(1)

Il-Bord Uniku ta' Riżoluzzjoni (il-Bord) ġie stabbilit skont ir-Regolament (UE) Nru 806/2014 u fdat bl-applikazzjoni tad-dispożizzjonijiet uniformi stabbiliti minn dan ir-Regolament u bl-amministrazzjoni tal-Fond Uniku għar-Riżoluzzjoni. L-Artikolu 58 ta' dan ir-Regolament jipprovdi li l-Bord jkollu baġit awtonomu li mhuwiex parti mill-baġit tal-Unjoni.

(2)

L-Artikolu 65(3) tar-Regolament (UE) Nru 806/2014 jipprovdi li l-Bord jiddetermina u jiġbor il-kontribuzzjonijiet għall-infiq amministrattiv tal-Bord li huma dovuti minn kull entità msemmija fl-Artikolu 2 ta' dan ir-Regolament. Dawn l-entitajiet huma istituzzjonijiet ta' kreditu stabbiliti fl-Istati Membri parteċipanti skont it-tifsira tal-Artikolu 2 tar-Regolament tal-Kunsill (UE) Nru 1024/2013 (2) u l-impriżi prinċipali, id-ditti tal-investiment u l-istituzzjonijiet finanzjarji stabbiliti fl-Istati Membri parteċipanti, fejn huma suġġetti għal superviżjoni konsolidata mwettqa mill-Bank Ċentrali Ewropew (BĊE) skont l-Artikolu 4(1)(g) tar-Regolament (UE) Nru 1024/2013. Fergħat, li huma stabbiliti fi Stati Membri parteċipanti, ta' istituzzjonijiet ta' kreditu stabbiliti fi Stati Membri mhux parteċipanti ma għandhomx ikunu koperti minn dan ir-Regolament.

(3)

Skont l-Artikolu 59 tar-Regolament (UE) Nru 806/2014, il-kontribuzzjonijiet għall-infiq amministrattiv tal-Bord jikkostitwixxu d-dħul ta' Parti 1 tal-baġit tal-Bord u jkopru l-infiq ta' Parti 1 tal-baġit, li tinkludi tal-inqas ir-remunerazzjoni tal-persunal, l-infiq amministrattiv, infrastrutturali, l-infiq tat-taħriġ professjonali u operazzjonali.

(4)

Fl-2014 il-Bord mhux se jkollu l-infrastruttura dedikata u l-kapaċità operazzjonali biex jiġbor kontribuzzjonijiet biex ikopri l-infiq amministrattiv tiegħu għall-2014 u l-2015 mill-entitajiet kollha msemmija fl-Artikolu 2 tar-Regolament (UE) Nru 806/2014. Madankollu, fl-2014 il-Bord se jkun jeħtieġ li jiġbor id-dħul meħtieġ biex jiffinanzja Parti 1 tal-baġit tiegħu biex ikopri l-infiq amministrattiv tiegħu għal dawk is-sentejn. L-infiq amministrattiv tal-Bord għas-snin 2014 u 2015 tal-perjodu provviżorju huwa stmat għal EUR 22 miljun.

(5)

Għandha tiġi prevista soluzzjoni temporanja biex tippermetti lill-Bord jiġbor kontribuzzjonijiet biex ikopri l-infiq amministrattiv tiegħu għall-2014 u 2015 filwaqt li jiġi żgurat li l-kalkolu u l-ġbir tal-kontribuzzjonijiet jistgħu jitwettqu bir-riżorsi limitati ħafna tal-Bord u fi żmien qasir ħafna. Dan għandu jkun possibbli permezz l-istabbiliment li l-kalkolu u l-ġbir tal-kontribuzzjonijiet biex ikopru l-infiq amministrattiv tal-Bord huma mwettqa abbażi ta' approċċ ta' żewġ fażijiet: sistema provviżorja waqt l-ewwel stadji tal-eżistenza tal-Bord u sistema finali.

(6)

Huma biss dawk l-entitajiet li ġew notifikati mill-BĊE, fl-ogħla livell ta' konsolidazzjoni fi ħdan l-Istati Membri parteċipanti, bid-deċiżjoni tal-BĊE li jitqiesu sinifikanti skont it-tifsira tal-Artikolu 6(4) tar-Regolament (UE) Nru 1024/2013 u skont l-Artikolu 147(1) tar-Regolament (UE) Nru 468/2014 tal-Bank Ċentrali Ewropew (BĊE/2014/17) (3) u li ġew imsemmija fil-lista ppubblikata fuq il-websajt tal-BĊE fl-4 ta' Settembru 2014, iżda esklużi dawk l-entitajiet sinifikanti li huma sussidjarji ta' gruppi diġà meqjusa (“entitajiet sinifikanti”), li għandhom javvanzaw l-ammont sħiħ ta' pagamenti biex ikopru l-infiq amministrattiv tal-Bord matul il-perjodu provviżorju. L-entitajiet li jkunu meqjusa bħala sinifikanti u notifikati bħala tali mill-BĊE bejn il-5 ta' Settembru 2014 u tmiem il-perjodu provviżorju ma għandhomx ikunu suġġetti għall-obbligu ta' ħlas ta' pagamenti fuq il-kontribuzzjonijiet. Għal dan l-għan, għandha tiġi stabbilita sistema provviżorja ta' pagamenti fuq il-kontribuzzjonijiet (“pagamenti”) li se tippermetti lill-Bord biex jiġbor, matul l-perjodu provviżorju, pagamenti minn entitajiet sinifikanti biex ikopri l-infiq tiegħu.

(7)

Din is-sistema provviżorja hija proporzjonata minħabba li l-entitajiet li se jħallsu bin-nifs jirrappreżentaw madwar 85 % tal-assi totali tal-istituzzjonijiet ta' kreditu koperti mir-Regolament (UE) Nru 806/2014 u huma faċilment identifikabbli. F'din il-fażi preliminari, tali metodu għall-kalkolu u l-ġbir ta' pagamenti għandu jinvolvi l-inqas piż amministrattiv possibbli kemm għall-Bord kif ukoll għall-entitajiet konċernati.

(8)

Ladarba l-Bord ikollu l-istruttura u l-kapaċità operattivi neċessarji, il-Kummissjoni se tadotta sistema finali ta' kontribuzzjonijiet amministrattivi li abbażi tagħhom il-kontribuzzjonijiet se jiġu kkalkolati u miġbura.

(9)

Skont is-sistema finali, il-kontribuzzjonijiet tal-entitajiet imsemmija fl-Artikolu 2 tar-Regolament (UE) Nru 806/2014 jiġu kkalkulati u miġbura skont ir-regoli finali. Il-kontribuzzjonijiet tal-entitajiet sinifikanti koperti mis-sistema provviżorja għandhom jiġu vvalutati mill-ġdid biex jitqiesu l-ammonti mħallsa minnhom skont din is-sistema provviżorja.

(10)

Kull differenza bejn il-pagamenti mħallsa abbażi tas-sistema provviżorja u l-kontribuzzjonijiet ikkalkolati skont is-sistema finali għandha tiġi saldata mal-kalkolu tal-kontribuzzjonijiet biex ikopru l-infiq amministrattiv tal-Bord għas-sena ta' wara t-tmiem tal-perjodu provviżorju.

(11)

Sabiex il-Bord isir operattiv sal-1 ta' Jannar 2015, kif meħtieġ mill-Artikolu 98(1) tar-Regolament (UE) Nru 806/2014, u biex jibda jwettaq il-kompiti elenkati fl-Artikolu 99(3) ta' dan ir-Regolament, huwa urġenti li jiġi stabbilit mekkaniżmu sempliċi u effettiv li jista' jiġi implimentat malajr u faċilment matul l-istadju inizjali ta' eżistenza tal-Bord li jippermettilu li jkollu l-mezzi finanzjarji neċessarji biex jistabbilixxi l-istruttura organizzazzjonali tiegħu u jimpjega l-persunal meħtieġ biex iwettaq il-kompiti tiegħu skont dan ir-Regolament,

(a)

sistema provviżorja ta' pagamenti fuq il-kontribuzzjonijiet biex ikopru l-infiq amministrattiv tal-Bord matul il-perjodu provviżorju;

(b)

il-metodoloġija għall-kalkolu tal-pagamenti li għandhom jiġu miġbura bil-quddiem minn kull entità sinifikanti biex ikopru l-infiq amministrattiv tal-Bord matul il-perjodu provviżorju;

(c)

il-proċedura u l-modalitajiet għall-ġbir tal-pagamenti msemmija fil-punt b) mill-Bord;

(d)

l-arranġamenti għad-diferiment tal-kalkolu u l-ġbir tal-kontribuzzjonijiet dovuti minn entitajiet imsemmija fl-Artikolu 2 tar-Regolament (UE) Nru 806/2014 ħlief entitajiet sinifikanti biex ikopru nfiq amministrattiv tal-Bord matul il-perjodu provviżorju;

(e)

l-arranġamenti biex jiġu aġġustati l-kontribuzzjonijiet dovuti mill-entitajiet sinifikanti għall-infiq amministrattiv tal-Bord wara l-perjodu provviżorju biex titqies kull differenza bejn il-pagamenti mħallsa bil-quddiem abbażi ta' dik is-sistema provviżorja u l-kontribuzzjonijiet dovuti għall-perjodu provviżorju tas-sistema finali.

(a)

“pagamenti” jew “pagamenti fuq kontribuzzjonijiet” tfisser il-pagamenti fuq kontribuzzjonijiet li għandhom jinġabru mill-Bord skont dan ir-Regolament biex ikopru l-infiq amministrattiv tal-Bord matul il-perjodu provviżorju;

(b)

“infiq amministrattiv tal-Bord” tfisser l-infiq tal-Parti I tal-baġit tal-Bord matul il-perjodu provviżorju;

(c)

“assi totali” tfisser il-valur totali ta' assi derivati mill-approprjazzjoni “assi totali” fuq il-karta bilanċjali konsolidata, fejn rilevanti, tal-entità sinifikanti kif irrappurtat skont il-liġi rilevanti tal-Unjoni għal skopijiet prudenzjali mill-31 ta' Diċembru 2013 jew mid-data ta' rappurtar applikabbli għas-sena finanzjarja 2013, jekk is-sena finanzjarja tintemm f'data aktar tard mill-31 ta' Diċembru;

(d)

“entitajiet sinifikanti” tfisser l-entitajiet li ġew notifikati mill-BĊE, fl-ogħla livell ta' konsolidazzjoni fl-Istati Membri parteċipanti, bid-deċiżjoni tal-BĊE li jitqiesu sinifikanti skont it-tifsira tal-Artikolu 6(4) tar-Regolament (UE) Nru 1024/2013 u skont l-Artikolu 147(1) tar-Regolament (UE) Nru 468/2014, u li ġew imsemmija fil-lista ppubblikata fuq il-websajt tal-BĊE fl-4 ta' Settembru 2014, iżda esklużi dawk l-entitajiet sinifikanti li huma sussidjarji ta' gruppi diġà meqjusa f'din id-definizzjoni, u fergħat, li huma stabbiliti fi Stati Membri parteċipanti, ta' istituzzjonijiet ta' kreditu stabbiliti fi Stati Membri mhux parteċipanti;

(e)

“avviż ta' pagament” tfisser avviż li jindika l-ammont tal-pagament għall-kontribuzzjoni li jinġabar bil-quddiem, maħruġ lil kull entità sinifikanti rilevanti skont dan ir-Regolament;

(f)

“perjodu provviżorju” tfisser perjodu li jibda fid-19 ta' Awwissu 2014 u jispiċċa fil-31 ta' Diċembru 2015, jew li jintemm fil-jum tal-applikazzjoni tas-sistema finali tal-kontribuzzjonijiet amministrattivi adottati mill-Kummissjoni skont l-Artikolu 65(5)(a) tar-Regolament (UE) Nru 806/2014, skont liem wieħed ikun l-aktar tard;

(g)

“awtorità kompetenti” tfisser awtorità kompetenti kif definita fl-Artikolu 4(2)(i) tar-Regolament (UE) Nru 1093/2010 (4).