11.6.2014 |
MT |
Il-Ġurnal Uffiċjali tal-Unjoni Ewropea |
L 170/3 |
DEĊIŻJONI TAL-KUNSILL
tal-24 ta' Marzu 2014
dwar l-iffirmar, f'isem l-Unjoni Ewropea, u l-applikazzjoni proviżorja tal-Ftehim dwar il-parteċipazzjoni tar-Repubblika tal-Kroazja fiż-Żona Ekonomika Ewropea, u tat-tliet ftehimiet relatati
(2014/343/UE)
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-Artikolu 217 flimkien mal-Artikolu 218(5) u t-tieni subparagrafu tal-Artikolu 218(8) tiegħu,
Wara li kkunsidra l-Att ta' Adeżjoni tar-Repubblika tal-Kroazja, u b'mod partikolari l-Artikolu 6(2) u 6(5) tiegħu,
Wara li kkunsidra l-proposta tal-Kummissjoni Ewropea,
Billi:
(1) |
Il-Ftehim dwar iż-Żona Ekonomika Ewropea (1) ("il-Ftehim ŻEE") kien iffirmat f'Oporto fit-2 ta' Mejju 1992. |
(2) |
Ir-Repubblika tal-Kroazja saret Stat Membru tal-Unjoni Ewropea fl-1 ta' Lulju 2013. |
(3) |
Wara l-adeżjoni tagħha mal-Unjoni Ewropea, ir-Repubblika tal-Kroazja applikat sabiex issir Parti Kontraenti fil-Ftehim ŻEE, skont l-Artikolu 128 tiegħu. |
(4) |
Għalhekk, il-Kummissjoni nnegozjat, f'isem l-Unjoni u l-Istati Membri tagħha, mal-Islanda, il-Prinċipat ta' Liechtenstein, ir-Renju tan-Norveġja l-Ftehim dwar il-parteċipazzjoni tar-Repubblika tal-Kroazja fiż-Żona Ekonomika Ewropea (“il-Ftehim”) u tliet Protokolli Addizzjonali relatati, jiġifieri (a) il-Protokoll Addizzjonali għall-Ftehim bejn ir-Renju tan-Norveġja u l-Unjoni Ewropea dwar Mekkaniżmu Finanzjarju Norveġiż għall-perjodu 2009-2014 b'konsegwenza tal-parteċipazzjoni tar-Repubblika tal-Kroazja fiż-Żona Ekonomika Ewropea, (b) il-Protokoll Addizzjonali għall-Ftehim bejn il-Komunità Ekonomika Ewropea u l-Islanda b'konsegwenza tal-adeżjoni tar-Repubblika tal-Kroazja mal-Unjoni Ewropea u (c) il-Protokoll Addizzjonali għall-Ftehim bejn il-Komunità Ekonomika Ewropea u r-Renju tan-Norveġja b'konsegwenza tal-adeżjoni tar-Repubblika tal-Kroazja mal-Unjoni Ewropea (“il-Protokolli relatati”). |
(5) |
Il-Ftehim u l-Protokolli relatati għandhom jiġu ffirmati u applikati fuq bażi proviżorja, sakemm jitlestew il-proċeduri għall-konklużjoni tagħhom, |
ADDOTTA DIN ID-DEĊIŻJONI:
Artikolu 1
B'dan, qed jiġi awtorizzat l-iffirmar, f'isem l-Unjoni tal-Ftehim dwar il-parteċipazzjoni tar-Repubblika tal-Kroazja fiż-Żona Ekonomika Ewropea u l-Protokolli relatati, soġġett għall-konklużjoni tagħhom.
It-testi tal-Ftehim u tal-Protokolli relatati, kif ukoll tal-Ftehimiet fil-forma ta' Skambji ta' Ittri li jikkonċernaw l-applikazzjoni proviżorja tagħhom, huma mehmuża ma' din id-Deċiżjoni.
Artikolu 2
Il-President tal-Kunsill b'dan qed jawtorizza li jaħtar persuna(i) li għandhom is-setgħa li jiffirmaw il-Ftehim u l-Protokolli relatati, kif ukoll il-Ftehimiet fil-forma ta' Skambji ta' Ittri li jikkonċernaw l-applikazzjoni proviżorja tagħhom, f'isem l-Unjoni.
Artikolu 3
Il-Ftehim u l-Protokoll Addizzjonali għall-Ftehim bejn ir-Renju tan-Norveġja u l-Unjoni Ewropea dwar Mekkaniżmu Finanzjarju Norveġiż għall-perjodu 2009-2014 b'konsegwenza tal-parteċipazzjoni tar-Repubblika tal-Kroazja fiż-Żona Ekonomika Ewropea għandhom japplikaw fuq bażi proviżorja mill-jum ta' wara d-data li fiha jkun tlesta l-aħħar Skambju ta' Ittri, sakemm jitlestew il-proċeduri għall-konklużjoni tal-Ftehim u tal-Protokoll imsemmijin.
Il-Protokoll Addizzjonali għall-Ftehim bejn il-Komunità Ekonomika Ewropea u l-Islanda b'konsegwenza tal-adeżjoni tar-Repubblika tal-Kroazja mal-Unjoni Ewropea u l-Protokoll Addizzjonali għall-Ftehim bejn il-Komunità Ekonomika Ewropea u r-Renju tan-Norveġja b'konsegwenza tal-adeżjoni tar-Repubblika tal-Kroazja mal-Unjoni Ewropea għandhom japplikaw fuq bażi proviżorja mill-ewwel jum tat-tielet xahar wara d-depożitu tal-aħħar notifika fir-rigward tal-applikazzjoni proviżorja, skont l-Artikolu 4 taż-żewġ Protokolli Addizzjonali.
Artikolu 4
Din id-Deċiżjoni tidħol fis-seħħ fil-jum tal-adozzjoni tagħha.
Magħmul fi Brussell, l-24 ta' Marzu 2014.
Għall-Kunsill
Il-President
A. TSAFTARIS