REGOLAMENT TA’ IMPLIMENTAZZJONI TAL-KUMMISSJONI (UE) Nru 1063/2013

tat-30 ta’ Ottubru 2013

li jemenda r-Regolament (KEE) Nru 2454/93 li jiffissa d-dispożizzjonijiet għall-implementazzjoni tar-Regolament tal-Kunsill (KEE) Nru 2913/92 li jistabbilixxi l-Kodiċi Doganali tal-Komunità fir-rigward tal-użu tas-sistema ta’ ekwivalenza fis-settur taz-zokkor

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament tal-Kunsill (KEE) Nru 2913/92 tat-12 ta’ Ottubru 1992 li jwaqqaf il-Kodiċi Doganali tal-Komunità (1), u b’ mod partikolari l-Artikolu 247 tiegħu,

Billi:

(1)

Il-Punt 3 tal-Anness 74 għar-Regolament tal-Kummissjoni (KEE) Nru 2454/93 (2) jippermetti l-użu tas-sistema ta’ ekwivalenza bejn iz-zokkor tal-kannamieli mhux raffinat (kodiċi NM 1701 11 90 ) u zokkor tal-pitravi mhux raffinat (kodiċi NM 1701 12 90 ) bil-kundizzjoni li jinkisbu l-prodotti ta’ kumpens li jaqgħu taħt il-kodiċi NM 1701 99 10 (zokkor abjad).

(2)	Madankollu, il-punt 3 tal-Anness 74 tar-Regolament (KEE) Nru 2454/93 ma jistax jiġi applikat b’mod korrett minħabba li m’hemmx suq għal zokkor tal-pitravi mhux raffinat fl-Unjoni.

(3)	Għandha tinstab soluzzjoni li tiżgura ċertezza legali fis-settur taz-zokkor f’konnessjoni mal-użu ta’ prodotti ekwivalenti.

(4)

Iz-zokkor abjad jinkiseb normalment minn konsenja ta’ zokkor tal-pitravi fi proċess kontinwu. Iz-zokkor tal-pitravi mhux raffinat ma jiġix prodott bħala prodott separat waqt dan il-proċess u għalhekk ma jistax jitqiegħed fis-suq. Minħabba din ir-raġuni, huwa xieraq li l-użu ta’ zokkor tal-pitravi jkun permess minflok zokkor tal-pitravi mhux raffinat bħala oġġetti ekwivalenti.

(5)	Ir-rendiment taz-zokkor tal-kannamieli mhux raffinat għandu jkun ukkalkulat f’konformità mal-punt III (3) tal-Parti B tal-Anness IV għar-Regolament tal-Kunsill (KE) Nru 1234/2007 (3) minħabba li dan huwa metodu ta’ kalkolu speċifiku fis-settur taz-zokkor.

(6)	Ir-referenzi għall-kodiċi tan-Nomenklatura Magħquda (NM) fil-punt 3 tal-Anness 74 għar-Regolament (KEE) Nru 2454/93 għandhom jiġu aġġornati minħabba t-tibdil fin-NM.

(7)	Il-Punt 3 tal-Anness 74 tar-Regolament (KEE) Nru 2454/93 għandu għalhekk jiġi emendat kif xieraq.

(8)	Il-miżuri previsti f’dan ir-Regolament huma skont l-opinjoni tal-Kumitat tal-Kodiċi Doganali,

ADOTTAT DAN IR-REGOLAMENT:

Artikolu 1

Il-Punt 3 tal-Anness 74 tar-Regolament (KEE) Nru 2454/93 hu mibdul b’dan li ġej:

“3. Zokkor

Rikors għall-użu ta’ prodotti ekwivalenti huwa permess bejn iz-zokkor tal-kannamieli mhux raffinat li mhux tal-Unjoni (kodiċi NM 1701 13 90 u/jew 1701 14 90 ) u z-zokkor tal-pitravi (kodiċi NM 1212 91 80 ) bil-kundizzjoni li jinkisbu l-prodotti ta’ kumpens li jaqgħu taħt il-kodiċi NM 1701 99 10 (zokkor abjad).

Il-kwantità ekwivalenti taz-zokkor tal-kannamieli mhux raffinat ta’ kwalità standard kif definit fil-punt III tal-Parti B tal-Anness IV għar-Regolament tal-Kunsill (KE) Nru 1234/2007 (*1) tiġi kkalkolata billi ssir multiplikazzjoni tal-kwantità ta’ zokkor abjad bil-koeffiċjent 1,0869565.

Il-kwantità ekwivalenti taz-zokkor tal-kannamieli mhux raffinat ta’ kwalità standard tiġi kkalkolata billi ssir multiplikazzjoni tal-kwantità ta’ zokkor abjad b’koeffiċjent miksub billi ssir diviżjoni ta’ 100 bir-rendiment taz-zokkor tal-kannamiela mhux raffinat. Ir-rendiment ta’ zokkor tal-kannamiela mhux raffinat jiġi kkalkulat kif stabbilit fil-punt III (3) tal-parti B tal-Anness IV għar-Regolament (KE) Nru 1234/2007.

(*1) Ir-Regolament tal-Kunsill (KE) Nru 1234/2007 tat-22 ta’ Ottubru 2007 li jistabbilixxi organizzazzjoni komuni ta’ swieq agrikoli u dwar dispożizzjonijiet speċifiċi għal ċerti prodotti agrikoli (ir-Regolament dwar l-OKS Unika) (ĠU L 299, 16.11.2007, p. 1).” "

Artikolu 2

Dan ir-Regolament jidħol fis-seħħ fl-għoxrin jum wara l-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament jorbot fl-intier tiegħu u japplika direttament fl-Istati Membri kollha.

Magħmul fi Brussell, it-30 ta’ Ottubru 2013.

Għall-Kummissjoni

Il-President

José Manuel BARROSO

(1) ĠU L 302, 19.10.1992, p. 1.

(2) Ir-Regolament tal-Kummissjoni (KEE) Nru 2454/93 tat-2 ta’ Lulju 1993 li jiffissa d-dispożizzjonijiet għall-implimentazzjoni tar-Regolament tal-Kunsill (KEE) Nru 2913/92 li jistabbilixxi l-Kodiċi Doganali tal-Komunità (ĠU L 253, 11.10.1993, p. 1).

(3) Ir-Regolament tal-Kunsill (KE) Nru 1234/2007 tat-22 ta’ Ottubru 2007 li jistabbilixxi organizzazzjoni komuni ta’ swieq agrikoli u dwar dispożizzjonijiet speċifiċi għal ċerti prodotti agrikoli (ir-Regolament dwar l-OKS Unika). (ĠU L 299, 16.11.2007, p. 1).