27.6.2014   

MT

Il-Ġurnal Uffiċjali tal-Unjoni Ewropea

L 188/85

(1)

L-Anness I tad-Direttiva 98/8/KE tal-Parlament Ewropew u tal-Kunsill (2) fih il-lista tas-sustanzi attivi li huma approvati fil-livell tal-Unjoni għall-użu fil-prodotti bijoċidali. Bid-Direttiva tal-Kummissjoni 2008/79/KE (3), is-sustanza attiva IPBC għall-użu fi prodotti li huma prodotti tat-tip 8, preservattivi tal-injam, kif iddefiniti fl-Anness V tad-Direttiva 98/8/KE, ġiet inkluża fil-lista. Bis-saħħa tal-Artikolu 86 tar-Regolament (UE) Nru 528/2012, l-IPBC għalhekk hija sustanza attiva approvata inkluża fil-lista msemmija fl-Artikolu 9(2) ta' dak ir-Regolament.

(2)

Ir-Renju Unit awtorizza prodotti li fihom l-IPBC għal applikazzjonijiet industrijali u professjonali fuq l-injam b'immersjoni awtomatizzata permezz ta' immersjoni f'tank tal-immerjsoni li jkun fih il-preservattiv tal-injam. L-awtorizzazzjonijiet ġew sussegwentement rikonoxxuti b'mod reċiproku minn Stati Membri oħra.

(3)

L-awtorità kompetenti Ġermaniża għall-prodotti bijoċidali rċeviet applikazzjonijiet għar-rikonoxximent reċiproku ta' awtorizzazzjonijiet skont l-Artikolu 4(1) tad-Direttiva 98/8/KE għal uħud minn dawk il-prodotti (“il-prodotti kontestati”). Il-prodotti kontestati huma elenkati fl-Anness ta' din id-Deċiżjoni.

(4)

Fl-4 ta' Ottubru 2012 u fis-6 ta' Novembru 2012, il-Ġermanja nnotifikat lill-Kummissjoni, lill-Istati Membri l-oħra u lill-applikanti dwar il-proposta tagħha li jiġu ristretti l-awtorizzazzjonijiet tal-prodotti kontestati skont l-Artikolu 4(4) tad-Direttiva 98/8/KE. Il-Ġermanja pproponiet li l-prodotti għall-immersjoni awtomatizzata ma jiġux awtorizzati, billi hija tikkunsidra li l-prodotti ma jissodisfawx ir-rekwiżiti tal-Artikolu 5(1) tad-Direttiva 98/8/KE fir-rigward ta' effetti fuq is-saħħa tal-bniedem f'ċirkustanzi bħal dawn. Skont in-notifiki, il-Ġermanja identifikat xi tħassib fir-rigward tal-esponiment tal-ġilda tal-utenti professjonali għall-IPBC meta l-prodotti jiġu applikati bl-immersjoni awtomatizzata. Dawn kienu ta' rilevanza partikolari għall-Ġermanja, fejn proporzjon sinifikanti ta' stabbilimenti li jużaw dan il-metodu ta' applikazzjoni huma rrappurtati li għandhom livell baxx ta' awtomatizzazzjoni, u għalhekk probabbiltà għolja ta' kuntatt mal-ġilda b'injam trattat jew superfiċji kontaminati.

(5)

Għal kull notifika, il-Kummissjoni stiednet lill-Istati Membri l-oħra u lill-applikanti jressqu l-kummenti tagħhom bil-miktub fi żmien 90 jum skont l-Artikolu 27(1) tad-Direttiva 98/8/KE. Bosta Stati Membri, kif ukoll l-applikanti, bagħtu l-kummenti tagħhom qabel l-iskadenza. In-notifiki ġew diskussi wkoll bejn il-Kummissjoni u l-Awtoritajiet Kompetenti tal-Istati Membri għall-prodotti bijoċidali u, fejn kien il-każ, waqt il-laqgħat tal-applikanti, fil-Grupp li jiffaċilita l-Awtorizzazzjoni tal-Prodotti u r-Rikonoxximent Reċiproku u tal-Grupp ta' Koordinazzjoni msemmi fl-Artikolu 35 tar-Regolament (UE) Nru 528/2012.

(6)

Minn dawn id-diskussjonijiet u mill-kummenti li waslu, irriżulta li l-mudelli eżistenti biex jiġi vvalutat l-esponiment tal-bniedem għall-proċessi ta' immersjoni għandhom jiġu adattati. Il-mudelli adattati għall-valutazzjoni tal-esponiment tal-operaturi professjonali involuti fit-trattament industrijali tal-injam bl-immersjoni kompletament awtomatizzata ġew żviluppati mill-Grupp ta' Esperti Dwar l-Esponiment tal-Bniedem, li l-opinjoni tiegħu kienet ġiet approvata fil-Laqgħa Teknika dwar il-Bijoċidi bejn is-16 u l-20 ta' Settembru 2013 (4). Il-mudelli adattati juru li, fejn il-prodotti kontestati jintużaw fi proċessi kompletament awtomatizzati, l-esponiment tal-operaturi professjonali għall-IPBC mhuwiex mistenni li jkollu effetti inaċċettabbli għas-saħħa tal-bniedem fi ħdan it-tifsira tal-Artikolu 5(1) tad-Direttiva 98/8/KE.

(7)

Konsegwentement, il-prodotti kontestati għandhom ikunu awtorizzati skont l-istruzzjonijiet fuq it-tikketta li jirrestrinġu l-użu għall-immersjoni kompletament awtomatizzata.

(8)

Ir-Regolament (UE) Nru 528/2012 japplika għall-prodotti kontestati skont id-dispożizzjonijiet tal-Artikolu 92(2) ta' dak ir-Regolament. Billi l-bażi legali ta' din id-Deċiżjoni hija l-Artikolu 36(3) ta' dak ir-Regolament, din id-Deċiżjoni għandha tiġi indirizzata lill-Istati Membri kollha skont l-Artikolu 36(4) tar-Regolament (UE) Nru 528/2012.

(9)

Il-miżuri previsti f'din id-Deċiżjoni huma skont l-opinjoni tal-Kumitat Permanenti dwar il-Prodotti Bijoċidali,