9.1.2014

Il-Ġurnal Uffiċjali tal-Unjoni Ewropea

L 4/67

DIRETTIVA TA’ DELEGA TAL-KUMMISSJONI 2014/12/UE

tat-18 ta’ Ottubru 2013

li temenda, għal skopijiet ta’ adattament għall-progress tekniku, l-Anness IV tad-Direttiva 2011/65/UE tal-Parlament Ewropew u tal-Kunsill fir-rigward ta’ eżenzjoni għal ċomb fi stann fuq bordijiet ta’ ċirkwiti stampati tad-ditekters u l-unitajiet tal-akkwist tad-dejta għal Tomografi tal-Emissjoni tal-Pożitroni li jkunu integrati f’tagħmir tar-Ritratti bir-Reżonanza Manjetika

(Test b’relevanza għaż-ŻEE)

IL-KUMMISSJONI EWROPEA

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva 2011/65/UE tal-Parlament Ewropew u tal-Kunsill tat-8 ta’ Ġunju 2011 dwar ir-restrizzjoni tal-użu ta’ ċerti sustanzi perikolużi fit-tagħmir elettriku u elettroniku (1), u b’mod partikolari l-Artikolu 5(1)(a) tagħha,

Billi:

(1)	Id-Direttiva 2011/65/UE tipprojbixxi l-użu taċ-ċomb fit-tagħmir elettriku u elettroniku mqiegħed fis-suq.

(2)

Fit-tomografi tal-emissjoni tal-pożitroni integrati fit-tagħmir tar-ritratti bir-reżonanza manjetika jkun hemm vibrazzjonijiet qawwija. Ir-riċerka wriet li l-istann mingħajr ċomb li sarulu testijiet għas-suxxettibbiltà għall-vibrazzjonijiet huwa iktar vulnerabbli għal falliment qabel iż-żmien fil-kundizzjonijiet ta’ vibrazzjonijiet kbar milli r-rabtiet li jsiru bl-istann tal-landa/ċomb. Il-kundizzjonijiet speċifiċi u r-restrizzjonijiet ġeometriċi tat-tagħmir jirrestrinġu l-applikabilità tal-miżuri mekkaniċi li jistgħu jeliminaw jew inaqqsu biżżejjed l-effetti tal-vibrazzjonijiet intensi.

(3)	Is-sostituzzjoni jew l-eliminazzjoni taċ-ċomb bħalissa ma hija la xjentifikament u lanqas teknikament prattikabbli. Tinħtieġ eżenzjoni temporanja biex tagħti lill-manifatturi biżżejjed żmien għar-riċerka biex jidentifikaw materjali u disinni xierqa mingħajr ċomb.

(4)	Id-Direttiva 2011/65/UE għandha għalhekk tiġi emendata skont dan,

ADOTTAT DIN ID-DIRETTIVA:

Artikolu 1

L-Anness IV tad-Direttiva 2011/65/UE huwa emendat kif stipulat fl-Anness ta’ din id-Direttiva.

Artikolu 2

1. L-Istati Membri għandhom idaħħlu fis-seħħ il-liġijiet, ir-regolamenti u d-dispożizzjonijiet amministrattivi meħtieġa sabiex ikunu konformi ma’ din id-Direttiva mhux aktar tard mill-aħħar jum tas-sitt xahar wara d-dħul fis-seħħ. Huma għandhom minnufih jikkomunikaw lill-Kummissjoni t-test ta’ dawn id-dispożizzjonijiet.

Meta l-Istati Membri jadottaw dawk id-dispożizzjonijiet, dawn għandhom jirreferu għal din id-Direttiva jew ikunu akkumpanjati mit-tali referenza fil-waqt tal-pubblikazzjoni uffiċjali tagħhom. L-Istati Membri għandhom jiddeċiedu kif għandha ssir it-tali referenza.

2. L-Istati Membri għandhom jikkomunikaw lill-Kummissjoni t-test tad-dispożizzjonijiet ewlenin tal-liġi nazzjonali li huma jaddottaw fil-qasam kopert minn din id-Direttiva.

Artikolu 3

Din id-Direttiva għandha tidħol fis-seħħ fl-għoxrin jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.

Artikolu 4

Din id-Direttiva hija indirizzata lill-Istati Membri.

Magħmul fi Brussell, it-18 ta’ Ottubru 2013.

Għall-Kummissjoni

Il-President

José Manuel BARROSO

(1) ĠU L 174, 1.7.2011, p. 88.

ANNESS

Fl-Anness IV tad-Direttiva 2011/65/UE, jiżdied il-punt 32 li ġej:

“32.	Ċomb fi stann fuq bordijiet ta’ ċirkwiti stampati tad-ditekters u l-unitajiet tal-akkwist tad-dejta għal Tomografi tal-Emissjoni tal-Pożitroni li jkunu integrati f’tagħmir tar-Ritratti bir-Reżonanza Manjetika. Tiskadi fil-31 ta’ Diċembru 2019.”