(1)

Għat-twettiq tal-kompiti speċifiċi li jikkonċernaw il-politiki relatati mas-superviżjoni prudenzjali ta' istituzzjonijiet ta' kreditu, kif mogħtija lill-Bank Ċentrali Ewropew (BĊE) mir-Regolament (UE) Nru 1024/2013, il-BĊE juża l-applikazzjonijiet elettroniċi, sistemi, pjattaformi u servizzi tas-Sistema Ewropea ta' Banek Ċentrali (SEBĊ) u tal-Eurosistema, kif ukoll l-applikazzjonijiet elettroniċi, sistemi, pjattaformi u servizziġodda speċifiċi għat-twettiq tal-kompiti fdati lill-BĊE skont ir-Regolament (UE) Nru 1024/2013 fuq il-bażi tal-Artikolu 127(6) tat-Trattat u l-Artikolu 25.2 tal-Istatut tas-Sistema Ewropew tal-Banek Ċentrali u tal-Bank Ċentrali Ewropew.

(2)

Huwa neċessarju għall-funzjonament bla xkiel, effettiv u konsistenti tal-Mekkaniżmu Superviżorju Uniku (MSU) l-arranġamenti prattiċi għall-kooperazzjoni bejn il-BĊE u l-awtoritajiet nazzjonali kompetenti (ANK) fi ħdan l-MSU jkunu jinkludu arranġamenti għall-użu ta' dawk l-applikazzjonijiet elettroniċi, sistemi, pjattaformi u servizzi li jkunu meħtieġa għat-twettiq tar-responsabbiltajietr tagħhom taħt ir-Regolament (UE) Nru 1024/2013.

(3)

L-infrastruttura taċ-ċavetta pubblika għas-Sistema Ewropea ta' Banek Ċentrali (iktar 'il quddiem is-“SEBĊ-PKI”) ġiet stabbilita permezz tad-Deċiżjoni BĊE/2013/1 (2). Skont l-Artikolu 3(1) tad-Deċiżjoni BĊE/2013/1, l-applikazzjonijiet elettroniċi, sistemi, pjattaformi u servizzi tas-SEBĊ u tal-Eurosistema bi kritikalità ta' livell medju jew 'il fuq mill-medju għandhom jiġu aċċessati u użati biss jekk utent ikun ġie awtentikat permezz ta' ċertifikat elettroniku maħruġ u mmaniġġjat minn awtorità għaċ-ċertifikazzjoni aċċettata mis-SEBĊ skont il-qafas ta' aċċettazzjoni taċ-ċertifikati SEBĊ/MSU, mill-awtorità ta' ċertifikazzjoni tas-SEBĊ-PKI jew minn awtoritajiet għaċ-ċertifikazzjoni aċċettati mis-SEBĊ għal TARGET2 u TARGET2 Securities għal dawk iż-żewġ applikazzjonijiet.

(4)

Il-Kunsill Governattiv identifika l-ħtieġa għal servizzi avvanzati għas-sigurtà tal-informazzjoni, bħal awtentikazzjoni b'saħħitha, firem elettroniċi u kriptaġġ, bl-użu ta' ċertifikati elettroniċi għall-applikazzjonijiet elettroniċi, sistemi, pjattaformi u servizzi li huma meħtieġa għat-twettiq tar-responsabbiltajiet tal-BĊE u tal-ANK, bħala awtoritajiet kompetenti fi ħdan l-MSU, taħt ir-Regolament (UE) Nru 1024/2013. Għaldaqstant, ċertifikati maħruġa mis-SEBĊ-PKI jistgħu jintużaw għall-aċċess u l-użu ta' applikazzjonijiet elettroniċi, sistemi, pjattaformi u servizzi użati għall-funzjonament tal-MSU.

(5)

Il-BĊE u l-ANK tal-MSU jistgħu jiddeċiedu li jużaw ċertifikati u servizzi pprovduti mis-SEBĊ-PKI biex jaċċessaw u jużaw l-applikazzjonijiet elettroniċi, sistemi, pjattaformi u servizzi,

1.

“awtorità nazzjonali kompetenti” (ANK) tfisser awtorità nazzjonali kompetenti maħtura minn Stat Membru parteċipanti skont l-Artikolu 2(2) tar-Regolament (UE) Nru 1024/2013. Din it-tifsira hija mingħajr preġudizzju għall-arranġamenti taħt il-liġi nazzjonali li jassenjaw ċerti kompiti superviżorji lil bank ċentrali nazzjonali (BĊN) li ma jkunx innominat bħala ANK. Fir-rigward ta' dawn l-arranġamenti, referenza għal ANK f'din id-Deċiżjoni għandha tirreferi wkoll għall-BĊN fir-rigward tal-kompiti superviżorji assenjati lilu bil-liġi nazzjonali;

2.

“awtorità kompetenti” tfisser jew ANK jew il-BĊE;

3.

“applikazzjonijiet elettroniċi, sistemi, pjattaformi u servizzi tas-SEBĊ u tal-Eurosistema”, “ċertifikat” jew “ċertifikat elettroniku”, “awtorità għaċ-ċertifikazzjoni tas-SEBĊ-PKI”, “awtorità għar-reġistrazzjoni”, “utent”, “bank ċentrali tal-Eurosistema” u “parti dipendenti” għandhom it-tifsiriet iddefiniti fl-Artikolu 1 tad-Deċiżjoni BĊE/2013/1;

4.

“applikazzjonijiet elettroniċi, sistemi, pjattaformi u servizzi tal-MSU” tfisser applikazzjonijiet elettroniċi, sistemi, pjattaformi u servizzi li jintużaw għat-twettiq tar-responsabbiltajiet tal-BĊE u tal-ANK taħt ir-Regolament (UE) Nru 2014/2013;

5.

“Qafas ta' aċċettazzjoni taċ-ċertifikati tas-SEBĊ/MSU” tfisser il-kriterji stabbiliti mill-Kumitat tat-Teknoloġija tal-Informazzjoni tas-SEBĊ sabiex jiġu identifikati l-awtoritajiet għaċ-ċertifikazzjoni, kemm interni kif ukoll esterni għas-SEBĊ, li jistgħu jiġu fdati b'rabta mas-SEBĊ u applikazzjonijiet elettroniċi, sistemi, pjattaformi u servizzi tas-SEBĊ u tal-Eurosistema u b'rabta ma' applikazzjonijiet elettroniċi, sistemi, pjattaformi u servizzi tal-MSU.