(1)

Fil-15 ta’ Novembru 2007, il-Kunsill adotta r-Regolament (KE) Nru 31/2008 dwar il-konklużjoni tal-Ftehim ta' Sħubija fis-settur tas-sajd bejn il-Komunità Ewropea u r-Repubblika tal-Madagaskar (1) (minn hawn ’il quddiem imsejjaħ “il-Ftehim ta’ Sħubija”).

(2)

Mill-1 ta’ Jannar 2013 huwa applikabbli provviżorjament Protokoll ġdid li jistabbilixxi l-opportunitajiet tas-sajd u l-kontribuzzjoni finanzjarja previsti fil-Ftehim ta’ Sħubija (minn hawn ’il quddiem imsejjaħ “il-Protokoll il-ġdid”). Il-Protokoll il-ġdid jagħti opportunitajiet tas-sajd lill-bastimenti tal-Unjoni fl-ilmijiet li jaqgħu taħt is-sovranità jew il-ġurisdizzjoni tal-Madagaskar fir-rigward tas-sajd. L-allokazzjoni tal-opportunitajiet tas-sajd lill-Unjoni skont il-Protokoll il-ġdid ġiet stabbilita mir-Regolament tal-Kunsill (UE) Nru 1258/2012 (2).

(3)

Fis-26 ta' Settembru 2012, il-Kumitat Konġunt, previst fil-Ftehim ta' Sħubija, evalwa l-kwistjoni tal-klieb il-baħar li jinqabdu flimkien mas-sajd immaniġġat mill-Kummissjoni għat-Tonn tal-Oċean Indjan (IOTC) u li huma s-suġġett tar-Riżoluzzjoni 05/05 tal-IOTC u li s-sajd tagħhom huwa awtorizzat fil-qafas tal-Ftehim ta' Sħubija. Din ikkonkludiet, abbażi tar-reġistrazzjonijiet tal-qabdiet, għall-perjodu mill-2007 sal-2011, tal-bastimenti tas-sajd bil-konzijiet tal-wiċċ awtorizzati li jistadu fil-qafas tal-Protokoll preċedenti tal-Ftehim ta' Sħubija, kif validati mill-istituti xjentifiċi kkonċernati, li jkun xieraq li l-qabdiet tal-klieb il-baħar minn dawn il-bastimenti jkunu limitati għal massimu ta' 200 tunnellata kull sena mill-1 ta' Jannar 2014 sal-31 ta' Diċembru 2014, u b'hekk iffriżaw il-pressjoni tas-sajd fuq l-istokkijiet tal-klieb il-baħar f'konformità mar-rakkomandazzjoni maħruġa mill-Kumitat Xjentifiku tal-IOTC.

(4)

Fid-dawl tad-diskussjonijiet li saru fi ħdan il-Kumitat Konġunt, huwa meħtieġ li jiġu limitati l-qabdiet tal-klieb il-baħar u li ssir allokazjoni ta' dawk il-qabdiet fost l-Istati Membri għall-perjodu tal-applikazzjoni tal-Protokoll il-ġdid. Ir-Regolament (UE) Nru 1258/2012 għandu għalhekk jiġi emendat.

(5)

Taħt l-Artikolu 20(5) tar-Regolament tal-Kunsill (KE) Nru 2371/2002 (3), l-Istati Membri li l-bastimenti tagħhom huma awtorizzati jistadu fil-qafas tar-Regolament (UE) Nru 1258/2012 jistgħu jiskambjaw l-opportunitajiet tas-sajd, kollha jew parzjalment, allokati lilhom fir-rigward tal-klieb il-baħar.

(6)

Jeħtieġ li dan ir-Regolament japplika mill-1 ta' Jannar 2014 'il quddiem,