|
22.10.2015 |
MT |
Il-Ġurnal Uffiċjali tal-Unjoni Ewropea |
L 277/17 |
DEĊIŻJONI TAL-KUNSILL (UE) 2015/1900
tal-5 ta' Ottubru 2015
li tistabbilixxi l-pożizzjoni li għandha tittieħed f'isem l-Unjoni Ewropea fil-Kunsill ta' Stabbilizzazzjoni u ta' Assoċjazzjoni stabbilit mill-Ftehim ta' Stabbilizzazzjoni u ta' Assoċjazzjoni bejn il-Komunitajiet Ewropej u l-Istati Membri tagħhom, min-naħa waħda, u l-Bożnija-Ħerzegovina, min-naħa l-oħra, rigward Deċiżjoni tal-Kunsill Stabbilizzazzjoni u ta' Assoċjazzjoni li tadotta r-regoli ta' proċedura tiegħu
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-Artikolu 217 flimkien mal-Artikolu 218(9) tiegħu,
Wara li kkunsidra l-proposta mill-Kummissjoni Ewropea,
Billi:
|
(1) |
L-Artikolu 115 tal-Ftehim ta' Stabbilizzazzjoni u ta' Assoċjazzjoni bejn il-Komunitajiet Ewropej u l-Istati Membri tagħhom, min-naħa waħda, u l-Bożnija-Ħerzegovina, min-naħa l-oħra (“il-Ftehim”) jistabbilixxi Kunsill ta' Stabbilizzazzjoni u ta' Assoċjazzjoni. |
|
(2) |
L-Artikolu 116 tal-Ftehim jipprevedi li l-Kunsill ta' Stabbilizzazzjoni u ta' Assoċjazzjoni jadotta r-regoli ta' proċedura tiegħu. |
|
(3) |
L-Artikolu 118 tal-Ftehim jipprevedi li l-Kunsill ta' Stabbilizzazzjoni u ta' Assoċjazzjoni jkun megħjun minn Kumitat ta' Stabbilizzazzjoni u ta' Assoċjazzjoni (“il-Kumitat”). |
|
(4) |
L-Artikolu 118 tal-Ftehim jipprevedi wkoll li l-Kunsill ta' Stabbilizzazzjoni u ta' Assoċjazzjoni, fir-regoli ta' proċedura tiegħu, jiddetermina d-doveri tal-Kumitat u li l-Kunsill ta' Stabbilizzazzjoni u ta' Assoċjazzjoni jista' jiddelega xi poteri minn tiegħu lill-Kumitatzzjoni u ta' Assoċjazzjoni. |
|
(5) |
L-Artikolu 120 tal-Ftehim jipprevedi li l-Kunsill ta' Stabbilizzazzjoni u ta' Assoċjazzjoni jista' jiddeċiedi li jistabbilixxi xi kumitati jew korpi speċjali oħra li jistgħu jassistuh fit-twettiq tad-dmirijietu. Dan jipprevedi wkoll li l-Kunsill ta' Stabbilizzazzjoni u ta' Assoċjazzjoni, fir-regoli ta' proċedura tiegħu, jiddetermina l-konfigurazzjoni u d-dmirijiet ta' tali kumitati u korpi, u kif jiffunzjonaw, |
ADOTTA DIN ID-DEĊIŻJONI:
Artikolu Uniku
Il-pożizzjoni li għandha tiġi adottata f'isem l-Unjoni Ewropea, fil-Kunsill ta' Stabbilizzazzjoni u ta' Assoċjazzjoni stabbilit mill-Artikolu 115 tal-Ftehim rigward Deċiżjoni ta' dan il-Kunsill ta' Stabbilizzazzjoni u ta' Assoċjazzjoni li jadotta r-regoli ta' proċedura tiegħu, għandha tkun ibbażata fuq l-abbozz tad-Deċiżjoni tal-Kunsill ta' Stabbilizzazzjoni u ta' Assoċjazzjoni, mehmuża ma' din id-Deċiżjoni.
Emendi minuri għal dan l-abbozz ta' Deċiżjoni jistgħu jintlaqgħu mingħajr deċiżjoni ulterjuri tal-Kunsill.
Magħmul fil-Lussemburgu, il-5 ta' Ottubru 2015.
Għall-Kunsill
Il-President
N. SCHMIT
DEĊIŻJONI Nru 1 TAL-KUNSILL TA' STABBILIZZAZZJONI U TA' ASSOĊJAZZJONI BEJN L-UE U L-BOŻNIJA-ĦERZEGOVINA
ta' [data]
li tadotta r-regoli ta' proċedura tiegħu
IL-KUNSILL TA' STABBILIZZAZZJONI U TA' ASSOĊJAZZJONI,
Wara li kkunsidra l-Ftehim ta' Stabbilizzazzjoni u ta' Assoċjazzjoni bejn il-Komunitajiet Ewropej u l-Istati Membri tagħhom, min-naħa waħda, u l-Bożnija-Ħerzegovina, min-naħa l-oħra (il-“Ftehim”), u b'mod partikolari l-Artikoli 115, 116, 118 u 120 tiegħu,
Billi l-Ftehim daħal fis-seħħ fl-1 ta' Ġunju 2015,
ADOTTA DIN ID-DEĊIŻJONI:
Artikolu 1
Presidenza
Il-Partijiet għandhom iżommu l-Presidenza tal-Kunsill ta' Assoċjazzjoni u ta' Stabbilizzazzjoni, b'mod alternat, għal perijodu ta' 12-il xahar. L-ewwel perijodu għandu jibda fid-data tal-ewwel laqgħa tal-Kunsill ta' Stabbilizzazzjoni u ta' Assoċjazzjoni u jintemm fil-31 ta' Diċembru tal-istess sena.
Artikolu 2
Laqgħat
Il-Kunsill ta' Stabbilizzazzjoni u ta' Assoċjazzjoni għandu jiltaqa' darba fis-sena f'livell ministerjali. Sessjonijiet speċjali tal-Kunsill ta' Stabbilizzazzjoni u ta' Assoċjazzjoni jistgħu jsiru bit-talba ta' waħda mill-Partijiet, jekk il-Partijiet jaqblu li jsir hekk. Sakemm ma jsirx ftehim mod ieħor mill-Partijiet, kull sessjoni tal-Kunsill ta' Stabbilizzazzjoni u ta' Assoċjazzjoni għandha ssir fil-post fejn is-soltu jsiru l-laqgħat tal-Kunsill tal-Unjoni Ewropea fid-data li jaqblu dwarha ż-żewġ Partijiet. Il-laqgħat tal-Kunsill ta' Stabbilizzazzjoni u ta' Assoċjazzjoni għandhom jissejħu b'mod konġunt mis-Segretarji tal-Kunsill ta' Stabbilizzazzjoni u ta' Assoċjazzjoni bi qbil mal-President.
Artikolu 3
Rappreżentanza
Il-membri tal-Kunsill ta' Stabbilizzazzjoni u ta' Assoċjazzjoni jistgħu jiġu rrappreżentati f'każ li ma jkunux jistgħu jattendu. Jekk membru jixtieq li jiġi rrappreżentat b'dan il-mod, jeħtieġ li huwa jinnotifika lill-President dwar l-isem tar-rappreżentant tiegħu qabel il-laqgħa li fiha se jiġi rrappreżentat b'dan il-mod. Ir-rappreżentant ta' membru tal-Kunsill ta' Stabbilizzazzjoni u ta' Assoċjazzjoni għandu jeżerċita d-drittijiet kollha ta' dak il-membru.
Artikolu 4
Delegazzjonijiet
Il-membri tal-Kunsill ta' Stabbilizzazzjoni u ta' Assoċjazzjoni jistgħu jkunu akkumpanjati minn uffiċjali. Qabel kull laqgħa, il-President għandu jkun infurmat dwar il-konfigurazzjoni tad-delegazzjoni prevista għal kull Parti. Rappreżentant tal-Bank Ewropew tal-Investiment għandu jattendi l-laqgħat tal-Kunsill ta' Stabbilizzazzjoni u ta' Assoċjazzjoni bħala osservatur, meta fl-aġenda jidhru ħwejjeġ li jirrigwardaw lill-Bank. Il-Kunsill ta' Stabbilizzazzjoni u ta' Assoċjazzjoni jista' jistieden persuni li mhumiex membri sabiex jattendu l-laqgħat tiegħu biex jipprovdu informazzjoni fuq suġġetti partikolari.
Artikolu 5
Segretarjat
Uffiċjal tas-Segretarjat Ġenerali tal-Kunsill tal-Unjoni Ewropea u uffiċjal tal-Missjoni tal-Bożnija-Ħerzegovina għall-Unjoni Ewropea għandhom jaġixxu b'mod konġunt bħala Segretarji tal-Kunsill ta' Stabbilizzazzjoni u ta' Assoċjazzjoni.
Artikolu 6
Korrispondenza
Il-korrispondenza indirizzata lill-Kunsill ta' Stabbilizzazzjoni u ta' Assoċjazzjoni għandha tintbagħat lill-President tal-Kunsill ta' Stabbilizzazzjoni u ta' Assoċjazzjoni fl-indirizz tas-Segretarjat Ġenerali tal-Kunsill tal-Unjoni Ewropea.
Iż-żewġ Segretarji għandhom jiżguraw li l-korrispondenza tiġi mgħoddija lill-President tal-Kunsill ta' Stabbilizzazzjoni u ta' Assoċjazzjoni u, fejn xieraq, tkun imqassma lil membri l-oħra tal-Kunsill ta' Stabbilizzazzjoni u ta' Assoċjazzjoni. Il-korrispondenza li titqassam għandha tintbagħat lis-Segretarjat Ġenerali tal-Kummissjoni, lis-Servizz Ewropew għall-Azzjoni Esterna, lir-Rappreżentanti Permanenti tal-Istati Membri u lill-Missjoni tal-Bożnija-Ħerzegovina għall-Unjoni Ewropea.
Il-komunikazzjonijiet mill-President tal-Kunsill ta' Stabbilizzazzjoni u ta' Assoċjazzjoni għandhom jintbagħtu miż-żewġ Segretarji lid-destinatarji u jitqassmu, fejn xieraq, lill-membri l-oħra tal-Kunsill ta' Stabbilizzazzjoni u ta' Assoċjazzjoni msemmija fit-tieni paragrafu.
Artikolu 7
Pubbliċità
Sakemm ma jiġix deċiż mod ieħor, il-laqgħat tal-Kunsill ta' Stabbilizzazzjoni u ta' Assoċjazzjoni ma għandhomx ikunu pubbliċi.
Artikolu 8
Aġendi għal-laqgħat
1. Il-President għandu għal kull laqgħa, ifassal aġenda proviżorja. Din għandha tiġi mgħoddija mis-Segretarji tal-Kunsill ta' Stabbilizzazzjoni u ta' Assoċjazzjoni lid-destinatarji msemmija fl-Artikolu 6 mhux aktar tard minn 15-il jum qabel il-bidu tal-laqgħa. L-aġenda proviżorja għandha tinkludi l-punti li fuqhom il-President ikun irċieva talba sabiex dawn jiżdiedu fl-aġenda mhux aktar tard minn 21 jum qabel tinbeda l-laqgħa, għalkemm l-ebda punt ma għandu jitniżżel fl-aġenda proviżorja sakemm ma tkunx intbagħtet id-dokumentazzjoni ta' sostenn lis-Segretarji mhux aktar tard mid-data li fiha tintbagħat l-aġenda. L-aġenda għandha tiġi adottata mill-Kunsill ta' Stabbilizzazzjoni u ta' Assoċjazzjoni fil-bidu ta' kull laqgħa. Punt apparti dawk li jidhru fl-aġenda proviżorja jista' jitqiegħed fuq l-aġenda jekk iż-żewġ Partijiet jaqblu li jsir hekk.
2. Il-President jista', bi ftehim maż-żewġ Partijiet, iqassar l-iskadenzi stipulati fil-paragrafu 1 sabiex jitqiesu l-ħtiġijiet ta' każ partikolari.
Artikolu 9
Minuti
L-abbozz tal-minuti ta' kull laqgħa għandu jitħejja miż-żewġ Segretarji. Il-minuti għandhom, bħala regola ġenerali, jindikaw fir-rigward ta' kull punt fl-aġenda:
|
— |
id-dokumentazzjoni ppreżentata lill-Kunsill ta' Stabbilizzazzjoni u ta' Assoċjazzjoni, |
|
— |
id-dikjarazzjonijiet li membru tal-Kunsill ta' Stabbilizzazzjoni u ta' Assoċjazzjoni jkun talab li jiddaħħlu, |
|
— |
id-deċiżjonijiet meħuda u r-rakkomandazzjonijiet magħmula, id-dikjarazzjonijiet li kien hemm qbil dwarhom u l-konklużjonijiet adottati. |
L-abbozz tal-minuti għandhom jiġi ppreżentat lill-Kunsill ta' Stabbilizzazzjoni u ta' Assoċjazzjoni għall-approvazzjoni. Meta approvati, il-minuti għandhom jiġu ffirmati mill-President u ż-żewġ Segretarji. Il-minuti għandhom jiġu ffajljati fl-arkivji tas-Segretarjat Ġenerali tal-Kunsill tal-Unjoni Ewropea, li jservi ta' depożitarju tad-dokumenti tal-Assoċjazzjoni. Kopja ċċertifikata għandha tiġi mgħoddija lil kull wieħed mid-destinatarji msemmija fl-Artikolu 6.
Artikolu 10
Deċiżjonijiet u rakkomandazzjonijiet
1. Il-Kunsill ta' Stabbilizzazzjoni u ta' Assoċjazzjoni għandu jieħu d-deċiżjonijiet tiegħu u jagħmel ir-rakkomandazzjonijiet bi qbil bejn il-Partijiet. Il-Kunsill ta' Stabbilizzazzjoni u ta' Assoċjazzjoni jista' jieħu deċiżjonijiet jew jagħmel rakkomandazzjonijiet bi proċedura bil-miktub jekk iż-żewġ Partijiet jaqblu li jsir hekk.
2. Id-deċiżjonijiet u r-rakkomandazzjonijiet tal-Kunsill ta' Stabbilizzazzjoni u ta' Assoċjazzjoni, skont l-Artikolu 117 tal-Ftehim, għandhom rispettivament, jingħataw it-titoli “Deċiżjoni” u “Rakkomandazzjoni” segwiti b'numru ta' serje, bid-data ta' meta ġew adottati u b'deskrizzjoni tas-suġġett tagħhom. Id-deċiżjonijiet u r-rakkomandazzjonijiet tal-Kunsill ta' Stabbilizzazzjoni u ta' Assoċjazzjoni għandhom jiġu ffirmati mill-President u awtentikati miż-żewġ Segretarji. Id-deċiżjonijiet u r-rakkomandazzjonijiet għandhom jiġu mgħoddija lil kull wieħed mid-destinatarji msemmija fl-Artikolu 6. Kull Parti tista' tiddeċiedi fuq il-pubblikazzjoni ta' deċiżjonijiet u rakkomandazzjonijiet tal-Kunsill ta' Stabbilizzazzjoni u ta' Assoċjazzjoni fil-pubblikazzjoni uffiċjali rispettiva tagħha.
Artikolu 11
Lingwi
Il-lingwi uffiċjali tal-Kunsill ta' Stabbilizzazzjoni u ta' Assoċjazzjoni għandhom ikunu l-lingwi uffiċjali taż-żewġ Partijiet. Sakemm ma jiġix deċiż mod ieħor, il-Kunsill ta' Stabbilizzazzjoni u ta' Assoċjazzjoni għandu jsejjes id-deliberazzjonijiet tiegħu fuq dokumentazzjoni mfassla f'dawn il-lingwi.
Artikolu 12
Spejjeż
L-Unjoni Ewropea u l-Bożnija-Ħerzegovina, għandhom kull wieħed minnhom iħallas l-ispejjeż li jagħmel biex jipparteċipa fil-laqgħat tal-Kunsill ta' Stabbilizzazzjoni u ta' Assoċjazzjoni, kemm fir-rigward tal-persunal, tal-spejjeż ta' vjaġġar u ta' sussistenza, kif ukoll tal-ispejjeż ta' posta u ta' telekomunikazzjoni. In-nefqa li għandha x'taqsam mas-servizzi ta' interpretar fil-laqgħat, it-traduzzjoni u r-riproduzzjoni tad-dokumenti kif ukoll infiq ieħor relatat mal-organizzazzjoni tal-laqgħat għandhom jitħallsu mill-Parti li tkun qed tospita l-laqgħat.
Artikolu 13
Kumitat ta' Stabbilizzazzjoni u ta' Assoċjazzjoni
1. B'dan ġie stabbilit Kumitat ta' Stabbilizzazzjoni u ta' Assoċjazzjoni (“il-Kumitat”) sabiex jgħin lill-Kunsill ta' Stabbilizzazzjoni u ta' Assoċjazzjoni fil-qadi ta' dmirijietu. Huwa għandu jkun magħmul minn rappreżentanti tal-Kunsill tal-Unjoni Ewropea u rappreżentanti tal-Kummissjoni Ewropea, min-naħa waħda, u rappreżentanti tal-Kunsill tal-Ministri tal-Bożnija-Ħerzegovina, min-naħa l-oħra, normalment fil-livell ta' impjegati tas-servizz pubbliku f'kariga għolja.
2. Il-Kumitat għandu jħejji l-laqgħat u d-deliberazzjonijiet tal-Kunsill ta' Stabbilizzazzjoni u ta' Assoċjazzjoni, jimplimenta d-deċiżjonijiet tal-Kunsill ta' Stabbilizzazzjoni u ta' Assoċjazzjoni fejn meħtieġ u, inġenerali, jiżgura l-kontinwità fir-relazzjoni ta' assoċjazzjoni kif ukoll it-tħaddim xieraq tal-Ftehim. Huwa għandu jqis kull kwistjoni li tiġi referuta lilu mill-Kunsill ta' Stabbilizzazzjoni u ta' Assoċjazzjoni kif ukoll kull kwistjoni li tista' tinqala' fl-andament tat-twettiq ta' kuljum tal-Ftehim. Huwa għandu jippreżenta proposti jew kull abbozz ta' deċiżjonijiet jew rakkomandazzjonijiet għall-adozzjoni lill-Kunsill ta' Stabbilizzazzjoni u ta' Assoċjazzjoni.
3. F'każijiet fejn il-Ftehim jirriferi għal obbligu li jikkonsulta jew il-possibilità ta' konsultazzjoni, din it-tip ta' konsultazzjoni tista' ssir fil-Kumitat. Il-konsultazzjoni tista' tissokta fil-Kunsill ta' Stabbilizzazzjoni u ta' Assoċjazzjoni jekk iż-żewġ Partijiet jaqblu li jsir hekk.
4. Ir-regoli ta' proċedura tal-Kumitat huma annessi ma' din id-Deċiżjoni.
Magħmul fi
Għall-Kunsill ta' Stabbilizzazzjoni u ta' Assoċjazzjoni
Il-President
ANNESS għad-DEĊIŻJONI Nru 1 TAL-KUNSILL TA' STABBILIZZAZZJONI U TA' ASSOĊJAZZJONI BEJN L-UE U L-BOŻNIJA-ĦERZEGOVINA
ta' [data]
Regoli ta' Proċedura tal-Kumitat ta' Stabbilizzazzjoni u ta' Assoċjazzjoni
Artikolu 1
Presidenza
Il-Partijiet għandhom ikollhom il-Presidenza tal-Kumitat, b'mod alternat, għal perijodu ta' 12-il xahar. L-ewwel perijodu għandu jibda fid-data tal-ewwel laqgħa tal-Kunsill ta' Stabbilizzazzjoni u ta' Assoċjazzjoni u jintemm fil-31 ta' Diċembru tal-istess sena.
Artikolu 2
Laqgħat
Il-Kumitat għandu jiltaqa' skont kif jitolbu ċ-ċirkostanzi, bil-ftehim taż-żewġ Partijiet. Kull laqgħa tal-Kumitat għandha ssir fi żmien u f'post miftiehma miż-żewġ Partijiet. Il-laqgħat tal-Kumitat għandhom jissejħu mill-President.
Artikolu 3
Delegazzjonijiet
Qabel kull laqgħa, il-President għandu jkun infurmat dwar il-konfigurazzjoni tad-delegazzjoni prevista għal kull Parti.
Artikolu 4
Segretarjat
Uffiċjal tal-Kummissjoni Ewropea flimkien ma' uffiċjal tal-Bożnija-Ħerzegovina, għandhom iservu flimkien bħala Segretarji tal-Kumitat. Il-komunikazzjonijiet kollha lil, u mingħand, il-President tal-Kumitat, previsti f'din id-Deċiżjoni għandhom jiġu mgħoddija lis-Segretarji tal-Kumitat, kif ukoll lis-Segretarji u l-President tal-Kunsill ta' Stabbilizzazzjoni u ta' Assoċjazzjoni.
Artikolu 5
Pubbliċità
Sakemm ma jkunx deċiż mod ieħor, il-laqgħat tal-Kumitat m'għandhomx ikunu pubbliċi.
Artikolu 6
Aġendi għal-laqgħat
1. Il-President għandu jfassal aġenda proviżorja għal kull laqgħa. Din għandha tiġi mgħoddija mis-Segretarji tal-Kumitat lid-destinatarji msemmija fl-Artikolu 4 sa mhux aktar tard minn 30 jum tax-xogħol qabel il-bidu tal-laqgħa. L-aġenda proviżorja għandha tinkludi l-punti li fuqhom il-President ikun irċieva talba sabiex dawn jiżdiedu fl-aġenda mhux aktar tard minn 35 jum tax-xogħol qabel tinbeda l-laqgħa, għalkemm l-ebda punt ma għandu jitniżżel fl-aġenda proviżorja sakemm ma tkunx intbagħtet id-dokumentazzjoni ta' sostenn lis-Segretarji mhux aktar tard mid-data li fiha tintbagħat l-aġenda. Il-Kumitat jista' jistieden esperti li mhumiex membri sabiex jattendu l-laqgħat tiegħu sabiex jipprovdu informazzjoni fuq suġġetti partikolari.L-aġenda għandha tiġi adottata mill-Kumitat fil-bidu ta' kull laqgħa. Punt apparti dawk li jidhru fl-aġenda proviżorja jista' jitqiegħed fuq l-aġenda jekk iż-żewġ Partijiet jaqblu li jsir hekk.
2. Il-President jista', bi ftehim maż-żewġ Partijiet, iqassar l-iskadenzi stipulati fil-paragrafu 1 sabiex jitqiesu l-ħtiġijiet ta' każ partikolari.
Artikolu 7
Minuti
Għal kull laqgħa għandhom jittieħdu l-minuti, u dawn għandhom ikunu msejsa fuq is-sommarju tal-konklużjonijiet mill-President, li l-Kumitat ikun wasal għalihom. Meta jiġu approvati mill-Kumitat, il-minuti għandhom jiġu ffirmati mill-President u mis-Segretarji, u jiġu ffajljati miż-żewġ Partijiet. Kopja tal-minuti għandha tiġi mgħoddija lil kull wieħed mid-destinatarji msemmija fl-Artikolu 4.
Artikolu 8
Deċiżjonijiet u rakkomandazzjonijiet
Fil-każijiet speċifiċi fejn il-Kumitat jingħata s-setgħa mill-Kunsill ta' Stabbilizzazzjoni u ta' Assoċjazzjoni skont l-Artikolu 118 tal-Ftehim sabiex jieħu deċiżjonijiet jew jagħmel rakkomandazzjonijiet, dawn l-atti għandhom ikunu intitolati rispettivament “Deċiżjoni” u “Rakkomandazzjoni”, segwiti b'numru ta' serje, bid-data tal-adozzjoni tagħhom u b'deskrizzjoni tas-suġġett tagħhom. Deċiżjonijiet u rakkomandazzjonijiet għandhom isiru bi qbil bejn il-Partijiet. Il-Kumitat jista' jieħu deċiżjonijiet jew jagħmel rakkomandazzjonijiet bi proċedura bil-miktub jekk iż-żewġ Partijiet jaqblu li jsir hekk. Id-deċiżjonijiet u r-rakkomandazzjonijiet tal-Kumitat għandhom jiġu ffirmati mill-President u awtentikati miż-żewġ Segretarji, u għandhom jiġu mgħoddija lid-destinatarji msemmija fl-Artikolu 4 ta' dan l-Anness. Kull Parti tista' tiddeċiedi fuq il-pubblikazzjoni tad-deċiżjonijiet u r-rakkomandazzjonijiet tal-Kumitat fil-pubblikazzjoni uffiċjali rispettiva tagħha.
Artikolu 9
Spejjeż
L-Unjoni Ewropea u l-Bożnija-Ħerzegovina, għandhom kull wieħed minnhom iħallas għall-ispejjeż li jagħmel biex jipparteċipa fil-laqgħat tal-Kumitat, kemm fir-rigward tal-persunal, tal-spejjeż ta' vjaġġar u ta' sussistenza, kif ukoll tal-ispejjeż ta' posta u ta' telekomunikazzjoni. In-nefqa li għandha x'taqsam mas-servizzi ta' interpretar fil-laqgħat, it-traduzzjoni u r-riproduzzjoni tad-dokumenti kif ukoll infiq ieħor relatat mal-organizzazzjoni tal-laqgħat għandhom jitħallsu mill-Parti li tkun qed tospita l-laqgħat.
Artikolu 10
Sottokumitati u gruppi speċjali
Il-Kumitat jista' jistabbilixxi sottokumitati jew gruppi speċjali sabiex jaħdmu taħt l-awtorità tiegħu.Huma għandhom jippreżentaw lill-Kumitat rapport WARA kull laqgħa li jagħmlu. Il-Kumitat jista' jiddeċiedi li jtemm kwalukwe sottokumitat jew grupp eżistenti, jistipula jew ibiddel it-termini ta' referenza tagħhom jew jistabbilixxi sottokumitati jew gruppi oħra sabiex jgħinuh fil-qadi ta' dmirijietu. Dawk is-sottokumitati u gruppi ma għandu jkollhom l-ebda setgħa ta' teħid ta' deċiżjonijiet.
ANNESS
għall-informazzjoni tal-kunsill biss
ABBOZZ
DEĊIŻJONI Nru 1/2015 TAL-KUMITAT TA' STABBILIZZAZZJONI U TA' ASSOĊJAZZJONI UE — BOŻNIJA-ĦERZEGOVINA
ta' […] 2015
li toħloq sottokumitati u gruppi speċjali
IL-KUMITAT TA' STABBILIZZAZZJONI U TA' ASSOĊJAZZJONI
Wara li kkunsidra l-Ftehim ta' Stabbilizzazzjoni u ta' Assoċjazzjoni bejn il-Komunitajiet Ewropej u l-Istati Membri tagħhom, min-naħa waħda, u l-Bożnija-Ħerzegovina, min-naħa l-oħra, u b'mod partikolari l-Artikolu 119 tiegħu,
Wara li kkunsidra r-regoli ta' proċedura tiegħu, u b'mod partikolari l-Artikolu 10 tiegħu,
ADOTTA DIN ID-DEĊIŻJONI:
Artikolu Uniku
Is-sottokumitati u l-gruppi speċjali elenkati fl-Anness I huma b'dan maħluqa. It-termini ta' referenza tagħhom huma stipulati fl-Anness II.
Magħmul fi …, fil-jum/xahar 2015.
Għall-Kumitat ta' Stabbilizzazzjoni u ta' Assoċjazzjoni
Il-President
ANNESS I
FTEHIM TA' STABBILIZZAZZJONI U TA' ASSOĊJAZZJONI UE — BOŻNIJA-ĦERZEGOVINA
L-Istruttura tas-Sottokumitati Multidixxiplinari
|
Titlu |
Kwistjonijiet |
Artikolu tal-Ftehim |
||
|
Moviment Liberu tal-Merkanzija |
Art. 18 |
||
|
Prodotti Industrijali |
Art. 19-23 |
|||
|
Kwistjonijiet kummerċjali |
Art. 32-46 |
|||
|
Standardizzazzjoni, metroloġija, akkreditazzjoni, ċertifikazzjoni, analiżi tal-konformità u sorveljanza tas-suq |
Art. 75 |
|||
|
Kooperazzjoni industrijali |
Art. 92 |
|||
|
SMEs |
Art. 93 |
|||
|
Turiżmu |
Art. 94 |
|||
|
Dwana |
Art. 97 |
|||
|
Tassazzjoni |
Art. 98 |
|||
|
Regoli tal-oriġini |
Protokoll 2 |
|||
|
Assistenza amministrattiva fi kwistjonijiet doganali |
Protokoll 5 |
|||
|
Prodotti agrikoli sensu lato |
Art. 24, 26(1), 26(2), 29, 30 u 33 |
||
|
Prodotti agrikoli sensu stricto |
Art. 27(1)(2) u 27(4) |
|||
|
Prodotti tas-Sajd |
Art. 26 u 28 |
|||
|
Prodotti agrikoli pproċessati |
Art. 25, il-Protokoll 1 |
|||
|
Inbid |
Art. 27(5) u l-Protokoll 7 |
|||
|
Protezzjoni tal-indikazzjonijiet ġeografiċi għal prodotti agrikoli u prodotti tas-sajd, u għall-prodotti tal-ikel li mhumiex inbid u spirti |
Art. 31 |
|||
|
Settur agrikolu u agroindustrijali, materji veterinarji u fitosanitarji |
Art. 95 |
|||
|
Kooperazzjoni fis-sajd |
Art. 96 |
|||
|
Sigurtà tal-ikel |
Art. 95 |
|||
|
Dritt ta' stabbiliment |
Art. 50-56 |
||
|
Provvista ta' servizzi |
Art. 57-59 |
|||
|
Mistoqsijiet oħrajn relatati mat-Titolu V tal-Ftehim |
Art. 63-69 |
|||
|
Approssimazzjoni tal-leġislazzjoni u l-infurzar tal-liġi |
Art. 70 |
|||
|
Kompetizzjoni |
Art. 71-72, Protokoll 4 |
|||
|
Proprjetà intelletwali, industrijali u kummerċjali |
Art. 73 |
|||
|
Akkwist pubbliku |
Art. 74 |
|||
|
Servizzi bankarji, tal-assigurazzjoni u servizzi finanzjarji oħra |
Art. 89 |
|||
|
Protezzjoni tal-konsumaturi |
Art. 76 |
|||
|
Saħħa pubblika |
|
|||
|
Ċaqliq ta' kapital u pagamenti |
Art. 60-62 |
||
|
Politika Ekonomika |
Art. 87 |
|||
|
Kooperazzjoni statistika |
Art. 88 |
|||
|
Promozzjoni u protezzjoni tal-investiment |
Art. 91 |
|||
|
Kooperazzjoni finanzjarja |
Art. 112-114 |
|||
|
Ġudikatura u d-drittijiet fundamentali, inkluża l-ġlieda kontra d-diskriminazzjoni |
Art. 78 |
||
|
Kooperazzjoni tal-pulizija u kooperazzjoni ġudizzjarja |
Art. 78 |
|||
|
Stat tad-Dritt |
Art. 78 |
|||
|
Protezzjoni tad-data |
Art. 79 |
|||
|
Viżi, kontroll tal-fruntieri, ażil u migrazzjoni |
Art. 80 |
|||
|
Immigrazzjoni illegali u riammissjoni |
Art. 81 |
|||
|
Ħasil tal-flus |
Art. 82 |
|||
|
Drogi |
Art. 83 |
|||
|
Ġlieda kontra t-terroriżmu |
Art. 85 |
|||
|
Kriminalità u attivitajiet illegali oħrajn |
Art. 84 |
|||
|
Moviment tal-ħaddiema |
Art. 47-49 |
||
|
Kundizzjonijiet tax-xogħol u opportunitajiet indaqs |
Art. 77 |
|||
|
Kooperazzjoni soċjali |
Art. 99 |
|||
|
Edukazzjoni u taħriġ |
Art. 100 |
|||
|
Kooperazzjoni kulturali |
Art. 101 |
|||
|
Informatika u komunikazzjoni |
Art. 105 |
|||
|
Kooperazzjoni fil-qasam awdjoviżiv |
Art. 102 |
|||
|
Networks u servizzi tal-komunikazzjoni elettronika |
Art. 104 |
|||
|
Soċjetà tal-informazzjoni |
Art. 103 |
|||
|
Żvilupp ta' riċerka u teknoloġija |
Art. 109 |
|||
|
Trasport |
Art. 53, 59, 106 u l-Protokoll 3 |
||
|
Enerġija |
Art. 107 |
|||
|
Sikurezza nukleari |
Art. 107 |
|||
|
Ambjent |
Art. 108 |
|||
|
Tibdil fil-klima |
Art. 108 |
|||
|
Protezzjoni ċivili |
Art. 108 |
|||
|
Żvilupp reġjonali u lokali |
Art. 110 |
L-istruttura tal-gruppi speċjali
|
Titolu |
Kwistjonijiet |
Artikolu tal-Ftehim |
|
Grupp speċjali għar-riforma tal-amministrazzjoni pubblika |
Ir-riforma tal-amministrazzjoni pubblika |
Titolu VI L-approssimazzjoni legali u l-infurzar tal-liġi, l-Art. 70 u Titolu VII, Ġustizzja u Affarijiet Interni, Art. 78, Art. 111 |
(1) Sabiex jiġi implimentat il-Protokoll 3 għall-Ftehim, dan is-sottokumitat għandu jaġixxi bħala s-sottokumitat speċjali msemmi fl-Artikolu 21 ta' dan il-Protokoll.
ANNESS II
IT-TERMINI TA' REFERENZA TAS-SOTTOKUMITATI U TAL-GRUPPI SPEĊJALI UE — BOŻNIJA-ĦERZEGOVINA
Il-Konfigurazzjoni u l-President
Is-sottokumitati u l-grupp speċjali għar-riforma tal-amministrazzjoni pubblika (RAP) għandhom ikunu magħmulin minn rappreżentanti tal-Kummissjoni Ewropea u rappreżentanti tal-Gvern tal-Bożnija-Ħerzegovina. Huma għandhom ikunu ippreseduti, darba kull wieħed, miż-żewġ partijiet. L-Istati Membri ser jiġu infurmati u mistiedna għal-laqgħat tas-sottokumitati u tal-grupp speċjali għar-RAP.
Segretarjat
Uffiċjal tal-Kummissjoni Ewropea u uffiċjal tal-gvern tal-Bożnija-Ħerzegovina għandhom iservu flimkien bħala segretarji ta' kull sottokumitat u tal-grupp speċjali għar-RAP.
Il-komunikazzjonijiet kollha dwar is-sottokumitati għandhom ikunu mgħoddija lis-segretarji tas-sottokumitat rilevanti u tal-grupp speċjali għar-RAP.
Laqgħat
Is-sottokumitati u l-grupp speċjali għar-RAP għandhom jiltaqgħu kull meta jkun hemm bżonn, bi qbil bejn iż-żewġ partijiet. Kull laqgħa ta' sottokumitat jew tal-grupp speċjali għar-RAP għandha ssir f'ħin u post li jaqblu dwarhom iż-żewġ partijiet.
Jekk iż-żewġ Partijiet jiftiehmu, is-sottokumitati u l-grupp speċjali għar-RAP jistgħu jistiednu esperti fil-laqgħat tagħhom biex jipprovdu l-informazzjoni speċifika mitluba.
Aġenda u dokumenti ta' sostenn
Il-President u s-Segretarji għandhom ifasslu aġenda proviżorja għal kull laqgħa mhux aktar tard minn 30 jum tax-xogħol qabel il-bidu tal-laqgħa.
L-aġenda proviżorja għandha tinkludi punti li dwarhom is-segretarji jkunu rċevew talba biex jiġu inklużi fl-aġenda mhux aktar tard minn 35 ġurnata qabel il-bidu tal-laqgħa.
Wara l-ftehim ta' aġenda proviżorja għal kull laqgħa u mhux aktar tard minn għaxart ijiem tax-xogħol qabel il-bidu tal-laqgħa s-segretarju -mill-Bożnija-Ħerzegovina għandu jibgħat lis-segretarju mill-Kummissjoni Ewropea id-dokumentazzjoni meħtieġa bil-miktub wara l-entrati miftehma fl-aġenda proviżorja.
Jekk l-iskadenza msemmija fil-paragrafu 3 ma tiġix irrispettata, il-laqgħa għandha tiġi kkanċellata awtomatikament mingħajr avviż ulterjuri.
Suġġetti
Is-sottokumitati għandhom jiddiskutu kwistjonijiet li għandhom x'jaqsmu mal-oqsma tal-Ftehim mniżżla fl-istruttura tas-sottokumitat multidixxiplinarju. Il-progress dwar l-approssimazzjoni, l-implimentazzjoni u l-infurzar tal-leġislazzjoni għandhom jiġu analizzati taħt il-materji kollha. Is-sottokumitati għandhom jeżaminaw kull problema li tista' titfaċċa fl-oqsma relevanti tagħhom u jissuġġerixxu l-passi possibbli li għandhom jittieħdu.
Is-sottokumitati għandhom iservu wkoll bħala postijiet fejn jiġi ċċarat aktar l-acquis, u għandhom jistħarrġu l-progress li jkun sar mill-Bożnija-Ħerzegovina biex tikkonforma mal-acquis skont l-impenji li ħadet fl-Ftehim.
Il-grupp speċjali għar-RAP għandu jiddiskuti kwistjonijiet relatati mar-riforma tal-amministrazzjoni pubblika u jissuġġerixxi l-passi li jistgħu jittieħdu.
Minuti
Għal kull laqgħa għandhom jittieħdu l-minuti, u wara għandu jkun hemm qbil dwarhom. Kopja tal-minuti għandha tiġi mgħoddija mis-segretarju tas-sottokumitat jew tal-grupp speċjali għar-RAP lis-Segretarju tal-Kumitat.
Pubbliċità
Sakemm ma jkunx deċiż mod ieħor, il-laqgħat tas-sottokumitati u tal-gruppi speċjali għar-RAP ma għandhomx ikunu pubbliċi.