REGOLAMENT TA' IMPLIMENTAZZJONI TAL-KUMMISSJONI (UE) Nru 1090/2014

tas-16 ta' Ottubru 2014

li japprova l-permetrina bħala sustanza attiva eżistenti għall-użu fil-prodotti bijoċidali għall-prodotti tat-tipi 8 u 18

(Test b'rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 528/2012 tal-Parlament Ewropew u tal-Kunsill tat-22 ta' Mejju 2012 dwar it-tqegħid fis-suq u l-użu tal-prodotti bijoċidali (1), u partikolarment it-tielet subparagrafu tal-Artikolu 89(1) tiegħu,

Billi:

(1)	Ir-Regolament tal-Kummissjoni (KE) Nru 1451/2007 (2) jistabbilixxi lista ta' sustanzi attivi li għandhom jiġu vvalutati bil-ħsieb li possibbilment jiġu inklużi fl-Anness I, IA jew IB tad-Direttiva 98/8/KE tal-Parlament Ewropew u tal-Kunsill (3). Dik il-lista tinkludi l-permetrina.

(2)

Il-permetrina ġiet evalwata f'konformità mal-Artikolu 90(2) tar-Regolament (UE) Nru 528/2012 għall-użu fi prodotti bijoċidali tat-tip ta' prodott 8, preservattivi tal-injam, u t-tip ta' prodott 18, insettiċidi, akariċidi u prodotti biex jikkontrollaw artropodi oħrajn, kif definit fl-Anness V tar-Regolament (UE) Nru 528/2012.

(3)	L-Irlanda ġiet magħżula bħala l-Awtorità Kompetenti tal-evalwazzjoni u ssottomettiet ir-rapporti ta' valutazzjoni, flimkien mar-rakkomandazzjonijiet tagħha, lill-Kummissjoni fis-7 ta' Diċembru 2010 f'konformità mal-paragrafi 4 u 6 tal-Artikolu 14 tar-Regolament tal-Kummissjoni (KE) Nru 1451/2007.

(4)	L-opinjoni tal-Aġenżija Ewropea għas-Sustanzi Kimiċi ġiet ifformulata fit-8 ta' April 2014 mill-Kumitat tal-Prodotti Bijoċidali, fid-dawl tal-konklużjonijiet tal-Awtorità Kompetenti tal-evalwazzjoni.

(5)

Skont dawk l-opinjonijiet, prodotti bijoċidali użati għall-prodotti tat-tip 8 u 18 u li fihom il-permetrina huma mistennija li jissodisfaw ir-rekwiżiti stabbiliti fl-Artikolu 5 tad-Direttiva 98/8/KE tal-Parlament Ewropew u tal-Kunsill bil-kundizzjoni li jiġu ssodisfati ċerti speċifikazzjonijiet u kundizzjonijiet marbuta mal-użu tagħhom.

(6)	Għalhekk jixraq li l-użu tal-permetrina fil-prodotti bijoċidali għall-prodotti tat-tip 8 u 18 jiġi approvat soġġett għall-konformità ma' ċerti speċifikazzjonijiet u kundizzjonijiet.

(7)	Billi l-evalwazzjonijiet ma indirizzawx in-nanomaterjali, l-approvazzjonijiet ma għandhomx ikopru tali materjali skont l-Artikolu 4(4) tar-Regolament (UE) Nru 528/2012.

(8)	Għandu jitħalla jgħaddi perjodu ta' żmien raġonevoli qabel ma sustanza attiva tiġi approvata, sabiex il-partijiet interessati jkunu jistgħu jippreparaw lilhom infushom biex jissodisfaw ir-rekwiżiti l-ġodda li jirriżultaw.

(9)	Il-miżuri stipulati f'dan ir-Regolament huma skont l-opinjoni tal-Kumitat Permanenti dwar il-Prodotti Bijoċidali,

ADOTTAT DAN IR-REGOLAMENT:

Artikolu 1

Il-permetrina għandha tiġi approvata bħala sustanza attiva għall-użu fil-prodotti bijoċidali għall-prodotti tat-tip 8 u 18, soġġett għall-ispeċifikazzjonijiet u l-kundizzjonijiet stabbiliti fl-Anness.

Artikolu 2

Dan ir-Regolament għandu jidħol fis-seħħ fl-għoxrin jum wara l-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, is-16 ta' Ottubru 2014.

Għall-Kummissjoni

Il-President

José Manuel BARROSO

(1) ĠU L 167, 27.6.2012, p. 1.

(2) Ir-Regolament tal-Kummissjoni (KE) Nru 1451/2007 tal-4 ta' Diċembru 2007 dwar it-tieni fażi tal-programm ta' ħidma ta' 10 snin imsemmi fl-Artikolu 16(2) tad-Direttiva 98/8/KE tal-Parlament Ewropew u tal-Kunsill rigward it-tqegħid fis-suq ta' prodotti bijoċidali (ĠU L 325, 11.12.2007, p. 3).

(3) Id-Direttiva 98/8/KE tal-Parlament Ewropew u tal-Kunsill tas-16 ta' Frar 1998 dwar it-tqegћid fis-suq tal-prodotti bijoċidali (ĠU L 123, 24.4.1998, p. 1).

ANNESS

Isem Komuni

Isem tal-IUPAC

Numri tal-Identifikazzjoni

Grad minimu ta' purità tas-sustanza attiva (1)

Data tal-approvazzjoni

Data tal-iskadenza tal-approvazzjoni

Tip ta' prodott

Kundizzjonijiet speċifiċi (2)

Permetrina

Isem tal-IUPAC:

3-fenossibenżil (1RS,3RS;1RS,3SR)-3-(2,2-diklorovinil)-2,2-dimetilċiklopropankarbossilat

Nru tal-KE: 258-067-9

Nru tal-CAS: 52645-53-1

Il-proporzjon cis:trans huwa 25:75.

930 g/kg

L-1 ta' Mejju 2016

It-30 ta' April 2026

Il-valutazzjoni tal-prodott għandha tagħti attenzjoni partikolari għall-esponimenti, ir-riskji u l-effikaċja marbuta ma' kwalunkwe użu kopert minn applikazzjoni għall-awtorizzazzjoni, iżda mhux indirizzat fil-valutazzjoni tar-riskju fil-livell tal-Unjoni tas-sustanza attiva.

Għall-prodotti bijoċidali l-awtorizzazzjonijiet huma soġġetti għall-kundizzjonijiet li ġejjin:

(1)	Għandhom jiġu stabbiliti proċeduri operattivi sikuri u miżuri organizzativi adegwati għall-utenti industrijali jew professjonali. Fejn l-esponiment ma jistax jitnaqqas għal livell aċċettabbli b'mezzi oħra, il-prodotti għandhom jintużaw b'tagħmir personali protettiv xieraq.

(2)

Għandhom jittieħdu l-miżuri xierqa għat-tnaqqis tar-riskju sabiex il-kompartimenti tal-ħamrija u dawk akwatiċi jkunu protetti. B'mod partikolari, it-tikketti, u fejn ikunu pprovduti, l-iskedi tad-dejta dwar is-sikurezza tal-prodotti awtorizzati għandhom jindikaw li l-applikazzjoni industrijali għandha titwettaq f'żona iżolata jew fuq bażi iebsa impermeabbli b'sistemi ta' iżolament, li hekk kif l-injam jiġi ttrattat jinħażen taħt għata jew fuq bażi iebsa impermeabbli, jew it-tnejn, biex jiġu evitati rilaxxi diretti fil-ħamrija jew fl-ilma, u li kull rilaxx mill-applikazzjoni tal-prodott għandu jinġabar għall-użu mill-ġdid jew għar-rimi.

(3)	Il-prodotti ma għandhomx jiġu awtorizzati għal injam li jkun spiss fl-apert sakemm ma tiġix sottomessa dejta li turi li l-prodott se jissodisfa r-rekwiżiti tal-Artikolu 19 u tal-Anness VI tar-Regolament (UE) Nru 528/2012, jekk meħtieġ bl-applikazzjoni ta' miżuri xierqa għat-tnaqqis tar-riskji.

(4)

Il-prodotti ma għandhomx jiġu awtorizzati għal trattament ta' kostruzzjonijiet fuq barra ħdejn jew fuq l-ilma, jew għat-trattament tal-injam li jkun se jintuża għal kostruzzjonijiet fuq barra ħdejn jew fuq l-ilma, sakemm ma tiġix sottomessa dejta li turi li l-prodott mhux se jippreżenta riskji inaċċettabbli, jekk meħtieġ bl-applikazzjoni ta' miżuri xierqa għat-tnaqqis tar-riskji.

Għall-oġġetti ttrattati, japplikaw il-kundizzjonijiet li ġejjin: Fejn oġġett ittrattat ikun ġie ttrattat bil-permetrina jew ikun jinkorporaha intenzjonalment, u fejn ikun meħtieġ minħabba l-possibbiltà ta' kuntatt mal-ġilda kif ukoll tar-rilaxx tal-permetrina f'kundizzjonijiet normali tal-użu, il-persuna responsabbli għat-tqegħid tal-oġġett fis-suq għandha tiżgura li t-tikketta tagħti tagħrif dwar ir-riskju ta' sensitizzazzjoni tal-ġilda, kif ukoll it-tagħrif imsemmi fit-tieni subparagrafu tal-Artikolu 58(3) tar-Regolament (UE) Nru 528/2012.

Għall-prodotti bijoċidali l-awtorizzazzjonijiet huma soġġetti għall-kundizzjonijiet li ġejjin:

(1)	Għandhom jiġu stabbiliti proċeduri operattivi sikuri u miżuri organizzativi adegwati għall-utenti industrijali jew professjonali. Fejn l-esponiment ma jistax jitnaqqas għal livell aċċettabbli b'mezzi oħra, il-prodotti għandhom jintużaw b'tagħmir personali protettiv xieraq.

(2)

Għandhom jittieħdu l-miżuri xierqa għat-tnaqqis tar-riskju sabiex il-kompartimenti tal-ħamrija u dawk akkwatiċi jkunu protetti. It-tikketti u, fejn provdut, l-iskedi tad-dejta tas-sikurezza tal-prodotti awtorizzati għandhom jindikaw it-tali miżuri meħtieġa. B'mod partikolari, il-prodotti awtorizzati għall-applikazzjoni tal-fibri tessili jew materjali oħrajn biex jikkontrollaw il-ħsara mill-insetti għandhom jindikaw li l-fibri trattati friski u materjali oħrajn adattati għandhom jinħażnu bħala prevenzjoni minn rilaxxi diretti fil-ħamrija jew fl-ilma, u li kwalunkwe rilaxx mill-applikazzjoni tal-prodott għandu jinġabar għall-użu mill-ġdid jew rimi.

Għall-oġġetti ttrattati, japplikaw il-kundizzjonijiet li ġejjin:

Fejn oġġett ittrattat ikun ġie ttrattat bil-permetrina jew ikun jinkorporaha intenzjonalment, u fejn ikun meħtieġ minħabba l-possibbiltà ta' kuntatt mal-ġilda kif ukoll tar-rilaxx tal-permetrina f'kundizzjonijiet normali tal-użu, il-persuna responsabbli għat-tqegħid tal-oġġett fis-suq għandha tiżgura li t-tikketta tagħti tagħrif dwar ir-riskju ta' sensitizzazzjoni tal-ġilda, kif ukoll it-tagħrif imsemmi fit-tieni subparagrafu tal-Artikolu 58(3) tar-Regolament (UE) Nru 528/2012.

(1) Il-purità indikata f'din il-kolonna kienet il-grad minimu ta' purità tas-sustanza attiva użat għall-evalwazzjoni li saret f'konformità mal-Artikolu 8 tar-Regolament (UE) Nru 528/2012. Is-sustanza attiva fil-prodott imqiegħed fis-suq jista' jkollha l-istess purità jew purità differenti jekk ikun ġie ppruvat li hija teknikament ekwivalenti għas-sustanza attiva evalwata.

(2) Għall-implimentazzjoni tal-prinċipji komuni tal-Anness VI tar-Regolament (UE) Nru 528/2012, il-kontenut u l-konklużjonijiet tar-rapporti tal-valutazzjoni jinsabu fuq is-sit tal-Kummissjoni: http://ec.europa.eu/environment/chemicals/biocides/index_en.htm