(1)

Il-fornitur Robert Bosch GmbH (l-“Applikant”) ressaq dawn iż-żewġ applikazzjonijiet għall-approvazzjoni tal-alternaturi ta' effiċjenza għolja Robert Bosch GmbH bħala teknoloġiji innovattivi fit-2 ta' Diċembru 2013 u fis-6 ta' Mejju 2014 rispettivament:

(2)

Il-kompletezza ta' żewġ applikazzjonijiet ġiet ivvalutata skont l-Artikolu 4 tar-Regolament ta' Implimentazzjoni tal-Kummissjoni (UE) Nru 725/2011 (2). Il-Kummissjoni sabet li fl-applikazzjoni oriġinali għat-teknoloġija innovattiva Nru 1 tħalliet barra ċerta informazzjoni rilevanti u talbet lill-Applikant biex jipprovdiha. L-Applikant ipprovda l-informazzjoni fis-6 ta' Mejju 2014. Instab li l-applikazzjoni kienet kompleta u l-perjodu għall-valutazzjoni mill-Kummissjoni tal-applikazzjonijiet beda l-għada tad-data tal-wasla uffiċjali tagħha, jiġifieri s-7 ta' Mejju 2014 fiż-żewġ każijiet.

(3)

Iż-żewġ applikazzjonijiet ġew ivvalutati skont l-Artikolu 12 tar-Regolament (KE) Nru 443/2009, skont ir-Regolament ta' Implimentazzjoni tal-Kummissjoni (UE) Nru 725/2011 u skont il-Linji Gwida Tekniċi għat-tħejjija tal-applikazzjonijiet għall-approvazzjoni ta' teknoloġiji innovattivi skont ir-Regolament (KE) Nru 443/2009 (il-Linji Gwida Tekniċi) (3).

(4)

L-applikazzjoni Nru 1 tirreferi għall-alternatur ta' effiċjenza għolja Robert Bosch GmbH b'HED. L-alternatur ta' effiċjenza għolja b'HED juża disinni ottimizzati tal-komponenti u dijodi b'effiċjenza għolja. Minbarra t-teknoloġija ġdida tad-dijodi tal-HED, l-alternatur tal-Applikant huwa aktar effiċjenti meta mqabbel mal-alternatur ta' bażi minħabba l-karatteristiċi li ġejjin: it-tnaqqis tat-telf fil-ħadid permezz tal-ottimizzazzjoni tal-azzar u tal-laminazzjoni, l-ottimizzazzjoni tat-tul tal-ħadid u tas-sezzjoni trasversali tas-snien, l-ottimizzazzjoni tal-arja maqbuda bejn ir-rotor u l-istator u l-ottimizzazzjoni tal-kompartiment tal-poli tar-rotor bi struttura claw-pole, u l-ottimizzazzjoni tar-reżistenza ta' fażi. Għaldaqstant, din it-teknoloġija hija differenti mill-alternaturi ta' ġenerazzjoni effiċjenti l-oħrajn, approvati bħala ekoinnovazzjoni bid-Deċiżjoni ta' Implimentazzjoni tal-Kummissjoni 2013/341/UE (4) u d-Deċiżjoni ta' Implimentazzjoni tal-Kummissjoni 2014/465/UE (5).

(5)

L-applikazzjoni Nru 2 tirreferi għall-alternatur ta' effiċjenza għolja Robert Bosch GmbH b'SAR. L-alternatur ta' effiċjenza għolja b'SAR għandu effiċjenza ta' mill-inqas 78 %. Iż-żieda fl-effiċjenza prinċipali tinkiseb bl-introduzzjoni tar-rettifikazzjoni attiva bl-użu ta' MOSFET, jiġifieri b'użu ta' teknoloġija ta' tranżister semikonduttur ossidumetalliku b'effett tal-kamp. Barra minn hekk, l-alternatur ta' effiċjenza għolja b'SAR tal-Applikant huwa aktar effiċjenti meta mqabbel mal-alternatur ta' bażi minħabba l-karatteristiċi li ġejjin: it-tnaqqis tat-telf fil-ħadid permezz tal-ottimizzazzjoni tal-azzar u tal-laminazzjoni, l-ottimizzazzjoni tat-tul tal-ħadid u tas-sezzjoni trasversali tas-snien, l-ottimizzazzjoni tal-arja maqbuda bejn ir-rotor u l-istator u l-ottimizzazzjoni tal-kompartiment tal-poli tar-rotor bi struttura claw-pole, u l-ottimizzazzjoni tar-reżistenza ta' fażi. Għaldaqstant, din it-teknoloġija hija differenti mill-alternaturi ta' ġenerazzjoni effiċjenti l-oħrajn, approvati bħala ekoinnovazzjoni bid-Deċiżjoni ta' Implimentazzjoni 2013/341/UE u d-Deċiżjoni ta' Implimentazzjoni 2014/465/UE, u mill-alternatur ta' effiċjenza għolja b'HED skont l-applikazzjoni Nru 1.

(6)

Il-Kummissjoni ssib li l-informazzjoni pprovduta fiż-żewġ applikazzjonijiet turi li l-kundizzjonijiet u l-kriterji msemmija fl-Artikolu 12 tar-Regolament (KE) Nru 443/2009 u fl-Artikoli 2 u 4 tar-Regolament ta' Implimentazzjoni (UE) Nru 725/2011 intlaħqu.

(7)

L-Applikant wera li ż-żewġ alternaturi ta' effiċjenza għolja tat-tip deskritt f'din l-applikazzjoni ma kinux jaqbżu t-3 % tal-karozzi ġodda tal-passiġġieri rreġistrati fis-sena ta' referenza 2009.

(8)

Sabiex jiġi ddeterminat l-iffrankar ta' CO2 li t-teknoloġija innovattiva se tagħti meta vettura tiġi mgħammra biha, jinħtieġ li tiġi ddefinita l-vettura ta' referenza li magħha se tiġi mqabbla l-effiċjenza tal-vettura mgħammra bit-teknoloġija innovattiva, kif previst fl-Artikoli 5 u 8 tar-Regolament ta' Implimentazzjoni (UE) Nru 725/2011. Il-Kummissjoni ssib li jixraq li alternatur b'effiċjenza ta' 67 % jitqies bħala teknoloġija ta' referenza xierqa fil-każ li t-teknoloġija innovattiva tiġi installata fuq tip ta' vettura ġdida. Meta l-alternaturi effiċjenti Robert Bosch GmbH jiġu installati fuq tip ta' vettura eżistenti, it-teknoloġija ta' referenza għandha tkun l-alternatur tal-verżjoni l-aktar reċenti ta' dak it-tip imqiegħed fis-suq.

(9)

Fiż-żewġ applikazzjonijiet l-Applikant ipprovda metodoloġija għall-ittestjar tat-tnaqqis tas-CO2 li tinkludi formuli li huma konsistenti mal-formuli deskritti fil-Linji Gwida Tekniċi għall-metodu ssimplifikat fir-rigward tal-alternaturi effiċjenti. Il-Kummissjon tqis li l-metodoloġija tal-ittestjar se tipprovdi riżultati tal-ittestjar li huma verifikabbli, ripetibbli u komparabbli u li hija kapaċi turi b'mod realistiku l-benefiċċji rigward l-emissjonijiet tas-CO2 tat-teknoloġija innovattiva b'sinifikat statistiku b'saħħtu skont l-Artikolu 6 tar-Regolament ta' Implimentazzjoni (UE) Nru 725/2011.

(10)

Il-Kummissjoni tinnota li l-metodoloġija tal-ittestjar u l-formuli użati mill-Applikant għall-kalkolu tal-iffrankar tas-CO2 fiż-żewġ każijiet huma identiċi fl-aspetti kollha mal-metodoloġija speċifikata fl-Anness tad-Deċiżjoni ta' Implimentazzjoni 2013/341/UE. Għaldaqstant, il-Kummissjoni tqis li l-metodoloġija speċifikata fid-Deċiżjoni ta' Implimentazzjoni 2013/341/UE għandha tintuża biex jiġi ddeterminat it-tnaqqis fl-emissjonijiet tas-CO2 dovut għall-użu tal-alternatur ta' effiċjenza għolja b'HED Robert Bosch GmbH u tal-alternatur b'effiċjenza għolja b'SAR Robert Bosch GmbH.

(11)

Fid-dawl ta' dan, il-Kummissjoni ssib li l-Applikant wera b'mod sodisfaċenti li t-tnaqqis fl-emissjonijiet miksub permezz tat-teknoloġija innovattiva huwa tal-anqas 1 g CO2/km.

(12)

Il-Kummissjoni tinnota li l-iffrankar taż-żewġ teknoloġiji innovattivi jista' jintwera parzjalment permezz taċ-ċiklu tat-test standard, u li l-iffrankar totali finali li jrid jiġi ċċertifikat għandu għalhekk jiġi ddeterminat skont it-tieni subparagrafu tal-Artikolu 8(2) tar-Regolament ta' Implimentazzjoni (UE) Nru 725/2011.

(13)

Il-Kummissjoni ssib li fiż-żewġ każijiet, ir-rapport ta' verifika tħejja mit-TÜV SÜD Industrie Service GmbH, li huwa korp indipendenti u ċċertifikat, u li r-rapport jappoġġa s-sejbiet stabbiliti fl-applikazzjonijiet.

(14)

Fid-dawl ta' dan, il-Kummissjoni ma ssib l-ebda oġġezzjoni fir-rigward tal-approvazzjoni taż-żewġ teknoloġiji innovattivi inkwistjoni.

(15)

Bl-għan li jiġi ddeterminat il-kodiċi tal-ekoinnovazzjoni ġenerali li jrid jintuża fid-dokumenti tal-approvazzjoni tat-tip rilevanti skont l-Annessi I, VIII u IX tad-Direttiva 2007/46/KE tal-Parlament Ewropew u tal-Kunsill (6), għandhom jiġu speċifikati l-kodiċijiet individwali li jridu jintużaw għat-teknoloġija innovattiva approvata permezz ta' din id-Deċiżjoni ta' Implimentazzjoni.

(16)

Kwalunkwe manifattur li jixtieq jibbenefika minn tnaqqis tal-emissjonijiet medji speċifiċi tas-CO2 tiegħu sabiex jilħaq il-mira ta' emissjonijiet speċifiċi tiegħu permezz tal-iffrankar tas-CO2 bl-użu tat-teknoloġija innovattiva approvata permezz ta' din id-Deċiżjoni ta' Implimentazzjoni, għandu, skont l-Artikolu 11(1) tar-Regolament ta' Implimentazzjoni (UE) Nru 725/2011, jirreferi għal din id-Deċiżjoni fl-applikazzjoni tiegħu għal ċertifikat tal-approvazzjoni tat-tip KE għall-vetturi kkonċernati,