiku attwali għal kull tip ta' prodott irrispettivament minn dan il-bejgħ huwiex profittabbli jew le, jekk:

(72)

F'dan il-każ, il-valur normali huwa l-medja peżata tal-prezzijiet tal-bejgħ domestiku kollu ta' dak it-tip ta' prodott matul il-perjodu tal-investigazzjoni.

(73)

Il-valur normali huwa l-prezz domestiku attwali għal kull tip ta' prodott tal-bejgħ domestiku bi profitt tat-tipi ta' prodotti biss matul il-perjodu tal-investigazzjoni, jekk:

(74)

L-analiżi tal-bejgħ domestiku wriet li għal xi tipi ta' prodotti, xi bejgħ domestiku ħalla profitt u li l-prezz tal-bejgħ medju peżat kien ogħla mill-kost tal-produzzjoni. Skont dan, il-valur normali kien ikkalkolat bħala medja peżata tal-prezzijiet kollha tal-bejgħ domestiku matul il-perjodu tal-investigazzjoni meta ġew issodisfati l-kundizzjonijiet tal-premessa (71) hawn fuq, jew bħala medja peżata tal-bejgħ bi profitt biss, meta dawn il-kundizzjonijiet ma ġewx issodisfati. Peress li ma kienx hemm biżżejjed bejgħ jew ma kienx hemm bejgħ ta' ċerti tipi ta' prodott tal-prodott simili, jew fejn ma kienx hemm bejgħ matul in-negozju ordinarju, il-Kummissjoni ħolqot il-valur normali skont l-Artikolu 2(3) u (6) tar-Regolament bażiku.

(75)

Il-valur normali nħoloq billi żdied dan li ġej mal-kost medju tal-produzzjoni tal-prodott simili tal-produtturi esportaturi investigati matul il-perjodu tal-investigazzjoni:

(76)

Għal wieħed mill-produtturi esportaturi investigati, il-prezz tal-produzzjoni ġie aġġustat. Peress li volum sinifikanti tal-inputs użati għall-produzzjoni tal-prodott simili kien akkwistat minn fornitur relatat ukoll, il-Kummissjoni biddlet il-kost tax-xiri ta' dawn l-inputs mal-kost tal-produzzjoni tal-inputs mill-produttur esportatur investigat.

(77)

Għall-istess produttur esportatur, il-Kummissjoni sabet ukoll li aġġustament għall-valur tar-rottamazzjoni ngħadd darbtejn għax il-volum tal-inputs ikkonvertiti fi prodotti lesti ġie rreġistrat bħala nett mir-rottamazzjoni. Għalhekk, il-Kummissjoni rrifjutat it-tnaqqis tal-valur tar-rottamazzjoni mill-kost tal-produzzjoni tal-prodott lest.

(78)

Għat-tipi ta' prodotti mhux mibjugħa fi kwantitajiet rappreżentattivi fis-suq domestiku, żdiedu l-ispejjeż SĠ&A medji u l-profitt tat-tranżazzjonijiet li saru matul in-negozju ordinarju fis-suq domestiku għal dawk it-tipi. Għat-tipi ta' prodotti mhux mibjugħa fis-suq domestiku, jew li ma nstabx bejgħ għalihom matul in-negozju ordinarju, żdiedu l-ispejjeż SĠ&A medji peżati u l-profitt tat-tranżazzjonijiet kollha li saru matul in-negozju ordinarju fis-suq domestiku.

(79)

Il-produtturi esportaturi investigati biegħu l-prodott ikkonċernat għall-esportazzjoni jew direttament lill-klijenti indipendenti fl-Unjoni inkella permezz ta' distributuri indipendenti fit-Tajwan. Għaldaqstant, il-prezz tal-esportazzjoni ġie stabbilit fuq il-bażi tal-prezzijiet attwali mħallsa jew li kellhom jitħallsu, skont l-Artikolu 2(8) tar-Regolament bażiku.

(80)

Il-Kummissjoni qabblet il-valur normali u l-prezz tal-esportazzjoni tal-produtturi esportaturi investigati fuq il-bażi ex-works.

(81)

Fejn dan kien iġġustifikat mill-ħtieġa li jiġi żgurat paragun ġust, il-Kummissjoni aġġustat il-valur normali u/jew il-prezz tal-esportazzjoni għad-differenzi li jaffettwaw il-prezzijiet u l-paragunabilità tal-prezzijiet skont l-Artikolu 2(10) tar-Regolament bażiku. Saru aġġustamenti għat-trasport, l-assigurazzjoni, l-immaniġġjar, it-tagħbija u l-ispejjeż anċillari, l-ippakkjar, il-kreditu, it-tariffi tal-bank u l-kummissjonijiet.

(82)

Il-produtturi esportaturi fil-kampjun naqsu milli jużaw ir-rati tal-kambju pprovduti lilhom fil-kwestjonarji tal-antidumping mibgħuta qabel iż-żjarat ta' verifika. Għalhekk, il-Kummissjoni reġgħet ikkalkolat il-valuri tat-tranżazzjoni bir-rati mogħtija fil-kwestjonarji.

(83)

Għall-produtturi esportaturi investigati, inklużi żewġ kumpaniji relatati fil-kampjun u kumpanija waħda li saritilha analiżi individwali, il-Kummissjoni qabblet il-valur normali medju peżat ta' kull tip ta' prodott simili mal-prezz medju peżat tal-esportazzjoni tat-tip ta' prodott li jikkorrispondi għal dak ikkonċernat, skont l-Artikolu 2(11) u (12) tar-Regolament bażiku.

(84)

Fuq il-bażi ta' dan, il-marġnijiet tad-dumping medju peżat provviżorju, espressi bħala perċentwal tal-prezz CIF fil-fruntiera tal-Unjoni, bid-dazju mhux imħallas, huma kif ġej:

Tabella 3

Marġini tad-dumping, it-Tajwan

(85)

Għall-produtturi esportaturi li kkooperaw u li ma kinux inklużi fil-kampjun, il-Kummissjoni kkalkolat il-marġini tad-dumping medju peżat, skont l-Artikolu 9(6) tar-Regolament bażiku. Għaldaqstant, dak il-marġini kien stabbilit fuq il-bażi tal-marġnijiet tal-produtturi esportaturi fil-kampjun.

(86)

Fuq il-bażi ta' dan, il-marġini tad-dumping provviżorju tal-produtturi esportaturi li kkooperaw u li ma kinux inklużi fil-kampjun kien ta' 10,9 %.

(87)

Għall-kumpaniji kollha l-oħrajn fil-pajjiż ikkonċernat, il-Kummissjoni stabbilixxiet il-marġini tad-dumping fuq il-bażi tal-fatti disponibbli, skont l-Artikolu 18 tar-Regolament bażiku. Għall-fini ta' dan, il-Kummissjoni ddeterminat il-livell ta' kooperazzjoni. Il-livell ta' kooperazzjoni huwa l-volum tal-esportazzjonijiet lejn l-Unjoni tal-kumpaniji li kkooperaw mogħti bħala proporzjon tal-volum totali tal-esportazzjonijiet — kif irrapportat fl-istatistika dwar l-importazzjoni tal-Eurostat — mill-pajjiż ikkonċernat lejn l-Unjoni.

(88)

Il-livell ta' kooperazzjoni f'dan il-każ kien ikkunsidrat għoli u fuq din il-bażi, il-Kummissjoni ddeċidiet li tibbaża l-marġini residwu tad-dumping fil-livell tal-kumpanija fil-kampjun bl-ogħla marġini tad-dumping.

(89)

Il-marġnijiet provviżorji tad-dumping mogħtija bħala perċentwal tal-prezz CIF fil-fruntiera tal-Unjoni, bid-dazju mhux imħallas, huma kif ġej:

Tabella 4

Marġini tad-dumping, it-Tajwan

(90)

Il-prodott simili kien immanifatturat minn disa' produtturi magħrufa fl-Unjoni matul il-perjodu ta' investigazzjoni. Dawn jikkostitwixxu l-“industrija tal-Unjoni” skont it-tifsira tal-Artikolu 4(1) tar-Regolament bażiku.

(91)

Il-produzzjoni totali tal-Unjoni matul il-perjodu tal-investigazzjoni kienet stabbilita għal aktar minn 3 miljun tunnellata. Il-Kummissjoni stabbilixxiet il-figura fuq il-bażi tal-informazzjoni kollha disponibbli li tirrigwarda l-industrija tal-Unjoni, bħal informazzjoni miġbura mill-produtturi fil-kampjun u d-dejta mill-ilment għall-prodotturi l-oħra tal-Unjoni. L-ikbar produttur tal-Unjoni la kkoopera u lanqas ma kkontesta l-ilment. Sitt produtturi tal-Unjoni li jagħmlu madwar 55 % tal-bejgħ u l-produzzjoni fl-Unjoni kkooperaw fl-investigazzjoni. Kif indikat fil-premessa (8) iktar 'il fuq, intgħażlu erba' produtturi tal-Unjoni fil-kampjun li bejniethom jirrappreżentaw madwar 50 % tal-produzzjoni totali tal-Unjoni tal-prodott simili.

(92)

Il-partijiet interessati argumentaw li produttur wieħed tal-Unjoni fil-kampjun għandu jkun eskluż mid-definizzjoni tal-Industrija tal-Unjoni, għax importa kwantitajiet sinifikanti tal-prodott konċernat. Madankollu, l-importazzjonijiet tal-prodottur tal-Unjoni mill-pajjiżi kkonċernati ammontaw għal inqas minn 5 % tal-importazzjonijiet totali tal-prodott konċernat, u inqas minn 2 % tal-volum tal-bejgħ tagħhom fl-Unjoni. Fuq din il-bażi, f'dan l-istadju dan il-produttur tal-Unjoni nżamm bħala parti mill-Industrija tal-Unjoni.

(93)

Il-partijiet interessati argumentaw li n-nuqqas ta' inklużjoni tal-akbar produttur tal-Unjoni fil-kampjun jagħmel il-kampjun wieħed mhux rappreżentattiv. Kif indikat diġà, l-erba' produtturi tal-Unjoni fil-kampjun jirrappreżentaw madwar 50 % tal-produzzjoni totali tal-Unjoni tal-prodott simili. Għalhekk il-Kummissjoni kkonkludiet li l-kampjun kien rappreżentattiv. L-akbar produttur xorta waħda ma daħalx f'kuntatt.

(94)

Il-Kummissjoni stabbilixxiet il-konsum tal-Unjoni fuq il-bażi tal-volumi ta' bejgħ tal-produzzjoni tal-industrija tal-Unjoni miġbura mill-produtturi fil-kampjun, id-dejta mill-ilment għall-prodotturi oħra tal-Unjoni u mid-dejta fuq il-volumi ta' importazzjoni fis-suq tal-Unjoni miġbura mill-istatistika tal-Eurostat.

(95)

Il-konsum tal-Unjoni żviluppa kif ġej:

Tabella 5

Il-konsum tal-Unjoni

(96)

Il-konsum tal-Unjoni baqa' jikber b'4 % matul il-perjodu kkunsidrat.

(97)

Il-Kummissjoni stħarrġet jekk l-importazzjonijiet tal-prodott ikkonċernat li oriġina mill-pajjiżi kkonċernati għandhomx ikunu vvalutati b'mod kumulattiv, skont l-Artikolu 3(4) tar-Regolament bażiku.

(98)

Il-marġini tad-dumping stabbilit b'rabta mal-importazzjonijiet mir-RPĊ u mit-Tajwan kien ogħla mil-limiti de minimis stabbiliti fl-Artikolu 9(3) tar-Regolament bażiku. Il-volum tal-importazzjonijiet minn kull pajjiż konċernat ma kienx negliġibbli skont it-tifsira tal-Artikolu 5(7) tar-Regolament bażiku. L-ishma tas-suq fil-perjodu tal-investigazzjoni kienu ta' 5,1 % għat-Tajwan u 4,3 % għar-RPĊ.

(99)

Il-kundizzjonijiet tal-kompetizzjoni ta' bejn l-importazzjonijiet oġġett ta' dumping mir-RPĊ u mit-Tajwan u l-prodott simili kienu simili. B'mod aktar speċifiku, il-prodotti importati kkompetew ma' xulxin u mal-prodott simili prodott fl-Unjoni għaliex il-prodotti kollha jikkonformaw mal-istess standards globali u għalhekk huma interkambjabbli. Barra minn hekk, jinbiegħu bl-istess mezzi ta' bejgħ u lil kategoriji simili ta' klijenti.

(100)

L-Assoċjazzjoni tal-Industriji tal-Azzar u l-Ħadid tat-Tajwan ('TSIIA') argumentat li l-Kummissjoni m'għandhiex tivvaluta b'mod kumulattiv l-effetti tal-importazzjonijiet oġġett ta' dumping mir-RPĊ u t-Tajwan. Iddikjarat li għalkemm il-prodott SSCR jista' jitqies li huwa simili skont ir-Regolament bażiku, il-bejgħ mit-Tajwan fis-suq tal-Unjoni m'għandux l-istess kundizzjonijiet ta' kompetizzjoni bħall-prodotti importati miċ-Ċina. Dawn huma differenti l-aktar fir-rigward tal-gradi u l-kwalità. Il-prodotti Tajwaniżi huma ta' kwalità ogħla.

(101)

Id-dikjarazzjoni dwar il-gradi differenti tirreferi biss għall-prodotti ta' speċjalità li jammontaw għal inqas minn 1 % tal-importazzjonijiet. Barra minn hekk, il-prodotti kollha (UE, Ċiniżi u Tajwaniżi) huma konformi mal-istess standards dinjija u ma tressqu l-ebda dikjarazzjonijiet li jikkwantifikaw differenzi fil-propjetajiet fiżiċi ta' bejn il-prodott simili prodott fl-Unjoni u l-importazzjonijiet, u għalhekk l-argument ma kienx sostnut. B'konsegwenza, it-talba ġiet miċħuda.

(102)

Għalhekk, il-kriterji kollha stabbiliti fl-Artikolu 3(4) tar-Regolament bażiku ġew issodisfati u l-importazzjonijiet mir-RPĊ u t-Tajwan kienu eżaminati b'mod kumulattiv għall-iskopijiet tad-determinazzjoni tad-dannu.

(103)

Il-Kummissjoni stabbilixxiet il-volum tal-importazzjonijiet fuq il-bażi tal-volum tal-importazzjonijiet miksuba mill-istatistika tal-Eurostat. Is-sehem mis-suq tal-importazzjonijiet kien stabbilit fuq l-istess bażi.

(104)

L-importazzjonijiet lejn l-Unjoni mill-pajjiżi kkonċernati żviluppaw kif ġej:

Tabella 6

Il-volum tal-importazzjoni (tunnellati) u s-sehem tas-suq

(105)

L-importazzjonijiet kumulattivi mill-pajjiżi kkonċernati żdiedu b'70 % minn 184 140 tunnellata għal 312 517-il tunnellata bejn l-2010 u l-perjodu tal-investigazzjoni. L-importazzjonijiet żdiedu b'mod stabbli matul il-perjodu kkunsidrat b'eċċezzjoni tal-2012 meta l-volumi tal-importazzjonijiet kienu ogħla minn dawk tal-2010 imma inqas mil-livell tal-2011.

(106)

Is-sehem kumulattiv mis-suq żdied bi 63 % minn 5,8 % għal 9,5 % matul il-perjodu kkunsidrat. B'mod simili għall-volum tal-importazzjonijiet, is-sehem mis-suq żdied b'mod stabbli matul il-perjodu kkunsidrat, bl-eċċezzjoni tal-2012.

(107)

Il-Kummissjoni stabbiliet il-prezzijiet tal-importazzjonijiet fuq il-bażi tal-valur u l-volum tal-importazzjonijiet miksuba mill-istatistika tal-Eurostat. It-twaqqigħ fil-prezz tal-importazzjonijiet kien stabbilit fuq il-bażi tat-tweġibiet għall-kwestjonarju mibgħuta mill-produtturi tal-Unjoni fil-kampjun, mill-produtturi esportaturi fil-kampjun u mill-produttur esportatur li saritlu analiżi individwali kif indikat fil-premessa (17) iktar 'il fuq.

(108)

Il-prezz medju peżat tal-importazzjonijiet lejn l-Unjoni mill-pajjiżi kkonċernati żviluppa hekk:

Tabella 7

Prezzijiet tal-Importazzjoni

(109)

Il-prezzijiet tal-importazzjoni tar-RPĊ u t-Tajwan għall-ewwel żdiedu b'6 punti perċentwali bejn l-2010 u l-2011. Maż-żmien, naqqsu 19-il punt perċentwali għal tnaqqis totali ta' 13 %. Il-prezzijiet tal-importazzjonijiet mir-RPĊ u t-Tajwan segwew xejra simili, b'eċċezzjoni tal-2012 li xorta wriet prezzijiet paragunabbli ogħla għar-RPĊ, imma diġà kien hemm prezzijiet paragunabbli baxxi għat-Tajwan. Għaż-żewġ pajjiżi, il-prezzijiet komplew jonqsu bejn l-2012 u l-perjodu tal-investigazzjoni.

(110)

Il-Kummissjoni ddeterminat it-twaqqigħ tal-prezz matul il-perjodu tal-investigazzjoni billi qabblet:

(111)

It-tqabbil tal-prezz sar fuq bażi ta' “tip b'tip” għat-tranżazzjonijiet aġġustati kif xieraq fejn kien hemm bżonn, u wara t-tnaqqis ta' skontijiet, kummissjonijiet u spejjeż tal-kunsinna. Ir-riżultat tat-tqabbil ingħata bħala perċentwal tal-fatturat tal-produtturi tal-Unjoni fil-kampjun matul il-perjodu tal-investigazzjoni. Dan wera marġini tat-twaqqigħ medju peżat ta' bejn id-9,6 % u l-11,3 % għall-importazzjonijiet mill-pajjiżi kkonċernati fis-suq tal-Unjoni.

(112)

L-investigazzjoni wriet li l-produtturi esportaturi kważi jbigħu b'mod esklużiv lil distributuri indipendenti jew lil ċentri tas-servizzi tal-azzar, filwaqt li l-industrija tal-Unjoni biegħet lil distributuri, ċentri tas-servizzi tal-azzar u lil utenti finali. L-investigazzjoni madankollu ma wrietx li din id-differenza ta' livell ta' negozju kellha impatt fuq il-prezzijiet. Bil-maqlub ta' dan, id-distributuri indipendenti u ċ-ċentri tas-servizzi tal-azzar iddikjaraw li ma jiksbux termini ta' bejgħ aktar favorevoli mill-produtturi tal-Unjoni meta mqabbla mal-utenti.

(113)

Skont l-Artikolu 3(5) tar-Regolament bażiku, l-eżaminazzjoni tal-impatt tal-importazzjonijiet oġġett ta' dumping fl-industrija tal-Unjoni kienet tinkludi evalwazzjoni tal-indikaturi ekonomiċi kollha li influwenzaw l-istat tal-industrija tal-Unjoni matul il-perjodu kkunsidrat.

(114)

Kif imsemmi fil-premessa (8) hawn fuq, il-kampjun intuża għad-determinazzjoni tad-dannu possibbli mġarrab mill-industrija tal-Unjoni. Erba' produtturi kienu inklużi fil-kampjun.

(115)

Għad-determinazzjoni tad-dannu, il-Kummissjoni għamlet distinzjoni bejn l-indikaturi ta' ħsarat makroekonomiċi u mikroekonomiċi. Il-Kummissjoni evalwat l-indikaturi makroekonomiċi fuq il-bażi tad-dejta miġbura mill-produtturi fil-kampjun u mid-dejta tal-ilment tal-produtturi l-oħra tal-Unjoni. Id-dejta kienet tirrigwarda lill-produtturi kollha tal-Unjoni. Il-Kummissjoni evalwat l-indikaturi makroekonomiċi fuq il-bażi tad-dejta fit-tweġibiet għall-kwestjonarju mill-produtturi tal-Unjoni fil-kampjun. Id-dejta kienet relatata mal-produtturi tal-Unjoni fil-kampjun. Iż-żewġ settijiet ta' dejta nstabu li jirrappreżentaw is-sitwazzjoni ekonomika tal-industrija tal-Unjoni.

(116)

L-indikaturi makroekonomiċi huma: il-produzzjoni, il-kapaċità tal-produzzjoni, l-użu tal-kapaċità, il-volum tal-bejgħ, is-sehem tas-suq, it-tkabbir, l-impjiegi, il-produttività u d-daqs tal-marġini tad-dumping.

(117)

L-indikaturi mikroekonomiċi huma: il-prezzijiet medji ta' unità, il-kost unitarju, il-kost lavorattiv, l-inventarji, il-profittabilità, il-fluss tal-flus, l-investimenti, ir-redditu fuq l-investimenti, u l-abbiltà li jiżdied il-kapital.

(118)

Il-partijiet interessati argumentaw li d-dejta tal-produtturi tal-Unjoni fil-kampjun għandha tintuża b'mod konsistenti għall-valutazzjoni tad-dannu minflok ma jsir qsim tal-indikaturi f'indikaturi makroekonomiċi u indikaturi mikroekonomiċi. Argumentaw li l-analiżi separata ta' indikaturi makroekonomiċi u indikaturi mikroekonomiċi kienet soġġetta għal manipulazzjoni mill-ilmentatur, peress li dan jista' jimmanuvra l-ġbir tad-dejta fil-livell makroekonomiku, peress li d-deċiżjoni dwar jekk indikatur speċifiku kienx makroekonomiku jew mikroekonomiku kienet ibbażata fuq id-disponibbiltà tal-informazzjoni.

(119)

Il-Kummissjoni stabbiliet u analizzat l-indikaturi makroekonomiċi kif instabu fil-livell tal-Unjoni u mhux biss fil-livell tal-produtturi tal-Unjoni fil-kampjun. Huwa tassew ikkunsidrat li sa fejn huma kkonċernati l-indikaturi makroekonomiċi, dejta kompleta tal-industrija sħiħa tal-Unjoni, li tinkludi wkoll id-dejta mill-kumpaniji fil-kampjun, tirrifletti aħjar is-sitwazzjoni matul il-perjodu kkunsidrat, minn dejta ta' parti biss tal-industrija.

(120)

Id-dejta ppreżentata mill-ilmentatur għall-evalwazzjoni ta' indikaturi makroekonomiċi kienet ikkunsidrata bħala preċiża u affidabbli. Il-validità tad-dejta ġiet iċċekkjata mal-informazzjoni sottomessa mill-produtturi tal-Unjoni inklużi fil-kampjun. Għas-saħħa tal-argument, l-analiżi tad-dannu b'mod konsistenti li tuża biss id-dejta pprovduta mill-produtturi tal-Unjoni inklużi fil-kampjun, turi stampa aktar negattiva ta' indikaturi makroekonomiċi. Ma kien hemm l-ebda raġunijiet biex jiġi stabbilit li l-ilmentatur deliberatament żamm informazzjoni biex jimmanipula l-analiżi tad-dannu. Għalhekk, ma hemmx raġuni għaliex għandha titwarrab l-informazzjoni pprovduta mill-ilmentatur fir-rigward tal-indikaturi makroekonomiċi. Għaldaqstant, l-argument li l-analiżi tal-indikaturi tad-danni kollha għandha tkun limitata għall-informazzjoni mogħtija mill-produtturi tal-Unjoni fil-kampjun biss, ma tistax tintlaqa'.

(121)

Il-produzzjoni totali tal-Unjoni, il-kapaċità tal-produzzjoni (laminazzjoni bil-lesħa) u l-użu tal-kapaċità żviluppaw matul il-perjodu kkunsidrat kif ġej:

Tabella 8

Il-produzzjoni, il-kapaċità produttiva u l-użu tal-kapaċità

(122)

Il-volum ta' produzzjoni baqa' stabbli bejn l-2010 u l-2012. Bejn l-2012 u l-perjodu ta' investigazzjoni, il-volum tal-produzzjoni naqas b'mod sinifikanti b'6 punti perċentwali għal tnaqqis globali ta' 5 % minkejja d-domanda stabbli.

(123)

Fl-istess ħin, il-kapaċità tal-produzzjoni żdiedet b'mod moderat b'4 % fil-perjodu kkunsidrat. Iż-żieda żgħira fil-kapaċità tal-produzzjoni tista' tiġi attribwita għal użu aħjar tal-makkinarju minħabba l-programmi ta' effiċjenza mwettqa mill-industrija tal-Unjoni.

(124)

B'riżultat ta' dan, l-użu tal-kapaċità naqas bi 8 % matul il-perjodu kkunsidrat. Huwa magħruf li 100 % tal-kapaċità ta' utilizzazzjoni ma tistax tinkiseb u mhijiex sostenibbli fit-tul fl-industrija SSCR. Madankollu, l-użu tal-kapaċità miksub mill-industrija tal-Unjoni matul il-perjodu kkunsidrat huwa ferm taħt il-kapaċità ta' utilizzazzjoni f'eċċess ta' 90 % li huwa meqjus li jista' jinkiseb b'mod sostenibbli fuq medda twila ta' żmien fil-livell tal-produzzjoni. Barra minn hekk, peress li d-differenza bejn il-kapaċità ta' produzzjoni u l-livell ta' produzzjoni sostenibbli fuq medda twila ta' żmien huwa minuri, dan ma jistax ikollu impatt fuq ix-xejra ta' tnaqqis murija mill-industrija tal-Unjoni.

(125)

Il-volum tal-bejgħ u s-sehem mis-suq tal-industrija tal-Unjoni żviluppaw matul il-perjodu kkunsidrat kif ġej:

Tabella 9

Volum tal-bejgħ u sehem mis-suq

(126)

Il-volum tal-bejgħ tal-industrija tal-Unjoni kien stabbli matul il-perjodu kkunsidrat, b'volumi tal-bejgħ ftit ogħla fl-2012.

(127)

Peress li l-konsum tal-Unjoni kiber matul il-perjodu kkunsidrat kif indikat fil-premessa (96) iktar 'il fuq, il-volumi ġeneralment stabbli ta' bejgħ wasslu għal tnaqqis ta' 5 % fis-sehem mis-suq tal-industrija tal-Unjoni matul il-perjodu kkunsidrat. Simili għall-volum tal-bejgħ, is-sena 2012 kellha bixra aktar pożittiva.

(128)

Kif deskritt hawn fuq, matul il-perjodu kkunsidrat il-volum tal-bejgħ tal-industrija tal-Unjoni kien ġeneralment stabbli f'suq li kien qed jikber. Fl-istess ħin, l-importazzjonijiet mill-pajjiżi kkonċernati żdiedu b'mod sinifikanti. B'riżultat ta' dan, it-tkabbir tas-suq ta' madwar 140 000 tunnellata matul il-perjodu kkunsidrat kważi b'mod esklużiv wassal biex l-importazzjonijiet mill-pajjiżi konċernati jibbenefikaw, xi ħaġa li żiedet il-volumi tagħhom b'madwar 128 000 tunnellata matul l-istess perjodu. Għalhekk, l-industrija tal-Unjoni ma setgħet bl-ebda mod tibbenefika mit-tkabbir tas-suq.

(129)

L-impjiegi u l-produttività żviluppaw kif ġej tul il-perjodu kkunsidrat:

Tabella 10

L-impjiegi u l-produttività

(130)

In-numru ta' impjegati tal-industrija tal-Unjoni naqas b'żewġ punti perċentwali fl-2011, u b'erba' punti perċentwali oħra fl-2012 u saħansitra b'ħames punti perċentwali oħra fil-perjodu tal-investigazzjoni, u dan wera tendenza ċara ta' tnaqqis. Ir-razzjonalizzazzjoni tal-għadd ta' impjegati tista' tkun attribwita għall-implimentazzjoni ta' pjani diversi ta' “effikaċja” mill-produtturi tal-Unjoni u t-tnaqqis fil-volum ta' produzzjoni.

(131)

L-industrija SSCR hija ġeneralment meqjusa bħala industrija li tuża kapital kbir. Madankollu, l-ammont ta' impjiegi provduti mill-industrija tal-Unjoni huwa sinifikanti. Barra minn hekk, l-ispejjeż tax-xogħol huma t-tieni l-iktar fattur ta' spiża importanti wara l-materja prima, li bħala medja tammonta għal madwar 10 % — 15 % tal-ispejjeż totali. L-impjiegi għalhekk huma indikatur rilevanti ta' dannu għal din l-industrija.

(132)

Il-produttività tal-industrija tal-Unjoni naqset ftit fl-2011 bi tliet punti perċentwali, imbagħad fl-2012 żdiedet b'10 punti perċentwali u reġgħet naqset b'punt perċentwal fil-perjodu tal-investigazzjoni. B'mod ġenerali, din għoliet b'sitt punti perċentwali minn 242 tunnellata għal 257 tunnellata għal kull impjegat fil-perjodu kkonċernat, minkejja t-tnaqqis fin-numru ta' impjegati, li wassal għal effikaċja ikbar.

(133)

Il-marġnijiet kollha tad-dumping kienu ogħla b'mod sinifikanti mil-livell de minimis. L-impatt tad-daqs tal-marġnijiet attwali tad-dumping fuq l-industrija tal-Unjoni kien sostanzjali, meta tqis il-volum u l-prezzijiet tal-importazzjonijiet mill-pajjiżi kkonċernati.

(134)

Din hi t-tieni investigazzjoni antidumping dwar il-prodott ikkonċernat. L-importazzjonijiet tal-istess prodott li oriġina fir-RPĊ, il-Korea t'Isfel u t-Tajwan, diġà kienu soġġetti għal investigazzjoni fl-2008-2009 (6). Minkejja li din l-investigazzjoni ma wasslitx għall-impożizzjoni ta' miżuri antidumping, l-investigazzjoni stabbilixxiet b'mod provviżorju l-eżistenza tad-dumping li diġà kien hemm dak iż-żmien (7).

(135)

Il-prezzijiet medji peżati tal-bejgħ ta' unità tal-produtturi tal-Unjoni fil-kampjun lill-klijenti mhux relatati fl-Unjoni żviluppaw kif ġej matul il-perjodu kkunsidrat:

Tabella 11

Prezzijiet tal-bejgħ fl-Unjoni

(136)

Il-prezzijiet tal-bejgħ tal-produtturi tal-Unjoni fil-kampjun lil klijenti mhux relatati naqsu bi 11 % matul il-perjodu kkunsidrat. Filwaqt li fl-2011 il-prezzijiet żdiedu b'6 %, sa tmiem il-perjodu kkunsidrat dawn niżlu bi 17-il punt perċentwali.

(137)

Il-kost unitarju tal-produzzjoni totali ta' SSCR (inklużi oġġetti eventwalment esportati) fil-biċċa l-kbira segwa x-xejra tal-prezzijiet tal-bejgħ u naqas b'14 % matul il-perjodu kkunsidrat. Madankollu, minħabba li l-prezzijiet tal-bejgħ u l-kost unitarju tal-produzzjoni mhumiex direttament komparabbli minħabba li hemm ċertu differenza fiż-żmien bejn il-produzzjoni u l-bejgħ. Hekk kif il-livell medju ta' inventarji tal-industrija tal-Unjoni ammonta għal madwar 15 % tal-valur tal-bejgħ, fil-medja hemm distakk ta' żmien ta' kważi xahrejn bejn il-produzzjoni u l-bejgħ.

(138)

Ġeneralment, kemm il-kostijiet tal-produzzjoni kif ukoll il-prezzijiet tal-bejgħ huma bbażati fuq l-iżvilupp tal-ispejjeż tal-materja prima, l-aktar il-kromu u n-nikil. Il-prezzijiet miżmuma mill-industrija tal-Unjoni qed isegwu l-hekk imsejjaħ mekkaniżmu ta' “ħlas addizzjonali fuq il-liga”. F'dan il-mekkaniżmu, il-prezzijiet jikkonsistu fi “prezz bażiku” fiss u “ħlas addizzjonali fuq il-liga” li jogħla u jinżel skont il-kompożizzjoni kimika tal-grad tal-azzar u l-istimi tal-ligi tal-London Metal Exchange ('LME). Għalhekk, il-prezzijiet huma marbuta mal-grad tal-azzar u l-ispejjeż korrispondenti tal-materja prima.

(139)

Il-partijiet interessati ssuġġerixxew li x-xejra tal-prezz tal-bejgħ tal-industrija tal-Unjoni għandha tiġi analizzata mingħajr il-“ħlas addizzjonali fuq il-liga”. Peress li l-industrija tal-Unjoni ma tinfluwenzax il-prezz tan-nikil, il-partijiet interessati ddikjaraw li l-Kummissjoni għandha tara biss il-“prezz bażiku”.

(140)

Il-prezz totali jikkonsisti sewwasew fil-prezz bażiku u l-ħlas addizzjonali fuq il-liga u l-klijenti normalment ikunu konxji ta' dan il-qsim. Madankollu, l-investigazzjoni wriet li matul il-perjodu ta' investigazzjoni, dawn iż-żewġ elementi tal-prezz ma kinux normalment mistqarra separatament fuq il-fattura. F'każijiet bħal dawn, id-dokumenti kummerċjali li kienu jeżistu qabel il-fattura bħall-ordni jew l-konferma tal-ordni konferma normalment ma tindikax dawn iż-żewġ elementi b'mod separat.

(141)

Għalhekk, l-iżvilupp tal-prezz bażiku ġie analizzat abbażi tal-informazzjoni disponibbli pubblikament sottomessa mill-partijiet interessati. Din l-informazzjoni turi t-tqassim dettaljat tal-prezz totali mitlub għall-prodotti ta' grad ta' komodità 304 (8) fil-Ġermanja (9) fil-prezz bażiku u tal-ħlas addizzjonali fuq il-liga. Filwaqt li l-ħlas addizzjonali fuq il-liga jvarja skont l-iżvilupp fl-ispejjeż tal-materja prima, il-prezz bażiku naqas matul il-perjodu meqjus b'madwar 20 % minn madwar EUR 1 200/tunnellata metrika fl-2010 għal madwar EUR 1 000/tunnellata fil-perjodu tal-investigazzjoni. Filwaqt li l-livell tat-tnaqqis tista' ma jkunx neċessarjament rappreżentattiv għall-prodotti kollha u l-produtturi kollha tal-Unjoni, il-kobor tat-tnaqqis jappoġġa l-konklużjoni li mhux biss il-livell ta' ħlas addizzjonali fuq il-liga, iżda wkoll il-livell tal-prezz bażiku segwew xejra ta' tnaqqis.

(142)

Il-kostijiet lavorattivi medji tal-produtturi tal-Unjoni fil-kampjun żviluppaw kif ġej matul il-perjodu kkunsidrat:

Tabella 12

Spejjeż medji tax-xogħol għal kull impjegat

(143)

Il-kostijiet lavorattivi medji għal kull impjegat kienu qed jiżdiedu matul il-perjodu kkunsidrat u żdiedu b'mod ġenerali bi 8 % bejn l-2010 u l-perjodu tal-investigazzjoni.

(144)

Il-livelli tal-ħażna tal-produtturi tal-Unjoni fil-kampjun żviluppaw kif ġej matul il-perjodu kkunsidrat:

Tabella 13

Inventarji

(145)

Il-volum tal-ħażniet baqa' pjuttost stabbli bejn l-2010 u l-2011, imbagħad naqas bi 13-il punt perċentwali fl-2012 u tela' ftit b'7 punti perċentwali fil-perjodu tal-investigazzjoni. B'mod ġenerali, dan naqas b'7 % matul il-perjodu kkunsidrat. Peress li ħafna mill-produzzjoni ssir fuq ordni, il-ħażniet mhumiex indikatur siewi f'din l-industrija.

(146)

Il-profittabbiltà, il-fluss tal-flus, l-investimenti u r-redditu fuq l-investimenti tal-produtturi tal-Unjoni fil-kampjun żviluppaw kif ġej matul il-perjodu kkunsidrat:

Tabella 14

Profittabbiltà, fluss tal-flus, investimenti u redittu fuq l-investimenti

(147)

Il-Kummissjoni stabbilixxiet il-profittabbiltà tal-produtturi tal-Unjoni fil-kampjun billi l-profitt nett qabel it-taxxa tal-bejgħ tal-prodott simili lil klijenti mhux relatati fl-Unjoni ngħata bħala perċentwal tal-fatturat ta' dak il-bejgħ. Il-profitabbiltà tal-produtturi fil-kampjun kienet negattiva matul il-perjodu sħiħ ikkunsidrat — naqset b'1,5 punti perċentwali bejn l-2010 u l-2012 u rkuprat ftit fil-perjodu tal-investigazzjoni b'0,5 punti perċentwali biex laħqet – 1,6 %. Kif spjegat fil-premessa (141) hawn fuq, il-profittabilità negattiva kienet prinċipalment minħabba tnaqqis kontinwu fil-prezz bażiku u mhux minħabba instabbiltà tal-prezzijiet għall-materja prima bħal nikil.

(148)

Il-fluss tal-flus nett huwa l-ħila tal-produtturi tal-Unjoni li jiffinanzjaw l-attivitajiet tagħhom huma stess. Il-fluss tal-flus kien negattiv fi tlieta mill-erba' snin ikkunsidrati — tjieb fl-2011, imma mbagħad reġa' beda nieżel. It-titjib temporanju fl-2011 sar l-aktar minħabba t-tnaqqis sinifikanti tal-ħażniet ta' prodotti nofshom lesti.

(149)

L-investimenti wrew xejra ta' tnaqqis — fl-2011 naqsu b'9 %, fl-2012 naqqsu b'6 % oħra u bi 2 % oħra fil-perjodu tal-investigazzjoni. B'mod ġenerali, dawn naqsu bi 17-il punt perċentwali matul il-perjodu kkunsidrat.

(150)

Ir-redditu fuq l-investimenti huwa l-profitt f'perċentwal tal-valur nett skont il-kotba tal-investimenti. Dan kien negattiv fl-erba' snin ikkunsidrati. Fl-2011 naqas b'146 %, fl-2012 b'124 % ulterjuri u laħaq iċ-ċifra ta' – 3,1 % fil-perjodu tal-investigazzjoni.

(151)

Il-ħila li jiżdied il-kapital tal-erba' produtturi fil-kampjun kien affettwat b'mod negattiv, għax minħabba ċ-ċifri negattivi fil-profitt tagħhom, ma kinux f'pożizzjoni li jiksbu finanzjament mill-banek. Il-produtturi kellhom isibu fondi pprovduti minn gruppi oħra ta' kumpaniji.

(152)

Ħafna mill-indikaturi tad-dannu tal-industrija tal-Unjoni wrew tendenza negattiva matul il-perjodu kkunsidrat. Il-volum tal-produzzjoni naqas b'5 %, u dan wassal għal tnaqqis fl-użu tal-kapaċità ta' 8 %. Il-volumi stabbli tal-bejgħ f'suq li qed jikber wasslu għal tnaqqis fis-sehem tas-suq ta' 5 %. L-impjiegi naqsu b' 11 % filwaqt li l-ispejjeż tax-xogħol żdiedu b'8 %. L-investimenti naqsu b'17 %, filwaqt li r-redditu fuq l-investimenti baqa' negattiv matul il-perjodu kkunsidrat u wera xejra li sejra għall-agħar.

(153)

L-uniċi fatturi ta' dannu li wrew xejra kemxejn pożittiva huma l-kapaċità tal-produzzjoni u l-produttività. Fi kwalunkwe każ, din iż-żieda fil-kapaċità tal-produzzjoni taqbel maż-żieda fil-konsum tul il-perjodu kkunsidrat. Iż-żieda fil-produttività seħħet bis-saħħa tat-tnaqqis fin-numru tal-impjegati.

(154)

Ċerti fatturi ta' dannu kellhom żvilupp temporanju aktar pożittiv fl-2011 jew fl-2012 meta mqabbla mas-snin preċedenti, imbagħad reġgħu naqsu — bħas-sehem mis-suq, il-prezzijiet tal-bejgħ, u l-kost tal-produzzjoni. Il-profittabbiltà kienet negattiva fl-erba' snin kollha, u l-fluss tal-flus kien negattiv fi tlieta mill-erba' snin.

(155)

Fuq il-bażi ta' dak li ntqal aktar 'il fuq, il-Kummissjoni f'dan l-istadju kkonkludiet li l-industrija tal-Unjoni sofriet dannu materjali skont it-tifsira tal-Artikolu 3(5) tar-Regolament bażiku.

(156)

Skont l-Artikolu 3(6) tar-Regolament bażiku, il-Kummissjoni stħarrġet jekk l-importazzjonijiet oġġett ta' dumping mill-pajjiżi kkonċernati kkawżawx dannu materjali lill-industrija tal-Unjoni. Skont l-Artikolu 3(7) tar-Regolament bażiku, il-Kummissjoni eżaminat ukoll jekk fatturi oħrajn magħrufa setgħux fl-istess ħin iddanneġġaw lill-industrija tal-Unjoni. Il-Kummissjoni żgurat li kwalunkwe dannu possibbli kkawżat minn fatturi oħra barra l-importazzjonijiet oġġett ta' dumping mill-pajjiżi kkonċernati ma kienx attribwit għal importazzjonijiet oġġett ta' dumping. Dawn il-fatturi huma: l-importazzjonijiet minn pajjiżi terzi, il-prestazzjoni tal-esportazzjoni tal-industrija tal-Unjoni, in-nefqa tal-enerġija, il-kapaċità żejda, u l-kompetizzjoni fl-Unjoni.

(157)

Il-konsum tal-Unjoni żdied b'4 % matul il-perjodu kkunsidrat, imma fl-istess ħin il-volum tal-importazzjonijiet mill-pajjiżi konċernati żdied b'70 % filwaqt li s-sehem mis-suq tal-industrija tal-Unjoni wera xejra ta' tnaqqis. Ix-xejra li fiha l-importazzjonijiet kisbu sehem mis-suq u x-xejra li fiha l-industrija tal-Unjoni tilfet is-sehem mis-suq instab li kienu jikkorrispondu. Is-sehem miżjud fis-suq tal-importazzjonijiet naqas fl-2012 u reġa' tela' fil-perjodu tal-investigazzjoni, filwaqt li t-tnaqqis fis-suq mill-industrija tal-Unjoni naqas ukoll fl-2012 u reġa' niżel fil-perjodu tal-investigazzjoni. Għalhekk jidher ċar li s-sehem mis-suq mitluf tal-industrija tal-Unjoni kien jikkorrelata maż-żieda tal-importazzjonijiet oġġett ta' dumping.

(158)

Il-prezzijiet tal-importazzjonijiet mill-pajjiżi kkonċernati naqsu bi 13 % matul il-perjodu kkunsidrat. Il-prezzijiet tal-industrija tal-Unjoni naqsu bi 11 % matul l-istess perjodu. Matul il-perjodu tal-investigazzjoni l-importazzjonijiet oġġett ta' dumping mill-pajjiżi kkonċernati waqqgħu l-prezzijiet tal-industrija tal-Unjoni b'9,6 % — 11,3 %, u għalhekk għamlu pressjoni fuq il-prezz fl-industrija tal-Unjoni. L-imġiba tal-prezz taż-żieda fl-importazzjonijiet oġġett ta' dumping mill-pajjiżi kkonċernati ma ppermettietx lill-industrija tal-Unjoni biex iżżomm sehemha fis-suq jew biex tibda tagħmel profitt.

(159)

Il-partijiet interessati ddikjaraw li l-prodotti importati mill-pajjiżi kkonċernati mhumiex qed jikkompetu mal-prodotti mibjugħa mill-industrija tal-Unjoni. Allegatament, l-importazzjonijiet mill-pajjiżi kkonċernati huma fil-biċċa l-kbira tagħhom prodotti rqaq bi ħxuna ta' inqas minn 2 mm, filwaqt li prodotti eħxen minn hekk huma forniti l-aktar mill-industrija tal-Unjoni. Din l-allegazzjoni ma sabitx konferma fil-fatti stabbiliti mill-investigazzjoni. Tabilħaqq, il-produtturi esportaturi u l-industrija tal-Unjoni jbigħu prodotti eħxen minn 2 mm kif ukoll prodotti rqaq b'inqas ħxuna. Barra minn hekk, bħala medja, il-proporzjon ta' prodotti ħoxnin vs. prodotti rqaq huwa simili b'madwar 30 % — 35 % kemm għall-industrija tal-Unjoni kif ukoll għall-produtturi esportaturi mill-pajjiżi kkonċernati.

(160)

Il-partijiet interessati ddikjaraw li ma kienx hemm korelazzjoni bejn il-livell u l-prezzijiet tal-importazzjonijiet mir-RPĊ u l-profitabbiltà tal-industrija tal-Unjoni. B'mod partikolari, irreferew għat-tnaqqis tal-importazzjonijiet u l-prezzijiet stabbli mir-RPĊ fl-2011-2012 li allegatament ma setgħux ikkawżaw it-tnaqqis fil-prezzijiet medji fis-suq tal-Unjoni. Fl-istess ħin, it-telf tal-industrija tal-Unjoni żdied u l-volum tal-bejgħ kien pjuttost stabbli.

(161)

Madankollu, din l-analiżi tiffoka apposta fuq sentejn biss għalihom, minflok fuq il-perjodu sħiħ ikkunsidrat. Meta ġie analizzat il-perjodu sħiħ, deher ċar li ż-żieda b'saħħitha fl-importazzjonijiet oġġett ta' dumping mhux biss wasslet għad-deterjorament tal-profitti imma wasslet ukoll għal telf fis-sehem tas-suq mill-industrija tal-Unjoni u għal tnaqqis fil-produzzjoni, l-użu tal-kapaċità, l-impjiegi, l-investimenti u r-redditu fuq l-investimenti. Filwaqt li s-sena 2012 ma segwietx b'mod strett ix-xejra ġenerali, din baqgħet negattiva. L-għan tal-valutazzjoni tal-indikaturi tad-danni fuq perjodu itwal ta' erba' snin isir l-aktar biex ikun evitat milli jintlaħqu konklużjonijiet fuq il-bażi ta' żviluppi iżolati, jekk ikun hemm. L-effetti tal-importazzjonijiet oġġett ta' dumping miż-żewġ pajjiżi kkonċernati xorta waħda ġew ivvalutati b'mod kumulattiv għar-raġunijiet spjegati fil-premessi minn (97) sa (102) hawn fuq. Għalhekk, ma kienx ġustifikabbli li jiġu vvalutati l-effetti indipendenti tal-importazzjonijiet oġġett ta' dumping mir-RPĊ waħedhom.

(162)

Il-partijiet interessati ddikjaraw li s-sehem mis-suq li l-industrija tal-Unjoni tilfet għall-importazzjonijiet mit-Tajwan kien insinifikanti. Skont l-informazzjoni pprovduta fl-ilment, l-importazzjonijiet mit-Tajwan kienu jammontaw għal sehem mis-suq ta' 4,98 % fil-perjodu tal-investigazzjoni, u żdiedu b'1,09 % bejn l-2010 u l-perjodu ta' investigazzjoni. Il-partijiet interessati ddikjaraw li għalhekk kien impossibbli li l-esportazzjonijiet Tajwaniżi kkawżaw dannu li l-ilmentaturi ddikjaraw li ġarrbu.

(163)

Skont is-sejbiet tal-investigazzjoni, is-sehem mis-suq tal-importazzjonijiet mit-Tajwan żdied b'mod ġenerali matul il-perjodu kkunsidrat u laħaq il-5,1 % matul il-perjodu tal-investigazzjoni. L-investigazzjoni stabbilixxiet biċ-ċar ukoll li dawn l-importazzjonijiet oġġett ta' dumping waqqgħu b'mod sostanzjali l-prezzijiet tal-bejgħ tal-industrija tal-Unjoni. Għalhekk, għall-kuntrarju ta' dak li qalet il-parti interessata, l-importazzjonijiet oġġett ta' dumping mit-Tajwan għamlu pressjoni fuq il-prezz u, flimkien mal-importazzjonijiet oġġett ta' dumping miċ-Ċina, ikkawżaw dannu lill-industrija tal-Unjoni kif diskuss hawn fuq. Jitfakkar li l-effetti tal-importazzjonijiet miż-żewġ pajjiżi kkonċernati kienu vvalutati b'mod kumulattiv għar-raġunijiet spjegati fil-premessi minn (97) sa (102) iktar 'il fuq. Għalhekk, l-effetti tal-importazzjonijiet oġġett ta' dumping mit-Tajwan biss ma kinux ivvalutati b'mod indipendenti.

(164)

Il-partijiet interessati ddikjaraw li l-kwantità tal-importazzjonijiet Tajwaniżi kienet esaġerata għax allegatament kienet tinkludi kwantitajiet sinifikanti ta' SSCR ta' oriġini Ċiniża jew Koreana li kienu ddikjarati bi żball bħala Tajwaniżi. Madankollu, din l-allegazzjoni ma kinitx sostnuta mill-evidenza.

(165)

Madankollu, il-kumpaniji Tajwaniżi li qed jikkooperaw (produtturi u partijiet oħrajn) irraportaw esportazzjonijiet li jirrappreżentaw il-maġġoranza kbira tat-total tal-importazzjonijiet mit-Tajwan. Għalhekk, il-kwistjoni tal-prodotti Tajwaniżi li allegatament kienu ddikjarati bi żball seta' kellha impatt limitat ħafna, jekk kellha.

(166)

Il-partijiet interessati ddikjaraw li l-prezzijiet tal-produtturi esportaturi Ċiniżi u Tajwaniżi, bħal dawk tal-industrija tal-Unjoni, segwew il-prezz tan-nikil. Filwaqt li tabilħaqq jista' jkun il-każ li maż-żmien ix-xejra tal-prezz tal-produtturi esportaturi segwiet ix-xejra tal-prezzijiet tal-materja prima, dan ma jindirizzax il-kwistjoni tal-livell assolut tal-prezz. F'dan ir-rigward, l-investigazzjoni sabet li kemm il-prezzijiet Ċiniżi kif ukoll dawk Tajwaniżi waqqgħu l-prezz tal-industrija tal-Unjoni b'9,6 % — 11,3 %. Jekk dan huwa minnu, l-argument li l-prezzijiet taċ-Ċina, it-Tajwan u tal-industrija tal-Unjoni żviluppaw f'xejra simili matul il-perjodu kkunsidrat iwassal biss għall-konklużjoni li l-esportazzjonijiet Ċiniżi u Tajwaniżi kienu qed iwaqqgħu l-prezzijiet tal-industrija tal-Unjoni b'marġini simili matul il-perjodu sħiħ ikkunsidrat.

(167)

Il-partijiet interessati ddikjaraw li l-allegata żieda fl-investimenti ma turix li l-industrija tal-Unjoni kienet qed iġarrbu minn dannu materjali. Madankollu, din l-allegazzjoni ma sabitx konferma fl-investigazzjoni. Tabilħaqq, l-investimenti naqsu b'mod kostanti bi 17 % matul il-perjodu kkunsidrat, kif indikat fil-premessa (149) iktar 'il fuq.

(168)

F'dan l-istadju ll-Kummissjoni kkonkludiet li ż-żieda fl-importazzjonijiet oġġett ta' dumping bi prezz baxx mill-pajjiżi kkonċerati kkawżat id-dannu tal-materjal li ġarrbet l-industrija tal-Unjoni.

(169)

Il-volum ta' importazzjonijiet minn pajjiżi terzi oħrajn żviluppa matul il-perjodu kkunsidrat kif ġej:

Tabella 15

Importazzjonijiet minn pajjiżi terzi

(170)

Il-pajjiżi terzi bl-ogħla volumi ta' importazzjoni kienu l-Indja, il-Korea t'Isfel, l-Afrika t'Isfel u l-Istati Uniti b'ishma mis-suq li varjaw bejn il-1,6 % u t-2,8 % matul il-perjodu tal-investigazzjoni. Is-sehem mis-suq tal-pajjiżi terzi l-oħra kollha kien ta' 10,8 %.

(171)

L-importazzjonijiet mill-Indja kienu negliġibbli, jiġifieri 1 % jew inqas, matul il-biċċa l-kbira tal-perjodu kkunsidrat. Darba biss qabżu l-limitu ta' 1 % matul il-perjodu tal-investigazzjoni meta kellhom sehem mis-suq ta' 1,9 %.

(172)

Is-sehem mis-suq tal-Korea t'Isfel kien pjuttost stabbli matul il-perjodu kkunsidrat, bi tnaqqis minn 2,3 % għal 1,9 % mill-2010 — 2012 u fl-aħħar b'żieda għal 2,8 % biss matul il-perjodu tal-investigazzjoni.

(173)

L-importazzjonijiet mill-Afrika t'Isfel u mill-Istati Uniti wrew xejra ta' tnaqqis matul il-perjodu kkunsidrat. Is-sehem mis-suq tal-importazzjonijiet mill-Afrika t'Isfel naqas minn 2,1 % għal 1,6 % filwaqt li s-sehem mis-suq tal-importazzjonijiet mill-Istati Uniti naqas minn 3,0 % għal 2,8 %

(174)

Rigward il-prezzijiet bbażati fuq il-Eurostat, jista' jiġi osservat li l-prezz tal-importazzjonijiet mill-Korea t'Isfel biss kien inqas mill-prezz tal-importazzjonijiet mir-RPĊ u t-Tajwan, filwaqt li l-importazzjonijiet mill-Afrika t'Isfel kellhom prezzijiet simili u l-importazzjonijiet mill-Indja u l-Istati Uniti kellhom prezzijiet ogħla. Ta' min jinnota li minkejja dan il-prodott ikkonċernat/il-prodott simili jikkonsisti fi gradi varji ta' azzar u dan iwassal għal differenza sinifikanti fil-prezzijiet li ma setgħetx tkun ikkunsidrata fil-prezz medju maħruġ mill-Eurostat.

(175)

Il-partijiet interessati rreferew għal importazzjonijiet minn pajjiżi terzi, inklużi l-Istati Uniti, il-Korea t'Isfel, l-Indja u l-Afrika t'Isfel. Iddikjaraw li dawk l-importazzjonijiet setgħu influwenzaw is-sitwazzjoni tal-industrija tal-Unjoni u peress li hemm importazzjonijiet sostanzjali minn pajjiżi terzi oħra, li mhumiex soġġetti għall-investigazzjoni tal-Kummissjoni, l-importazzjonijiet mir-RPĊ u t-Tajwan m'għandhomx jinstabu responsabbli għal xi dannu kkawżat minn importazzjonijiet minn pajjiżi oħrajn.

(176)

Kif spjegat hawn fuq, fil-perjodu tal-investigazzjoni, fost pajjiżi oħrajn li huma sorsi tal-importazzjonijiet ta' prodotti SSCR lejn l-Unjoni, it-Tajwan u r-RPĊ għandhom l-ogħla ishma mis-suq (5,1 % u 4,3 % rispettivament). L-ebda importazzjoni minn pajjiż ieħor ma qabżet is-sehem mis-suq ta' 3 % matul il-perjodu kkunsidrat. Barra minn hekk, filwaqt li s-sehem mis-suq mill-pajjiżi kkonċernati żdied bi 3,7 punti perċentwali matul il-perjodu kkunsidrat, f'daqqa, is-sehem mis-suq tal-importazzjonijiet mill-pajjiżi terzi għajr il-pajjiżi kkonċernati baqa' stabbli u żdied b'0,2 punti perċentwali biss matul il-perjodu kkunsidrat.

(177)

Għalhekk, minħabba x-xejra stabbli fil-volumi tal-importazzjonijiet, il-Kummissjoni kkonkludiet b'mod provviżorju li l-importazzjonijiet minn pajjiżi terzi oħra ma kkontribwixxewx b'mod sinifikanti għad-dannu li ġarrbet l-industrija tal-Unjoni.

(178)

Il-volum tal-esportazzjonijiet tal-produtturi tal-Unjoni fil-kampjun żviluppa matul il-perjodu kkunsidrat kif ġej:

Tabella 16

Il-prestazzjoni tal-esportazzjonijiet tal-produtturi tal-Unjoni fil-kampjun

(179)

Il-volumi tal-esportazzjonijiet tal-produtturi tal-Unjoni fil-kampjun qed jonqsu wara żieda ta' darba fl-2011 kemm fil-volumi kif ukoll fil-prezzijiet tal-bejgħ. B'mod ġenerali, il-volumi tal-esportazzjonijiet tal-produtturi fil-kampjun kienu jirrappreżentaw madwar 12 % tal-produzzjoni f'daqqa tagħhom. Għad li t-tnaqqis fl-esportazzjonijiet kien ikkontribwixxa għat-tnaqqis fil-produzzjoni, minħabba l-livell baxx ta' esportazzjonijiet b'rabta mal-bejgħ fl-Unjoni, kwalunkwe kontribut tal-esportazzjonijiet għad-dannu mġarrab mill-industrija tal-Unjoni huwa limitat ħafna.

(180)

Il-partijiet interessati ddikjaraw li d-dannu li ġarrbet l-industrija tal-Unjoni kien għoli minħabba kostijiet għolja tal-enerġija, li jingħad li huma 20 % ogħla minn dawk fir-RPĊ. Madankollu, l-enerġija hi biss fattur minuri għall-produzzjoni ta' prodotti SSCR, u tipikament tammonta għal inqas minn 10 % tal-ispejjeż totali. Jekk inwarrbu l-kwistjoni dwar jekk il-kostijiet tal-enerġija fir-RPĊ jirriflettux il-valuri tas-suq, id-differenza fil-prezz tal-enerġija ma setgħetx tikkawża d-dannu li ġarrbet l-industrija tal-Unjoni.

(181)

Il-partijiet interessati ddikjaraw li għall-kuntrarju tal-informazzjoni pprovduta fl-ilment, l-industrija tal-Unjoni sofriet minħabba kapaċità żejda sinifikanti. Il-Kummissjoni osservat l-użu tal-kapaċità tal-Industrija tal-Unjoni li naqset minn 77 % fl-2010 għal 70 % fil-perjodu kkunsidrat. Madankollu, il-kapaċità tal-produzzjoni tal-industrija tal-Unjoni u l-konsum fis-suq tal-Unjoni żviluppaw b'mod parallel, bit-tnejn li huma jiżdiedu b'4 % matul il-perjodu kkunsidrat. Għalhekk it-telf fl-użu tal-kapaċità hu kkawżat min-nuqqas ta' ħila tal-industrija tal-Unjoni li tisfrutta t-tkabbir tas-suq, għax dan it-tkabbir kien assorbit mill-importazzjonijiet oġġett ta' dumping mill-pajjiżi konċernati. Għaldaqstant, l-allegata kapaċità żejda li rriżultat aktar hija konsegwenza tal-importazzjonijiet oġġett ta' dumping milli kawża tad-dannu li ġarrbet l-industrija tal-Unjoni.

(182)

Il-Kummissjoni kkonkludiet li la l-kost tal-enerġija tal-industrija tal-Unjoni u lanqas l-allegata kapaċità żejda ma setgħu jikkaġunaw id-dannu li ġarrbet.

(183)

Il-partijiet interessati ddikjaraw li l-importazzjonijiet ta' prodotti SSCR mir-RPĊ żdiedu b'rispons għall-konċentrazzjoni tal-kapaċitajiet fl-Unjoni għal numru żgħir ta' fornituri, meta l-utenti fl-Unjoni tħallew b'numru limitat ta' produtturi mill-Unjoni. Madankollu, f'dawn l-aħħar 10 snin minn dejjem kien hemm erba' fornituri medji u għadd ta' fornituri iżgħar fis-suq tal-Unjoni. Filwaqt li s-sjieda ta' xi wħud minn dawn il-kumpaniji ma nbidlitx matul dak il-perjodu, l-għadd ta' fornituri baqa' stabbli. Għalhekk, iż-żieda tal-importazzjonijiet Ċiniżi li huma l-oġġett ta' dumping ma setgħetx ġiet ikkawżata minn tnaqqis fin-numru ta' fornituri fl-Unjoni.

(184)

Il-partijiet interessati ddikjaraw li s-suq tal-Unjoni kellu konċentrazzjoni għolja u li l-importazzjonijiet mill-pajjiżi kkonċernati ma setgħux ikkawżaw xi dannu li ġarrbet l-industrija tal-Unjoni. Iddikjaraw li l-volum tal-importazzjonijiet mill-Asja ma kienx biżżejjed biex jagħmel pressjoni fuq il-kompetizzjoni u ma setax iżomm lill-industrija tal-Unjoni milli żżid il-prezzijiet tagħha. F'dan ir-rigward, l-istess partijiet għamlu referenza għad-deċiżjoni ta' fużjoni tal-Kummissjoni biex tkun approvata l-fużjoni (suġġetta għall-impenji) bejn Outokumpu u Inoxum (10) f'Novembru 2012 (id-“Deċiżjoni ta' Fużjoni ta' Outokumpu”)

(185)

Madankollu, l-analiżi fi proċedura ta' fużjoni u investigazzjoni ta' antidumping jikkonċernaw oqfsa legali differenti li għandhom objettivi differenti. Filwaqt li proċedura ta' fużjoni tanalizza jekk fużjoni proposta tqajjem tħassib dwar il-kompetizzjoni, investigazzjoni antidumping tanalizza jekk l-industrija tal-Unjoni hijiex esposta għal dumping ta' dannu.

(186)

Fi kwalunkwe każ, fil-qafas tad-Deċiżjoni ta' Fużjoni Outokumpu, ġie eżaminat jekk l-akkwist ta' Inoxum minn Outokumpu jwassal għal attur dominanti fis-suq tal-Unjoni. L-entità magħquda ta' Outokumpu u Inoxum kien se jkollha sehem tas-suq kombinat ta' aktar minn 50 % u naqqset in-numru ta' produtturi ewlenin minn erbgħa għal tlieta. Din id-deċiżjoni ta' fużjoni obbligat lil Outokumpu li ċċedi parti ta' Inoxum inkluża l-kumpanija ta' produzzjoni Acciai Speciali Terni (“AST”). L-għan ta' dan l-iżvestiment kien preċiżament li tinżamm il-kompetizzjoni fis-suq SSCR fl-Unjoni u l-entità fuża ppjanata (Outokumpu u l-assi kollha ta' Inoxum inkluża AST) li kellu jkollha sehem mis-suq ta' iktar minn 50 % fis-suq tal-Unjoni qatt ma ssarrfet f'realtà. Minflok, għad hemm erba' atturi ta' daqs medju u numru ta' atturi iżgħar li jikkompetu ma' xulxin mingħajr xi waħda minn dawn il-partijiet li għandhom livell ta' saħħa fis-suq li l-entità fuża proposta analizzat fil-każ ta' Fużjoni kienet miżmuma.

(187)

Il-partijiet interessati rreferew ukoll għad-diskussjoni fid-Deċiżjoni ta' Fużjoni ta' Outokumpu għall-fatt li l-produtturi tal-Unjoni ma kinux ristretti mill-importazzjonijiet Asjatiċi matul dawk il-perjodi ta' żmien li fihom l-importazzjonijiet mill-Asja saru inqas kompetittivi minħabba ċaqliq fil-prezzijiet tan-nikil, ir-rata tal-kambju u l-prezzijiet baxxi tan-nikil ikkwotati fl-LME. Fid-“Deċiżjoni ta' Fużjoni ta' Outokumpu” ingħad li “anke jekk il-limitazzjoni dovuta għall-importazzjonijiet ma kinitx b'saħħitha fil-preżent, huwa possibbli li din tikber fil-ġejjieni” (11), li mbagħad wassal għal valutazzjoni tal-iżviluppi probabbli tas-suq. L-investigazzjoni attwali wriet dan li ġej: l-importazzjonijiet oġġett ta' dumping mill-pajjiżi kkonċernati, fil-perjodu tal-investigazzjoni laħqu sehem mis-suq ta' 9,5 % u żdiedu b'70 % meta mqabbla mal-2010. Kien stabbilit li dawn l-importazzjonijiet oġġett ta' dumping waqqgħu l-prezzijiet tal-industrija tal-Unjoni b'9,6 % — 11,3 %.

(188)

Barra minn hekk, il-fatt li d-domanda fis-suq tal-Unjoni hija relattivament stabbli anke f'każ ta' varjazzjonijiet sinifikanti fil-prezzijiet ma jfissirx li x-xerrejja mhumiex sensittii għall-prezz. Filwaqt li prezzijiet iktar baxxi offruti minn esportaturi ma jwasslux għal żieda fil-konsum fis-suq tal-Unjoni, l-investigazzjoni uriet biċ-ċar li x-xerrejja jkunu lesti li jixtru kwantitajiet akbar ta' importazzjonijiet bi prezz baxx. Peress li dawn l-importazzjonijiet bi prezz baxx ma jiġġenerawx kwalunkwe domanda addizzjonali, dan il-bejgħ hu għas-spejjeż tal-bejgħ ta' atturi oħra fis-suq, prinċipalment għad-detriment tal-industrija tal-Unjoni.

(189)

L-investigazzjoni kkonfermat li l-industrija tal-Unjoni tbiegħ firxa tal-prodott akbar minn produtturi esportaturi li kkooperaw. Madankollu, matul il-perjodu ta' investigazzjoni madwar 75 % tal-bejgħ tal-industrija tal-Unjoni kienet relatata mal-erba' tipi l-aktar komuni ta' gradi tal-azzar (304, 304L, 316L u 430). Dawn il-gradi kollha huma mibjugħa mill-esportaturi mill-pajjiżi kkonċernati f'varjetà kbira ta' ħxuna, wisa' u finituri. Prodotti wkoll lil hinn minn dawn il-gradi ta' komodità huma f'kompetizzjoni diretta billi huma kienu wkoll mibjugħa mill-esportaturi mill-pajjiżi kkonċernati.

(190)

L-ebda waħda mill-partijiet interessati ma qajmet xi kwistjonijiet dwar il-kwalità tal-prodott f'din l-investigazzjoni. Id-Deċiżjoni ta' Fużjoni Outokumpu stabbiliet li filwaqt li bħala medja, il-kwalità prodotta minn produtturi mhux Ewropej tista' titqies bħala komparabbli ma' dik tal-produtturi Ewropej (12), hi identifikat ukoll li l-klijenti b'rekwiżiti speċifiċi ma jistgħux jixtru fl-Asja (13). Madankollu, kif deskritt hawn fuq, il-maġġoranza l-kbira tal-bejgħ tal-industrija tal-Unjoni huma prodotti ta' komodità fejn il-kwalità hija komparabbli.

(191)

Kwistjonijiet oħra li jipprevjenu ċerti klijenti milli jixtru SSCR importat huma żminijiet itwal minħabba t-tul tat-trasport mill-pajjiżi kkonċernati u termini inqas favorevoli ta' ħlas offruti minn produtturi fil-pajjiżi kkonċernati. Madankollu, dawn il-kwistjonijiet huma relevanti l-aktar għal klijenti li jixtru direttament mill-mitħna, li jammonta biss għal madwar terz tas-suq tal-Unjoni.

(192)

Fl-istess ħin, il-maġġoranza ta' bejgħ li sar permezz ta' ċentri ta' servizzi tal-azzar, jirrappreżentaw madwar żewġ terzi mis-suq tal-Unjoni. Kważi l-bejgħ kollu mill-pajjiżi kkonċernati hu magħmul permezz ta' ċentri ta' servizzi indipendenti, li jixtru wkoll mill-industrija tal-Unjoni. F'dan il-każ, it-terminu ta' ħlas offrut mid-distributur hu rilevanti għall-utent. Billi dawn tipikament ikunu magħmula mill-istokk tad-distributur, il-ħin rilevanti huwa wkoll iż-żmien meħtieġ biex il-merkanzija titwassal mingħand id-distributur lill-utent. Għalhekk, il-maġġoranza tal-bejgħ mhux affettwat minn dawn il-kwistjonijiet.

(193)

Għalhekk, il-maġġoranza tal-bejgħ tal-industrija tal-Unjoni hu direttament affettwat mill-importazzjonijiet li huma l-oġġett ta' dumping mill-pajjiżi kkonċernati.

(194)

Għalhekk, il-Kummissjoni kkonkludiet li l-kundizzjonijiet tal-kompetizzjoni fl-Unjoni ma setgħux ipprevenew l-importazzjonijiet oġġett ta' dumping għall-pajjiżi kkonċernati milli jikkawżaw dannu lill-industrija tal-Unjoni.

(195)

Il-partijiet interessati sostnew li d-deċiżjoni jekk jixtru l-prodott ikkonċernat li joriġina fil-pajjiżi kkonċernati jew tal-prodott simili prodott mill-industrija tal-Unjoni hija mmexxija mill-iżvilupp tal-prezzijiet tal-materja prima, b'mod partikolari n-nikil. Dan huwa minħabba li l-esportaturi jitolbu prezz uniku u l-industrija tal-Unjoni titlob prezz bażiku flimkien ma' ħlas addizzjonali fuq il-liga.

(196)

Għalhekk, din allegatament kienet ta' benefiċċju akbar għall-importaturi li jixtru mill-pajjiżi kkonċernati meta jiżdiedu l-prezzijiet tal-materja prima (kif ukoll il-prezzijiet tal-industrija tal-Unjoni se jiġi riveduti 'il fuq filwaqt li l-prezzijiet tal-esportaturi se jibqgħu stabbli). Min-naħa l-oħra, jekk jonqsu l-prezzijiet tal-materja prima, allegatament jkun inqas ta' benefiċċju għal dawk l-importaturi li jixtru mill-pajjiżi kkonċernati (hekk kif il-prezzijiet tal-industrija tal-Unjoni se jonqsu filwaqt li l-prezzijiet tal-esportaturi se jibqgħu stabbli).

(197)

Fid-Deċiżjoni ta' Fużjoni Outokumpu, ġie analizzat l-impatt tal-iżvilupp mistenni fil-prezz tan-nikil fuq id-deċiżjonijiet tax-xiri tal-importaturi (14). F'din l-investigazzjoni, ġie analizzat jekk l-iżvilupp tal-importazzjonijiet effettivament issegwi l-iżvilupp attwali tal-prezzijiet tan-nikil u jsegwi l-formula deskritta hawn fuq. Il-prezzijiet tan-nikil (15) naqsu b'31 %, minn EUR 16 453/tunnellata fl-2010 għal EUR 11 327/tunnellata matul il-perjodu ta' investigazzjoni. Skont it-talba mressqa mill-partijiet interessati deskritta fil-premessa (196) hawn fuq, dan it-tnaqqis fil-prezzijiet tan-nikil kellu jwassal għal tnaqqis fl-importazzjonijiet mill-pajjiżi kkonċernati. Madankollu l-investigazzjoni wriet li minkejja t-tnaqqis sinifikanti fil-prezzijiet tan-nikil, l-esportazzjonijiet mill-pajjiżi kkonċernati żdiedu b'70 % matul l-istess perjodu, kif deskritt fil-premessa (104) hawn fuq.

(198)

Filwaqt li l-iżvilupp tal-prezzijiet tal-materja prima jista' jkun li kellu xi effett fuq l-iżvilupp tal-volumi ta' importazzjoni, fatturi oħrajn bħalma huma l-livell baxx tal-prezzijiet tal-produtturi esportaturi għelbu b'mod ċar dan l-effett. L-iżvilupp tal-prezzijiet tan-nikil huwa għalhekk ikkunsidrat li ma jkollux impatt dejjiemi fuq iż-żjieda fit-tendenza ġenerali ta' importazzjonijiet li huma l-oġġett ta' dumping mill-pajjiżi kkonċernati matul il-perjodu kkunsidrat.

(199)

Fid-Deċiżjoni ta' Fużjoni Outokumpu, ġie stabbilit li kemm il-livell tal-prezz tan-nikil assolut u l-volatilità tal-prezzijiet tan-nikel x'aktarx li jnaqqsu l-attrazzjoni ta' azzar li ma jissaddadx bħala materjal u jagħtu spinta lid-domanda għall-azzar li ma jissaddadx mhux nikil (16).

(200)

Fir-rigward l-attrazzjoni tal-azzar li ma jissaddadx bħala materjal, ġie argumentat ukoll li għadd ta' tendenzi li jista' jkollhom impatt possibbli fuq sostituzzjoni għal/minn azzar inossidabbli, inkluża l-ħtieġa għall-użu ta' materjali eħfef pereż. fil-karozzi (impatt negattiv fuq li ma jsaddadx; ċaqliq minn azzar għal komposti), ċikli tal-ħajja iqsar tal-prodott f'oġġetti għall-konsumatur (impatt negattiv fuq li ma jsaddadx; hu użat materjal orħos), ħtieġa akbar għal trattament tal-ilma u l-produzzjoni tal-enerġija ekoloġika (impatt pożittiv fuq li ma jsaddadx; diffiċli biex tissostitwixxi f'ħafna applikazzjonijiet) u l-iżvilupp tal-prezzijiet ta' materjali possibilment kompetittivi (minerali tal-ħadid, l-aluminju, ir-ram) (17).

(201)

F'dan ir-rigward, l-investigazzjoni preżenti kkonfermat is-sejbiet tad-Deċiżjoni ta' Fużjoni Outokumpu (18) li d-domanda għall-azzar li ma jissaddadx b'mod ġenerali u SSCR b'mod partikolari huma pjuttost riġidi. Il-biċċa l-kbira ta' dan it-tkabbir fil-konsum seħħet bejn l-2010 u l-2011 meta l-prezzijiet kienu qed jiżdiedu. Matul il-perjodu ta' tnaqqis fil-prezzijiet mill-2011 sal-perjodu ta' investigazzjoni, il-konsum baqa' stabbli u żdied biss b'1 %. Is-sostituzzjoni għal/minn azzar li ma jissaddadx, inkluż il-fatturi msemmija hawn fuq, għalhekk kellhiex impatt li jista' jitkejjel fuq il-konsum totali tal-SSCR.

(202)

Fir-rigward il-bidla tad-domanda lejn il-gradi tal-azzar non-nikel ta' azzar li ma jissaddadx li huma wkoll il-prodott simili, analiżi dettaljata tat-transazzjonijiet ta' bejgħ irrapportati mill-produtturi tal-Unjoni fil-kampjun tikkonferma s-sejbiet fid-Deċiżjoni ta' Fużjoni Outokumpu.

(203)

Madankollu, kif deskritt fil-premessa (138) hawn fuq, il-prezzijiet mitluba mill-industrija tal-Unjoni huma marbuta direttament mal-grad tal-azzar u mal-ispejjeż tal-materja prima korrispondenti. Bidla fid-domanda minn grad tal-azzar wieħed għal ieħor għalhekk għandu impatt newtrali fuq il-prestazzjoni tal-industrija tal-Unjoni.

(204)

Għalhekk qed jiġi konkluż f'dan l-istadju li t-tibdil ta' xejriet ta' konsum ma jkollhomx impatt negattiv fuq il-prestazzjoni tal-industrija tal-Unjoni.

(205)

L-importazzjonijiet oġġett ta' dumping mill-pajjiżi kkonċernati żdiedu f'termini assoluti u relattivi fil-konsum tal-Unjoni fi żmien meta l-biċċa l-kbira tal-fatturi ta' dannu tal-industrija tal-Unjoni (il-produzzjoni, il-kapaċità tal-użu, is-sehem mis-suq, l-impjiegi, il-prezzijiet tal-bejgħ, il-kost lavorattiv, il-profittabbiltà, l-investimenti, ir-redditu fuq l-investimenti) iddeterjoraw. L-importazzjonijiet oġġett ta' dumping mill-pajjiżi kkonċernati waqqgħu l-prezzijiet tal-industrija tal-Unjoni b'9,6 % — 11,3 % matul il-perjodu tal-investigazzjoni.

(206)

Fatturi oħra bħall-kost tal-enerġija, il-kapaċità u l-kundizzjonijiet tal-kompetizzjoni fis-suq tal-Unjoni ma kkontribwixxewx għad-dannu li ġarrbet l-industrija tal-Unjoni. Fatturi bħal importazzjonijiet minn pajjiżi terzi oħra u esportazzjonijiet tal-industrija tal-Unjoni setgħu kienu ta' kontribut għad-dannu imma bi grad limitat ħafna.

(207)

Fuq il-bażi ta' dan t'hawn fuq, il-Kummissjoni kkonkludiet b'mod provviżorju li d-dannu materjali lill-industrija tal-Unjoni kien ikkawżat mill-importazzjonijiet oġġett ta' dumping mill-pajjiżi kkonċernati u l-fatturi l-oħra kkunsidrati individwalment ma kisrux ir-rabta kawżali. Id-dannu jikkonsisti l-aktar fis-sitwazzjoni finanzjarja fraġli tal-industrija tal-Unjoni u fit-tnaqqis fil-produzzjoni, l-użu tal-kapaċità, l-impjegabbiltà u s-sehem mis-suq.

(208)

Il-Kummissjoni ddistingwixxiet u sseparat l-effetti tal-fatturi magħrufa kollha dwar is-sitwazzjoni tal-industrija tal-Unjoni mill-effetti dannużi tal-importazzjonijiet oġġett ta' dumping. L-effett ta' importazzjonijiet oħra, esportazzjonijiet tal-industrija tal-Unjoni, l-ispiża tal-enerġija, il-kapaċità u l-kundizzjonijiet tal-kompetizzjoni fuq l-iżviluppi negattivi tal-industrija tal-Unjoni f'termini tas-sitwazzjoni finanzjarja, il-produzzjoni u s-sehem mis-suq kienu jew limitati ħafna jew ma eżistewx.

(209)

B'konformità mal-Artikolu 21 tar-Regolament bażiku, il-Kummissjoni analizzat jekk, minkejja l-konklużjoni dwar dumping dannuż, huwiex fl-interess tal-Unjoni li jiġu adottati miżuri f'dan il-każ. Id-determinazzjoni tal-interess tal-Unjoni kienet ibbażata fuq l-apprezzament ta' kull wieħed mill-bosta interessi involuti, inklużi dawk tal-industrija tal-Unjoni, tal-importaturi u tal-utenti.

(210)

Il-maġġoranza tal-industrija tal-Unjoni ssostni l-impożizzjoni tal-miżuri. L-akbar produttur tal-Unjoni ma kkooperax fl-investigazzjoni, iżda ma kkontestax l-ilment. Sitt produtturi tal-Unjoni li jammontaw għal madwar 55 % tal-bejgħ u l-produzzjoni fl-Unjoni kkooperaw fl-investigazzjoni u appoġġjaw l-ilment.

(211)

L-Industrija tal-Unjoni ġarrbet dannu materjali. L-indikaturi finanzjarji kollha (il-profitabbiltà, il-fluss tal-flus, ir-redditu fuq l-investiment) kienu fil-biċċa l-kbira negattivi matul il-perjodu kkunsidrat. Inidikaturi oħra bħall-produzzjoni, l-użu tal-kapaċità, l-impjegabbiltà u s-sehem mis-suq żviluppaw b'mod negattiv matul il-perjodu kkunsidrat. L-industrija tal-Unjoni rnexxielha biss iżżomm il-volum baxx tal-bejgħ ta' wara l-kriżi u ma setgħetx tibbenefika mit-tkabbir tas-suq.

(212)

Fin-nuqqas ta' miżuri, l-importazzjonijiet li huma l-oġġett ta' dumping mill-pajjiżi konċernati jkomplu jagħmlu forza fuq l-industrija tal-Unjoni biex tbigħ bi prezzijiet li jwasslu għal telf. Din l-akkumulazzjoni ta' aktar telf twassal għal aktar deterjorament fis-sitwazzjoni tal-industrija tal-Unjoni. Għalhekk, huwa fl-interess tal-industrija tal-Unjoni li timponi l-miżuri.

(213)

L-importaturi u d-distributuri (inklużi ċ-ċentri tas-servizz tal-azzar) kienu attivi ħafna f'din l-investigazzjoni. Wieħed u tletin importatur u distributur ressqu 'l quddiem u esprimew l-oppożizzjoni tagħhom għall-impożizzjoni tal-miżuri.

(214)

L-importaturi u d-distributuri stqarrew li s-sorsi possibbli tagħhom tal-provvista jkunu limitati bl-impożizzjoni tal-miżuri. Argumentaw li jekk jiġu imposti dawn il-miżuri, ma jkunux jistgħu jġibu aktar prodotti SSCR mir-RPĊ u t-Tajwan.

(215)

Iżda, l-investigazzjoni wriet li l-importaturi u d-distributuri kollha jixtru minn sorsi diversi, inkluż mill-industrija tal-Unjoni, mill-pajjiżi kkonċernati u minn pajjiżi terzi. Għalhekk jiddependu biss sa ċertu punt fuq il-provvisti mill-pajjiżi konċernati.

(216)

Dawn il-partijiet jistgħu jkomplu jixtru prodotti SSCR mill-industrija tal-Unjoni u minn pajjiżi oħra li mhumiex soġġetti għal din l-investigazzjoni (pereżempju l-Indja, l-Afrika t'Isfel, il-Korea t'Isfel jew l-Istati Uniti), li b'mod kumulattiv għandhom sehem mis-suq ta' 11 %. Għalhekk, kemm l-industrija tal-Unjoni kif ukoll l-importazzjonijiet minn pajjiżi terzi oħra huma alternattivi kredibbli għall-importazzjonijiet Ċiniżi u Tajwaniżi.

(217)

Għaldaqstant, f'dan l-istadju ġie konkluż li l-impożizzjoni tal-miżuri jista' jkollha biss impatt negattiv minimu fuq is-sitwazzjoni ta' importaturi u distributuri mhux relatati.

(218)

Numru ta' partijiet interessati, inkluż produtturi esportaturi u distributuri qajmu tħassib dwar l-effetti negattivi possibbli tal-miżuri fuq l-utenti. L-utenti nfushom ma kellhomx l-istess tħassib. Tabilħaqq, il-grad ta' parteċipazzjoni tal-utenti f'dan il-każ kien baxx ħafna. Sitt utenti (inkluż grupp ta' erba' kumpaniji) esprimew opinjoni, u utent minnhom biss ikkontesta l-impożizzjoni tal-miżuri. L-utenti l-oħra u l-assoċjazzjonijiet tagħhom jew ma ħadux sehem jew naqsu milli jieħdu pożizzjoni.

(219)

Għalhekk, ġie konkluż b'mod provviżjorju li l-impożizzjoni tal-miżuri ma tmurx kontra l-interess tal-utenti.

(220)

Fid-Deċiżjoni ta' Fużjoni Outokumpu, il-Kummissjoni stabbiliet li l-fużjoni proposta ta' Outokumpu u Inoxum x'aktarx tirriżulta f'impediment sinifikanti għal kompetizzjoni effettiva permezz ta' effetti mhux koordinati permezz tal-ħolqien ta' pożizzjoni dominanti fis-suq taż- Żona Ekonomika Ewropea (ŻEE) għal SSCR (19). Biex jiġi evitat impediment bħal dan, il-Kummissjoni aċċettat li pakkett ta' divestitura inkluż AST tkun biżżejjed biex tirrimedja t-tħassib dwar il-kompetizzjoni (20). Tabilħaqq, ir-rimedju aċċettat mill-Kummissjoni żamm l-għadd ta' erba' produtturi ta' daqs medju tal-Unjoni.

(221)

Dan ir-rimedju diġà ġie implimentat u issa hu kompletament effettiv. Barra minn hekk, l-impożizzjoni ta' miżuri antidumping ma għandhiex tnaqqas in-numru tad-daqs medju tal-produtturi tal-Unjoni. Għalhekk qed jiġi konkluż f'dan l-istadju li l-impożizzjoni tal-miżuri ma għandhiex titnaqqas jew telimina l-effett tal-impenn aċċettat mill-Kummissjoni fid-Deċiżjoni ta' Fużjoni Outokumpu.

(222)

Fuq il-bażi t'hawn fuq, f'dan l-istadju ta' investigazzjoni, il-Kummissjoni kkonkludiet li ma kienx hemm raġunijiet persważivi li ma kienx fl-interess tal-Unjoni li timponi miżuri fuq importazzjonijiet tal-prodott ikkonċernat li joriġina fir-RPĊ jew fit-Tajwan.

(223)

Fuq il-bażi tal-konklużjonijiet li waslet għalihom il-Kummissjoni fir-rigward tad-dumping, id-dannu, il-kawżalità u l-interess tal-Unjoni, għandhom jiġu imposti miżuri antidumping provviżorji sabiex ma jippermettux li ssir aktar ħsara lill-industrija tal-Unjoni mill-importazzjonijiet oġġett ta' dumping.

(224)

Sabiex jiġi ddeterminat il-livell ta' dawn il-miżuri, il-Kummissjoni l-ewwel stabbiliet l-ammont ta' dazju neċessarju sabiex jiġi eliminat id-dannu mġarrab mill-industrija tal-Unjoni.

(225)

Id-dannu jiġi eliminat jekk l-industrija tal-Unjoni tkun kapaċi tkopri l-ispejjeż tal-produzzjoni tagħha u tagħmel profitt qabel it-taxxa mill-bejgħ tal-prodott simili fis-suq tal-Unjoni li jista' jinkiseb b'mod raġonevoli f'kundizzjonijiet normali ta' kompetizzjoni minn industrija ta' dan it-tip fis-settur, jiġifieri fin-nuqqas ta' importazzjonijiet oġġett ta' dumping.

(226)

Il-profittabbiltà tal-industrija tal-Unjoni kienet negattiva matul il-perjodu kollu kkunsidrat, jiġifieri għas-snin 2010 sa 2013. Is-snin preċedenti tal-2008 u l-2009 ġew affettwati minn kollass fid-domanda matul il-kriżi ekonomika globali, u l-profitt miksub f'dawn is-snin għalhekk ma jistax titqies li jkun intlaħaq f'kundizzjonijiet normali ta' kompetizzjoni. Filwaqt li l-investigazzjoni preċedenti kif deskritt fil-premessa (134) hawn fuq, stabbilit b'mod provviżorju l-eżistenza ta' dumping għas-sena 2007, ebda rabta materjali bejn dawn l-importazzjonijiet u s-sitwazzjoni tal-industrija tal-Unjoni ma setgħet tiġi stabbilita. Għal dak il-għan, il-profitt fil-mira kien ta' 8,1 %, li kien il-profitt milħuq mill-industrija tal-Unjoni fl-2007. Din kienet l-aħħar sena rappreżentattiva mmarkata b'kundizzjonijiet normali ta' kompetizzjoni qabel il-kollass fid-domanda fl-2008 u fl-2009. Id-daqs tas-suq fl-2013 kważi laħaq il-livell ta' konsum fl-2007.

(227)

Fuq il-bażi ta' dan, il-Kummissjoni kkalkolat prezz mingħajr dannu għall-prodott simili għall-industrija tal-Unjoni billi mill-prezzijiet tal-bejgħ tal-Unjoni neħħiet it-telf attwali mġarrab matul il-perjodu tal-investigazzjoni u żiedet il-marġini tal-profitt ta' 8,1 % imsemmi hawn fuq.

(228)

Imbagħad, il-Kummissjoni ddeterminat il-livell tal-eliminazzjoni tad-dannu fuq il-bażi ta' tqabbil tal-prezz ta' importazzjoni medju peżat tal-produtturi esportaturi li kkooperaw fil-kampjun tal-pajjiżi kkonċernati, kif stabbilit għall-kalkoli tat-twaqqigħ tal-prezz, mal-prezz mingħajr dannu medju peżat tal-prodott simili mibjugħ mill-produtturi tal-Unjoni fil-kampjun, fis-suq tal-Unjoni matul il-perjodu tal-investigazzjoni. Kwalunkwe differenza li tirriżulta minn dan it-tqabbil ingħatat bħala perċentwal tal-valur CIF medju peżat tal-importazzjoni.

(229)

Il-livell tal-eliminazzjoni tad-dannu għal “kumpaniji oħra li kkooperaw” u għal “kumpaniji kollha l-oħrajn” huwa ddefinit bl-istess mod bħall-marġini tad-dumping għal dawn il-kumpaniji (ara l-premessi (57), (60), (85) u (88) iktar 'il fuq).

(230)

Għandhom ikunu imposti miżuri antidumping provviżorji fuq l-importazzjonijiet tal-prodotti tal-metall mgħattan mingħajr tisħin f'fuljetti li joriġinaw fir-RPĊ u t-Tajwan, skont ir-regola ta' inqas dazju tal-Artikolu 7(2) tar-Regolament bażiku. Il-Kummissjoni qabblet il-marġnijiet tad-dannu u l-marġnijiet tad-dumping. L-ammont tar-rati tad-dazju għandu jkun issettjat fil-livell tal-inqas ammont bejn il-marġinijiet tad-dumping u tad-dannu.

(231)

Kif imsemmi fil-premessa (4) hawn fuq, il-Kummissjoni għamlet li l-importazzjonijiet tal-prodott ikkonċernat li joriġinaw mir-RPĊ u t-Tajwan soġġetti għal reġistrazzjoni bir-Regolament ta' Implimentazzjoni (UE) Nru 1331/2014 minħabba l-possibbiltà tal-applikazzjoni retroattiva ta' kull miżura antidumping u kompensatorja skont l-Artikolu 10(4) tar-Regolament bażiku u l-Artikolu 16(4) tar-Regolament tal-Kunsill (RK) Nru 597/2009 tal-11 ta' Ġunju 2009 dwar il-protezzjoni kontra importazzjonijiet sussidjati minn pajjiżi li mhumiex membri tal-Komunità Ewropea (21) ('ir-Regolament bażiku antisussidji').

(232)

Rigward din l-investigazzjoni antidumping u fid-dawl tas-sejbiet imsemmijin hawn fuq, ir-reġistrazzjoni tal-importazzjonijiet għall-finijiet tal-investigazzjoni antidumping skont l-Artikolu 14(5) tar-Regolament bażiku għandha tieqaf hawn.

(233)

Rigward l-investigazzjoni antisussidji parallela (ara l-premessa (3) iktar 'il fuq), ir-reġistrazzjoni tal-importazzjonijiet mir-RPĊ skont l-Artikoli 24(5) tar-Regolament bażiku antisussidji għandha tibqa'.

(234)

F'dan l-istadju tal-proċediment ma tista' tittieħed l-ebda deċiżjoni dwar l-applikazzjoni retroattiva possibbli tal-miżuri anti-dumping.

(235)

Fuq il-bażi ta' dan li ntqal hawn fuq, ir-rati ta' dazju antidumping provviżorji, mogħtija skont il-prezz CIF fil-fruntiera tal-Unjoni, bid-dazji doganali mhux imħallsa, għandhom ikunu kif ġej:

(236)

Ir-rati tad-dazju antidumping ta' kumpaniji individwali speċifikati f'dan ir-Regolament ġew stabbiliti fuq il-bażi tas-sejbiet ta' din l-investigazzoni. Għaldaqstant, dawn kienu jirriflettu s-sitwazzjoni misjuba waqt din l-investigazzjoni fir-rigward ta' dawn il-kumpaniji. Dawn ir-rati ta' dazju huma applikabbli esklużivament għall-importazzjonijiet tal-prodott ikkonċernat li joriġina mill-pajjiżi kkonċernati u prodott mill-entitajiet legali msemmija. L-importazzjoni tal-prodott ikkonċernat prodott minn kull kumpanija oħra mhux imsemmija b'mod speċifiku fil-parti operattiva ta' dan ir-Regolament, inklużi entitajiet relatati ma' dawk imsemmija b'mod speċifiku, għandhom ikunu soġġetti għar-rata ta' dazju applikabbli għall-“kumpaniji kollha l-oħrajn”. Ma għandhomx ikunu soġġetti għal xi rata individwali ta' dazju antidumping.

(237)

Kumpanija tista' titlob l-applikazzjoni ta' dawn ir-rati tad-dazju antidumping individwali jekk imbagħad tibdel l-isem tal-entità tagħha. It-talba għandha tkun indirizzata lill-Kummissjoni (22). It-talba għandha tinkludi l-informazzjoni kollha rilevanti li turi li l-bidla ma taffettwax lid-dritt tal-kumpanija li tibbenefika mir-rata tad-dazju li tapplika għaliha. Jekk il-bidla fl-isem tal-kumpanija ma taffettwax lid-dritt tagħha li tibbenefika mir-rata ta' dazju li tapplika għaliha, tiġi ppubblikata notifika ta' informazzjoni dwar il-bidla tal-isem f'Il-Ġurnal Uffiċjali tal-Unjoni Ewropea.

(238)

Biex ikun żgurat infurzar xieraq ta' dazji antidumping, ir-rata tad-dazju antidumping għall-'kumpaniji kollha l-oħrajn' għandha tkun applikata mhux biss għall-produtturi esportaturi li ma kkooperawx f'din l-investigazzjoni, imma anki għall-produtturi li ma kellhomx esportazzjonijiet lejn l-Unjoni matul il-perjodu ta' investigazzjoni.

(239)

Mis-26 ta' Marzu 2015, dazju antidumping provviżorju jipprovdi għall-protezzjoni kontra importazzjonijiet li jkunu l-oġġett ta' dumping. Għalhekk ma għadx hemm iktar bżonn li jiġu rreġistrati l-importazzjonijiet għall-finijiet ta' protezzjoni kontra importazzjonijiet oġġett ta' dumping. L-Artikolu 1(1) tar-Regolament ta' Implimentazzjoni (UE) Nru 1331/2014 għandu għalhekk jiġi emendat skont dan.

(240)

Fl-interessi ta' amministrazzjoni tajba, il-Kummissjoni se tistieden lill-partijiet interessati jissottomettu kummenti bil-miktub u/jew jitolbu seduta mal-Kummissjoni u/jew mal-Uffiċjal tas-Seduta fil-proċeduri kummerċjali bi skadenza fissa.

(241)

Is-sejbiet li jikkonċernaw l-impożizzjoni ta' dazju provviżorju huma provviżorji u jistgħu jkunu emendati fl-istadju definittiv tal-investigazzjoni,