(1)

L-Artikolu 53 tar-Regolament (KE) Nru 882/2004 jagħti s-setgħa lill-Kummissjoni li tirrakkomanda pjanijiet ta’ kontroll ikkoordinati fejn tqis li huma meħtieġa, organizzati fuq bażi ad hoc, b’mod partikolari bil-ħsieb li tistabbilixxi l-prevalenza tal-perikli fl-għalf, fl-ikel u fl-annimali.

(2)

Id-Direttiva 2000/13/KE tal-Parlament Ewropew u tal-Kunsill (2) tistabbilixxi r-regoli tal-Unjoni dwar it-tikkettar tal-ikel applikabbli għall-oġġetti kollha tal-ikel.

(3)

Skont id-Direttiva 2000/13/KE, it-tikkettar u l-metodi użati ma għandhomx iqarrqu bil-konsumatur, b’mod partikolari fir-rigward tal-karatteristiċi tal-ikel, inkluż in-natura proprja u l-identità tiegħu. Barra minn hekk, fin-nuqqas ta’ regoli nazzjonali jew speċifiċi tal-Unjoni, l-isem li taħtu qed jinbiegħ l-oġġett tal-ikel għandu jkun l-isem li normalment jinbiegħ taħtu fl-Istat Membru, jew deskrizzjoni tal-oġġett tal-ikel li hija ċara biżżejjed biex ix-xerrej ikun jaf in-natura proprja tiegħu.

(4)

L-ingredjenti kollha jridu jissemmew fuq it-tikketta tal-oġġetti tal-ikel imballaġġati minn qabel maħsuba għall-konsumatur aħħari jew il-kejterers tal-massa. B’mod partikolari, l-oġġetti tal-ikel li fihom il-laħam bħala ingredjent, meta jkunu maħsuba għall-konsumatur aħħari jew għall-kejterers tal-massa, għandhom jindikaw l-ispeċi tal-annimal li minnu joriġina l-laħam direttament fuq l-imballaġġ jew fuq tikketta mwaħħla miegħu. Jekk ingredjent jissemma fl-isem tal-oġġett tal-ikel, trid tingħata wkoll il-kwantità tiegħu espressa bħala persentaġġ fil-lista tal-ingredjenti sabiex ikun evitat li l-konsumatur jiġi mqarraq fir-rigward tal-identità u l-kompożizzjoni tal-oġġett tal-ikel.

(5)

Ir-Regolament (KE) Nru 853/2004 tal-Parlament Ewropew u tal-Kunsill (3) jistabbilixxi rekwiżiti ta’ ttikkettar addizzjonali applikabbli għal oġġetti tal-ikel speċifiċi li joriġinaw mill-annimali. B’mod partikolari, dan jistipula li l-imballaġġi maħsuba għall-provvista lill-konsumatur aħħari li fihom il-laħam ikkapuljat, fost l-oħrajn, mis-solipedi għandu jkollhom avviż li jindika li prodotti bħal dawn għandhom jissajru qabel jittieklu, jekk, u sa fejn, dan jintalab mir-regoli fl-Istat Membru fit-territorju li fih jitqiegħed il-prodott fis-suq.

(6)

B’segwitu għall-kontrolli uffiċjali li ilhom jitwettqu f’għadd ta’ Stati Membri minn Diċembru 2012, il-Kummissjoni ġiet informata li ċerti prodotti li huma imballaġġati minn qabel kien fihom il-laħam taż-żiemel, li ma kienx iddikjarat fil-lista tal-ingredjenti li tidher direttament fuq l-imballaġġ jew fuq it-tikketta mwaħħla miegħu. Minflok, l-isem ta’ ċerti oġġetti tal-ikel bħal dawn u/jew il-lista tal-ingredjenti li takkumpanjahom irreferew biss, b’mod qarrieqi, għall-preżenza taċ-ċanga.

(7)

B’konformità mal-Artikolu 17 tar-Regolament (KE) Nru 178/2002 tal-Parlament Ewropew u tal-Kunsill (4), l-operaturi tan-negozju tal-ikel f’kull stadju tal-produzzjoni, ipproċessar, u tqassim fin-negozji taħt il-kontroll tagħhom għandhom jiżguraw li l-ikel ikun jissodisfa l-ħtiġijiet tal-liġi dwar l-ikel li huma relevanti għall-attivitajiet tagħhom u għandhom jivverifikaw li dawk il-ħtiġijiet jitħarsu.

(8)

Ir-Rakkomandazzjoni tal-Kummissjoni 2013/99/UE (5) irrakkomandat li l-Istati Membri jimplimentaw pjan ta’ kontroll ikkoordinat bil-ħsieb li tiġi stabbilita l-prevalenza tal-prattiċi frawdolenti fil-kummerċjalizzazzjoni ta’ ċerti oġġetti tal-ikel għal perjodu ta’ xahar. Il-pjan ta’ kontroll ikkoordinat rakkomandat kien jikkonsisti f’żewġ azzjonijiet. L-ewwel azzjoni kienet tikkonsisti f’kontrolli xierqa mwettqa fil-livell tal-bejgħ bl-imnut u fi stabbilimenti oħra biex jiġi ddeterminat jekk il-prodotti tal-ikel imballaġġati minn qabel u l-prodotti tal-ikel mhux imballaġġati minn qabel kienx fihom laħam taż-żiemel li ma kienx ittikkettjat kif jixraq fuq l-imballaġġ jew, fil-każ ta’ oġġetti tal-ikel mhux imballaġġati minn qabel, l-informazzjoni dwar il-preżenza tiegħu ma kinitx disponibbli għall-konsumatur jew għall-kejterers tal-massa. It-tieni azzjoni kienet tikkonsisti f’kontrolli xierqa mwettqa fl-istabbilimenti li jitrattaw il-laħam taż-żiemel maħsub għall-konsum mill-bniedem, inkluż l-ikel li joriġina minn pajjiżi terzi, għad-detezzjoni tar-residwi tal-fenilbutażon.

(9)

Ir-riżultati tal-pjan ta’ kontroll ikkoordinat ikkonfermaw in-nuqqas ta’ konformità rikorrenti mal-leġiżlazzjoni applikabbli għall-ittikkettar tal-prodotti tal-laħam fil-biċċa l-kbira tal-Istati Membri. Għaldaqstant, jeħtieġ li jingħata segwitu għall-pjan ta’ kontroll ikkoordinat permezz tat-tieni sensiela ta’ kontrolli fil-livell tal-bejgħ bl-imnut u fi stabbilimenti oħra, biex jiġi ddeterminat jekk għadhomx jeżistu l-prattiki identifikati matul l-ewwel pjan ta’ kontroll ikkoordinat.

(10)

Min-naħa l-oħra, il-kontrolli uffiċjali mwettqa biex tiġi vverifikata l-preżenza ta’ residwi ta’ fenilbutażon ma wrew l-ebda nuqqas ta’ konformità rikorrenti u mifrux; jidher għalhekk li f’dan l-istadju ma hemmx bżonn jiġi rrakkomandat it-tieni sett ta’ kontrolli kkoordinati dwar din il-kwistjoni.

(11)

Matul l-ewwel pjan ta’ kontroll ikkoordinat, il-Laboratorju ta’ Referenza tal-Unjoni Ewropea għall-Proteini tal-Annimali fl-Għalf ta parir dwar l-użu ta’ metodi biex tiġi individwata l-preżenza ta’ proteini ta’ speċijiet mhux iddikjarati fil-kampjuni. Għad ma hemm l-ebda metodu vvalidat għal din l-analiżi, iżda wara konsultazzjoni mal-esperti, il-parir dwar l-użu ta’ protokoll armonizzat ġie aġġornat mil-laboratorju msemmi hawn fuq u huwa disponibbli fuq is-sit elettroniku tiegħu.

(12)

L-Istati Membri għandhom jikkomunikaw il-metodi użati, ir-riżultati tal-kontrolli u l-miżuri meħuda f’każ ta’ sejbiet pożittivi lill-Kummissjoni fi żmien perjodu stabbilit u b’format armonizzat.

(13)

Wara konsultazzjoni mal-Kumitat Permanenti dwar il-Katina Alimentari u s-Saħħa tal-Annimali,