(1)

Ir-Regolament tal-Kummissjoni (KE) Nru 2073/2005 (2) jistabbilixxi l-kriterji mikrobijoloġiċi għal ċerti mikro-organiżmi u r-regoli ta’ implimentazzjoni li l-operaturi tan-negozju tal-ikel iridu jikkonformaw magħhom b’rabta mar-rekwiżiti ġenerali u speċifiċi tal-iġjene msemmija fl-Artikolu 4 tar-Regolament (KE) Nru 852/2004, u b’mod partikolari kriterju tal-iġjene tal-proċess għas-Salmonella li jitwettaq fuq il-karkassi tal-ħnieżer sabiex tiġi kkontrollata l-kontaminazzjoni waqt il-qatla.

(2)

Fit-3 ta’ Ottubru 2011, l-Awtorità Ewropea dwar is-Sigurtà fl-Ikel (l-EFSA) adottat Opinjoni Xjentifika dwar il-perikli għas-saħħa pubblika li għandhom ikunu koperti mill-ispezzjoni tal-laħam (tal-ħnieżer) (3), li fiha tidentifika s-Salmonella bħala ħaġa ta’ riskju għoli għas-saħħa pubblika marbuta mal-konsum tal-laħam tal-ħnieżer, u tirrakkomanda l-prevenzjoni tal-kontaminazzjoni tal-karkassi tal-ħnieżer bis-Salmonella. L-EFSA tirrakkomanda, fost l-oħrajn, li jissaħħaħ il-kriterju tal-iġjene tal-proċess għas-Salmonella li jitwettaq fuq il-karkassi tal-ħnieżer.

(3)

Sabiex titnaqqas il-prevalenza tas-Salmonella fil-karkassi tal-ħnieżer, il-kontroll tal-iġjene waqt il-qatla għandu jissaħħaħ skont id-dispożizzjonijiet mogħtija fir-Regolament (UE) Nru 218/2014 li jemenda l-Annessi tar-Regolamenti (KE) Nru 853/2004 tal-Parlament Ewropew u tal-Kunsill u (KE) Nru 854/2004 tal-Parlament Ewropew u tal-Kunsill u r-Regolament (KE) Nru 2074/2005 (4), u b’hekk l-għadd ta’ kampjuni pożittivi għandu jitnaqqas.

(4)

Ir-rekwiżiti stipulati fir-Regolament jinvolvu l-adattament tal-prattiki attwali tal-operaturi tan-negozju tal-ikel. Għaldaqstant huwa xieraq li jkun permess dewmien fl-applikazzjoni ta’ dan ir-Regolament.

(5)

Għalhekk, ir-Regolament (KE) Nru 2073/2005 għandu jiġi emendat kif xieraq.

(6)

Il-miżuri stipulati f’dan ir-Regolament huma skont l-opinjoni tal-Kumitat Permanenti dwar il-Katina Alimentari u s-Saħħa tal-Annimali, u la l-Parlament Ewropew u lanqas il-Kunsill ma opponihom,