(1)

F’Diċembru 2008, Hypo Alpe Adria Group (“HGAA” jew “il-bank”) irċieva EUR 900 miljun f’Partizipationskapital (2) (kapital ta’ parteċipazzjoni) tal-Grad 1 mir-Repubblika tal-Awstrija abbażi tal-iskema Awstrijaka ta’ emerġenza għas-sostenn tal-banek (“l-iskema ta’ appoġġ finanzjarju għall-banek”) (3).

(2)

Fid-29 ta’ April 2009, l-Awstrija pprovdiet lill-Kummissjoni bi pjan ta’ vijabbiltà għall-HGAA.

(3)

Fid-deċiżjoni tagħha tat-12 ta’ Mejju 2009 fil-Kawża N 254/2009 (“id-deċiżjoni ta’ ftuħ tal-2009”) (4) il-Kummissjoni nediet proċedura ta’ investigazzjoni formali skont l-Artikolu 16 tar-Regolament tal-Kunsill Nru 659/1999 tat-22 ta’ Marzu 1999 li jippreskrivi regoli dettaljati għall-applikazzjoni tal-Artikolu 108 tat-Trattat dwar il-Funzjonament tal-Unjoni Ewropea (5), li jqajjem dubji dwar il-kompatibilità mas-suq intern tal-għajnuna għar-ristrutturar li l-Ġermanja kienet tat lill-parti interessata ewlenija ta’ HGAA, BayernLB, f’Diċembru 2008. Fl-istess deċiżjoni, il-Kummissjoni staqsiet jekk HGAA kienx bank bażikament b’saħħtu.

(4)

HGAA ġie nazzjonalizzat fit-23 ta’ Diċembru 2009. F’dan il-kuntest diversi miżuri ta’ għajnuna kienu temporanjament awtorizzati mill-Kummissjoni fid-deċiżjoni tagħha tat-23 ta’ Diċembru 2009 fil-Kawżi C 16/2009 u N 698/2009 (6) (“id-deċiżjoni ta’ salvataġġ ta’ Diċembru 2009”) fuq il-bażi tal-Artikolu 107(3)(b) tat-Trattat dwar il-Funzjonament tal-Unjoni Ewropea (“it-Trattat”) sakemm tressqet is-sottomissjoni ta’ pjan ta’ ristrutturar kredibbli għal HGAA lill-Kummissjoni. Fl-istess deċiżjoni, il-Kummissjoni estendiet il-proċedura ta’ investigazzjoni formali fir-rigward tal-miżuri addizzjonali ta’ għajnuna mogħtija mill-Awstrija lill-HGAA.

(5)

Fit-22 ta’ Ġunju 2010, il-Kummissjoni kompliet testendi l-proċedura ta’ investigazzjoni formali b’mod partikolari minħabba n-nuqqas tal-pjan rivedut ta’ ristrutturar għal HGAA, li kien ġie sottomess fis-16 ta’ April 2010, biex turi r-ritorn għall-vijabbiltà, qsim tal-piżijiet xieraq u livell suffiċjenti tat-tnaqqis tad-distorsjoni tal-kompetizzjoni. Il-Kummissjoni tawlet ukoll l-awtorizzazzjoni tal-għajnuna li kienet sabet temporanjament kompatibbli mas-suq intern fid-deċiżjoni ta’ salvataġġ ta’ Diċembru 2009, sakemm ikkonkludiet l-eżami tagħha tal-pjan ta’ ristrutturar għal HGAA (“id-deċiżjoni ta’ estensjoni tal-2010”) (7).

(6)

Fid-29 ta’ Diċembru 2010, l-Awstrija nnotifikat miżura addizzjonali għall-HGAA fil-forma ta’ garanzija ta’ assi li tammonta għal EUR 200 miljun. Din il-miżura ta’ għajnuna ġiet awtorizzata bid-Deċiżjoni tal-Kummissjoni tad-19 ta’ Lulju 2011 fil-Kawżi SA.32172 (2011/NN) u SA.32554 (2009/C) (8) (“id-deċiżjoni ta’ salvataġġ ta’ Lulju 2011”).

(7)

Fis-7 ta’ Frar 2011, il-Kummissjoni infurmat lill-Ġermanja u lill-Awstrija li l-Kawża N 698/2009 (9) dwar il-HGAA se tiġi sseparata fil-proċedura mill-Kawża C 16/2009 dwar BayernLB. Għaldaqstant, il-proċedura marbuta mal-HGAA ġiet irreġistrata fil-Kawża SA.32554 (2009/C). Din id-Deċiżjoni tikkonċerna biss il-Kawża SA.32554 (2009/C).

(8)

Fil-21 ta’ April 2011, l-Awstrija ppreżentat pjan ta’ ristrutturar ġdid għall-HGAA.

(9)

Fit-3 ta’ Diċembru 2012, l-Awstrija nnotifikat miżura ta’ għajnuna addizzjonali għall-HGAA fil-forma ta’ injezzjoni ta’ kapital permezz ta’ ishma ordinarji mir-Repubblika tal-Awstrija u garanzija mill-Istat fuq strumenti tad-dejn subordinat li għandhom jinħarġu mill-HGAA. In-notifika inkludiet katalgu ta’ impenji għall-HGAA. Dawn il-miżuri ġew awtorizzati temporanjament permezz tad-Deċiżjoni tal-Kummissjoni tal-5 ta’ Diċembru 2012 fil-Kawża SA. 32554 (2009/C) (10) (“id-deċiżjoni ta’ salvataġġ ta’ Diċembru 2012”). L-awtorizzazzjoni saret fil-kuntest ta’ ċerti impenji mogħtija mill-Awstrija. Madankollu, l-Awstrija rrispettat parti biss minn dawn l-impenji.

(10)

Fil-5 ta’ Ottubru 2012, l-Awstrija ppreżentat rikors għall-annullament tad-Deċiżjoni tal-Kummissjoni tal-25 ta’ Lulju 2012 fil-Kawża SA.28487 (C 16/2009 (ex N 254/2009) (11) (sussegwentement irtirata u mibdula bid-Deċiżjoni tal-Kummissjoni tal-5 ta’ Frar 2013 (12)) dwar BayernLB (“id-deċiżjoni ta’ BayernLB”).

(11)

Għal deskrizzjoni dettaljata tal-proċedura, issir referenza għad-deċiżjoni tal-ftuħ tal-2009, id-deċiżjoni ta’ salvataġġ ta’ Diċembru 2009, id-deċiżjoni ta’ estensjoni tal-2010, id-deċiżjoni ta’ salvataġġ ta’ Lulju 2011 u d-deċiżjoni ta’ salvataġġ 2012.

(12)

Id-diversi pjanijiet ta’ ristrutturar għall-HGAA u l-emendi tagħhom ġew diskussi bejn l-awtoritajiet Awstrijaċi u s-servizzi tal-Kummissjoni f’għadd ta’ laqgħat, konferenzi bit-telefown u skambji oħra ta’ informazzjoni bejn Lulju 2010 u Awwissu 2013.

(13)

Fid-29 ta’ Ġunju 2013, l-Awstrija nnotifikat pjan ta’ ristrutturar li stabbilixxa l-likwidazzjoni tal-HGAA li ntemmet sussugwentement bis-sottomissjoni tas-27 ta’ Awwissu 2013.

(14)

L-HGAA huwa grupp ta’ finanzjament attiv internazzjonalment u l-kwartieri ġenerali tiegħu jinsab fi Klagenfurt, Carinthia, minn fejn l-attivitajiet bankarji u ta’ lokazzjoni tiegħu inkluż stralċ jiġu kkontrollati u mmexxija minn Hypo Alpe Adria Bank-International (“HBInt”). Hypo Alpe Adria Bank-International għandu funzjonijiet ewlenin bħal grupp ta’ kontroll, grupp ta’ kontabilità, ġestjoni globali tar-riskju, kwistjonijiet legali u ta’ konformità, ġestjoni tal-likwidità, ħruġ ta’ titoli u rifinanzjament tas-sussidjarji tal-HGAA.

(15)

Fi tmiem l-2012, l-HGAA fil-karta bilanċjali kellu total globali ta’ EUR 33,8 biljun u madwar EUR 21 biljun ta’ assi mwieżna għar-riskju (“RWA”).

(16)

L-HGAA huwa 100 fil-mija proprjetà tar-Repubblika tal-Awstrija (13).

(17)

Mill-31 ta’ Diċembru 2008 l-HGAA kien preżenti permezz ta’ sussidjarji bankarji u/jew ta’ lokazzjoni fi 12-il pajjiż, jiġifieri l-Awstrija, is-Slovenja, l-Italja, il-Ġermanja, l-Ungerija, il-Bulgarija, il-Kroazja, is-Serbja, il-Bosnja-Ħerzegovina, il-Montenegro, l-Ukraina u dik li kienet ir-Repubblika Jugoslava tal-Maċedonja (“FYROM”).

(18)

Bħalissa, l-HGAA huwa attiv fl-Awstrija flimkien ma’ HBA. Huwa rrappreżentat ukoll fis-Slovenja (bl-HBS u l-kumpanija ta’ lokazzjoni HLS), il-Kroazja (bl-HBC u l-kumpanija ta’ lokazzjoni integrata HAALC), il-Bosnja-Ħerzegovina (maż-żewġ entitajiet bankarji HBFBiH u - fir-Repubblika Srpska - HBRS inkluż il-kumpanija ta’ lokazzjoni HLRS), is-Serbja (bl-HBSE) u l-Montenegro (bl-HBM) (“il-pajjiżi Ewropej tax-Xlokk (“SEE”) flimkien”).

(19)

Ġie mniedi proċess ta’ stralċ għal ħafna attivitajiet industrijali tal-bank u sussidjarji finanzjarji. L-HBI Taljan waqqaf operat ġdid sal-1 ta’ Lulju 2013. Sussidjarji oħrajn li jinsabu fi stralċ jinkludu l-kumpanija ta lokazzjoni Kroata (HLC) u l-unità fi stralċ Kroata li nħolqot minn assi bankarji trasferiti (H-ABDUCO), il-kumpanija ta’ lokazzjoni Awstrijaka (HLA), il-kumpanija ta’ lokazzjoni Ġermaniża (HLG), fil-Montenegro l-kumpanija ta’ lokazzjoni (HLM) u l-unità fi stralċ li nħolqot minn assi bankarji trasferiti (HDM), il-kumpanija ta’ lokazzjoni fl-Ungerija (HLHU), il-kumpanija ta’ lokazzjoni fil-Bulgarija (HLBG), il-kumpanija ta’ lokazzjoni fil-FYROM (HLMK), il-kumpanija ta’ lokazzjoni fl-Ukraina (HLUA), fil-Bosnja-Ħerzegovina l-kumpanija ta’ lokazzjoni HETA BIH kif ukoll l-unità fi stralċ li nħolqot minn assi bankarji trasferiti (BORA), il-kumpanija ta’ lokazzjoni HLSE u HRSE fis-Serbja, u fis-Slovenja TCK u TCV li huma żewġ entitajiet li nħolqu minn attivitajiet bankarji u ta’ lokazzjoni trasferiti u l-kumpanija ta’ lokazzjoni HLI fl-Italja (14). Il-Bank Privat Alpe Adria f’liechtenstein diġà ġie likwidat.

(20)

Il-premessi li ġejjin jipprovdu ħarsa ġenerali tal-entitajiet li għadhom attivi.

(21)

Is-sussidjarja Awstrijaka HBA toffri servizzi bankarji għall-klijenti privati, impriżi kif ukoll istituzzjonijiet. Din toffri s-servizzi klassiċi kollha ta’ bank universali. L-HBA li għandha fowkus reġjonali f’Carinthia b’fergħat fi Vjenna u Salzburg għandha sehem mis-suq nazzjonali ta’ anqas minn […] (*1) f’assi jew […] % f’depożiti.

(22)

Fis-Slovenja l-grupp huwa preżenti bil-Bank HBS (sehem mis-suq ta’ madwar […] % f’assi jew […] % f’depożiti). Il-kumpanija ta’ lokazzjoni HLS tiffoka fuq attivitajiet ta’ lokazzjoni tal-mobbli u immobbli magħżula.

(23)

L-HBC Kroat huwa bank universali (sehem mis-suq ta’ madwar […] % f’assi, […] % f’depożiti). L-HAALC hija attiva fl-operat tal-lokazzjoni u għandha sehem fis-suq ta’ madwar […] % f’volum ta’ finanzjament ġdid.

(24)

Żewġ banek differenti huma attivi fil-Bosnja-Ħerzegovina, HBRS fir-Repubblika Srpska (sehem fis-suq ta’ madwar […] % f’assi u […] % f’depożiti) u HBFBiH fil-Federazzjoni tal-Bosnja-Ħerzegovina (b’sehem fis-suq ta’ […] % f’assi). Il-kumpanija ta’ lokazzjoni HLRS, proprjetà ta’ HBRS, għandha sehem fis-suq ta’ madwar […]. % fuq volum ta’ finanzjament ġdid.

(25)

L-HBM fil-Montenegro għandu sehem fis-suq ta’ […] % f’assi. Operat ta’ lokazzjoni ġġenerat mill-bank għandu sehem fis-suq ta’ […] %.

(26)

L-HBSE Serb jiffoka fuq l-oqsma privati u tal-opearat (ishma fis-suq ta’ madwar […] % f’assi u […] % f’depożiti).

(27)

Fl-2008 l-HGAA rċieva appoġġ mill-azzjonisti tiegħu f’dan iż-żmien, BayernLB u r-Repubblika tal-Awstrija.

(28)

Meta l-HGAA ġie nazzjonalizzat huwa rċieva l-miżuri ta’ għajnuna li ġejjin:

(29)

Wara ħtieġa addizzjonali għal valwazzjoni negattiva, l-Awstrija tat garanzija tal-assi lill-HGAA li tammonta għal EUR 200 miljun mill-31 ta’ Diċembru 2010 sat-30 ta’ Ġunju 2013.

(30)

Wara deċiżjoni mill-awtorità superviżorja Awstrijaka, l-HGAA kellu jikkonforma b’żieda fil-proporzjon kapitali ta’ 12,04 % sal-31 ta’ Diċembru 2012. Għal dan l-għan, l-HGAA rċieva mingħand l-awtoritajiet Awstrijaċi

(31)

Għal deskrizzjoni dettaljata tal-bank u l-miżuri ta’ għajnuna awtorizzati sa issa, issir referenza għall-premessi minn 17 sa 19 tad-deċiżjoni tal-ftuħ, il-premessi minn 13 sa 15 u minn 27 sa 40 tad-deċiżjoni ta’ salvataġġ ta’ Diċembru 2009, il-premessi minn 15 sa 19 tad-deċiżjoni ta’ salvataġġ ta’ Lulju 2011 u l-premessi minn 10 sa 12 tad-deċiżjoni ta’ salvataġġ ta’ Diċembru 2012.

(32)

Il-proġetti tal-pjan ta’ ristrutturar għall-ħtiġijiet kapitali addizzjonali għall-perjodu 2013-2017 għall-unità fi stralċ jammontaw għal madwar EUR 2,6 biljun fil-każ bażi, EUR 4,7 biljun fil-każ pessimistiku u EUR 5,4 biljun fil-każ ta’ stress. Skont is-suppożizzjoni li l-kapital jiġi pprovdut f’forma likwida l-ħtiġijiet ta’ likwidità addizzjonali meħtieġa tal-HGAA sal-2017 jammontaw għal EUR 2,5 biljun f’każ bażiku, u huwa stmat li jilħqu EUR 3,3 biljun f’każ pessimistiku ta’ stress. (Jekk il-miżuri ma jingħatawx f’forma likwida jistgħu jkunu meħtieġa aktar miżuri ta’ likwidità).

(33)

Fuq bażi prekawzjonali l-Awstrija fittxet l-awtorizzazzjoni tal-Kummissjoni tal-miżuri tal-għajnuna mill-Istat li jistgħu jkunu meħtieġa biex jiġi ssodisfat kull kapital addizzjonali jew ħtiġijiet ta’ likwidità sabiex jintlaħqu r-rekwiżiti regolatorji kollha jew jiġi kopert it-telf. Kull kapital mogħti jkun limitat għall-ammont meħtieġ sabiex jiġu ssodisfati r-rekwiżiti kapitali minimi regolatorji li għandhom jiġu kkonfermati mill-awtorità ta’ sorveljanza kompetenti.

(34)

Qabel ma ġie nazzjonalizzat il-proprjetarji tal-HGAA kienu dawn li ġejjin: BayernLB (67,08 %), Land Carinthia permezz ta’ Kärntner Landesholding (12,42 %), Grazer Wechselseitige Versicherung AG (“GRAWE”) (20,48 %) u Mitarbeiterstiftung Hypo Alpe Adria (0,02 %).

(35)

Il-proprjetarji kollha ċedew id-drittijiet tal-azzjonisti tagħhom billi biegħu l-ishma tagħhom lill-Awstrija għall-prezz simboliku ta’ euro.

(36)

BayernLB irrinunzja għad-drittijiet tal-azzjonisti kollha tiegħu inkluż l-Ergänzungskapital (kapital tal-Grad 2) eżistenti ta’ EUR 300 miljun fl-HGAA u neħħa l-obbligu għall-HGAA li jħallas lura EUR 525 miljun ta’ linji ta’ kreditu eżistenti kien diġa ngħata (15).

(37)

Sabiex tiġi żgurata likwidità għall-HGAA, BayernLB ħareġ mill-ġdid linja ta’ likwidità li kienet intemmet f’Diċembru 2009, li tammonta għal EUR […]. Barra minn hekk, kien ġie miftiehem li l-finanzjament intragrupp eżistenti ta’ EUR […] minn BayernLB lill-HGAA jibqa’ fl-HGAA sal-31 ta’ Diċembru 2013. Għall-2014, BayernLB iħalli finanzjament li jammonta għal EUR […] fl-HGAA, u għall-2015 EUR […]. Dawn l-ammonti jiġu garantiti mill-Awstrija fil-każ li l-HGAA jiġi sseparat jew tittieħed miżura oħra ekonomikament komparabbli li ma tiżgurax il-vijabilità tal-HGAA (16).

(38)

Fl-2008 BayernLB kien diġà injetta kapital li jammonta għal EUR 700 miljun fl-HGAA, li minn dak iż-żmien ’l hawn kien ġie eżawrit kompletament minħabba li ntuża kollu biex ikopri t-telf.

(39)

GRAWE ssottoskriviet għal EUR 30 miljun ta’ kapital tal-Grad 1 (kapital ta’ parteċipazzjoni) mhux konvertibbli b’dividend ta’ 6 % fis-sena mill-2013 fil-każ ta’ profitti. Abbażi ta’ deċiżjoni mir-Repubblika tal-Awstrija fit-30 ta’ Mejju 2011, l-ammont nominali ta’ dak il-kapital tnaqqas għal EUR 9 miljun wara allokazzjoni ta’ telf.

(40)

GRAWE kkontribwixxiet wkoll EUR 100 miljun f’termini ta’ likwidità sal-31 ta’ Diċembru 2013. Il-likwidità kienet kollateralizzata kompletament (EUR 50 miljun minn bonds koperti mill-Awstrija, il-kumplament jiġifieri EUR 50 miljun b’assi oħra eliġibbli għall-ħruġ ta’ bonds koperti).

(41)

Carinthia kkontribwixxiet għall-operazzjoni ta’ salvataġġ f’Diċembru 2009 permezz ta’

(42)

It-tabella li ġejja tipprovdi ħarsa ġenerali tal-ammonti oriġinali ta’ kapital ta’ parteċipazzjoni fl-HGAA (kollha f’HBInt) u l-ammont attwali tiegħu. Għandu jitfakkar li ma hemmx drittijiet tal-vot marbutin mal-kapital ta’ parteċipazzjoni. L-ishma kollha li għandhom id-drittijiet tal-vot jinżammu mir-Repubblika tal-Awstrija.

Tabella 1

Ħarsa ġenerali tal-kapital ta’ parteċipazzjoni

(43)

L-HGAA xtara mill-ġdid diversi strumenti ibridi u kapitali oħra anqas mill-valur nominali b’mod sinifikanti jew ikkanċellahom kompletament u għalhekk żied il-bażi kapitali tiegħu: F’April 2012 l-HGAA għamel tranżazzjoni li rriżultat f’żieda tal-Grad 1 ta’ EUR 153 miljun. F’Awwissu 2012 l-HGAA kkanċella xi strumenti ibridi u b’hekk iġġenera somma ulterjuri ta’ EUR 23,5 miljun f’kapital. F’Diċembru 2012, l-HGAA offra xiri lura ta’ strumenti kapitali oħra li wassal għal profitt straordinarju ta’ EUR […].

(44)

Barra minn hekk, id-detenturi ta’ strumenti ta’ fondi proprji (kapital ta’ parteċipazzjoni u strumenti kapitali ibridi oħra) ma rċevew l-ebda dividendi dipendenti fuq il-profitt jew kupuni minħabba t-telf tal-HGAA. Għall-2009 u l-2010, l-HGAA għalhekk seta’ jżomm aktar minn EUR […].

(45)

Il-problemi tal-HGAA kienu kkawżati prinċipalment minn strateġija ta’ tkabbir agressiva msejsa fuq finanzjament irħis garantit mill-Istat.

(46)

L-HGAA ddependa wisq fuq tkabbir rapidu u rkupru fis-swieq fil-pajjiżi Ewropej tax-Xlokk. B’mod partikolari fil-perjodu mis-sena 2000 sa 2007 l-HGAA daħal f’numru kbir ta’ swieq ġodda. Bħala riżultat ta’ dan, it-total tal-karta bilanċjali tal-HGAA żdied minn EUR 9,8 biljun fil-31 ta’ Diċembru 2002 għal EUR 43,3 biljun fil-31 ta’ Diċembru 2008.

Tabella 2

L-espansjoni tal-HGAA, skont il-pajjiż u l-linja operatorja

(47)

L-istrateġija tal-espansjoni kienet possibbli permezz ta’ kostijiet ta’ finanzjament favorevoli tal-HGAA minħabba garanziji mill-Istat minn Land Carinthia (sistema ta’ garanzija favorevoli għall-istituzzjonijiet pubbliċi ta’ kreditu jew Ausfallshaftung) li żdiedu minn EUR 4,9 biljun sal-31 ta’ Diċembru 2002 għal EUR 20,7 biljun sal-31 ta’ Diċembru 2009. L-aċċess għal finanzjament irħis wassal lill-HGAA biex iwarrab il-ħolqien ta’ depożiti lokali.

(48)

Espansjoni rapida tal-karta bilanċjali fis-swieq tal-pajjiżi Ewropej tax-Xlokk, flimkien ma’ finanzjament garantit mill-Istat irħis, ġġeneraw profitti immedjati. Mill-2002 sal-2006, l-HGAA, għamel profitt kull sena ħlief fl-2004. Madankollu, il-mudell tal-operat ħeba r-riskji sottostanti ta’ deterjorament fil-kwalità tal-assi u l-finanzjament mill-ġdid, b’hekk wassal lill-bank biex iwarrab ir-rieżami adegwat u l-iżvilupp tal-proċeduri għall-kontroll intern u l-ġestjoni tar-riskju, li kienu jkunu meħtieġa biex jiġu indirizzati l-ħtiġijiet il-ġodda wara l-espansjoni. Minħabba li l-istrateġija tal-bank kienet ibbażata fuq iż-żieda fil-volum tal-operat, il-bank ħa riskji kbar, b’mod partikolari fi proġetti tal-proprjetà immobbli u s-settur tat-turiżmu, u r-riskji ekonomiċi u tal-operat ma ġewx ikkalkolati b’mod korrett. In-nuqqas ta’ mekkaniżmi ta’ kontroll adegwati wassal ukoll biex il-bank ikun vulnerabbli għal frodi, u dan wassal għal bosta investigazzjonijiet kriminali. Maż-żmien il-portafoll tiegħu ntlaqat ħażin, parzjalment minħabba nuqqas ta’ kollateralizzazzjoni xierqa, aktar u aktar b’porzjon sinifikanti ta’ self improduttiv. F’ħafna każijiet huwa diffiċli jew impossibbli biex tbigħ kollateral sottostanti, li valwazzjonijiet negattivi jkunu meħtieġa.

(49)

Barra minn hekk, il-bank ħa riskji addizzjonali ta’ rimborż, minħabba li l-parti l-kbira mill-kreditu tiegħu lil persuni privati u intrapriżi żgħar u ta’ daqs medju (SME) f’pajjiżi Ewropej tax-Xlokk kienet f’euro jew fi Frank Svizzeru. Wara r-rivalutazzjoni b’mod partikolari tal-Frank Svizzeru mqabbel mal-muniti lokali, dawn ir-riskji saru parzjalment reali.

(50)

Għalkemm fil-limiti regolatorji f’dak iż-żmien, fid-dawl tal-profil tar-riskju tiegħu li jirriżulta mill-bażi ta’ klijenti fil-mira tiegħu u tal-portafoll tal-assi, il-bank kien qed jopera b’nuqqas ta’ kapital. Dan il-fattur sar problema hekk kif is-sitwazzjoni qalbet għall-agħar. Kalkolu li jinsab fil-pjan ta’ likwidazzjoni sottomess juri li mingħajr il-miżuri ta’ għajnuna, mill-2013 il-bank xorta kien ikollu proporzjon kapitali negattiv, kemm għall-proporzjon tal-Grad 1 […] kif ukoll għall-proporzjon ta’ fondi proprji globali […]. Dak il-kalkolu huwa fittizju kieku kien hemm il-ħtieġa ta’ tnaqqis drastiku jew likwidazzjoni tal-bank anki minn qabel. Skont l-Awstrija, likwidazzjoni kien ikollha effetti ta’ stabbiltà finanzjarji sistemiċi fl-Awstrija, b’mod partikolari minħabba l-garanziji ta’ obbligazzjoni fir-responsabbiltà ta’ Land Carinthia, li setgħu nħolqu f’xenarju bħal dan, iżda wkoll f’dawk il-pajjiżi Ewropej tax-Xlokk fejn il-HGAA għandu sehem sinifikanti mis-suq.

(51)

Il-bank rrealizza tard wisq li l-mudell tal-operat tiegħu ma kienx qed jiffunzjona b’mod tajjeb u rreaġixxa bil-mod wisq, parzjalment minħabba l-istruttura kumplessa tal-grupp u d-diffikultà biex jiġi mmaniġġat grupp daqshekk kbir u eteroġenu.

(52)

Anki fil-bidu tal-[…], il-kwalità tal-assi fir-rigward ta’ operat ġdid kompliet tkun problematika u l-marġini ma kinux adegwati, meta jittieħdu f’kunisderazzjoni l-kostijiet korretti tar-riskju u l-kapital.

(53)

Pjanijiet ta’ ristrutturar ippreżentati minn qabel ma urewx il-vijabbiltà indipendenti tal-HGAA.

(54)

Barra minn hekk, fis-sottomissjonijiet tal-Awstrija li fuqhom hija bbażata din id-Deċiżjoni (17) ix-xenarji tal-każ bażi tal-pjan ta’ ristrutturar juru li r-riżultat tal-grupp jkun negattiv matul il-perjodu 2013-2017, filwaqt li ġiet stabbilita l-ħtieġa ta’ kapital addizzjonali ta’ EUR […]. Anki x-“xenarju ta’ immaniġġar”, li ma jinkludix miżuri adegwati biex jillimitaw id-distorsjonijiet potenzjali tal-kompetizzjoni, juri ritorn għal profitt żgħir (ta’ […]) biss fis-sena 2017, b’telf qabel dan. Barra minn hekk, il-kostijiet potenzjali għall-estensjonijiet tal-garanziji wara l-2013 mhumiex inklużi f’dawn il-previżjonijiet.

(55)

Fid-deċiżjoni ta’ salvataġġ ta’ Diċembru 2012 il-Kummissjoni awtorizzat il-miżuri nnotifikati mill-Awstrija fid-dawl ta’ ċerti impenji magħmula mill-Istat Membru li kienu maħsuba li jiżguraw li kemm jista’ jkun id-distorsjonijiet tal-kompetizzjoni jiġu limitati. L-impenji kellhom il-għan li jillimitaw l-attivitajiet tal-operat tal-bank, pereż. f’termini ta’ livelli ta’ dħul, kategoriji ta’ riskju tal-konsumaturi u maturitajiet, b’hekk jikkontribwixxu biex jillimitaw l-imġiba riskjuża u għalhekk il-possibbiltà ta’ espansjoni tal-operat għad-detriment tal-kompetituri.

(56)

F’Jannar 2013 l-Awstrija infurmat lill-Kummissjoni li għal raġunijiet ekonomiċi ma kienx fattibbli għall-bank li jikkonforma ma’ dawn l-impenji kollha għal xi uħud mis-sussidjarji tiegħu. Il-Kummissjoni semmiet b’mod partikolari r-restrizzjoni rigward self fil-munita barranija, ir-restrizzjoni li jiġu limitati l-finanzi pubbliċi u impenji ta’ kreditu korporattiv għall-klijenti bi klassifikazzjoni tal-kreditu ta’ […] li l-Awstrija sostniet li ma setgħux jiġu implimentati fil-pajjiżi Ewropej tax-Xlokk u, għall-HBA, ir-restrizzjoni li jiġu limitati l-impenji tal-finanzi pubbliċi biex […].

(57)

Fid-29 ta’ Ġunju 2013 l-Awstrija ppreżentat pjan ta’ likwidazzjoni li taħtu l-HGAA jiġi likwidat b’mod xieraq bil-ħin meħtieġ disponibbli biex jinbiegħu l-assi potenzjalment vijabbli filwaqt li l-kumplament tal-partijiet jitnaqqsu maż-żmien.

(58)

Skont il-pjan ta’ likwidazzjoni, it-total tal-karta bilanċjali tal-HGAA jonqos b’85 % minn EUR 43,3 biljun fit-tmiem tal-2008 għal EUR 6,56 biljun fl-2017. Fl-istess perjodu l-RWA tiegħu jonqsu b’85 % għal EUR 4,75 biljun minn EUR 32,8 biljun fit-tmiem tal-2008.

(59)

Biex tiġi implimentata din il-likwidazzjoni, pjan ta’ likwidazzjoni jippreżenta strateġija għat-tliet pilastri tal-bank, jiġifieri (i) il-bank Awstrijak (HBA), (ii) in-netwerks tal-pajjiżi Ewropej tax-Xlokk u (iii) l-parti fl-istralċ.

(60)

Il-proċess ta’ likwidazzjoni se jitmexxa mil-livell tal-grupp ċentrali, fejn sadanittant twettaq ċertu titjib fir-rigward – inter alia – tal-ġestjoni tar-riskju, ir-rappurtar, il-valwazzjoni tal-kollateral u l-proċeduri relatati mal-klassifikazzjonijiet (18).

(61)

B’mod ġenerali, il-pjan ta’ likwidazzjoni jitfa’ l-attenzjoni fuq it-tlestija tal-bejgħ tal-HBA, li diġà ġie introdott, u jżid l-importanza tan-netwerk tal-pajjiżi Ewropej tax-Xlokk bil-għan li jsir bejgħ tal-entitajiet kollha tal-pajjiżi Ewropej tax-Xlokk sa mhux aktar tard mit-30 ta’ Ġunju 2015. Għal dan il-għan, l-Awstrija tat numru ta’ impenji għal kull operat ġdid bil-għan li jiġi żgurat bilanċ adegwat tar-riskju u l-profitabbiltà sakemm l-entitajiet tal-pajjiżi Ewropej tax-Xlokk ma jkunux inbiegħu.

(62)

B’mod partikolari, l-HGAA fil-prinċipju jħallas self ipotekarju ġdid biss bi proporzjon tas-self għall-valur ta’ […] % jew ogħla, il-matriċi tal-kost tal-finanzjament intern tkun proporzjonata mas-sitwazzjoni ta’ finanzjament tal-fergħa jew sussidjarja rilevanti u […] minbarra ċerti eċċezzjonijiet, jingħata biss lill-klijenti li jkollhom […].

(63)

Fil-31 ta’ Mejju 2013 ġie ffirmat kuntratt ma’ Anadi Financial Holdings Pte Ltd għall-bejgħ tal-ishma kollha tal-HBA, u l-għeluq tat-tranżazzjoni ta’ dan il-bejgħ attwalment mistenni li jseħħ qabel il-31 ta’ Diċembru 2013 (19).

(64)

Sal-għeluq tal-bejgħ, l-HBA jkompli jiffoka fuq il-pożizzjoni tiegħu bħala bank reġjonali f’Carinthia b’fergħat fi Vjenna u Salzburg. Id-daqs tal-bank diġà tnaqqas b’mod sinifikanti u l-portafoll problematiku li jammonta għal EUR 1,99 biljun ġie trasferit qabel il-31 ta’ Diċembru 2011. Il-karta bilanċjali tal-HBA mill-31 ta’ Diċembru 2012 kienet tammonta għal EUR 4,15 biljun (filwaqt li l-karta bilanċjali sal-31 ta’ Diċembru 2008 kienet jammonta għal EUR 7,05 biljun).

(65)

L-attività tal-operat tal-pajjiżi Ewropej tax-Xlokk diġà tnaqqset b’mod sinifikanti billi ngħatat attenzjoni fuq is-swieq u l-kompetenzi ewlenin fis-Slovenja, il-Kroazja, il-Bosnja-Ħerzegovina, is-Serbja u l-Montenegro. Barra minn hekk, l-entitajiet operattivi f’dawn il-pajjiżi nħelsu permezz ta’ portafoll ta’ EUR 2,4 biljun u fl-2013 trasferiment ulterjuri tal-portafoll fl-ammont ta’ EUR […] huwa ppjanat, li jrid jiġi approvat mill-awtoritajiet superviżorji lokali. It-total tal-karta bilanċjali tat-total tan-netwerk tal-pajjiżi Ewropej tax-Xlokk jammonta għal EUR 10,11 biljun mill-31 ta’ Diċembru 2012 u se jonqos aktar għal anqas minn EUR […] wara li t-trasferiment tal-portafoll addizzjonali previst ikun intemm, li jammonta għal madwar […] % tat-total tal-karta bilanċjali meta mqabbel mal-31 ta’ Diċembru 2008 (EUR 14,8 biljun).

(66)

Barra minn hekk, kien hemm bidla fl-istrateġija tal-operat ta’ dawn l-entitajiet fil-pajjiżi Ewropej tax-Xlokk, li jimmiraw għat-titjib tal-bejgħ tagħhom, b’enfasi fuq l-operat fuq skala żgħira u fuq bl-imnut u l-SME. L-istrateġija ta’ finanzjament tagħhom qed tinbidel ukoll, minħabba li l-entitajiet tal-pajjiżi Ewropej tax-Xlokk lokali qed jiffukaw biex jiġu ffinanzjati aktar lokalment minflok jiddependu żżejjed fuq il-finanzjament ipprovdut mill-grupp. L-operat il-ġdid diġà qed jiġi ffinanzjat lokalment b’mod sħiħ.

(67)

Fis-Slovenja l-enfasi tal-attivitajiet bankarji hija fuq […] u […] l-klijenti […] bil-għan li […]. […] se jitnaqqas b’mod sinifikanti bi pjan ta’ ħruġ minn […] filwaqt li l-bank jibqa’ attiv fi […].

(68)

Fil-Kroazja l-bank jipprova […] bil-għan li […]. Għal […], l-għan huwa li jkun hemm aktar enfasi fuq […]. L-enfasi ta’ […] hija fuq […].

(69)

Fil-Bosnja-Ħerzegovina l-enfasi se tkun dejjem aktar fuq […] flimkien ma’ […] aktar stretti, […] aħjar u […]. […] se jitnaqqas b’ […] jibqa’ l-enfasi.

(70)

Fis-Serbja l-enfasi hija fuq […] bil-għan li […]. Fir-rigward […], l-enfasi hija fuq […] kif ukoll […]. Il-bank għandu l-għan li […], anki għat-twettiq ta’ portafolli.

(71)

Fil-Montenegro […] jiffoka fuq […], u fuq […].

(72)

Il-bidla fl-enfasi u l-istrateġija tal-operat tal-banek tal-pajjiżi Ewropej tax-Xlokk għandhom il-għan li jżidu l-opportunitajiet li l-entitajiet jistgħu jinbiegħu matul iż-żmien. Il-pjan ta’ likwidazzjoni jipprovdi li n-netwerk tal-pajjiżi Ewropej tax-Xlokk ikunu jistgħu jinbiegħu b’mod sħiħ jew f’partijiet sat-30 ta’ Ġunju 2015. Kull bejgħ isir permezz ta’ proċeduri ta’ bejgħ miftuħa u trasparenti fejn ix-xerrejja jkollhom l-għażla li jiksbu n-netwerk kollu jew parti minnu.

(73)

Kull parti tan-netwerk tal-pajjiżi Ewropej tax-Xlokk mhux mibjugħa sat-30 ta’ Ġunju 2015 tieqaf immedjatament milli twettaq opera ġdid u tiġi trasferita għall-unità fl-istralċ (20).

(74)

L-għan tal-unità fl-istralċ huwa li jnaqqas l-entitajiet ta’ stralċ kollha u l-portafolli malajr kemm jista’ jkun.

(75)

L-attivitajiet fl-Italja diġà jinsabu fi stralċ. L-għan huwa li jitwettaq proċess ta’ stralċ ordnat filwaqt li jiġi evitat irtirar f’daqqa ta’ depożiti (21).

(76)

Barra minn hekk, il-parti fl-istralċ tinkludi kull portafoll ieħor li ġie identifikat biex jiġi stralċjat (inklużi l-entitajiet li waqqfu l-operat il-ġdid inklużi s-sussidjarji tal-Maċedonja, l-Ukraina, il-Bulgarija, il-Ġermanja u l-Ungerija), kif ukoll l-ishma f’kumpaniji industrijali u turistiċi.

(77)

Fil-qosor, il-parti fl-istralċ tinkludi b’mod partikolari:

(78)

Sal-2017, il-ħtiġijiet kapitali kumulattivi stmati (l-aktar minħabba l-valwazzjoni negattiva tal-valur kontabilistiku tal-entitajiet li jridu jinbiegħu, minħabba aktar telf fuq portafolli differenti u minħabba l-ħtieġa ta’ rifinanzjament) jammontaw għal madwar EUR 2,6 biljun f’każ bażi u sa EUR 5,4 biljun f’każ pessimistiku ta’ stress negattiv. Il-pjan ta’ likwidazzjoni jassumi wkoll ħtiġijiet ta’ likwidità addizzjonali skont jekk il-kapital jiġix provdut fi flus jew permezz ta’ garanzija. Skont is-suppożizzjoni li l-kapital jiġi provdut f’forma likwida, il-ħtiġijiet ta’ likwidità addizzjonali meħtieġa tal-HGAA sal-2017 jammontaw għal EUR 2,5 biljun f’każ bażiku, u huwa stmat li jilħqu EUR 3,3 biljun f’każ pessimistiku ta’ stress (23).

(79)

Madankollu, minħabba li skont l-Awstrija għażliet differenti għadhom qed jiġu eżaminati għall-parti fl-istralċ, dawn l-estimi jistgħu jinbidlu. Pereżempju, l-Awstrija ddikjarat li qed tanalizza l-għażla li twaqqaf kumpanija maniġerjali tal-assi (“KMA”), li tippermetti lill-HGAA biex jittrasferixxi l-assi ta’ stralċ lil dik l-entità, li toperaw mingħajr liċenzja bankarja. Trasferiment bħal dan jaffettwa l-perjodu ta’ żmien li fih il-kapital ikunu meħtieġ.

(80)

L-Awstrija ddeċidiet li tiżgura li pjan ta’ likwidazzjoni mressaq fid-29 ta’ Ġunju 2013, kif emendat l-aħħar mill-komunikazzjoni tal-Awstrija tas-27 ta’ Awwissu 2013, jiġi implimentat b’mod sħiħ, inklużi l-impenji stabbiliti fl-Anness, u skont l-iskeda stipulata f’dan l-Anness.

(81)

Il-Kummissjoni tfakkar li tat bidu għall-proċedura ta’ investigazzjoni formali skont l-Artikolu 108(2) tat-Trattat rigward il-kumpatibbiltà tal-għajnuna għar-ristrutturar għall-HGAA mas-suq intern minħabba li kellha dubji serji, abbażi tal-pjanijiet għar-ristrutturar ippreżentati minn qabel, jekk l-HGAA jkunx jista’ jirrestawra mill-ġdid il-vijabbiltà fit-tul tiegħu. Il-Kummissjoni kienet esprimiet ukoll dubji dwar jekk kienx hemm kondiviżjoni tal-piżijiet b’mod xieraq u d-distorsjonijiet tal-kompetizzjoni kinux limitati biżżejjed.

(82)

Il-Kummissjoni ripetutament esprimiet tħassib dwar il-kapaċità tal-HGAA li jirrestawra mill-ġdid il-vijabbiltà tiegħu (24), u semmiet dubji serji b’mod ċar fir-rigward tal-mudell tal-operat (25). Il-Kummissjoni qajmet ukoll dubji dwar jekk l-HGAA jkunx kapaċi jħallas il-kapital tiegħu b’mod suffiċjenti, li huwa prerekwiżit għal bank biex jitqies li huwa vijabbli (26). Fid-deċiżjoni ta’ salvataġġ tagħha ta’ Diċembru 2009, il-Kummissjoni diġà talbet lill-Istat Membru biex jikkunsidra l-għażla ta’ stralċ tal-bank b’mod ordnat (27).

(83)

Fil-valutazzjoni tal-vijabbiltà, il-Kummissjoni qajmet dubji relatati b’mod partikolari mal-istrateġija ta’ finanzjament (28), il-kwalità tal-assi (29) u l-istrutturi ta’ kontroll interni (30). Fil-premessa 37 tad-deċiżjoni ta’ salvataġġ ta’ Diċembru 2012, il-Kummissjoni qajmet dubji dwar il-kwalità tal-operat il-ġdid tal-HGAA.

(84)

Rigward il-kondiviżjoni tal-piżijiet, id-deċiżjoni tal-ftuħ tal-2009 (31) u d-deċiżjoni ta’ salvataġġ ta’ Diċembru 2009 (32) jsemmu l-possibbiltà ta’ nuqqas ta’ kondiviżjoni tal-piżijiet bejn BayernLB u l-proprjetarji preċedenti tal-HGAA (GRAWE u Land Carinthia). Id-deċiżjoni tal-ftuħ tal-2009 fil-premessa 102 ssemmi nuqqas ta’ kondiviżjoni tal-piżijiet fost il-proprjetarji kapitali ibridi tal-HGAA.

(85)

Il-premessa 41 tad-deċiżjoni ta’ estensjoni tal-2010 tikkontesta jekk il-kapital injettat fl-HGAA mill-Awstrija skont il-kundizzjonijiet tal-iskema Awstrijaka huwiex imħallas b’mod suffiċjenti minħabba li l-bank kien ikkunsidrat bħala fundamentalment b’saħħtu mill-Awstrija u għalhekk ibbenefika minn rati ta’ rimunerazzjoni bi prezz aktar baxx milli kieku kien ikkunsidrat bħala bank f’diffikultà.

(86)

Dwar id-distorsjonijiet tal-kompetizzjoni, il-Kummissjoni, abbażi tal-pjanijiet preċedenti mressqa mill-Awstrija, staqsiet jekk il-limitu tat-tnaqqis tad-daqs tal-bilanċ ikunx suffiċjenti (33) u ripetutament sejħet għal miżuri biex jiġu indirizzati d-distorsjonijiet tal-kompetizzjoni (34). Fid-dawl tal-ammont ta’ għajnuna li dejjem tiżdied il-Kummissjoni ripetutament sejħet għal miżuri addizzjonali biex jiġu indirizzati d-distorsjonijiet tal-kompetizzjoni (35).

(87)

Ma waslu l-ebda kummenti mingħand partijiet interessati.

(88)

Il-kummenti tal-Awstrija jiffokaw l-aktar dwar it-trattament tal-Kummissjoni tal-għajnuna mill-Istat lil BayernLB. Fid-Deċiżjoni tagħha tal-25 ta’ Lulju 2012 fil-Kawża SA. 28487 (C16/2009) (36) dwar l-għajnuna għar-ristrutturar lil BayernLB, il-Kummissjoni kkonkludiet li l-garanzija mir-Repubblika tal-Awstrija fuq il-likwidità tammonta għal EUR 2,638 biljun li BayernLB, fil-kuntest tal-operazzjoni ta’ salvataġġ tal-2009, qabel li titħalla fl-HGAA, kienet tikkostitwixxi f’għajnuna mill-Istat għall-benefiċċju ta’ BayernLB u sussegwentement awtorizzat il-miżura ta’ għajnuna minħabba li hija kompatibbli mas-suq intern. Fil-5 ta’ Ottubru 2012, l-Awstrija ressqet rikors għal annullament (37) kontra din id-deċiżjoni, bl-argument b’mod partikolari li l-Kummissjoni kienet naqset milli turi għaliex il-miżura għandha tiġi kkunsidrata bħala kompatibbli mas-suq intern u sosniet li l-miżura ma tikkostitwixxix għajnuna għall-benefiċċju ta’ BayernLB.

(89)

L-Awstrija timpenja ruħha li tiżgura li l-impenji stabbiliti fl-Anness jiġu mħarsa b’mod sħiħ.

(90)

Skont l-Artikolu 107(1) tat-Trattat, kull għajnuna mogħtija minn Stat Membru jew permezz ta’ riżorsi tal-Istat f’kull forma li tfixkel jew thedded li tfixkel il-kompetizzjoni billi tiffavorixxi ċerti impriżi jew il-produzzjoni ta’ ċerti oġġetti tkun inkompatibbli mas-suq intern, jekk taffettwa l-kummerċ bejn l-Istati Membri.

(91)

Il-kwalifikazzjoni ta’ miżura bħala għajnuna mill-Istat tirrikjedi li dawn il-kundizzjonijiet jiġu ssodisfati: (i) il-miżura trid tiġi ffinanzjata permezz ta’ riżorsi tal-Istat; (ii) il-miżura għandha tagħti vantaġġ responsabbli biex tiffavorixxi ċerti impriżi jew il-produzzjoni ta’ ċerti oġġetti; (iii) dak il-vantaġġ irid ikun selettiv; u (iv) il-miżura trid tfixkel jew thedded li tfixkel il-kompetizzjoni u jkollha l-potenzjal li taffettwa l-kummerċ bejn l-Istati Membri. Dawn il-kundizzjonijiet li huma kumulattivi, iridu jkunu kollha preżenti qabel ma l-miżura tiġi kkaratterizzata bħala għajnuna mill-Istat.

(92)

Il-premessi minn 51 sa 56 tad-deċiżjoni li tapprova l-iskema ta’ appoġġ finanzjarju għall-banek jikkonfermaw li kull miżura mogħtija fil-kuntest ta’ din l-iskema tikkostitwixxi għajnuna mill-Istat. Barra minn hekk, il-Kummissjoni tfakkar li hija diġà stabbilit fil-premessi minn 48 sa 53 tad-deċiżjoni ta’ salvataġġ tal-2009, il-premessa 25 tad-deċiżjoni ta’ salvataġġ ta’ Lulju 2011 u l-premessa 16 tad-deċiżjoni ta’ salvataġġ ta’ Diċembru 2012 li l-kundizzjonijiet stipulati fl-Artikolu 107(1) tat-Trattat jiġu ssodisfati għall-miżuri ta’ għajnuna elenkati f’a) u b) u li għalhekk dawn il-miżuri jikkostitwixxu għajnuna. Il-Kummissjoni ssostni l-fehma tagħha kif jiġi spjegat hawn taħt.

(93)

Il-miżuri kollha mogħtija bl-iskema ta’ appoġġ finanzjarju għall-banek, jiġifieri rikapitalizzazzjoni ta’ EUR 900 miljun u l-garanziji ta’ EUR 1,35 biljun li ġew riċevuti fl-2008, jikkostitwixxu għajnuna kif stabbilit fil-premessi minn 51 sa 56 tad-deċiżjoni li japprovaw din l-iskema.

(94)

Minbarra l-iskema ta’ appoġġ finanzjarju għall-banek, l-Awstrija awtorizzat rikapitalizzazzjoni ta’ EUR 450 miljun, garanzija tal-assi ta’ EUR 100 miljun (li sadanittant intemmet), garanzija tal-assi ta’ EUR 200 miljun, żieda tal-kapital ta’ EUR 500 miljun fil-forma ta’ ishma u garanzija fuq strumenti subordinati tal-kapital tal-Grad 2 b’valur nominali ta’ EUR 1 biljun.

(95)

Kemm l-injezzjoni tal-kapital u l-garanziji jingħataw minn riżorsi tal-Istat skont it-tifsira tal-Artikolu 107(1) tat-Trattat. Dawn jingħataw lil impriża unika u, għaldaqstant, huma selettivi. Dawn jingħataw b’kundizzjonijiet li ma jkunux disponibbli għall-HGAA fis-swieq, li mhuwiex ikkontestat mill-Awstrija. Minħabba li l-HGAA huwa impriża attiva fis-settur finanzjarju, li hija miftuħa għal kompetizzjoni internazzjonali kbira, kull vantaġġ minn riżorsi tal-Istat lill-HGAA għandu l-potenzjal li jaffettwa l-kummerċ intern tal-UE u jfixkel il-kompetizzjoni. Dawn is-sejbiet kienu diġà ġew stabbiliti fil-premessa 16 tad-deċiżjoni ta’ salvataġġ ta’ Diċembru 2012 u huma kkonfermati f’din id-Deċiżjoni.

(96)

BayernLB stess ġie rikapitalizzat mill-Istat Liberu tal-Bavarja fl-2008 u uża parti mill-fondi biex jirrikapitalizza s-sussidjarja tiegħu l-HGAA. Skont il-premessa 124 tad-deċiżjoni ta’ BayernLB l-ammont sħiħ tar-rikapitalizzazzjoni mogħti mill-Istat Liberu tal-Bavarja jikkostitwixxi għajnuna lil BayernLB. Minħabba li l-ammont ta’ għajnuna f’miżura waħda ma jistax jingħadd darbtejn, il-Kummissjoni tikkonkludi li r-rikapitalizzazzjoni tal-HGAA minn BayernLB ma tikkostitwix għajnuna mill-Istat għall-benefiċċju tal-HGAA. Barra minn hekk, jidher li fiż-żmien tar-rikapitalizzazzjoni tal-HGAA BayernLB kien qed jaġixxi biex jissalvagwardja l-investiment fis-sussidjarja tiegħu, skont kunsiderazzjonijiet tal-ekonomija tas-suq, u li d-deċiżjoni tiegħu biex jirrikapitalizza l-HGAA ma tistax tiġi imputata lil Stat Membru.

(97)

L-Awstrija tfittex l-awtorizzazzjoni tal-miżuri ta’ għajnuna biex tkopri l-kapital li jista’ potenzjalment jinħoloq u l-ħtiġijiet ta’ likwidità li f’xenarju ta’ stress jistgħu jammontaw għal EUR 5,4 biljun għall-kapital u sa EUR 3,3 biljun għall-likwidità. Dawn il-miżuri ta’ għajnuna potenzjali futuri għall-istalċ tal-HGAA se jingħataw minn riżorsi tal-Istat fit-tifsira tal-Artikolu 107(1) tat-Trattat. Dawn jingħataw lil impriża unika u, għaldaqstant, huma selettivi. Minħabba li dawn jingħataw b’kundizzjonijiet li ma jkunux disponibbli għall-HGAA fis-swieq jikkostitwixxu vantaġġ. Minħabba li l-HGAA huwa impriża attiva fis-settur finanzjarju, li hija miftuħa għal kompetizzjoni internazzjonali kbira, kull vantaġġ minn riżorsi tal-Istat lill-HGAA għandu l-potenzjal li jaffettwa l-kummerċ intern tal-UE u jfixkel il-kompetizzjoni.

(98)

L-ammont totali ta’ għajnuna mogħtija mill-Awstrija lill-HGAA permezz tat-tisħiħ tal-kapital huwa ta’ EUR 3,15 biljun (li jinkludi EUR 300 miljun ta’ garanziji tal-assi li jkollhom l-istess effett bħal injezzjoni ta’ kapital). Dan l-ammont jirrappreżenta madwar 9,6 % tal-RWA tal-HGAA fl-2008. Barra minn hekk, l-HGAA rċieva ammont totali ta’ EUR 1,35 biljun f’garanziji. Barra minn hekk, l-Awstrija talbet l-awtorizzazzjoni ta’ miżuri ta’ għajnuna potenzjali li jistgħu jkunu meħtieġa biex jiġu koperti l-ħtiġijiet tal-kapital futuri fl-istralċ tal-HGAA li f’każ ta’ stress jistgħu jiżdiedu sa EUR 5,4 biljun, li jwassal għal ammont totali ta’ għajnuna f’termini ta’ kapital u garanziji tal-assi ta’ EUR 8,55 biljun li jkun daqs 26 % tal-RWA. Barra minn hekk, l-Awstrija talbet l-awtorizzazzjoni ta’ miżuri ta’ likwidità li jammontaw għal EUR 3, 3 biljun.

(99)

L-Artikolu 107(3)(b) tat-Trattat jistipula li l-għajnuna mill-Istat tista’ titqies kompatibbli mas-suq intern meta tingħata “biex tirrimedja taqlib serju fl-ekonomija ta’ Stat Membru”.

(100)

Fuq il-bażi tal-Artikolu 107(3)(b) tat-Trattat għajnuna mill-Istat tista’ tinstab kompatibbli mas-suq intern jekk tintuża biex “tirrimedja taqlib serju fl-ekonomija ta’ Stat Membru”. Minkejja l-irkupru ekonomiku bil-mod mill-bidu tal-2010, il-Kummissjoni xorta tikkunsidra li r-rekwiżiti għall-għajnuna mill-Istat li għandhom jiġu approvati skont l-Artikolu 107(3)(b) tat-Trattat jibqgħu jiġu ssodisfati minħabba l-istress persistenti fis-swieq finanzjarji. F’lulju 2013 il-Kummissjoni kkonfermat dan billi adottat il-Komunikazzjoni tal-Kummissjoni dwar l-applikazzjoni, mill-1 ta’ Awwissu 2013, tar-regoli tal-għajnuna mill-Istat biex jiġu appoġġati l-miżuri favur il-banek fil-kuntest tal-kriżi finanzjarja (38).

(101)

F’okkażjoni preċedenti l-Bank Ċentrali Awstrijak diġà kkonferma li l-HGAA kien bank b’importanza sistemika għas-suq finanzjarju fl-Awstrija u fix-Xlokk tal-Ewropa u tenna dan permezz tal-ittra tat-3 ta’ Diċembru 2012. Mingħajr il-miżuri ta’ għajnuna l-awtoritajiet superviżorji setgħu għalqu l-HGAA minħabba l-ksur tar-rekwiżiti kapitali tiegħu.

(102)

L-għeluq f’dawn il-kundizzjonijiet ta’ bank, bħall-għeluq tal-HGAA, li jitqies minn Stat Membru li jkun ta’ importanza sistemika, jista’ jaffettwa direttament is-swieq finanzjarji u b’hekk anki l-ekonomija globali ta’ Stat Membru. Fid-dawl tas-sitwazzjoni fraġli kurrenti tas-swieq finanzjarji, il-Kummissjoni għalhekk tkompli tibbaża l-valutazzjoni tagħha tal-miżuri ta’ għajnuna mill-Istat fis-settur bankarju fuq l-Artikolu 107(3)(b) tat-Trattat.

(103)

Il-miżuri kollha identifikati bħala għajnuna mill-Istat ġew ipprovduti fil-kuntest tar-ristrutturar u l-likwidazzjoni tal-HGAA. Il-Komunikazzjoni dwar ir-ritorn għall-vijabbiltà u l-valutazzjoni tal-miżuri ta’ ristrutturar fis-settur finanzjarju fil-kriżi attwali skont ir-regoli tal-għajnuna mill-Istat (39) (“Komunikazzjoni dwar ir-Ristrutturar”) tistabbilixxi r-regoli applikabbli għall-għoti tal-għajnuna għar-ristrutturar u għal-likwidazzjoni lill-istituzzjonijiet finanzjarji fil-kriżi attwali. Skont il-Komunikazzjoni dwar ir-Ristrutturar, sabiex ir-ristrutturar ta’ istituzzjoni finanzjarja fil-kuntest tal-kriżi finanzjarja attwali jkun kompatibbli mas-suq intern skont l-Artikolu 107(3)(b) tat-Trattat, għandu (i) iwassal għal ritorn għall-vijabbiltà tal-bank, (ii) jinkludi kontribuzzjoni proprja suffiċjenti mill-benefiċjarju stess (kondiviżjoni tal-piżijiet) u jiġi żgurat li l-għajnuna hija limitata għall-minimu neċessarju u (iii) jinkudi biżżejjed miżuri li jillimitaw id-distorsjoni tal-kompetizzjoni.

(104)

Kif indikat il-Kummissjoni fil-Komunikazzjoni dwar ir-Ristrutturar, l-Istat Membru għandu jipprovdi pjan ta’ ristrutturar komprensiv li juri kif l-vijabbiltà fit-tul tal-entità tiġi rrestawrata mill-ġdid mingħajr l-għajnuna mill-Istat fi żmien raġonevoli u fi żmien massimu ta’ ħames snin. Skont il-punt 13 tal-Komunikazzjoni dwar ir-Ristrutturar il-vijabbiltà fit-tul tinkiseb meta bank ikun kapaċi jikkompeti fis-suq għall-kapital bil-kapaċitajiet tiegħu stess, b’konformità mar-rekwiżiti regolatorji rilevanti. Biex bank jagħmel dan, għandu jkun kapaċi jkopri l-kostijiet kollha tiegħu u jipprovdi redditu xieraq għall-ekwità, filwaqt li jikkunsidra l-profil tar-riskju tal-bank. Il-punt 14 tal-Komunikazzjoni dwar ir-Ristrutturar jistipula li l-vijabbiltà fit-tul teħtieġ li kull għajnuna mill-Istat jew tiġi riċevuta inkella tiġi mifdija maż-żmien jew titħallas skont il-kundizzjonijiet normali tas-suq, b’hekk jiġi żgurat li kull forma ta’ għajnuna mill-Istat addizzjonali tintemm.

(105)

Il-pjanijiet ta’ ristrutturar mressqa minn qabel għall-HGAA ma wasslux għall-konklużjoni li restawr tal-vijabbiltà tal-grupp kollu huwa fattibbli.

(106)

Barra minn hekk, il-Kummissjoni tinnota li finanzjament irħis li jirriżulta mill-garanziji offruti minn Carinthia se jintemm maż-żmien u li l-proċess ta’ rkupru rapidu tal-ekonomiji tal-pajjiżi Ewropej tax-Xlokk waqaf.

(107)

Bħala riżultat, il-bank ma jistax iħallas adegwatament il-kapital tiegħu jew iħallas lura l-kapital tal-Istat u b’hekk jikseb restawr tal-vijabbiltà sa tmiem il-perjodu ta’ ristrutturar. Għaldaqstant, ma jidhirx li huwa possibbli li tiġi rrestawrata mill-ġdid il-vijabbiltà għall-HGAA fuq bażi awtonoma. Il-Kummissjoni għalhekk tikkonkludi li d-dubji tagħha fir-rigward tar-restawr tal-vijabbiltà ma ġewx solvuti.

(108)

Kif stabbilit fil-punt 9 tal-Komunikazzjoni dwar ir-Ristrutturar kull pjan ta’ ristrutturar għandu jinkludi paragun mal-għażliet alternattivi, inkluża d-diviżjoni, jew l-assorbiment minn bank ieħor. F’każ li bank ma jkunx jista’ jirrestawra l-vijabbiltà, il-pjan ta’ ristrutturar għandu jindika kif dan jista’ jiġi stralċjat b’mod ordnat. Il-punt 21 jistipula li stralċ ordnat jew l-irkant ta’ bank fallut għandhom dejjem jitqiesu f’każ li bank ma jkunx jista’ jirrestawra b’mod kredibbli l-vijabbiltà fit-tul.

(109)

L-awtoritajiet Awstrijaċi ssottomettew pjan ta’ likwidazzjoni li jipprovdi għal din it-tip ta’ strateġija għal stralċ ordnat. Il-pjan imressaq jistabbilixxi l-bejgħ tal-entitajiet operattivi, l-HBA Awstrijak (li għalih diġà ġie ffirmat kuntratt ta’ bejgħ) u n-netwerk tal-pajjiżi Ewropej tax-Xlokk, permezz ta’ proċedura miftuħa sa mhux aktar tard mill-aħħar ta’ Ġunju 2015. Il-kumplament tal-partijiet kollha jiddaħħlu fi proċess ta’ stralċ ikkontrollat u ordnat. F’dan il-kuntest l-Awstrija timpenja ruħha li mill-1 ta’ Lulju 2013 l-entità Taljana HBI ma twettaqx operat ġdid. F’każ li l-bejgħ tal-unitajiet tal-pajjiżi Ewropej tax-Xlokk operattivi ma jkunx fattibbli sat-30 ta’ Ġunju 2015, iwaqqfu wkoll l-operat il-ġdid u jiġu stralċjati. Għaldaqstant, sa mhux aktar tard mit-30 ta’ Ġunju 2015 l-HGAA mhux se jibqa’ impriża attiva fis-settur finanzjarju.

(110)

Il-bejgħ tal-entitajiet operattivi se jsir permezz ta’ proċeduri miftuħa, trasparenti u mingħajr kundizzjonijiet, li se jippermettu lill-parteċipanti tas-suq kollha interessati biex jagħmlu offerta għall-entitajiet. Proċeduri kompetittivi bħal dawn jiżguraw li l-aħjar offerta tikkostitwixxi l-prezz tas-suq, u b’hekk teskludi għajnuna lix-xerrej (40). Meta l-Kummissjoni ssib li jkun hemm għajnuna lil xerrej, il-Kummissjoni se tivvaluta l-kompatibbiltà ta’ din l-għajnuna b’mod separat.

(111)

Fir-rigward tal-kwistjoni ta’ jekk l-entitajiet li se jinbiegħu jistgħux jikkostitwixxu kontinwità ekonomika tal-HGAA u l-miżuri ta’ għajnuna jistgħu għalhekk jikkostitwixxu għajnuna lil dawn l-entitajiet, il-Kummissjoni l-ewwel tinnota li għadu mhux ċar jekk in-netwerk tal-pajjiżi Ewropej tax-Xlokk humiex se jinbiegħu kollha kemm huma lil xerrej wieħed jew jekk ix-xerrejja diversi se jakkwistaw partijiet tan-netwerk attwali.

(112)

Biex tiġi żgurata kontinwità ekonomika, dawn il-fatturi li ġejjin fost oħrajn jistgħu jiġu kkunsidrati: is-suġġett tat-trasferiment, il-prezz tat-trasferiment, l-identità tal-azzjonisti jew il-proprjetarji tal-impriża l-ġdida u tal-impriża inizjali jew il-loġika ekonomika tal-operat (41).

(113)

L-ewwel nett il-Kummissjoni tosserva li l-għajnuna mogħtija ma kinitx assenjata biex jiġu indirizzati l-problemi tal-entitajiet operattivi individwali fl-Awstrija jew tal-pajjiżi Ewropej tax-Xlokk iżda tal-HGAA bħala grupp. L-ebda mis-sussidjarji fil-pajjiżi Ewropej tax-Xlokk jew l-HBA ma jirrappreżentaw il-qalba tal-operat tal-HGAA u l-entitajiet li se jinbiegħu jirrappreżentaw biss parti tal-assi tal-HGAA. Barra minn hekk, il-mudell tal-operat tal-entitajiet li se jinbiegħu huwa differenti mill-mudell tal-operat tal-HGAA, li kien grupp bankarju internazzjonali li jiddependi fuq finanzjament irħis fil-biċċa l-kbira bbażat fuq garanziji mill-Istat minn Carinthia u jenfasizza fuq l-espansjoni rapida li tibbenefika mill-potenzjali tal-irkupru tas-swieq emerġenti. Fil-futur, il-finanzjament tas-sussidjarji tal-pajjiżi Ewropej tax-Xlokk mhux se jibqa’ dipendenti fuq garanziji mill-Istat iżda se jkun ibbażat fuq finanzjament lokali (u għalhekk aktar għali), li jkun jeħtieġ approċċ aktar prudenti fir-rigward tal-marġini u l-ġestjoni tar-riskju. Filwaqt li l-HGAA ffoka aktar fuq l-operat fuq skala kbira u l-klijenti ewlenin, l-entitajiet li se jinbiegħu se jiffokaw fuq l-operat tal-SMEs. Fil-prattika l-entitajiet li se jinbiegħu se jimmiraw lejn bażi ta’ klijenti differenti.

(114)

Barra minn hekk, il-Kummissjoni tinnota li l-bejgħ tal-entitajiet operattivi huwa mfassal biex jiġi massimizzat il-valur tal-assi tal-HGAA qabel il-likwidazzjoni fl-interess tal-kredituri tiegħu.

(115)

Abbażi tal-fatt li l-azzjonisti tal-HGAA u l-entitajiet li se jinbiegħu mhux se jkunu identiċi, u tal-loġika ekonomika tal-operat tal-bejgħ, il-Kummissjoni tqis li ladarba l-entitajiet operattivi jinbiegħu u l-HGAA ma jibqax jiffunzjona, ma jkun hemm l-ebda kontinwazzjoni tal-attività ekonomika tal-HGAA.

(116)

Il-pjan ta’ likwidazzjoni jistabbilixxi li ċerti assi se jittieħdu mill-entitajiet operattivi li għandhom jinbiegħu. Din is-separazzjoni se ttejjeb il-kapaċità ta’ finanzjament tal-entitajiet u ttejjeb il-medja tal-kwalità tal-assi tal-kumplament tal-karta bilanċjali, b’hekk tikkontribwixxi għall-kummerċjabilità tal-entitajiet rispettivi.

(117)

Il-punt 21 tal-Komunikazzjoni dwar ir-Ristrutturar jindika li l-ħolqien ta’ “bank tal-assi tajbin” awtonomu mill-assi “tajbin” flimkien mal-obbligazzjonijiet ta’ bank eżistenti jista’ jkun triq aċċettabbli lejn il-vijabbiltà, sakemm din l-entità l-ġdida ma tkunx f’pożizzjoni li twassal għal distorsjoni fil-kompetizzjoni mingħajr bżonn. F’dan ir-rigward, il-ħolqien ta’ parteċipazzjoni ta’ pajjiż Ewropew tax-Xlokk jew raggruppament ta’ ċerti assi mill-HBInt għall-parteċipazzjoni ta’ pajjiż Ewropew tax-Xlokk bil-għan li tinħoloq unità bankarja vijabbli u kummerċjabbli tkun soluzzjoni aċċettabbli (42).

(118)

Il-problema tal-kwalità tal-assi, li tirriżulta minn kemm il-portafoll tal-legati kif ukoll impenji riskjużi aktar riċenti, ma kienx possibbli li tiġi solvuta fuq bażi ta’ operat avvjat minħabba ż-żieda tal-kostijiet marbuta ma’ riskji u indeboliment. Għaldaqstant il-Kummissjoni tikkunsidra li l-pjan ta’ likwidazzjoni ppreżentat mill-Awstrija li l-assi problematiċi jiġu trasferiti dejjem aktar għall-unità ta’ stralċ huwa l-istrateġija adatta.

(119)

F’dak li jirrigwarda l-finanzjament previst fil-pjan ta’ likwidazzjoni, l-entitajiet li se jinbiegħu se jikkonċentrataw aktar fuq il-finanzjament lokali u jfittxu li jnaqqsu d-dipendenza tagħhom fuq il-finanzjament tal-operaturi pprovdut mill-HGAA. Il-Kummissjoni tilqa’ din il-bidla fl-istrateġija ta’ finanzjament. Il-Kummissjoni tinnota li se jkun hemm impenn ta’ finanzjament kontinwu mill-HGAA għall-entitajiet li se jinbiegħu.

(120)

Barra minn hekk, il-pjan ta’ likwidazzjoni jipprovdi għal tnaqqis sinifikanti fl-attivitajiet ta’ lokazzjoni tal-HGAA, li kienu sors ewlieni għall-problemi tiegħu fil-passat minħabba li attivitajiet ta’ lokazzjoni għandhom profitt relattivament baxx meta mqabbel mar-riskji tagħhom u r-rekwiżiti ta’ finanzjament. Dan it-tnaqqis se jikkontribwixxi b’mod pożittiv ukoll għall-kummerċjabilità tal-entitajiet operattivi.

(121)

Il-Kummissjoni tikkonkludi li l-vijabbiltà tal-HGAA ma tistax tiġi rrestawrata mill-ġdid u li l-istrateġija tal-istralċ ordnat għall-HGAA kif imressqa mill-Awstrija hija mezz xieraq biex jiġi trattat l-HGAA minħabba li mhuwiex possibbli li tiġi rrestawrata mill-ġdid il-vijabbiltà tal-bank.

(122)

Il-Komunikazzjoni dwar ir-Ristrutturar tindika li kontribuzzjoni adegwata mill-benefiċjarju hija meħtieġa biex l-għajnuna tiġi limitata għall-minimu u biex tiġi indirizzata d-distorsjoni tal-kompetizzjoni kif ukoll il-periklu morali. Għal dan il-għan, din tipprovdi li (i) kemm il-kostijiet tar-ristrutturar kif ukoll l-ammont ta’ għajnuna għandhom jiġu limitati u (ii) kontribuzzjoni proprja sinifikanti hija meħtieġa.

(123)

Il-Komunikazzjoni dwar ir-Ristrutturar tipprovdi wkoll li, sabiex l-għajnuna tinżamm limitata għall-minimu, il-bank għandu l-ewwel juża r-riżorsi proprji tiegħu biex jiffinanzja r-ristrutturar. Il-kostijiet assoċjati mar-ristrutturar għandhom mhux biss jitħallsu mill-Istat iżda wkoll minn dawk li investew fil-bank. Dan l-objettiv jinkiseb b’mod partikolari billi jiġi assorbit it-telf b’kapital disponibbli.

(124)

L-ewwel nett, l-azzjonisti preċedenti kollha tal-HGAA biegħu l-ishma tagħhom lir-Repubblika tal-Awstrija għal prezz simboliku ta’ EUR 1, li naqqas ir-riskju li l-azzjonisti preċedenti jibbenefikaw mill-miżuri ta’ għajnuna. Il-proprjetarji preċedenti pprovdew ukoll lill-HGAA b’kapital jew likwidità, li ntużaw biex jiġi kopert it-telf u tittejjeb is-sitwazzjon tal-likwidita.

(125)

Fil-perjodu ta’ żmien ta’ dan il-bejgħ l-azzjonist ewlieni tal-HGAA kien BayernLB. B’kollox, BayernLB ikkontribwixxa madwar EUR 1,5 biljun f’kapital filwaqt li rrinunzja għal aktar drittijiet tas-sjieda, anki għal possibbiltà ta’ rimunerazzjoni addizzjonali. BayernLB ikkontribwixxa wkoll madwar EUR 4,3 biljun f’likwidità lill-HGAA. Barra minn hekk, BayernLB iffaċċa telf fil-valur sinifikanti meta biegħ l-ishma tal-HGAA li jikkontribwixxi biex jiġi indirizzat il-periklu morali b’konformità mal-punt 22 tal-Komunikazzjoni dwar ir-Ristrutturar.

(126)

Il-Kummissjoni għalhekk tqis li l-ammont ta’ kondiviżjoni tal-piżijiet mill-proprjetarju preċedenti BayernLB huwa sinifikanti u xieraq.

(127)

Din il-konklużjoni mhux se tkun effettwata bl-eżitu finali tal-kawża għaddejja dwar ir-rimborż tas-self pendenti lil BayernLB. Jekk BayernLB jitlef il-kawża, l-ammont ta’ kondiviżjoni tal-piżijiet kien ikun saħansitra ogħla. Jekk BayernLB kellu jirbaħ il-kawża, l-ammont ta’ kondiviżjoni tal-piżijiet kif ivvalutat f’din id-Deċiżjoni ma jinbidilx.

(128)

Il-kontribuzzjoni ta’ GRAWE tikkonsisti kemm f’kapital kif ukoll miżuri ta’ likwidità. L-injezzjoni ta’ kapital inizjali ta’ GRAWE fl-HGAA li tammonta għal EUR 30 miljun, sadanittant tnaqqset għal madwar EUR 9 miljun permezz ta’ deċiżjoni mir-Repubblika tal-Awstrija bħala l-uniku azzjonist tal-bank li jalloka l-kapitali għal assorbiment ta’ telf (tnaqqis tal-kapital). Grawe pprovdiet ukoll likwidità lill-HGAA.

(129)

Abbażi tal-kunsiderazzjonijiet ta’ hawn fuq, il-Kummissjoni tikkonkludi li l-kondiviżjoni tal-piżijiet ta’ GRAWE hija suffiċjenti.

(130)

Fir-rigward ta’ Land Carinthia, il-Kummissjoni tosserva li Land Carinthia kkontribwixxa għal kondiviżjoni tal-piżijiet bl-injezzjoni ta’ kapital li sadanittant tnaqqset b’mod sinifikanti permezz ta’ tnaqqis tal-kapital.

(131)

Abbażi tal-kunsiderazzjonijiet ta’ hawn fuq, il-Kummissjoni tikkonkludi li l-kondiviżjoni tal-piżijiet ta’ GRAWE hija suffiċjenti.

(132)

Il-fatt li r-remunerazzjoni fuq il-kapital ta’ parteċipazzjoni għal GRAWE u Land Carinthia hija ogħla mir-remunerazzjoni għall-kapital injettat minn BayernLB huwa ġustifikat minħabba li BayernLB pprovda tip differenti ta’ strument kapitali. B’kuntrast ma’ GRAWE u Land Carinthia, BayernLB ma pprovda l-ebda kapital ta’ parteċipazzjoni, iżda sempliċement irrinunzja għad-drittijiet kollha li rriżultaw minn strumenti kapitali u xi likwidità. Għalhekk BayernLB ipprovda livell ogħla ta’ kondiviżjoni tal-piżijiet li jidher li huwa adegwat minħabba li BayernLB kien il-proprjetarju ewlieni tal-HGAA qabel l-akkwiżizzjoni tal-bank mill-Awstrija.

(133)

Kwistjoni oħra hija jekk għall-kapital ta’ parteċipazzjoni fl-HGAA mill-Awstrija skont il-kundizzjonijiet tal-iskema ta’ appoġġ finanzjarju għall-banek titħallasx rimunerazzjoni b’mod suffiċjenti. Għandu jitfakkar li skont l-iskema ta’ appoġġ finanzjarju għall-banek kien hemm żewġ rati differenti ta’ interessi li għandhom jitħallsu skont jekk il-bank li ngħata l-għajnuna kienx f’diffikultà jew fundamentalment b’saħħtu. L-HGAA kien ikkunsidrat bħala fundamentalment b’saħħtu mill-Awstrija u għalhekk ħallas rati ta’ rimunerazzjoni aktar baxxi milli kieku kien meqjus bħala bank f’diffikultà.

(134)

Dwar din il-kwistjoni, il-Kummissjoni tosserva li l-kumplament tal-kapital ta’ parteċipazzzjoni jibqa’ fl-HBInt, u b’hekk anki mal-parti fl-istralċ tal-HGAA. Minħabba li l-parti fl-istralċ ma għadhiex iżjed attiva fis-suq u l-vijabilità tal-HGAA ma tistax tiġi rrestawrata (sabiex l-HGAA jiġi likwidat), il-Kummissjoni tikkunsidra li rimunerazzjoni baxxa tista’ tiġi aċċettata fil-każ preżenti.

(135)

Alpe Adria Mitarbeiterstiftung kien l-iżgħar proprjetarju tal-HGAA b’sehem ta’ 0,02 %. Is-sehem tiegħu kien inbiegħ ukoll għal EUR 1 meta r-Repubblika tal-Awstrija kisbet HGAA f’Diċembru 2009. Minħabba t-telf komplet ta’ kull dritt tal-azzjonisti mingħajr l-ebda kunsiderazzjoni, il-Kummissjoni tikkunsidra li l-livell ta’ kondiviżjoni tal-piżijiet huwa suffiċjenti, b’mod partikolari meta jitqies id-daqs relattivament żgħir meta mqabbel mal-proprjetarji l-oħra.

(136)

Fir-rigward tad-detenturi ta’ kapital ibridu, l-HGAA ħa għadd ta’ passi biex jiżgura kondiviżjoni tal-piżijiet tagħhom billi reġa’ xtara dawn l-istrumenti taħt il-valur nominali jew ikkanċellahom għal kollox, li ġġenera effett ta’ kapital sinifikanti.

(137)

Barra minn hekk, il-Kummissjoni tinnota li ħafna strumenti kapitali ibridi kif ukoll l-istrumenti tal-kapital ta’ parteċipazzjoni jrendu biss dividendi jew ħlas tal-kupuni f’każ ta’ qligħ. Minħabba n-nuqqas ta’ profitabilità tal-bank f’dawn l-aħħar snin, id-detenturi ta’ dawn l-istrumenti ma rċevewx pagamenti bħal dawn. Barra minn hekk, fil-ġejjieni se jkun hemm restrizzjonijiet fuq dividendi u ħlas tal-kupuni. Għaldaqstant, il-Kummissjoni tikkunsidra li hemm kondiviżjoni tal-piżijiet suffiċjenti mid-detenturi ta’ dawn l-istrumenti.

(138)

Għal dawn ir-raġunijiet, il-Kummissjoni tikkonkludi li l-pjan tal-likwidazzjoni tal-HGAA jipprovdi sistema xierqa ta’ kondiviżjoni tal-piżijiet.

(139)

Fl-aħħar nett, it-Taqsima 4 tal-Komunikazzjoni dwar ir-Ristrutturar titlob li l-pjan ta’ ristrutturar jinkludi l-miżuri li jillimitaw id-distorsjonijiet tal-kompetizzjoni. Miżuri bħal dawn għandhom jitfasslu b’mod speċifiku sabiex jiġu indirizzati d-distorsjonijiet fis-swieq fejn il-benefiċjarju jopera wara r-ristrutturar. F’dan il-każ jeħtieġ li jiġi żgurat li l-entitajiet li jibqgħu attivi fis-suq qabel ma finalment jinbiegħu ma jużawx riżorsi tal-Istat riċevuti b’mod li jkun detrimentali għall-kompetituri u ma jaġixxux b’mod li jfixkel.

(140)

Għal dan il-għan, l-Awstrija tikkonforma mar-restrizzjonijiet tal-operat stabbiliti fit-Taqsima 4 tal-Anness li jiżgura li sal-bejgħ id-distorsjonijiet tal-kompetizzjoni li jirriżultaw mill-eżistenza u l-attivitajiet tal-entitajiet operattivi jinżammu kemm jista’ jkun għal minimu.

(141)

In-natura u l-forma tal-miżuri tal-kompetizzjoni jiddependu fuq żewġ kriterji: l-ewwel nett, l-ammont tal-għajnuna u l-kundizzjonijiet u ċ-ċirkustanzi li taħthom ingħatat u, it-tieni, il-karatteristiċi tas-swieq li fihom il-benefiċjarju jopera.

(142)

Il-Kummissjoni tfakkar li l-HGAA rċieva għajnuna mill-Istat li tammonta għal EUR 3,15 biljun f’kapital u garanziji tal-assi u EUR 1,35 biljun f’garanziji ta’ likwidità u, għal skopijiet tal-proċess tal-istralċ, fil-futur jista’ jirċievi għajnuna addizzjonali mill-Istat sa EUR 5,4 biljun f’kapital u EUR 3,3 biljun f’likwidità.

(143)

L-ammont totali tal-għajnuna f’kapital u garanziji tal-assi jammonta għal EUR 8,55 biljun, li huwa ekwivalenti għal madwar 26 % tal-RWA tal-HGAA ta’ EUR 32,8 biljun mill-31 ta’ Diċembru 2008. L-ammont ta’ għajnuna mogħtija huwa għalhekk kbir ħafna, li jeħtieġ miżuri xierqa.

(144)

Il-punt 35 tal-Komunikazzjoni dwar ir-Ristrutturar tistipula li l-miżuri strutturali bħalma huma żvestimenti għandhom jiffavorixxu d-dħul ta’ kompetituri filwaqt li jippermettu li l-proċess ta’ ħruġ iseħħ f’perjodu xieraq li jippreżerva l-istabbiltà finanzjarja.

(145)

Il-Kummissjoni tosserva li l-pjan ta’ likwidazzjoni jipprovdi għal stralċ ordnat li sa mhux aktar tard mit-30 ta’ Ġunju 2015 l-HGAA ma jibqax jiffunzjona bħala attur ekonomiku attiv fis-swieq u jtemm l-attivitajiet li ma jkunux inbiegħu sa dak iż-żmien.

(146)

Fir-rigward tal-attività kontinwa tal-entitajiet tal-pajjiżi Ewropej tax-Xlokk sal-bejgħ tagħhom, l-Awstrija ressqet numru ta’ impenji fir-rigward tal-operat il-ġdid li għandu jiġi segwit minn dawn l-entitajiet, biex tiġi evitata kull distorsjoni possibbli tal-kompetizzjoni fil-perjodu ta’ żmien sal-bejgħ.

(147)

F’dan ir-rigward, il-Kummissjoni partikolarment b’mod pożittiv tieħu nota tar-restrizzjonijiet tal-operat il-ġdid li l-Awstrija u l-HGAA huma impenjati fih: Wara li jitqiesu l-kostijiet tar-riskji kif ukoll tal-finanzjament redditu minimu ta’ […] % fis-sena għandu jitħallas għall-operat il-ġdid. Redittu minimu għall-operat il-ġdid jiżgura li l-entitajiet operattivi ma jidħlux fi prattiki ta’ prezzijiet kontra l-kompetizzjoni filwaqt li fl-istess ħin jikkontribwixxu għall-profittabbiltà fit-tul tagħhom. F’dan is-sens, il-bank jimpenja ruħu għal-limitazzjonijiet fuq il-maturitajiet tal-operat il-ġdid sabiex it-trasformazzjoni tal-maturità tikkontribwixxi biss b’mod limitat għall-profittabilità. […] (43) […]. Fir-rigward […], l-Awstrija pprovdiet impenn addizzjonali li jillimita […] lill-klijenti tal-operat bir-rata ta’ […] jew aħjar u volum totali ta’ mhux aktar minn EUR […]. Dan l-impenn itaffi r-riskji assoċjati mal-iżvalutazzjoni tal-munita u jillimita l-volum li fih il-bank jista’ jkun attiv f’dan is-segment tas-suq. Fil-qosor, dawn ir-restrizzjonijiet iservu kemm biex tiġi żgurata l-vijabbiltà fit-tul kif ukoll tiġi llimitata l-kapaċità kompetittiva tal-entitajiet rispettivi.

(148)

Barra minn hekk, il-Kummissjoni tosserva b’mod pożittiv l-impenji rigward ġestjoni tar-riskju msaħħa, b’mod partikolari fir-rigward tal-gradazzjoni mill-ġdid annwali tal-iskoperturi kollha ogħla minn EUR […] u l-impenn li fil-finanzi bl-imnut u pubbliċi l-bank jopera ma’ klijenti bir-rata ta’ […] (44). Dawn l-impenji jiżguraw li l-kondotta tal-operat tkun prudenti u l-entitajiet li ġew affettwati jevitaw strateġija ta’ operat riskjuża. L-operat isir b’mod li l-ħteġijiet tal-profitabbiltà jkunu bbilanċjati mal-kunsiderazzjonijiet ta’ kontroll tar-riskju meħtieġa. Fl-istess ħin, l-impenji jipprekludu wkoll strateġija ta’ espansjoni aggressiva fis-suq.

(149)

Il-Kummissjoni tosserva b’mod pożittiv l-iskop doppju tal-impenji stabbiliti fil-premessi 147 u 148. L-ewwel nett, dawn jikkontribwixxu biex iżidu l-bejgħ tal-operat minħabba li l-ebda operat riskjuż ma jitwettaq, u t-tieni nett, dawn inaqqsu d-distorsjonijiet tal-kompetizzjoni billi jirrestrinġu mġiba aggressiva, u b’hekk jillimitaw operat ġdid.

(150)

Skont il-pjan ta’ likwidazzjoni l-partijiet operattivi kollha tal-HGAA se jkunu fi stralċ jew mibjugħa. L-Awstrija pprovdiet impenn sod rigward il-bejgħ tal-HBA u n-netwerk tal-pajjiżi Ewropej tax-Xlokk (f’partijiet jew kollha flimkien) li l-bejgħ isir sat-30 ta’ Ġunju 2014 rispettivament u mhux aktar tard mit-30 ta’ Ġunju 2015. Wara din id-data, kull operat ġdid irid jieqaf u l-HGAA joħroġ mis-suq, jew għax l-attivitajiet kollha jkunu fi proċess ta’ stralċ inkella minħabba li jkunu nbiegħu lil parti terza b’mod trasparenti. Għalhekk il-bejgħ/proċess ta’ stralċ tal-HGAA jikkontribwixxi b’mod sinifikanti biex jillimita d-distorsjonijiet l-kompetizzjoni fil-kompetizzjoni li jirriżultaw mill-għajnuna, minħabba li l-HGAA se joħroġ mis-swieq.

(151)

Il-Kummissjoni tqis li s-sitwazzjoni fraġli fis-swieq finanzjarji b’mod partikolari fil-pajjiżi Ewropej tax-Xlokk tiġġustifika d-data tal-għeluq fit-tul tat-30 ta’ Ġunju 2015 għall-bejgħ tal-entitajiet f’dawn il-pajjiżi. Il-Kummissjoni tinnota li l-attivitajiet Awstrijaċi diġà nbiegħu u li jekk il-bejgħ ma jkunx kompletat sat-30 ta’ Ġunju 2014 dawn l-attivitajiet se jiġu stralċjati.

(152)

B’mod ġenerali, il-Kummissjoni tinnota li sal-2017, il-kumplament tat-total tal-karta bilanċjali u l-RWA tal-HGAA se jonqsu b’madwar 85 % (sakemm il-bejgħ ikun suċċess kif ippjanat).

(153)

Flimkien ma’ dawn il-miżuri b’ambitu wiesa’, l-Awstrija impenjat ruħha fi projbizzjoni fuq reklamar tal-għajnuna mill-Istat u projbizzjoni fuq prattiki tal-operat aggressivi. Il-Kummissjoni tilqa’ wkoll projbizzjoni fuq l-akkwiżizzjonijiet, li tiżgura li l-għajnuna mill-Istat ma tintużax biex jittieħed il-kontroll tal-kompetituri, imma għandha sservi l-iskop maħsub tagħha, jiġifieri l-finanzjament tal-proċess ta’ likwidazzjoni.

(154)

Il-Kummissjoni tilmenta dwar in-nuqqas tal-konformità kompleta tal-Awstrija mal-impenji li saru fil-qafas tad-deċiżjoni ta’ salvataġġ ta’ Diċembru 2012. Il-Kummissjoni tqis, madankollu, li ksur ta’ uħud minn dawn l-impenji li dam għal perjodu ta’ żmien limitat jiġi bbilanċjat bid-diviżjoni u l-likwidazzjoni tal-bank.

(155)

Filwaqt li jiġu kkunsidrati l-impenji u fid-dawl tal-konformità tal-kontribuzzjoni proprja u l-kondiviżjoni tal-piżijiet kif stabbilit fil-premessi minn 122 sa 138, il-Kummissjoni tqis li hemm salvagwardji biżżejjed biex tiġi llimitata d-distorsjoni potenzjali tal-kompetizzjoni minkejja l-ammont kbir ta’ għajnuna mogħtija lill-HGAA.

(156)

Fid-dawl tal-impenji meħuda mill-Awstrija jiġi konkluż li l-istrateġija ta’ stralċ hija f’konformità mal-Komunikazzjoni dwar ir-Ristrutturar, l-għajnuna għal-likwidazzjoni hija limitata għall-minimu neċessarju u d-distorsjonijiet tal-kompetizzjoni jiġu indirizzati b’mod suffiċjenti. L-għajnuna għal-likwidazzjoni hija għalhekk kompatibbli mas-suq intern skont l-Artikolu 107(3)(b) tat-Trattat,