DIRETTIVA 2014/64/UE TAL-PARLAMENT EWROPEW U TAL-KUNSILL

tal-15 ta’ Mejju 2014

li temenda d-Direttiva tal-Kunsill 64/432/KEE fir-rigward tad-databases tal-kompjuter li huma parti min-netwerks ta’ sorveljanza fl-Istati Membri

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u partikolarment l-Artikolu 43(2) tiegħu,

Wara li kkunsidraw il-proposta mill-Kummissjoni Ewropea,

Wara li l-abbozz tal-att leġiżlattiv intbagħat lill-parlamenti nazzjonali,

Wara li kkunsidraw l-opinjoni tal-Kumitat Ekonomiku u Soċjali Ewropew (1),

Filwaqt li jaġixxu skont il-proċedura leġiżlattiva ordinarja (2),

Billi:

(1)

Id-Direttiva tal-Kunsill 64/432/KEE (3) tapplika għall-kummerċ fl-Unjoni tal-annimali bovini u suwini. Din tistipula li l-awtorità kompetenti fi Stat Membru tista’ tintroduċi sistema ta’ netwerks ta’ sorveljanza. Dawk in-netwerks jinkludu database tal-kompjuter li għandu jkun fiha, bħala minimu, għadd ta’ elementi stipulati fid-Direttiva 64/432/KEE, inkluż il-kodiċi tal-identifikazzjoni ta’ kull annimal.

(2)

Ir-Regolament (KE) Nru 1760/2000 tal-Parlament Ewropew u tal-Kunsill (4) jistabbilixxi sistema għall-identifikazzjoni u r-reġistrazzjoni ta’ annimali bovini. Jirrikjedi bħala regola ġenerali li ż-żewġ mezzi ta’ identifikazzjoni uffiċjali allokati lil annimal jkollhom l-istess kodiċi ta’ identifikazzjoni. Madankollu, waqt il-fazi tal-aġġustament tal-bidu għall-użu ta’ identifikaturi elettroniċi bħala mezz ta’ identifikazzjoni uffiċjali, ma jistax jiġi eskluż li f’xi każijiet, limitazzjonijiet tekniċi relatati mal-konfigurazzjoni tal-kodiċi ta’ identifikazzjoni oriġinali ta’ annimal jistgħu jimpedixxu r-riproduzzjoni ta’ dak il-kodiċi fuq identifikatur elettroniku. Dan jista’ jiġri fejn il-karattri li jiffurmaw il-kodiċi ta’ identifikazzjoni eżistenti ta’ annimal jimpedixxu li dak il-kodiċi jiġi konvertit f’format elettroniku. Għalhekk, ir-Regolament (KE) Nru 1760/2000 jipprevedi derogi transitorji speċifiċi li jippermettu l-użu ta’ identifikatur elettroniku anke għal dawk l-annimali, dment li tkun żgurata traċċabilità sħiħa u li l-annimali jistgħu jiġu identifikati individwalment, inkluż l-istabbiliment fejn twieldu. Il-possibbiltà li jintużaw tali identifikaturi elettroniċi għandha tiġi riflessa fil-lista ta’ elementi tad-databases tal-kompjuter stipulati fid-Direttiva 64/432/KEE.

(4)	Biex ikun hemm konsistenza fil-leġiżlazzjoni tal-Unjoni, it-tip ta’ identifikatur elettroniku, jekk ikun applikat għall-annimali għandu wkoll jiżdied mal-lista ta’ elementi li għandhom jiġu inklużi fid-databases tal-kompjuter stipulati fid-Direttiva 64/432/KEE.

(5)	Għalhekk, id-Direttiva 64/432/KEE għandha tiġi emendata skont dan,

ADOTTAW DIN ID-DIRETTIVA:

Artikolu 1

Fil-parti C tal-Artikolu 14(3), tad-Direttiva 64/432/KEE, il-punt (1) huwa sostitwit b’dan li ġej:

“(1)

għal kull annimal:

—	il-kodiċi uniku jew kodiċijiet uniċi ta’ identifikazzjoni, fir-rigward tal-każijiet spjegati fl-Artikoli 4(1), 4b, 4c(1) u 4d tar-Regolament (KE) Nru 1760/2000 tal-Parlament u tal-Kunsill (*1),

—	id-data tat-twelid,

—

is-sess,

—	ir-razza jew il-kulur,

—	il-kodiċi ta’ identifikazzjoni tal-omm jew, fil-każ ta’ annimal impurtat minn pajjiż terz, il-kodiċi uniku ta’ identifikazzjoni tal-mezz individwali ta’ identifikazzjoni allokat lill-annimal mill-Istat Membru tad-destinazzjoni skont ir-Regolament (KE) Nru 1760/2000,

—	in-numru ta’ identifikazzjoni tal-istabbiliment fejn twieled,

—	in-numri ta’ identifikazzjoni tal-istabbilimenti kollha fejn inżamm l-annimal u d-dati ta’ kull bidla ta’ stabbiliment,

—	id-data tal-mewt jew tal-qtil,

—	it-tip ta’ identifikatur elettroniku, jekk applikat lill-annimal.

(*1) Regolament (KE) Nru 1760/2000 tal-Parlament Ewropew u tal-Kunsill tas-17 ta’ Lulju 2000 li jistabbilixxi sistema għall-identifikazzjoni u r-reġistrazzjoni tal-bhejjem tal-fart u dwar it-tikkettjar tal-laħam taċ-ċanga u tal-prodotti tal-laħam taċ-ċanga u li jħassar ir-Regolament tal-Kunsill (KE) Nru 820/97 (ĠU L 204, 11.8.2000, p. 1).”."

Artikolu 2

1. Sat-18 ta’ Jannar 2016, l-Istati Membri għandhom għandhom idaħħlu fis-seħħil-liġijiet, ir-regolamenti u d-dispożizzjonijiet amministrattivi neċessarji għall-konformità ma’ din id-Direttiva. Huma għandhom jgħarrfu bihom lill-Kummissjoni minnufih.

Huma għandhom japplikaw dawk il-miżuri mit-18 ta’ Lulju 2019.

Meta l-Istati Membri jadottaw dawk il-miżuri, dawn għandhom jinkludu referenza għal din id-Direttiva jew għandhom ikunu akkumpanjati b’tali referenza fl-okkażjoni tal-pubblikazzjoni uffiċjali tagħhom. Il-metodi ta’ kif għandha ssir tali referenza għandhom jiġu stipulati mill-Istati Membri.

2. L-Istati Membri għandhom jikkomunikaw lill-Kummissjoni t-test tad-dispożizzjonijiet ewlenin tad-dritt nazzjonali li jadottaw fil-qasam kopert minn din id-Direttiva.

Artikolu 3

Din id-Direttiva għandha tidħol fis-seħħ għoxrin jum wara li tiġi ppubblikata f’Il-Ġurnal Uffiċjali tal-Unjoni Ewropea.

Artikolu 4

Din id-Direttiva hija indirizzata lill-Istati Membri.

Magħmul fi Brussell, il-15 ta’ Mejju 2014.

Għall-Parlament Ewropew

Il-President

M. SCHULZ

Għall-Kunsill

Il-President

D. KOURKOULAS

(1) ĠU C 43, 15.2.2012, p. 64.

(2) Pożizzjoni tal-Parlament Ewropew tat-2 ta’ April 2014 (għadha mhijiex ippubblikata fil-Ġurnal Uffiċjali) u deċiżjoni tal-Kunsill tas- 6 ta’ Mejju 2014.

(3) Direttiva tal-Kunsill 64/432/KEE tas-26 ta’ Ġunju 1964 dwar il-problemi tas-saħħa tal-annimali li jaffettwaw il-kummerċ ta’ annimali bovini u suwini ġewwa l-Komunità (ĠU 121, 29.7.1964, p. 1977/64).

(4) Regolament (KE) Nru 1760/2000 tal-Parlament Ewropew u tal-Kunsill tas-17 ta’ Lulju 2000 li jistabbilixxi sistema għall-identifikazzjoni u reġistrazzjoni ta’ annimali bovini u dwar it-tikkettjar ta’ ċanga u prodotti taċ-ċanga u jħassar ir-Regolament tal-Kunsill (KE) Nru 820/97 (ĠU L 204, 11.8.2000, p. 1).