28.12.2013 |
MT |
Il-Ġurnal Uffiċjali tal-Unjoni Ewropea |
L 353/43 |
REGOLAMENT TA’ IMPLIMENTAZZJONI TAL-KUMMISSJONI (UE) Nru 1419/2013
tas-17 ta’ Diċembru 2013
dwar l-għarfien tal-organizzazzjonijiet tal-produtturi u l-organizzazzjonijiet interprofessjonali, l-estensjoni tar-regoli tal-organizzazzjonijiet tal-produtturi u tal-organizzazzjonijiet interprofessjonali u l-pubblikazzjoni ta’ prezzijiet skattaturi kif stipulat fir-Regolament (UE) Nru 1379/2013 tal-Parlament Ewropew u tal-Kunsill dwar l-organizzazzjoni komuni tas-swieq fil-prodotti tas-sajd u tal-akkwakultura
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) Nru 1379/2013 tal-Parlament Ewropew u tal-Kunsill tal-11 ta’ Diċembru 2013 dwar l-organizzazzjoni komuni tas-swieq fil-prodotti tas-sajd u tal-akkwakultura (1), u b’mod partikolari l-Artikoli 21, 27 u 32 tiegħu,
Billi:
(1) |
Ir-Regolament (UE) Nru 1379/2013 jistipula l-għarfien tal-organizzazzjonijiet tal-produtturi u l-organizzazzjonijiet interprofessjonali, l-estensjoni tar-regoli tal-organizzazzjonijiet tal-produtturi u tal-organizzazzjonijiet interprofessjonali u l-iffissar tal-prezzijiet li jiskattaw il-mekkaniżmu tal-ħżin. |
(2) |
Jeħtieġ li jiġu speċifikati l-limiti taż-żmien, il-proċeduri u l-forma tal-applikazzjonijiet għall-għarfien u għall-irtirar tal-għarfien tal-organizzazzjonijiet tal-produtturi u l-organizzazzjonijiet interprofessjonali, u l-format, l-limiti taż-żmien u l-proċeduri biex l-Istati Membri jgħarrfu lill-Kummissjoni bid-deċiżjonijiet tagħhom li jagħtu jew jirtiraw l-għarfien. |
(3) |
Jeħtieġ li jiġu speċifikati l-format u l-proċedura tan-notifika li l-Istati Membri jridu jibagħtu lill-Kummissjoni biex jgħarrfuha dwar ir-regoli tal-organizzazzjonijiet tal-produtturi jew tal-organizzazzjonijiet interprofessjonali li beħsiebhom idaħħlu bħala regoli li jorbtu għall-organizzazzjonijiet kollha tal-produtturi jew għall-operaturi f’żona speċifika jew f’żoni speċifiċi. |
(4) |
Jeħtieġ li jiġi speċifikat il-format tal-pubblikazzjoni, min-naħa tal-Istati Membri, tal-prezzijiet skattaturi li l-organizzazzjonijiet tal-produtturi magħrufin fit-territorji tagħhom għandhom japplikaw. |
(5) |
Il-miżuri stipulati f’dan ir-Regolament huma skont l-opinjoni tal-Kumitat ta’ Eżaminazzjoni tal-prodotti tas-sajd u tal-akkwakultura, |
ADOTTAT DAN IR-REGOLAMENT:
Artikolu 1
Definizzjonijiet
Għall-iskopijiet ta’ dan ir-Regolament, għandhom japplikaw id-definizzjonijiet li ġejjin:
(a) |
“organizzazzjonijiet tal-produtturi” tfisser l-organizzazzjonijiet tal-produtturi fil-qasam tas-sajd u tal-akkwakultura u l-assoċjazzjonijiet tagħhom, stabbiliti skont l-Artikoli 6 u 9 tar-Regolament (UE) Nru 1379/2013; |
(b) |
“organizzazzjonijiet interprofessjonali” tfisser organizzazzjonijiet tal-operaturi stabbiliti skont l-Artikolu 11 tar-Regolament (UE) Nru 1379/2013. |
Artikolu 2
Il-limiti taż-żmien, il-proċeduri u l-forma tal-applikazzjonijiet għall-għarfien tal-organizzazzjonijiet tal-produtturi u tal-organizzazzjonijiet interprofessjonali
1. Fi żmien tliet xhur minn meta tasal applikazzjoni għall-għarfien skont l-Artikoli 14 u 16 tar-Regolament (UE) Nru 1379/2013, l-Istat Membru kkonċernat għandu jinforma bil-miktub lill-organizzazzjoni tal-produtturi jew lill-organizzazzjoni interprofessjonali bid-deċiżjoni tiegħu. F’każ li l-għarfien jiġi miċħud, l-Istat Membru għandu jagħti r-raġunijiet għaċ-ċaħda.
2. Il-forma tal-applikazzjonijiet għall-għarfien tal-organizzazzjonijiet tal-produtturi u tal-organizzazzjonijiet interprofessjonali għandha tkun hekk kif stabbilit fl-Anness I.
Artikolu 3
Il-limiti taż-żmien u l-proċedura għall-irtirar tal-għarfien tal-organizzazzjonijiet tal-produtturi u tal-organizzazzjonijiet interprofessjonali
Meta Stat Membru jkun beħsiebu jirtira l-għarfien ta’ organizzazzjoni tal-produtturi jew ta’ organizzazzjoni interprofessjonali skont l-Artikolu 18 tar-Regolament (UE) Nru 1379/2013, għandu jinnotifika dan lill-organizzazzjoni kkonċernata flimkien mar-raġunijiet għall-irtirar. L-Istat Membru għandu jippermetti lill-organizzazzjoni tal-produtturi jew lill-organizzazzjoni interprofessjonali kkonċernata tissottometti l-osservazzjonijiet tagħha fi żmien xahrejn.
Artikolu 4
Il-format, il-limiti taż-żmien u l-proċeduri għall-komunikazzjoni tad-deċiżjonijiet għall-għoti jew l-irtirar tal-għarfien
1. Il-format tal-komunikazzjoni, min-naħa tal-Istati Membri, lill-Kummissjoni biex jgħarrfuha bid-deċiżjonijiet tagħhom li jagħtu jew li jirtiraw l-għarfien tal-organizzazzjonijiet tal-produtturi jew tal-organizzazzjonijiet interprofessjonali skont l-Artikoli 14, 16 jew 18 tar-Regolament (UE) Nru 1379/2013 għandu jkun hekk kif stabbilit fl-Anness II.
2. L-Istati Membri għandhom jittrażmettu l-komunikazzjoni ta’ deċiżjoni msemmija fl-ewwel paragrafu fi żmien xahrejn mid-data ta’ dik id-deċiżjoni.
3. Il-komunikazzjonijiet għandhom jiġu trażmessi fil-forma ta’ fajl XML wieħed għal kull komunikazzjoni. Il-fajl XML għandu jintbagħat lill-Kummissjoni bħala dokument mehmuż fll-indirizz tal-posta elettronika funzjonali li ġej: MARE-B2@ec.europa.eu bis-suġġett “Komunikazzjoni dwar l-organizzazzjonijiet tal-produtturi jew l-organizzazzjonijiet interprofessjonali”.
Artikolu 5
Il-format u l-proċedura tan-notifika mill-Istati Membri tar-regoli li beħsiebhom idaħħlu bħala regoli li jorbtu għall-produtturi jew l-operaturi kollha.
1. Il-format tan-notifika li l-Istati Membri jridu jibagħtu lill-Kummissjoni biex jgħarrfuha dwar ir-regoli tal-organizzazzjonijiet tal-produtturi jew tal-organizzazzjonijiet interprofessjonali li beħsiebhom idaħħlu bħala regoli li jorbtu għall-produtturi jew l-operaturi kollha f’żona speċifika jew f’żoni speċifiċi, kif stipulat fl-Artikoli 22 u 23 tar-Regolament (UE) Nru 1379/2013, għandu jkun kif stabbilit fl-Anness III.
2. L-Istati Membri għandhom jibagħtu notifika lill-Kummissjoni mill-inqas xahrejn qabel id-data prevista għad-dħul fis-seħħ tal-estensjoni tar-regoli.
3. Kull modifika prevista tar-regoli li ddaħħlu bħala regoli li jorbtu għall-produtturi jew l-operaturi kollha għandhom jiġu nnotifikati f’konformità mal-paragrafi 1 u 2.
Artikolu 6
Il-format tal-pubblikazzjoni tal-prezzijiet skattaturi
Il-format tal-pubblikazzjoni, min-naħa tal-Istati Membri, tal-prezzijiet skattaturi msemmija fl-Artikolu 31(4) tar-Regolament (UE) Nru 1379/2013 għandu jkun kif stabbilit fl-Anness IV ta’ dan ir-Regolament.
Artikolu 7
Dħul fis-seħħ
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Għandu jibda japplika mill-1 ta’ Jannar 2014.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, is-17 ta’ Diċembru 2013.
Għall-Kummissjoni
Il-President
José Manuel BARROSO
(1) Ara paġna 1 ta’ dan il-Ġurnal Uffiċjali.
ANNESS I
FORMA TAL-APPLIKAZZJONIJIET GĦALL-GĦARFIEN
L-informazzjoni li għandha tiddaħħal fl-applikazzjonijiet għall-għarfien tal-organizzazzjonijiet tal-produtturi u tal-organizzazzjonijiet interprofessjonali:
(a) |
l-istatut tal-organizzazzjoni tal-produtturi jew tal-organizzazzjoni interprofessjonali; |
(b) |
ir-regoli tal-funzjonament intern skont il-prinċipji stabbiliti fl-Artikolu 17 tar-Regolament (UE) Nru 1379/2013; |
(c) |
l-ismijiet tal-persuni li għandhom is-setgħa jaġixxu għall-organizzazzjoni tal-produtturi jew l-organizzazzjoni interprofessjonali jew f’isimha; |
(d) |
evidenza li l-organizzazzjoni tal-produtturi jew l-organizzazzjoni interprofessjonali tikkonforma mal-kundizzjonijiet stabbiliti fl-Artikoli 14(1) u 16(1) tar-Regolament (UE) Nru 1379/2013, rispettivament; |
(e) |
dettalji dwar l-attivitajiet imwettqin mill-organizzazzjoni tal-produtturi jew mill-organizzazzjoni interprofessjonali, fosthom il-qasam ta’ attività u l-prodotti tas-sajd u tal-akkwakultura li għalihom qed jintalab l-għarfien. |
ANNESS II
FORMAT TAL-KOMUNIKAZZJONI TAD-DEĊIŻJONIJIET GĦALL-GĦOTI JEW L-IRTIRAR TAL-GĦARFIEN
L-informazzjoni li għandha tiddaħħal fil-komunikazzjoni, min-naħa tal-Istati Membri, lill-Kummissjoni biex jgħarrfuha bid-deċiżjonijiet tagħhom li jagħtu jew li jirtiraw l-għarfien:
Isem iż-żona |
Isem l-element (1) |
Numru massimu ta’ karattri |
Definizzjoni u kummenti |
||||
Stat Membru |
SM |
3 |
L-Istat Membru li qiegħed jikkomunika d-deċiżjoni li jagħti jew li jirtira l-għafien (il-kodiċi alfa-3 tal-ISO tiegħu) |
||||
Tip ta’ organizzazzjoni |
TO |
3 |
PO: organizzazzjoni tal-produtturi; APO: assoċjazzjoni tal-organizzazzjonijiet tal-produtturi; IBO: organizzazzjoni interprofessjonali |
||||
Numru ta’ reġistrazzjoni |
RN |
— |
In-numru li bih ġiet irreġistrata l-organizzazzjoni |
||||
Isem l-organizzazzjoni |
NO |
— |
Isem il-PO, l-APO jew l-IBO li bih ġiet irreġistrata l-organizzazzjoni |
||||
Kuntatt |
CO |
100 |
Test liberu. L-indirizz għandu jkun ċar biżżejjed biex l-organizzazzjoni tkun tista’ tiġi kkuntattjata: indirizz postali, numru tat-telefown u tal-faks, indirizz tal-posta elettronika, sit tal-Internet. |
||||
Il-qasam ta’ attività |
AA |
— |
N tfisser nazzjonali T tfisser transnazzjonali (indika l-Istati Membri l-oħra kkonċernati bil-kodiċi alfa-3 tal-ISO tagħhom) |
||||
Qasam ta’ kompetenza |
AC |
100 |
Ippreċiża qasam wieħed jew iktar minn fost dawk li ġejjin:
|
||||
Data tal-għarfien |
DR |
10 |
ssss-xx-jj |
||||
Data tal-irtirar tal-għarfien |
DW |
10 |
ssss-xx-jj fejn rilevanti |
(1) Dawn l-elementi għandhom jitqiegħdu ġol-element tal-għerq imsejjaħ “ORG”. L-ispazju tal-isem għandu jkun: urn:xeu:mare:grant-withdrawal-recognition-organisation:v1
ANNESS III
FORMAT TAN-NOTIFIKA TAL-ESTENSJONI TAR-REGOLI
L-informazzjoni li għandha tiddaħħal fin-notifika li l-Istati Membri jridu jibagħtu lill-Kummissjoni biex jgħarrfuha dwar ir-regoli li beħsiebhom jestendu:
(a) |
l-isem u l-indirizz postali tal-organizzazzjoni tal-produtturi jew tal-organizzazzjoni interprofessjonali kkonċernata; |
(b) |
l-informazzjoni kollha meħtieġa biex jintwera li l-organizzazzjoni tal-produtturi jew l-organizzazzjoni interprofessjonali hija rappreżentattiva skont l-Artikoli 22(2), 22(3) u 23(1)(a) tar-Regolament (UE) Nru 1379/2013 rispettivament; |
(c) |
ir-regoli li għandhom jiġu estiżi; |
(d) |
il-ġustifikazzjoni għall-estensjoni tar-regoli, appoġġata minn dejta xierqa u minn informazzjoni rilevanti oħra; |
(e) |
il-qasam jew l-oqsma li fihom hemm il-ħsieb li r-regoli jiddaħħlu bħala regoli li jorbtu; |
(f) |
il-perjodu tal-applikazzjoni tal-estensjoni tar-regoli; |
(g) |
id-data tad-dħul fis-seħħ. |
ANNESS IV
FORMAT TAL-PUBBLIKAZZJONI TAL-PREZZIJIET SKATTATURI
L-informazzjoni li għandha tiddaħħal fil-pubblikazzjoni, min-naħa tal-Istati Membri, tal-prezzijiet skattaturi li għandhom jiġu applikati fit-territorji tagħhom:
(a) |
il-perjodu tal-applikazzjoni tal-prezzijiet skattaturi; |
(b) |
l-Istat Membru kkonċernat; |
(c) |
fejn xieraq, l-isem tar-reġjun jew tar-reġjuni fejn japplikaw il-prezzijiet skattaturi, segwit mill-kodiċi tan-NUTS tagħhom f’konformità mar-Regolament (KE) Nru 1059/2003 tal-Parlament Ewropew u tal-Kunsill (1); |
(d) |
isem il-prodotti tas-sajd li huma soġġetti għall-iffissar tal-prezzijiet skattaturi, flimkien mal-kodiċi alfa-3 tal-FAO ta’ kull speċi; |
(e) |
għal kull speċi, il-prezz skattatur li japplika skont il-piż; |
(f) |
il-munita użata. |
(1) Ir-Regolament (KE) Nru 1059/2003 tal-Parlament Ewropew u tal-Kunsill tas-26 ta’ Mejju 2003 dwar l-istabbiliment ta’ klassifikazzjoni komuni ta’ unitajiet territorjali għall-istatistika (NUTS) (ĠU L 154, 21.6.2003, p. 1).