10.7.2014 |
MT |
Il-Ġurnal Uffiċjali tal-Unjoni Ewropea |
L 201/18 |
DEĊIŻJONI TAL-KUNSILL
tat-8 ta' Lulju 2014
dwar pożizzjoni li trid tittieħed, f'isem l-Unjoni Ewropea, fi ħdan is-Sottokumitat dwar il-Miżuri Sanitarji u Fitosanitarji stabbilit mill-Ftehim Kummerċjali bejn l-Unjoni Ewropea u l-Istati Membri tagħha, minn naħa waħda, u l-Kolombja u l-Perù, min-naħa l-oħra, fir-rigward tal-adozzjoni tar-Regoli ta' Proċedura tiegħu
(2014/443/UE)
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-ewwel subparagrafu tal-Artikolu 207(4), flimkien mal-Artikolu 218(9) tiegħu,
Wara li kkunsidra l-proposta mill-Kummissjoni Ewropea,
Billi:
(1) |
Fid-19 ta' Jannar 2009, il-Kunsill awtorizza l-Kummissjoni biex tinnegozja ftehim Kummerċjali multipartit f'isem l-Unjoni Ewropea u l-Istati Membri tagħha mal-pajjiżi Membri tal-Komunità Andina. |
(2) |
Dawn in-negozjati ġew konklużi u l-Ftehim Kummerċjali bejn l-Unjoni Ewropea u l-Istati Membri tagħha, min-naħa waħda, u l-Kolombja u l-Perù, min-naħa l-oħra (“il-Ftehim”) (1) ġie ffirmat fi Brussell fis-26 ta' Ġunju 2012. |
(3) |
Skont l-Artikolu 330(3) tal-Ftehim, il-Ftehim ġie applikat b'mod provviżorju mal-Perù mill-1 ta' Marzu 2013 u mal-Kolombja mill-1 ta' Awwissu 2013, suġġett għall-konklużjoni tiegħu f'data iktar 'il quddiem. |
(4) |
L-Artikolu 103 tal-Ftehim jistabbilixxi Sottokumitat dwar il-Miżuri Sanitarji u Fitosanitarji (minn hawn' il quddiem imsejjaħ “is-Sottokumitat SPS”) li għandu jiżgura u jimmonitorja l-implimentazzjoni tal-Kapitolu 5 tal-Ftehim, relatat mal-miżuri Sanitarji u Fitosanitarji, u jqis kull kwistjoni li tista' taffettwa l-konformità mad-dispożizzjonijiet ta' dan il-Kapitolu. Is-Sottokumitat SPS għandu jadotta r-regoli ta' proċedura ta' ħidma tiegħu fl-ewwel laqgħa tiegħu. |
(5) |
L-Unjoni għandha tiddetermina l-pożizzjoni li trid tittieħed fir-rigward tal-adozzjoni tar-Regoli ta' Proċedura tas-Sottokumitat SPS, |
ADOTTA DIN ID-DEĊIŻJONI:
Artikolu 1
Il-pożizzjoni li trid tittieħed f'isem l-Unjoni fis-Sottokumitat dwar il-Miżuri Sanitarji u Fitosanitarji (“is-Sottokumitat SPS”), stabbilit mill-Ftehim Kummerċjali bejn l-Unjoni Ewropea u l-Istati Membri tagħha, minn naħa waħda, u l-Kolombja u l-Perù, min-naħa l-oħra, fir-rigward tal-adozzjoni tar-Regoli ta' Proċedura tas-Sottokumitat SPS, għandha tkun ibbażata fuq l-abbozz tad- deċiżjoni tas-Sottokumitat SPS UE-Kolombja-Perù annessa ma' din id-Deċiżjoni.
Korrezzjonijiet tekniċi minuri fl-abbozz tad-deċiżjoni tas-Sottokumitat SPS UE-Kolombja-Perù jistgħu jiġu maqbula mir-rappreżentanti tal-Unjoni fis-Sottokumitat SPS, mingħajr deċiżjoni ulterjuri tal-Kunsill.
Artikolu 2
Din id-Deċiżjoni għandha tidħol fis-seħħ fid-data tal-adozzjoni tagħha.
Magħmul fi Brussell, it-8 ta' Lulju 2014.
Għall-Kunsill
Il-President
P. C. PADOAN
(1) ĠU L 354, 21.12.2013, p. 3.
ABBOZZ TA'
ID-DEĊIŻJONI Nru …/2014 TAS-SOTTOKUMITAT UE-KOLOMBJA-PERÙ DWAR IL-MIŻURI SANITARJI U FITOSANITARJI
ta' …
dwar l-adozzjoni tar-Regoli ta' Proċedura tas-Sottokumitat dwar il-Miżuri Sanitarji u Fitosanitarji msemmija fl-Artikolu 103 tal-Ftehim Kummerċjali bejn l-Unjoni Ewropea u l-Istati Membri tagħha, minn naħa waħda, u l-Kolombja u l-Perù, min-naħa l-oħra
IS-SOTTOKUMITAT DWAR IL-MIŻURI SANITARJI U FITOSANITARJI,
Wara li kkunsidra l-Ftehim Kummerċjali bejn l-Unjoni Ewropea u l-Istati Membri tagħha, minn naħa waħda, u l-Kolombja u l-Perù, min-naħa l-oħra (“il-Ftehim”) (1), iffirmat fi Brussell fis-26 ta' Ġunju 2012, u b'mod partikolari l-Artikolu 103 tiegħu,
Billi:
(1) |
Is-Sottokumitat dwar il-Miżuri Sanitarji u Fitosanitarji (“is-Sottokumitat MSF”) għandu jadotta r-Regoli ta' Proċedura fl-ewwel laqgħa tiegħu. |
(2) |
Is-Sottokumitat MSF għandu jiżgura u jimmonitorja l-implimentazzjoni tal-Kapitolu 5 tal-Ftehim, b'referenza għall-miżuri Sanitarji u Fitosanitarji, u jqis kull kwistjoni li tista' taffettwa l-konformità mad-dispożizzjonijiet ta' dak il-Kapitolu. |
ADOTTA DIN ID-DEĊIŻJONI:
1. |
Ir-Regoli ta' Proċedura tas-Sottokumitat MSF huma adottati kif stipulat fl-Anness għal din id-Deċiżjoni. |
2. |
Din id-Deċiżjoni tidħol fis-seħħ fi … |
Magħmul fi … nhar il-…
Għas-Sottokumitat dwar il-Miżuri Sanitarji u Fitosanitarji
Ministru għal …
Kummissarju għal
Ministru għal …
(1) ĠU L 354, 21.12.2012, p. 3.
ANNESS
REGOLI TA' PROĊEDURA TAS-SOTTOKUMITAT DWAR IL-MIŻURI SANITARJI U FITOSANITARJI STABBILITI FIL-KAPITOLU 5 TAL-FTEHIM KUMMERĊJALI BEJN L-UNJONI EWROPEA U L-ISTATI MEMBRI TAGĦHA, MINN NAĦA WAĦDA, U L-KOLOMBJA U L-PERÙ, MIN-NAĦA L-OĦRA
Artikolu 1
Kompożizzjoni u Presidenza
1. Is-Sottokumitat dwar il-Miżuri Sanitarji u Fitosanitarji ( is-“Sottokumitat MSF”) li huwa stabbilit skont l-Artikolu 103 tal-Ftehim Kummerċjali bejn l-Unjoni Ewropea u l-Istati Membri tagħha, minn naħa waħda, u l-Kolombja u l-Perù, min-naħa l-oħra (“il-Ftehim”) (1), għandu jwettaq id-dmirijiet tiegħu kif ipprovdut fl-Artikolu 103 tal-Ftehim u għandu r-responsabbiltà li jiżgura u jimmonitorja l-implimentazzjoni tal-Kapitolu 5 dwar il-Miżuri Sanitarji u Fitosanitarji.
2. Kif stipulat fl-Artikolu 103(2) tal-Ftehim, is-Sottokumitat MSF għandu jkun magħmul mir-rappreżentanti appuntati minn kull Parti bir-responsabbiltajiet għal kwistjonijiet sanitarji u fitosanitarji.
3. Is-Sottokumitat MSF li għandu jiġi ppresedut, fuq bażi ta' rotazzjoni, għal perjodu ta' sena minn uffiċjal għoli tal-Kummissjoni Ewropea, f'isem l-Unjoni Ewropea u l-Istati Membri tagħha, u minn uffiċjal għoli tal-Gvern Kolombjan, jew minn uffiċjal għoli tal-Gvern Peruvjan. L-ewwel perjodu ta' presidenza għandu jibda fid-data tal-ewwel laqgħa tal-Kumitat Kummerċjali u jispiċċa fil-31 ta' Diċembru tal-istess sena. Is-Sottokumitat MSF għandu jkun ippresdut mill-Parti li jkollha l-presidenza tal-Kumitat Kummerċjali.
4. Is-Sottokumitat MSF jista' jiltaqa' f'sessjonijiet fejn biss il-parti tal-UE u Pajjiż Andin firmatarju wieħed jipparteċipa, dwar kwistjonijiet li jirrelataw esklussivament ma' relazzjoni bilaterali tagħhom. Dawn is-sessjonijiet għandhom ikunu preseduti b'mod konġunt miż-żewġ Partijiet. Il-Pajjiżi Andini firmatarji l-oħra jistgħu jipparteċipaw f'dawn is-sessjonijiet soġġett għall-ftehim minn qabel tal-Partijiet kkonċernati.
5. Ir-referenza għall-Partijiet fir-Regoli ta' Proċedura hija skont id-definizzjoni stipulata fl-Artikolu 6 tal-Ftehim.
Artikolu 2
Laqgħat
1. Is-Sottokumitat MSF għandu jiltaqa' għallanqas darba fis-sena u jlaqqa' sessjonijiet speċjali fuq talba ta' xi Parti, kif stipulat fl-Artikolu 103(2) tal-Ftehim. Il-laqgħat għandu jinżammu fuq sistema ta' rotazzjoni, f'Bogota, fi Brussell u f'Lima, sakemm il-Partijiet ma jaqblux mod ieħor.
2. Kull laqgħa tas-Sottokumitat MSF għandha titlaqqgħa mill-Parti li għandha l-Presidenza f'data u f'post maqbul mill-Partijiet.
3. Is-Sottokumitat MSF jista' jiltaqa' wkoll permezz ta' konferenza vidjo u awdjo.
Artikolu 3
Delegazzjonijiet
Qabel kull laqgħa, il-Partijiet għandhom jiġu informati bil-kompożizzjoni intiża tad-delegazzjonijiet li jkunu se jattendu l-laqgħa.
Artikolu 4
Osservaturi
Is-Sottokumitat MSF jista' jiddeċiedi li jistieden osservaturi fuq bażi ad hoc.
Artikolu 5
Korrispondenza
1. Id-dokumenti tas-Sottokumitat MSF previsti fl-Artikoli 6, 7 u 8 tar-Regoli ta' Proċedura għandhom jintbagħtu lill-Presidenti tas-Sottokumitat MSF u lis-Segretarjat tal-Kumitat Kummerċjali.
2. Għal kwistjonijiet li jirrelataw esklussivament ma' relazzjoni bilaterali bejn l-UE u Pajjiż Andin firmatarju wieħed, il-korrispondenza ssir bejn dawn iż-żewġ Partijiet, filwaqt li l-pajjiżi Andini firmatarji l-oħra jinżammu informati bis-sħiħ, kif xieraq.
Artikolu 6
Aġenda għal-Laqgħat
1. Għandha titħejja aġenda provviżorja għal kull laqgħa b'mod konġunt mill-Partijiet. Din tintbagħat, flimkien mad-dokumenti rilevanti, lill-Partijiet kollha mhux aktar tard minn 14-il jum qabel il-bidu tal-laqgħa.
2. L-aġenda għandha tkun adottata mis-Sottokumitat MSF fil-bidu ta' kull laqgħa. Punti barra dawk li jidhru fl-aġenda provviżorja jistgħu jiddaħħlu fl-aġenda jekk il-Partijiet jaqblu li jsir hekk.
3. Il-President tas-Sottokumitat MSF jista', bi ftehim mal-Partijiet l-oħra, jistieden lill-esperti biex jattendu l-laqgħat tiegħu biex jipprovdu informazzjoni fuq suġġetti speċifiċi.
Artikolu 7
Minuti
1. Għandu jitħejja abbozz tal-minuti ta' kull laqgħa b'mod konġunt miż-żewġ Partijiet. L-ewwel abbozz jitħejja mill-Parti li taġixxi bħala President fi żmien wieħed u għoxrin jum wara l-għeluq tal-laqgħa.
2. Il-minuti, bħala regola ġenerali, jagħtu sommarju ta' kull punt fl-aġenda, u jispeċifikaw fejn hu applikabbli:
(a) |
id-dokumenti ppreżentati lis-Sottokumitat MSF; |
(b) |
kull dikjarazzjoni li membru tal-Kumitat Kummerċjali jitlob li tiddaħħal; u |
(c) |
id-deċiżjonijiet proposti, ir-rakkomandazzjonijiet magħmula, l-istqarrijiet mifthiema u l-konklużjonijiet adottati dwar punti speċifiċi. |
3. Il-minuti għandhom jinkludu wkoll lista tal-parteċipanti fil-laqgħa tas-Sottokumitat tal-SPS.
4. Il-minuti għandhom jiġu approvati bil-miktub mill-Partijiet fi żmien xahrejn mid-data tal-laqgħa. Ladarba approvati, għandhom jiġu ffirmati kopji mill-President u l-kontropartijiet tiegħu/tagħha tal-Partijiet l-oħra. Kull Parti għandha tirċievi kopja oriġinali ta' dawn id-dokumenti awtentiċi. Għandhom jintbagħtu kopji tal-minuti ffirmati lill-membri tal-Kumitat Kummerċjali.
Artikolu 8
Pjan ta' Azzjoni
1. Is-Sottokumitat MSF għandu jadotta pjan ta' azzjoni li jirrifletti l-azzjonijiet miftiehma mill-Partijiet waqt il-laqgħa.
2. L-implimentazzjoni mill-Partijiet tal-pjan ta' azzjoni tkun riveduta mis-Sottokumitat MSF waqt il-laqgħa tiegħu li jmiss.
Artikolu 9
Lingwi
1. Il-lingwi uffiċjali tas-Sottokumitat MSF ikunu l-lingwi uffiċjali tal-Partijiet.
2. Sakemm ma jiġix deċiż mod ieħor, is-Sottokumitat MSF għandu normalment jibbaża d-deliberazzjonijiet tiegħu fuq dokumentazzjoni u proposti mħejjija fil-lingwi msemmija fil-paragrafu 1.
Artikolu 10
Pubbliċità u Kunfidenzjalità
1. Sakemm ma jiġix deċiż mod ieħor, il-laqgħat tas-Sottokumitat MSF ma għandhomx ikunu pubbliċi.
2. Meta Parti tressaq informazzjoni meqjusa bħala kunfidenzjali skont il-liġijiet u r-regolamenti tagħha quddiem is-Sottokumitat MSF, kumitati speċjalizzati, gruppi ta' ħidma jew xi organi oħra, il-Partijiet l-oħra jittrattaw dik l-informazzjoni bħala kunfidenzjali skont ir-regoli deskritti fl-Artikolu 290(2) tal-Ftehim.
Artikolu 11
Spejjeż
1. Kull Parti għandha tieħu ħsieb kwalunkwe spejjeż li ġġarrab bħala riżultat tal-parteċipazzjoni fil-laqgħat tas-Sottokumitat MSF kemm fir-rigward tal-ispejjeż tal-istaff, tal-ivvjaġġar u tal-għajxien kif ukoll fir-rigward tal-ispejjeż tal-posta u tat-telekomunikazzjonijiet.
2. L-ispejjeż marbuta mal-organizzazzjoni tal-laqgħat u mar-riproduzzjoni tad-dokumenti, għandhom jitħallsu mill-Parti li tkun qed tospita l-laqgħa.
3. L-ispejjeż marbuta mal-interpretazzjoni fil-laqgħat u mat-traduzzjoni ta' dokumenti għall-Ispanjol jew mill-Ispanjol u għall-Ingliż jew mill-Ingliż jitħallsu mill-Parti li tkun qed tospita l-laqgħa. Interpretazzjoni u traduzzjoni għal-lingwi l-oħra jew mil-lingwi l-oħra jitħallsu mill-Parti li titlobhom.
Artikolu 12
Emenda tar-Regoli ta' Proċedura
Ir-Regoli ta' Proċedura, kif ukoll kwalunkwe emenda sussegwenti, għandhom ikunu adottati mis-Sottokumitat MSF skont l-Artikolu 103(2) tal-Ftehim.