10.7.2014   

MT

Il-Ġurnal Uffiċjali tal-Unjoni Ewropea

L 201/31

DEĊIŻJONI TA' IMPLIMENTAZZJONI TAL-KUMMISSJONI

tat-8 ta' Lulju 2014

li temenda d-Deċiżjoni ta' Implimentazzjoni 2014/178/UE fir-rigward tad-deni Afrikan tal-ħnieżer fil-Latvja

(notifikata bid-dokument C(2014) 4925)

(Test b'rilevanza għaż-ŻEE)

(2014/448/UE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva tal-Kunsill 89/662/KEE tal-11 ta' Diċembru 1989 dwar spezzjonijiet veterinarji fil-kummerċ intra-Komunitarju bil-ħsieb tat-tlestija tas-suq intern (1), u b'mod partikolari l-Artikolu 9(4) tagħha,

Wara li kkunsidrat id-Direttiva tal-Kunsill 90/425/KEE tas-26 ta' Ġunju 1990 dwar kontrolli veterinarji u żootekniċi applikabbli fil-kummerċ intra-Komunitarju f'ċerti annimali ħajjin u prodotti bil-għan li jkun hemm il-kompletar tas-suq intern (2), u partikolarment l-Artikolu 10(4) tagħha,

Wara li kkunsidrat id-Direttiva tal-Kunsill 2002/99/KE tas-16 ta' Diċembru 2002 li tistabbilixxi r-regoli sanitarji għall-annimali u li jiddeterminaw il-produzzjoni, l-ipproċessar, id-distribuzzjoni u l-introduzzjoni ta' prodotti li joriġinaw mill-annimali u li huma għall-konsum uman (3), u b'mod partikolari l-Artikolu 4(3) tagħha,

Billi:

(1)

Id-Direttiva tal-Kunsill 2002/60/KE (4) tistabbilixxi l-miżuri minimi li jridu jiġu applikati fl-Unjoni biex ikun ikkontrollat id-deni Afrikan tal-ħnieżer, fosthom il-miżuri li jridu jittieħdu meta jfaqqa' d-deni Afrikan tal-ħnieżer, b'mod partikolari meta d-deni Afrikan tal-ħnieżer ikun suspettat jew konfermat fi ħnieżer slavaġ.

(2)

Minħabba l-preżenza tad-deni Afrikan tal-ħnieżer f'ċerti Stati Membri, ġiet adottata d-Deċiżjoni ta' Implimentazzjoni tal-Kummissjoni 2014/178/UE (5). Dik id-Deċiżjoni tiddemarka u telenka żoni ristretti f'Anness differenzjata skont il-livell ta' riskju meta wieħed iqis il-qagħda epidemjoloġika. Id-Deċiżjoni tistabbilixxi regoli dwar is-saħħa tal-annimali dwar il-moviment, id-dispaċċ u l-immarkar tal-ħnieżer u ċertu prodotti tal-ħnieżer minn dawk l-Istati Membri effettwati, ħalli jkun evitat li din il-marda tixtered f'żoni oħra tal-Unjoni.

(3)

Fis-26 ta' Ġunju 2014, fil-Latvja nstab id-deni Afrikan tal-ħnieżer fi ħnieżer slavaġ, speċifikament fil-ħalluġ, għax daħal il-vajrus tad-deni Afrikan tal-ħnieżer minn pajjiżi terzi ġirien fejn tinsab din il-marda. Il-virus instab ukoll f'żewġ irziezet żgħar b'livell ta' bijosigurtà baxx fl-istess żona. Dawk it-tifqigħat, meħuda flimkien ma' każijiet fil-ħalluġ ħdejn il-fruntiera esterna tal-Unjoni, għandhom jiġu kkunsidrati fil-valutazzjoni tar-riskju rappreżentata mill-qagħda epidemjoloġika attwali. Sabiex tiffoka l-miżuri ta' kontroll u tipprevjeni t-tixrid tal-mard kif ukoll biex tipprevjeni kwalunkwe tfixkil mhux meħtieġ għall-kummerċ fl-Unjoni u biex tevita ostakli mhux ġustifikati għall-kummerċ minn pajjiżi terzi, il-lista tal-Unjoni ta' żoni infettati fil-Latvja għandha tiġi stabbilita b'mod urġenti abbażi tar-riskju li l-marda tfisser għall-Unjoni u f'ħidma mal-Istat Membru inkwistjoni.

(4)

Għaldaqstant, huwa meħtieġ li d-Deċiżjoni ta' Implimentazzjoni 2014/178/UE tiġi emendata biex it-territorji rilevanti tal-Latvja jiddaħħlu f'Parti I u Parti II tal-Anness tagħha.

(5)

Il-miżuri stipulati f'din id-Deċiżjoni huma skont l-opinjoni tal-Kumitat Permanenti dwar il-Katina Alimentari u s-Saħħa tal-Annimali,

ADOTTAT DIN ID-DEĊIŻJONI:

Artikolu 1

L-Anness tad-Deċiżjoni ta' Implimentazzjoni 2014/178/UE għandu jiġi emendat skont l-Anness ta' din id-Deċiżjoni.

Artikolu 2

Din id-Deċiżjoni hija indirizzata lill-Istati Membri.

Magħmul fi Brussell, it-8 ta' Lulju 2014.

Għall-Kummissjoni

Tonio BORG

Membru tal-Kummissjoni

(1)  ĠU L 395, 30.12.1989, p. 13.

(2)  ĠU L 224, 18.8.1990, p. 29.

(3)  ĠU L 18, 23.1.2003, p. 11.

(4)  Id-Direttiva tal-Kunsill 2002/60/KE tas-27 ta' Ġunju 2002 li tistabbilixxi miżuri għall-kontroll tad-deni Afrikan tal-qżieqeż u li temenda d-Direttiva 92/119/KEE għar-rigward tal-marda Teschen u d-deni Afrikan tal-qżieqeż (ĠU L 192, 20.7.2002, p. 27).

(5)  Id-Deċiżjoni ta' Implimentazzjoni tal-Kummissjoni 2014/178/UE tas-27 ta' Marzu 2014 dwar miżuri ta' kontroll tas-saħħa tal-annimali relatati mad-deni Afrikan tal-ħnieżer f'ċertu Stati Membri (ĠU L 95, 29.3.2014, p. 47).

ANNESS

L-Anness tad-Deċiżjoni ta' Implimentazzjoni 2014/178/UE huwa emendat kif ġej:

(1)

Fil-Parti 1, jiżdied il-punt li ġej:

“3.   Latvja

Dawn iż-żoni tal-Latvja:

 

Fin-novads ta' Rēzeknes il-pagasti ta' Stoļerovas, Griškānu, Čornajas, Lūznavas, Maltas, Feimaņu, Silmalas u Ozolaines.

 

Fin-novads ta' Riebiņi il-pagasti ta' Riebiņu, Rušonas u Silajāņu.

 

Fin-novads ta' Preiļi il-pagasti ta' Pelēču, Preiļu u Aizkalnes.

 

Fin-novads ta' Ludza il-pagasti ta' Cirmas, Pureņu, Ņukšu, Isnaudas, Pildas, Nirzas u Briģu.

 

Fin-novads ta' Zilupe il-pagasti ta' Lauderu u Zaļesjes.

 

Fin-novads ta' Daugavpils il-pagasti ta' Dubnas, Višķu, Ambeļu, Biķernieku, Naujenes, Salienas, Vecsalienas, Skrudalienas, Demenes, Laucesas, Tabores u Maļinovas.

 

In-novads kollu ta' Ciblas.”

(2)

Fil-Parti II, jiżdied il-punt li ġej:

“3.   Latvja

Dawn iż-żoni tal-Latvja:

 

Fin-novads ta' Rēzeknes il-pagasti ta' Pušas, Mākoņkalna u Kaunatas.

 

In-novads kollu ta' Dagdas.

 

Fin-novads ta' Aglonas il-pagasti ta' Šķeltovas, Grāveru u Kastuļinas.

 

In-novads kollu ta' Krāslavas.

 

Fin-novads ta' Ludza il-pagasti ta' Rundēnu u Istras.

 

Fin-novads ta' Zilupe il-pagasts ta' Pasienas.”