REGOLAMENT TAL-KUMMISSJONI (UE) Nru 218/2014

tas-7 ta’ Marzu 2014

li jemenda l-Annessi tar-Regolamenti (KE) Nru 853/2004 u (KE) Nru 854/2004 tal-Parlament Ewropew u tal-Kunsill u r-Regolament (KE) Nru 2074/2005

(Test b’relevanza għaż-ŻEE)

IL-KUMMISSJONI EWROPEA

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (KE) Nru 853/2004 tal-Parlament Ewropew u tal-Kunsill tad-29 ta’ April 2004 li jistabbilixxi ċerti regoli speċifiċi ta’ iġjene għall-ikel li joriġina mill-annimali (1), u b’mod partikolari l-Artikolu 10(1) tiegħu,

Wara li kkunsidrat ir-Regolament (KE) Nru 854/2004 tal-Parlament Ewropew u tal-Kunsill tad-29 ta’ April 2004 li jippreskrivi regoli speċifiċi għall-organizzazzjoni ta’ kontrolli uffiċjali fuq prodotti li joriġinaw mill-annimali maħsuba għall-konsum uman (2), b’mod partikolari l-Artikolu 17(1) u l-punti 3 u 10 and l-Artikolu 18 tiegħu,

Billi:

(1)

Ir-Regolament (KE) Nru 853/2004 jistabbilixxi regoli speċifiċi ta’ iġjene għall-ikel li joriġina mill-annimali għal operaturi tan-negozji tal-ikel. B’mod partikolari, skont l-Anness II ta’ dak ir-Regolament l-operaturi kummerċjali li joperaw il-biċċeriji għandhom jesiġu, jingħataw, jiċċekkjaw u jaġixxu fid-dawl tal-informazzjoni tal-katina alimentari u dan jgħodd għall-annimali kollha mibgħuta jew maħsuba biex jintbagħtu lejn il-biċċerija, għajr l-annimali tal-kaċċa selvaġġi. Informazzjoni bħal din tinkludi l-istatus tal-ażjenda li minnha jkunu ġejjin.

(2)

Ir-Regolament tal-Kummissjoni (UE) Nru 216/2014 tas-7 ta’ Marzu 2014 li jemenda r-Regolament (KE) Nru 2075/2005 li jispeċifika regoli speċifiċi dwar kontrolli uffiċjali għat-Trichinella fil-laħam (3) jagħti deroga mid-dispożizzjonijiet tal-ittestjar lill-azjendi li japplikaw kundizzjonijiet kontrollati ta’ abitazzjoni. Tali informazzjoni għandha għalhekk tiġi inkluża fl-informazzjoni dwar il-katina tal-ikel li għandha tingħata lill-biċċerija, sabiex tippermetti lill-Istati Membri japplikaw ir-reġim xieraq tal-ittestjar għat-Trichinella.

(3)

Ir-Regolament (KE) Nru 853/2004 jistipula l-kundizzjonijiet li skonthom il-laħam minn annimali li jinqatlu b’emerġenza f’post ieħor barra l-biċċerija, huwa tajjeb għall-konsum mill-bniedem. Billi laħam minn qtil b’emerġenza li għadda b’suċċess l-ispezzjoni tal-laħam, ma jikkostitwixxix riskju għas-saħħa pubblika, ir-rekwiżit għal marka speċjali tas-sanità u r-restrizzjoni għas-suq nazzjonali għal-laħam tal-qatla ta’ emerġenza għandu jitħassar minn dak ir-Regolament u r-rekwiżit għal marka speċjali tas-sanità għal-laħam tal-qatla ta’ emerġenza għandu jitħassar ukoll mir-Regolament (KE) Nru 854/2004.

(4)

Ir-Regolament (KE) Nru 854/2004 jippreskrivi regoli speċifiċi għall-organizzazzjoni ta’ kontrolli uffiċjali fuq il-prodotti li joriġinaw mill-annimali. B’mod partikolari, l-Anness I ta’ dak ir-Regolament jistipula regoli għall-ispezzjonijiet ante-mortem u post-mortem, inkluż l-ispezzjonijiet viżwali, u għal perikli speċifiċi fil-laħam frisk.

(5)

Ir-Regolament (KE) Nru 854/2004 jistipula li l-veterinarju uffiċjali jista’ jiġi megħjun minn uffiċjali awżiljarji waqt il-kontrolli uffiċjali sakemm jitħarsu ċerti restrizzjonijiet. F’dak li għandu x’jaqsam ma’ spezzjoni ante-mortem u kontrolli li jikkonċernaw il-benesseri tal-annimali, l-uffiċjali awżiljarji għandhom jingħataw permess li jgħinu lill-veterinarju uffiċjali fil-preselezzjoni ta’ annimali b’anormalitajiet.

(6)

L-Awtorità Ewropea dwar is-Sigurtà fl-Ikel (EFSA) adottat fit-3 ta’ Ottubru 2011 Opinjoni Xjentifika dwar perikli tas-saħħa pubblika li għandhom ikunu koperti permezz ta’ spezzjoni ta’ laħam (majjali) (4), li kkonkludiet li l-palpazzjonijiet u l-inċiżjonijiet attwalment meħtieġa fl-ispezzjonijiet post-mortem, jinvolvu riskju ta’ kontaminazzjoni minn post għall-ieħor. Biex tiġi evitatata l-kontaminazzjoni minn post għall-ieħor, dawn il-palpazzjonijiet u l-inċiżjonijiet m’għandhomx jinħtieġu aktar għal annimali normali, iżda biss meta jiġu identifikati xi anormalitajiet. F’dik l-opinjoni l-EFSA tidentifika li l-patoġeni li jikkawżaw l-endokardite fil-majjali mhumiex rilevanti għas-saħħa pubblika. Billi l-inċiżjoni rutina tal-qalb mhijiex meħtieġa għal raġunijiet ta’ sigurtà, m’għandhiex tkun meħtieġa aktar.

(7)	Fl-istess opinjoni, l-EFSA tidentifika s-Salmonella bħala ta’ riskju għoli għas-saħħa pubblika relatat mal-konsum ta’ laħam tal-majjal, u tirrakkomanda li tiġi evitata l-kontaminazzjoni tal-karkassi tal-majjali bis-Salmonella.

(8)

Fil-Kapitolu IX tat-Taqsima IV tal-Anness I tar-Regolament (KE) Nru 854/2004, huma stabbiliti dispożizzjonijiet dwar il-ħidmiet tal-veterinarju uffiċjali għal perikli speċifiċi. Is-Salmonella għandha wkoll tkun soġġetta għal ħidma speċifika tal-veterinarju uffiċjali, b’mod partikolari f’każ ta’ nuqqas ta’ konformità ma’ leġiżlazzjoni speċifika tal-Unjoni. B’mod partikolari, is-superviżjoni tal-kriterju eżistenti dwar l-iġjene fl-ipproċessar għas-Salmonella fuq il-karkassi, stipulat fir-Regolament tal-Kummissjoni (KE) Nru 2073/2005 tal-15 ta’ Novembru 2005 dwar il-kriterji mikrobijoloġiċi għall-prodotti tal-ikel (5) u l-infurzar ta’ azzjoni mill-operatur tan-negozju tal-ikel f’każ ta’ nuqqas ta’ konformità ma’ leġiżlazzjoni speċifika tal-Unjoni, għandhom jiġu integrati fl-ispezzjonijiet tal-laħam tal-majjal. Is-superviżjoni tipprovdi wkoll għodda kosteffiċjenti biex tipprovdi l-informazzjoni dwar il-monitoraġġ mandatorju tas-Salmonella fil-katina tal-produzzjoni tal-laħam tal-majjal skont id-Direttiva 2003/99/KE tal-Parlament Ewropew u tal-Kunsill tas-17 ta’ Novembru 2003 rigward il-monitoraġġ taż-żoonożi u tal-aġenti żoonotiċi, li temenda d-Deċiżjoni tal-Kunsill 90/424/KEE u li tħassar id-Direttiva tal-Kunsill 92/117/KEE (6).

(9)

Fir-Regolament tal-Kummissjoni (KE) Nru 2074/2005 tal-5 ta’ Diċembru 2005 li jistabbilixxi miżuri ta’ implimentazzjoni għal ċerti prodotti taħt ir-Regolament (KE) Nru 853/2004 tal-Parlament Ewropew u tal-Kunsill u għall-organizzazzjoni ta’ kontrolli uffiċjali taħt ir-Regolament (KE) Nru 854/2004 tal-Parlament Ewropew u tal-Kunsill u r-Regolament (KE) Nru 882/2004 tal-Parlament Ewropew u tal-Kunsill, li jidderoga mir-Regolament (KE) Nru 852/2004 tal-Parlament Ewropew u tal-Kunsill u li jemenda r-Regolamenti (KE) Nru 853/2004 u (KE) Nru 854/2004 (7), huma stipulati regoli speċifiċi għall-ispezzjoni fakultattiva viżwali post mortem tal-majjali. L-emendi proposti fir-Regolament preżenti tar-rekwiżiti standard tal-ispezzjoni viżwali post mortem fir-Regolament (KE) Nru 854/2004 irendu r-rekwiżiti għal ispezzjonijiet fakultattivi viżwali post mortem tal-majjali stipulati fir-Regolament (KE) Nru 2074/2005 irrilevanti għall-majjali u konsegwentement dawk ir-rekwiżiti għandhom jiġu emendati.

(10)	Ir-rekwiżiti previsti fir-Regolament jinvolvu adattament ta’ prattiki kurrenti kemm għall-operaturi tan-negozji tal-ikel kif ukoll għall-awtoritajiet kompetenti. Huwa għalhekk xieraq li jkun permess dewmien fl-applikazzjoni ta’ dan ir-Regolament.

(11)	Ir-Regolamenti (KE) Nru 853/2004, (KE) Nru 854/2004 u (KE) Nru 2074/2005 għandhom, għalhekk, jiġu emendati kif xieraq.

(12)	Il-miżuri stipulati f’dan ir-Regolament huma skont l-opinjoni tal-Kumitat Permanenti dwar il-Katina Alimentari u s-Saħħa tal-Annimali, u la l-Parlament Ewropew u lanqas il-Kunsill ma opponewhom,

ADOTTAT DAN IR-REGOLAMENT:

Artikolu 1

Emendi għar-Regolament (KE) Nru 853/2004

Ir-Regolament (KE) Nru 853/2004 huwa emendat kif ġej:

(1)

Il-punt 3(a) tat-Taqsima III tal-Anness II jiġi sostitwit b’dan li ġej:

“(a)

l-istatus tal-ażjenda li minnha jkunu ġejjin l-annimali jew l-istatus reġjonali tas-saħħa tal-annimali, u jekk l-azjenda hijiex uffiċjalment rikonoxxuta biex tapplika kundizzjonijiet ikkontrollati ta’ abitazzjoni fir-rigward tat-Trichinella skont il-punt A tal-Kapitolu I tal-Anness IV għar-Regolament tal-Kummissjoni (KE) Nru 2075/2005 (*1);

(*1) ĠU L 338, 22.12.2005, p. 60.” "

(2)	Fil-Kapitolu VI tat-Taqsima I tal-Anness III, il-punt 9 jitħassar.

Artikolu 2

Emendi għar-Regolament (KE) Nru 854/2004

L-Anness I tar-Regolament (KE) Nru 854/2004 huwa emendat kif ġej:

(1)	Fil-Kapitolu III tat-Taqsima I, il-punt 7 jitħassar.

(2)

Fil-Kapitolu I tat-Taqsima III, il-Punt 2 jinbidel b’dan li ġej:

“2.	f’dak li għandu x’jaqsam ma’ spezzjonijiet ante-mortem u kontrolli li jikkonċernaw il-benesseri tal-annimali, l-uffiċjali awżiljarji jistgħu jgħinu biss f’xogħlijiet purament prattiċi li jistgħu jinkludu l-preselezzjoni ta’ annimali b’anormalitajiet;”

(3)

Fil-Parti B tal-Kapitolu IV tat-Taqsima IV, il-Punti 1 u 2 jinbidlu b’dan li ġej:

“1.

Karkassi u interjuri ta’ majjali għandhom jgħaddu mill-proċeduri ta’ spezzjonijiet post-mortem li ġejjin:

(a)	spezzjoni viżwali tar-ras u l-gerżuma; spezzjoni viżwali tal-ħalq, il-fawċi u l-ilsien;

(b)	spezzjonijiet viżwali tal-pulmuni, tat-trakea u l-esofagu;

(c)	spezzjoni viżwali tal-perikardju u tal-qalb;

(d)	spezzjoni viżwali tal-dijaframma;

(e)	spezzjoni viżwali tal-fwied u tal-glandoli żgħar limfatiċi epatiċi u pankreatiċi (Lnn. portales);

(f)	spezzjoni viżwali tal-passaġġ gastro intestinali, tal-glandoli żgħar limfatiċi gastriċi u mesenteriċi (Lnn.gastrici, mesenterici, craniales u caudales);

(g)	spezzjoni viżwali tal-dijaframma;

(h)	spezzjoni viżwali tal-kliewi;

(i)	spezzjoni viżwali tal-pleura u tal-peritoneum;

(j)	sezzjoni viżwali tal-organi ġenitali (ħlief għall-pene, jekk diġà mormija);

(k)	spezzjoni viżwali tal-beżżula u tal-glandoli żgħar limfatiċi tagħha;

(l)	spezzjoni viżwali tar-reġjun umbelikali u tal-ġogi ta’ annimali żgħar;

Meta d-dejta epidemjoloġika jew dejta oħra mill-azjenda tal-oriġini tal-annimali, it-tagħrif dwar il-katina alimentari jew is-sejbiet ta’ spezzjoni ante-mortem, u/jew id-detezzjoni viżwali post-mortem ta’ anormalitajiet rilevanti jindikaw riskji possibbli għas-saħħa pubblika, is-saħħa tal-annimali u l-benessri tal-annimali, il-karkassi u l-ġewwieni tal-majjali għandhom jgħaddu minn aktar proċeduri post-mortem bl-użu ta’ inċiżjoni u palpazzjoni. Skont ir-riskji li jiġu identifikati, dawn il-proċeduri jistgħu jinkludu:

(a)	l-inċiżjoni u l-eżaminazzjoni tal-glandoli żgħar limfatiċi submaxillari (Lnn. mandibulares);

(b)

il-palpazzjoni tal-pulmuni u tal-glandoli żgħar limfatiċi tal-bronki u medjastinali (Lnn. bifurcationes, eparteriales u mediastinales); It-trakea u l-fergħat ewlenija tal-bronki għandhom jinfetħu mit-tul u l-pulmuni għandhom jiġu inċiżi fit-tielet posterjuri, perpendikolari għall-axxi prinċipali tagħhom; dawn l-inċiżjonijiet mhumiex neċessarji meta l-pulmuni huma esklużi mill-konsum uman;

(c)	l-inċiżjoni tal-qalb mit-tul b’mod li jinfetħu l-ventrikoli u l-qatgħa tgħaddi mis-septum interventrikulari;

(d)	il-palpazzjoni tal-fwied u l-glandoli żgħar limfatiċi tiegħu;

(e)	il-palpazzjoni u, jekk neċessarju, l-inċiżjoni tal-glandoli żgħar limfatiċi gastriċi u mesenteriċi;

(f)	il-palpazzjoni tal-milsa;

(g)	l-inċiżjoni tal-kliewi u tal-glandoli żgħar limfatiċi renali (Lnn. renales);

(h)	l-inċiżjoni tal-glandoli żgħar limfatiċi supramammarji;

(i)	il-palpazzjoni tar-reġjun umbelikali u tal-ġogi ta’ annimali żgħar u, jekk tinħtieġ, l-inċiżjoni tar-reġjun umbelikali u l-ftuħ tal-ġogi.”

(4)

Fil-Kapitolu IX tat-Taqsima IV, il-Parti G li ġejja hija miżjuda:

“G. Salmonella

Bla ħsara għall-ewwel paragrafu tal-Artikolu 1 tar-Regolament tal-Kummissjoni (KE) Nru 2073/2005 (*2), l-awtorità kompetenti għandha tivverifika l-implimentazzjoni korretta min-naħa ta’ operaturi tan-negozju tal-ikel tal-punt 2.1.4 (il-kriterju tal-proċess tal-iġjene għas-Salmonella fuq il-karkassi tal-majjal) tal-Anness I ta’ dak ir-Regolament billi tapplika l-miżuri li ġejjin:

(a)

it-teħid uffiċjali ta’ kampjuni bl-użu tal-istess metodu u żona tal-ikkampjunar bħall-operaturi tan-negozju tal-ikel. Mill-inqas 49 (*3) kampjun każwali għandhom jittieħdu f’kull biċċerija kull sena. Dan in-numru ta’ kampjuni jista’ jitnaqqas għall-biċċeriji żgħar abbażi tal-evalwazzjoni tar-riskji; u/jew

(b)	il-ġbir tal-informazzjoni kollha dwar in-numru totali u l-għadd ta’ kampjuni pożittivi ta’ Salmonella meħuda mill-operaturi kummerċjali tal-ikel skont l-Artikolu 5(5) tar-Regolament (KE) Nru 2073/2005, u fi ħdan il-qafas tal-punt 2.1.4 tal-Anness I tiegħu; u/jew

(c)

il-ġbir tal-informazzjoni kollha dwar in-numru totali u l-għadd ta’ kampjuni pożittivi ta’ Salmonella meħuda fil-qafas tal-programmi ta’ kontroll nazzjonali fi Stati Membri jew reġjuni ta’ Stati Membri li għalihom il-garanziji speċjali jkunu ġew approvati skont l-Artikolu 8 tar-Regolament (KE) Nru 853/2004 fir-rigward tal-produzzjoni tal-majjal;

Jekk il-kriterju tal-proċess tal-iġjene ma jitħarisx f’diversi okkażjonijiet, l-awtorità kompetenti għandha titlob pjan ta’ azzjoni mill-operatur tan-negozju tal-ikel ikkonċernat u tissorvelja strettament l-eżitu tiegħu.

In-numru totali u l-għadd ta’ kampjuni tas-Salmonella pożittivi, li jiddifferenzjaw bejn kampjuni meħuda skont 1(a), (b) u (c), meta l-miżura tkun ġiet applikata, għandhom jiġu rrappurtati skont l-Artikolu 9(1) tad-Direttiva 2003/99/KE tal-Parlament Ewropew u tal-Kunsill (*4).

(*2) ĠU L 338, 22.12.2005, p. 1."

(*3) Jekk kollha jkunu negattivi, tingħata ċertezza statistika ta’ 95 % jekk il-prevalenza tkun inqas minn 6 %."

(*4) ĠU L 325, 12.12.2003, p. 31.” "

Artikolu 3

Emendi għar-Regolament (KE) Nru 2074/2005

Fil-Punt 3 tal-Anness VIb tar-Regolament (KE) Nru 2074/2005, il-punt (a) jitħassar.

Artikolu 4

Dħul fis-seħħ

Dan ir-Regolament għandu jidħol fis-seħħ fl-għoxrin jum wara l-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan għandu japplika mill-1 ta’ Ġunju 2014.

Madankollu, il-Parti G (3) tal-Kapitolu IX tat-Taqsima IV tal-Anness I tar-Regolament (KE) Nru 854/2004 għandha tapplika sa mill-1 ta’ Jannar 2015.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, is-7 ta’ Marzu 2014.

Għall-Kummissjoni

Il-President

José Manuel BARROSO

(1) ĠU L 139, 30.4.2004, p. 55.

(2) ĠU L 139, 30.4.2004, p. 206.

(3) Ara paġna 85 ta’ dan il-Ġurnal Uffiċjali.

(4) EFSA Journal 2011; 9 (10): 2351.

(5) ĠU L 338, 22.12.2005, p. 1.

(6) ĠU L 325, 12.12.2003, p. 31.

(7) ĠU L 338, 22.12.2005, p. 27.